1. U suukileʼ, ¿tuʼux u taal le modos yaantoʼonoʼ?

 KEX wa úuch okjaʼanakoʼon bey xan wa maʼeʼ tuláakloʼon taak u yantaltoʼon le jatsʼuts modos uts tu tʼaan Jéeobaoʼ. Chéen baʼaleʼ utiaʼal u páajtaleʼ kʼaʼabéet k-kanáantik baʼaxoʼob k-tuklik. ¿Baʼaxten k-aʼalik leloʼ? Tumen le modos ku yantaltoʼonoʼ u suukileʼ ku taal tiʼ le baʼaxoʼob k-tuklikoʼ. Wa mantatsʼ k-tuukul tiʼ le baʼaxoʼob ku tsʼíiboltik k-wíinkliloʼ yaan k-aʼalik yéetel yaan k-beetik baʼaxoʼob maʼ maʼalobtakiʼ (Efe. 4:17-19). Chéen baʼaleʼ wa k-chupik k-tuukul yéetel baʼaloʼob maʼalobtakeʼ maas yaan k-tʼaan maʼalob yéetel yaan k-beetik baʼaloʼob uts tu tʼaan Jéeoba, k-Taata yaan teʼ kaʼanoʼ (Gál. 5:16).

2. ¿Baʼax kʼáatchiʼiloʼob kun núukbil teʼ xookaʼ?

² Jeʼex t-ilil teʼ xook máanikoʼ, u jaajileʼ yaan kʼiineʼ deporsi yaan u taal wa baʼax maʼ maʼalob t-tuukuliʼ, chéen baʼaleʼ toʼon ken k-chʼaʼtukult wa yaan k-beetik wa maʼ. Desde antes k-okjaʼeʼ unaj u xuʼulul k-tʼaan kʼaas yéetel k-beetik baʼaloʼob maʼ maʼalobtak tu táan Jéeobaiʼ. Leloʼ jach kʼaʼabéet u beetik máak utiaʼal u pitik le úuchben modosoʼ. Chéen baʼaleʼ utiaʼal k-beetik u maas kiʼimaktal u yóol Jéeobaeʼ, kʼaʼabéet k-beetik le baʼax ku yaʼalik le Bibliaaʼ: «Búukinteʼex le túumben modosoʼ» (Col. 3:10). Teʼ xookaʼ yaan u núukaʼal le kʼáatchiʼobaʼ: ¿Baʼax «le túumben modos» ku yaʼalik le Bibliaoʼ? ¿Bix jeʼel k-búukintkeʼ? ¿Bix jeʼel u yantaltoʼon utiaʼal mantatsʼeʼ?

3. ¿Baʼax «le túumben modos» ku yaʼalik le Bibliaoʼ, yéetel bix jeʼel k-búukintkeʼ? (Gálatas 5:22, 23).

³ «Le túumben modos» ku yaʼalik le Bibliaoʼ letiʼe modos ku yantal tiʼ máak kéen tuukulnak jeʼex Jéeobaoʼ yéetel kéen  u beet le baʼaxoʼob uts tu tʼaanoʼ. ¿Bix k-búukintik le túumben modosoʼ? Letiʼe kéen k-chaʼa u nuʼuktaʼal k-tuukul yéetel k-kuxtal tumen u espíritu santo Diosoʼ (xok Gálatas 5:22, 23). Juntúul máax yaantiʼ «le túumben modosoʼ» u yaabiltmaj Jéeoba bey xan le máaxoʼob meyajtikoʼ (Mat. 22:36-39). Kiʼimak u yóol kex ku aktáantik yaayaj baʼaloʼob (Sant. 1:2-4). Ku yilik ka yanak jeetsʼelil (Mat. 5:9). Ku yeʼesik paciencia yéetel ku perdonartik u maasil (Col. 3:12, 13). U yaabiltmaj baʼax maʼalob yéetel ku yeʼesik u yutsil (Luc. 6:35). Yoʼolal baʼaxoʼob ku beetkeʼ ku yeʼesik jach yaan u fe tiʼ Jéeoba (Sant. 2:18). Maʼ tu séeb kʼuuxil (Tito 3:2). Tsʼoʼoleʼ ku controlarkuba tiʼ tuláakal baʼal (1 Cor. 9:25, 27).

4. ¿Baʼaxten unaj k-ilik u yantaltoʼon tuláakal le jatsʼuts modos ku yaʼalik Gálatas 5:22, 23?

⁴ Utiaʼal k-búukintik «le túumben modos» ku yaʼalik le Bibliaoʼ kʼaʼabéet k-ilik u yantaltoʼon le modos ku yaʼalik Gálatas 5:22 yéetel 23, bey xan le ku yaʼalik uláakʼ tekstoʼob tiʼ le Bibliaoʼ. * Le modosoʼobaʼ maʼ beyoʼob jejeláas nookʼoʼobeʼ, baʼaxeʼ ku formarkoʼob junpʼéeliliʼ nookʼ. Por ejemploeʼ wa jach tu jaajil k-yaabiltmaj u maasileʼ yaan xan k-eʼesik paciencia tiʼob yéetel utsil. Tsʼoʼoleʼ wa k-kʼáat ka ilaʼakoʼon utsul máakoʼoneʼ kʼaʼabéet k-ojel k-controlartba yéetel maʼ unaj k-séeb pʼuʼujuliʼ.

5. ¿Baʼax u kʼáat u yaʼal u yantaltoʼon «u tuukul Cristo», yéetel baʼaxten unaj k-jach ilik bix úuchik u kuxtal? (1 Corintios 2:16).

⁵ (Xok 1 Corintios 2:16). Utiaʼal k-búukintik le túumben modosoʼ kʼaʼabéet u yantaltoʼon «u tuukul Cristo». Leloʼ u kʼáat u yaʼaleʼ kʼaʼabéet k-ojéeltik bix u tuukul Jesús yéetel k-seguertik u ejemplo. Jesúseʼ ku yeʼesik tuláakal le jatsʼuts modos ku taal tiʼ u espíritu santo Diosoʼ. Letiʼeʼ bey junpʼéel néen ku yeʼesik u jatsʼuts modos Jéeobaeʼ (Heb. 1:3). Wa k-ilik k-tuukul jeʼex Jesúseʼ yaan k-kuxtal jeʼex úuchik u kuxtaloʼ yéetel yaan u yantaltoʼon le jatsʼuts modos yanchajtiʼoʼ (Fili. 2:5).

6. ¿Baʼax unaj u kʼaʼajaltoʼon le táan k-tsʼáaik k-óol k-búukint le túumben modosoʼ?

⁶ ¿Jach wa tu jaajil jeʼel u páajtal k-seguertik u ejemplo Jesúseʼ? Maʼ xaaneʼ techeʼ jeʼel a tuklikeʼ: «Jesúseʼ perfecto. ¡Teneʼ junpuliʼ maʼ kun páajtal in beetik jach jeʼex úuchik u beetik letiʼoʼ!». U jaajileʼ tumen j-kʼeban máakecheʼ yaan baʼaloʼob maʼ tu páajtal a beetik. Chéen baʼaleʼ  yaan óoxpʼéel baʼaloʼob unaj a kʼaʼajsik. Yáaxeʼ, techeʼ beetaʼabech jeʼex Jéeoba yéetel Jesúseʼ, le oʼolaleʼ wa ka chʼaʼtuklik a seguertik u ejemploʼobeʼ jeʼel u béeytaleʼ (Gén. 1:26). U kaʼapʼéeleʼ, Dioseʼ jeʼel u yáantkech yéetel u espíritu santo utiaʼal a beetik le baʼaxoʼob ka tuklik maʼ tu páajtal a beetkoʼ. U yóoxpʼéeleʼ, Jéeobaeʼ maʼ tu páaʼtik ka a weʼes jach tubeel tuláakal le jatsʼuts modos ku taal tiʼ le espíritu santooʼ. Kʼaʼajaktecheʼ Jéeobaeʼ yaan u páaʼtik u máan 1,000 años utiaʼal u pʼáatal perfectoil le máaxoʼob kun pʼáatal kuxtal way Luʼumeʼ (Apo. 20:1-3). Jeʼex túun k-ilkoʼ le baʼax ku páaʼtik Jéeoba beora tiʼ toʼonaʼ letiʼe ka k-tsʼáa k-óol k-beet le baʼax ku yaʼalikoʼ yéetel ka confiarnakoʼon tiʼ letiʼ.

7. ¿Baʼax ken k-il beoraaʼ?

⁷ ¿Bix jeʼel u páajtal k-seguertik u ejemplo Jesúseʼ? Utiaʼal k-ilkeʼ koʼoneʼex tʼaan tiʼ kanpʼéel modos ku taal tiʼ le espíritu santooʼ. Le kéen tsʼoʼokkeʼ yaan k-ilik bix úuchik u yeʼesik Jesús ichil u kuxtal yéetel baʼax jeʼel u páajtal k-kanikeʼ. Tsʼoʼoleʼ yaan k-ilik jujunpʼéel kʼáatchiʼob jeʼel u yáantkoʼon k-il wa kʼaʼabéet k-maas eʼesik le jatsʼuts modosoʼ.

8. ¿Bix tu yeʼesil Jesús u yaabiltmaj Jéeoba bey xan wíinikoʼob?

⁸ Jesúseʼ u yaabiltmaj kaʼach Jéeoba, le oʼolal tu beetaj sacrificioʼob tu yoʼolal u Taata bey xan tu yoʼolal wíinik (Juan 14:31; 15:13). Le ka taal xan way Luʼumeʼ tu yeʼesaj jach u yaabiltmaj wíinik. Letiʼeʼ tu yeʼesaj u yutsil yéetel u chʼaʼ óotsilal tak tiʼ jujuntúul máaxoʼob ku tsʼáaikubaʼob kaʼach tu contra. Tu yeʼesaj xan jach u yaabiltmaj wíinikoʼob le ka tu tsikbaltajtiʼob baʼax ken u beet u Reino Diosoʼ (Luc. 4:43, 44). Tsʼoʼoleʼ utiaʼal u yeʼesik jach u yaabiltmaj Jéeoba bey xan wíinikoʼobeʼ tu yóotaj muʼyaj bey xan u kʼub u kuxtal. Bey túunoʼ tu tsʼáajtoʼon u páajtalil k-kuxtal minaʼan u xuul.

9. ¿Bix jeʼel k-eʼesik yaabilaj jeʼex tu yeʼesil Jesúseʼ?

⁹ Toʼoneʼ k-yaabiltmaj Jéeoba le oʼolal t-kʼubaj k-kuxtal tiʼ letiʼ yéetel okjaʼanajoʼon. Chéen baʼaleʼ le yaabilaj k-uʼuyik tu yoʼolaloʼ unaj xan k-eʼesik tiʼ u maasil máakoʼob jeʼex tu beetil Jesúseʼ. Le apóstol Juanoʼ tu tsʼíibtaj: «Le máax maʼ tu yaabiltik u sukuʼun kex táan u yilkeʼ maʼ tu páajtal u yaabiltik Dios máax maʼ u yiliʼ» (1 Juan 4:20). Maʼalob ka k-tukle: «¿In yaabiltmaj wa u maasil? ¿Kin chʼaʼik wa óotsilil tiʼob kex jelaʼan u modosoʼob tin wéetel? ¿Ku meyajten wa in tiempo yéetel le baʼaxoʼob yaanten utiaʼal in wáantik le máakoʼob u kʼaj óoltoʼob Jéeobaoʼ? ¿Kin wilik wa in wáantkoʼob kex u maas yaʼabil tiʼ letiʼob maʼatech u beetkoʼob u cuentail baʼax kin beetik tu yoʼolaloʼob wa hasta ku tsʼáaikubaʼob tin contra? ¿Jeʼel wa u páajtal in maas táakpajal teʼ kʼaʼaytajoʼ?» (Efe. 5:15, 16).

10. ¿Baʼax tu beetaj Jesús utiaʼal u yantal jeetsʼelil?

¹⁰ Jesúseʼ maʼatech u kaxtik kaʼach baʼateʼel, maʼatech u vengarkuba, ku yilik u yantaltiʼ jeetsʼelil yéetel u maasil yéetel tu yaʼalaj tiʼ le máakoʼob ka u beetoʼob xan beyoʼ. Juntéenjeakeʼ tu kaʼansaj tiʼ le máakoʼoboʼ utiaʼal u kʼaʼamal u adoraciónoʼob tumen Jéeobaeʼ kʼaʼabéet u yutskíintikoʼob le problemas ku yantaltiʼob yéetel u sukuʼunoʼoboʼ (Mat. 5:9, 23, 24). Yaʼab u téenel xaneʼ tu yaʼalaj tiʼ u apóstoloʼob ka xuʼuluk u baʼateltikoʼob máax u maas nojchil ichiloʼob (Luc. 9:46-48; 22:24-27).

11. ¿Baʼax jeʼel u páajtal k-beetik utiaʼal ka yanak jeetsʼelileʼ?

¹¹ Utiaʼal ka yanak jeetsʼelileʼ kʼaʼabéet maʼ k-kaxtik baʼateʼel, kʼaʼabéet k-ilik k-utskíintik le problemas ku yantaltoʼon yéetel u maasiloʼ yéetel unaj k-aʼalik tiʼ le sukuʼunoʼob ka u yutskíintoʼob le problemas ku yantal ichiloʼoboʼ (Fili. 4:2, 3; Sant. 3:17, 18). Maʼalob ka k-tukle: «¿Tak baʼax dispuestoen in beet utiaʼal in wutskíintik  le problema yaanten yéetel wa máaxoʼ? ¿Kin chaʼik wa u kuup tin puksiʼikʼal le baʼax beetaʼantenoʼ? ¿Kin wilik wa in wutskíintik le problema yaanten yéetel wa máax kex kin tuklik tiʼ letiʼ yanchaj u culpailoʼ? ¿Wa kin páaʼtik u taal u kaxten utiaʼal k-utskíintik? Le kéen in wil jeʼel u páajtaleʼ, ¿kin animartik wa u maasil utiaʼal u yutskíintikoʼob le problema yaan ichiloʼoboʼ?».

12. ¿Bix tu kaxtil Jesús u yutsil u maasil?

¹² Jesúseʼ tu yeʼesaj u yutsil (Mat. 11:28-30). Tu yeʼesaj u yaabiltmaj u maasil yéetel ku chʼaʼik en cuenta bix u yuʼubikubaʼob. Por ejemploeʼ le ka kʼáataʼabtiʼ tumen juntúul koʼolel feniciail ka u tsʼak u hijaeʼ, letiʼeʼ tu tʼanaj yéetel yaabilaj. Kex tu káajbal maʼ tu beetaj le baʼax ku kʼáatik le koʼoleloʼ le ka tu yilaj bukaʼaj nojchil u fejeʼ tu tsʼakaj u hija (Mat. 15:22-28). Chéen baʼaleʼ kex suuk u kaxtik kaʼach u yutsil u maasileʼ wa ku yilik kʼaʼabéeteʼ ku tsolnuʼuktik xan le máaxoʼob u yaabiltmoʼ. Por ejemploeʼ le ka aʼalaʼabtiʼ tumen Pedro maʼ kʼaʼabéet u béeykuntik le baʼax túuxtaʼab u beet tumen Jéeobaoʼ letiʼeʼ tu táajtʼantaj tu táan u maasil discípuloʼoboʼ (Mar. 8:32, 33). ¿Baʼaxten tu beetaj? Maʼ tu beetaj utiaʼal u pajik u suʼtaliʼ, baʼaxeʼ utiaʼal u kaʼansik tiʼ Pedro yéetel tiʼ u maasil discípuloʼoboʼ tu lugar u beetkoʼob beyoʼ kʼaʼabéet u apoyarkoʼob. U jaajileʼ Pedroeʼ chan suʼlakchaj waleʼ, chéen baʼaleʼ Jesúseʼ tu beetaj tumen u kʼáat ka xiʼik utsil tiʼ.

13. ¿Yaan kʼiineʼ baʼax kʼaʼabéet k-beetik wa jach tu jaajil táan k-kaxtik u yutsil u maasil?

¹³ Yaan kʼiineʼ wa jach tu jaajil k-kaxtik u yutsil u maasileʼ kʼaʼabéet k-tsʼáaik consejo tiʼob. Chéen baʼaleʼ le kéen k-beeteʼ unaj k-beetik jeʼex Jesúseʼ yéetel unaj k-chʼaʼik teʼ Biblia le baʼax ken k-aʼaltiʼoboʼ. Unaj k-eʼesik yaabilaj tiʼob yéetel unaj k-confiar yaan u beetkoʼob le baʼax ken k-aʼaltiʼoboʼ tumen u yaabiltmoʼob Jéeoba yéetel u yaabiltmoʼonoʼob xan. Maʼalob ka k-tukle: «Le kéen in wil juntúul máax in yaabiltmaj táan u beetik junpʼéel baʼal maʼ maʼalobeʼ, ¿kin waʼaliktiʼ wa? ¿Bix in beetik? ¿Kin beetik yéetel yaabilaj wa kʼeybil in beetik? ¿Baʼaxten kin tsʼáaik le consejo tiʼoʼ? ¿Tumen pʼujaʼanen wa tumen in kʼáat ka xiʼik utsil tiʼ?».

14. ¿Baʼax péeksik kaʼach u yeʼes u yutsil Jesús?

¹⁴ Jesúseʼ maʼ chéen u yojel kaʼach baʼax maʼalobiʼ baʼaxeʼ ku yilik u beetik. Letiʼeʼ mantatsʼ tu beetaj baʼax maʼalob tumen u yaabiltmaj u Taata, maʼ tu yoʼolal yaanal baʼaliʼ. Juntúul máax utseʼ mantatsʼ ku kaxtik u yutsil u maasil, maʼatech u conformar chéen tumen u yojel baʼax maʼalob. Letiʼeʼ ku yeʼesik u yutsil tumen u yaabiltmaj u maasil maʼ tu yoʼolal yaanal baʼaliʼ. Maʼ xaaneʼ yaan máax jeʼel u yaʼalikeʼ: «¿Yaan wa túun uláakʼ baʼax jeʼel u péeksik máak u yeʼes u yutsileʼ?». Yaan. Por ejemploeʼ Jesúseʼ tʼaanaj tiʼ le máaxoʼob tu yeʼesoʼob u yutsil tiʼ le óotsiloʼob chéen utiaʼal ka ilaʼakoʼob tumen u maasiloʼ. Le baʼax ku beetkoʼoboʼ junpuliʼ maʼ maʼalob kaʼach tu táan Jéeobaiʼ (Mat. 6:1-4).

15. ¿Bix jeʼel k-eʼesik jach tu jaajil utsoʼoneʼ?

¹⁵ Wa jach tu jaajil utsoʼoneʼ yaan k-beetik baʼaloʼob maʼalobtak yoʼolal u maasil tumen k-yaabiltmoʼob, maʼ tu yoʼolal yaanal baʼaliʼ. Maʼalob ka k-tukle: «¿Chéen wa in wojel baʼax maʼalob wa kin wilik in beetik? ¿Baʼax péeksiken in weʼes in wutsil tiʼ u maasil?».

16. ¿Baʼax unaj k-beetik sáamsamal, yéetel baʼaxten?

¹⁶ Maʼ unaj k-tuklikeʼ tumen tsʼoʼok k-okjaʼeʼ, tsʼoʼok k-láaj búukintik le túumben modos ku yaʼalik le Bibliaoʼ yéetel maʼ kʼaʼabéet k-mejorariʼ. Maʼ u tuʼubultoʼoneʼ le túumben modosoʼ bey jeʼex junpʼéel nookʼ mantatsʼ kʼaʼabéet k-kanáantikeʼ. Junpʼéel bix jeʼel k-beetkeʼ  letiʼe k-ilik bix jeʼel k-maas eʼesik sáamsamal le jatsʼuts modos ku taal tiʼ u espíritu santo Diosoʼ. ¿Baʼaxten maʼalob ka k-il k-beetik leloʼ? Tumen tiʼ Jéeobaeʼ ku meyaj u espíritu santo utiaʼal u béeykuntik baʼax u kʼáat (Gén. 1:2). Leloʼ u kʼáat u yaʼaleʼ cada junpʼéel tiʼ le jatsʼuts modos ku taal tiʼ u espíritu santo Diosoʼ unaj u péeksikoʼon k-beet baʼax maʼalob. Por ejemploeʼ, Santiagoeʼ tu yaʼalaj: «Le fe xanoʼ wa maʼ tu yeʼesik máak yéetel baʼaxoʼob ku beetkeʼ kimen yanil» (Sant. 2:26). Bey xan jeʼel u yúuchul yéetel tuláakal le jatsʼuts modos ku taal tiʼ le espíritu santooʼ. Le oʼolaleʼ cada ken k-eʼes le jatsʼuts modosaʼ, k-eʼesik táan u nuʼuktikoʼon u espíritu santo Dios.

17. ¿Baʼax jeʼel u páajtal k-beetik wa maʼ t-eʼesik le jatsʼuts modos ku taal tiʼ le espíritu santo jeʼex unajoʼ?

¹⁷ Tak le máaxoʼob úuch okjaʼanakoʼoboʼ yaan kʼiineʼ maʼatech u yeʼeskoʼob le jatsʼuts modos ku taal tiʼ le espíritu santo jeʼex unaj u beetkoʼoboʼ. Chéen baʼaleʼ maʼ unaj u lúubul u yóoloʼobiʼ. ¿Baʼaxten k-aʼalik leloʼ? Utiaʼal k-naʼatikeʼ koʼoneʼex tsʼáaik junpʼéel ejemplo. ¿Máasaʼ wa ka jáatak junpʼéel tiʼ le nookʼoʼob jatsʼuts k-ilkoʼ maʼatech k-jáan pulik? Baʼaxeʼ k-ilik k-utskíintik yéetel kéen tsʼoʼokkeʼ k-ilik k-maas kanáantik. Bey túun xanoʼ wa yaan kʼiin maʼ t-eʼesik utsil, paciencia yéetel yaabilaj tiʼ u maasileʼ maʼ unaj u jáan lúubul k-óoliʼ. Wa yaan kʼiin k-aʼalik wa k-beetik junpʼéel baʼal ku beetik u yaatal u yóol wa máaxeʼ maʼalob ka k-kʼáattiʼ ka u perdonartoʼon yéetel k-ilik k-kaanbal tiʼ le baʼax úuchtoʼonoʼ.

18. ¿Baʼax tsʼoʼok k-ilik teʼ xookaʼ?

¹⁸ ¿Máasaʼ jach kiʼimak k-óol tumen ku béeytal k-kaanbal tiʼ u ejemplo Jesús? Wa k-ilik k-tuukul jeʼex úuchik u tuukul letiʼoʼ yaan xan u páajtal k-beetik le baʼaxoʼob tu beetaj letiʼoʼ. Bey túunoʼ yaan k-búukintik le túumben modos ku yaʼalik le Bibliaoʼ. Teʼ xookaʼ tsʼoʼok k-ilik kanpʼéel tiʼ le jatsʼuts modos ku taal tiʼ u espíritu santo Diosoʼ. Chéen baʼaleʼ maʼalob ka k-jóoʼs tiempo utiaʼal k-xakʼaltik le uláakʼ jatsʼuts modos ku taal tiʼ le espíritu santooʼ yéetel ka k-il bix jeʼel k-eʼesik ichil k-kuxtaleʼ. Utiaʼal leloʼ jeʼel u páajtal a bin teʼ Áantaj utiaʼal u xakʼalxook u j-jaajkunajoʼob Jéeobaoʼ ka a kaxt le jaats «U kuxtal máaxoʼob meyajtik Dios», ku tsʼoʼokoleʼ ka kaxtik «U yich le kiliʼich muukʼoʼ». Jeʼex tsʼoʼok k-ilik teʼ xookaʼ wa k-kanáantik le túumben modos tsʼoʼok k-búukintikoʼ Jéeobaeʼ yaan u yáantkoʼon.