1. Kɛkɔnge kelekaka nkfumbola lonto lɔso?

 AYALE sombolongola batisimo nde, ɛnɔnyi emangha kana ɛnɔnyi efula, isankfumɔ nkombolaka ndjala la yopo yɛ lonto lɔ Yehova ɔkɔpakande. Djɛ ndjala la yopo yɛ lonto lɔkɔ, iso ladjɛ ndjapamela tokanyi tɔso. Lamo? Ladjikɛnde lonto lɔso ndekaka nkfumbwama má tokanyi tɔso. Ntsha iso nkanelaka mbala la mbala djɛ nsasangɛ mposɛ yɛso yɛ demba, mbɔ koko tongotepelaka la tongonanghaka akambo wa nyɛtshi. (Ɛfɛ. 4:17-19) L’onkoko onkina, ntsha iso ndodjɛ wɔɔngɔ wɔso la tokanyi tɔ wɔlɔ, tongolekaka ntepela la nangha akambo lá yopo yengosasangɛ Papa kɛso, Yehova.—Nga. 5:16.

2. Weepó wɛkɔnge wɔkɔpaso nshishima lá djamba djɛnɛ?

² Etengo isɛnyi lá djamba djemboheta, topangokoka nshimba tokanyi tonkfumɔ tɔ nyɛtshi dj’ipa ndjingela lá wɔɔngɔ wɔso. Koko iso nkoka ndɔsa nkano dj’ipa nkamba la tokanyi tɔkɔ. Lá ntondo k’iso ndongola batisimo, iso ladjɛ ntshika ntepela la nangha akambo wa Yehova otonande. Ɔsɔ ndeke djina djɛ ntondo la djeleka djonyi dj’oyɛso ladjɛ ntapola djɛ ndjoola lonto lɔ ntondo. Koko lonkina, dj’iso nsasangɛ Yehova lá yopo yɛ wɔlɔ, iso ladjɛ nɛmɛyɛ ɔlɛmbɛ wɔnɛ: ‘Nyɔlɔtɛ lonto lɔ bango.’ (Kɔl. 3:10) Lá djamba djɛnɛ, tongokadjimola weepó wɛ wɔlama wɛnɛ: ‘Lonto lɔ bango’ osakisolawɔ nge? Wopo wɔkɔnge w’okokaso ndɔta lonto lɔ bango edjinge nkindjɛ ntshikala la lɔkɔ?

3. Lá nkilika Ngalatiya 5:22, 23, ‘lonto lɔ bango’ osakisolawɔ nge, ko wopo wɔkɔnge onto okokande ndɔta lonto lɔkɔ?

³ ‘Lonto lɔ bango’ alekɔ yopo yɛ nkanela la yɛ nangha akambo yɛnyɛ lonto lɔ Yehova. Onto wɔmbɔlɔta lonto lɔ bango  ndjalaka la nanghedji djɛ lowambo lɔ nyuma kɛ Ndjambe, la ndjawolaka djɛ nyuma k’ekina nkfumbola tokanyi, mposɛ, la nanghedji djɛnde. (Wala Ngalatiya 5:22, 23.) Ndjɔmbɔmba, onto wɔkɔ nkɔpaka Yehova edjinge enkambi wɛ Nde. (Mat. 22:36-39) Onto wɔkɔ namaka osasa wɔnde kaanga winá w’opomanande l’ehemba. (Dja. 1:2-4) Nde alekɔ onto w’ilaka vu. (Mat. 5:9) Nde alekɔ la balentshitshi edjinge la wɔlɔ te anto ankina. (Kɔl. 3:13) Nde nkɔpaka la nanghaka kɛnɛ kelekɔ wɔlɔ. (Luka 6:35) Nde nyɛnyɛka má nanghedji djɛnde djɛ, nde alekɔ la djawo djɛ wolo te Papa kɛnde kel’olongo. (Dja. 2:18) Nde ndjalaka ɔkɔkɛ winá w’anto osolawɔ la ndakotaka winá w’oyɛnde la nkɛlɛ.—1 Kɔ. 9:25, 27; Tito 3:2.

4. Djɛ ndɔta lonto lɔ bango, iso nkoka nyɛnyɛ djekeka mmɔ mmɔ dj’owalawɔ lá Ngalatiya 5:22, 23? Pakisola.

⁴ Djɛ ndɔta lonto lɔ bango, iso ladjɛ ndjala la wekeka ankfumɔ w’owalawɔ lá Ngalatiya 5:22, 23 edjinge lá avɛrse ankina walekɔ lá Bible. * Wekeka wasɔ wapalekɔ etengo ntshendja djelekɔ lonto dj’ɔlɔtakande kɛmɔ kɛmɔ. Lá nsɔsɔlɔ, wekeka efula mfɔnaka l’ankina. Ndjɔmbɔmba, ntsha nsɔsɔlɔ wɛ nkɔpaka winako, ongoyala la wɔlɔ edjinge la balentshitshi tende. Lonkina, djɛ ndjala nsɔsɔlɔ kanga wɔlɔ, wɛ ladjɛ ndjala ɔkɔkɛ edjinge la ndakota.

5. Kɛkɔnge kesakisola ndjala ‘l’ikanyi yɛ Kristo,’ ko lamo oyɛso ladjɛ ndjeka lowiko lɔ Yeso? (1 Kɔrɛtɔ 2:16)

⁵ Wala 1 Kɔrɛtɔ 2:16. Djɛ ndɔta lonto lɔ bango, iso ladjɛ ndjala ‘l’ikanyi yɛ Kristo.’ L’etepela enkina, iso ladjɛ ndjeka wopo wɔ Yeso ndakanelaka, ko másɔ ndoowokola. Yeso ɛnyɛka wekeka wa lowambo lɔ nyuma kɛ Ndjambe lá lɛdji lɔ djɔ. Lá ndjɔmbɔmba k’ilendjeyɛ yeposɛka onto ngo wopo woyɛnde, nde ɛnyɛka wekeka wa Yehova ngo wopo w’oyɛwɔ nsɔsɔlɔ. (Heb. 1:3) Winá wɔ sotaleke nkanela etengo Yeso, ndeke songotalekaka nangha akambo etengo nde la songolekaka ndonga djɛ nyɛnyɛ lonto lɔnde lá yopo yɛ wɔlɔ.—Flp. 2:5.

6. Akambo wakɔnge w’oyɛso ladjɛ mvungɔka winá wilaso welo djɛ ndɔta lonto lɔ bango?

⁶ Iso nkoka nsɔsɔlɔ nkilika ndjɔmbɔmba kɛ Yeso? Tokoka ntepela ente: ‘Yeso ayalaka djɔ. Mpayalaki djɔ etengo nde!’ Ntsha oyawokɛnde nghɔsɔ, mbɔ vungɔ akambo wa nsɔsɔlɔ wanɛ. Ntondontondo wɛ otongamaka l’ɛfɔ kɛ Yehova nya Yeso. Djɛkondeke wɛ nkoka nsɔna djɛ ndawokola, la ndjala etenbo iwɔ lá  lɛdji lɔmɔtshi. (Ewa. 1:26) Djoyi dj’epe, nyuma k’ekina kɛ Ndjambe kelekɔ nkfulu keleka wolo l’andja w’otondo. M’okotshɔ wɔ nyuma kɛkɔ, wɛ nkoka nangha akambo wangopakoke nangha má wolo wɔko nghɔmɛlɛ kaanga ndambo daambi. Nkambo dj’esato, Yehova apakɔlɔmbɛ djɛ wɛ nyɛnyɛ lowambo lɔ nyuma lá lɛdji lɔ djɔ winá wɔsɔ. Djɛkondeke, Papa kɛso kɛ ngandji alonghanyɛka ɛnɔnyi 1 000 djɛ wanɛ walekɔ la nkongi djɛ mbika lanɛ lá looko ntoyala djɔ. (Ndj. 20:1-3) Kɛnɛ kɛ Yehova ɔtɔlɔmbande winá wɔsɔ nde ndjila welo w’efula la ndawɛkɛ t’okotshɔ wɔnde.

7. Kɛkɔnge k’ɔkɔpaso nshishima?

⁷ Ko lá wopo wɔkɔnge wɔ kɔɔ w’okokaso ndjokola Yeso? Tɔkɔpa nshishima lá yopasɛ wekeka anɛyi wa lowambo lɔ nyuma kɛ Ndjambe. Lá djekeka mmɔ mmɔ, tɔngɛna olakanyelo w’okokaso mba má wopo wɔ Yeso ndɛnyɛ wekeka wakɔ. La tongoshishima weepó ɛmɔtshi wekoka ntokotshɛ dj’iso ndashishima djɛ ndenda ntsha tɔmbɔlɔngɔsɔla lonto lɔso lɔ bango wɔlɔ.

8. Wopo wɔkɔnge Yeso ndɛnyɛ ngandji kɛnde te anto?

⁸ Ngandji k’efula keyalaki la Yeso te Yehova k’otshindaka djɛ ndapekala akambo amɔtshi lá nkambo djɛ Papa kɛnde edjinge lá nkambo djɛso. (Dj. 14:31; 15:13) Yeso ɛnyɛka ngandji k’efula kɛ ndokaka anto má yopo yɛ lowiko lɔ ndawikaka lanɛ lá looko. Mfu inkfumɔ, nde Ayalaki la ngandji edjinge la nkɛtshi kaanga winá w’anto amɔtshi iyonanyɛka. Yopo yeleka djonyi yɛ ndɛnyɛ ngandji kɛnde te anto nde, má ndaalakanyɛ akambo walendana l’Onkfumi wɔ Ndjambe. (Luka 4:43, 44) Yeso ɛnyɛka lonkina ngandji kɛnde kɛ ndapekala te Ndjambe la te anto ma ndjawola nyɛna ndjolo la ndjakema nyɔyi kɛ nyɛtshi me ananghi y’evunga. Má nangha nghɔsɔ, nde atɔpɛyɛka isankfumɔ mbamba kɛ mba lowiko l’etshinda.

9. Wopo wɔkɔnge w’okokaso ndjokola Yeso má ndjoka anto ankina ngandji?

⁹ Toyalambolaka te Papa kɛso kel’olongo Yehova la tolongolaka batisimo ladjikɛnde iso ndɔɔkɔpaka. Djɛkondeke, ngo ngete Yeso, iso ladjɛ nyɛnyɛ ngandji k’okaso Yehova má wopo w’onanghelaso anto akambo. Ɔpɔstɔlɔ Djɔanɛ afunaka ante: ‘Onto wopakɔpɛ wɔnanyɔ wɔnde wɛnande, apakoke nkɔpa Ndjambe, kanga ndɔpɛnyi.’ (1 Dj. 4:20) Iso nkoka ndawopola ente: ‘Lemi ndekɔ la ngandji k’efula te anto? Lemi ndjokaka anto ankina nkɛtshi kaanga ntsha iwɔ walekɔ wayi wolo te lemi? Ngandji kengontshindake djɛ nkamba la winá wɛmi edjinge la mfalanga yɛmi djɛ nkotshɛ anto ankina dj’iwɔ ndjeka djɛ ndjewa Yehova? Langoyalake entshupa djɛ nangha nkambo djɛsɔ kaanga ntsha anto efula wapalekɔ la djedjɛ lá welo w’ilami kana wangonanyɛke? Lemi nkoka mba topo tɔ ndeka ndapɛyɛ l’olemo wɔ nkfumba anto ambeki?’—Ɛfɛ. 5:15, 16.

10. Kɛkɔnge k’ɛnyɛ djɛ Yeso ayalaka onto wilaki vu?

¹⁰ Yeso ayalaka onto w’ilaki vu. Winá w’anto iyonanghelaka nyɛtshi, nde atakawoyɛki nyɛtshi tá nyɛtshi. Koko nde atakoma ngo lá nangha nghɔsɔ toko. Nde ɔsaki nonghanyi kɛ ndjila vu la akembɛki anto ankina djɛ ndjewɔ wayi waposɛka ampɔsɔ. Ndjɔmbɔmba, nde álakanyɛka ante iwɔ ladjɛ ndjila vu la wananyɔ wawɔ ntsha iwɔ nkombolaka djɛ Yehova ndjawola elambo wɛwɔ. (Mat. 5:9, 23, 24) Edjinge nde akotshɛki apɔstɔlɔ mbala la mbala dj’iwɔ ntshika ndjangasana djɛ ndjewa onto woleka ekekete l’anteyi kɛwɔ.—Luka 9:46-48; 22:24-27.

11. Wopo wɔkɔnge w’okokaso ndjala anto w’ilaka vu?

¹¹ Djɛ ndjala onto wilaka vu, iso ladjɛ nangha akambo efula koko apengo ndota akambo wayakalaka ekakasano toko. Iso ladjɛ ndjila welo djɛ ndjila vu l’anto ankina la nkembɛ wananyɔ l’ankaana yɛso djɛ ndjewɔ  wayi w’ampɔsɔ. (Flp. 4:2, 3; Dja. 3:17, 18) Iso nkoka ndawopola weepó wɛnɛ: ‘Tii lá lɛdji lɔkɔnge loyalakami entshupa djɛ ndapekala l’ikanyi yɛ ndjila vu l’anto ankina? Ntsha wɔnanyɔ kana nkaana ambonkiyanyɛ, langowombake onkomba? Langokongake dj’onto onkina ndɔsa nonghanyi kɛ ndilá la lemi vu, ndokoko langoyalake onto wɔ ntondo w’otapola djina djɛ ndjila vu kaanga winá w’ɛnamawɔ etengo onto wɔkɔ ndeke lombonanghela nyɛtshi? Langokembɛke anto walekɔ l’okakasano djɛ ndjila vu l’anteyi kɛwɔ ntsha nkokaka?’

12. Wopo wɔkɔnge Yeso ndɛnyɛ djɛ nde ayalaki wɔlɔ?

¹² Yeso ayalaki la wɔlɔ w’oloko. (Mat. 11:28-30) Nde ɛnyɛka djɛ ayalakaki wɔlɔ edjinge l’ekanedji kɛ wɔlɔ kaanga lá winá w’ekakasano wɛ wolo. Ndjɔmbɔmba, winá wɔ omoto w’ose Finikiya ndɔwɔndɛ djɛ nkɔnɔla wɔnande, nde atonaka lɔlɔmbɔ lɔnde má bango, koko winá wɔ ndɛɛnyɛka djawo djɛnde, nde akɔnɔlaka wɔnande la wɔlɔ onkfumɔ. (Mat. 15:22-28) Kaanga Yeso ndayalaka onto wɔ wɔlɔ, nde atakaakandaki mpɛyɛ alako. Lá mbamba imɔtshi nde ɛnyɛki wɔlɔ wɔnde má nshimela anto amɔtshi wa ndakɔpaka akambo papopapoo. Ndjɔmbɔmba, winá wɔ Pɛtɛlɔ ndahonɛ nshimba Yeso dj’ipande nangha ɛkɔpa kɛ Yehova, Yeso opangolaka lá wiso w’ambeki ankina. (Mar. 8:32, 33) Nde atanangha nghɔsɔ, djɛ mpɛyɛ Pɛtɛlɔ nsɔnyi, koko djɛ ndɔpɛyɛ olakanyelo la djɛ ndjewola ambeki ankina dj’ipa iwɔ ndjala la lotamanyɛ. Ape l’ehamo Pɛtɛlɔ okaka ndambo kɛ nsɔnyi, koko nde awaka wapɔ má dilanyɛ djɛsɔ.

13. Wopo wɔkɔnge w’okokami ndjala onto wɔ wɔlɔ?

¹³ Djɛ nyɛnyɛ ente olekɔ l’oloko wɔlɔ te anto w’ɔkɔpɛ, wɛ ladjɛ nsawolaka nyawɔ akambo papopapoo lá winá ɛmɔtshi. Winá w’onanghɛ nghɔsɔ, okola Yeso má mposɛka alako wako má tɔkfɔ tolekɔ l’Otepela wɔ Ndjambe. Yala la loshilambo. Awola ente iwɔ nkɔpaka nangha kɛnɛ kelekɔ wɔlɔ, edjinge yala l’eshikikelo ente wanɛ wakɔpa Yehova la wakɔkɔpa wɛ wangawola alako wako. Yawopola weepó wɛnɛ: ‘Ndekɔ l’oloko wolo wɔ ntepela winá w’ɛnami onto ɔmɔtshi w’ɔkɔpami anangha nkambo mɔtshi djɛ nyɛtshi? Ntsha lambɛna djonyi djɛ mpɛyɛ dako, langotepelake lá yopo yɛ wɔlɔ ndokoko la nkɛlɛ? Elonga kɛkɔnge kentshinda djɛ mpɛyɛ dako? Ɔpɛyɛmi onto wɔnɛ dakonde, mande kɛnɛ konanghakande kengonyomadjɛke, ndokoko ladjikɛnde nkɔpa ndokotshɛ?’

14. Wopo wɔkɔnge Yeso ndɛnyɛ wɔlɔ wɔnde?

¹⁴ Yeso atewaki ngo kɛnɛ kelekɔ wɔlɔ toko, koko lonkina nde ananghaki. Yeso nkɔpaka Papa kɛnde, djɛkondeke nde nanghaka winá enkfumɔ kɛnɛ kelekɔ wɔlɔ, l’ekoma wɛ wɔlɔ. Djekeka dj’etawɔ wɔlɔ nyɛnamaka má kɛnɛ k’onanghelaso anto ankina. Ɔsɔ alekɔ djekeka dj’oyɛso ladjɛ nyɛnyɛ lofu la lofu má nkotshɛka anto ankina. Topakoke nkoma ngo lá ndjewa la nangha kɛnɛ kelekɔ wɔlɔ, koko iso ladjɛ nanghaka l’ekoma wɛ wɔlɔ. Tokoka ndawopola ente ‘onto nkoka nangha kɛnɛ kelekɔ wɔlɔ l’ekoma wɛ nyɛtshi?’ Ee, nkokaka. Ndjɔmbɔmba, Yeso atepelaka nkambo dj’anto amɔtshi wapɛyɛki epapɛyɛ djɛ nkotshɛ ase ɔmvɔ, koko wánángháki kenkfumɔ k’iyakoka nangha djɛ anto ankina ndjewa epapɛyɛ wɛwɔ. Kaanga kɛnɛ k’iyananghaka iyayalaka wɔlɔ, koko epapɛyɛ wɛwɔ wetayala la ntshina le Yehova.—Mat. 6:1-4.

15. Wopo wɔkɔnge w’okokaso ndjala wɔlɔ lá lɛdji lɔ nsɔsɔlɔ?

¹⁵ Iso nkoka ndjetama anto wa wɔlɔ ngo ntsha tonangha akambo wa wɔlɔ la donga djepalekɔ djɛ lokaki. Djɛkondeke iso ladjɛ ndawopola ente: ‘Lemi langewake kɛnɛ kelekɔ wɔlɔ edjinge langonanghake? Ekoma wɛkɔnge wentshindaka djɛ nangha akambo wa wɔlɔ?’

16. Kɛkɔnge k’oyɛso ladjɛ nanghaka mfu inkfumɔ, ko lamo?

¹⁶ Totakanelake ente ntsha tombolongola batisimo mbɔ koko tomboshiyɛ ndɔta lonto lɔ bango la topalekɔ lonkina la djonyi djɛ ndjila welo. Lonto lɔ bango alekɔ etengo esendja kɛ wɔlɔ kɛ ‘bango’ k’oyɛso ladjɛ nkindjɛ nama lá yopo yɛ wɔlɔ. Yopo imɔtshi y’okokaso nangha nkambo djɛsɔ nde, má mponaka mfu inkfumɔ topo t’okokaso nyɛnyɛ lowambo lɔ nyuma kɛ Ndjambe. Lamo? Ladjikɛnde Yehova alekɔ Ndjambe k’ɛnyɛ akambo wande má naghedji, edjinge nyuma kɛnde kelekɔ wolo wokamba olemo. (Ewa. 1:2) Djɛkondeke wekeka ankfumɔ wa lowambo lɔ nyuma ladjɛ ntshindaka nanghedji djɛso. Ndjɔmbɔmba, ombeki Djakɔbɔ afunaka ante: ‘Djawo djepalekɔ la nanghedji mbovɔ.’ (Dja. 2:26) Nghɔsɔ ndeke oyɛwɔ edjinge lá kɛnɛ kelendana la wekeka ankfumɔ wa lowambo lɔ nyuma kɛ Ndjambe. Winá enkfumɔ wɛ sɔngɛnyɛka wekeka wasɔ, tɔngɛnyɛka ente nyuma kɛ Ndjambe kekamba olemo leso.

17. Oyɛso ladjɛ nangha nge ntsha topalongisa djɛ nyɛnyɛ lowambo lɔ nyuma?

¹⁷ Lá winá ɛmɔtshi, kaanga Akristo wambolongola batisimo ɛnɔnyi efula wapalongaka djɛ nyɛnyɛ lowambo lɔ nyuma. Koko nkambo deka djonyi nde, nsamba mpekɔ. Tokoshishima ndjɔmbɔmba kɛnɛ. Ntsha esendja k’ɔkɔpakɛ efula kembatshɛ, ɔngɔhɔnyɔla mbala kɛkɔ kɛmɔ? Lako. Wɛ ɔngɔtɛla la nkɔmɛ nkfumɔ l’edjena kɛ yatshɛ ntsha nkokaka. Ko masɔ wɛ ongoleka ndjala la yewo y’efula. Wopo wɔk’ɔmɔ ndeke, ntsha lá mbamba kɛmɔtshi opalongisa djɛ nanghela onto ɔmɔtshi akambo la wɔlɔ, la balentshitshi, kana la ngandji, mbɔ koko tɔlɛmbake. Mpona imeyelo l’oloko ɔmɔ, nkoka ndɔngɔsɔla akambo la nkokotshɛ djɛ wɛ ndɔngɔsɔla djokanelo djɛko nya onto wɔkɔ. Ɔsa nkano djɛ ndeka nangha akambo waleka wɔlɔ t’etsho weyaye.

18. Nkambo djɛkɔnge dj’okokaso ndashikikɛ?

¹⁸ Ɔsɔngo oyɛso la djedjɛ lá wopo wɔ Yeso ndatotshikela ndjɔmbɔmba kɛ wɔlɔ! Winá wɔ sotaleke ndjokola ekanedji la eyalelo kɛnde, ndeke yongoleka ndjala wɔdju leso djɛ nangha akambo etengo nde. Winá wɔ sotaleke nangha akambo etengo Yeso, ndeke songotalekaka ndɔta lonto lɔ bango lá yopo yɛ wɔlɔ. Lá djamba djɛnɛ, tomboshishima ngo wekeka amangha wa lowambo lɔ nyuma kɛ Ndjambe. Lamo ngɔpɔshi winá djɛ nshishima wekeka ankina wa lowambo lɔ nyuma la ndashishima djɛ ndenda ntsha wɛ nyɛnyɛka wekeka wakɔ lá yopo yɛ wɔlɔ? Ongotana listɛ lɔ wamba wasɔ lá Index des Publications des Témoins de Jéhovah l’itɛ yɛ djoyi yetepela ante: “Lowiko l’Okristo” ko masɔ “Lowambo lɔ nyuma.” Yashikikɛ ente ntsha wɛ ndjila welo Yehova angokokotshɛ djɛ wɛ ndɔta lonto lɔ bango, edjinge djɛ wɛ ntshikala la lɔkɔ.