1. Sol saremo boni de gaver la nova personalità se stemo atenti a quel che pensemo. Parché?

 ARQUANTI i ze batesadi fà tanti ani e altri fà pochi giorni. Anca cossita, tuti i ga de sforsarse par seitar a gaver la nova personalità. Ma sol saremo boni de gaverla se stemo atenti a quel che pensemo. Parché? Noantri semo quel che pensemo. Alora se sol pensemo in quel che l’è sbalià, ndaremo parlar e far robe sbaliade. (Efe. 4:17-19) Ma se seitemo a pensar in quel che l’è giusto, sarà pi fàcile parlar e far quel che assa Geovà contento. — Gàl. 5:16.

2. Cossa ndaremo imparar in questo stùdio?

² Come ghemo visto nel primo stùdio, ghemo de cavar via la vècia personalità, o sia, fermarse de parlar e far robe sbaliade vanti del batésimo. Ghemo anca visto che podaremo pensar in qualcossa de sbalià, ma no’l vol dir che ne tocarà farla. Ma, par assar Geovà contento, ghemo de far de pi che sol cavar via la vècia personalità. Cossa ancora ghemo de far? Gaver la nova personalità. (Col. 3:10) Cossa la ze la nova personalità? Come podemo gaverla e mai cavarla via? In questo stùdio, gavaremo le risposte a queste domande.

3. Cossa che la ze la nova personalità, e come una persona la pol gaverla? (Gàlati 5:22, 23)

³ La “nova personalità” la vol dir pensar e far le robe come Geovà. Ma come che la persona la pol gaver questa nova personalità? La ga de far sforso par gaver le qualità  del fruto del spìrito de Dio, o sia, assar che el spìrito santo ghe giute a pensar, sentir e far quel che ghe piase a Dio. (Ledi Gàlati 5:22, 23. *) Par esémpio, la persona che la ga la nova personalità la ama a Geovà e i so fradei. (Mat. 22:36-39). Ela ze contenta anca che la infronte dificoltà e la se sforsa de viver in pace con tuti. (Tiago 1:2-4; Mat. 5:9) Ela sempre la mostra passiensa e bontà ai altri e la vol tanto far quel che l’è giusto. (Col. 3:12, 13; Luc. 6:35) Questa persona anca la mostra che la ga una forte fede in Geovà in tuto quel che la fà e che la ga autocontrolo anca quando no l’è fàcile gaverlo. — Tiago 2:18; 1 Cor. 9:25, 27; Tito 3:2.

4. Sarà che podemo gaver le qualità de Gàlati 5:22, 23 una ala volta? Spiega.

⁴ Par gaver la nova personalità, ne ocore mostrar le qualità de Gàlati 5:22, 23 e le altre qualità che catemo nela Bìblia. * Ma queste qualità no le ze come le robe che metemo su. Come cossita? Noantri semo boni de meter su una roba ala volta. Ma no semo boni de mostrar una qualità sensa mostrar anca quele altre. Par esémpio, se te ami una persona, te vè anca mostrarghe bontà e passiensa, e par mostrarghe bontà, te ocore gaver autocontrolo e no restar inrabià con ela.

5. Come podemo pensar compagno a Cristo e parché che ghemo de cognosser cada volta de pi a Gesù? (1 Corinti 2:16)

⁵ Ledi 1 Corinti 2:16. * Sol gavaremo la nova personalità se pensemo compagno a Cristo. Parché? Parché lu el gavea tute le qualità del fruto del spìrito santo, e el mostrea de maniera perfeta tute le qualità de Geovà. (Ebr. 1:3) Alora, ghemo de saver come Gesù el pensa e sforsarse de pensar compagno a lu. Cossita sarà cada volta pi fàcile far compagno a Gesù e gaver la so personalità. — Fil. 2:5.

6. Che tre robe ghemo de ricordarse?

 ⁶ Sarà che semo boni de far compagno a Gesù? Fursi pensemo: ‘Mai mi sarò bon de far come Gesù parché lu l’era perfeto.’ Se pensemo cossita, tre robe le pol giutarne. Prima, semo stati creadi cole medèsime qualità che Geovà e Gesù, par quela che podemo far compagno a lori e gaver le qualità che lori i ga. (Gén. 1:26) Seconda, Geovà el pol darne el so spìrito santo, che la ze la forsa pi poderosa del Universo, par giutarne a far le robe che mai sarìssino boni de far noantri soli. Tersa, Geovà el sa che no saremo boni de mostrar le qualità del fruto del spìrito santo de maniera perfeta adesso. Par quela che la Bìblia la dise che ghen sarà mila ani par le persone deventar perfete. (Apo. 20:1-3) Ma, Geovà el vol che seitemo a far el meio che podemo e che se fidemo nel so aiuto.

7. Cossa ndaremo veder adesso?

⁷ Adesso, ndaremo veder quatro qualità del fruto del spìrito, e come che Gesù le ga mostrà. Ndaremo anca veder arquante domande che le ndarà giutarne a saver come podemo mostrar queste qualità ancora meio.

8. Come Gesù el ga mostrà che el amea a Geovà e ale persone?

⁸ Gesù el amea tanto a Geovà. Par quela, el fea quel che l’era meio par Geovà e par i altri, e nò par lu. (Gioani 14:31; 15:13) Quel che Gesù el ga fato quando l’era qua nela Tera ga mostrà che el amea tanto le persone. Par esémpio, Gesù sempre el mostrea amor e misericòrdia a tuti, anca a quei che i ghe disea su. Lu el ga anca insegnà ale persone sora el Regno de Dio. (Luc. 4:43, 44) Lu el amea tanto a Geovà e ale persone che el ga dato la so vita come sacrifìssio. Par quela, tuti noantri ghemo la speransa de viver par sempre.

9. Come podemo mostrar amor compagno a Gesù?

⁹ Come Gesù, noantri amemo tanto a Geovà e ghemo prometesto doperar la nostra vita par servirlo. Par mostrar che amemo a Geovà, ghemo de far compagno a Gesù e tratar ben le persone. El apòstolo Gioani el ga scrito: ‘Quel che no ama el so fradel, che el ga visto, no’l pol mia amar a Dio, che no lo ga visto.’ (1 Gio. 4:20) Alora l’è tanto bon che se domandemo: ‘Sarà che amo pròpio i altri? Mi li trato con bontà, anca se i me dise su? Mi dopero el me tempo e i me soldi par giutar i altri a imparar sora Geovà? Me sforso de farlo anca se quasi tuti no i vol scoltarme o i me vien contra? Sarà che posso doperar de pi del me tempo par predicar e insegnar?’ — Efe. 5:15, 16.

10. Come Gesù el ga mostrà che el volea viver in pace con tuti?

¹⁰ Gesù el volea viver in pace con tuti e el se sforsea par farlo. Quando le persone le ghe disea su, lu no’l ghe disea indrio. Lu anca el incoraiea quei che i era disgustadi un colaltro a far la pace. Par esémpio, lu el ga dito che una persona sol la podaria assar Geovà contento se la fusse drio viver in pace con tuti. (Mat. 5:9, 23, 24) E quando i dissìpoli i barufea par saver chi che l’era el meio intrà de lori, Gesù li giutea a far la pace. — Luc. 9:46-48; 22:24-27.

11. Cossa che ghemo de far par viver in pace coi altri?

¹¹ Ghemo de proar viver intesi con tuti.  Ma se ga belche sucedesto qualcossa intrà noantri e nantro fradel, volemo far la pace con lu. E se savemo che due fradei i ze disgustadi un colaltro, ghemo de incoraiarli a far la medèsima roba. (Fil. 4:2, 3; Tiago 3:17, 18) Alora, podemo domandarse: ‘Mi vui pròpio sforsarme par far la pace coi altri? Se un fradel o una sorela el fesse qualcossa che no me piase, seitaria disgustà? Mi ndaria far la pace con lu o spetaria che lu lo fesse? Mi lo faria anca se penso che lu che el ga sbalià? Se mi savesse che due fradei i ze disgustadi un colaltro, ndaria incoraiarli a far la pace intrà de lori?’

12. Come Gesù el ga mostrà bontà ai altri?

¹² Gesù el ga sempre mostrà bontà ai altri. (Mat. 11:28-30) Lu el tratea ben a tuti e el capia quel che i era drio infrontar. Par esémpio, quando una dona dela Fenìssia la ga domandà che Gesù el guarisse la so fiola, lu el ga parlà con bontà con questa dona. Nel scomìnsio, lu no’l ga fato quel che la ghe ga domandà. Ma quando el ga visto che la gavea una forte fede, el ga guario la so fiola. (Mat. 15:22-28) Gesù anca el ga mostrà bontà quando el ga dato consili a quei che el amea. Varda un esémpio. Quando Piero el ga dito che Gesù no ghe tocaria morir, Gesù el ghe ga dito davanti dei altri dissìpoli che lu l’era sbalià. (Mar. 8:32, 33) Gesù el ga fato cossita nò parché el volea che Piero el restesse con vergogna. Invesse, lu el volea insegnarghe e mostrar anca ai altri dissìpoli che no i podea fidarse in lori stessi. Fursi Piero l’è restà con vergogna, ma quel che Gesù el ghe ga dito lo ga giutà.

13. Come podemo mostrar bontà ai altri?

¹³ Se volemo mostrar bontà ai altri ne tocarà darghe consili quando i ga de bisogno. Ma come ghemo de farlo? Ghemo de far come Gesù e parlarghe con bontà e dar el consìlio de acordo con quel che la Bìblia la dise. Ghemo de creder che questa persona la vol far quel che l’è giusto e che se la ama a Geovà e a noantri, la ndarà scoltar el consìlio. Alora, podemo domandarse: ‘Se mi vedesse che una persona che mi amo la ndaria far qualcossa sbaliada, gavaria coraio par darghe un consìlio? Sarà che saria bon de farlo con bontà? Parché che volaria darghelo? Sarà che volaria farlo parché son disgustà con ela o parché mi ghe vui ben?

14. Parché che Gesù sempre el giuta i altri?

¹⁴ Gesù el ama a Geovà, par quela che el mostra benignità, o sia, el vol tanto giutar i altri. Gesù sempre el giuta i altri parché el vol farlo. Una persona che mostra benignità la vol sempre giutar i altri e lo fà parché la ga caro. Ma fursi podemo domandarse: ‘Sarà che se pol giutar a una persona sensa voler del bon?’ Si. Par esémpio, Gesù el ga parlà de persone che le era drio giutar i poareti parché le volea farse veder. Ma Geovà no’l ga mia dato valor a quel che le ga fato. — Mat. 6:1-4.

15. Come una persona la mostra che la vol pròpio giutar i altri?

¹⁵ Una persona la mostra che la fà pròpio quel che l’è bon par i altri quando lo fà sensa spetar qualcossa indrio. Podemo domandarse: ‘Sarà che mi sò come giutar i altri, ma no lo fao? E se mi li giuto, parché che lo fao?’

16. Cossa ghemo de far se volemo seitar a gaver la nova personalità, e parché?

¹⁶ Sarà che ghemo de sforsarse par gaver la nova personalità sol fin batesarse? Nò, ghemo de seitar a farlo anca dopo del batésimo. Come podemo farlo? Ghemo de mostrar le qualità del fruto del spìrito santo tuti i giorni. Parché che ghemo de mostrar queste qualità? Ghemo de ricordarse che el spìrito santo de Geovà l’è una forsa che la fà agir. (Gén. 1:2) Alora, se ghemo el spìrito santo, gavaremo anca le qualità del fruto e ndaremo mostrarle. Tiago el ga dito che la fede de una persona sol la ga valor se la mostra. (Tiago 2:26) La medèsima roba la sucede cole altre qualità del fruto del spìrito santo de Dio. Quando mostremo le qualità del fruto del spìrito, anca mostremo che el spìrito santo de Geovà l’è drio giutarne.

17. Cossa ghemo de far se no semo stati boni de mostrar el fruto del spìrito?

¹⁷ Anca se semo batesadi fà tanti ani no saremo boni de mostrar el fruto del spìrito santo de maniera perfeta. Metemo dir che no ghemo mostrà passiensa, bontà o amor a qualchedun. Alora, cossa ghemo de far? Invesse de restar desanimadi, ghemo de domandarghe scusa e sforsarse par tratarlo sempre ben. Par giutarne a capir parché che ghemo de farlo, pensemo nte una ilustrassion. Imaginemo che ghemo fato un pìcolo sbrego nte una roba che ne piase tanto. Sarà che ndarìssino butarla via? Sicuro che nò, pitosto ndarìssino rangiarla e sforsarse par no sbregarla pi.

18. Cossa ndarà suceder se noantri se sforsemo par gaver el fruto del spìrito?

¹⁸ Semo pròpio contenti de gaver el esémpio de Gesù par ndarghe drio. Se noantri se sforsemo de pensar compagno a lu, saremo boni de far quel che el fea, e de seitar a gaver la nova personalità. In questo stùdio, ghemo visto quatro qualità del fruto del spìrito santo. Ma ghen’è anca altre qualità. Alora, podemo studiarle e pensar in come mostrarle. Te pol studiar i artìcoli che ghen’è nel Guia de Pesquisa para Testemunhas de Jeová. Va in “Vida cristã”, e dopo “Fruto do espírito”. Se se sforsemo par gaver le qualità del fruto del spìrito, Geovà el ndarà giutarne a seitar a gaver la nova personalità.