1. Nu eeshshay darotoo aybiira gayttii?

 NUUNI xammaqettoosappe amarida gallassa woy daro laytta gidin, nuuni ubbay Yihooway dosiyo eeshshay deˈiyoogeeta gidanawu koyoos. Nuuni hegaa mala asa gidanawu qoppiyooban naagettana koshshees. Aybissi? Nu eeshshay nuuni qoppiyoobaara darotoo gayttiyo gishshataassa. Nuuni ubbatoo nuna ufayssiyaabaa qoppikko, iitabaa haasayoos woy oottoos. (Efi. 4:17-19) SHin nuuni loˈˈobaa qoppikko, nu Aawaa Yihoowa ufayssiyaabaa haasayana woy oottana danddayoos.—Gal. 5:16.

2. Nuuni ha huuphe yohuwan beˈana oyshati awugeetee?

² Hagaappe kasetiya huuphe yohuwan qonccidaagaadan, iita qofaa qoppiyoogaa muleera aggana danddayokko. SHin he qofaa polennan agganawu doorana danddayoos. Yihooway ixxiyoobata haasayiyoogaanne oottiyoogaa nuuni xammaqettanaappe kase aggana koshshees. Hagee ceega asatettaa xayssanawu nuuni oottana koshshiya waannaba. SHin nuuni Yihoowa loytti ufayssanawu “ooratta meretaa [maayite]” giya azazuwaakka azazettana bessees. (Qol. 3:10) Ha huuphe yohuwan kaallidi deˈiya oyshatu zaaruwaa nuuni beˈana: ‘Ooratta meretay’ aybee? Nuuni ooratta meretaa waati maayana danddayiyoo, qassi hegaa maayidi deˈanawu waatana danddayiyoo?

3. ‘Ooratta meretay’ aybee, qassi issi uri hegaa waati maayii? (Galaatiyaa 5:22, 23)

³ “Ooratta meretaa” maayida uri Yihoowa milatees. Issi uri Xoossaa ayyaanaa ayfiyaa ayfiyoogan, ba qofaanne oosuwaa  geeshsha ayyaanay laammanaadan paqqadiyoogan ooratta asatettaa maayees. (Galaatiyaa 5:22, 23 nabbaba.) Leemisuwawu, I Yihoowanne A asaa siiqees. (Maa. 22:36-39) I metuwaa genccidi deˈiyo wodekka ubbatoo ufayttees. (Yaaq. 1:2-4) I sigettiya asa. (Maa. 5:9) I haratuura gayttidaagan danddayanchchanne keha. (Qol. 3:13) I loˈˈobaa doseesinne oottees. (Luq. 6:35) I saluwan deˈiya ba Aawaa mintti ammaniyoogaa ba oosuwan bessees. (Yaaq. 2:18) Harati bana yiilloyiyo wode woppu gees, qassi paacee gakkiyo wode bana naagees.—1 Qor. 9:25, 27; Tii. 3:2.

4. Nuuni ooratta meretaa maayanawu, Galaatiyaa 5:22, 23ninne Geeshsha Maxaafan hara xiqisetun odettida eeshshati deˈiyoogeeta gidana koshshiyoy aybissee?

⁴ Nuuni ooratta meretaa maayanawu, Galaatiyaa 5:22, 23ninne Geeshsha Maxaafan hara xiqisetun odettida ubba eeshshati deˈiyoogeeta gidana koshshees. * Ha eeshshati nuuni dumma dumma maayiyo maayotu mala gidokkona. Qassi ha eeshshatuppe daroti hara eeshshatuura issi mala. Leemisuwawu, neeni wozanappe ne shooruwaa siiqiyaaba gidikko, A danddayananne ayyo kehana. Qassi neeni tumuppe loˈˈo asa gidikko, ashkkenne nena naagiyaagaa gidaasa.

5. “Nuussi Kiristtoosa wozanai” woy qofay deˈees giyoogee woygiyoogee, qassi Yesuusa deˈuwaabaa nuuni xannaˈana koshshiyoy aybissee? (1 Qoronttoosa 2:16)

⁵ Koyro Qoronttoosa 2:16 nabbaba. Nuuni ooratta asatettaa maayanawu “nuussi Kiristtoosa wozanai” woy qofay deˈana koshshees. Hegaa giyoogee nuuni Yesuusa qofaa tamaarananne A milatana koshshees giyoogaa. Xoossaa ayyaanaa ayfiyaa Yesuusi wottiyoobi baynna ogiyan ayfiis. I Yihoowa eeshshata wottiyoobi baynna ogiyan bessiis. (Ibr. 1:3) Nuuni Yesuusaagaadan loytti qoppiyo wode, aagaadan loytti oottoos; qassi aagaa mala eeshshaa loytti bessiyaageeta gidoos.—Pili. 2:5.

6. Nuuni ooratta asatettaa maayanawu baaxetiyo wode ay hassayana koshshii?

⁶ Yesuusa leemisuwaa kaalliyoogee tumuppe nuussi danddayettiyaabee? Nuuni hagaadan qoppana danddayoos: ‘Yesuusi wottiyoobi baynna asa. Taani wottiyoobi baynna ogiyan A mala gidana danddayikke!’ Neessi hegaadan siyettikko, ha hanotata hassaya. Koyruwan, neeni Yihoowanne Yesuusa  leemisuwan merettadasa. Hegaa gishshawu, amarida hanotan neeni eta milatana danddayaasa. (Doo. 1:26) Naaˈˈanttuwan, Xoossaa geeshsha ayyaanay saluwan saˈan aybippenne aadhdhiya wolqqa. Neeni nerkka mule oottana danddayennabaa geeshsha ayyaanaa maaduwan oottana danddayaasa. Heezzanttuwan, neeni ha wodiyan wottiyoobi baynna ogiyan ayyaanaa ayfiyaa ayfanaadan Yihooway naagenna. Saˈan merinawu deˈanawu hidootiyaageeti wottiyoobi baynnaageeta gidanaadan nu siiqo Aaway 1,000 layttaa keeriis. (Ajj. 20:1-3) Ha wodiyan nuuni nuussi danddayettida ubbabaa oottanawu baaxetanaadaaninne Yihooway nuna maaddiyoogaa ammanettanaadan I nuuppe koyees.

7. Nuuni haˈˈi ay beˈanee?

⁷ Yaatin, nuuni Yesuusa waati milatana danddayiyoo? Nuuni Xoossaa ayyaanaa ayfiyaa macaratuppe oyddata pilggana. Eta huuphiyan huuphiyan pilggiyo wode, he eeshshata Yesuusi bessido ogiyaappe nuuni tamaarana danddayiyoobaa akeekana. Qassi, nuuni ooratta asatettaa ay keena loytti maayidaakko nuna qoranawu maaddana danddayiya amarida oyshata beˈana.

8. Yesuusi siiqiyoogaa waati bessidee?

⁸ Yesuusi Yihoowa keehi siiqiyo gishshawu, ba Aawaassinne nuussi bana yarshshiis. (Yoh. 14:31; 15:13) Yesuusi asaa keehi siiqiyoogaa saˈan deˈido deˈuwan bessiis. Amaridaageeti A eqettikkonne, I ubba galla asaa siiqiisinne asawu qarettiis. I asaa siiqiyoogaa bessido waanna ogee Xoossaa Kawotettaabaa asaa tamaarissiyoogaa. (Luq. 4:43, 44) Yesuusi tuggatanawunne nagaranchchatu kushiyan hayqqanawu eeno giyoogan Xoossaanne asaa ba goˈˈaa aggi bayidi siiqiyoogaakka bessiis. Yaatiyoogan, nuuni ubbay merinaa deˈuwaa demmanaadan ogiyaa dooyiis.

9. Nuuni Yesuusaagaadan siiqiyoogaa waati bessana danddayiyoo?

⁹ Nuuni saluwan deˈiya nu Aawaa siiqiyo gishshawu, nuna awu sheedhdhidi xammaqettida. Yaatiyo gishshawu, nuuni asaa Yesuusaagaadan oyqqiyoogan Yihoowa siiqiyoogaa bessana koshshees. Kiitettida Yohaannisi hagaadan giis: “Be7ido ba ishaa siiqennaagee be7ibeenna Xoossaa siiqanau waani danddayii?” (1 Yoh. 4:20) Nuna hagaadan oychchana danddayoos: ‘Taani asaa loytta siiqiyaanaa? Harati tawu meqetta iitikkonne, taani etawu qarettiyaanaa? Harati Yihoowabaa eranaadan maaddanawu ta wodiyaanne ta aquwaa goˈettanaadan siiqoy tana denttettii? Taani baaxetiyo baaxiyaa daro asay nashshenna wode woy tana eti eqettiyo wode taani hegaadan oottanawu eeno giyaanaa? Erissiyo ashkkara oottiyo oosuwaa kaseppe loytta oottanawu wodiyaa demmana danddayiyaanaa?’—Efi. 5:15, 16.

10. Yesuusi saruwan deˈanawu waatidee?

¹⁰ Yesuusi saruwan deˈiya asa. Asay A bolli iitabaa oottido wode, I iitabaa ootti zaaribeenna. SHin I hegaappe aarobaa oottiis. I saruwan deˈiis; qassi harati sigettanaadan minttettiis. Leemisuwawu, eti Yihooway bantta goynuwan ufayttanaadan koyikko, bantta ishanttuura sigettana koshshiyoogaa I eta tamaarissiis. (Maa. 5:9, 23, 24) Qassi kiitettidaageeti bantta giddon ubbaappe ooni gitakko palamettiyoogaa agganaadan Yesuusi eta darotoo maaddiis.—Luq. 9:46-48; 22:24-27.

11. Nuuni sigettiyaageeta waani gidana danddayiyoo?

¹¹ Nuuni sigettiyaageeta gidanawu, ooshshay merettennaadan naagettiyoogaappe aarobaa oottana koshshees. Nuuni haratuura sigettanawunne nu ishanttinne michchontti bantta giddon merettidabaa giigissanaadan  minttettanawu baaxetana koshshees. (Pili. 4:2, 3; Yaaq. 3:17, 18) Nuuni nuna ha oyshata oychchana danddayoos: ‘Taani haratuura sigettanawu ay agga bayanawu eeno giyaanaa? Issi ishay woy michchiyaa tana azzanttiyo wode, taani uluwan lancciyaa oyqqiyaanaa? Hara uri tanaara sigettanaashin naagiyaanaayye, metuwawu gaasoy hara uraa gaada taani qoppikkonne, kasetada sigettiyaanaa? Ooyettidaageeti sigettanaadan koshshiya wodiyan minttettiyaanaa?’

12. Yesuusi kehatettaa waati bessidee?

¹² Yesuusi keha. (Maa. 11:28-30) Metiyaabay deˈishinkka, qarettiyoogaaninne hanotaadan haniyoogan I kehatettaa bessiis. Leemisuwawu Kanaane biittaa maccaasiyaa ba naˈiyo I pattanaadan mintta oychchaasu, A oychchidobaa I koyro oottibeenna; shin A gita ammanuwaa bessido gishshawu I naˈiyo kehatettan pattiis. (Maa. 15:22-28) Yesuusi keha gidikkonne, zorana bessiyo wode zoriis. I siiqiyoogeeta issi issitoo mintti zoriyoogan kehatettaa bessiis. Leemisuwawu, PHeexiroosi Yesuusi Yihoowa sheniyaa oottiyoogaa digganawu malido wode, hara erissiyo ashkkaratu sinttan Yesuusi A seeriis. (Mar. 8:32, 33) I hegaadan oottidoy PHeexiroosa kawushshanaassa gidennan, A loohissanaassanne hara erissiyo ashkkarati otorettennaadan zoranaassa. PHeexiroosi guuttaa yeellatidaba gidikkonne, he seeran I goˈettidoogee qoncce.

13. Nuuni waanidi wozanappe kehana danddayiyoo?

¹³ Neeni siiqiyoogeetuyyo wozanappe kehanawu, eta issi issitoo neeni zoriyoogee koshshana danddayees. Neeni yaatiyo wode, Xoossaa Qaalan deˈiya maaraadan zoriyoogan Yesuusa milataasa. Ashkke gida. Etabaa loˈˈobaa qoppa, Yihoowanne nena siiqiyaageeti neeni siiquwan zoriyo zoriyaa siyanaagaa ammanetta. Ha oyshata nena oychcha: ‘Taani siiqiyo uri balabaa oottiyo wode, he uraa zoranawu taani xalee? Taani zorana koshshiyo wode, kehatettan haasayiyaanaayye, meqetti baynna hanotan haasayiyaanaa? Taani zoranaadan oottiya gaasoy aybee? Taani he uri tana hanqqetissido gishshawu zoriyaanaayye, taani A maaddanawu koyiyo gishshawu zoriyaanaa?’

14. Yesuusi loˈˈotettaa waati bessidee?

¹⁴ Yesuusi loˈˈobaa eriyoogaa xalla gidennan, loˈˈobaa wozanappe oottiis. Yesuusi ba Aawaa siiqiyo gishshawu, ubbatoo loˈˈobaa oottiis. Loˈˈo asi ubba wode harata maaddiyo ogiyaa koyeesinne etawu loˈˈobaa oottees. Loˈˈobaa oottana koshshiyoogaa eriyoogaa xallay gidenna; nuuni wozanappe qoppidi loˈˈobaa oottana koshshees. Nuuni hagaadan qoppana danddayoos: ‘Iitabaa qoppidi loˈˈobaa oottiyoogee danddayettiyaabee?’ Ee danddayettiyaaba. Leemisuwawu, Yesuusi hiyyeesatussi imotaa immida asatubaa yootiis, shin eti bantta imotaa harati eranaadan oottidosona. Immiyoogee loˈˈo ooso gidikkonne, Yihooway etan ufayttibeenna.—Maa. 6:1-4.

15. Nuuni waani tumuppe loˈˈo gidana danddayiyoo?

¹⁵ Nuuni nu xalla siiqennan aggidi suurebaa oottikko, tumuppe loˈˈo asa gidana danddayoos. Nena hagaadan oychchana danddayaasa: ‘Taani suurebaa oottana koshshiyoogaa eriyoogaa xalla gidennan, tumuppe hegaa oottiyaanaa? Taani loˈˈobaa oottiyoy aybissee?’

16. Nuuni ubba galla ay oottana koshshii, qassi aybissi?

¹⁶ Ooratta meretaa maayiyoogee xammaqettiyo wode wuriis giidi nuuni qoppana koshshenna. Ooratta meretay nuuni ubbatoo  loˈˈo hanotan oyqqana koshshiyo “ooratta maayuwaa” mala. Nuuni ubba galla Xoossaa ayyaanaa ayfiyaa ayfiyo ogiyaa koyiyoogee yaatana danddayiyo issi oge. Aybissi? Yihooway issibaa oottanawu ba ayyaanaa goˈettiyo gishshataassa. (Doo. 1:2) Hegaa gishshawu, Xoossaa ayyaanaa ayfe macara ubbay nuuni issibaa oottanaadan nuna denttettana danddayeesinne denttettana bessees. Leemisuwawu, erissiyo ashkkaraa Yaaqoobi hagaadan giis: “Oosoi shaahettido ammanoi haiqqidaagaa.” (Yaaq. 2:26) Xoossaa ayyaanaa ayfiyaa macara gidida hara ubbawukka hegaadan gaana danddayettees. Nuuni eta bessiyo wode ubban, Xoossaa ayyaanay nuna maaddiyoogaa qonccissoos.

17. Nuuni ayyaanaa ayfiyaa ayfennan aggiyo wode waatana koshshii?

¹⁷ Xammaqettoosappe daro laytta gidido Kiristtaanetikka, ayyaanaa ayfiyaa issi issitoo ayfennan aggana danddayoosona. SHin nuuni ha eeshshata bessanawu ubbatoo baaxetiyoogee keehi koshshiyaaba. Ha leemisuwaa qoppa. Neeni dosiyo maayoy peerettiyaakko, hegaa sohuwaara oluutee? CHii, olakka. Danddayettikko, neeni he peerettaa loyttada sikkennan waaya aggana. Qassi hegaappe simmada neeni loytta naagettaasa. Hegaadan, neeni issi wode issi uraa kehatettan, danddayan woy siiquwan oyqqana xayikko, hidootaa qanxxoppa. He uraara dabbotaa minttada deˈanawu wozanappe maarotaa oychcha. Qassi sinttappe loˈˈobaa oottanawu murtta.

18. Nuuni ay ammanettana danddayiyoo?

¹⁸ Yesuusi nuussi leemiso gidiyo gishshawu nuuni A keehi galatoos! Nuuni A qofaa loytti kaalliyo wode, aagaadan oottanawu metootokko. Nuuni Yesuusaagaadan loytti oottiyo wode, ooratta meretaa loytti maayana. Ha huuphe yohuwan, Xoossaa ayyaanaa ayfiyaa macaratuppe oyddaa xalla beˈida. Ayyaanaa ayfe gidida hara eeshshata xannaˈanawunne neeni he eeshshata waata loytta bessanaakko wotta dentta qoppanawu amarida wodiyaa bazziyoogee neessi loˈˈo. Ha allaalliyaabaa yootiya huuphe yohota Yihoowa Markkati Geeshsha Maxaafaa Xannaˈanawu Maaddiya Xuufiyaa giyaagaa garssan “Kiristtaanetu Deˈuwaa” giyaasan “Geeshsha Ayyaanaa Ayfiyaa” giddon demmana danddayaasa. Neeni ooratta meretaa maayada deˈanawu baaxetikko, Yihooway nena maaddanaagaa ammanettana danddayaasa.