1. ¿Bin-utʼil ya xchiknaj ta jtaleltik te bin ya jnoptike?

 CHIKAN teme mato jaluk la kichʼtik jaʼ o ayix tiempoe, jpisiltik jaʼ ya jmulantik te lekuk jtaleltik yuʼun lek ya yilotik te Jehová. Swenta ya xjuʼ kuʼuntik spasel ya skʼan ya jtsajtaytik te jpensartik. ¿Bin yuʼun? Melel te bin ya jnoptik jaʼ ya yakʼ ta ilel te bin yilel jtaleltik. Teme spisil-ora ya jnoptik te bin ya skʼan koʼtantik, jaʼ ya kaltik sok jaʼ ya jpastik te bin ma leke (Efes. 4:17-19). Yan teme jaʼ ya jnoptik te bintik leke, jaʼ ya kaltik sok jaʼ ya jpastik te bin ya smulan te jTatik Jehová (Gál. 5:16).

2. ¿Bin jojkʼoyeletik ya kilbeytik skʼoplal ta artículo ini?

² Jich bitʼil la kiltik ta yan artículo, maba spisil ya xjuʼ kuʼuntik spʼajel te bin ma lek ya xtal ta jpensartik. Pero ya xjuʼ ya jkom jbatik yuʼun maba ya jpastik. Kʼalal mato kichʼojtik jaʼ-ae ya skʼan ya kijkitaytik te bin ma lek ta alel sok ta pasel te ma smulan te Jehová. Jaʼ te bin nail ya jpastik sok te mukʼ skʼoplale swenta ya kijkitaytik te jpokoʼ taleltike. Pero yuʼun ya kakʼbeytik stseʼelil yoʼtan te Jehová, jaʼnix jich ya skʼan ya jchʼuuntik te mantalil ini: «Jaʼ xa alapik te yachʼil talelil» (Col. 3:10, TNM). Ta artículo ini ya kakʼbeytik sujtib te jojkʼoyeletik ini: ¿Bin-a te yachʼil talelil? Sok ¿bin-utʼil ya xjuʼ ya jlaptik sok te maba ya jlokʼestike?

3. 1) ¿Bin-a te yachʼil talelil? 2) ¿Bin-utʼil ya jlaptik? (Gálatas 5:22, 23).

³ Te yachʼil talelil jaʼ ya skʼan ya yal te bin ya jnoptik sok te bin ya jpastik te ya yakʼ ta ilel te taleliletik yuʼun te Jehová. ¿Bin-utʼil ya jlaptik? Jaʼ te kʼalal ya kakʼtik ta ilel te sit te chʼul espíritu yuʼun Dios sok te ya kakʼtik te ya x-aʼtej ta jpensartik, te bin yaʼiyel ya kaʼiy jbatik sok te bin ya jpastike (kʼopona Gálatas 5:22, 23). Te machʼa ya slap te yachʼil talelil kʼux ta yoʼtan te Jehová sok te j-abatetik yuʼune  (Mat. 22:36-39). Spisil-ora tseʼel yoʼtan kʼalal ya sitintay wokoliletik (Sant. 1:2-4). Ya yakʼ te ay lamalkʼinal (Mat. 5:9). Ay slamalil yoʼtan sok lek yoʼtan ta stojol te yantik (Col. 3:13). Kʼux ta yoʼtan te bin lek sok ya spas (Luc. 6:35). Ya yakʼ ta ilel ta swenta te bintik ya spas te tulan schʼuunel yoʼtan ta stojol te jTatik ta chʼulchan (Sant. 2:18). Lamalnax yoʼtan kʼalal ay bin ma lek ya xpasbot sok ya snaʼ skomel sba kʼalal ya yichʼ tenel ta spasel te bin ma lek (1 Cor. 9:25, 27; Tito 3:2).

4. ¿Bin yuʼun te ma xjuʼ ta jujun ya jchʼitestik te taleliletik te ya yalbey skʼoplal ta Gálatas 5:22, 23?

⁴ Swenta ya jlaptik te yachʼil talelil ya skʼan ya jchʼitestik taleliletik te ay ta Gálatas 5:22, 23 sok ya jtabeytikxan skʼoplal ta yantik textoetik. * Te taleliletik-abi ma pajaluk sok te kʼuʼul pakʼal ya jlaptik ta jujun lijk. Te taleliletik ini jun-nax ayik. Jich bitʼil kʼux ta koʼtantik te yantik ya kakʼtik ta ilel slamalil koʼtantik sok slekil koʼtantik. Swenta ay yutsil koʼtantik ya skʼan ayuk slamalil koʼtantik sok te ya jnaʼtik skomel jbatik.

5. 1) ¿Bin ya skʼan ya yal te ayuk kuʼuntik te «spʼijil yoʼtan te Cristo»? 2) ¿Bin yuʼun ya skʼan ya jnopbeytik te skuxlejal te Jesús? (1 Corintios 2:16).

⁵ (Kʼopona 1 Corintios 2:16). Swenta ya jlaptik te yachʼil talelil ya skʼan ayuk kuʼuntik te «spʼijil yoʼtan te Cristo» te ya skʼan ya yal, te ya jnaʼtik te bin ya snop ta yoʼtan te Jesús sok te ya jkʼayinbeytike. Te Jesús la yakʼ ta ilel ta lek te sit te chʼul espíritu yuʼun Dios. Jich kʼoem bitʼil jun lekil espejo te la yakʼ ta ilel ta lek te taleliletik yuʼun te Jehová (Heb. 1:3). Kʼalal ya jpastik tulan te jichuk snopojibal kuʼuntik bitʼil te Jesús, jaʼ jich ya xjuʼ ya jkʼayintikxan te bin la spas sok te taleliletik yuʼune (Filip. 2:5).

6. ¿Bin ya skʼan ayuk ta koʼtantik kʼalal ya jpastik tulan ta slapel te yachʼil talelil?

⁶ ¿Yanibal xjuʼ jkʼayinbeytik te ejemplo yuʼun te Jesús? Jichniwan ya awal: «Te Jesús toj ta winikil. ¡Maʼyuk bin-ora ya xjuʼ ya jkʼayinbey te stalele!». Teme jich ya anope, ayuk ta awoʼtan ini. Sbabial, la awichʼ pasel yuʼun ya xjuʼ ya akʼayinbey stalel te Jehová sok te Jesús. Jich yuʼun jaʼat ya ata ta nopel teme ya akʼayinbey stalel sok te ya apas te bantito kʼalal ya xjuʼ awuʼune (Gén. 1:26). Schebal, te jaʼ bayalxan  yip te schʼul espíritu te Diose. Ta swenta te koltayel yuʼune ya xjuʼ awuʼun te bin wokol ya awaʼiye. Yoxebal, te Jehová maba ya skʼanbotik te jkʼaxel stojil ya kakʼtik ta ilel te sit te chʼul espíritu. Nopa awaʼiy te ya yakʼ jmil jaʼbil te Jehová yuʼun ya xkʼootik ta tojil ants winik (Apoc. 20:1-3). Te bin ya skʼanbotik te Jehová ta ora ini, jaʼ te ya jpastik tulan sok te ya smukʼulin koʼtantik te jaʼ ya skoltayotike.

7. ¿Bin ya kilbeytik skʼoplal ta ora ini?

⁷ ¿Bin-utʼil ya xjuʼ ya jkʼayinbeytik stalel te Jesús? Ya kilbeytik skʼoplal chanchajp taleliletik te sit te chʼul espíritu yuʼun Dios. Ya kiltik bin-utʼil la yakʼ ta ilel te jujun taleliletik te Jesús sok bin ya yakʼ jnoptik te joʼotike. Jaʼnix jich ya kilbeytik skʼoplal cheʼoxeb jojkʼoyeletik te ya skoltayotik ta yilel teme ya skʼan ya jlekubtestik te yachʼil talelile.

8. ¿Bin-utʼil la yakʼ ta ilel te skʼuxul yoʼtan te Jesús?

⁸ Te Jesús kʼax kʼux ta yoʼtan te Jehová te jaʼ tijbot yoʼtan te ay bin ya spas ta stojol sok ta jtojoltik (Juan 14:31; 15:13). La yakʼ ta ilel te kʼux ta yoʼtan te ants winiketik ta swenta te bin yilel kuxin liʼ ta Balumilal. Spisil-ora la yakʼ ta ilel skʼuxul yoʼtan sok la snaʼbey yoʼbolil sba te yantik, jaʼnix jich ta stojol te machʼatik ya xkontrainot. La yakʼ ta ilel te skʼuxul yoʼtan kʼalal la yalbey skʼoplal te Wentainel yuʼun Dios (Luc. 4:43, 44). La yakʼ ta ilel te kʼux ta yoʼtan te Dios sok te ants winiketik kʼalal jun yoʼtan kʼax swokol sok te la yakʼ sba ta lajele. Kʼalal jich la spase, jich la yakʼ te ya xkuxinotik ta sbajtelkʼinal.

9. ¿Bin-utʼil ya kakʼ ta ilel skʼuxul koʼtan jich bitʼil la spas te Jesús?

⁹ Teme la kakʼ jbatik ta stojol te Jehová sok la kichʼtik jaʼ, jich la jpastik ta swenta te kʼux ta koʼtantik te jTatik ta chʼulchan. Jich bitʼil la spas te Jesús, ya skʼan ya kakʼtik ta ilel te kʼuxul oʼtanil-abi ta stojol te ants winiketik. Te jpuk-kʼop Juan jich la stsʼibay: «Te machʼa ma ba cʼux ta yoʼtan te yermano te yilbeyej sit, ¿bin utʼil cʼan cʼuxuc ta yoʼtan te Dios te ma ba yilbeyej sit stuquel?» (1 Juan 4:20). Jojkʼoybey jbatik: «¿Kʼuxbal ta koʼtan te yantike? ¿Yabal jnaʼtiklanbey yoʼbolil sba manchukme ay bintik ma lek ya spasbonik? ¿Yabal kakʼbey jtiempo sok te bintik ay kuʼun yuʼun ya jkoltay te ants winiketik ta snaʼbeyel sba te Jehová? ¿Jichbal ya jpas manchukme bayal ants winiketik maʼyuk skʼoplal ta yoʼtanik o ya skontrainonik? ¿Yabal xjuʼ ya jcholxan skʼop Dios?» (Efes. 5:15, 16).

10. ¿Bin la spas te Jesús swenta la yakʼ te ayuk lamalkʼinal?

¹⁰ Te Jesús la yakʼ ta ilel slamalil yoʼtan sok ma la sut ta bin ma lek kʼalal ay bin pasbot. Pero ma jaʼuknax la spas-abi. Jaʼ nail ya xbajt slekubtesbey yoʼtan te ants winiketik sok ya stijbey yoʼtan te yantik te jichuknix ya spasik te kʼalal ya xjajch kʼop yuʼunike. Jich bitʼil la yakʼtiklanbey snop te ya skʼan ya slekubtesbeyik yoʼtan te yermano teme ya skʼan te lek ya x-ilbotik yuʼun Jehová te bin ya spasik ta stojole (Mat. 5:9, 23, 24). Te Jesús bayal buelta la yalbey te jpuk-kʼopetik te manchuk ya stij sbaik ta kʼop ta swenta te machʼa mukʼxan skʼoplale (Luc. 9:46-48; 22:24-27).

11. ¿Bin ya xjuʼ ya jpastik yuʼun ayuk lamalkʼinal?

¹¹ Swenta ayuk lamalkʼinal ma jaʼuknax ya skʼan ya jpʼajtik te jajch kʼope. Ya skʼan te joʼotiknix nail ya jlekubtesbeytik yoʼtan te yantik sok ya jtijbeytik yoʼtan te hermanoetik ta schajpanel te kʼop jajchem yuʼunike (Filip. 4:2, 3; Sant. 3:17, 18). Ya xjuʼ ya jojkʼoybey jbatik: «¿Yabal jpas tulan ta slekubtesbeyel yoʼtan te yantike? ¿Yabal  jkʼej slab koʼtan teme jtul hermano ay bin la spasbon te ma lek la kaʼiy jba yuʼune? ¿Jaʼbal ya jmaliy te jaʼ ya schajpan te kʼope? O ¿joʼon nail ya jchajpan manchukme jaʼ te machʼa la spas te bin ma leke? Teme ya xjuʼ ta pasele, ¿yabal jtijbey yoʼtan te yantik ta schajpanel te kʼop jajchem yuʼunike?».

12. ¿Bin-utʼil la yakʼ ta ilel te Jesús te ay slekil yoʼtan?

¹² Te Jesús la yakʼ ta ilel yutsil yoʼtan (Mat. 11:28-30). Slekil yoʼtan sok la yichʼ ta wenta te yantik manchukme ay ta wokol-a. Kʼalal jtul ants te talem ta Fenicia la skʼanbey te yakuk xlekubtesbot te yantsil-al, ta sjajchibal te Jesús maba la spas te bin kʼanbote. Pero sok slekil yoʼtan la skʼopon sok la slekubtes te chʼin achʼix kʼalal la yilbey te schʼuunel yoʼtan te antse (Mat. 15:22-28). Jaʼnix jich maʼyuk bin makot yuʼun ya stojobtes te yantike. Ay baeltik la yakʼbey tojobtesel te machʼatik kʼux ta yoʼtane. Jaʼ jich la spas ta stojol te Pedro kʼalal kʼan skom te Jesús ta spasel te skʼanojel yoʼtan te Jehová, la stojobtes ta sit te yantik jnopojeletik (Mar. 8:32, 33). Maba jich la spas yuʼun ya spejkʼanbey skʼoplal te Pedro, la spas yuʼun ya yakʼbey snaʼ te jnopojeletik te yakuk xkoltaywanik sok te manchuk ya skomik ta spasel te yaʼtel te Jehová. Manchukme la sta kʼexlal te Pedro, pero jaʼ ta swenta slekilal.

13. ¿Bin ya skʼan ya jpastik teme yuʼun-nix ay slekil koʼtantik-ae?

¹³ Swenta ay slekil koʼtantik ta stojol te machʼatik kʼux ta koʼtantik, aynix baeltik te ya skʼan ya kakʼbeytik tojobtesel. Teme jich ya jpastik ya jkʼayinbeytik stalel te Jesús sok ya jtuuntestik te Biblia kʼalal ya kakʼtik tojobtesel. Kakʼtik ta ilel slekil koʼtantik. Jaʼ ya jkʼantik te bin lek ta stojolik sok ya smukʼulin koʼtantik te ya spasik te tojobtesel ya kakʼbeytik, melel kʼux ta yoʼtanik te Jehová sok kʼuxotik ta yoʼtan-euk. Jojkʼoybey jbatik: «¿Yabal xkʼopojon sok te machʼa kʼux ta koʼtan kʼalal ya kil te ay bin ma lek yak ta spasele? ¿Bin-utʼil ya kalbey? ¿Sokbal slekil koʼtan o tulan ya kalbey? ¿Bin yuʼun ya kakʼbey te tojobtesel? ¿Jaʼbal yuʼun te ilinemon soke, o jaʼ ya jkʼan te bin lek ta stojole?».

14. ¿Bin-utʼil la yakʼ ta ilel yutsil yoʼtan te Jesús?

¹⁴ Te Jesús ma jaʼuknax snaʼoj te bin lek jaʼnix jich ya spas. Kʼux ta yoʼtan te sTat, jaʼ yuʼun spisil-ora stojil te bin ya spase. Te machʼa ya yakʼ ta ilel yutsil yoʼtan spisil-ora ya sle te bin-utʼil ya skoltay te yantike. Ma jaʼuknax ya skʼan ya jnaʼtik te bin lek; jaʼnix jich ya skʼan ya jpastik sok te stojiluk te bin yuʼun ya jpastike. Ayniwan machʼa jich ya xjuʼ ya sjojkʼoybey sba: «¿Yabal xjuʼ te ay bin lek ya jpastik te ma stojiluk te bin yuʼun ya yichʼ pasele?». Yak. Te Jesús la yalbey skʼoplal te machʼatik ya skʼebanbeyik takʼin te pobreetik, jaʼ ya skʼanik te ya snaʼik te yantik te bin ya spasike. Jich yilel te lek te bin yakik ta spasele, pero maba lek ya yil stukel te Jehovae (Mat. 6:1-4).

15. ¿Bin-utʼil ya kakʼtik ta ilel te smelelil yutsil oʼtanil?

¹⁵ Jaʼnax ya xjuʼ ya kakʼtik ta ilel smelelil yutsil oʼtanil teme ay bintik lek ya jpastik ta stojol te yantike sok maba ya jpastik sok sbikʼtal koʼtantik. Ya skʼan ya jojkʼoybey jbatik: «¿Yabal xjuʼ ya kal te ma jaʼuknax ya jnaʼ te bin leke te jaʼnix jich ya jpase? ¿Bin yuʼun ya jpas te bintik leke?».

16. ¿Bin ya skʼan ya jpastik ta jujun kʼajkʼal sok bin yuʼun?

¹⁶ Mame jkuytik te kʼalal la kichʼtikix jaʼ la jlaptikix ta jkʼaxel te yachʼil talelil sok te  maba ya jkanantaytikixe. Te yachʼil talelil jaʼ pajal sok te kʼuʼul pakʼal te ya skʼan te ya jkanantaytike. Jaʼ yuʼun jujun kʼajkʼal ya skʼan ya jletik bin-utʼil ya kakʼtik ta ilel te sit te chʼul espíritu yuʼun Dios. ¿Bin yuʼun? Melel te Jehová jaʼ jun Dios te ay bintik yak ta spasele sok te schʼul espíritu spisil-ora yak ta aʼtel (Gén. 1:2). Te jujun taleliletik yuʼun te sit te chʼul espíritu jaʼ ya skʼan ya stij koʼtantik yuʼun ay bintik ya jpastik. Jich bitʼil la stsʼibay te jpuk-kʼop Santiago: «Chamen te schʼuhunel-oʼtanil teme mayuc yaʼtelule» (Sant. 2:26). Jaʼnix jich ya xjuʼ ya kaltik ta swenta te yantik taleliletik te ya yakʼ te chʼul espíritu yuʼun Dios. Te jujun buelta ya kakʼtik ta ilel, jich ya kakʼtik ta ilel te yak ta aʼtel ta jtojoltik te schʼul espíritu te Diose.

17. ¿Bin ya skʼan ya jpastik teme wokol ya kaʼiytik yakʼel ta ilel te sit te chʼul espíritu?

¹⁷ Manchukme ay machʼatik bayal jaʼbil yichʼojikix jaʼ ay baeltik maba ya yakʼik ta ilel te sit te chʼul espíritu te bitʼilnix ya skʼan pasel-ae. Mukʼ skʼoplal te manchuk ya xchebaj koʼtantike. Jnop kaʼiytik te ya schʼiʼ lijk jkʼuʼ jpakʼtik te kʼax ya jmulantike, ¿mabal jichuk te ma jchʼojtik bael ta ora ta kʼaʼpale? Te bin ya jpastike jaʼniwan te ya jtsʼistik teme jich ya xjuʼ ta pasele. Teyto tal-abi ya skʼan ya jtsajtay jbatik. Jaʼnix jich teme ay banti maba la kakʼtik ta ilel slekil koʼtantik, slamalil koʼtantik o skʼuxul koʼtantik ta stojol te yantik ya skʼan te maba ya xchebaj koʼtantik. Jaʼ lek te ya jkʼanbeytik perdón sok te ya jpastik tulan yuʼun lek ya jchaʼkil jbatik sok. Ta yan buelta te jich ya xkʼot ta pasel ya jpastik tulan yuʼun ya kakʼtik ta ilel te lekil talelile.

18. ¿Bin ya skʼan te ayuk ta koʼtantik?

¹⁸ ¡Ya kaltik wokol ta swenta te ejemplo la yakʼbotik jilel te Jesús! Kʼalal ya jpastik tulan ta skʼayinbeyel te spensar, jich maba wokol ya kaʼiytik skʼayinbeyel te stalele. Jaʼnix jich ya kakʼtik ta ilel ta lek te yachʼil talelile. Ta artículo ini jaʼnax la kalbeytik skʼoplal chanchajp taleliletik yuʼun te sit te chʼul espíritu yuʼun Dios. Pero lek teme ya jlokʼestik tiempo ta yilbeyel skʼoplal te yantik taleliletik te ya yakʼ te chʼul espíritu, yuʼun jich ya kakʼtik ta ilel-a. Ya ataxan yantik articuloetik ta Sleojibal temaetik yuʼun stestigotak Jehová, baan ta «Te bitʼil jchʼuunejtik Dios» patil ta «Sit te chʼul espiritu». Seguro ayotik te ya skoltayotik te Jehová teme ya jpastik tulan ta slapel te yachʼil talelil sok teme spisil-ora jlapojtike.