1. Бистиң кандыг кижи болурувус чүүден хамааржыр?

 ДҮҮН азы он-он чылдар бурунгаар сугга суктурган-даа болзувусса, Иегова биске ынак болзун деп күзээр бис. Ындыг болзун дизе, угаан-бодалывыста чүү барын хайгаараар ужурлуг бис. Чүге дизе кандыг кижи болурувус бодалдарывыстан хамааржыр. Бир эвес бачыттыг бүдүжүвүстүң бодалдарын бодаар болзувусса, бир-ле багай чүүлдү чугаалап азы кылыптар бис (Эф. 4:17—19). А бир эвес бажывысты эки бодалдар-биле долдурар болзувусса, Иегованың күзеп турары ышкаш чугааланып, алдынар бис (Гал. 5:16).

2. Бо статьяга кандыг айтырыгларны сайгарар бис?

² Мурнунда статьяда көргенивис дег, шупту багай бодалдарны бодавайн баары болдунмас. Ынчалза-даа ол бодалдарның аайы-биле алдынмайн барып шыдаар бис. Сугга суктурарының мурнунда Иеговага таарышпас чүүлдерни чугаалаарын база кылырын соксадыр ужурлуг бис. Оон башка «биеэги бүдүжүвүстү» адыра сивирип кааптары болдунмас. Ынчалза-даа чүгле ону кылгаш, Иегованың сеткилинге кирери чедишпес. Библия бисти: «Чаа кижиниң бүдүжүн кедип ал[ыңар]» — деп кыйгырып турар (Кол. 3:10). Бо статья ийи айтырыгга харыылаар: 1) «Чаа кижиниң бүдүжү» дээрге чүл ол? 2) Ону канчаар кедерил база кажан-даа ужулбазыл?

3. «Чаа кижиниң бүдүжүн» кедип алган кижи кандыг боор база ону кедер дизе, чүнү канчаарыл? (Галатчыларга 5:22, 23).

³ «Чаа кижиниң бүдүжүн» кедип алыры дээрге Иегова ышкаш боданып, алдынары-дыр. Ону кедип алган кижи бодалдарынче, минниишкиннеринче база ажыл-херээнче Бурганның ыдыктыг сүлдезинге салдар чедирерин чөпшээреп  турар. (Номчуптуңар: Галатчыларга 5:22, 23.) Ол чүүл кайыын көстүп турар? Ындыг кижи Иеговага болгаш Ооң чонунга ынак (Мф. 22:36—39). Ол кандыг-даа аар-берге шенелделерге таварышкаш, өөрүшкүзүн чидирбес (Иак. 1:2—4). Ол амыр-тайбыңны тургузуп, деткип чоруур (Мф. 5:9). Ол шыдамык болгаш буянныг (Кол. 3:12, 13). Ол ачы-буян чедиреринге ынак (Лк. 6:35). Кандыг-даа ажыл-херек ооң быжыг бүзүрелин көргүзүп турар (Иак. 2:18). А кажан ону кандыг-бир кижи өжегерээн хорададырга, ол бодун томаартып алгаш, хорадавас база күткүлге үезинде бодун туттунуп билир (1 Кор. 9:25, 27; Тит. 3:2).

4. Ыдыктыг сүлдениң үре-түңнелинче кирип турар шынарларны, хеп ышкаш, аңгы-аңгы кылдыр илередири болдунар бе?

⁴ «Чаа кижиниң бүдүжүн» кедип алыр дизе, ыдыктыг сүлдениң үре-түңнелинче кирип турар шупту шынарларны хары угда сайзырадыр херек *. Ол шынарлар бир хүнде бирээзин, өске хүнде өскезин кедип алыр хептерге дөмей эвес. Христиан кижиге херек шынарлар бот-боттары-биле сырый харылзаалыг база оларны аңгы-аңгы кылдыр илередири болдунмас. Чижээ, чанымда кижиге шыдамык бооп, ачы-буян чедирбес болзумза, мени аңаа сеткилинден ынак деп болур бе? Бир эвес бодумну томаартып, туттунуп билбес болзумза, мени буянныг деп болур бе?

5. Христос ышкаш боданыры дээрге чүү дээни ол база ооң чуртталгазын шинчилээри чүге чугула? (1 Коринфичилерге 2:16).

⁵ Номчуптуңар: 1 Коринфичилерге 2:16. «Чаа кижиниң бүдүжүн» кедип алыр дизе, Христостуң канчаар боданып чораанын тодарадып алгаш, ол ышкаш боданып өөренир херек. Иисус ыдыктыг сүлдениң шынарларының шуптузун тергиини-биле сайзырадып алган. Ол Адазының шынарларын кара олчаан илередип чоруур (Евр. 1:3). Христос ышкаш боданырын кызар болзувусса, аңаа оон-даа артык дөмей апаар бис (Флп. 2:5).

6. «Чаа кижиниң бүдүжүн» кедип алыксап турар улус чүнүң дугайында сактыр болза эки?

⁶ Ынчаарга Иисусту өттүнери болдунар бе? Бир кижи: «Иисус дээрге тергиин кижи ышкажыл, мен каяа ону өттүнүп шыдаар мен!» деп бодап болур. Силер база ынчаар  бодап турар болзуңарза, мооң дугайында боданыңар. Бирээде, бис Иегова биле Иисуска дөмейлештир чаяаттынган бис (Э. д. 1:26). А бис бодувус оларга дөмей боорун күзеп турар бис бе? Ийе болза, ону болдунар шаа-биле кылып шыдаар бис. Ийиде, Иегова биске Октаргайда эң-не күчүлүг күжүн, ыдыктыг сүлдезин, берип турар. Ооң дузазы-биле бодаваан чүүлүвүстү безин кылып шыдаар бис. Үште, Иегова бистен Иисусту тергиини-биле өттүнерин манавайн турар. Харын-даа ынакшылдыг дээрде Адавыс черге чурттаар идегелдиг улуска тергиин апаарынга 1000 чылды үндүрүп каан! (Ажыд. 20:1—3). Иегова бистен чүгле шыдаар шаавыс-биле шупту чүүлдү кылырын база Аңаа идегээривисти күзеп турар.

7. Ам чүнү сайгарар бис?

⁷ Иисустуң чүзүн өттүнүп болур бис? Ам ыдыктыг сүлдениң үре-түңнелинче кирип турар дөрт чараш шынарны сайгарыптаалыңар. Иисустуң ынакшылды илередип, амыр-тайбыңны нептередип, кижилерге ачы-буянны чедирип, буянны көргүзүп чораанын көөр бис. Оон чүнү өөренип ап болурувусту боданыр бис. Ол ышкаш «чаа кижиниң бүдүжүн» кайы хире эки кедип алганывысты билип алырынга дузалаар каш айтырыгны бодувуска салыр бис.

8. Иисус ынакшылын канчаар көргүскен?

⁸ Иисус Иеговага аажок ынак болгаш, бодун өргүлге берген. Ол ону Адазы дээш база бис дээш кылган (Ин. 14:31; 15:13). Иисустуң черге хүн бүрүде чуртталгазы кижилерге кайы хире ынаан көргүзүп турган. Аңаа улус каржы-хажагай боорга безин, ол буянныг болгаш кээргээчел чораан. Иисустуң кижилерге ынакшылы, бирги ээлчегде, Бурганның Чагыргазының дугайында чугаалап турганындан көскү (Лк. 4:43, 44). Ол ышкаш ооң Бурганга болгаш кижилерге бодун хайыралавас ынакшылы бисти мөңге чурттазын дээш, хинчектенип өлүрүнге белен болганындан көстүп турар.

9. Иисустуң ынакшылын канчаар өттүнүп болур бис?

⁹ Бис дээрде Адавыска ынак болгаш, чуртталгавысты Аңаа бараалгадып, сугга суктуруп алган бис. Иеговага ынакшылывысты сайзырадыр дизивиссе, Иисус ышкаш, кижилерге ынак боор болзувусса эки. Иоанн элчин: «Көрүп чорууру эжинге ынак эвес кижи көрүп көрбээни Бурганга канчап ынак боорул?» — деп бижээн (1 Ин. 4:20). Ынчангаш бодувустан айтыраалыңар: «Шынында мен кижилерге ынак мен бе? Иегованың дугайында улуска чугаалаар дээш үемни, күжүмнү харамнанмайн, үндүрүп турар мен бе? Улус меңээ каржы хамаарылганы көргүзерге-даа, кээргээчел мен бе? Мээң күжениишкиннеримни хөй улус эскербес-даа болза азы меңээ өжээннежир-даа болза, эки хөөннүг артып шыдаар мен бе? Өөреникчилер белеткээр ажылче оон-даа хөй үемни үндүрүп шыдаар мен бе?» (Эф. 5:15, 16).

10. Иисусту амыр-тайбың нептередикчизи деп чүге чугаалап болур?

¹⁰ Иисус амыр-тайбың нептередикчизи турган. Ону багай аажылаарга, ол кажан-даа бак-биле харыылавайн чораан. Оон аңгыда, байдал изигленип эгелээрге, ол ону чавырылдырып турган. А кажан улус кыржып алырга, Иисус оларны эптежип алырынче деткиир чораан. Бир эвес ха-дуңмавыс-биле эп-найыралдыг болбас болзувусса, Иеговага мөгейиишкинивис ажык чок боор деп, ол өөредип турган (Мф. 5:9, 23, 24). Ол элчиннеринге «кайызы эң чугула болурун» маргышпас кылдыр, чаңгыс удаа эвес тайылбырлаан (Лк. 9:46—48; 22:24—27).

11. Амыр-тайбың нептередикчизи болур дизе, чүнү канчаарыл?

¹¹ Амыр-тайбың нептередикчизи дээрге  анаа-ла маргыштыг байдалдардан дезип чоруур кижи эвес-тир. Ол амыр-тайбың чок черге ону тургузуп, акы-угбаларны эптежип алырынче оттурар боор (Флп. 4:2, 3; Иак. 3:17, 18). Бодувуска мындыг айтырыгларны салып болур бис: «Өскелер-биле амыр-тайбың болур дээш, чүнү кылырынга белен мен? Хомудал шыгжаар сундулуг мен бе? Маргыжып алган кижим-биле эптежип алыр дээш, бирги базымны кылырынга белен мен бе азы мээң бодап турарым буруулуг кижи ону кылыр ужурлуг бе? Улусту эптежип алырынче оттуруп турар мен бе?»

12. Иисус буянныг чорукту канчаар көргүзүп турган?

¹² Иисус буянныг кижи чораан (Мф. 11:28—30). Ол берге байдалдарда безин эвилең-ээлдек, чайлап бээринге белен турган. Бир катап хананей херээжен кижи Иисустан ооң уруун экиртип бээрин дилээн. Баштай Иисус ооң дилээн күүсетпээн. Оон ол херээжен кижиниң быжыг бүзүрелин көргеш, аңаа чайлап берип, ооң уруун экиртип каан (Мф. 15:22—28). Иисус буянныг-даа турган болза, улуска чымчактатпайн чораан. Бир эвес ооң бир эжинге сагындырыг херек турган болза, ол ону дорт чугаалаар чораан. Чижээ, Иисус Иегованың күзел-соруун күүседир деп турда, Пётр аңаа шаптыктап эгелээрге, ол өөреникчилериниң мурнунга ону шыңгыы чемелээн (Мк. 8:32, 33). Иисус ону Пётрну куду көөр дээш эвес, а өөреникчилери болгаш Пётр чугула кичээлди өөренип алзын дээш кылган: Христостуң эдерикчилери аңаа удур чүве чугаалавайн, а ону бүрүнү-биле деткиир ужурлуг турган. Ийе, Пётр эпчоксуна берген-даа болза, ол болуушкун аңаа ажыктыг болган.

13. Ёзулуг буянны канчаар көргүзер?

¹³ Чамдыкта эштеривиске оларның частырыгларын дорту-биле чугаалап тургаш, ёзулуг буянны көргүзүп болур бис. Силер ону кылыр деп турар болзуңарза, Иисусту өттүнүңер. Силерниң сүмеңер Библияга үндезилеттинген боор ужурлуг. Эвилең-ээлдек болуңар. Эжиңер ону багай сеткилинден кылган деп черле бодаваңар. Иеговага болгаш силерге ынак кижи сагыш човаашкыныңар дээш өөрүп четтиргенин илередир деп чигзинмеңер. Мындыг айтырыгларның дугайында боданыңар: «Эжим шын эвес алдынып турар болза, аңаа ону дидими-биле чугаалап шыдаар мен бе? Ол сагындырыгны дорамчылаан аянныг азы эки сеткилдиг чугаалап турар мен бе? Ону хорадаан азы дузалажыксаан хөөн-биле кылып турар мен бе?»

14. Иисус ачы-буянны ажыл-херээ-биле канчаар көргүзүп турган?

¹⁴ Иисус ачы-буян чедирерин анаа-ла билиринден аңгыда, ол ону херектери-биле көргүзүп турган. Ол Адазынга ынак болгаш, кезээде шын хөөннүг бооп, шын чүүлдерни кылып чораан. Ачы-буян чедирерин анаа-ла билири чедишпес. Ону кезээде ажыл-херек кырынга көргүзери чугула. Ажыл-херээвистиң улуска кандыг салдар чедиргенинден ооң ачы-буянныг болган-болбаанын билип ап болур. Ачы-буян кылып тургаш, шын хөөннүг болур болза эки. Кандыг-бир кижи кайгап: «Багай хөөннүг эки херектерни кылып болур бе?» деп айтырып болур. Ийе, болур. Чижээ, улус-ла көрзүн дээш, ядыыларга дузалажып турган кижилерниң дугайында Иисус чугаалаан. Оларның ачы-буянныг ышкаш ажыл-херээн Иегова хүлээвээн (Мф. 6:1—4).

15. Ачы-буян чедирери дээрге чүү дээни ол?

¹⁵ Ачы-буян чедирери дээрге шын хөөн-биле шын ажыл-херектерни кылыры-дыр. Ынчангаш бодуңардан айтырыңар: «Ачы-буян кылырын анаа-ла билир мен бе азы ону ажыл-херээм-биле көргүзүп турар мен бе? Шын  алдынарынче мени кандыг хөөн оттуруп турар?»

16. Хүннүң-не чүнү канчаар ужурлуг бис база чүге?

¹⁶ Сугга суктуруп алган кижи «чаа кижиниң бүдүжүн» кедип алгаш, олчаан ужулбас деп болбас. Ол каас чараш хепти камнаар херек. Канчаар? Бурганның ыдыктыг сүлдези биске салдарын чедирзин дээш, хүннүң-не күжениишкиннерни үндүрер ужурлуг бис. Эки кызар-ла болзувусса, Иегованың ыдыктыг сүлдези оон-даа дузалаар. Иегова кажан-даа ажыл чок олурбас болганда, Ооң ыдыктыг сүлдези үргүлчү хөделип турар (Э. д. 1:2). Ынчангаш ыдыктыг сүлдениң үре-түңнелинде шупту шынарларны херек кырынга көргүзери чугула. Чижээ, Иаков: «Бүзүрел ажыл-херек чокта өлүг» — дээн (Иак. 2:26). Сүлдениң үре-түңнелинде өске шынарларның дугайында база ынча деп болур.

17. Бир-ле байдалда Бурганга таарымчалыг шынарларны илеретпейн барган болзувусса канчаар?

¹⁷ Хөй чылдар бурунгаар-даа сугга суктуруп алган болзувусса, Бурганга таарымчалыг шынарларны илередири белен эвес. Ынчалза-даа холувус сула салбаалыңар. Мындыг чижекти бодап көрүңер: ынак хевиңерни оруп алгаш, ону дораан үндүр октавас болгай силер. Ону даарап алгаш, дараазында камнаарын кызар силер. Ам ол чижекти акы-угбаларывыс-биле хамаарылгавыска дөмейлеп көрээлиңер. Бис чамдыкта ачы-буянны, шыдамык чорукту, ынакшылды илеретпейн баар бис. Ол дээш найыралывыстың хендирлери сөктүп болур. Ынчалза-даа ону октаарынче далашпаңар. Сеткиливистен «буруулуг болдум» дээн сөзүвүс, өскээр чугаалаарга, найыралывысты даарап алгаш, эки хамаарылганы тургузуп алырынга дузалаар. А соң даарта ол найыралды камнаалыңар!

18. Чүү чүвеге чигзинмес бис?

¹⁸ Иисустуң кайгамчык үлегери дээш Иеговага өөрүп четтирер-дир бис! Христостуң канчаар боданып турганын эки өөренген тудум, биске ооң ышкаш алдынары белен боор. А «чаа кижиниң бүдүжүн» оон-даа артык эки кедип алыр бис. Бис бо статьяга ыдыктыг сүлдениң үре-түңнелинде шынарларның чүгле дөртүн сайгардывыс. Оларның артканын хууда чүге шинчилеп болбас деп? Ол ышкаш оларны чуртталгавыста канчаар ажыглап турарывысты база боданып болур. Аңаа биске «Путеводитель по публикациям Свидетелей Иеговы» (Христианская жизнь > Плод духа) деп дептер дузалаар. Шыдаар-ла шааңар-биле шупту чүүлдү кылырын кызар болзуңарза, Иегова силерге «чаа кижиниң бүдүжүн» кедип алгаш, ону кажан-даа ужулбазынга дузалаар.