1. Eaa te ka akakeu i to tatou tu?

 NOATU kua papetitoia tatou no tetai tuatau poto me kore tuatau roa, ka inangaro tatou pouroa i te akaari i te tu ta Iehova e mareka ana. E rauka ai te reira, ka anoanoia kia akatere i to tatou aerenga manako. Eaa te tumu? No te mea ka akakeu to tatou aerenga manako i to tatou tu. Me ka akamanako ua tatou i te au anoano tika kore, ka tuatua e ka rave rai tatou i te mea kino. (Ephe. 4:17-19) Inara, me akamanako tatou i te au mea meitaki, ka tuatua e ka rave tatou i te au mea te ka akamareka i to tatou Metua, ko Iehova.—Gala. 5:16.

2. Eaa te au uianga ta tatou ka uriuri i roto i teia atikara?

² Mei tei taikuia i roto i te atikara i mua ake, kare e rauka ia tatou i te takore takiri i te au manako kino. Inara ka rauka ia tatou i te iki kia kore e rave i te reira. I mua ake tatou ka papetito ei, ka anoanoia tatou kia akamutu i te tuatua e te rave i ta Iehova e rikarika ana. Ko te takainga puapinga rava atu teia no te kopae i te tangata taito. Inara, kia akamareka tikai ia Iehova, ka anoanoia tatou kia rave i teia akauenga: ‘Kia akatangata ou’ ia kotou uaorai. (Kolo. 3:10) I roto i teia atikara, ka pau tatou i teia nga uianga: Eaa te “akatangata ou”? Akapeea tatou me akatangata ou ia tatou e me rave ua atu rai i te reira?

3. Ia Galatia 5:22, 23, eaa te “akatangata ou,” e akapeea tetai me akatangata ou iaia?

³ Ko te “akatangata ou” ia tatou, koia oki kia aru i to Iehova aerenga manako e tona tu. Ka akatangata ou tetai tangata iaia me akaari aia i te ua o te vaerua o te Atua, e te akatika i te reira kia akakeu i tona aerenga manako,  manako ngakau e tana ka rave. (E tatau ia Galatia 5:22, 23.) Ei akaraanga, ka inangaro aia ia Iehova e Tona iti tangata. (Mata. 22:36-39) Ka vai rai tona rekareka noatu ka tupu te au manamanata. (Iako. 1:2-4) Ka akatupu aia i te ’au. (Mata. 5:9) Ka akakoromaki aia e ka takinga meitaki i tetai ke. (Kolo. 3:13) E mea inangaro nana te rave i te mea meitaki. (Luka 6:35) Ka akapapu tana e rave ra e e akarongo ketaketa tona ki roto i tona Metua i te rangi. (Iako. 2:18) Ka noo maru ua aia e ka akaari i te tu akono me timataia aia.—1 Kori. 9:25, 27; Tito 3:2.

4. Ka rauka ainei ia tatou i te akaari tatakitai i te au tu tei taikuia ia Galatia 5:22, 23? Akamārama mai.

⁴ Kia akatangata ou ia tatou, ka anoanoia tatou kia akaari i te au tu tei taikuia ia Galatia 5:22, 23, e i roto i te au irava ke o te Pipiria. * Kare tatou e akaari tatakitai i teia au tu, mei te kakau rai ta tatou ka aao tatakitai. Te tika, ka kitea katoaia teia au tu i roto i tetai e tetai. Ei akaraanga, me aroa koe i toou tangata tupu, ka akaari koe i te tu akakoromaki e te takinga meitaki kiaia. Pera katoa kia akaari i te tu meitaki, ka anoanoia te tu maru e te akono meitaki.

5. Eaa “te ngakau o te Mesia,” e eaa tatou ka apii ei no runga ia Iesu? (1 Korinetia 2:16)

⁵ E tatau ia 1 Korinetia 2:16. Kia akatangata ou ia tatou, ka anoanoia “te ngakau o te Mesia.” Te aiteanga, ka anoanoia tatou kia apii i to Iesu aerenga manako e kia aru i tona akaraanga. Kua akaari apa kore aia i te ua o te vaerua o te Atua. Mei tetai iʼo manea rai, kua akaata mai aia i te tu tikai o Iehova. (Ebe. 1:3) Me aru tatou i to Iesu aerenga manako, ka aite tatou mei iaia rai e ka akaata meitaki i tona tu.—Phili. 2:5.

6. Eaa ta tatou ka akamaara no runga i te akatangata ou?

⁶ Ka rauka ainei ia tatou i te aru i to Iesu akaraanga? Penei ka manako tatou: ‘E tu apa kore to Iesu. Kare rava au e aite mei iaia rai!’ Me manako akapera koe, e akamaara i teia. Mea mua, kua angaia koe ki te tu o Iehova e Iesu. No reira ka rauka ia koe i te aru vaitata ia raua. (Gene. 1:26)  Te rua, ko te vaerua tapu o te Atua te mana ririnui rava atu i te ao katoa. Ma te tauturu a te vaerua tapu, ka rauka ia koe te rave i te au mea kare rava e rauka i toou uaorai maroiroi. Te toru, kare a Iehova e tapapa ia koe kia akaata tikai i te ua o te vaerua. Te tika, kua akanoo to tatou Metua aroa e 1,000 mataiti kia riro mai tona au tavini i te enua nei ei aronga apa kore. (Apo. 20:1-3) Ko ta Iehova e umuumu maira ia tatou i teianei, kia tauta tatou e kia irinaki iaia no te tauturu.

7. Eaa ta tatou ka uriuri i teianei?

⁷ Akapeea tatou me aru i te akaraanga o Iesu? Ka uriuri tatou e ā tuanga o te ua o te vaerua o te Atua. Ka kite mai tatou i roto i te au tuanga tatakitai akapeea a Iesu te akaari anga i teia au tu. Ka uriuri katoa tatou i tetai au uianga ei tauturu ia tatou kia akameitaki atu i te tu o te tangata ou.

8. Akapeea a Iesu te akaari anga i te aroa?

⁸ No tona inangaro maata no Iehova, kua akaatinga a Iesu iaia uaorai no tona Metua e no tatou. (Ioa. 14:31; 15:13) Akapapu to Iesu tu oraanga i te enua nei i tona aroa maata no te tangata. I te au rā ravarai, kua akaari aia i te aroa e te takinga meitaki noatu kua patoiia aia. Akaari katoa aia i tona aroa no te tangata na te apii anga i te Patireia o te Atua kia ratou. (Luka 4:43, 44) Akapapu katoa a Iesu i tona aroa maata no te Atua e te tangata na te āriki anga kia tamateia aia e te aronga ara. Na teia tu, kua akatuera aia i te mataara no tatou kia rauka te ora mutu kore.

9. Akapeea tatou me aru i to Iesu tu aroa?

⁹ No to tatou inangaro maata ia Iehova, kua akatapu e kua papetitoia tatou. Mei ia Iesu rai, ka akaari tatou i te inangaro maata no Iehova na te aroa anga i te tangata. Tata te apotetoro ko Ioane: “Ko tei kore e aroa i tona taeake tei akaraia e ia ra, eaa e tikaʼi iaia kia anoano i te Atua tei kore i akaraia e ia ra?” (1 Ioa. 4:20) E ui kia koe uaorai: ‘Te aroa maata ra ainei au i te tangata? Te takinga meitaki ra ainei au i tetai ke, noatu to ratou tu kino? Te akakeu ra ainei te aroa iaku kia akapou i toku taime e taku au apinga no te apii i te tangata no runga ia Iehova? Te puareinga ra ainei au i te rave i teia noatu me kare te maata anga e āriki mai e ka patoi mai ratou? Ka rauka ainei iaku te akapou maata i toku taime ki roto i te angaanga tutu aere?’—Ephe. 5:15, 16.

10. Akapeea a Iesu te akatupu anga i te ’au?

¹⁰ E tu akamoeau to Iesu. Te akono tau kore anga te tangata iaia, kare aia i tutaki ana i te kino ki te kino. Inara e maata atu tana i rave. Kua akatupu aia i te ’au e kua akamaroiroi i tetai ke kia rave katoa i te reira. Ei akaraanga, kua apii aia ia ratou kia akatupu i te ’au ki to ratou au taeake me ka inangaro ratou ia Iehova kia āriki i ta ratou akamorianga. (Mata. 5:9, 23, 24) E kua tauturu putuputu aia i tana au apotetoro kia kore e tauetono e koai tei maata ia ratou.—Luka 9:46-48; 22:24-27.

11. Akapeea tatou me akatupu i te ’au?

¹¹ Kia akatupu i te ’au, e maata atu te ka anoanoia i te kopae ua i te akamata i te pekapeka. Ka anoanoia tatou kia akatupu i te ’au ki te au taeake e te au tuaine e kia akamaroiroi ia ratou kia akatikatika i to ratou au manamanata. (Phili. 4:2, 3; Iako. 3:17, 18) E ui i teia au uianga  kia koe uaorai: ‘Eaa taku ka akaatinga kia rauka i te akatupu i te ’au ki tetai ke? Ka akamoupuku ainei au me akamamae tetai taeake me kore tuaine iaku? Ka tiaki ainei au e na tetai ke e akatupu i te ’au, me naku e rave i te reira, noatu me nana i akamata i te manamanata? Ka akamaroiroi ainei au i te aronga e manamanata to ratou kia akatupu i te ’au ki tetai e tetai?’

12. Akapeea a Iesu te akaari anga i te tu takinga meitaki?

¹² E tu takinga meitaki to Iesu. (Mata. 11:28-30) Kua akaari aia i te reira na roto i tona tu tau e te maru, noatu te ngatā o te turanga. Ei akaraanga, te pati anga tetai vaine Kanaana iaia kia akaora i tana tamaine, kare a Iesu i rave ana i tana i pati, inara te akaari anga te vaine i te akarongo matutu, kua akaora a Iesu i tana tamaine. (Mata. 15:22-28) Noatu e tu takinga meitaki to Iesu, ka ako rai aia i te aronga tana i akaperepere maata. Ei akaraanga, te tauta anga a Petero i te tāpu ia Iesu mei te rave i to Iehova anoano, kua ako a Iesu iaia i mua i te katoatoa. (Mare. 8:32, 33) Kare aia i rave i te reira no te taakamā ia Petero, mari ra kia tereni iaia e kia akamatakite i te au pipi kia kore e akaari i te tu akateitei. Penei kua akamā a Petero, inara kua puapingaia aia mei teia ako.

13. Akapeea tatou me akaari i te tu takinga meitaki?

¹³ Kia akaari i te tu takinga meitaki, tetai taime, ka anoanoia koe kia ako i toou au akaperepere. Me rave koe i te reira, e aru ia Iesu na te akamou anga i taau ako ki runga i te Tuatua a te Atua. E akaari i te tu maru. E kimi i te meitaki i roto ia ratou, ma te irinaki e ko te aronga te inangaro ra ia Iehova, ka akarongo ratou ki taau ako. E ui i teia au uianga: ‘Ka tae ainei au i te ako i toku au akaperepere me rave ratou i te tarevake? Ka ako ainei au ia ratou ma te takinga meitaki, me ka tuatua riri ainei au? Eaa te tumu ka oronga ei au i te ako? Ka ako ainei au no toku riri iaia, me no toku inangaro i te tauturu iaia?’

14. Akapeea a Iesu te akaari anga i te tu meitaki?

¹⁴ Kua kite a Iesu i te mea meitaki e kua rave katoa i te reira. No to Iesu inangaro i tona Metua, ka rave ua rai aia i te mea tika ma te tumu tau. Ka kiteaia mai to tatou tu meitaki e tetai ke. Ka akaari tatou i teia tu na te rave anga i te au angaanga meitaki. Kare e rava ua kia kite eaa te mea meitaki; ka anoanoia ra kia rave i te mea meitaki ma te tumu tau. Penei ka ui tatou, ‘Ka rauka ainei ia tatou i te rave i te mea meitaki ma te tumu tarevake?’ Ae. Ei akaraanga, kua tuatua a Iesu no te au tangata tei oronga i te au apinga na te putaua, e kua akapapu e kua kite tetai ke i te reira. Noatu ta ratou angaanga meitaki i rave, kare a Iehova i mareka.—Mata. 6:1-4.

15. Akapeea tatou me akaari i te tu meitaki?

¹⁵ Ka akaari tatou i te tu meitaki me rave tatou i te au mea tika ma te tumu tau. E ui kia koe uaorai: ‘Kua kite ainei au eaa te au mea meitaki, e ka rave ainei i te reira? Eaa te tumu i rave ei au i te au mea meitaki?’

16. Eaa ta tatou ka rave i te au rā ravarai, e eaa te tumu?

¹⁶ Eiaa e manako e ka akamutu te angaanga no te akatangata ou me papetitoia  tatou. Ka anoanoia tatou kia paruru i to tatou “kakau ou.” Ka rauka ia tatou i te rave i te reira na te tauta anga i te akaari i te ua o te vaerua o te Atua i te au rā ravarai. Eaa te tumu? No te mea e Atua rave angaanga a Iehova, e pera e mana ririnui tona vaerua. (Gene. 1:2) No reira ka rauka i te ua o te vaerua i te akakeu ia tatou kia rave angaanga. Ei akaraanga, kua tata te pipi ko Iakobo: “Te akarongo kare e angaanga ra, e mea mate katoa ïa.” (Iako. 2:26) Ka aite katoa teia ki te katoaanga o te ua o te vaerua o te Atua. Te au taime ka akaari tatou i te reira, te akapapu ra tatou e te angaanga nei te vaerua o te Atua i roto ia tatou.

17. Eaa ta tatou ka rave me kare tatou e akaari i te ua o te vaerua?

¹⁷ Noatu kua papetitoia tetai au Kerititiano no tetai tuatau roa, i tetai taime kare ratou e akaari ana i te ua o te vaerua. Ko te mea puapinga, auraka ratou e tuku i te ’au. Akamanako ana i teia akatutuanga. Me ngaae tetai kakau taau e reka ana, ka viviki ainei koe i te titiri i te reira? Kare. Mea papu e ka tuitui koe kia manea akaou e ka akono meitaki i te reira a muri ake. Mei te reira rai, me kare e rauka ia koe i te akaari i te tu takinga meitaki, te akakoromaki e te aroa ki tetai ke, auraka e taitaia. Me tataraara koe ma te ngakau tae, ka akameitaki akaou koe i toou pirianga ki toou taeake. No reira e tauta ua rai kia rave i te mea meitaki a te tuatau ki mua.

18. Eaa tei papu ia tatou?

¹⁸ Kia mataora tatou e kua akanoo a Iesu i tetai akaraanga no tatou! Me aru ua rai tatou i tona aerenga manako e tona tu, ka māmā ua ia tatou i te aru i tona akaraanga. Me aru ua rai tatou i to Iesu akaraanga, te akatupu ra tatou i te tu akatangata ou. I roto i teia apii, kua akara ana tatou e ā tuanga o te ua o te vaerua. E mea meitaki kia akapou i tetai tuatau no te apii i tetai au tuanga ke o te ua o te vaerua, e te akamanako me te akaari ra koe i teia au tu. Ka kite koe i te au atikara no teia tumu manako i roto i te Research Guide for Jehovah’s Witnesses, i raro ake i te tumu manako “Christian Life” e oti, “Fruitage of the Spirit.” Papu e me rave koe i taau tuanga, ka tauturu a Iehova ia koe kia akatangata ou ua rai.