1. Kintu ki ekikuru ekikira kukwataho engeso zaitu?

 KATUBE tubatiziibwe kumara ebiro bike rundi kumara emyaka nyingi, itwena nitugonza kuba bantu Yahwe abarukugonza. Kusobora kuba bantu ba mulingo ogu, nitwetaaga kulema entekereza yaitu. Habwaki? Habwokuba engeso zaitu zisigikirra muno ha bitekerezo byaitu. Kakuba twikara nitutekerezaaho ebintu ebirukusemeza okwegomba kwaitu okw’omubiri, nitwija kubaza kandi tukole ebintu ebibi. (Bef. 4:17-19) Baitu kakuba twikara nitutekerezaaho ebintu ebirungi, nikiija kutwanguhira kubaza kandi n’okwetwaza omu mulingo ogurukusemeza Isiitwe Yahwe.​—Bag. 5:16.

2. Bikaguzo ki ebiturukugenda kubazaaho omu kicweka kinu?

² Nk’oku twarozere omu kicweka ekyahoire, titusobora kwerindira kimu ebitekerezo ebibi byona. Baitu nitusobora kucwamu kutahonderea ebitekerezo ebi. Tutakabatiziibwe, nitwetaaga kuleka kubaza n’okwetwaza omulingo Yahwe anoba. Oru nurwo orutambu orw’okubanza kandi orukukira obukuru omu kujuura omuntu owaira. Baitu kusobora kusemeza Yahwe omu bwijwire, tusemeriire kworobera ekiragiro ekirukugamba kiti: ‘Mujwale [omuntu] omuhyaka.’ (Bak. 3:10) Omu kicweka kinu nitwija kugarukamu ebikaguzo binu: Omuntu omuhyaka nikimanyisa ki? Nitusobora tuta kujwara omuntu omuhyaka kandi tukaikara tumujwaire?

3. Omuntu omuhyaka nikimanyisa ki, kandi omuntu amujwara ata? (Abagaratiya 5:22)

³ Omuntu ow’ajwaire omuntu omuhyaka, ayegera ha ntekereza hamu n’ebikorwa bya Yahwe. Omuntu ajwara omuntu omuhyaka kurabira omu kwoleka ekyana eky’omwoyo ogurukwera,  kandi n’okwikiriza omwoyo ogurukwera kukwataho ebitekerezo, enyehurra, hamu n’ebikorwa bye. (Soma Abagaratiya 5:22, 23.) Ekyokurorraho, agonza Yahwe hamu n’abantu be. (Mat. 22:36-39) Omuntu nk’ogu aikara aine okusemererwa n’obwaba naraba omu bizibu. (Yak. 1:2-4) Akurakuraniza obusinge. (Mat. 5:9) Agumiisiriza abantu abandi kandi abooleka embabazi. (Bak. 3:12,13) Agonza ebirungi kandi abikora. (Luk. 6:35) Kurabira omu bikorwa bye akyolekera kimu ngu aine okwikiriza okw’amaani omuli Ise ow’omu iguru. (Yak. 2:18) Aikara ali muculeezi abandi obubamwendereza kandi ayetanga obwayohebwa.​—1 Kol. 9:25, 27; Tit. 3:2.

4. Kusobora kujwara omuntu omuhyaka, habwaki nitwetaaga kukurakuraniza emiringo yoona erukubazibwaho omu Abagaratiya 5:22, 23 hamu n’omu Byahandiikirwe ebindi?

⁴ Kusobora kujwara omuntu omuhyaka nitwetaaga kukurakuraniza emiringo yoona erukubazibwaho omu Abagaratiya 5:22, 23 hamu n’emiringo endi erukubazibwaho omu Baibuli. * Emiringo enu teri ngoye ezitujwara rumu rumu. Amananu gali, emiringo erukukira obwingi n’esisana n’emiringo endi. Ekyokurorraho, kakuba mali oba n’ogonza mutaahi wawe, noija kumugumiisiriza kandi omwoleke embabazi. Ekindi, kusobora kuba muntu murungi mali osemeriire kuba muculeezi kandi n’okwoleka okwetanga.

5. Nikimanyisa ki kuba n’entekereza nk’eya Yesu, kandi habwaki tusemeriire kwegaho obwomeezi bwe? (Abafiripi 2:5)

⁵ Soma Abafiripi 2:5. Kusobora kujwara omuntu omuhyaka nitwetaaga kuba n’entekereza nk’eya Kristo. Ekirukumanyisa tusemeriire kwega omulingo Yesu atekereza kandi hanyuma tumwegereho. Yesu ayoleka ekyana eky’omwoyo kikumu ha kikumu. Nk’endolerwamu etaine kamogo, Yesu ayoleka emiringo ya Yahwe nk’oku eri, kikumi ha kikumi. (Baheb. 1:3) Obuturayeyongera kutekereza nka Yesu, nitwija kweyongera kwetwaza nka uwe kandi nitwija kusobora kwoleka emiringo nk’eye.

6. Biki ebitusemeriire kwijuka obuturukuba nitulengaho kujwara omuntu omuhyaka?

⁶ Mali nikisoboka kuhondera ekyokurorraho kya Yesu? Nitusobora kutekereza ngu: ‘Yesu ahikiriire. Titusobora kuba nka uwe kikumi ha kikumi.’ Obworaaba nukwo orukwehurra oti, ijuka ensonga zinu. Ey’okubanza, okahangwa  kuba nka Yahwe na Yesu. Nahabweki nosobora kucwamu kubegeraho, kandi nosobora kubegeraho ha rulengo orw’orukusobora. (Kub. 1:26) Eyakabiri, omwoyo ogurukwera nugo maani agarukukirrayo kimu omu buhangwa bwona. Habw’obukonyezi obw’omwoyo ogurukwera noija kuhikiiriza ebintu eby’otakusoboire kukora omu maani gaawe. Eyakasatu, Yahwe tarukukunihirramu omu kasumi kanu kwoleka ekyana eky’omwoyo ogurukwera kikumi ha kikumi. Amananu gali, Isiitwe ow’okugonza atekaniize emyaka 1,000, kukonyera abo abaine okunihira okw’okwikara omu nsi kufooka abahikiriire. (Kus. 20:1-3) Omu kasumi kanu, Yahwe ekyarukutwetaagisa nukwo kulengaho kukora ekiturukusobora kandi n’okumwesiga kutukonyera.

7. Kiki ekiturukugenda kubazaaho?

⁷ Miringo ki eitusobora kwegera hali Yesu? Omu bugufu nitwija kubazaaho emiringo ena ey’ekyana eky’omwoyo ogurukwera. Nitwija kurora kiki ekitusobora kwega kuruga omu mulingo Yesu yayolekeremu emiringo egi. Kandi nitwija kubazaaho ebikaguzo ebimu ebiratukonyera kwekebiija omulingo twemeriire obukirukuhika ha kujwara omuntu omuhyaka.

8. Yesu akooleka ata okugonza?

⁸ Okugonza Yesu akaba ainiire Yahwe kukamuletera kwefereza habwa Ise hamu naitwe. (Yoh. 14:31; 15:13) Yesu akooleka okugonza okw’amaani okwakaba ainiire abantu, kurabira omu mulingo yatwaizeemu obwomeezi bwe obwakaba ali omu nsi. Buli kiro, yayolekaga okugonza n’embabazi abantu abamu n’obubamuhakanizaaga. Omulingo omukuru Yesu yayolekere ngu akaba nagonza abantu nugwo ogw’okubegesa ebirukukwata ha Bukama bwa Ruhanga. (Luk. 4:43, 44) Ekindi, Yesu akooleka okugonza okw’ainiire Ruhanga hamu n’abantu kurabira omu kwehayo kubonabonesebwa kandi n’okwitwa abasiisi. Habw’okukora eki akatukingurraho omuhanda ogw’okutunga obwomeezi obutahwaho.

9. Nitusobora tuta kwegera ha kyokurorraho kya Yesu eky’okwoleka okugonza?

⁹ Tukehayo hali Yahwe kandi twabatizibwa habwokuba nitugonza Isiitwe ow’omu iguru. Nahabweki, nka Yesu tusemeriire kwoleka okugonza okutwiniire Yahwe kurabira omu mulingo tutwazaamu abantu. Omukwenda Yohana akahandiika ati: “Ogu atarukugonza mugenziwe ouyaboine, tasobora okugonza Ruhanga owataraboine.” (1 Yoh. 4:20) Nitusobora kwekaguza: ‘Nyiniire abantu okugonza okw’amaani? Nyoleka abantu embabazi n’obubaba bantwaize kubi? Kugonza kundetera kukozesa obwire bwange hamu n’ebintu ebinyine kukonyera abandi kwega hali Yahwe? Nyetekaniize kukora eki n’obukiraaba ngu abantu abarukukira obwingi tibarukusiima habw’amaani agandukuteekamu rundi n’obubampakaniza? Ninsobora kutunga emiringo endi ei nsobora kwongera ha bwire obundukumara omu mulimo ogw’okufoora abantu abegeswa?’​—Bef. 5:15, 16.

10. Yesu akakurakuraniza ata obusinge?

¹⁰ Yesu akaba ali muntu w’obusinge. Abantu obubamutwaize kubi atahoole enzigu, baitu akakora ekirukukiraho. Nuwe yabanzaaga kugarraho obusinge kandi akekambisa n’abandi kumaraho obutetegerezangana bwabo. Ekyokurorraho, akabegesa ngu basemeriire kugarraho obusinge n’abagenzi baabo obubaraaba nibagonza Yahwe aikirize okuramya kwabo. (Mat. 5:9, 23, 24) Kandi akaikara nakonyera abakwenda be kuleka kutonganira obukuru.​—Luk. 9:46-48; 22:24-27.

11. Nitusobora tuta kuba bantu abarukukurakuraniza obusinge?

¹¹ Kusobora kukurakuraniza obusinge, kwerinda kuleetaho obutabanguko kyonka tikirukumara. Niitwe tusemeriire kuteera orutambu orw’okubanza orwokugarraho obusinge n’abandi,  kandi n’okwekambisa ab’oruganda na banyaanya itwe kumaraho obutetegerezangana hagati yabo. (Baf. 4:2, 3; Yak. 3:17, 18) Nitusobora kwekaguza ebikaguzo binu: ‘Kiki ekinyetekaniize kwefereza kusobora kugarraho obusinge n’abandi? Ow’oruganda rundi munyaanya itwe obwakora ekintu kikansaliza mwahurra enzigu? Ndinda omuntu ountungire na uwe obutetegerezangana nuwe agarreho obusinge, rundi ninyowe nteera orutambu orw’okubanza n’obukiba nikizooka ngu omuntu ogu nuwe alesereho ekizibu eki? Obukiba kisemeriire, nyekambisa abo abaine obutetegerezangana kugarraho obusinge?’

12. Yesu akooleka ata embabazi?

¹² Yesu akaba aine embabazi. (Mat. 11:28-30) Akooleka embabazi kurabira omu kutwaza abantu kurungi, kandi n’omu mulingo ogw’okwetegereza n’obuyabaga ali omu nyikara ezigumire. Ekyokurorraho, omukazi Omukanani obuyamwesengeriize kukiza omwana we, ha kubanza Yesu atakole ekyakaba amusabire, baitu omukazi onu obuyayolekere okwikiriza okw’amaani, omu mulingo ogw’embabazi, akakiza omwana we. (Mat. 15:22-28) N’obukiraaba ngu Yesu akaba aine embabazi, tiyatiinaga kuhabura abandi. Obwire obumu yayolekaga embabazi abo abaarukugonza kurabira omu kubahabura. Ekyokurorraho, Petero obuyalengereho kutanga Yesu kukora Yahwe ekyarukugonza, Yesu akamuhana omu maiso g’abegeswa abandi. (Mar. 8:32, 33) Atakole kinu habw’okugonza kuswaza Petero, baitu kumutendeka kandi n’okwegesa abegeswa abandi kwerinda kwetumisiriza. Hataroho kugurukyagurukya Petero akaswara, baitu akagasirwa omu kuhanwa oku.

13. Nitusobora tuta kwoleka embabazi zonyini?

¹³ Kusobora kwoleka embabazi zonyini hali abo aborukugonza, obwire obumu nikisobora kukwetaagisa kubaha obuhabuzi. Obworakora eki, yegera ha kyokurorraho kya Yesu kurabira omu kubaha obuhabuzi oburukusigikirra ha misingi ya Baibuli. Batwaze kurungi. Baikiririzeemu ngu nibagonza kukora ebihikire kandi oyesige ngu abo abarukugonza Yahwe kandi abarukukugonza, nibaija kwikiriza obuhabuzi obw’obahaire habw’okubafaaho. Wekaguze ebikaguzo binu: ‘Nyine obumanzi obwokugira ekinabaza obundora omuntu oundukugonza nakora ekintu ekitahikire? Obumba nimpa obuhabuzi, mbaza omu mulingo ogw’embabazi rundi ogw’obukaali? Ekigendererwa kyange nikiha eky’okuha omuntu obuhabuzi? Muha obuhabuzi habwokuba aba ambihiize rundi mba ningonza kumukonyera?’

14. Yesu akooleka ata oburungi?

¹⁴ Yesu tagarukira ha kumanya oburungi kyonka baitu abuteeka n’omu nkora. Yesu n’agonza Ise, nahabweki buli kimu kyona ekyakora akikora n’ekigendererwa ekihikire. Omuntu omurungi aikara naserra emiringo eyokukonyeramu abandi. Kandi abakorra ebintu ebirungi. Tikirukumara kumanya ekintu ekihikire eky’okukora, tusemeriire kukikora, kandi n’okukikora twine ekigendererwa ekihikire. Omuntu nasobora kwekaguza, ‘Mali nikisoboka kukora ekintu ekihikire habw’ekigendererwa ekitahikire?’ Ego, nikisoboka. Ekyokurorraho Yesu akabazaaho abantu abaahaga abanaku ebisembo, baitu ababanzaaga kukigumya ngu abandi nibabarora nukwo babahaisanize. N’obukiraaba ngu ebikorwa byabo byabaga biri birungi tibyasemezaaga Yahwe.​—Mat. 6:1-4.

15. Nitusobora tuta kwoleka oburungi bwonyini?

¹⁵ Nitusobora kwoleka oburungi bwonyini kurabira omu kukora ekintu ekihikire habw’ekigendererwa ekihikire hatali habw’okwegondeza itwenka. Nosobora kwekaguza: ‘Ntaho obulyo obwokukora ekintu ekihikire omu kiikaro ky’okugarukira ha kukimanya kwonka? Obumba ninkora ebintu ebirungi mba nyine kigendererwa ki?’

16. Kiki ekitusemeriire kukora buli kiro, kandi habwaki?

¹⁶ Titusemeriire kutekereza ngu omulimo ogw’okujwara omuntu omuhyaka nigugarukira ha kubatizibwa. Omuntu omuhyaka nasisana nk’orugoye oruhyaka oruturukwetaaga kwikaza omu nyikara enungi. Omulingo gumu ogutusobora kukora eki, nugwo ogw’okuserra emiringo buli kiro eitusobora kwolekamu ekyana eky’omwoyo ogurukwera. Habwaki? Habwokuba Yahwe akozesa omwoyo gwe ogurukwera kukora ebintu. (Kub. 1:2) Nahabweki buli mulingo gwona oguleetwa ekyana eky’omwoyo ogurukwera, nigusobora kandi gusemeriire kutuleetera kugira ekitwakoraho. Ekyokurorraho omwegeswa Yakobo akahandiika ati: ‘Okwikiriza hataloho okukora kuba kufiire.’ (Yak. 2:26) Kandi eki nukwo kiri na ha miringo endi yoona ey’eretwa omwoyo ogurukwera. Buli murundi twoleka ekyana ky’omwoyo ogurukwera twoleka ngu omwoyo ogurukwera nigutukonyera.

17. Tusemeriire kwetwaza tuta obutulemwa kwoleka ekyana eky’omwoyo ogurukwera?

¹⁷ Obwire obumu n’Abakristaayo ababatiziibwe kumara emyaka nyingi balemwa kwoleka ekyana eky’omwoyo ogurukwera. Baitu ekirukukira obukuru, titusemeriire kujwaha. Tekerezaaho ekyokurorraho kinu. Kakuba otaagura orugoye orworukugonza nosobora kurunaga aho naaho? Nangwa. Busaho kugurukyagurukya, n’obwegendereza obwingi noija kurusona obukiraaba nikisoboka. Kandi hanyuma noija kwikara noyerinda kwongera kurusiisa. Omu mulingo nugwo gumu, obwire obumu kakuba olemwa kutwaza omuntu omu mulingo ogw’embabazi, ogw’okugumiisiriza, rundi ogw’okugonza, otahwamu amaani. Saba ekiganyiro kuruga ha mutima nukwo osobole kwikara n’enkoragana enungi n’omuntu ogu, kandi hanyuma cweramu kimu kwetwaza kurungi.

18. Kiki ekitusobora kugumya?

¹⁸ Nitusiima muno habw’ekyokurorraho kya Yesu! Obuturayegera ha ntekereza ye, nitwija kweyongera kwetwaza nka uwe. Obuturayeyongera kwetwaza nka Yesu nitwija kweyongera kujwara omuntu omuhyaka. Omu kicweka kinu, tubalizeeho emiringo ena ey’eretwa ekyana eky’omwoyo ogurukwera. Habwaki otatunga obwire obw’okweijukya emiringo endi ey’eretwa ekyana eky’omwoyo kandi n’okwecumitirizaaho omulingo orukwolekamu emiringo egi? Noija kutunga orukarra orw’ebicweka ebirukukwata ha isomo limu omu Research Guide for Jehovah’s Witnesses hansi y’omutwe “Christian Life” kandi hanyuma genda nambere hali “Fruitage of the Spirit.” Kigumye ngu obworakora ekyorukusobora Yahwe naija kukukonyera kujwara omuntu omuhyaka kandi n’okwikara omujwaire.