1. Малы чакланы кулэ, мар сярысь ми малпаськиськомы?

 КУ ГИНЭ ми медам пылатӥське, ваньмылэн милям потэ, Иегова милемыз мед яратоз шуыса. Нош со понна чакланы кулэ, мар сярысь ми малпаськиськомы. Малы? Малы ке шуоно ӵем дыръя кыӵеесь малпанъёсмы, сыӵеесь ик ужъёсмы но луозы. Ми уродэз сярысь малпаськимы ке, соку кылъёсмы но ужъёсмы уродэсь луозы (Еф. 4:17—19). Нош умоез сярысь малпаськимы ке, соку кылъёсмы но ужъёсмы Иеговаез шумпоттозы (Гал. 5:16).

2. Кыӵе юанъёсты ми эскеромы та статьяын?

² Кызьы ми тодӥмы кылем статьяысь, милям урод малпанъёсмы кылдыло ке но, ми быгатӥськомы соосты палэнтыны но урод ужъёс лэсьтытэк улыны. Пылатӥськон азямы милемлы куштӥськоно вал кылъёслэсь но ужъёслэсь, кудъёссэ Иегова адӟемпотостэм каре. Озьы ӧм лэсьтэ ке, «выль адями» луыны ум быгатэ. Со сяна, Библия ӧте милемыз: «Выль адями луонэн [дӥсяське]» (Кол. 3:10). Та статья кык юанъёслы валэктон сётоз: 1) кыӵе со «выль адями» но 2) мар юрттоз милемлы «выль адямилэсь» дӥськутсэ дӥсяны но сое ноку кыльылытэк улыны?

3. Кыӵе со «выль адями» но мар кароно, сыӵе адями луон понна? (Галатъёслы 5:22, 23).

³ «Выль адями» Иегова сямен малпаське но лэсьтэ. Святой духлэн юрттэменыз, со малпанъёссэ, шӧдонъёссэ но ужъёссэ тупатэ. (Лыдӟе Галатъёслы 5:22, 23.)  Кылсярысь, со яратэ Иеговаез но солэсь калыксэ (Матф. 22:36—39). Шуг-секытъёс дыръя но со шумпотыса улэ (Иак. 1:2—4). Со мукетъёсыныз тупаса улыны тырше (Матф. 5:9). Со чидась но лякыт (Кол. 3:12, 13). Солы кельше ӟеч ужъёс лэсьтыны (Лука 6:35). Сыӵе адямилэн ужъёсыз возьмато, солэн юн осконэз шуыса (Иак. 2:18). Куке солэсь вожзэ потто, со тырше зӥбыт-востэм луыны но ассэ кияз возьыны (1 Кор. 9:25, 27; Тит. 3:2).

4. Малы, «выль адями» луон понна, вань христиан сямъёсты возьматыны кулэ?

⁴ «Выль адями» луон понна, духлэн емышез пӧлы пырись вань сямъёсты возьматыны кулэ b. Кылсярысь, ми вань дӥськутмес огдыре ум нуллӥське: туннэ — огзэ, нош ӵуказе мукетсэ дӥсяськомы. Нош христиан сямъёс ваньзы ог-огеныз герӟаськемын. Соосты нимаз-нимаз возьматыны уг луы. Мыным кинэн ке чидаса но лякытэн вераськыны секыт ке, луоз-а вераны, мон сое яратӥсько шуыса? Озьы ик зӥбыт-востэм луыны но асме киям кутыны секыт ке, луоз-а вераны, мон ӟеч адями шуыса?

5. Мар кароно, милям «Христослэн визьмыз» мед луоз шуыса, но малы милемлы Иисуслэсь улонзэ эскероно? (1 Коринфъёслы 2:16).

⁵ Лыдӟе 1 Коринфъёслы 2:16. «Выль адями» луон понна, милям «Христослэн визьмыз» луыны кулэ. Мукет кылъёсын вераса, милемлы валано, кызьы малпаськиз Иисус, нош собере тыршоно озьы ик малпаськыны. Чылкыт синучкон выллем, Иисус Иеговалэсь сямъёссэ туж умой возьматъя (Евр. 1:3). Ми Христос сямен малпаськыны тыршимы ке, соку эшшо но золгес солы кельшомы (Флп. 2:5).

6. Мае тодаз возёно солы, кинлэн «выль адями» луэмез потэ?

⁶ Нош зэм ик-а ми быгатомы Иисуслэсь быдэсак адӟем карыны? Кин ке но малпаны быгатоз: «Иисус тырбыдэс. Нош мон тырбыдэстэм ук!» Тӥляд но сыӵе малпанъёсты кылдыло ке, малпаське: нырысетӥез, ми кылдытэмын вал, Иегова но Иисус кадь луон понна (Ул.-выл. 1:26). Но юан кылдэ: потэ-а милям соос кадь луэммы? Потэ ке, соку ми быгатомы кӧня ке но  соослы кельшыны. Кыкетӥез, Иегова сётэ милемлы святой духсэ — дунне вылысь самой бадӟым кужымез. Солэн юрттэменыз, ми быгатомы быдэстыны луонтэмзэ но лэсьтыны. Куинетӥез, Иегова уг возьма, ми али ик ини быдэсак Иисус кадь луомы шуыса. Та понна со висъяз 1 000 ар! (Усьт. 20:1—3). Нош али Иегова возьма: ми мед лэсьтомы ваньзэ, мае быгатӥськомы, но со вылэ мед оскиськомы.

7. Мае ми али эскеромы?

⁷ Мар ласянь милемлы Иисуслэсь адӟем кароно? Ойдолэ эскеромы ньыль сямъёсты, кудъёсыз святой духлэн емышез пӧлы пыро. Ми эскеромы, кызьы Иисус та сямъёсты возьматъяз. Озьы ик тодомы, малы ми солэсь дышетскыны быгатомы. Эшшо ми эскеромы юанъёсты, кудъёсыз валаны юрттозы, пӧрме-а милям «выль адями» луэммы.

8. Кызьы Иисус яратэмзэ возьматӥз?

⁸ Иисус Иеговаез туж зол яратӥз. Соин ик со Инмар понна но, ми понна но ассэ курбонлы сётӥз (Иоанн 14:31; 15:13). Музъем вылын улыкуз, Иисус адямиосты яратэмзэ возьматӥз. Сое адӟемпотостэм каризы ке но, со лякыт но гажась-жалясь вал. Иисус адямиослы яратэмзэ возьматӥз, соослы Инмарлэн Эксэйлыкез сярысь ӟеч иворез вераса (Лука 4:43, 44). Озьы ик со Инмарез но адямиосты яратэмзэ возьматӥз, куке, дась луыса, ми понна улонзэ сётӥз. Солы луыса милям пырак улыны луонлыкмы вань.

9. Кызьы ми, Иисус сямен, яратэммес возьматыны быгатӥськомы?

⁹ Ми яратӥськомы инмысь Атаймес. Соин ик ми солы улонмес сӥзимы но пылатӥськимы. Иисус сямен ик, милемлы кулэ Иеговаез но адямиосты яратыны. Апостол Иоанн гожтӥз: «Агай-вынзэ адӟыса вылысь сое яратӥсьтэм мурт кызьы быгатоз Инмарез яратыны, Кудзэ со уг адӟы?» (1 Иоанн 4:20). Соин ик аслэсьтыд юаны кулэ: «Яратӥсько-а мон адямиосты? Быгатӥсько-а мон адямиосты жаляны, соос монэн асьсэды чурыт возё ке но? Висъясько-а мон дырме но кужымме, адямиослы Иегова сярысь веран понна? Дась-а мон тае лэсьтыны соку но, куке адямиос тыршеме понна тау уг каро но мон вылэ йыркуръясько? Быгато-а мон эшшо но тросгес дырме висъяны, дышетскисьёсты дасян понна?» (Еф. 5:15, 16).

10. Кытысь адӟиськиз, Иисус тупаса улонэз яратэ вал шуыса?

¹⁰ Иисус тупаса улонэз яратэ вал. Куке адямиос асьсэды соин шонертэм возизы, со соослы пунэмзэ ӧз берыкты. Со сяна, куке адямиос вискын ченгешонъёс кылдылӥзы, Иисус соослэсь мылкыдзэс ӝутӥз кусыпъёссэс тупатыны. Иисус дышетӥз: Иеговалы йыбыртъянмы юнме луоз, ми вын-агайёсынымы тупаса ӧм улэ ке (Матф. 5:9, 23, 24). Огпол апостолъёс споръяськизы, «соос пӧлысь кин меда ваньмызлэсь бадӟымез» шуыса. Нош Иисус соослы валаны юрттӥз, та сярысь сюлмаськоно ӧвӧл шуыса (Лука 9:46—48; 22:24—27).

11. Мар кароно, тупаса улонэз ваён понна?

¹¹ Тупаса улонэз ваён понна, ченгешонъёслэсь палэнсконо гинэ ӧвӧл. Со понна ченгешонъёсты тупатоно но вын-агайёслэсь но сузэр-апайёслэсь мылкыдзэс ӝутоно сӧриськем кусыпъёссэс тупатыны (Иак. 3:17, 18; Флп. 4:2, 3). Аслыд таӵе юанъёс сётыны луоз: «Мар карыны мон дась, мукетъёсыныз тупаса улон понна? Вань-а мынам куатаськон сямы? Возьмасько-а  мон, куке мукетъёсыз монэн кусыпъёссэс тупатозы? Яке мон ачим кусыпъёсмес тупатыны дась, мон малпамъя, ачим мон янгыш ӧвӧл ке но? Тупась учыре мукетъёсызлэсь мылкыдзэс ӝутӥсько-а тупаса улыны?»

12. Кыӵе учыръёсысь адӟиськиз, Иисус ӟеч сямо вал шуыса?

¹² Иисус ӟеч сямо вал (Матф. 11:28—30). Секыт дыръя но со тыршиз лякыт луыны но мукетъёссэ кылзыны. Тодамы ваёмы одӥг учырез. Куке хананей кышно Иисусэз сюлворыса куриз нылзэ бурмытыны, Иисуслэн та кышномуртлэсь куронзэ быдэстэмез нырысь уг поты вал. Нош куке со кышномуртлэсь юн осконзэ адӟиз, со солэсь кылзӥськиз но лэсьтӥз озьы, кызьы со куриз (Матф. 15:22—28). Нош кулэ дыръяз Иисус визь-кенеш но сётыны быгатэ вал. Кылсярысь, куке Пётр Иисуслы люкетыны тыршиз Иеговалэсь эриксэ быдэстыны, со дышетскисьёсыз азьын Пётрез тупатӥз (Марк 8:32, 33). Иисуслэн Пётрез ултӥямез уг поты вал. Со тыршиз солы но, дышетскисьёсызлы но валэктыны, солэсь котьма ласянь кылзӥськоно шуыса. Валамон, Пётрлы возьыт вал ке но, та учыр сое тросэзлы дышетӥз.

13. Кытысь адӟиськоз, ми ӟеч сямоесь шуыса?

¹³ Эшмылы ӟеч сяммес возьматон понна, куддыръя солы шонерак верано луэ, мае солы тупатыны кулэ. Соку Иисуслэсь адӟем каре. Визь-кенештэс Библия вылэ пыкиськыса вералэ. Лякытэсь луэ. Эшты сярысь уродэн эн малпалэ. Юн оске: адями, кудӥз Иеговаез но тӥледыз яратэ, тӥледлы тау кароз сюлмаськемды понна. Малпаське таӵе юанъёс вылын: «Эше кыӵе ке янгыш лэсьтӥз ке, дӥсьто-а мон солы визь-кенеш сётыны? Кызьы мон соин верасько: лякытэн яке пыкылыса? Малы мон соин верасько: мынам солы воже потэ яке солы юрттэме потэ?»

14. Иисуслэн примерез вылын валэктэ, мар со сыӵе ӟеч сямо луон.

¹⁴ Иисус вала, мар со сыӵе ӟеч сямо луон. Со ассэ озьы ик возьыны тырше. Со яратэ аслэсьтыз Атайзэ, соин ик со котьку но шонер мылкыдын умой ужъёс лэсьтэ. Нош мар со сыӵе ӟеч сямо луон, тодыны гинэ тырмыт ӧвӧл. Сое уж вылын возьматоно. Ужъёсмы мукетъёсызлы пайда вайыны кулэ. Но со дыре ик соосты шонер мылкыдын лэсьтоно. Кин ке но юаны быгатэ: «Луэ, шат, урод малпанъёсын умой ужъёс лэсьтыны?» Зэм, луэ. Кылсярысь, Иисус вераз адямиос сярысь, кудъёсыз куанеръёслы юрттӥзы чеберъяськон понна. Соослэн ужъёссы Иеговалы ярамон ӧй вал (Матф. 6:1—4).

15. Мар кароно, ӟеч сямо луон понна?

¹⁵ Ӟеч сямо луон понна, шонер мылкыдын умой ужъёс лэсьтоно. Соин ик аслэсьтыд юано: «Мон тодӥсько гинэ, мар со ӟеч сямо луон, яке мон сое уж вылын возьматӥсько? Мар мынэсьтым мылкыдме ӝутэ умой ужъёс лэсьтыны?»

16. Мар милемлы кароно котькуд нунал но малы?

¹⁶ Азьланяз но «выль адями» луон понна, милемлы мар ке но кароно. Котькуд нунал тыршоно святой духлэн емышез пӧлы пырись сямъёсты уж вылын возьматыны. Малы? Святой духсэ кутыса, ачиз Иегова но котьку мар ке но каре (Ул.-выл 1:2). Святой духлэн емышез пӧлы пырись вань сямъёсты уж вылын возьматоно. Кылсярысь, Иаков гожтӥз: «Оскон... ужъёстэк улыны уг быгаты» (Иак. 2:26). Сое ик вераны луоз  духлэн емышез пӧлы пырись мукет сямъёс сярысь но.

17. Мар кароно, кыӵе ке учыре ми христиан сямъёсмес ӧм возьматэ ке?

¹⁷ Соослы но, кинъёс трос аръёс талэсь азьло пылатӥськизы, куддыръя христиан сямъёссэс возьматыны капчи ӧвӧл. Но киостэс эн лэзе. Малпаське: тӥ яратоно дӥсьтэс кесиды ке, соку ик сое куштоды-а? Уд, дыр. Тӥ тыршоды сое тупатыны но азьланяз чакласькыса нуллоды. Сое ик вераны луэ эшъёсмы сярысь но. Ми ӟеч сяммес, чидаммес яке яратэммес ӧм возьматэ ке, кусыпъёсмы лябӟыны быгатозы. Но эн дыртэ соосын эшъяськемысь дугдытыны. Соосты сюлмысь простить карыны куриды ке, тӥ быгатоды кусыпъёстэс тупатыны. Нош азьланяз чакласькыны тыршомы но соосты вӧсь ум каре.

18. Малы ми юн оскиськомы?

¹⁸ Ми шумпотӥськомы, Иисус Христос милемлы умой адӟем карон кельтӥз шуыса. Ми валаны тыршимы ке, кызьы малпаськиз Иисус, соку милемлы капчигес луоз со сямен асьмеды возьыны. Солы луыса ми быгатомы «выль адями» луыны. Та статьяын ми эскеримы ньыль сямъёсты, кудъёсыз святой духлэн емышез пӧлы пыро. Умой луысал мукет сямъёсты но эскерыны, озьы ик малпаськыны, макем умой мон та сямъёсты ас улонам возьматӥсько. Милемлы юрттоз «Иеговалэн Адӟись-Ивортӥсьёсызлэн публикациоссыя эскерыны юрттэт» (Христианская жизнь > Плод духа). Юн оске: вань сюлмысьтыды тыршиды ке, Иегова юрттоз тӥледлы азьланяз но «выль адями» луыны.