1. ¿Ambe úsïni eska ma sési jámaaka o nómbe?

 NÁJKIRUKACHI ióni páni jakaia engachi itsï atakuarhika o nótki xáni, iáminduechachi uékasïnga ísï jámani eska Tata Diosï Jeoba na jaiapanhentajka. Parachi úni ísï úni, jatsiskachi para jánguarhintani no no sési jásï ambe eratseni, jimbokachi imani ambe úsïnga ambe engachi eratsejka. Engachi méntku eratseni jauaka úni imani ambe engachi jucha tsitijka, imani ambechi uandaaka ka úni enga no sési jaka (Efes. 4:17-19). Joperu engachi ambakiti ambe eratseska, sánderu fásiliuati uandani ka úni imani ambe enga Tata Diosï Jeoba jaiapanhentajka (Gal. 5:16).

2. ¿Náki kurhamarhikuechanchi mókuantani jaua ini jorhenguarhikua jimbo?

² Ísï eskachi na exeka máteru jorhenguarhikua jimbo, nóchi úsïnga meru no no sési jásï ambe eratseni. Peruchi kʼóru úsïnga pʼíngukuarhini para no úni imani ambe engachi eratsejka. Ante dechi itsï atakuarhini jatsiskachi para nóteru uandania ka ni úni imani ambe enga Tata Diosï Jeoba kurhunhijka. Orhetachi ini ambe jatsiska para úni ka uétarhisïndi eskachi ísï uaaka parachi jimbanhi kʼuiripu máeni. Joperu, paraka Tata Diosï Jeoba sési pʼikuarheraaka, ístuchi jatsiska para kurhajchani ini juramukuani: Jimbanhi kʼuiripu máe je (Col. 3:10, TNM). Ini jorhenguarhikua jimbo, arini ambechi mókuntaaka: ¿ambe arhikuekasïni jimbanhi kʼuiripu máeni?, ¿nénachi uaa jimbanhi kʼuiripu máeni? ka ¿ambejtsïni jarhuataa parachi seguirini jarhani jimbanhi kʼuiripu máeni?

3. ¿Ambe arhikuekasïni jimbanhi kʼuiripu máeni ka nénachi úsïni indeni ambe? (Galasia 5:22, 23).

³ Nema enga jimbanhi kʼuiripu máejkia, ísï eratsesïndi ka ísï jámasïndi eska Tata Diosï Jeoba. Ka úsïngachi jimbanhi kʼuiripu  máeni jimbokachi jurajkusïnga eskajtsïni Tata Diosïri espiritu santu jarhuataaka; espiritu santu jimbo juchachi úsïnga ambakiti ambe eratseni, sési pʼikuarherani ka ístu ambakiti ambe úni (arhinta je Galasia 5:22, 23). Pori ejemplu, kʼuiripu ma enga mójtakukuarhijkia, xénchasïndi Tata Diosï Jeobani ka imeeri marhuarichani (Mat. 22:36-39). Ka sési pʼikuarherasïndi nájkiruka no sési nitamakuarhini jauaka (Sant. 1:2-4). Úsïndi eskaksï iáminduecha sési pájperaaka (Mat. 5:9). Tekaantskua jingoni jámasïndi ka sési kaasïndi máteruechani (Col. 3:12, 13, TNM). Tsitisïndi ambakiti ambe úni (Luk. 6:35). Imeeri jángua jingoni xarhatasïndi eska mintsikasïnga imeeri Taati auandarhu anapuni (Sant. 2:18). No sóntku ikiasïndi enga no sési kánhajka (Titu 3:2). Ka úsïndi pʼíngukuarhini enga tsʼéjkukuechani jatsiajka (1 Kor. 9:25, 27).

4. ¿Andichisï jatsi para iámindu kualidadichani xarhataani engaksï Galasia 5:22, 23 jimbo uandaajka?

⁴ Parachi jimbanhi kʼuiripu máeni, jatsiskachi para xarhataani imani kualidadichani engaksï Galasia 5:22, 23 jimbo jaka ka máteru kualidadichani enga ístu Biblia uandaajka. * Íksï kualidadicha no ísïisti komueska takusï ambe engachi mándani arhijka jukantani. Sánderu sési, ma kualidadi sáno májkuenisti eska máteru kualidadi. Pori ejemplu, engachi meru xénchaajka máteruechani, tekaantstisïngachi imeecha jingoni ka sésichi kaasïnga. Ka parachi meru ambakiti kʼuiripu máeni, jatsiskachi para pʼíngukuarhini ka no sóntku ikiani.

5. ¿Ambe arhikuekasïni “Kristueri eratsekuani” jatsini, ka andichisï jatsipirini para jorhenguarhini na enga jámeenga Jesúsi? (1 Korintu 2:16).

⁵ (Arhinta je 1 Korintu 2:16). Parachi úni jimbanhi kʼuiripu máeni, uétarhisïndi eskachi jatsiaka “Kristueri eratsekuani”. I ambe arhikuekasïndi eskachi jatsiska para jorhenguarhini ísï eratseni eska Jesúsi, ka ísïchi uaaka ísï jámani eska ima. Jesúsi sési xarhataasïndi iámindu kualidadichani enga Tata Diosïri espiritu úrpijka. Ísï eska espeju ma, Jesúsi ísïmindu xarhataasïndi iámindu Tata Diosï Jeobaeri kualidadichani (Ebr. 1:3). Engachi jánguarhintaska ísï eratseni eska Jesúsi, sánderuchi uaaka ísï jámani eska ima (Filip. 2:5).

6. ¿Ambechi jatsiski para miántani engachi jánguarhintani jaka parachi jimbanhi kʼuiripu máeni?

⁶ ¿Meruchi uaa ísï jámani eska Jesúsi na jámeenga? Jamberijtsï chá eratsejka: “Jesúsi perfektuesti. ¡Ji no uaaka meru ísï jámani eska ima!”. Engajtsï chá ísï eratsejka, miá je arini tanimu ambe. Primeru, chájtsï kueraanhaska  parajtsï ísï jámani eska Tata Diosï Jeoba ka Jesúsi. Nájkirukajtsï no uaaka merumindu ísï jámani eska imeecha, chájtsï uaaka jánguarhintani para sáno májkueni jámani eska imeecha (Gén. 1:26). Segundu, Tata Diosïri espiritu santu kánikua uinhapisti. Imeeri jarhuajperata jingoni chájtsï uaaka úni ambe engajtsï jandiajku no úpiringa úni. Terseru, Tata Diosï Jeoba no erokuarhisïndi eskajtsï chá iáiasï sési xarhatauaka imani kualidadichani enga imeeri espiritu santu úrpijka. Miánta je eska juchaari Taati enga kánikua xénchpejka 1,000 uéxurhini íntsauaka imeechani engaksï erokuarhini jaka Echerirhu irekani paraksï perfektueni (Jaŋ. 20:1-3). Ambe enga Tata Diosï Jeoba erokuarhijka iásï, jindeesti eskachi kánikua jánguarhintaaka iámindu kualidadichani xarhataani ka mintsikani eska imajtsïni jarhuataaka.

7. ¿Ambechi exeni jaua iáiasï?

⁷ ¿Ambechi uaa úni parachi ísï jámani eska Jesúsi? Ju je exeani tʼámu kualidadichani enga Tata Diosïri espiritu úrpijka. Exeakachi néna xarhataaspi Jesúsi ini kualidadichani ka ambe engachi uaaka jorhenguarhini. Ístuchi exeauaka máru kurhamarhikuechani engajtsïni jarhuataaka exeni sinchi jatsiski para úni ambe ma parachi seguirini jarhani mójtakurhini.

8. ¿Néna xarhataspi Jesúsi eska xénchasïreenga Tata Diosï Jeobani ka kʼuiripuechani?

⁸ Jesúsi xáni xénchasïreendi Tata Diosï Jeobani enga uékapka uánikua ambe úni imani jimbo ka ístu juchantsïni jimbo (Juanu 14:31; 15:13). Enga Jesúsi Echerirhu japka, xarhataspti na enga xáni xénchauenga kʼuiripuechani imani ambe jimbo enga úpka. Méntkisï sési kaaspti kʼuiripuechani ka pʼamojkuaspti asta imeechani engaksï no sési kámeenga. Xarhataspti eska xénchaasïreenga kʼuiripuechani jimboka aianguaspka Tata Diosïri Reinueri ambe (Luk. 4:43, 44). Ístu, xarhataspti eska kánikua xénchasïreenga Tata Diosïni ka kʼuiripuechani jimboka jurajkuspka eska no sési kánhapiringa ka eskaksï no sési úricha uándikupiringa. Ka enga Jesúsi indeni ambe úpka, iásïchi iáminduecha uaakia irekani para méntkisï.

9. ¿Nénachi uaa xarhatani eskachi xénchaasïnga kʼuiripuechani ísï eska Jesúsi?

⁹ Jimbokachi xénchasïnga juchaari Taati auandarhu anapuni, aiakukuarhespkachi imani ka itsï atakuarhini. Ka ísï eska Jesúsi, jatsipiringachi para xénchaani kʼuiripuechani. Apostoli Juanu karaspti: “Ima enga no uékajka ermanu jémbani enga exejka, ¿néna uaa uékani Diosïni enga no méni exeka?” (1 Juanu 4:20). Ju je eratsentani ini ambe: “¿Mintsita jingoni xénchaasïni máteruechani? ¿Pʼamojkuasïni máteruechani nájkirukajtsïni imeecha no sési kámaaka? ¿Úrasïni juchiiti tiempu ka ambe engani jatsikuarheka parani aianguani máteru kʼuiripuechani Tata Diosï Jeobaeri ambe jimbokani xénchaasïnga? ¿Úsïni indeni ambe nájkirukaksï sáno iámindu kʼuiripuecha no jukaparharajka o nájkirukajtsïni no sési kámajka? ¿Uaa sánderuni aianhpini?” (Efes. 5:15, 16).

10. ¿Ambe úspi Jesúsi parakaksï iáminduecha sési pájperapiringa?

¹⁰ Jesúsi sési pájperasïreendi máteruecha jingoni. Nájkirukaksï kʼuiripuecha no sési kámeenga, ima no májkueni kaasïreendi. Sánderu sési, ima jánguarhintasïreendi sési pájperani kʼuiripuecha jingoni ka arhiasïreendi máteruechani parakaksï imeechajtu sési peentaapiringa problemechani engaksï jatsiapiringa máteruecha jingoni. Pori ejemplu, Jesúsi jorhendaaspti kʼuiripuechani eskaksï jatsispka para sési pájperantani imeecheri ermanu jémba jingoni para Tata Diosï Jeoba jaiapanhentani engaksï imeecha kʼéri ambe arhipiringa (Mat. 5:9, 23, 24). Ka mémindu arhiaspti imeeri apostolichani eskaksï no jámapiringa arhirperani né sánderu kʼéri ambeespi (Luk. 9:46-48; 22:24-27).

11. ¿Ambechi uaa úni parachi iáminduecha sési pájperani?

¹¹ Parakachi iáminduecha sési pájperaaka, nóchi solu jatsiska para no arhirperani máteruecha jingoni. Uétarhisïndi eskachi jucha ueenaaka úni  ambe ma parachi sési pájperantani nema jingoni ka ístu arhiani erachichani paraksï imeechajtu sési peentaani problemechani engaksï jatsiauaka máteruecha jingoni (Filip. 4:2, 3; Sant. 3:17, 18). Úpiringachi eratsentani arini ambe: “¿Úsïni ambe enga xáni uétarhijka parani sési pájperantani máteruecha jingoni? ¿Jatanhekusïni erachini ma engareni no sési pʼikuastaka? ¿Erokuarhisïni eska máteru kʼuiripu uaaka ambe ma parachi sési pájperantani? ¿O ji orhetani úsïni ambe ma nájkirukani eratsejka eska ima kʼuiripu kulpa jatsiska? Enga sési jauaka, ¿uandaxekuasïni imeechani engaksï no sési pájperajka paraksï sési peentaani imeecheri problemechani?”.

12. ¿Néna xarhataspi Jesúsi eska sési kámpisïreenga?

¹² Jesúsi sési kámpisïreendi (Mat. 11:28-30). Xénchaasïreendi kʼuiripuechani ka kurhangukuasïreendi. Pori ejemplu, enga Fenisia anapu uarhiiti ma kómarhipka Jesúsini eska ambakerantapiringa imeeri nanaka sapichuni, ima orheta no ísï úspti. Peru sési kámaspti uarhiitini ka ambakerantaspti nanaka sapichuni enga exepka na enga xáni mintsikeenga ima uarhiiti (Mat. 15:22-28). Joperu ístu Jesúsi xarhataspti eska sési kámpisïreenga enga jurhimberantaapka imeechani enga xénchauenga. Pori ejemplu, enga Pedru arhipka Jesúsini eska no úpiringa ambe enga Tata Diosï Jeoba uékeenga, Jesúsi jurhimberantaspti Pedruni máteru imeeri chúxapatichani japarini (Mar. 8:32, 33). Jesúsi no úspti indeni ambe para Pedruni kʼuratsetani, sánderu sési, ísï úspti para jorhendani imani ka ístu máteru chúxapatichani eskaksï no jámapiringa pʼínguni para ima no úni ambe enga Tata Diosï uéjka. Jamberi Pedru kʼuratsepti sáni, joperu inde ambe kánikua marhuakuspti.

13. ¿Ménichanchi ambe jatsiski para úni parachi xarhatani eskachi sési kaasïnga máteruechani?

¹³ Para xarhatani eskachi sési kaasïnga imeechani engachi xénchaajka, ménichanchi jatsiska para konsejuechani íntskuani. Engachi ísï uaaka, ju je májkueni úni eska Jesúsi ka eskaksï konsejuecha Bibliarhu pʼitakata jauaka. Ju je sési kaani máteruechani ka mintsikani eskaksï imeecha engaksï xénchajka Tata Diosï Jeobani ka ístu juchantsïni, uaakaksï ambe engachi arhiauaka. Ju je eratsentani ini ambe: “¿Konseju íntskusïni nemani engani exejka eska no sési úni jarhasïnga ambe ma? ¿Ka néna íntskusïni konsejuni? ¿Iatsitakuarhu o xukasïni? ¿Andisïni konseju íntskujki? ¿Jindeeski jimbokani ikiaxaka imani jingoni o jimbokani uékasïnga eska sési jauaka?”.

14. ¿Néna xarhataspi Jesúsi eska ambakiti kʼuiripu máespka?

¹⁴ Jesúsi no solu mítesti ambe enga sési jaka, sino úsïndi indeni ambe. Ima xénchasïndi Taati jémbani, jimbosï méntkisï újti ambe enga sési jaka ka ambakiti mintsita ma jingoni. Ima enga ambakiti kʼuiripu máejka méntkisï jirinhakuntasïndi néna jarhuataani máteruechani ka ísï úsïndi. No solu uétarhisïndi míteni ambe enga sési jaka, sino jatsiskachi para mintsita jingoni ísï úni. Nema úpirindi kurhamarhikuarhini: “¿Uaa nema úni ambe ma máteruni jimbo solu para sési pakarani máteruecha jingoni?”. Jo, nema uaati ísï úni. Pori ejemplu, Jesúsi uandaspti eska imeecha engaksï limosna íntsauenga pobrichani, ísïksï úsïreenga nomasi paraksï máteruecha exeani. Nájkiruka ísï xarhareenga enajkiksï ambakiti ambe úni jarheeni, Tata Diosï Jeoba no jaiapanhentasïreendi indeni ambe (Mat. 6:1-4).

15. ¿Nénachi uaa meru ambakiti kʼuiripu máeni?

¹⁵ Juchachi uaaka ambakiti kʼuiripu máeni solu engachi mintsita jingoni úska ambakiti ambe para máteruechani jarhuataani ka no parachi juchajkumindu sési pakarani. Úpiringachi ini ambe eratsentani: “¿Míteski ambe enga sési jaka ka ístuni ísï úsïni? ¿Andisïni újki ambakiti ambe?”.

16. ¿Ambechi jatsiski para úni pauani pauani, ka andi?

¹⁶ Nóchi jatsipiringa para eratseni eska jimbokachi itsï atakuarhiskia nóteruchi uaakia imani ambe engachi ióntki ueenga ka eskachi nóteru ambe ma jatsiskia para úni. Jimbanhi kʼuiripu  máeni, ísïisti komueska xukuparhakua ma engachi jatsika para kuidarini. Ísï jimbo, pauani pauanchi jatsiska para jirinhakuntani néna xarhataani imani kualidadichani enga Tata Diosïri espiritu santu úrpijka. ¿Andi? Jimboka Tata Diosï Jeoba méntkisï ánchikuarhini jarhasïndi ka úrasïndi imeeri uinhapikuani parajtsïni jarhuatani xarhataani imeeri kualidadichani (Gén. 1:2). I ambe arhikuekasïndi eska mándani kualidadi enga espiritu santu úrpijka, úsïndi ka jarhuatasïndijtsïni parakachi ambakiti ambe uaaka. Pori ejemplu, Santiagu karaspti eska “jakajkukua, no jindeesïnga jakajkukua enga nómbe úkuechani jingonijka” (Sant. 2:26). Ka májkueni úkuarhisïndi máteru kualidadicha jingoni enga Tata Diosïri espiritu santu úrpijka. Engachi xarhataajka indeni kualidadichani, xarhatani jarhasïngachi eskajtsïni espiritu santusï jarhuatani jarhajka.

17. ¿Ambechi uaa úni engachi no uaaka sési xarhataani kualidadichani enga espiritu santu úrpijka?

¹⁷ Nájkirukaksï máru erachicha ióni páni jakaia engaksï itsï atakuarhika, ménichanisïksï no sési xarhataasïndi imani kualidadichani enga Tata Diosïri espiritu santu úrpijka. Ísï jimbo, uétarhisïndi eskaksï seguirini jauaka jánguarhintani paraksï xarhataani. Ju je eranhaskani ini ambe: enga karukurhipiringa takusï ma engachi kánikua tsitijka, ¿a no eskachi no jirejiresï kʼuanikupiringa? Sánderu sési, jánguarhintapiringachi sïrintani ka jiáni uératinchi sánderu kuidaripiringia. Sáno májkueni, engachi ménichani no xáni sési kámaska nemani o no tekaakuntani, nóchi jatsiska para chkétakuarhini. Engachi mintsita jingoni arhiska eskajtsïni puáchentaaka, uaakachi ménderu sési pájperantani imani jingoni. Ka jiáni uératini, ju je jánguarhintani parachi sánderu jingontku jámani.

18. ¿Ambeerichi uaa seguru jarhani?

¹⁸ ¡Kánikuachi agradesidu jarhaska engachi Jesúsiri ejempluni jatsika! Engachi jánguarhintaska májkueni eratseni eska Jesúsi, sánderu fásiliuati eskachi ísï jámaaka eska ima, ka ísïchi xarhataaka eskachi jimbanhi kʼuiripu máeskia. Ini jorhenguarhikua jimbo, soluchi tʼámu kualidadichani exeaska enga Tata Diosïri espiritu santu úrpijka. Peru sési japirindi eskachi arhutapiringa tiempu parachi jorhenguarhiani máteru kualidadichani ka exeni nénachi uaa sánderu sési xarhataani. Exentaakachi sánderu informasioni ixú Jarhuajperata paraksï Jeobaeri testiguecha estudiarini, partirhu “Kristianuecheri irekua” ka tátsekua “Ambe enga espiritu santu úrpijka”. Seguruchi jarhaska eska engachi jánguarhintaska parachi jimbanhi kʼuiripu máeni ka parachi nóteru méni ísï jámania eska ióntki, Tata Diosï Jeobajtsïni jarhuataati.