1. Die kiriguo yen churobọ si oka rẹ ohwo rẹ avwanre hepha?

 Ọ DIANẸ e bromaphiyame nu obọ yẹrẹ o krire, avwanre eje guọnọ dia oka rẹ ohwo rẹ Jihova che vwo ẹguọnọ rọyen. A sa vwọ dia oka rẹ ohwo ọtiọyen, ofori nẹ e sun iroro rẹ avwanre. Diesorọ? Kidie emuọvo kiriguo ro churobọ si oka rẹ ohwo rẹ avwanre ghene hepha yen iroro rẹ avwanre. Siẹrẹ e de roro kpahen ojevwe rẹ ugboma na ọkieje, ọnana cha nẹrhẹ e ru je ta eta ebrabra ọkieje. (Ẹfe. 4:17-19) Ẹkẹvuọvo, a da vwẹ ọkieje vwo roro kpahen obo ri yovwinrin, ka sa dia ihwo re ta eta ji ruẹ obo re sa nẹrhẹ oma vwerhen Jihova.—Gal. 5:16.

2. Enọ vọ yen a cha fuẹrẹn vwẹ uyono nana?

² Kirobo re djunute vwẹ uyono rọ wanre na, a cha sa dobọ rẹ iroro ebrabra eje re djẹ rua ẹwẹn rẹ avwanre ji kare kare-e. Ẹkẹvuọvo, a sa jẹ ojẹ re vwo je ruẹ nene iroro ọtiọyena. Avwanre dobọ rẹ eta vẹ iruemu rẹ Jihova vwo utuoma kpahen ji tavwen e ki bromaphiyame. Ọyena yen owọẹjẹ rẹsosuọ rọ je ma ghanre ro fori nẹ a jẹ e se vwo siobọnu iruemu rẹ ohwo rẹ awanre na. E se vwo ru obo re ghene vwerhen Jihova oma, ofori nẹ e ru nene iji nana: “Ku ohwo ọkpokpọ na phihọ.” (Kọl. 3:10) Vwẹ uyono nana, a cha kpahenphiyọ enọ nana: Die yen “ohwo ọkpokpọ na”? Mavọ yen e se vwo vwo iruemu rẹ ohwo kpokpọ na je sẹro rayen?

3. Vwo nene obo rehẹ Galesha 5:22, 23, die yen iruemu rẹ “ohwo ọkpokpọ na,” kẹ, mavọ yen ohwo se vwo vwo ayen?

³ Ohwo ro vwo iruemu rẹ “ohwo ọkpokpo na” vwẹrokere iruemu ri Jihova. Ohwo ọtiọyena dje iruemu rẹ omamọ rẹ ẹwẹn ọfuanfon na phia vwẹ akpeyeren rọyen womarẹ iroro  rọyen kugbe obo ro ruẹ erọnvwọn wan. (Se Galesha 5:22, 23.) Kerẹ udje, o vwo ẹguọnọ rẹ Jihova kugbe ihwo Rọyen. (Mat. 22:36-39) Ohwo tiọyena sẹro rẹ aghọghọ rọyen ọ da tobọ dianẹ o chirakon rẹ ebẹnbẹn. (Jems 1:2-4) Ọyen ohwo rẹ ufuoma. (Mat. 5:9) Ọyen ohwo vẹ akoechiron ro ji dje erorokẹ phia. (Kọl. 3:13) O vwo ẹguọnọ rẹ obo ri yoma, ọyen o ji ruẹ. (Luk 6:35) O djephia womarẹ obo ro ruẹ nẹ ọyen vwo esegbuyota ọgangan kpahen Ọsẹ rọyen rọhẹ obodjuvwu. (Jems 2:18) O dje uruemu ri dẹndẹn kugbe omaẹriẹnsuon phia ọke rẹ ihwo efa da kpare ophu rọyen.—1 Kọr. 9:25, 27; Tai. 3:2.

4. E che dje iruemu na eje re djunute vwẹ Galesha 5:22, 23 phia ọvuọvo tavwen e ki se vwo iruemu rẹ ohwo kpokpo na? Djekpahọn.

⁴ E se vwo vwo iruemu rẹ ohwo kpokpọ na, o fori nẹ e dje iruemu eje re djunute vwẹ Galesha 5:22, 23 vẹ ẹkpo ri Baibol efa phia. * Iruemu nana họhọ iwun sansan re kuẹ phiyọ vwẹ ọke rọ fẹnẹre-e. Vwọrẹ uyota, buebun rayen họhọ ohwohwo. Kerẹ udje, wo de ghini vwo ẹguọnọ rẹ ọrivẹ wẹn, ku wo se chirakon rọyen ji dje erorokẹ vwọ kẹ. Vwọba, wọ sa vwọ dia ohwo ro vwo uruemu rẹ uyoyovwin dẹn, o fori nẹ wọ dia dẹndẹn je dia ohwo rọ riẹn oma suẹn.

5. Die yen o mudiaphiyọ e vwo “vwo iroro ri Kristi,” kẹ diesorọ e vwo yono kpahen akpeyeren ri Jesu? (1 Kọrẹnt 2:16)

⁵ Se 1 Kọrẹnt 2:16. E se vwo vwo iruemu rẹ ohwo kpokpọ na, o fori nẹ e “vwo iroro ri Kristi.” Ọtiọyena, o fori nẹ e yono kpahen oborẹ Jesu vwẹ ẹgba rẹ iroro rọyen vwo ruiruo wan, a me je vwẹrokere. Jesu dje omamọ rẹ ẹwẹn ọfuanfon na phia gbagba. Ọ nabọ dje iwan ri Jihova phia gbagba kerẹ ughegbe ra nabọ vwọ mrorẹ fiotọ. (Hib. 1:3) E de roro kerẹ Jesu, kẹ avwanre sa vwẹrokere ji vwo oka rẹ iruemu ro vwori.—Fil. 2:5.

6. Die yen ofori nẹ a karophiyọ ọke a da davwẹngba e vwo vwo iruemu rẹ ohwo kpokpọ na?

⁶ A ghene sa vwẹrokere udje ri Jesu? E se roro: ‘Jesu ohwo ọgbagba. Me cha sa vwẹrokere gbagba-a!’ Wo de vwo oka rẹ iroro tiọyen, karophiyọ iroro erha nana. Ẹsosuọ, a ma wẹ vwọ họhọ Jihova vẹ Jesu. Ọtiọyena, wo se brorhiẹn wọ vwọ vwẹrokere ayen, wọ ghene sa vwẹrokere ayen tẹdia evo. (Jẹn. 1:26) Ọrivẹ, ẹwẹn ọfuanfon rẹ Ọghẹnẹ yen ẹgba rọ ma rho kparobọ vwẹ akpọneje. Womarẹ ukẹcha rọyen, wo se ru erọnvwọn  wo rorori nẹ wo che se ru jovwo-o. Ọrerha, ọ dia Jihova rhẹro rọyen nẹ wo dje omamọ rẹ ẹwẹn ọfuanfon na phia gbagba enẹna-a. Vwọrẹ uyota, Ọsẹ rẹ avwanre ro vwo ẹguọnọ na rhuẹrẹ ẹgbukpe 1,000 phiyọ vwọ kẹ ihwo re cha dia otọrakpọ na ayen sa rhe vwọ dia ihwo re gbare. (Ẹvwọ. 20:1-3) Asaọkiephana, Jihova guọnọre nẹ a davwẹngba vwọ vwẹroso ọyen ọke a da guọnọ ukẹcha.

7. Die yen a cha fuẹrẹn enẹna?

⁷ Idjerhe vọ kiriguo yen a sa vwọ vwẹrokere Jesu? A cha fuẹrẹn ẹbẹre ẹne rẹ omamọ rẹ ẹwẹn ọfuanfon na. Vwẹ ẹdia ọvuọvo, a cha mrẹ obo re se yono vwo nẹ idjerhe ri Jesu vwo dje iruemu nana phia. E che vwo ru ọtiọyena, e che roro kpahen enọ evo re cha chọn avwanre uko vwọ fuẹrẹn obo re se vwo ru yovwinphiyọ e vwo vwo iruemu rẹ ohwo kpokpọ na.

8. Idjerhe vọ yen Jesu vwo dje ẹguọnọ phia?

⁸ Ẹguọnọ okokodo rẹ Jesu vwo kpahen Jihova yen muro vwọ vwẹ oma rọyen vwo ze kẹ Ọsẹ rọyen kugbe avwanre. (Jọn 14:31; 15:13) Jesu dje obo ro vwo ẹguọnọ rẹ ihwo te womarẹ obo ro yeren akpọ rọyen wan. Kẹdẹ kẹdẹ, yen o vwo dje uruemu rẹ ẹguọnọ vẹ erorokẹ phia, ọ da tobọ dianẹ e shenyẹ dede. Idjerhe ọvo kiriguo ro vwo dje ẹguọnọ kẹ ihwo ọyen o vwo yono ayen kpahen Uvie rẹ Ọghẹnẹ. (Luk 4:43, 44) Jesu ji dje ẹguọnọ rẹ omaevwoze ro vwo kpahen Ọghẹnẹ vẹ ihworakpọ phia womarẹ o vwo ghwu ughwu rẹ oja vwẹ obọ rẹ iruimwemwu. Ọnana de rhie idjerhe phiyọ vwọ kẹ avwanre e se vwo vwo arhọ ri bẹdẹ.

9. Mavọ yen a sa vwọ vwerokere Jesu vwo dje ẹguọnọ phia?

⁹ Avwanre vwomakpahotọ kẹ Jihova ji bromaphiyame kidie e vwo ẹguọnọ ri Jihova. Ọtiọyena, kerẹ Jesu, je dje ẹguọnọ kẹ Jihova womarẹ obo ra vẹ ihwo yerẹn wan. Ọyinkọn Jọn de si: “Ohwo rọ sa guọnọ oniọvo rọye ro rhiẹ ẹro mrẹ-ẹ, komavọ o ru sa guọnọ Ọghẹnẹ re jẹ sa mrẹ.” (1 Jọn 4:20) Avwanre sa nọ oma avwanre: ‘Mi vwo ẹguọnọ okokodo kpahen ihwo efa? Mi dje erorokẹ phia vwọ kẹ ihwo efa, ọ da tobọ dianẹ ayen muọghọ kẹ vwẹ-ẹ? Ẹguọnọ mu vwe vwọ reyọ ọke vẹ ekuakua mẹ vwọ chọn ihwo efa uko ayen se vwo yono kpahen Jihova? Mi vwo owenvwe mi vwo ru enana eje ọ da tobọ dianẹ ihwo buebun vwo ọdavwaro kpahen ẹgbaẹdavwọn mẹ-ẹ yẹrẹ tobọ vwọso ovwẹ dede? Me sa guọnọ idjerhe mi vwo ru bunphiyọ vwẹ iruo rẹ odibo egbe na?’—Ẹfe. 5:15, 16.

10. Idjerhe vọ yen Jesu vwo djephia nẹ ọyen ohwo rẹ ufuoma?

¹⁰ Jesu ọyen ohwo rẹ ufuoma. Ọke rẹ ihwo vwo ruo obo re brare, o ru ayen keri-i. O ji vwo emu efa o ruru. Ọ jowọ rọ vwọ sẹro rẹ ufuoma je vuẹ ihwo nẹ ayen vẹ ihwo efa rhuẹrẹ ebẹnbẹn rayen phiyọ. Kerẹ udje, o yono ayen nẹ o fori ayen vẹ iniọvo rayen vwo yerinkugbe vwọrẹ ufuoma ọ da dianẹ ayen guọnọre nẹ Jihova rhiabọreyọ ẹga rayen. (Mat. 5:9, 23, 24) Ọke buebun yen ọ vwọ chọn idibo rọyen uko vwọ rhuẹrẹ ebẹnbẹn rayen phiyọ ọke rẹ ayen vwo sisiesi rẹ ohwo rọ ma rho vwẹ usun rayen.—Luk 9:46-48; 22:24-27.

11. Mavọ yen a sa vwọ dia ohwo rẹ ufuoma?

¹¹ A vwọ dia ohwo rẹ ufuoma, o fori nẹ e ru vrẹ a de vwọ kẹnoma vwọ kẹ ẹghwọ. O fori nẹ a jowọ a vẹ ihwo efa vwọ rhuẹrẹ kugbe ji yerin vwọrẹ ufuoma, e mi ji jiro vwọ kẹ iniọvo na nẹ ayen vẹ ihwo efa rhuẹrẹ ebẹnbẹn rayen phiyọ. (Fil. 4:2, 3; Jems 3:17, 18) A sa nọ oma rẹ avwanre enọ nana: ‘Erhọ yen erọnvwọn evo ri mi se vwo ze rere mẹ vẹ ihwo efa se vwo yerinkugbe vwọrẹ ufuoma? Ọ da dianẹ oniọvo ọvo gbe vwe ku, mi phi obo ro ru vwe na phiyọ evun? Me hẹrhẹ nẹ ohwo ochekọ na rhe  rẹ vwẹ tavwen gbanẹ mẹvwẹ yen ka jowọ rẹ ọrhuẹrẹ kugbe ọ da tobọ dianẹ ohwo ochekọ na yen ru vwe chọ? Siẹrẹ o de shephiyọ, mi jiro vwọ kẹ ihwo re vẹ ihwo efa gbe vwo ẹghwọ nẹ ayen vẹ ihwo na rhuẹrẹ kugbe?’

12. Idjerhe vọ yen Jesu vwo dje erorokẹ phia?

¹² Jesu ọyen ohwo vẹ erorokẹ. (Mat. 11:28-30) O dje erorokẹ phia womarẹ o vwo dje uruemu ri dẹndẹn phia je dia ohwo rọ nuẹ vwẹ ọke ọ tobọ vwo hirharoku ebẹnbẹn. Kerẹ udje, ọke rẹ aye ri Fonisha na vwọ rẹ nẹ o sivwin ọmọ rọyen, vwẹ ẹsosuọ ọ senre, ẹkẹvuọvo, ọke ọ vwọ mrẹ nẹ aye na vwo uvi rẹ esegbuyota, o de sivwin ọmọ rọyen na. (Mat. 15:22-28) Dede nẹ Jesu ohwo vẹ erorokẹ, ọ dia ọyen o vwo si obọ rẹ ọghwọku kpotọ vwọ kẹ ohwo ro fo vwọ kẹ-ẹ. Ọkievo, o dje erorokẹ phia vwọ kẹ ihwo ro vwo ẹguọnọ rọyen womarẹ o vwo sianro vuẹ ayen obo ri fori. Kerẹ udje, ọke rẹ Pita vwọ guọno dobọ ri Jesu ji o vwo jẹ ọhọre ri Jihova eruo, Jesu da ghwọkuo vwẹ irharo rẹ idibo ichekọ na. (Mak 8:32, 33) Ọ dia o ru ọnana ọ vwọ phọphọ Pita-a, ẹkẹvuọvo o ruro o vwo yono je vwẹ orhọn-esio vwọ kẹ idibo ichekọ na nẹ ayen dia ihwo ri ruẹ vrẹ obo ro fori nẹ ayen ru-u. Aphro herọ-ọ, oma vua Pita kpahen obo re phiare na, ẹkẹvuọvo, ọ mrẹ erere vwo nẹ ọghwọku na rhe.

13. Mavọ yen se vwo dje uvi rẹ erorokẹ phia?

¹³ Wo se vwo dje uvi rẹ erorokẹ phia vwọ kẹ ihwo ru wo vwo ẹguọnọ kpahen, ofori nẹ wo sianro vwẹ uchebro ro fori vwọ kẹ ayen vwẹ ọkievo. Wo de che ru ọtiọyen, vwẹrokere Jesu rere wo mu uchebro wẹn na kpahen uyono ri Baibol na. Dia dẹndẹn. Vwẹroso ayen nẹ ayen che ru obo ri yoma, ji vwo imuẹro nẹ ihwo ri vwo ẹguọnọ ri Jihova ri ji vwo ẹguọnọ wẹn che ru nene uchebro ru wọ vwọphia na. Nọ oma wẹn enọ nana: ‘Mi vwo uduoyivwin re me vwọ ta ota siẹrẹ me da mrẹ ohwo ọvo ri mi vwo ẹguọnọ rọyen ro ruẹ obo re chọre? Ọ da dia obo ri fori re me vwọ vwẹ uchebro phia, me vwọphia vwẹ idjerhe ri dẹndẹn gbanẹ me ta eta na gbaegbae? Die yen mu vwe vwọ vwẹ uchebro phia? Me vwẹ uchebro na phia kidie iruemu rẹ ohwo na tu vwe oma gbanẹ mi ruẹ ọtiọyen me sa vwọ vwẹ ukẹcha kẹ?’

14. Idjerhe vọ yen Jesu wan dje uruemu rẹ uyoyovwin phia?

¹⁴ Ọ dia Jesu de riẹn obo ri yoma ọvo-o, o ji ruo. Jesu vwo ẹguọnọ rẹ Ọsẹ rọyen, ọtiọyena, ọkieje yen o vwo ru obo ri yovwinrin vẹ omamọ rẹ ẹwẹn. Uruemu rẹ uyoyovwin teyanphia womarẹ ihwo re djerephia vwọ kẹ. Ọnana uruemu re se djephia womarẹ re vwo ruẹ obo ri yovwinrin vwọ chọn ihwo efa uko. Ọ dia a de vwọ riẹn obo ri yovwinrin ro fori nẹ e ru ọvo-o; o fori nẹ e ru obo ri yovwinrin vẹ omamọ rẹ ẹwẹn. Ihwo evo sa nọ: ‘E se ru obo ri yovwinrin vẹ orharhe rẹ ẹwẹn?’ Dẹn! Kerẹ udje, Jesu ta ota kpahen ihwo ri ruẹ ẹse vwọ kẹ ivwiogbere ẹkẹvuọvo kẹ ayen rhoma hworo ukpokpo rọyen rere ihwo efa vwọ riẹn oborẹ ayen ruru na. Dede nẹ obo ri yovwinrin yen ayen ruru, jẹ, oma vwerhen Jihova kpahọ-ọn.—Mat. 6:1-4.

15. Mavọ yen a sa vwọ dia ihwo ri vwo uvi rẹ uruemu rẹ uyoyovwin?

¹⁵ A cha sa dia ohwo ro vwo uvi rẹ uruemu rẹ uyoyovwin siẹrẹ ọ da dianẹ erere romobọ yen mu avwanre vwo ruẹ erhuvwu-u. Ọtiọyena wọ sa nọ oma wẹn: ‘Me de riẹn obo ri yovwinrin ro fori nẹ mi ru gbanẹ mi ji ruo nene obo ro fori nẹ e ruo nene? Die yen mu vwe vwo ruẹ obo ri yovwinrin?’

16. Die yen o fori nẹ e ru kẹdẹ kẹdẹ, kẹ diesorọ?

¹⁶ E jẹ a reyọ phiyọ nẹ egbaẹdavwọn re vwo vwo iruemu rẹ ohwo kpokpọ na vwoba ọke e  vwo bromaphiyame nu-u. Ohwo kpokpọ na họhọ ewun kpokpọ ro fori nẹ a sẹro rọyen. E se ru ọtiọyen siẹrẹ a da guọnọ idjerhe sansan vwo dje omamọ rẹ ẹwẹn ọfuanfon na phia kẹdẹ kẹdẹ. Diesorọ? Kidie Jihova ruẹ obo rọ tare, ẹwẹn ọfuanfon rọyen na yen o vwo ruẹ obo rọ tare gba. (Jẹn. 1:2) Ọtiọyena, ẹbẹre sansan rẹ omamọ rẹ ẹwẹn ọfuanfon na se mu avwanre vwo ru obo ri fori. Kerẹ udje, odibo Jems de si: ‘Esegbuyota ro vwo iruo-o ghwure.’ (Jems 2:26) Ọtiọyen ẹbẹre sansan rẹ omamọ re ẹwẹn ọfuanfon rẹ Ọghẹnẹ na je hepha. Kọke kọke rẹ avwanre de dje iruemu na phia, jẹ avwanre djephia nẹ ẹwẹn ọfuanfon rẹ Ọghẹnẹ na ghene chọn avwanre uko.

17. Die yen e ru siẹrẹ ọ da dianẹ e se dje iruemu rẹ omamọ rẹ ẹwẹn ọfuanfon na phia vwẹ ọkievo-o?

¹⁷ Ọ dia ọkieje yen Inenikristi ri bromaphiyame vwẹ ikpe buebun re se vwo dje iruemu rẹ omamọ rẹ ẹwẹn ọfuanfon na phia-a. O yovwin mamọ siẹrẹ avwanre da davwẹngba vwo dje iruemu rẹ omamọ rẹ ẹwẹn ọfuanfon na phia ọkieje. Roro kpahen Udje nana. Ewun wẹn ọvo ro me je we mamọ da bẹre, wo ke ghwe brokpakpa do kufia? Ẹjo. Ọ da dia oborẹ wo se ru, wọ cha jomaotọ ko asan rọ bẹre na. Wọ da cha rhoma ku ẹwun na phiyọ, wọ cha rha kẹnoma rere o vwo jẹ rhoma bẹrẹ. Vwẹ idjerhe ọvuọvo na, o de vwo ọkievo ru wo se dje uruemu ri dẹndẹn, akoechiron yẹrẹ ẹguọnọ phia vwọ kẹ ohwo-o, wo jẹ ọnana sua ọkuọrọn vwọ kẹ wẹ-ẹ. Orẹ ro nẹ otọ rẹ ubuidu rhe sa rhuẹrẹ ẹdia na phiyọ rere wẹ vẹ ohwo na sa vwọ rhoma vwo omamọ rẹ oyerinkugbe. Davwẹngba vwo ru yovwinphiyọ vwẹ obaro na.

18. Imuẹro vọ yen avwanre vwori?

¹⁸ Ọyen emu rẹ omavwerhovwẹn rẹ Jesu vwo phi udje phiyotọ vwọ kẹ avwanre. A da vwẹrokere oborẹ Jesu vwẹ ẹgba rẹ iroro rọyen vwo ruiruo wan kugbe oborẹ o ru erọnvwọn wan, kọ cha lọhọ vwọ kẹ avwanre a sa vwọ vwẹrokere gbagba. A da vwẹrokere Jesu, ọ cha chọn avwanre uko vwo vwo iruemu rẹ ohwo kpokpọ na. Vwẹ uyono nana, ẹbẹre ẹne rẹ omamọ rẹ ẹwẹn ọfuanfon rẹ Ọghẹnẹ na ọvo yen e yono kpahen. O che yovwin siẹrẹ wọ da ghwọrọ ọke vwọ fuẹrẹn ẹbẹre efa rẹ omamọ rẹ ẹwẹn ọfuanfon na kugbe obo ru wo se vwo dje ayen phia vwẹ akpeyeren wẹn. Wọ cha mrẹ iyovwinreta sansan re ta ota kpahen omamọ rẹ ẹwẹn ọfuanfon na vwẹ Research Guide for Jehovah’s Witnesses vwẹ otọ rẹ uyovwinrota na “Christian Life” wo mi rhe ni “Fruitage of the Spirit.” Jẹ o muwẹro nẹ wọ da davwẹngba vwo ru ẹkẹn wẹn, Jihova cha chọn wẹ uko vwo vwo iruemu rẹ ohwo kpokpọ na ọkieje.