1. Ano an nangunguna nga butang nga nakakaimpluwensya han aton personalidad?

 BAWTISMADO man kita hin pipira pa la ka adlaw o hin damu na ka dekada, karuyag naton ngatanan nga magkaada personalidad nga nalilipayan ni Jehova. Basi mahimo ito, kinahanglan naton kontrolon an aton panhunahuna. Kay ano? Kay an nangunguna nga butang nga nakakaimpluwensya han aton personalidad amo an aton panhunahuna. Kon pirme naton ginhuhunahuna kon paonan-o matatagbaw an aton unudnon nga mga hingyap, magyayakan ngan magbubuhat kita hin magraot nga butang. (Efe. 4:17-19) Ha luyo nga bahin, kon pirme maopay an aton ginhuhunahuna, posible nga an aton ginyayakan ngan ginbubuhat makakapalipay ha aton Amay nga hi Jehova.​—Gal. 5:16.

2. Ano nga mga pakiana an aton hihisgotan hini nga artikulo?

² Sugad han gin-unabi ha nauna nga artikulo, diri naton bug-os nga malilikyan nga makahunahuna hin maraot. Pero puydi naton pilion nga diri buhaton ito. Antes kita magpabawtismo, kinahanglan iundang naton an panyakan ngan buhat nga ginkakangalasan ni Jehova. Ito an siyahan ngan pinakaimportante nga pitad ha paghukas han daan nga personalidad. Pero basi bug-os nga mapalipay hi Jehova, kinahanglan liwat naton sundon ini nga sugo: “Igsul-ot niyo an bag-o nga personalidad.” (Col. 3:10) Hini nga artikulo, babatunon naton ini nga mga pakiana: Ano “an bag-o nga personalidad”? Paonan-o naton maisusul-ot an bag-o nga personalidad ngan diri gud ito hukason?

3. Sumala ha Galacia 5:22, 23, ano “an bag-o nga personalidad,” ngan paonan-o ito iginsusul-ot han usa?

³ An usa nga may “bag-o nga personalidad” nagsusubad han personalidad ni Jehova. Iginsusul-ot niya an bag-o nga personalidad pinaagi ha pagpakita han bunga han espiritu han Dios ngan pagtugot  ha baraan nga espiritu nga mag-impluwensya han iya panhunahuna, pag-abat, ngan mga buhat. (Basaha an Galacia 5:22, 23.) Pananglitan, hinigugma niya hi Jehova ngan an iya katawohan. (Mat. 22:36-39) Nagpapabilin hiya nga malipayon bisan kon naatubang hiya hin mga kakurian. (San. 1:2-4) Andam hiya pirme makigmurayaw. (Mat. 5:9) Pasensyoso ngan buotan hiya ha mga tawo. (Col. 3:13) Hinigugma niya kon ano an maopay ngan ginbubuhat ito. (Luc. 6:35) Iginpapakita niya ha iya mga buhat nga may marig-on hiya nga pagtoo ha iya langitnon nga Amay. (San. 2:18) Nagpapabilin hiya nga malumo kon may nakakapasina ha iya, ngan nagpupugong hiya ha kalugaringon kon may nakakasulay ha iya.​—1 Cor. 9:25, 27; Tito 3:2.

4. Basi maisul-ot an bag-o nga personalidad, kay ano nga kinahanglan naton ipakita an ngatanan nga kalidad nga gin-unabi ha Galacia 5:22, 23 ngan ha iba pa nga mga teksto?

⁴ Basi maisul-ot an bag-o nga personalidad, kinahanglan naton kultibaron an ngatanan nga kalidad nga gin-uunabi ha Galacia 5:22, 23 ngan ha iba pa nga mga teksto. * Ini nga mga kalidad diri pariho ha pidaso hin mga bado nga pausa-usa naton nga iginsusul-ot. Ngani, damu hini nga mga kalidad an puropariho ha iba nga mga kalidad. Pananglitan, kon hinigugma mo gud an imo igkasi-tawo, magigin pasensyoso ka ngan buotan ha iya. Ngan basi magin tinuod nga maopay, kinahanglan magin malumo ka ngan magpakita hin pagpugong ha kalugaringon.

5. Ano an iginpapasabot han ‘pagkaada han panhunahuna han Kristo,’ ngan kay ano nga kinahanglan naton pag-adman an kinabuhi ni Jesus? (1 Corinto 2:16)

⁵ Basaha an 1 Corinto 2:16. Basi maisul-ot an bag-o nga personalidad, kinahanglan ‘magkaada kita han panhunahuna han Kristo.’ Ha iba nga pagkayakan, kinahanglan mahibaroan naton kon paonan-o naghuhunahuna hi Jesus ngan katapos subaron hiya. Perpekto nga iginpapakita ni Jesus an bunga han espiritu han Dios. Pariho hin de-kalidad nga espiho, klaro gud nga iginpapakita niya an mga kalidad ni Jehova. (Heb. 1:3) Samtang mas naghuhunahuna kita pariho kan Jesus, mas magios kita pariho ha iya ngan mas magigin malampuson kita ha pagsubad han iya personalidad.​—Fil. 2:5.

6. Ano nga mga punto an kinahanglan naton hinumdoman kon nangangalimbasog kita ha pagsul-ot han bag-o nga personalidad?

⁶ Posible gud ba naton masunod an ehemplo  ni Jesus? Bangin maghunahuna kita: ‘Perpekto hi Jesus. Diri gud ako bug-os nga magigin pariho ha iya!’ Kon ito an imo inaabat, hinumdumi ini nga mga punto. Siyahan, gindisenyo ka nga magin pariho kan Jehova ngan kan Jesus. Salit puydi mo pilion nga subaron hira, ngan mahihimo mo gud ito bisan man la ha limitado nga paagi. (Gen. 1:26) Ikaduha, an baraan nga espiritu han Dios amo an pinakagamhanan nga pwersa ha uniberso. Ha bulig hito, mahihimo mo an mga butang nga diri mo gud mahihimo ha imo la pangalimbasog. Ikatulo, diri naglalaom hi Jehova nga perpekto nga maipapakita mo yana an bunga han espiritu. Ngani, adton may paglaom nga mabuhi ha waray kataposan ha tuna tatagan han aton mahigugmaon nga Amay hin 1,000 ka tuig basi magin perpekto. (Pah. 20:1-3) An iginpapabuhat ha aton ni Jehova yana amo an mangalimbasog nga buhaton an aton pinakamaopay ngan sumarig ha iya para hin bulig.

7. Ano an aton hihisgotan yana?

⁷ Paonan-o naton espisipiko nga masusubad hi Jesus? Uusisahon naton hin madaliay an upat nga bahin han bunga han espiritu han Dios. Ha tagsa hito, kikitaon naton kon ano an aton mahibabaroan tikang ha paagi han pagpakita ni Jesus hito nga mga kalidad. Samtang ginbubuhat naton ito, hihisgotan naton an pipira nga pakiana nga makakabulig ha aton nga mapauswag an aton bag-o nga personalidad.

8. Paonan-o nagpakita hi Jesus hin gugma?

⁸ An hilarom nga gugma ni Jesus kan Jehova nagpagios ha iya nga maghimo hin mga sakripisyo para ha iya Amay ngan para ha aton. (Juan 14:31; 15:13) Iginpakita ni Jesus an iya hilarom nga gugma ha mga tawo ha paagi han iya pagkinabuhi dinhi ha tuna. Kada adlaw, mahigugmaon ngan mapinairon hiya, bisan kon ginkontra hiya han iba. An usa nga importante nga paagi nga iginpakita niya an iya gugma ha mga tawo amo an pagtutdo ha ira mahitungod han Ginhadian han Dios. (Luc. 4:43, 44) Iginpakita liwat ni Jesus an iya nagsasakripisyo nga gugma ha Dios ngan ha mga tawo pinaagi ha pagin andam nga mag-antos hin masakit nga kamatayon ha kamot han mga makasasala. Tungod hito, nagin posible para ha aton nga magkaada kinabuhi nga waray kataposan.

9. Paonan-o naton masusubad hi Jesus ha pagpakita hin gugma?

⁹ Igindedikar naton an aton kalugaringon kan Jehova ngan nagpabawtismo tungod kay hinigugma naton an aton langitnon nga Amay. Salit pariho kan Jesus, kinahanglan ipakita naton an gugma kan Jehova ha paagi han aton pagtratar ha mga tawo. Hi apostol Juan nagsurat: “Hiya nga diri nahigugma ha iya bugto nga iya nakikita, diri makakahimo paghigugma ha Dios nga diri niya nakikita.” (1 Juan 4:20) Mahimo naton pakianhan an aton kalugaringon: ‘Hilarom ba an akon gugma ha mga tawo? Mapinairon ba ako ha iba, bisan kon diri maopay an ira pagtratar ha akon? Ginpapagios ba ako han gugma nga gamiton an akon panahon ngan materyal nga mga butang basi buligan an iba nga mahibaro parte kan Jehova? Kinaburut-on ko ba ito nga ginhihimo bisan kon diri gin-aapresyar han kadam-an an akon mga pangalimbasog o kon nakontra hira ha akon? Mahimo ba ako mamiling hin mga paagi basi magkaada dugang nga panahon ha panhimo hin disipulo nga buruhaton?’​—Efe. 5:15, 16.

10. Paonan-o iginpakita ni Jesus nga andam hiya pirme makigmurayaw?

¹⁰ Hi Jesus pirme andam makigmurayaw. Han gintratar hiya hin maraot han mga tawo, waray hiya bumulos hin maraot. Pero labaw pa hito an iya ginbuhat. Nag-una hiya ha pakigmurayaw, ngan gin-aghat niya an iba nga tuhayon an ira diri pagsinabtanay. Pananglitan, gintutdoan niya hira nga kinahanglan makigmurayaw hira ha ira bugto kon karuyag nira nga karawaton ni Jehova an ira pagsingba. (Mat. 5:9, 23, 24) Ngan pauroutro nga ginbuligan niya an mga apostol  nga diri na magdiskusyon kon hin-o ha ira an pinakalabaw.​—Luc. 9:46-48; 22:24-27.

11. Paonan-o naton maipapakita nga andam kita pirme makigmurayaw?

¹¹ Kon andam kita pirme makigmurayaw, diri la naton basta lilikyan nga magpatikang han diri pagsinabtanay. Kinahanglan mag-una kita ha pakigmurayaw ha iba ngan aghaton an aton kabugtoan nga tuhayon an ira mga diri pagsinabtanay. (Fil. 4:2, 3; San. 3:17, 18) Mahimo naton pakianhan an aton kalugaringon: ‘Ano an andam ko isakripisyo basi makigmurayaw ha iba? Kon may bugto nga nakasakit ha akon, nagdudumot ba ako? Naghuhulat ba ako nga hiya an mag-uuna ha pakigmurayaw ha akon, o ako an nag-uuna, bisan kon ginhuhunahuna ko nga hiya an nagpatikang han problema? Kon angayan, gin-aaghat ko ba adton may diri pagsinabtanay nga makigmurayaw ha usa kag usa?’

12. Paonan-o nagpakita hi Jesus hin pagkabuotan?

¹² Hi Jesus buotan. (Mat. 11:28-30) Iya iginpakita an pagkabuotan pinaagi ha pagin malumo ngan mapauyon-uyon, bisan ha makuri nga mga sitwasyon. Pananglitan, han an usa nga babaye nga taga-Fenicia nakimalooy kan Jesus nga tambalon an iya anak, ha siyahan, waray buhata ni Jesus an iya hangyo. Pero han nagpakita hiya hin daku nga pagtoo, buotan nga gintratar hiya ni Jesus pinaagi ha pagtambal ha iya anak. (Mat. 15:22-28) Bisan kon buotan hi Jesus, waray hiya mag-alang ha paghatag hin sagdon. May mga panahon nga iginpakita niya an pagkabuotan pinaagi ha mapwersa nga pagsagdon ha iya mga hinigugma. Pananglitan, han ginpaluya ni Pedro an determinasyon ni Jesus nga buhaton an kaburut-on ni Jehova, ginsaway hiya ni Jesus ha atubangan han iba nga mga disipulo. (Mar. 8:32, 33) Ginbuhat niya ito, diri basi pakaalohan hi Pedro, kondi basi bansayon hiya ngan pahamangnoan an iba nga mga disipulo nga diri magin paragbuot. Sigurado nga naawod hi Pedro, pero nagpahimulos hiya ha disiplina.

13. Paonan-o kita magigin tinuod nga buotan?

¹³ Basi magin tinuod nga buotan ha imo mga hinigugma, usahay bangin kinahanglan mo hira sagdonan hin prangka. Kon ginbubuhat mo ito, subara hi Jesus pinaagi ha pagbase han imo sagdon ha mga prinsipyo ha Pulong han Dios. Magin malumo. Tapod nga karuyag nira buhaton an tama, ngan sarig nga adton nahigugma kan Jehova ngan ha imo makarawat han imo mahigugmaon nga sagdon. Pakianhi an imo kalugaringon: ‘May kaisog ba ako nga magyakan kon nakikita ko nga sayop an ginbubuhat han usa ko nga hinigugma? Kon kinahanglan ko magsagdon, buotan ba an paagi han akon pagyakan o maisog? Ano an akon motibo ha pagsagdon? Nagsasagdon ba ako tungod kay naaaringit ako ha iya, o tungod kay karuyag ko hiya buligan?’

14. Paonan-o iginpakita ni Jesus an pagkamaopay?

¹⁴ Hi Jesus diri la basta maaram kon ano an maopay kondi nagbubuhat liwat hito. Hinigugma ni Jesus an iya Amay, salit pirme niya ginbubuhat an tama nga may husto nga motibo. An maopay nga tawo pirme namimiling hin mga paagi nga mabuligan an iba, ngan nagbubuhat hiya hin mag-opay nga butang para ha ira. Diri igo nga maaram kita kon ano an tama nga buhaton; kinahanglan buhaton naton an tama nga may husto nga motibo. Bangin magpakiana kita, ‘Posible ba nga buhaton an tama nga may sayop nga motibo?’ Oo. Pananglitan, gin-unabi ni Jesus an mga naghahatag hin regalo ha mga pobre pero ginsisiguro nira nga mahibaroan ito han iba. Bisan kon maopay ito nga mga buhat, waray malipay hito hi Jehova.​—Mat. 6:1-4.

15. Paonan-o kita magigin tinuod nga maopay?

¹⁵ Mahimo la kita magin tinuod nga maopay kon ginbubuhat naton an tama nga may diri makikalugaringon nga mga rason. Salit mahimo mo pakianhan an imo kalugaringon: ‘Labot la nga maaram ako kon ano an tama nga buhaton, ginbubuhat ko ba liwat ito? Ano an akon motibo ha pagbuhat hin mag-opay nga butang?’

16. Ano an kinahanglan naton buhaton kada adlaw, ngan kay ano?

¹⁶ Diri naton hunahunaon nga kon bawtismado na kita, bug-os na naton nga naisul-ot an bag-o nga personalidad ngan diri na naton kinahanglan padayon nga kultibaron ito. Kinahanglan padayon naton nga hirotan an aton maopay nga “bag-o nga bado.” Usa nga paagi nga mahihimo naton ito amo an pagbiling hin mga paagi kada adlaw nga maipakita an bunga han espiritu han Dios. Kay ano? Kay hi Jehova usa nga Dios nga pirme may ginbubuhat, ngan an iya espiritu usa nga aktibo nga pwersa. (Gen. 1:2) Salit an tagsa nga bahin han bunga han espiritu mahimo ngan kinahanglan mag-aghat ha aton nga gumios. Pananglitan, an disipulo nga hi Santiago nagsurat: “An pagtoo nga waray mga buhat patay.” (San. 2:26) Ito liwat an masisiring ha ngatanan nga iba pa nga bahin han bunga han espiritu han Dios. Ha kada panahon nga iginpapakita naton ito, ginpapamatud-an naton nga nagios ha aton an espiritu han Dios.

17. Ano an angay naton buhaton kon diri kita nakakagpakita han bunga han espiritu?

¹⁷ Bisan an mga Kristiano nga damu ka tuig na nga bawtismado usahay diri nakakagpakita han bunga han espiritu. Pero an importante amo an diri pag-undang. Hunahunaa ini nga ilustrasyon. Kon nagisi an imo paborito nga bado, ilalabog mo ba ito dayon? Diri. Bangin tahion mo an gisi kon posible ito. Ngan magigin mas mahirot ka na ha sunod. Sugad man, kon may mga panahon nga diri ka nagigin buotan, pasensyoso, o mahigugmaon ha usa nga tawo, ayaw panluya. An kinasingkasing nga pangaro hin pasaylo makakatahi han gisi, siring pa, ngan makakabulig ito nga maibalik an imo maopay nga relasyon ha iya. Magin determinado nga mag-uswag ha sunod.

18. Ha ano kita makakasiguro?

¹⁸ Mapasalamaton gud kita nga may-ada kita han ehemplo ni Jesus! Samtang mas ginsusubad naton an iya panhunahuna ngan disposisyon, nagigin mas masayon para ha aton nga gumios pariho ha iya. Samtang mas nagios kita pariho kan Jesus, naisusul-ot naton hin mas maopay an bag-o nga personalidad. Hini nga artikulo, ginhisgotan naton an upat nga bahin han bunga han espiritu han Dios. Kay ano nga diri maggahin hin panahon ha pagrepaso han iba pa nga bahin han bunga han espiritu ngan ha pagpamalandong kon ano na nga mga pag-uswag an imo nahimo ha pagpakita hito nga mga kalidad? Makakabiling ka hin mga artikulo mahitungod hini nga topiko ha Giya ha Pagsaliksik Para ha mga Saksi ni Jehova ilarom han ulohan nga “Kristiano nga Pagkinabuhi” ngan katapos “Bunga han Espiritu.” Makakasiguro ka nga kon bubuhaton mo an imo bahin, bubuligan ka ni Jehova nga maisul-ot an bag-o nga personalidad ngan diri gud ito hukason.