1. Со највише влијајнела упри амари личност?

 БИЗИ разлика дали крстинѓем амен англедер некобор диве или англедер некобор берша, сарине амен мангаја те ова прифатлива англо е Јеховаскере јакхја. Те шај те успејна ко адава ваљани те контролирина амаре мисле. Соске? Адалеске со амаро размислување влијајнела бут упри амари личност. Ако стално размислинаја башо адава сар шај те задоволина амаре телесна желбе амен ка вакера хем ка кера лошна буќа (Еф. 4:17-19). Ама ако пхераја амари годи шукар мисленцар, тегани ка овел аменге полокхо те кера лафи хем те постапина ко начин сој прифатливо амаре Дадеске, е Јеховаске (Гал. 5:16).

2. Башо кола пучиба ка кера лафи ки акаја статија?

² Сар со дикхлем ки англуни статија, амен нашти скроз те чхинава те појавинен пе погрешна мисле ки амари годи. Ама амен шај те бирина дали ка постапина спрема адала мисле. Англедер те крстина амен мора те чхинава те кера лафи хем те постапина ко начин со о Јехова мрзинела ле. Акава тано о прво хем о најважно чекори со ваљани те кера ле те шај те хуљава амендар и пурани личност. Ама те шај целосно те угодина е Јеховаске амен мора те ова послушна ки заповед: „Уравен тумен и неви личност“ (Кол. 3:10). Ки акаја статија ка одговорина ко пучиба: Сој тани и „неви личност“? Сар шај те урава ла хем ма те хуљава ла више?

3. Сој тани и „неви личност“, хем сар некој уравела ла? (Галатите 5:22, 23).

³ Околе со иси ле и „неви личност“ размислинела хем постапинела сар о Јехова. А сар уравела некој и неви личност?  Аѓаар со сикавела о особине со авена таро свети дух хем дозволинела акава духо те влијајнел упро лескере мисле, чувствија хем постапке. (Читин Галатите 5:22, 23.) На пример, ов мангела е Јехова хем лескере народо (Мат. 22:36-39). Асавко мануш ачховела бахтало чак кеда иси ле пхарипа (Јак. 1:2-4). Ов керела мир (Мат. 5:9). Ов тано стрпливо хем љубезно е јаверенцар (Кол. 3:13). Ов на само со мангела адава сој тано шукар, него исто аѓаар керела ле да (Лука 6:35). Пле постапкенцар сикавела кај иси ле силно вера ко пло небесно Дад (Јак. 2:18). Ов ачховела смиримо кеда о јавера провоциринена ле хем сикавела само контрола кеда тано искушимо (1. Кор. 9:25, 27; Тит 3:2).

4. Соске ваљани те сикава са о особине таро Галатите 5:22, 23 те шај те урава и неви личност?

⁴ Те шај те урава и неви личност ваљани те развина са о особине сој спомниме ко Галатите 5:22, 23, хем о јавера особине сој спомниме ко јавера стихија. * Акала особине нане сар посебна делија шеја со ураваја лен јекх пало јекх. Уствари, бут таро акала особине тане поврзиме јавере особиненцар. На пример, ако чаче мангеа тле пашутне, ту ка ове леа стрпливо хем љубезно. А те шај те ове чаче шукар мануш, мора те ове кротко хем те овел тут самоконтрола.

5. Со значинела те овел амен „е Христосескири годи“, хем соске ваљани те проучина лескоро живото? (1. Коринќаните 2:16).

⁵ Читин 1. Коринќаните 2:16. Те шај те урава и неви личност амен ваљани те овел амен е „Христосескири годи“. Јавере лафенцар, мора те дознајна сар размислинела о Исус хем тегани те џа пало лескоро пример. Ов целосно сикавела о особине со авена таро свети дух хем совршено сикавела е Јеховаскере особине (Евр. 1:3). Со повише размислинаја сар о Исус, добором повише ка постапина сар лесте хем ка ова панда поуспешна ко адава те овел амен сар лескири личност (Фил. 2:5).

6. Со на ваљани те бистра кеда трудинаја амен те урава и неви личност?

⁶ Дали шај чаче те џа пало е Исусескоро пример? Шај мислинаја аменге: „О Исус тано совршено ме никогаш нане те овав сар лесте“. Ако ту да осетинеа тут аѓаар, ма бистре акала буќа. Прво, ту сиан створимо те ове сар о Јехова хем о Исус. Значи, ту шај те  бирине те џа пало ленгоро пример хем џи негде шај те ове успешно ко адава (1. Мој. 1:26). Дујто, е Девлескоро свети дух тани и најмоќно сила ко цело универзум. Адаја сила шај те поможинел тут те кере буќа со на би шај сине коркори те кере лен. Трито, о Јехова на очекујнела тутар совршено те сикаве о особине со авена таро свети дух. Уствари, ов одвојнѓа 1000 берш те шај окола со иси лен надеж те живинен ки пхув те овен совршена (Отк. 20:1-3). Адава со о Јехова очекујнела амендар авдиве тано те да амаро најшукар хем те овел амен доверба ки лесте кај ов ка поможинел амен.

7. Со ка дикха акана?

⁷ Ко саве конкретна начинија шај те џа пало е Исусескоро пример? Акана ка дикха штар особине кола со авена таро свети дух. Ка дикха со шај те сикљова таро начин сар о Исус сикавѓа акала особине. Исто аѓаар, ка дикха несаве пучиба со ка поможинен амен те хаљова дали шукар уравѓем и неви личност.

8. Сар о Исус сикавѓа мангипе?

⁸ Е Исусескоро баро мангипе башо Јехова поттикнинѓа ле те керел жртве пе Дадеске хем аменге (Јован 14:31; 15:13). О Исус сикавѓа кобор бут мангела е манушен адалеа сар живинѓа пло живото ки пхув. Ов секова диве сикавела сине мангипе хем сочувство чак околенге со противинена пе сине леске. Јекх бут важно начин сар сикавѓа пло мангипе башо мануша тано аѓаар со сикавѓа лен башо е Девлескоро Царство (Лука 4:43, 44). О Исус исто аѓаар сикавѓа пло самопожртвувано мангипе спрема о Девел хем спрема о мануша аѓаар со сине спремно те овел мучимо хем мудардо таро грешникија. Аѓаар ов денѓа амен прилика те живина вечно.

9. Сар шај те сикава мангипе сар о Исус?

⁹ Амен денѓем лафи е Јеховаске кај ка служина леске хем крстинѓем амен адалеске со мангаја ле. Амен да, сар о Исус шај те сикава кај мангаја е Јехова адалеа сар понашинаја амен е манушенцар. О апостол Јован пишинѓа: „Кој на мангела пле пхрале касте со дикхела, нашти те мангел е Девле касте со на дикхела“ (1. Јов. 4:20). Шај те пуча амен: „Дали мангава е манушен? Дали сиум сочувствително е јаверенцар чак кеда ола понашинена пе манцар грубо? Дали о мангипе поттикнинела ман те користинав мло време хем адава со иси ман те шај те поможинав е јаверенге те дознајнен кој тано о Јехова? Дали сиум спремно те керав акава чак кеда повише мануша на ценинена мло трудо или чак противинена пе манге? Дали шај повише време те џав ки служба?“ (Еф. 5:15, 16).

10. Сар о Исус керела сине те овел мир?

¹⁰ О Исус керела сине те овел мир. Кеда о мануша понашинена пе сине леа лошно, ов на иранела сине ленге лошнипаја. Наместо адава, ов керела сине о прво чекори те шај те керел мир хем поттикнинела сине е јаверен да те решинен о проблемија со сине лен е јаверенцар. На пример, ов сикавѓа лен кај ако мангена о Јехова те прифатинел ленгоро обожавибе ола мора те овен ко мир пумаре пхралеа (Мат. 5:9, 23, 24). Исто аѓаар ов бут пути поможинѓа е апостоленге те чхинавен те распрајнен пе башо адава кој лендар тано најбаро (Лука 9:46-48; 22:24-27).

11. Сар шај те кера те овел мир?

¹¹ Те шај те кера мир, нане доволно само те на распрајна амен. Ваљани те трудина амен те смирина амен е пхраленцар хем те охрабрина амаре пхрален хем пхењен те решинен  о проблемија со иси лен е јаверенцар (Фил. 4:2, 3; Јак. 3:17, 18). Шај те пуча амен: „Со сиум спремно те жртвујнав те шај те смиринав ман е јаверенцар? Дали икерава холи кеда јекх пхрал или пхен поврединела ман? Дали аџикерава о јавер те авел ки манде те шај те смирина амен, или ме керава о прво чекори чак кеда мислинава кај ов тано криво? Кеда тано соодветно дали охрабринава околен со иси лен проблеми те смиринен пе јекх јекхеа“?

12. Сар о Исус сикавѓа љубезност?

¹² О Исус сине љубезно (Мат. 11:28-30). Ов сикавѓа љубезност аѓаар со сине разумно хем обѕирно. На пример, кеда јекх Феничанка молинѓа ле те сасљарел лакере чхаја, ов ко почеток на мангља те шунел ла. Ама кеда ој сикавѓа бари вера ов сикавѓа љубезност аѓаар со сасљарѓа лакере чхаја (Мат. 15:22-28). Иако сине љубезно, о Исус на избегинела сине те дел советија. Понекогаш сикавела сине љубезност аѓаар со сине директно околенцар со мангела лен сине. На пример, кеда о Петар пробинѓа те обесхрабринел е Исусе те керел е Јеховаскири волја, о Исус строго испрајнѓа ле англо јавера ученикија (Мар. 8:32, 33). Ов на мангља те понижинел е Петаре, него акалеа мангља те сикавел ле хем е јавере апостолен ма те накхен пумаре границе. Сигурно о Петар лаџандило, ама бут користинѓа леске акава укор.

13. Сар шај те ова љубезна?

¹³ Те шај те ове љубезно околенцар со мангеа лен понекогаш шај ка ваљани директно те вакере ленге несаве буќа. Исто сар о Исус, ту да темелин тле советија ко библиска начелија. Ов обѕирно хем нека овел тут доверба кај ола мангена те керен адава сој исправно хем кај адалеске со мангена е Јехова хем тут ка прифатинен о совет. Пуч тут: „Ако дикхава кај некас со мангава керела нешто погрешно, дали иси ман и храброст те вакерав леске кај грешинела? Ако ваљани те дав совет, дали керава адава ко јекх љубезно начин или сиум бут строго? Која тани и причина соске дава совет? Дали дава ле совет адалеске со нервиринела ман или адалеске со мангава те поможинав леске?“

14. Сар о Исус сикавѓа шукарипе?

¹⁴ О Исус на само со џанела сој шукар него хем керела адава. Ов мангела пле Даде хем адалеске секогаш керела адава сој тано шукар хем таро исправна причине. Јекх шукар мануш секогаш дикхела сар шај те поможинел е јаверенге хем те керел ленге шукарипе. Нане доволно само те џана сој тано шукар те кера. Ваљани те кера и исправно бути таро исправна причине. Шај пучаја амен: „Шај ли некој те керел шукарипе тари погрешно причина?“ Оја шај. На пример, о Исус керѓа лафи башо адала мануша со поможинена сине е чороленге те шај о јавера те дикхен лен. Иако ола керѓе шукарипе, англо е Јеховаскере јакхја адава на врединела сине (Мат. 6:1-4).

15. Сар шај чаче те ова шукар?

¹⁵ Те шај чаче те ова шукар на ваљани те кера шукарипе таро себична причине. Адалеске шај те пуча амен: „Освен со сиум свесно сој шукар хем исправно, дали постапинава аѓаар? Тари која причина керава шукарипе?“

16. Со ваљани те кера секова диве, хем соске?

¹⁶ На ваљани те мислина кај пало крстибе на ваљани више те кера бути ки амари неви личност. И неви личност тани сар јекх нево  шеј со ваљани те аракха ле. Јекх начин сар шај те кера адава тано аѓаар со секова диве ка рода начинија сар те сикава о особине со авена таро свети дух. Соске? Кобор повише сикаваја акала особине, добором повише ка поможинел аменге о свети дух те сикава лен. Соске вакераја акава? Адалеске со о свети дух, и сила колаја со о Девел керела нешто, поттикнинела амен да те кера нешто (1. Мој. 1:2). Значи, секоја особина со авела таро свети дух шај хем ваљани те поттикнинел амен те кера нешто. На пример, о апостол Јаков пишинѓа: „И вера бизо те сикавел пе ко дело тани мули“ (Јак. 2:26). О исто шај те вакерел пе башо са о особине со авена таро свети дух. Секова пути кеда сикаваја лен докажинаја кај е Девлескоро духо поможинела аменге.

17. Со ваљани те кера кеда на успејнаја те сикава о особине со авена таро свети дух?

¹⁷ Чак окола со бут берша тане крстиме понекогаш на успејнена те сикавен о особине со авена таро свети дух. Ама важно тано ма те откажина амен. Размислин баши акаја споредба. Дали одма ка фрде тло омилено шеј ако пхаравѓола? На. Ако шај, веројатно ка пробине те поправине и штета аѓаар со ка сиве ле. Хем пало адава повише ка пазине ле. Слично аѓаар, ако понекогаш на постапинеа љубезно или стрпливо некасаја, ма обесхрабрин тут. Шај те поправине и штета ако искрено извининеа тут хем адава ка поможинел туке палем те ове шукар амал е манушеа. Хем ов одлучно јавер пути ма те кере о иста грешке.

18. Ко со шај те ова сигурна?

¹⁸ Бут сием благодарна со о Исус денѓа амен јекх шукар пример. Со повише размислинаја сар лесте, добором полокхо ка овел аменге те постапина сар лесте. Со повише постапинаја сар о Исус, добором пошукар ка џана сар те урава и неви личност. Ки акаја статија дикхлем само штар особине со авена таро свети дух. Ама, шукар ка овел те одвојна аменге време те разгледина о јавера да особине хем те размислина кобор сикаваја акала особине ко амаро живото. Ту шај те аракхе повише информацие баши акаја тема ко Прирачникот за истражување на публикациите на Јеховините сведоци тели тема „Христијански живот“ ко дело „Плодови на духот“. Шај те ове сигурно кај ако трудинеа тут те ураве и неви личност хем те на икале ла, о Јехова ка поможинел туке.