1. Gini nyanyakipa pai du na maapai kurii sino rani?

 SINGIA ani azi bapatiza bete aˈuru gbua kusayo watadu ani ima manga dungu agarã wa ani azihe, ani dunduko naida kadu na ngbatunga gu sino tirani Yekova akpinyemuhe. Tipa ka manga gipai re, si naida ani du na zatise rogo gaani aberã. Tipagine? Bambiko gu nyanyakipa pai du na maapai kurii sinorani nga gaani aberã. Ka ani aberã dedede tipa kina gu nyemuapai nga ga borose, ani nikaa gumba agu apai na kini mangi agu apai du ni gbegberẽhe. (Ef. 4:17-19) Ono tie, ka ani aberã tipa weneapai si nawiraha wa ani nikaa fura na kini mangi apai gbe ngba gu gene nika sa ngbarago ti Barani nga Yekova.​—Gara. 5:16.

2. Ginipai asanahe ani nika sakapai tipaha rogo gi kekeapai re?

² A wa i afura tipaha rogo gu kekeapai naadu mbata fu gere, ani arengbanga ka za gbegberẽ aberã dũ ti rimoho ku berãrani yo te. Ono ani ima rengba ka sia ka zanga mangapai kuti ngbatunga agu aberã re. Mbata fu ani zi bapatiza, si naida ani mbu peka afugo na mangapai ngba gu gene Yekova asogaha. Gere du nga gu nyanyakipa diandue nga bambataha boro amangaha ka ura kuru borose. Ono tie, tipa ka sa ngbarago ti Yekova wenengai, ani du wa ka ani mangipai kuti gu zinahe nga: ‘Oni ukadi vovo borose.’ (Koro. 3:10) Rogo gi kekeapai re, ani nika karagapai kuti agi asanahe re: Ginihe nga ‘vovo borose’? Waigu rengbe ani ka ukadi vovo borose na ki bandaha?

3. Ringbisihe kuti AGaratio 5:22, 23, ginihe nga ‘vovo borose,’ na waigu boro aukadi tini na ni?

³ Gu boro du na ‘vovo borose’ ni nawirika ga Yekova asino.  Gu boro ukadi tini na vovo borose, ni nayugo ga Mbori toro, nimbu ni ziazia toro si du na maapai kurii gani aberã, gani abipai, gbiati gani mangaapai. (Oni gedi AGaratio 5:22, 23.) Ni kpiapai, ni nakpinyemu Yekova gbiati Gako aboro. (Mt. 22:36-39) Gu ngbatunga boro re nabanda gani ngbarago zavura ho ni agbia tini ni na akpakarapai vurũ. (Yak. 1:2-4) Ni nga bamangi zereda. (Mt. 5:9) Ni na zerangbaduse na kidu na wene sino ho ni amangapai ni na kura aboro. (Koro. 3:13) Ni nakpinyemu gupai du ni wenehe na kini mangihe. (Rk. 6:35) Ni nayugoho rogo gani mangaapai yo nga ni na nyanyaki idapase kuti gu Bani du ngbangbaturũ yo. (Yak. 2:18) Ni nadu na zerangbaduse ho kura aboro aida ka takpata ni na ni watadu ka zinga na ni, ni naza tini ho du ni ni ni asadiasadi ni.​—1 Kor. 9:25, 27; Tito 3:2.

4. Tipa ani ukadi vovo borose, tipagine si aida ani yugu agu asino ti ni dunduko i nape paha rogo AGaratio 5:22, 23 gbiati agu du rogo kura apapara Baibiri?

⁴ Tipa ka ukadi vovo borose, si naida ani sonosi agu asino dunduko i nafura tipaha rogo AGaratio 5:22, 23 gbiati agu du rogo kura apapara Baibiri. * Agi asino re wa aroko nga gu ani aukadi gu areme ani ki uru gure ki ukadi gu gba te. Ni rengo, badungu agi asino re ima du na wiratise dagbaha na gu kura asino. Ni kpiapai, ka mo kpinyemu kuaro nzunzu, mo nika du na zerangbaduse na ni na kini yugu wenesino funi. Na tipa mo du nzunzu nga wene boro, si naida mo du na zerangbaduse na kini mangisunge na zatise.

5. Ginipai padu na “ga Kristo berã” ayugoho, na tipagine si aida ani wisigipai ti ni tipa ga Yesu raka? (1 AKorindo 2:16)

⁵ Oni gedi 1 AKorindo 2:16. Tipa ka ukadi vovo borose, si naida ani du na “ga Kristo berã.” Ka pehe rogo kura afugo, ani du wa ka ani wirikipai tipa wai Yesu aberã na tifuoho ani ki wiriki ko. Yesu nayugo zuzu ga Mbori toro ngba rengberengbe gene. Ko nayugo ga Yekova asino kina wai duhe nzunzu. (Eb. 1:3) Kina wai ani nikaa berã wa Yesu gbe, kina wo a ani nikaa mangapai wa ko na kidu na diabese gbe rogo yugo agu asino du wa gako.​—Frp. 2:5.

6. Gini apai si aida ani tingidihe ho ani aasada ka ukadi vovo borose ni?

⁶ Ya mo si rengbe ka du nzunzu furani taata ani pekefuo ga Yesu kpiapai? Ani rengbe ka berã gupai nga: ‘Yesu nga rengberengbe boro. Ka mi du nga wa ko te!’ Kangia wo gu mo abi  tiro, mo tingidipa agi arengo re. Bambatapai nga, i akusi ro mo du wa aYekova na Yesu. Sidu, mo ima rengba ka sia ka wirika yo, na mo ima rengba kadu wa yo kandara ku gene. (Bam. P. 1:26) Uepai nga, ga Mbori ziazia toro ima du na bakere ome ti ni rogo zegino dunduko. Na gaha undo, mo ima rengba ka manga agu apai ka mo amanganga ha ni tiro na gamo ome ya. Biatapai nga, Yekova abingo gupai nga si naida mo yugu agu asino nga ga zuzu toro ngba rengberengbe gene awere te. Nirengo, gu Barani nga boro nyemuse ima sigira agarã 1,000 tipa agu aboro du na maabangirise ka raka nyeanye kindi auru kpotosende ane da ni rengberengbe yo. (Yugo. 20:1-3) Gupai Yekova aidaha berani awere nga ani mangi ome nyanyaki na kini kido kuti ko tipa undo.

7. Ginipai ani nika sakapai tipaha awere?

⁷ Rogo gini gene yo gbe, rengbe ani ka wirika Yesu ngbaha? Ani nika sakapai ni wiri guruhe tipa apapara asino nga ga ga Mbori zuzu toro biama. Tipaha ni basasa, ani nika bi gupai rengbe ani ka wirikaha ti gu gene Yesu ayugu agu asino re ngbaha. Na ani nika wisigopai tipa bete asanahe nga gu rengbe ka undo rani ani wisigipa wai ani naukadi vovo borose wenengai.

8. Waigu Yesu ayugu nyemuse?

⁸ Ga Yesu dudunguro nyemuse tipa Yekova afõ ngbaduko yo ko mbupa kura gako apai tipa Bako na tipa rani. (Yo. 14:31; 15:13) Yesu ayugu ba bakio wai ko akpinyemu aboro ngba gu gene ko araki gako raka ngbaha auru kpotosende. Rogo aˈuru dunduko, ko anaayugo nyemuse gbiati nunga zavura ho kura aboro anaasoga ko ni vurũ. Gu nyanyakipa gene ko ayugu nyemuse ngbaha tipa aboro angia ka yugopai fuyo tipa ga Mbori Kindo. (Rk. 4:43, 44) Yesu ayugu gu gako nyemuse nga ga mbupa kura gako apai tipa Mbori na tipa aboro re ni ida ko pa ka kpi iigirã kpio vurube aboro ingapai. Rogo gi gene re, ko azakigene furani dunduko tipa ani gbia nyenye unga.

9. Waigu rengbe ani ka wirika Yesu rogo yugo nyemuse yo?

⁹ Ani akpara gaani raka fu Yekova na ki zi bapatiza mbiko ani nakpinyemu gu Barani du ngbangbaturũ yo. Sidu, wakina Yesu, si naida ani yugu nyemuse fu Yekova rogo gu gene ani amangapai na aboro ngbaha. Gu mokedi nangia Yoane akepai nga: “Gu ni adu nga nyemu gu wirinani ti ni bi ni ni ya, ka nyemu Mbori du nga ti ni ni abi nga ko ya te.” (1 Yo. 4:20) Ani ima rengba ka sana tirani nga: ‘Ya mo mi sonosi dudunguro nyemuse tipa aboro? Ya mo mi nayugo nunga ho mi amangapai ni na kura aboro, zavura ho i amangapai ni ngba gbegberẽ gene na mi? Ya mo nyemuse nafõ ngbadure yo mi mangisunge na gimi regbo gbiati agu ahe du bere tipa ka undo kura aboro i wirikipai tipa Yekova? Ya mo mi na nyemu ka manga gipai re zavura ho badungu aboro adu nga ni na tambuahe tipa gu ome mi amangaha ya watadu ho i asoga re ni? Ya mo mi rengbe ka gbata agene tipa kaa dia bakere regbo kuti sunge sa aboro ni abawiriki?’​—Ef. 5:15, 16.

10. Waigu Yesu adu ni bamangi zereda?

¹⁰ Yesu angia gu kumba nangia bamangi zereda. Ho aboro anaamanga fuko ni ngba gbegberẽ gene, ko akaraganga gbegberẽpai fuyo kuba gbegberẽpai te. Ono ko amangi kurapai berewe susi gure. Ko amangi diandue ka zeresa gu kpakarapai naanikuru na ki ngarasi kura aboro i mbakadi gayo atagbagapai. Ni kpiapai, ko ayugupai fuyo nga si naida i mangi zereda na awirinayo ka i aida Yekova idi na gayo iriso. (Mt. 5:9, 23, 24) Na ko aundo amokedi bara dungu he i mbakadi gu tagbagapai naadu dagbayo tipa da dagbayo nangia gu bakumba ni.​—Rk. 9:46-48; 22:24-27.

11. Waigu rengbe ani kadu ni amangi zereda?

¹¹ Tipa kadu ni amangi zereda, si naida ani  mangi dungu apai susi gu gbua nga ka ne ye na akpakarapai. Si naida ani mangi asadatise ka manga zereda na kura aboro na ki ngarasi awirinarani i mbakadi gayo akpakarapai. (Frp. 4:2, 3; Yak. 3:17, 18) Ani ima rengba ka sana tirani na agu asanahe nga: ‘Ginipai du mi na nyemu ka mbupaha tipa ka manga zereda na kura aboro? Ho wirina aimisa ngbadure ni, ya mo mi nakpipai? Ya mo mi naapido kina gu kura boro re tipa ni mangi diandue ani mangi zereda, watadu mi naamanga bambata diandue ka si vura du nga si nangera wa gu kura boro re du niye na kpakarapai vurũ? Ho rẽhe arẽ ni, ya mo mi naangarasa agu aboro du na tagbagapai dagbayo i mangi zereda?’

12. Waigu Yesu ayugu wenesino?

¹² Yesu adu na wenesino tiko. (Mt. 11:28-30) Ko ayugu wenesino nidu ko ni bayee boro na kidu na ruru bipai, zavura ho ko anidu ni rogo kpakarakpakaraapai vurũ. Ni kpiapai, ho dee ni boro Kanana [Poinike] azungodi ko ni ko husi wiiri, ti bambataha, ko aamanganga gupai ri asanako tipaha te, ono ho ri ayugu bakere idapase ni, ko ahusi wiiri. (Mt. 15:22-28) Wa Yesu avura du na wenesino, ko azanganga fu arugute te. Ti kura aregbo, ko ayugu wenesino nifu ko nyanyaki rugute fu agu aboro ko akpinyemuyo. Ni kpiapai, ho Petero aasadi ni ka za Yesu ti manga gupai Yekova akpinyemuhe, Yesu aruguko kina ku bangiri gu kura abawiriki. (Mk. 8:32, 33) Ko aamanganga gipai re tipa ka ba zee ti Petero te, ono tipa ka ruga ko na tipa kafu zahe fu kura abawiriki ka i naadianga ngbiti apai ya. Zanga kapa, wiri zee aima zio Petero tigaha, ono ko aima gbia undo ti gu rugute re.

13. Waigu rengbe ani ka yugo ndikidi wenesino?

¹³ Tipa ka yugo ndikidi wenesino fu agu aboro mo akpinyemuyo, ti kura aregbo si naida aida mo fu rugute fuyo. Ho mo amangaha ni wo, mo moi mburu gamo rugute rii gu bangua arengo du rogo Fugo Mbori yo. Mo du na zerangbaduse. Mo du na gu ida nga i naida aida ka manga gupai du ni ruruhe, na mo du na gu kido nga agu aboro kpinyemu Yekova na ki kpinyemuro nika mangapai amanga wenengai kuti gu wene arugute mo afuhe re. Mo sana tiro na agi asanahe re: ‘Ya mo mi na wingbaduse ka fura ho mi abi gu boro ni mi akpinyemuni ni nimangi gupai du ni gbegberẽhe? Ka si du nga si naida mi fu rugute afu, ya mo mi nafura rogo wene gene yo, watadu ngba gbegberẽ gene? Gini ndupai nasa re mi fu rugute? Ya mo mi nafuhe mbiko rago du nagberã tire na gu boro re, watadu mbiko mi naida ka undo ni?’

14. Waigu Yesu ayugu weneringise?

¹⁴ Yesu ainongo kina ini ini gupai gbua du ni wenehe te, ono ko namangaha amanga a. Yesu ima kpinyemu Bako, sidu, ko namanga gupai ti aregbo dunduko du niruru he na ruru ndupai. Wene boro ti aregbo dunduko nagbata agene tipa ka undo kura aboro na kini mangi wene apai fuyo. Anga pa ino gupai gbua du ni ruruhe si aida boro mangihe nga yangarapai te; si naida ani mangi gupai du ni ruruhe na ruru ndupai. Ani rengbe ka bakabangirani nga, ‘Ya mo boro rengbe ka manga rurupai na gbegberẽ ndupai?’ Ii, si ima rengba ka manga wo. Ni kpiapai, Yesu afura tipa agu aboro nafuku agamahe fu rungorungo aboro, ono i ki sa gupai nga kura aboro bi gupai i aamangaha na ki sambuo yo tipaha. Wa si avura du nga gi mangaapai re adu ni wenehe, rago aangbanga ti Yekova na yo te.​—Mt. 6:1-4.

15. Waigu rengbe ani kadu nga ndikidi wene aboro?

¹⁵ Ani rengbe kadu nga ndikidi wene aboro sa kina gu ka ani amanga rurupai zanga na gu nduapai nga ga gbangbati. Sidu, mo ima rengba ka sana tiro nga: ‘Ya mo mi ni gu boro ainongo kina ini ini gupai du ni ruruhe sa ya ono ni gu boro namangaha amanga a? Gini ndupai nasa re mi mangi agu apai du ni wenehe?’

16. Ginipai si aida ani naamangaha na aˈuru dunduko, na tipagine?

¹⁶ Si aidanga ani da kuti gu digisopai nga gu sunge nakoda pa ukadi vovo borose nadigo ti regbo zio bapatiza te. Vovo borose wakina vovo roko si aida ani bandaha abanda. Gene sa rengbe ani ka mangaha ngbaha nga ka gbata agene rogo aˈuru dunduko tipa ka yugo ga Mbori zuzu toro. Tipagine? Bambiko Yekova namangasunge na gako toro tipa si naamangapai, na gako toro nga zaaza ome mangapai. (Bam. P. 1:2) Sidu, apapara zuzu toro dunduko ima rengba ka fõngbadu rani yo na ki sarani ani mangipai. Ni kpiapai, gu bawiriki nangia Yakoba akepai nga: “Idapase zanga mangaapai . . . ni kpikpi he.” (Yak. 2:26) Kina gu bangisapai re du tipa kura apapara zuzu ga Mbori toro dunduko. Ti agu aregbo dunduko ani ayugo agu asino re, ani nayugo gu gopai nga ga Mbori toro namangasunge rogo rani yo.

17. Waigu si aida ani mangipai ho ani azanga yugo agu asino ni nga ga zuzu toro?

¹⁷ Ti kura aregbo, zavura agu aKristano naaima zio bapatiza dungu agarã kusayo ima rengba ka zanga yugo agu asino nga ga zuzu toro. Ono gupai nyakipaha gbe nga ani naamanga asadatise kindi kaa yugo agi asino re. Oni makianga gi kpiapai re. Ka gu gamo roko ni ngba angba gbe tiro siri, ya mo mo rengbe ka baha kusa yo nibasa? Oó. Si nawiraha wa mo rungu gu ba si nisiri rogoho wenengai ka rengba du ka mangaha wo. Na mo ima rengba kadu na rubangirise gbe tifuo gure. Wakina gure a, ka i ya ti kura aregbo mo amanganga pai ngba wene gene, ni zerangbaduse watadu rogo gu gene nga ga nyemuse fu kura boro te, ka rago gberẽnga tiro ya. Ka pepai ngba kura gene, mo hõmbupai kina boro ngbaduro yo si nika sa gupai nga mo du rogo gu bangiriba nika sa ro mo mbakadipai dagba ro na gu boro re berewe. Na mo diberã tipa ka mangapai ni bawenehe kumbatayo.

18. Ginipai rengbe ani kadu na kido tipaha?

¹⁸ Nairiwo gu tambuahe du ani na ni kadu na gu kpiapai Yesu amoihe re! Kina wai ani nikaa wirika gako berã na gako bipai ni bakerehe, kina wo si nika du furani taata ani mangipai wa ko. Kina wai ani nikaa mangapai ni bakere he gbe wa Yesu, kina wo a ani nika ukadi tirani gbe na vovo borose. Rogo gi kekeapai re, ani bi apai gbua biama nga papara ga Mbori zuzu toro. Si adu ni wenepai foro ka mo di bete regbo ka wisigopai tipa kura asino nga ga zuzu toro na kini berẽpa wai mo ayugo agu asino re wenengai. Mo nika bi tangaratangara riiapai du rogo Research Guide for Jehovah’s Witnesses tii gu riipai nga “Christian Life” na ti fuo gure, “Fruitage of the Spirit.” Oni ima rengba kadu na gu kido nga ka oni asadi ka ukadi vovo borose na ki bandaha, Yekova nika undo roni aundo.