1. I yini lexi khumbaka ngopfu wumhunu byezru?

 SWI NGE NA mhaka leswaku hi babatisiwe khale kumbe swoswinyana, hinkwezru hi djula ku va ni wumhunu lebyi Yehovha a byi zrandzraka. Akuva leswo swi koteka hi fanela ku lawula leswi hi swi pimisaka. Ha yini? Hikusa leswi hi swipimisaka swi byi khumba ngopfu wumhunu byezru. Loko hi tsrhamela ku pimisa hi ku nyonxisa ku navela kwezru ka nyama, hi ta hlaya ni ku yentxa mintxhumu leyi hoxekiki. (Ef 4:17-19) Hi hala tlhelo, loko hi tata mimpimiso yezru hi mintxhumu leyinene, swi ta hi nabyalela ku hlaya ni ku yentxa mintxhumu leyi nyoxisaka Yehovha.—Ga 5:16.

2. I yini leswi hi ta ka swi kambisisa ka xidondzro lexi?

² Hi lani hi swi voniki hakone ka xidondzro lexi khalutiki, a hi nge swi koti ku sivela hi ku helela mimpimiso leyi hoxekiki. Kambe hi nga swi kota ku lawula leswi hi swi pimisaka. Na hi nga si babatisiwa hi fanela ku yima ku khanela ni ku yentxa mintxhumu leyi Yehovha a yi nyenyaka. Lowu hi wone ntxhumu wa kusungula ni wa lisima akuva hi hlivila wumhunu bya khale. Kambe akuva hi nyonxisa Yehovha hi ku helela hi fanela ku landzra xileleto xa ku va hi yambala ‘mhunu lwemumpshwa’. (Kl 3:10) Ka xidondzro lexi hi ta kambisisa leswaku i yini wumhunu lebyimpshwa? Hi nga byi yambalisa kuyini wumhunu lebyimpshwa hi va hi nga byi hlivili?

3. Hi kuya hi Ba-le-Galatia 5:22, 23, i yini ‘wumhunu lebyimpshwa’ nakone mhunu a swi kombisisa kuyini leswaku a byi yambalile?

³ ‘Wumhunu lebyimpswha’ i ku pimisa ni ku yentxa mintxhumu ku fana na Yehovha. Loko mhunu a yambala wumhunu lebyimpshwa a kombisa mhandzru wa moya wa Xikwembu Nkulukumba  nakone a pfumelela moya lowa ku xwenga akuva wu kongomisa mapimisela, matitwela ni swiyentxo swake. (Dondzra Ba-le-Galatia 5:22, 23.) Hi xikombiso, a zrandzra Yehovha ni vhanu vake. (Mt 22:36-39) Mhunu yelweyo a tama a nyonxa nambi loko a langutana ni mindzringo. (Yk 1:2-4) A tikazratela ku kondletela ku zrula. (Mt 5:9) A lehisela vambeni mbilu ni ku va komba wunene. (Kl 3:13) A zrandzra ni ku yentxa leswinene. (Lk 6:35) A swi kombisa hi mintizro leswaku a ni lipfumelo ledzri tiyiki ka Papayi wake wa le matilweni. (Yk 2:18) Nambi loko a pfukiwa a tama a kombisa ku zrula.—1Ko 9:25, 27; Ti 3:2.

4. Ha yini hi fanela ku kombisa matsrhamela hinkwawu lama kombisiwiki ka Ba-le-Galatia 5:22, 23, akuva hi yambala wumhunu lebyimpshwa? Tlhamuxela.

⁴ Akuva hi yamabala wumhunu lebyimpshwa swi djula hi txutxela matsrhamela lama kombisiwiki ka buku dzra Ba-le-Galatia 5:22, 23, ni ka swiyenge swimbeni swa Bibele. * A matsrhamela lawa a ma fani ni mpahla leyi hi nga yambalaka ntxhumu ha wun’we ha wun’we. Ku hlaya ntiyiso matsrhamela lawa hinkwawu ma fambisana. Hi xikombiso, loko u zrandzra mhunu mumbeni u ta mu lehisela mbilu u tlhela u mu komba wunene. Nakone akuva u mu komba wunene bya ntiyiso u fanela ku va mhunu wa ku zrula u tlhela u tikhoma.

5. Xana swi tlhamuxela yini ku ‘va ni ku yanakanya ka Kriste’, nakone ha yini hi fanela ku dondzra hi mahanyela ya Yesu? (1 Ba-le-Korinte 2:16)

⁵ Dondzra 1 Ba-le-Korinte 2:16. Akuva hi yambala wumhunu lebyimpshwa a swi djula ‘hi va ni ku yanakanya ka Kriste’. Leswi liki, hi fanela ku dondzra mayanakanyela ya Yesu hi tlhela hi mu yetisela. Yesu a kombisa matsrhamela ya Xikwembu Nkulukumba hi ku helela. Ku fana ni leswi xipelhu xi kombisaka leswi nga mahlweni ka xone, Yesu a kombisa leswi matsrhamela ya Yehovha ma nga xiswone. (Hb 1:3) Loko hi ya hi yanakanya ku fana na Yesu swi ta ya swi hi nabyalela ku va ni matsrhamela ya ku fana ni yake.—Flp 2:5.

6. He tini tinhla leti hi fanelaka ku ti dzrimuka nkama lowu hi tikazratelaka ku yambala wumhunu lebyimpshwa?

⁶ Xana hi nga swi kota ku yetisela Yesu? Hi nga ha ku: ‘Yesu a hetisekile. A ni nge zi ni fanile na yene hi ku helela!’ Loko u titwa hi ndlela leyo dzrimuka tinhla leti landzrelaka. Ya ku sungula, u vumbiwe a xifanisweni xa Yehovha na Yesu. Xileswo u nga hlawula ku va yetisela, u va u swi kota hi ku ya hi wuswikoti byaku.  (Gn 1:26) Ya wubidzri, a moya wa ku xwenga wa Xikwembu Nkulukumba i ntamu lowukulu a wuyakwini hinkwabyu. Hi ku pfuniwa ha wone, u nga swi kota ku hetisisa mintxhumu leyi a wu nge ti yi kota loko a wo yi yentxa ha wuswaku. Ya wuzrazru, Yehovha a nga yimelanga leswaku u kombisa mihandzru ya moya hi ku helela swoswi. Xileswo Papayi wezru lwa nga ni lizrandzru a ta nyika lava nga ni dumbo dzra ku hanya hi la ku nga helikiki la misaveni 1.000 wa malembe akuva va va lava hetisekiki. (Mpf 20:1-3) Leswi Yehovha a swi djulaka kwezru, i ku va hi yentxa hinkwaswu leswi hi nga swi kotaka ni ku va hi dumba mpfunu wake.

7. I yini leswi hi ta ka swi kambisisa swoswi?

⁷ Xana he yini ndlela ya ku kongoma leyi hi nga mu yetiselaka ha yone Yesu? Hi ta kambisisa mune wa matsrhamela ya mhandzru wa moya wa Xikwembu Nkulukumba. Ka tsrhamela ha dzrin’we hi ta vona leswi hi nga swi dondzraka ka ndlela leyi Yesu a kombisiki hayone tsrhamela ledzro. Hi ta kambisisa swivutiso swa kukazri leswi taka hi pfuna ku kambela ndlela leyi hi kombisaka ha yone tsrhamela ha dzrin’we, ni ku hi pfuna ku yampswisa nkama lowu hi tikazratelaka ku yambala wumhunu lebyimpshwa.

8. Xana Yesu a dzri kombise hi ndlela yini lizrandzru?

⁸ Lizrandzru dzrikulu ledzri Yesu a nga na dzrone ha Yehovha, dzri mu susumetele kuva a nyikela gandzrelo ka Papayi wake ni ku va a hi tizrula. (Yh 14:31; 15:13) Ndlela leyi Yesu a hanyiki ha yone la misaveni yi swi beke livaleni leswaku a va zrandzra ngopfu vhanu. Siku ni siku a a kombisa ntwelawusiwana ni lizrandzru nambi ka vhanu lava a va mu kaneta. Ndlela ya lisima leyi Yesu a kombisiki leswaku a a va zrandzra ha yone vhanu i ku va dondzrisa mayelanu ni Mfumu wa Xikwembu Nkulukumba. (Lk 4:43, 44) Yesu a tlhele a kombisa lizrandzru dzrake ha Xikwembu Nkulukumba ni vhanu hi ku tinyikela hi ku swi zrandzra akuva a fa hi ndlela ya ku vavisa a mavokweni ya vadohi. Hi ku yentxa leswo a hi pfulele ndlela hinkwezru akuva hi kuma wutomi lebyi nga helikiki.

9. Xana hi nga mu yetisela hi ndlela yini Yesu loko hi kombisa lizrandzru ka vambeni?

⁹ Hi nyiketele wutomi byezru ka Yehovha hi tlhela hi babatisiwa hikusa ha mu zrandzra papayi wezru wa le tilweni. Ku fana na Yesu hi fanela ku kombisa lizrandzru dzrezru ha Yehovha hi ndlela leyi hi va khomaka ha yone vhanu vambeni. Mupostola Yohane a tsrale leswi: ‘Hikusa lwa nga zrandzrikiki makwavu lwa mu voniki, a nga swi koti ku zrandzra Xikwembu Nkulukumba lweyi a nga mu vonikiki.’ (1Yh 4:20) Hi nga ha tivutisa leswi: ‘Xana ni tikazratela ku kombisa lizrandzru ledzri tiyiki ka vambeni? Xana ni kombisa ntwela wusiwana ka vhanu vambeni nambi loko va ni khoma hi ndlela ya ku biha? Xana lizrandzru dzra ni susumetela akuva ni tizrisa nkama wanga ni mintxhumu yanga akuva ni pfuna vambeni leswaku va dondzra ha Yehovha? Xana ni tama ni yentxa ntizro lowu nambi loko vanyingi va nga yi nyiki lisima minzamu yanga kumbe va ni kaneta? Xana ni nga djula tindlela ni nkama lowu yengetelekiki a ntizrweni wa ku yentxa vadondzrisiwa?’—Ef 5:15, 16.

10. Xana Yesu a kondletele ku zrula hi ndlela yini?

¹⁰ Yesu a a li mhunu wa ku kondletela ku zrula. Loko vhanu va mu xanisa, a a nga tlheliseli wubihi hi wubihi. Kambe a yentxe ni leswi swi tlulaka leswo, a a li wa ku zranga a ku kondleteleni ka ku zrula, nakone a kutxe vambeni akuva va lulamisa timholova tavu. Hi xikombiso a dondzrise vhanu leswaku akuva Xikwembu Nkulukumba a yamukela wugandzreli byavu a va fanela ku hanyisana hi ku zrula ni vamakwavu. (Mt 5:9, 23, 24) Nakone a tlhele a pfuna vadondzrisiwa vake makhambi hinkwawu lawa va holovisaniki hi leswaku i mani a a ta va lwenkulu ku vone.—Lk 9:46-48; 22:24-27.

11. Hi nga ku kondletela hi ndlela yini ku zrula?

 ¹¹ Akuva hi va vakondleteli va ku zrula, a swi djuli hi tingawula ku pfuxa timholova ntsena. Swi djula hi va va ku sungula a ku kondleteleni ka ku zrula ni vambeni nakone hi kutxa vamakwezru akuva va lulamisa timholova tavu. (Flp 4:2, 3; Yk 3:17, 18) Hi fanela ku tivutisa leswi: ‘Xana ni tiyimisele ku kondletela ku zrula ku ya tlhasa kwini? Loko vamakwezru va ni khunguvanyisa, xana ni tsrhama na ni va bekele xiviti? Loko ni ni mhaka ya kukazri ni makwezru, xana ni yimela leswaku a va yene a zrangaka a ta akuva hi tata yi lulamisa, kumbe na tisrongahata ni va ni va wa ku sungula a ku kondleteleni ka ku zrula nambiloko a li yene a ni doheliki? Loko swi faneleka, xana na va kutxa vamakwezru lava nga ni mhaka ya kukazri akuva va kondletela ku zrula?’

12. Xana Yesu a kombise ntwela wusiwana hi ndlela yini?

¹² Yesu a a va twela wusiwana vhanu. (Mt 11:28-30) A kombise ntwela wusiwana hikuva mhunu lwa dzringaniselaka ka vhanu vambeni nambi ka swiyimu leswi kazrataka. Hi xikombiso, loko wansati wa Mufenikiya a kombela leswaku a hanyisa n’wanake, a mu hlamulile hi ndlela ya ku zrula. A ku sunguleni a yalile, kambe ntsrhaku ka loko a vone lipfumelo ledzrikulu ledzri kombisiwiki hi wansati lwiya, hi ku susumetiwa hi ntwela wusiwana, a dahe n’wanake. (Mt 15:22-28) Nambi leswi a a ni ntwela wusiwana, Yesu a nga tsrhikanga ku nyikela swilayu. Hi makhambi ya kukazri a kombise kombise tsrhamela ledzro, hi ku laya hi ndlela leyi kongomiki vhanu lava a va zrandzraka. Hi xikombiso, loko Petro a dzringise ku hlohlotela Yesu leswaku a nga hetisisi ku zrandzra ka Yehovha, Yesu a mu kawukile a mahlweni ka vadondzrisiwa lavambeni. (Mr 8:32, 33) Yesu a nga yentxanga leswo akuva a danisa Petro, kambe a a djula ku mu dondzrisa kun’we ni vadondzrisiwa lavambeni leswaku a va nga fanelanga va tikulisa. Handle ka ku ganaganeka Petro a danile, kambe a pfunekile hi ku kawukiwa loko.

13. Hi nga swi kombisa hi ndlela yini leswaku hi twela van’wana?

¹³ Loko hakunene hi djula ku kombisa ku twela vhanu vambeni, minkama yimbeni swi ta djula hi khanela na vone hi ndlela leyi kongomiki. Loko leswo swi yentxeka yetisela Yesu u va u nyikela swilayu leswi sukelaka Bibeleni. Khanela hi ndlela leyinene. Tiyiseka leswaku lava va zrandzraka Yehovha va tlhela va ku zrandzra, va ta xi yingiseta xilayu xaku. Tivutise leswi: ‘Xana ni ni xixixi xa ku vulavula ni mhunu loko a djula ku yentxa ntxhumu wa kukazri lowu hoxiki? Loko ni nyikela xilayu, xana ni xi nyikela hi ndlela ya ku zrula kumbe a ni na mhaka ni ndlela leyi ni xi nyikelaka ha yone? Xana ni nyikela xilayu hi leswi ni khunguvanyisiwiki hi leswi a swi yentxiki kumbe hi ku djula ku mu pfuna?’

14. Xana Yesu a kombise wunene hi ndlela yini?

¹⁴ Yesu a a ngo tiva leswi nga swinene ntsena, kambe a a tlhela a swi yentxa. Yesu a wa mu zrandzra Papayi wake xileswo minkama hinkwayu a yentxa leswi lulamiki hi swivangelo leswinene. Akuva hi va vhanu lavanene a swi yanelanga kuva hi kombisa wunene, kambe hi fanela ku byi kombisa hi swivangelo leswinene. Van’wana va nga ha tivutisa leswi: ‘Swi nga yentxeka ni kombisa wunene hi xivangelo lexi nga liki xinene?’ Ina, swi nga yentxeka. Hi xikombiso, Yesu a vulavule hi vhanu lava a va pfuna swisiwana loko va voniwa hi vhanu akuva va kulungeliwa. Kambe ka Yehovha, wunene lebyi kalaka byi nge na swivangelo leswinene a byi pfuni ntxhumu.—Mt 6:1-4.

15. Xana hi nga byi kombisisa ku yini wunene bya ntiyiso?

¹⁵ Hi nga kombisa leswaku hi ni wunene bya ntiyiso loko hi yentxela wunene van’wana na hi nga yimeli ku hakeliwa. Tivutise leswi: ‘Xana ni tsrhika ni navela ku yentxa leswinene kambe  ni hetelela hi ku va ni nga yentxi? I yini lexi ni susumetelaka ku yentxela wunene vambeni?

16. I yini leswi hi fanelaka ku swi yentxa siku ni siku nakone ha yini?

¹⁶ A hi fanelanga hi pimisa leswaku hi fanela ku yima ku txutxela wumhunu lebyimpswha loko hi babatisiwile. Nambi ntsrhaku ka loko hi babatisiwile, hi fanela ku tama hi txutxela ni ku sizrelela wumhunu lebyimpswha. Hi nga yentxa leswo hi ku va siku ni siku hi djuletela mikhandlu ya ku kombisa mihandzru ya moya lowa ku xwenga. Ha yini? Hikusa Yehovha a nga yentxa ntxhumu wun’wana ni wun’wana, hi ku tizrisa ntamu wake ku nga moya lowa ku xwenga. (Gn 1:2) Xileswo tsrhamela dzrin’wana ni dzrin’wana dzra moya lowa ku xwenga dzri fanela ku hi susumetela ku yentxa xa kukazri. Hi xikombiso, mudondzrisiwa Yakobe a tsrale leswi: ‘Ku pfumela loku ngeke na mintizro ku file.’ (Yk 2:26) Na wo matsrhamela laman’wana ya moya wa ku xwenga wa Xikwembu Nkulukumba, loko ma nga kombisiwi hi mintizro ma file. Minkama hinkwayu leyi hi kombisaka matsrhamela ya moya lowa ku xwenga, hi swi beka livaleni leswaku moya lowa ku xwenga wa tizra a ndzreni kwezru.

17. I yini leswi hi fanelaka ku swi yentxa loko hi pfa hi hluleka ku kombisa mhandzru wa moya?

¹⁷ Nambi vakriste lava nga ni malembe manyingi na va babatisiwile va pfa va hluleka ku kombisa a mihandzru ya moya. Kambe a xa lisima i kuva va nga kazrali. Pimisa hi xikombiso lexi. Xana a wu ta txukumeta mpahla yaku leyi u yi zrandzraka ngopfu hi leswi yi handzrukikinyana? Im him. Kambe u ta yentxa hinkwaswu akuva u zrunga la ku handzrukiki, u tlhela u tivonela akuva u nga ha phindhi. Hi ndlela leyi fanaka loko u phazamile ka ndlela leyi u khomiki kumbe u yanguliki ha yone mhunu mumbeni, u nga kazrali. Tikazratele kuva u kondletela ku zrula ni mhunu yelweyo u va u kombela kuva a ku dzrivalela. Leswo swi nga pfuna akuva mi tlhela mi va ni wunghanu lebyinene. Tlhela u tikazratela kuva u nga ha phindhi xihoxo lexi fanaka.

18. Xana hi nga tiyiseka ha yini?

¹⁸ Hi tlangela swinene hi leswi hi nga ni xikombiso xa Yesu akuva hi xi yetisela. Loko hi ya hi yetisela mayanakanyela ya Yesu, swi ta hi nabyalela ku yentxa leswi a a swi yentxa. Loko hi ya hi fana na Yesu swi ta hi nabyalela ku yambala wumhunu lebyimpswha. Ka xidondzro lexi hi kambisise mune wa matsrhamela ya mhandzru wa moya wa Xikwembu Nkulukumba. Ha yini u nga tinyiki nkama wa ku kambisisa matsrhamela mambeni ya mhandzru wa moya wa Xikwembu Nkulukumba ni ku kambisisa ndlela leyi u nga ma kombisaka ha yone? U nga kuma tinhlokomhaka tinyingi leti khanelaka hi mhaka leyi ka Nkongomiso Wo Endla Ndzavisiso Wa Timbhoni Ta Yehovha, hansi ka nhlokomhaka leyi liki, “Mahanyelo Ya Vakreste”, u gama u ya ka “Mihandzu Ya Moya”. Tiyiseka leswaku loko u tikazrata, Yehovha a ta ku pfuna akuva u kota ku yambala wumhunu lebyimpshwa.