DILONGI 11
Tatamana “Kuvuata Kimutu Kimona” Kheti Widi Wubotama
“Vuat’anu kimutu kimona.”—KOLO. 3:10.
NKUNGA 49 Tuyangidika Ntima wu Yave
MAMBU TUANLONGUKA *
1. Mbi bintuadisanga mambu tumvanga?
KHETI tubotama mu thama voti vangi tuma botama, befu boso tufueti kuna zikhadulu Yave kanzolanga. Muingi tuvanga mawu tufueti yala mayindu mitu. Kibila mbi? Kibila mayindu mawu mantuadisanga mambu tumvanga. Befu kutatamana kuyindula mambu makhambu fuana, tunkuiza tuba ayi kuvanga mambu mambi. (Efe. 4:17-19) Vayi befu kuyindulanga mambu mamboti, tunkuiza tuba ayi kuvanga mambu mankuangidika Yave Tat’itu yi diyilu.—Ngala. 5:16.
2. Mbi tuenlonguka mu dilongi adidi?
2 Dedi bo tulongukidi mu dilongi dibedi, tulendi botula ko mayindu moso mambi va kilunzi kitu. Vayi tulendi bika ko mayindu beni ma tutuadisa. Diawu ava kubotama tufueti bika kuvanga mambu moso Yave kanlendanga. Adiodio diawu diambu dinkinza tufueti vanga muingi kukuangidika Yave. Mvandi tufueti tumukina lutumu luntuba: “Vuat’anu kimutu kimona.” (Kolo. 3:10) Mu dilongi adidi tunkuiza baka mimvutu mi biuvu abibi: Mbi binsundula “kimutu kimona”? Buidi tulenda vuatila kimutu kimona ayi kutatamana kukieba kiawu?
MBI BINSUNDULA “KIMUTU KIMONA”?
3. Dedi bummonisina Ngalatia 5:22, 23, mbi binsundula “kimutu kimona,” ayi buidi mutu kalenda vuatila kiawu?
3 “Kimutu kimona” kinsundula kuyindula ayi kuvanga mambu mu phila Yave kantombila. Mutu wumvuata kimutu kimona wumbikanga Yave katuadisa mayindu ayi mavanga mandi. (Tanga Ngalatia 5:22, 23.) Dedi, nandi wunzolanga Yave ayi dikabu diandi. (Matai 22:36-39) Mvandi wuntatamananga kuba mayangi kheti bo kamviokila mu mambu makhambulu masonga. (Yako. 1:2-4) Wuntuadisanga ndembama. (Matai 5:9) Wumvibidilanga ayi wummonisanga mamboti kuidi bankaka. (Kolo. 3:13) Wunzolanga mamboti ayi wumvanganga mawu. (Luka 6:35) Wummonisanga mu mavanga mandi ti widi kiminu kuidi Yave Tat’andi yi diyilu. (Yako. 2:18) Mvandi wuntatamananga wuvumbama kheti bo ba kunthota.—1 Koli. 9:25, 27; Tito 3:2.
4. Muingi kuvuata kimutu kimona, tufueti kuna zikhadulu bantubila mu Ngalatia 5:22, 23 mu zikhumbu ziviakana? Sudikisa.
4 Muingi kuvuata kimutu kimona vantombulu kukuna zikhadulu bantubila mu Ngalatia 5:22, 23 ayi mvandi zidi mu matangu mankaka ma Kibibila. * Zikhadulu aziozio zisi ko buka bikhutu tumvuata ayi tulenda vingisa khumbu ziwombo mu nyitu. Vayi zidi buka bikhutu tufueti vuatila mu khumbu yimueka. Ayi tulenda mona nguizani yidi mu zikhadulu beni. Dedi, boti wunzolanga wadi yaku, ngie wala kummonisa luzolo ayi mamboti. Ayi muingi tuba batu bankua mamboti tufueti ba bavumbama ayi kukiyalanga.
BUIDI TULENDA VUATILA KIMUTU KIMONA?
Bo tunluta longuka matedi Yesu, dinkuiza ba diambu diluelu kuvuata kimutu kimona (Tala binduika 5, 8, 10, 12, 14)
5. Mbi binsundula “kuba mayindu ma Yesu,” ayi kibila mbi tufueti longukila matedi nzingulu’andi? (1 Kolinto 2:16)
5 Tanga 1 Kolinto 2:16. Muingi kuvuata kimutu kimona, tufueti ba “mayindu ma Klisto.” Mawu mansundula ti tufueti yindula mu phila nandi kaba yindudilanga. Yesu wumonisa mbutu wu phevi yi Nzambi ayi mvandi wumonisa zikhadulu zi Yave mu phila yisulama. (Ebe. 1:3) Befu kuvanga mangolo ma kuyindula dedi Yesu, tunkuiza nunga kulandakana kifuani kiandi.—Fili. 2:5.
6. Mbi tufueti tebukanga moyo bo tumvanga mangolo ma kuvuata kimutu kimona?
6 Bukiedika ti tulenda nunga kulandakana kifuani ki Yesu? Ḿba wulenda yindula: ‘Yesu wuba wuvedila, minu yilendi nunga ko kulandakana kifuani kiandi!’ Boti buawu wummuenanga, buna yindula mu mambu amama. Theti, ngie wuvangulu mu kifuani ki Yave ayi Yesu. Mawu mansundula ti ngie wulenda nunga kulandakana kifuani kiawu mu phila yifuana. (Ngene. 1:26) Dimuadi, Phevi yinlongo yi Nzambi yawu yilutidi lulendu mu nza yimvimba. Ayi yilenda kusadisa kuvanga mambu mo wulendi nunga ko mu zingolo ziaku. Dintatu, Yave kasintomba ko wumonisa mbutu wu phevi mu phila yivedila. Kibila mu luyalu lu 1.000 di mimvu, tunkuiza baka luaku lu kuba bavedila. (Nzai. 20:1-3) Vayi Yave wuntomba wuvanga mamoso wunnunga ayi wuzaba ti nandi wunkuiza kusadisa.
7. Mbi tuanlonguka?
7 Buidi tulenda landikinina kifuani ki Yesu? Tuentubila zikhadulu zinna zimbutu wu phevi yinlongo yi Nzambi. Mu kadika khadulu, tunkuiza mona mbi tulenda longuka mu phila Yesu kamonisina yawu. Mvandi tunkuiza mona mu kadika khadulu biuvu bilenda kutu sadisa kufiongunina boti tuidi mu kuvuata kimutu kimona.
8. Buidi Yesu kamonisina luzolo?
8 Luzolo Yesu kaba mu Yave ayi mu befu, lumvanga kutula zitsatu zi bankaka vantuala. (Yoa. 14:31; 15:13) Yesu wumonisa luzolo kaba mu batu mu phila kaba zingilanga yawu bo kaba va ntoto. Kadika kilumbu Yesu waba monisanga luzolo ayi mamboti, kheti bo bankaka baba kunlendanga. Phila yinkaka kavangila mawu yidi mu kuba longa matedi Kintinu ki Nzambi. (Luka 4:43, 44) Yesu mvandi wumonisa luzolo kadi mu Yave ayi mu batu, bo kavana luzingu luandi banga nkhailu mu kibila ki masumu mitu. Mu kuvanga mawu, Yesu wuzibula nzila muingi tubaka luzingu lu mvu ka mvu.
9. Buidi tulenda landikinina kifuani ki Yesu mu kumonisa luzolo kuidi bankaka?
9 Befu tukivanina kuidi Yave ayi kubotama mu kibila ki luzolo tuidi mu nandi. Diawu, dedi Yesu befu tulenda monisa luzolo luitu mu Yave mu phila tuntadilanga batu. Mvuala Yoane wusonika: “Kibila mutu wukhambu zolanga khomb’andi no kammonanga, kalendi zola ko Nzambi no kakhambu monanga.” (1 Yoa. 4:20) Tulenda kuyikuvusa: ‘Minu yidi luzolo mu batu? Yimmonisanga mamboti kuidi bankaka, kheti mu thangu bawu ba kuphangila mambu mambi? Luzolo lu kuphanganga kusadila buboti thangu ayi biuma biama bi luvalu muingi kulonga bankaka matedi Yave? Yidi wukubama muingi kuvanga mawu kheti bankaka basimvua ko nkinza mangolo yimvanga? Bukiedika ti yilenda buela kukivana mu kisalu ki kuvanga minlonguki?’—Efe. 5:15, 16.
10. Buidi Yesu kaba tuadisilanga ndembama?
10 Yesu waba tuadisanga ndembama. Bo batu baba kumvangilanga mambu mambi, nandi kabasa vutudilanga ko mambi mu mambi. Mvandi waba tuamanga ntuala mu kutuadisa ndembama ayi wukindisa bankaka kuvanga mawu. Dedi, nandi wulongisa minlandikini miandi ti boti bantomba Yave kakikinina mbuongimini’awu, bafueti dedikisanga mambu na bankaka. (Matai 5:9, 23, 24) Mu zikhumbu ziwombo, nandi wusadisa minlonguki miandi kudedikisa mambu matedi nani wulutidi mu bawu.—Luka 9:46-48; 22:24-27.
11. Buidi tulenda bela batu bantuadisanga ndembama?
11 Kuba batu bantuadisanga ndembama, kuisinsundula ti tulendi bakasana ko mambu. Vayi bo diambu dimmonika, tufueti tuama ntuala muingi kudedikisa diawu ayi kukindisa mvandi bankaka kuvanga mawu.(Fili. 4:2, 3; Yako. 3:17, 18) Tulenda kuyikuvusa: ‘Yidi wukubama muingi kubika mabanza mami va khonzu ayi kutuadisa ndembama? Boti khomba be kundiongisa ntima, bukiedika ti minu yikunkangilanga nganzi? Bukiedika ti yinteminanga mutu widi foto katuama ntuala, muingi kudedikisa mambu? Yinkindisanga bankaka kudedikisa mambu ayi kutuadisa ndembama?’
12. Buidi Yesu kamonisina mamboti?
12 Yesu wumonisa mamboti. (Matai 11:28-30) Nandi waba monisanga mamboti kheti bo kaba viokilanga mu ziphasi. Dedi, bo nkieto musi Fenisi kandinda muingi kasadisa muan’andi, nandi wuyoluka yandi mu luzolo. Va thonono, nandi kasa ba ko mayindu ma kunsadisa vayi bo nkieto beni kamonisa kiminu mu nandi, Yesu wubelusa muan’andi. (Matai 15:22-28) Kheti Yesu wuba wuvumbama, vayi nandi waba sembanga batu mu luzolo. Dedi, bo Petelo kaba tomba kuntula nkaku muingi kavanga luzolo lu Yave, nandi wunsemba vantuala batu bankaka. (Malako 8:32, 33) Yesu kasa vanga ko mawu muingi kumfuisa zitsoni vayi muingi kunkubika ayi kulubula minlonguki minkaka, babika kutubanga mambu mo bakhambulu bivisa bioso. Kheti Petelo wumona zitsoni vayi mawu mantuadisa ndandu.
13. Buidi tulenda monisina mamboti?
13 Kumonisa mamboti khumbu zinkaka, kuntombuluanga kusemba mutu wunzolanga. Muingi kuvanga mawu, ngie fueti landakana kifuani ki Yesu mu kusadila minsua midi mu Kibibila. Monisa mamboti ayi ba lufiatu ti bo wunkuiza vana tsembolo kuidi batu banzolanga Yave ayi ba kuzolanga, bawu bankuiza vitika tsembolo beni. Wukiyuvusa: ‘Minu yidi kibakala muingi kuvana tsembolo bo yimmona mutu yinzolanga kuvekuka? Mu thangu yimvana malongi, yinkolukilanga mu luzolo voti mu lukasu? Kibila mbi yifueti vanina malongi? Yimvangilanga mawu kibila zifiti yidi mu mutu beni, voti muingi kunsadisa?’
14. Buidi Yesu kamonisina ti wuba nkua mamboti?
14 Yesu kasa zaba ko to mambu mamboti ma kuvanga vayi mvandi waba vanganga mawu. Tulenda mona ti mutu widi nkua mamboti mu mambu kamvangilanga bankaka. Nandi wuntombanga ziphila zi kuvangila mamboti kuidi bankaka. Vasintombulu ko to kuzaba mambu mamboti vayi tufueti vanga mawu. Wulenda kuyikuvusa: ‘Bukiedika ti mutu kalenda vanga diambu dimboti mu khambu luzolo?’ Ngete. Dedi, Yesu wutubila matedi batu basadisa biphumbulu vayi bavangila mawu muingi bankaka bamona mambu bavanga. Mambu bawu bavanga maba monikina ti madi mamboti vayi masa ba ko luvalu va meso ma Yave.—Matai 6:1-4.
15. Buidi tulenda bela batu bankua mamboti?
15 Muingi tuba batu bankua mamboti, tufueti vangila mambu mu ntima woso. Wukiyuvusa: ‘Minu yizebi to mbi binsundula mamboti voti mvandi yimvanganga mawu? Mbi bi kuphanganga kuvanga mamboti?’
BUIDI TULENDA KIEBILA KIMUTU KITU KIMONA?
16. Mbi tufueti vanganga kadika kilumbu, ayi kibila mbi?
16 Tulendi yindula ko ti boti tumana botama buna vasintombulu ko kuvanga mangolo muingi kukieba kimutu kitu kimona. Tulenda vangila mawu mu kutomba luaku kadika kilumbu muingi kumonisa mbutu wu phevi yi Nzambi. Kibila mbi? Kibila Yave wuntatamananga kusala. (Ngene. 1:2) Diawu tufueti monisa kadika mbutu wu phevi yinlongo mu mavanga. Yakobi wusonika: “Kiminu kikhambulu mavanga kidi kifua.” (Yako. 2:26) Mawu mvandi mammonikanga mu zikhadulu zinkaka zi mbutu wu phevi yi Nzambi. Kadika khumbu tummonisa mbutu wu phevi yi Nzambi, tummonisanga bivisa ti tuidi phevi yinlongo yi Nzambi.
17. Mbi tulenda vanga muingi kumonisa mbutu wu phevi mu phila yifuana?
17 Kheti baklisto babotama mu thama, banunganga ko kumonisa mbutu wu phevi mu phila yivedila. Vayi tulendi vonga ko. Tala kifuani akiki. Yindula boti kikhutu ngie wunzolanga kiba bakuka, bukiedika ti wunkuiza loza kiawu? Ndamba. Ḿba ngie wunkuiza londa kiawu ayi kukikieba buboti. Bobuawu mvandi, kheti khumbu zinkaka tuisinnunga ko kumonisa mamboti, mvibudulu ayi luzolo kuidi bankaka tulendi vonga ko. Kudinda nlemvu kulenda kutu sadisa kuvutula kithuadi. Ayi tufueti ba bakubama muingi kubika vutukila zinzimbala beni.
18. Lufiatu mbi wulenda ba?
18 Tumvutulanga beni matondo mu kifuani Yesu ka tubikila! Befu kuvanga mangolo muingi kuba mayindu ma Yesu ayi mavanga mandi, dinkuiza ba diambu diluelu kulandakana kifuani kiandi. Mu kuvanga mawu, tunkuiza nunga kuvuata kimutu kimona. Mu dilongi adidi, tuma tubila zikhadulu zinna zidi mu mbutu wu phevi. Diawu buboti beni kubotula thangu muingi kuyindula mu zikhadulu zinkaka zidi mu mbutu wu phevi. Ayi kuyindula buidi tulenda kunina ziawu. Boti wuntomba kubuela zaba mawu, tomba mu Guia de Pespisa das Testemunhas de Jeová vantuba: “Vida Cristã” bosi “Mbutu wu Phevi.” Ba lufiatu ti ngie kuvanga mangolo, Yave wunkuiza kusadisa kutatamana kuvuata kimutu kimona ayi kukieba kiawu.
NKUNGA 127 Phila Mutu Mbi Yifueni Ba?
^ Lut. 5 Kheti mambu mambi tuvanga kumbusa, tulenda vuata “kimutu kimona.” Diawu tufueti vanga mangolo ma kubalula kimutu kitu kikhulu ayi kulandakana kifuani ki Yesu. Mu dilongi adidi, tunkuiza tubila matedi mayindu ayi zikhadulu Yesu kaba. Mvandi tunkuiza mona buidi tulenda landikinina kifuani kiandi kheti tubotama.
^ Lut. 4 Zikhadulu bantubila mu Ngalatia 5:22, 23 zisi ko to ziawu phevi yinlongo yi Nzambi yilenda kutu sadisa kukuna. Muingi wuluta zaba mawu, tala “Mu Biuvu bi Mintangi” mu Kibanga ki Nsungi ki Ngonda Yinsambanu, mvu 2020.
