1. Καβά πράγμας σικαβέλα σο τζενέ ισινάμ;

 ΕΙΤΕ ισινάμ μπολντέ χάνικ ντιβεσά είτε μπουτ μπρεσά, σαρέ μανγκάσα τι τθεράς ο χαρακτήρας σο μανγκέλα ο Ιεχωβά. Για τι αβάς ασακέ τζενέ, χρειαζίντιβελα τι κεράς κουμάντος οντουλά σο τθεράσα αμαρέ γκοντιάτε. Σόσκε; Σόσκε οντουλά σο τθεράσα αμαρέ γκοντιάτε σικαβένα σο τζενέ ισινάμ. Άμα αμαρί γκοντί ισί κο πράγματα σο μανγκέλα ο σώμας, αμαρέ λάφια ντα οντουλά σο κα κεράς κα αβέν μπέτι. (Εφεσ. 4:​17-19) Οκιά μπάνταρ, άμα πφεράσα αμαρί γκοντί λατσσέ πραγματέντζαρ, κα αβέλ πο σίγουρος ότι οντουλά σο βακεράσα ντα κεράσα κα κερέν ο γκι αμαρέ Νταντέσκο, ι Ιεχωβάσκο.​—Γαλ. 5:16.

2. Καλά ερωτήσεις κα ντικχάς ανταλέ μαθημάστε;

² Σαρ σικλιλάμ κο γιαβέρ μάθημας, ναστί τσσιναβάσα σαρέ ο μπέτι σκέψεις σο αβένα αμαρέ γκοντιάτε. Αλλά ισί αμαρέ βαστέστε τι τραμπίνας μα τι κεράς-λεν. Πριν τι μπολντιάς, χρειαζίντιβελα τι μουκχάς παλ’ αμέντε ο λάφια ντα ο πράγματα σο μισίνελα ο Ιεχωβά. Ανταβά ισί ο πρώτος ντα ο πο σημαντικός πράγμας για τι νικαβάς οπρ’ αμένταρ ο πουρανό χαρακτήρας. Αλλά για τι κεράς ντιπ ι Ιεχωβάσκο γκι, πρέπει τι ντας καν ακαλέ εντολιάτε-ντα: «Ιρίν ο νεβό χαρακτήρας». (Κολ. 3:​10) Ανταλέ μαθημάστε, κα απαντίνας ακαλέ ερωτησιέντε: Σο ισί «ο νεβό χαρακτήρας»; Σαρ αβέλα-πες τι ιριάς ο νεβό χαρακτήρας ντα μα τι νικαβάς-λες οπρ’ αμένταρ;

3. Σο ισί ο «νεβό χαρακτήρας», ντα σαρ ιρίλα-λες εκ τζενό; (Γαλάτες 5:​22, 23)

³ Ο «νεβό χαρακτήρας» ισί ο τρόπος σο ο Ιεχωβά σκεφτίνελα ντα κερέλα ο πράγματα. Εκ τζενό ιρίλα ο νεβό χαρακτήρας  κάνα σικαβέλα πι ζωγιάτε ο καρπός ι Ντεβλέσκε πνευμάσκο. Ανταβά μανγκέλα τι βακερέλ ότι μουκχέλα ο άγιος πνεύμας τι αλλάνελ εμ οντουλά σο τθερέλα πι γκοντιάτε ντα πι γκίστε εμ οντουλά σο κερέλα. (Διαβάνεν Γαλάτες 5:​22, 23) Για παράδειγμας, εκ ασακό τζενό μανγκέλα ι Ιεχωβάς ντα λέσκε λαός. (Ματθ. 22:​36-39) Να χασαρέλα πι χαρά ατζέ-ντα κάνα νακχέλα δοκιμασίες. (Ιακ. 1:​2-4) Κερέλα ειρήνη. (Ματθ. 5:9) Κερέλα υπομονή ντα σικαβέλα λατσσιπέ κο γιαβερά. (Κολ. 3:​13) Μανγκέλα ο λατσσιπέ ντα κερέλα-λες. (Λουκ. 6:​35) Σικαβέλα οντουλέντζαρ σο κερέλα ότι τθερέλα ζουρανί πίστη πι Νταντέστε, κο Ιεχωβά. (Ιακ. 2:​18) Ατσσόλα κοβλέ γκίσκο κάνα ο γιαβερά χολιασκιαρένα-λες ντα ατσσικιαρέλα-πες κάνα αβέλα λέσκε εκ πειρασμός.​—1 Κορ. 9:​25, 27· Τίτο 3:2.

4. Για τι ιριάς ο νεβό χαρακτήρας, σόσκε πρέπει τι μπαριαράς σαρέ ο ιδιότητες σο βακέρντιβενα κο Γαλάτες 5:​22, 23 ντα γιαβερέ εδαφιόντε; Εξηγίνεν.

⁴ Για τι ιριάς ο νεβό χαρακτήρας, χρειαζίντιβελα τι μπαριαράς σαρέ ο ιδιότητες σο βακέρντιβενα κο εδάφια Γαλάτες 5:​22, 23 ντα γιαβερέ εδαφιόντε. * Ανταλά ιδιότητες νανέ σαρ ο σέα σο ιριντιόνα ξεχωριστά ο εκ κατά γιαβέρ. Μπουτ κατά ιδιότητες ανταλά τθερένα τι κερέν γιαβερέ-ντα ιδιοτητέντζαρ. Για παράδειγμας, άμα μανγκάσα μπαγιά ι τζενέν, κα κεράς υπομονή λέντζαρ ντα κα σικαβάς λένγκε λατσσιπέ. Ντα για τι αβάς μπαγιά λατσσέ τζενέ, πρέπει τι τθεράς κοβλό γκι ντα τι ατσσικιαράς αμαρό νεαυτός.

5. Σο μανγκέλα τι βακερέλ τι τθεράς «ι γκοντί ι Χριστόσκι», ντα σόσκε πρέπει τι σικλιάς ατζέ πο μπουτ ι Ιησούσκε ζωγιάκε; (1 Κορινθίους 2:16)

⁵ Διαβάνεν 1 Κορινθίους 2:​16. Για τι ιριάς ο νεβό χαρακτήρας, χρειαζίντιβελα τι τθεράς «ι γκοντί ι Χριστόσκι». Γιαβερέ λαφίντζαρ, πρέπει τι σικλιάς σαρ σκεφτίνελα ο Ιησούς, ντα σοράν τι μοιάζας λέστε. Ο Ιησούς σικαβέλα τέλεια πι ζωγιάτε ο καρπός ι Ντεβλέσκε πνευμάσκο. Ισί σαρ εκ ανιάς σο σικαβέλα ο ιδιότητες ι Ιεχωβάσκε ντιπ αντικάς σαρ ισί. (Εβρ. 1:3) Καζόμ πο μπουτ σκεφτίνασα σαρ ο Ιησούς, αζόμ πο μπουτ κα κεράς ο πράγματα σαρ κερέλα-λεν βοβ ντα αζόμ πο μπουτ κα μοιάζας λέστε.​—Φιλιπ. 2:5.

6. Σο πρέπει τι ντας-αμέν γκοντί καζόμ μαράσα-αμέν τι ιριάς ο νεβό χαρακτήρας;

⁶ Αβέλα-πες μπαγιά τι μοιάζας κο Ιησούς; Μπέκιμ σκεφτίνασα: “Ο Ιησούς ισί τέλειος.  Με ποτές ναστί κα αβάβ σαρ λέστε!” Άμα νιωθίνενα αντικάς, ντεν-τουμέν γκοντί ακαλά: Πρώτον, ισινέν κερντέ για τι αβέν σαρ ο Ιεχωβά ντα ο Ιησούς. Οτθάρ, ισί τουμαρέ βαστέστε τι τραμπίνεν τι αβέν σαρ λέντε ντα μπορίνενα τι κερέν-λες ανταβά καζόμ πο λατσσές αβέλα-πες. (Γέν. 1:​26) Δεύτερον, ο άγιος πνεύμας ι Ντεβλέσκο ισί η πο μπαρί ζορ σο υπαρχίντιβελα. Ανταλέ ζοριάσαρ, μπορίνενα τι κερέν πράγματα σο ποτές ναστί κα κερένας κορκορέ. Τρίτον, ο Ιεχωβά να μπεκλεντίνελα τουμένταρ τι σικαβέν τέλεια ο καρπός ι πνευμάσκο ακανά. Αμαρό λατσσό Ντατ τραμπιντάς τι ντελ 1.000 μπρεσά κο τζενέ σο κα τζουβντιόν κι πφουβ για τι αβέν τέλειοι. (Αποκ. 20:​1-3) Οντουβά σο μανγκέλα αμένταρ ο Ιεχωβά ακανά ισί τι κεράς ο πο λατσσό ντα τι ντας λέσκε μπέσα για τι βοηθίνελ-αμέν.

7. Σο κα ντικχάς ακανά;

⁷ Σο πρέπει τι κεράς για τι μοιάζας κο Ιησούς; Κα ντικχάς σταρ ιδιότητες σο ισί κο καρπός κι Ντεβλέσκε πνευμάσκο. Κα ανάς αμαρέ γκοντιάτε σαρ σικαβέλας ο Ιησούς πι ζωγιάτε ανταλά ιδιότητες ντα σο σικλιάσα λέσταρ. Καζόμ κεράσα-λες ανταβά, κα ντικχάς μερικές ερωτήσεις σο κα βοηθίνεν-αμέν τι αγαβάς καζόμ λατσσές ιριάσα ο νεβό χαρακτήρας.

8. Σαρ σικαντάς ο Ιησούς μανγκιπέ;

⁸ Ο μπαρό μανγκιπέ σο τθερέλα ο Ιησούς ι Ιεχωβάσκε τσσιντιντάς-λες τι κερέλ θυσίες πι Νταντέσκε ντα αμένγκε. (Ιωάν. 14:​31· 15:​13) Ο Ιησούς σικαντάς καζόμ μπουτ μανγκέλας ι τζενέν οντουλέντζαρ σο κερντάς κάνα τζουβντιλό ατθέ κι πφουβ. Κάθε ντιβές, σικαβέλας μανγκιπέ ντα πφαμπόλας ι τζενένγκε, ατζέ-ντα κάνα μερικοί τζάνας λέσαρ κόντρα. Εκ σημαντικός τρόπος σο σικαβέλας πο μανγκιπέ ι τζενένγκε ισινέ ότι σικλιαρέλας-λεν ι Ντεβλέσκε Βασιλειάκε. (Λουκ. 4:​43, 44) Σικαντάς ότι μανγκέλα ι Ντεβλές ντα ι τζενέν πο μπουτ πι νεαυτόσταρ-ντα κάνα τσσιντιντάς μπουτ ντα μουλό κο βαστά αμαρτωλέ τζενένγκε. Αντικάς, πουταρντάς αμένγκε ο ντρομ τι τζουβντιάς για πάντα.

9. Σαρ μπορίνασα τι σικαβάς μανγκιπέ σαρ ο Ιησούς;

⁹ Ο μανγκιπέ σο τθεράσα ι Ιεχωβάσκε, αμαρέ Νταντέσκε, κερντάς-αμέν τι ντας αμαρό λάφι τι τζουβντιάς λέσκε ντα τι μπολντιάς. Οτθάρ, σαρ ο Ιησούς, πρέπει τι σικαβάς μανγκιπέ ι Ιεχωβάσκε οντουλέντζαρ σο κεράσα κο γιαβερά τζενέ. Ο απόστολος Ιωάννης γραφιντάς: «Οντουβά σο να μανγκέλα πι πφραλές, σο ντικχλάς-λες, ναστί μπορίνελα τι μανγκέλ ι Ντεβλές, σο να ντικχλάς-λες». (1 Ιωάν. 4:​20) Ισί λατσσό τι πουτσάς-αμέν: “Τθεράβα μπαριαρντό μπουτ μο μανγκιπέ ι τζενένγκε; Πφαμπάβα ι γιαβερένγκε ατζέ-ντα άμα βον να σικαβένα μάνγκε λατσσιπέ; Τσσίντελα-μαν ο μανγκιπέ τι νταβ μι σαατίσταρ ντα μι πραγματένταρ για τι βοηθίναβ ι γιαβερέν τι σικλιόν ι Ιεχωβάσκε; Ισινόμ έτοιμος τι κεράβ-λες ανταβά ατζέ-ντα κάνα ο πο μπουτ τζενέ να σικαβένα εκτίμηση ή τζάνα μάντζαρ κόντρα; Μπορίναβα τι αρακχάβ τρόπους τι νταβ πο μπουτ μι σαατίσταρ για τι κεράβ μαθητέν;”​—Εφεσ. 5:​15, 16.

10. Σαρ κερέλας ειρήνη ο Ιησούς;

¹⁰ Ο Ιησούς ισινέ εκ τζενό σο κερέλας ειρήνη. Κάνα ο γιαβερά να σικαβένας λέσκε λατσσιπέ, βοβ να κερέλας ο ίδιος λένγκε. Αλλά να ερεσέλας-λες ανταβά. Τζάλας βοβ πρώτος τι κερέλ ειρήνη ντα σικλιαρέλας ι τζενέν τι αρακχέν-λεν ι γιαβερέντζαρ. Για παράδειγμας, σικλιαρέλας-λεν ότι, για τι ντεν λατρεία ι Ιεχωβάς, έπρεπε τι κερέν ειρήνη πουμαρέ πφραλέσαρ. (Ματθ. 5:9, 23, 24) Ντα μπουτ φαρ βοηθίνελας ι αποστολόν μα τι χαν-πες κον ισινέ ο πο μπαρό.​—Λουκ. 9:​46-48· 22:​24-27.

11. Σαρ μπορίνασα τι κεράς ειρήνη;

¹¹ Για τι κεράς ειρήνη, να ερεσέλα σάντε μα τι χας-αμέν ι γιαβερέντζαρ. Χρειαζίντιβελα αμέν πρώτα τι τζας τι κεράς ειρήνη ντα τι βακεράς αμαρέ πφραλένγκε ντα πφενίνγκε τι  αρακχέν-λεν ι γιαβερέντζαρ. (Φιλιπ. 4:2, 3· Ιακ. 3:​17, 18) Ισί λατσσό τι πουτσάς-αμέν: “Σο ισινόμ έτοιμος τι νταβ για τι κεράβ ειρήνη ι γιαβερέντζαρ; Κάνα εκ πφραλ ή εκ πφεν ανέλα ντουκχ μι γκίστε, ατσσικιαράβα χολί; Μήπως μπεκλεντίναβα κατά γιαβέρ τζενό τι κερέλ ειρήνη ή τζάβα με πρώτος τι κεράβ-λες ανταβά ατζέ-ντα άμα ντικχίντιβελα ότι ο πρόβλημας αβιλό ιτιρί κατά γιαβέρ τζενό; Κάνα ισί λατσσό, βακεράβα οντουλένγκε σο τθερένα εκ πρόβλημας τι αρακχέν-λεν;”

12. Σαρ σικαβέλας λατσσιπέ ο Ιησούς;

¹² Ο Ιησούς σικαβέλας λατσσιπέ. (Ματθ. 11:​28-30) Κερέλας-λες ανταβά σόσκε ισινέ ήρεμος ντα να μανγκέλας τι νακχέλ λέσκο ατζέ-ντα κάνα ο πράγματα ισινέ δύσκολα. Για παράδειγμας, κάνα εκ Φοίνισσα μολιντάς-λες τι κερέλ λατσσές λάκε τσσαβές, κι αρχή να κερντάς οντουβά σο μανγκλάς λέσταρ. Αλλά κάνα οντιά τζουβέλ σικαντάς μπαρί πίστη, ο Ιησούς λατσσιμάσαρ κερντάς λατσσές λάκε τσσαβές. (Ματθ. 15:​22-28) Παρόλο σο ισινέ λατσσό, ο Ιησούς να σακιντίνελας τι ντελ συμβουλή. Ισινέ φαρ σο σικαντάς λατσσιπέ κάνα διορθωντάς οντουλέν σο μανγκέλας. Για παράδειγμας, κάνα ο Πέτρος γκιλό τι βακερέλ ι Ιησούσκε μα τι κερέλ οντουβά σο μανγκέλας ο Ιεχωβά, ο Ιησούς διορθωντάς-λες ανγκλάλ κο γιαβερά μαθητές. (Μάρκ. 8:​32, 33) Να κερντάς-λες ανταβά για τι ανέλ λατζ ι Πετρόσκε, αλλά για τι σικλιαρέλ-λες ντα για τι σικαβέλ κο γιαβερά-ντα μαθητές μα τι νακχέν ο όρια. Ο Πέτρος σίγουρα να νιωσάλο σουκάρ, αλλά ντικχλάς λατσσιπέ κατά Ιησούσκε λάφια.

13. Σαρ μπορίνασα τι σικαβάς μπαγιά λατσσιπέ;

¹³ Για τι σικαβέν τουμέν-ντα μπαγιά λατσσιπέ ι τζενένγκε σο μανγκένα, μπέκιμ τι χρειαζίντιβελ καέκ φαρ τι ντεν-λεν συμβουλή. Τουμαρί συμβουλή τι αβέλ αντράλ κατά Ντεβλέσκο Λάφι σαρ ισινέ ο συμβουλές ι Ιησούσκε-ντα. Αβέν ήρεμοι. Μα πακιάν ότι ο γιαβερά να μανγκένα τι κερέν ο σωστός, αλλά αβέν σίγουροι ότι οντουλά σο μανγκένα ι Ιεχωβάς ντα τουμενέ κα ασουνέν τουμαρί συμβουλή σο ντιντιόλα μανγκιμάσαρ. Πουτσέν-τουμέν: “Τθεράβα ο θάρρος τι κεράβ λάφι κάνα ντικχάβα ότι εκ τζενό σο μανγκάβα κερέλα εκ λάθος; Άμα μπαγιά χρειαζίντιβελα τι νταβ συμβουλή, κεράβα λατσσό ή μπέτι λάφι; Σόσκε ντάβα συμβουλή; Επειδή χολιασάλομ οντουλέ τζενέσκε ή επειδή μανγκάβα λέσκο λατσσιπέ;”

14. Σαρ σικαβέλα ο Ιησούς αγαθότητα;

¹⁴ Ο Ιησούς να τζανέλα σάντε καβά ισί ο λατσσιπέ, αλλά κερέλα-λες ντα. Ο Ιησούς μανγκέλα πι Νταντές, οτθάρ κερέλα πάντα ο σωστός για το σωστός λόγος. Η αγαθότητα ισί εκ ιδιότητα σο σικάντιβελα οντουλένταρ σο κερέλα κο γιαβερά. Σικαβάσα-λα κάνα ρόντασα τρόπους τι βοηθίνας ι γιαβερέν. Να ερεσέλα σάντε τι τζανάς καβά ισί ο σωστός. Πρέπει τι κεράς ο σωστός για το σωστός λόγος. Εκ τζενό μπορεί τι πουτσέλ: “Αβέλα-πες τι κεράς ο σωστός για λάθος λόγος;” Βα, αβέλα-πες. Για παράδειγμας, ο Ιησούς κερντάς λάφι οντουλέ τζενένγκε σο ντένας δώρα κο τσορορέ ανγκλάλ κο γιαβερά για τι σικαβέν-πες. Παρόλο σο ο πράγματα σο κερένας ντικχίντιβενας λατσσέ, να κερένας ι Ιεχωβάσκο γκι.​—Ματθ. 6:​1-4.

15. Σαρ κα σικαβάς μπαγιά αγαθότητα;

¹⁵ Κα σικαβάς μπαγιά αγαθότητα σάντε άμα κεράσα ο σωστός χωρίς τι μπεκλεντίνας τι λας κάτι παλάλ. Οτθάρ, πουτσέν-τουμέν: “Ερεσέλα-μαν τι τζανάβ καβά ισί ο σωστός ή κεράβα-λες ντα; Σο τσσίντελα-μαν τι κεράβ λατσσέ πράγματα;”

16. Σο πρέπει τι κεράς κάθε ντιβές, ντα σόσκε;

¹⁶ Μα τι αμντίνας ότι αζομάν σο μπολντιάσα τσσιναβάσα τι μαράς-αμέν για τι ιριάς ο νεβό  χαρακτήρας. Χρειαζίντιβελα τι αρακχαβάς αμαρό σουκάρ «νεβό ιριαϊπέ». Εκ τρόπος τι κεράς-λες ανταβά, ισί τι ρόντας κάθε ντιβές σαρ τι σικαβάς αμαρέ ζωγιάτε ο καρπός ι Ντεβλέσκε πνευμάσκο. Σόσκε; Σόσκε ο Ιεχωβά ισί εκ Ντεβέλ σο να τσσιναβέλα τι κερέλ πράγματα. Ντα ανταλά κερέλα-λεν πι πνευμάσαρ σο ισί λέσκι μπαρί ζορ. (Γέν. 1:2) Οτθάρ, κάθε ιδιότητα σο ισί κο καρπός κι πνευμάσκο μπορίνελα ντα πρέπει τι τσσίντελ-αμέν τι κεράς πράγματα. Για παράδειγμας, ο μαθητής Ιάκωβος γραφιντάς: «Η πίστη . . . χωρίς τι κερέλ λατσσέ πράγματα ισί μουλί». (Ιακ. 2:​26) Ο ίδιος αβέλα-πες σαρέ ι γιαβερέ-ντα ιδιοτητέντζαρ σο ισί αντρέ κο καρπός κι Ντεβλέσκε πνευμάσκο. Κάθε φαρ σο σικαβάσα-λεν αμαρέ ζωγιάτε, σικαβάσα ότι ο πνεύμας ι Ντεβλέσκο κερέλα μπουτί αντρ’ αμέντε.

17. Σο πρέπει τι κεράς άμα κα αβέν φαρ σο ναστί κα σικαβάς αμαρέ ζωγιάτε ο καρπός ι πνευμάσκο;

¹⁷ Ατζέ-ντα ο Χριστιανοί σο ισί μπολντέ μπουτ μπρεσά, ισί φαρ σο ναστί σικαβένα πουμαρέ ζωγιάτε ο καρπός ι πνευμάσκο. Η μπουτί όμως ισί μα τι μουκχάς-αμέν. Ντικχέν ακαβά παράδειγμας. Άμα τουμαρέ αγαπημέ σέα κα πφαράντιβενας, κα σιγκιαρένας τι φουρτίνεν-λεν; Νάα. Κα κερένας ο πο λατσσό για τι λατσσαρέν ο ζιάνι σο αβιλό-πες, άμα αβέλα-πες. Ντα κα τθερένας τουμαρί γκοντί μα τι πφαραβέν-λεν πάλι. Σο σικλιάσα ανταλέσταρ; Άμα να σικαντέν εκχέ τζενέσκε λατσσιπέ, υπομονή ή μανγκιπέ, μα τσσουβέν τουμαρέ γκίστε. Άμα μανγκλέν συγνώμη αντράλ τουμαρέ γκίσταρ, ανταβά μπορίνελα τι λατσσαρέλ ο ζιάνι, σαρ τι βακεράας, ντα τι πουτρέλ ο ντρομ για τι αρακχέν-λεν πάλι οντουλέ τζενέσαρ. Κερέν σο νακχέλα τουμαρέ βαστένταρ για τι τζαν-λεν πο λατσσές ι γιαβέρ φαρ.

18. Καλέ πραγμάσκε μπορίνασα τι αβάς σίγουροι;

¹⁸ Ισινάμ πφερντέ εκτίμηση σο τθεράσα ο παράδειγμας ι Ιησούσκο! Καζόμ πο μπουτ σκεφτίνασα σαρ ο Ιησούς, αζόμ πο εύκολος κα αβέλ τι κεράς ο πράγματα σαρ βοβ. Καζόμ πο μπουτ κα κεράς ο πράγματα σαρ ο Ιησούς, αζόμ πο λατσσές κα ιριάς ο νεβό χαρακτήρας. Ανταλέ μαθημάστε, ντικχλάμ σάντε σταρ ιδιότητες σο ισί κο καρπός κι Ντεβλέσκε πνευμάσκο. Κα αβέλας λατσσό τι ντεν τουμαρέ σαατίσταρ για τι ντικχέν ο γιαβερά-ντα ιδιότητες ντα τι σκεφτίνεν καζόμ λατσσές σικαβένα-λεν τουμαρέ ζωγιάτε. Κα αρακχέν μπουτ θέματα ντα μαθήματα οπράλ ανταλέστε κο Οδηγός Έρευνας για τους Μάρτυρες του Ιεχωβά κο θέμας «Χριστιανική Ζωή» ντα σοράν «Καρπός του Πνεύματος». Μπορίνενα τι αβέν σίγουροι ότι άμα κερντέν ο πο λατσσό, ο Ιεχωβά κα βοηθίνελ-τουμέν τι ιρίν ο νεβό χαρακτήρας ντα μα τι νικαβέν-λες ποτές οπρά-τουμένταρ.