1. Cinyi cingabata-bata maningi unhu wedu?

 AMWENI aano makore akawanda aa abhabhatidzwa, uye amweni ano mazuwa manganani. Asi zvezvirokwazvo azvinei no makore atinawo taatabhabhatidzwa, tese hedu tirikuedza kugara no unhu unopfadza Djehovha. Uye ciro cingatibetsera kuita izvona, ngecekuonerera marangariro edu ngekuti zviro zvatinorangarira zvinobata-bata maningi unhu wedu. Kana tikarangarira kupfadza zvido zvedu zvekunyama, ticareketa uye ticaita zviro zvakashata. (Aef. 4:17-19) Asi kana tikadzadza ndangariro dzedu no zviro zvakanaka, ticareketa uye ticaita zviro nge mushobo unopfadza Baba edu Djehovha.—Aga. 5:16.

2. Mufundo ino ticada kuona mibvunzo dzipi?

² Hingana zvetakaona mu fundo yakadarika, isusu atingakwanisi kurekera zvacose murangariro wakashata. Asi isusu tino simba re kuonerera maitiro edu. atidikani kuita zviro maererano no murangariro wakashata. Danho rokutanga rinokosha kuti tibvise unhu wekare, zvinodikana kuizwa tisati tabhabhatidzwa. Tinodikana kurekera kureketa no kuita zviro zvinozondwa na Djehovha. Asi kuti tipfadze Djehovha, tinodikana kuita zviro zvinopinda ipona, tinodikana: “Kupfeka unhu upsva.” (Ako. 3:10) Mu fundo ino ticaona mibvunzo dzinoteera: Cinyi cinozwi “unhu upsva”? Tingaita kudini kuti tipfeke unhu upsva uye kuti tisausiye?

3. Maererano na Agaratiya 5:22, 23, cinyi cinozwi “unhu upsva,” uye munhu ungaupfeka kudini?

³ “Unhu upsva” ndi umwe mushobo wekurangarira no kuita zviro hingana Djehovha. Munhu paanopfeka unhu upsva,  unonga uno mawara e zvibereko zve mwiya mucena wa Mwari, uye unosiya kuti mwiya mucena ugadzirise mazwiro ake, ndangariro dzake uye maitiro ake. (Erengai Agaratiya 5:22, 23.) Ngo muezaniso, munhu uno unhu upsva unoda Djehovha uye hama dzake mu kutenda. (Mat. 22:36-39) Iyena unorumbwawo akapfara kunyazi ecisongana no zvinetso. (Tg. 1:2-4) Iyena unopeta masimba kuti agare mu runyararo no anhu amweni. (Mat. 5:9) Une mwoyo unononoka kutsamwa uye une unaki ne anhu amweni. (Ako. 3:13) Iyena unoda uye unoita zviro zvakanaka. (Ruka 6:35) Zvese zvaanoita, zvinopangidza kuti ano kutenda kakabamba muna Djehovha. (Tg. 2:18) Unodzibata uye unorumbwa akaterama kunyazi paanoambirhwa.—1Ako. 9:25, 27; Tito 3:2.

4. Kodi tingakwanisadi kamare kusakurira mawara ari pana Agaratiya 5:22, 23 rimwe nga rimwe? Panganidzai.

⁴ Kuti tipfeke unhu upsva, tinodikana kugara no mawara anorekethwa pana Agaratiya 5:22, 23 uye mawara anorekethwa mu matii amweni e Bhaibheri. * Mawara aya, aazi kugara hingana macira atinopfeka rimwe nga rimwe. Zvezvirokwazvo, mawara akawanda akabatana no mawara amweni. Ngo muezaniso, kana imwimwi mecida mudoni wenyu, mucamupangidzira mwoyo unononoka kutsamwa uye unaki. Uye kana tecida kugara anhu akanaka kamare, tinodikana kugara anhu ano upfawi uye anodzibata.

5. Zviri kuda kureyei “kugara no ndangariro dza Kristu,” uye ngei tecidikana kufunda nge zve upenyu wake? (1 Akorinti 2:16)

⁵ Erengai 1 Akorinti 2:16. Kuti tigare no unhu upsva, tinodikana “kugara no ndangariro dza Kristu.” Nge masoko amweni, zvinoda kureya kuti tinodikana kuziya mirangariro ya Djesu uye toteedzera muezaniso wake. Djesu ainga ano mawara ese anobatanidzwa pa zvibereko zvese zve mwiya mucena wa Mwari. Hingana supeya yakakwana, Djesu anopangidza mawara ese a Mwari nge mushobo wakakwana. Hino kana tikarangarira hingana na Djesu, zvicaita nyore kuteedzera maitiro ake uye kugara no unhu wake.—Afi. 2:5.

6. Ngazvipi zviro zvitatu zvatinodikana kuedzurira pa kugara no unhu upsva?

⁶ Zvinobviradi kamare kuteedzera muezaniso wa Djesu here? Tingarangarira teciti: ‘Djesu ainga ari munhu akakwana. Andizokwanisi  kugara hingana iyena kamare!’ Kana imwimwi mecizwa kudaro, edzurirai zviro zvinoteera. Cekutanga, isusu takasikwa kuti titodzane na Djehovha uye na Djesu. Hino, tingakwanisa kuteedzera miezaniso yawo, uye tingatokwanisawo kutodzana maningi nawo. (Gen. 1:26) Cecipiri, tinodikana kuedzurira kuti mwiya mucena wa Mwari, i simba rakanyasa kubamba mu nyika yese. Tecibetserhwa nge mwiya mucena, tinokwanisa kuita zviro zvatainga tisikazokwanisi kuita. Cecitatu, Djehovha anoziya kuti parizvino, imwimwi amukwanisi kugara no zvibereko zve mwiya mucena nge mushobo wakakwana, zvekutoti ayena akasanangura makore anokwana kuita 1000 kuitira kuti anhu ano kariro yokugara panyika agare anhu akakwana. (Zvak. 20:1-3) Asi zvinoda Djehovha, nge zvekuti umwe na umwe wedu apete masimba uye agonde no rubetso rake.

7. Ticaonei kubvira zvino?

⁷ Cinyi catinodikana kuteedzera pa muezaniso wa Djesu? Ticaona mawara marongomuna e zvibereko zve mwiya mucena, uye kuti Djesu akapangidza kudini rimwe na rimwe. Ticaonawo kuti tingafundei ne muezaniso wa Djesu, pedzepo tozoonawo kuti tirikubudiririawo kudini pakuteedzera muezaniso wa Djesu uye kugara ne unhu upsva.

8. Djesu akapangidza kudini rudo rake?

⁸ Djesu aida maningi Djehovha ndiyo ndaa akaita cibairo ngekuti anotida. (Juau 14:31; 15:13) Mushobo waakararama pasi pano, Djesu aipangidza makurire akaita rudo rake ku anhu. Ayena ainga ano rudo nguwa dzese kunyazi ne anhu aya aimuphikisa. Djesu akapangidza rudo rake ku anhu nge kuafundisa nge zve Umambo wa Mwari. (Ruka 4:43, 44) Kusiya izvona, rudo raainga anaro kuna Djehovha ne anhu rainga rakakura zvokuti akapasa upenyu wake uye akauraiwa zvinorhwadza mu nyara dze ashaishi. Uye nge ndaa ye zvaakaita tese tinomukana wekuona upenyu usikaperi.

9. Tingapangidzira kudini rudo uye toteedzera muezaniso wa Djesu?

⁹ Isusu tinoda Baba edu zvokuti takadzipira kaari tobhabhatidzwa. Ndiyo ndaa isusu tinodikana kuteedzera muezaniso wa Djesu, ngekubata zvakanaka anhu amweni. Mupostori Juau wakatara kuti: “Kana munhu asikadi hama yake anonga ecinyepa, ngekuti kana ecizonda hama yake yaanoona aangadi Mwari waasikazi kumboona.” (1 Juau 4:20) Ndiyo ndaa tinodikana kudzibvunzisa kuti: ‘Kodi inini ndinodadi mudoni wangu zvezvirokwazvo here? Ndinobata zvakanaka anhu amweni kunyazi ecindibata zvakashata here? Ndinoseenzesa nguwa yangu kuti ndibetsere anhu amweni kuti aziye nge zva Djehovha here? Ndakagadzirira kuita izvona kunyazi anhu asina basa no zvandinoita uye ecindizonda here? Ndingapsvaka nguwa kuti ndiite basa rokuita afundi here?’—Aef. 5:15, 16.

10. Djesu aiitei kuti pagare ne runyararo?

¹⁰ Djesu ainga munhu aida runyararo. Paaibathwa zvisina unatsi ayena ainga asikahwirinziri, zvezvirokwazvo Djesu aitoita kuti paoneke runyararo. Uye aitokohomedzesawo amweni kuti agadzirise kusazwirana kawo. Nge muezaniso, ayena akafundisa kuti kana munhu ecida kupfadza Djehovha, anodikana kugara murunyararo ne hama dzake. (Mat. 5:9, 23, 24) Djesu akabetserazve afundi ake kuti agare ne runyararo paaireketedzana kuti ndiyani mukuru pakati pawo.—Ruka 9:46-48; 22:24-27.

11. Tingaita kudini kuti paoneke runyararo?

¹¹ Kuti paoneke runyararo tinodikana kuita zvakawanda kudarika kuita kuti tisareketedzane. Tinodikana kutanga kuita kuti paoneke  runyararo uye kukohomedzesa hama ne hanzvadzi kuti dziite zvimwezvo. (Afi. 4:2, 3; Tg. 3:17, 18) Isusu tingadzibvunzisa kuti: ‘Ndakagadzirira kugara murunyararo ne amweni dakara papi? Ndinomusambo wekugara no bundu hama kana hanzvadzi ikandirhwadzisa here? Ndinoimira amweni kuti auye kandiri kuti pagare ne runyararo here? Kana kuti ndini ndinotanga kunyazi ndikaona kuti munhuwo ndiyena unonga ashaisha? Kana zvecibvira ndinokohomedzesawo hama dzangu kuti dziite kuti pakati pawo pagare ne runyararo here?’

12. Djesu akapangidza kudini unaki?

¹² Djesu ainga ano unaki. (Mat. 11:28-30) Ayena aipangidza unaki ngekubata amweni zvakanaka uye nge kuabata nge mushobo uri pakati ne pakati kunyazi mu migariro inoshupha. Ngo muezaniso, mwanakadzi we ku Fenisiya paakadeketera kuna Djesu kuti aporese mwana wake, Djesu akareketa naye zvakanaka. Pakutanga ayena aazi kuita zvaainga akumbirhwa, asi mumasure mekuona kutenda kakura ke mwanakadziwo, ayena akaporesa mwana wake. (Mat. 15:22-28) Djesu ainga ano unaki, asi ainga asikarekeri kupasa mazano. Nguwa dzimweni ayena aipangidza unaki nge kupasa mazano anhu aya aaida. Nge muezaniso, Pedru paakabhuya kuti Djesu ainga asikadikani kufa, Djesu akamusumurura pamberi pe afundi amweni. (Mk. 8:32, 33) Ayena aazi kuita izvona kuti apsverudze Pedru, kusiyana nazvo, Djesu aida kuroedza Pedru uye kupangidza afundi amweni kuti ainga asikadikani kudzigonda. Pamweni Pedru wakapsveruka asi iyena waidikana kupaswa mupango uu.

13. Tingapangidza kudini unaki?

¹³ Kana tecida kupangidza unaki ku anhu amweni, tinodikanawo kureketa nawo nge mushobo wakanaka. Nguwa dzimweni tinodikana kubudira pamhene. Kana izvi zvikaitika teedzerai Djesu uye pasai mazano anobva mu Bhaibheri. Pangidzai unaki nge mareketero amunoita. Musarangarire kuti aona aangatambiri mazano amunoapasa, asi tenderai kuti aya anoda Djehovha uye amunodawo anoda kuita zviro zvakanaka uye acatambira mazano enyu. Dzibvunzisei kuti: ‘Ndino ushingi wekupasa mazano pandinoona kuti munhu wandinoda waapadhuze kuita cishaishi here? Pandinopasa mazano ndinozviita ne unaki kana kuti ndinozviita ne hasha? Cinyi cinondiitisa kuti ndipase zano irona? Ndirikuita izvi ngekuti zvaanoita zvinondinyangadza here? Kana kuti ndirikuda zvakamunakira?’

14. Ngei Djesu aiita zvakanaka ku amweni?

¹⁴ Djesu ainga asikandokohomedzesi basi amweni kuti aite zvakanaka, asi ayena aitozviitawo. Nge ndaa ye rudo rake kuna Djehovha, Djesu aiita zvakanaka nguwa dzese nge cikonzero cakanaka. Munhu wakanaka unoteedzera muezaniso uu uye unopeta masimba kuti atange iyena kuitira amweni zvakanaka. Kuti tigare anhu akanaka azvikwani basi kuita zviro zvakanaka. Tinodikana kuita zviro zvakanaka ne cikonzero cakanaka. Amweni angadzibvunzisa kuti: ‘Zvingaitadi kamare kuita zviro zvakanaka ne cikonzero cakashata here?’ Honde zvinobvira. Nge muezaniso, Djesu akabhuya nge zve anhu aipasa mare arombo pamberi pe anhu amweni ngekuda kusimbwa nawo. Asi kuna Djehovha kuita ciro cakanaka ne cikonzero cakashata azvibetseri ciro.—Mat. 6:1-4.

15. Munhu ungaitira kudini anhu amweni zvakanaka?

¹⁵ Munhu ucakwanisa kuitira amweni zvakanaka kana asikaetseri kupaswa ciro. Dzibvunzisei kuti: ‘Ndino cido cekuita zvakanaka asi ndinopedzesera ndisikacazviiti here?  Cinyi cinondiitisa kuti ndiitire amweni zviro zvakanaka?’

16. Zuwa rimwe na rimwe tinodikana kuitei, uye ngei?

¹⁶ Atidikani kurangarira kuti tinodikana kugara ne unhu upsva mumasure mekubhabhatidzwa. Tinodikana kupeta masimba kuti “unhu wedu upsva” urumbwe wakanaka. Tingazviita nge kupsvaka mikana zuwa ne zuwa kuti tipangidze zvibereko zve mwiya mucena. Ngei? Ngekuti Djehovha ndi Mwari anoseenza uye simba rake rinoseenzawo. (Gen. 1:2) Ndiyo ndaa zvibereko zvese zve mwiya mucena zvinodikana kutitora kuti tiite cito. Ngo muezaniso, mufundi Tiyago wakatara kuti: “Kutenda kusina mabasa kakafa.” (Tg. 2:26) Ndizvonawo zvinodikana kuizwa ne zvibereko zvese zve mwiya mucena wa Mwari. Pese patinopangidza zvibereko zve mwiya mucena, tinonga tecipangidza kuti mwiya mucena wa Mwari ndiwona urikutibetsera.

17. Tinodikana kuitei kana tikambokonerhwa kupangidza zvibereko zve mwiya mucena?

¹⁷ Kunyazi munhu waano makore akawanda abhabhatidzwa, unorumbwa asikazi kukwana, uye nguwa dzimweni unoposha kupangidza zvibereko zve mwiya mucena. Asi cinokosha kusama kuremba. Cimborangarirai zvinoteera, kana mukamwesa padoko hanzu yenyu yamunoda maningi, maizoipsveta here? Haiwa. Maizoita zviri zvese kuti muisone uye zvisazoitikezve. Nge mushobo umwewo kana mukasama kubata munhu ne mwoyo unononoka kutsamwa, ne rudo uye unaki musarembe. Itai kuti pakati penyu pagare ne runyararo uye kumbirai rurekerero. Izvona zvicabetsera maningi uye mucagarazve ne ushamwari ne munhu wakhona. Petai masimba kuti izvona zvisaitikezve mberiyo.

18. Tingagara ne cokwadi cipi?

¹⁸ Zvezvirokwazvo zvakanaka maningi kuti titeedzere muezaniso wa Djesu Kristu! Kana tikateedzera marangariro ake zvicaita nyore kuti titeedzere maitiro ake. Uye patinoteedzera maitiro a Djesu, ticakwanisa kupangidza unhu upsva. Mu fundo ino taongorora mawara marongomuna e zvibereko zve mwiya mucena. Zvakadini kumbopsvaka nguwa kuti muongorore mawara amweni e zvibereko zve mwiya mucena, uye monyasa kurangarira mapangidzire amurikuaita? Mucaona mafundo akawanda anoreketa nge zve nyaya ii mu Bhuku Rinobatsira Zvapupu zvaJehovha Pakutsvakurudza, psvakai pakazwi “Upenyu hwevaKristu” uye endai pakazwi “Chibereko cheMweya Mutsvene.” Mungagonda henyu kuti kana mukaita dii renyu, Djehovha acamubetsera kugara ne unhu upsva zvino uye nekusikaperi.