1. ¿Judiorabara kʼãrẽ nebiata oibasi?

 JUDIORÃRA poaga biobasi Babiloniane ãyi nezokʼa kĩrãkʼa panʉta. Mamina maʉ̃ta Jeowaba osi Ciro nokʼo Persiadebemaba ãyita kʼarebamarẽã. Naʉ̃ nokʼoba judiora jarasi ãyira jẽda wãseabʉta ãyi drʉama, adewara Daizeze templora ara oseabʉta (Esd. 1:1, nota, 3). Naʉ̃ba jarakĩrãbʉ akʉza ãyi drʉama wãita Jeowaba diadade, adewara mawũã Jeowaba zokʼabʉde odaita. Maʉ̃ kʼarea judiorãra mejãcha sobiapanasi.

2. Ʉ̃kʉrʉ judiora Jerusalénma jʉ̃ẽsidera, ¿kʼãrẽta ojʉ̃drʉsida?

² Ʉ̃kʉrʉ judiorãra jʉ̃ẽsida poaga 537 Kristo nãã Jerusalénma. Yi judiora nãã jʉ̃ẽnara aramaʉ̃ta traja jʉ̃drʉsida templo ara oita, maʉ̃ta poaga 536 Kristo nãã templode yi wuagaʉrabʉta yi maparãma basi.

3. ¿Kʼãrẽ bedʼea zromata ũdusi judiorabara templo opanʉ kʼarea?

³ Judioraba templo ojʉ̃drʉda tẽã, ãyi kʼawa pʉwʉrʉra pananabara kãga ẽ basi maparãnamarẽã maʉ̃ templora. «Aramaʉ̃ta ãyi kʼawa panʉra ẽbẽrabara krĩcha zroma obikʉasida israelitarata mõbe sopʉa osida templota ara oda ẽ marẽã» (Esd. 4:4). Judiora mawũã zʉbʉrianʉmʉne wũẽta, awuru nokʼoraba zokʼabasi Persiara yi trʉ̃ra Artajerjesbasi. * Iyara zokʼa jʉ̃drʉsi poaga 522 Kristo nãã. Maʉ̃ kʼarea ẽbẽra Jerusalén kʼawa panʉrabara jʉrʉsida naʉ̃ nokʼota zewa nebʉra jaraita judiora ʉ̃rʉ, mawũã ãya templo maparãna ẽ marẽã (Sal. 94:20). Adewara jarasida naʉ̃ra ẽbẽrarãbara judiorãra nokʼo ʉ̃rʉ bakĩrãpanʉta (Esd. 4:11-16).  Mawũẽra nokʼo Artajerjesbara ĩjãsi ãyi bedʼeata, maʉ̃ kʼarea jarasi wua parãna ẽ marẽã templora (Esd. 4:17-23). Maʉ̃ kʼarea judiorabara wua parãna ẽ basi templora (Esd. 4:24).

4. Isaías 55:11de jarabʉdera, ¿kʼãrẽta osi Jeowabara templo wua oda ẽ marẽã jarasidadera?

⁴ Ʉ̃kʉrʉ ẽbẽra Daizeze kãga ẽ badaba akʉza ʉ̃kʉrʉ nokʼora persiadebemaba jĩpa kãgada ẽ basi templo maparãna ẽ marẽã. Mamina Jeowabara kãgabasi judiorabara mapãrãnamarẽã templora. Kĩrãbedadrʉ, Jeowaba jarabʉra jõma aripe obʉta (akʉra Isaías 55:11). Aramaʉ̃ta Jeowabara jʉrʉsi propeta Zacaríasta, maʉ̃ra nekʼãrẽ ocho ũdubisi iyi ʉrʉmabʉde. Aramaʉ̃ta Zacaríasbara maʉ̃ta jara ũrĩbisi judioraʼa ãyaʼa so zarea diaita. Naʉ̃bara kʼarebasi judiorãra pera ẽ bʼaita ãyi nejʉra kʼarea, awuarabʉrʉ so zarea diasi mapãrãnaita templora Jeowaba zokʼada kĩrãkʼa. Maʉ̃ne Jeowaba nekʼãrẽ jũesoma ũdubidade, ũdusi Zacaríasbara ĩbira juwa jiwini barabʉta akʉza bakuru olivo ũme bʉta.

5. ¿Kʼãrẽta kʼawuadai naʉ̃ artikulodera?

⁵ Dayirã jõmaʉ̃ta edaʉde krĩcha zroma obada, maʉ̃ kʼarea Jeowaba Zacarías ũdubidaba dayirã so zarea diaseabʉ. Iya ũdusi ĩbira juwa jiwini barabʉta akʉza olivo bakʉrʉ ũme. Naʉ̃ba kʼarebasi israelitara zowaĩnĩgʉa bʼaita. Dayirãsida naʉ̃ba kʼarebaseabʉ. Bari jaraita, naʉ̃ba dayirãra kʼarebaseabʉ kʼẽrẽpa bʼaita Daizezeʉ̃me. Nããra, ẽbẽraba kãga ẽãne dayirãba odamarẽã Jeowaba zokʼabʉta. Ʉ̃meta, dayirã pribilegio erbʉta wua oẽãde. Ũbeata, Jeowa organizasionba dayirã zokʼabʉrʉde maʉ̃ta omarẽã mamina dayirãba ũrĩ ẽãne.

6. Zacarías 4:1-3 bayeda jarabʉdebara, ¿sãwũã zowãĩnĩgʉabisi judiorãra? (Akʉra poto nããrabemata).

⁶ (Akʉra Zacarías 4:1-3). Zacaríasba ũdudaba ĩbira juwa jiwini barabʉta akʉza olivo bakuru ũmebʉta, naʉ̃ba kʼarebasi judiorãra pera ẽ bʼaita ãyi nejʉra kʼarea akʉza maparãnaita Jeowaba zokʼadara. Naʉ̃ra krĩchadadrʉ Zacaríasbara ũdudata. Zacaríasbara ũdusi olivo bakuruta ũme. Maʉ̃ bakurudebara aseiteta drʉbasi sãbʉma, maʉ̃ sãbʉde jʉ̃ebasi, aseitera mamaʉ̃ba ĩbira juwa jiwinibara bʉma drʉbasi maʉ̃ ĩbirata ki ẽ marẽã, mawũã naʉ̃ ĩbirãra ewari jõma pureabasi. Aramaʉ̃ta Zacaríasbara angelʼra widisi kʼãrẽta jarakĩrãbʉta naʉ̃ba. Angelbara jarasi Jeowaba jaradata: «‹Gorogororaba akʉza zareaba oẽbayi awuarabʉrʉ mʉ̃ jaure zareadeba oyi›, jarasi Jeowa gorogorora nokʼoba» (Zac. 4:4-6). Maʉ̃ta jõma aripe osida judiorabara. Nokʼoba wuabida jara ẽ basimina templo ara odamarẽã, ãyara ara ojʉ̃drʉsida templora. Olivo bakuru ũmebʉdeba aseite zebadabara jarakĩrãbasi Daizeze jaure zareata, naʉ̃ra jõkata. Mawũẽra Daizeze jaure zareara mejãcha zarea basi gorogorora persiadebemaraira Jeowara templo opananarebasi baera ãyira awuantaseabasi bedʼea zroma erpananara akʉza maparãseabasi templo opanʉra. Kʼãrẽ yibia basi naʉ̃ bedʼeara. Judiorabara ĩj̈ãibarabasi Jeowade akʉza maparãnaibarabasi templora.

7. ¿Kʼãrẽta berabarisi Persiade akʉza sãwũã kʼarebasi naʉ̃ba judiorãra?

⁷ Mamina ewari aba jõma awuara jʉ̃drʉsi. Poaga 520de Kristo nãã, nokʼo Darío I naʉ̃ba zokʼa jʉ̃drʉsi Persiara. Iya  kʼawuasi templo wua oẽmarẽã jarapanʉra sewidata, maʉ̃ kʼarea jarasi judioraʼa maʉ̃ templo opanʉra maparãnamarẽã (Esd. 6:1-3). Adewara naʉ̃ nokʼobara jarasi Jerusalén pʉwʉrʉ kʼawapanʉra yõna ẽ marẽã, awuarabʉrʉ platata diadamarẽã maʉ̃ templo jõma maparãnaita (Esd. 6:7-12). Maʉ̃ kʼarea ãyara maparãsida templora poaga 515de Kristo nãã poaga kimarene (Esd. 6:15).

8. ¿Kʼãrẽa zowaĩnĩgʉa bʼaibara ẽbẽraba kãga ẽ bʉrʉ bʉa Jeowaba zokʼabʉta omarẽã?

⁸ Idi ewadera ʉ̃kʉrʉ mebẽrãra mejãcha zʉbʉriabʉ ẽbẽrãraba kãga ẽ baera Jeowaba zokʼabʉta odamarẽã. Bari jaraita, ʉ̃kʉrʉ drʉadera nokʼorabara Jeowa ʉ̃rʉ Kʼawuabipanʉrãra iduaribida ẽ Jeowaba zokʼabʉ oita, maʉ̃ kʼarea, nokʼorabara jidapanʉ karsel eda bʉita akʉza trʉ̃panʉ ãyi nãã bamarẽã ãyibawara bedʼeaita (Mat. 10:17, 18). Edaʉde maʉ̃ drʉade awuru nokʼota bʉepanʉ, maʉ̃ba iduaribiseabʉ Jeowababa zokʼabʉ oita, mawũã ẽ bʉrʉ juezba iduaribiseabʉ Jeowaba zokʼabʉ oita. Adewara ʉ̃kʉrʉ mebẽrãra ãyi mebẽrãraba kãga ẽ Daizezeba zokʼabʉ oita (Mat. 10:32-36). Ãya mawũã kãga ẽ mina dayirãba idubʉ ẽ bayi Jeowaba zokʼabʉ oira, maʉ̃ba ʉ̃kʉrʉba kʼawuabʉrʉde mawũã krĩchabʉta ãyira wawia zroma oẽ. Ʉ̃kʉrʉbara jipa kãga ẽ basi Jeowa ode bʉra, mamina idi maʉ̃ta ãyira Jeowa ʉ̃rʉ kʼawuabipanʉra. Maʉ̃ kʼarea ʉ̃kʉrʉ ẽbẽraba kãga ẽ bʉrʉ bʉa Jeowaba zokʼabʉta omarẽã, perarãra zowaĩnĩgʉabara, Jeowaba kʼarebabʉ baera iyi jaure zareaba.

9. ¿Kʼãrẽa krĩcha obasi judiorãra ãya ũduside templo wuagaʉ maparãdata?

⁹ Ʉ̃kʉrʉ judiora zõrãra ũdusidade templo yiwidide yi wuagaʉta maparãbʉdade ãyira jẽgasida (Esd. 3:12). Ãya ũdusida baera Salomónba templo parãnara jipa biʼia yirasida, maʉ̃ kʼarea ãyira krĩcha zroma obasi krĩchapanasi baera templo yiwidira mawũã biʼia yira ẽ basita (Ageo 2:2, 3).

10. Angelba Zacarías 4:8-10 bayeda jaradabara, ¿sãwũã kʼarebasi judioraʼa jẽda sobia bʼaita?

¹⁰ (Akʉra Zacarías 4:8-10). Angelba jarasi judiorãra mejãcha sobia panaita akʉza ũdudaibasita nokʼo Zorobabelba iyi juwade erbaita plomadata. Naʉ̃bara, ¿kʼãrẽta jarakĩrãbasi? Naʉ̃ plomadara biode  zokʼapanʉ de semento obʉrʉde, naʉ̃bara kʼarebabʉ kʼawuaita jõma daucha obʉ kʼawuaita. Naʉ̃ba angelbara jarakĩrãbasi templo biʼia parã ba ẽ basimina nãã erpanana kĩrãkʼa templora jõma parãnaita. Adewara jõma aripe oibasita Jeowaba kãgabʉ kĩrãkʼa. Jeowaitara audre yibiabasi judioraba odamarẽã iya kãgabʉde templode. Judioraba osidabʉrʉ Jeowa kãgabʉde ãyira akʉza jẽda sobiapanakasi.

11. Ʉ̃kʉrʉ Jeowa ʉ̃rʉ Kʼawuabipanʉrãitara, ¿kʼãrẽta zarea baseabʉ?

¹¹ Zare dayirãita pribilegio erbʉta wua oda ẽ bʉrʉ. Bari jaraita, kongregasion zõrãrã akʉbaria yi nãã edebari 130 ora diabʉa akʉza betelita jarabada ãya obʉta wua oda ẽ marẽã awuarabʉrʉ nekʼãrẽ awuruta ojʉ̃drʉdamarẽã. Mawũã ẽ bʉrʉ ʉ̃kʉrʉ mebẽrã ãya pribilegio mejãcha kãgabadara idubʉepanʉ ãyita zõnabasi baera. Mawũã berabaribʉrʉdera dayirãra krĩcha zromara opanʉ. Edaʉde dayirãbara bia kʼawua ẽ kʼãrẽa mawũã jidasidata, mawũã ẽ bʉrʉ kʼãrẽa mawũã osidata. Maʉ̃ba dayirãbara krĩchaseabʉ dayirã nãã sãwũã obadara audre yibia basita atia dayirã panʉira, adewara krĩcha zroma oseapanʉ, krĩchaseapanʉ baera nãã obada kĩrãkʼa obʉ ẽãta Jeowaita (Prov. 24:10). Kõbebʉrʉ akʉdaya sãwũã Zacaríasba iyi ʉ̃rʉmabʉde ududaba kʼarebaseabʉta dayirãra mawũã krĩcha ẽ bʼaita, awuarabʉrʉ dayirãba nekʼãrẽ audre oseabʉta Jeowaita.

12. ¿Sãwũã kʼarebaseabʉ Zacaríasba ũdudaba iyi ʉ̃rʉmabʉde krĩcha zroma oẽ bʼaita, dayirãba nãã obadata wua oda ẽ bʉrʉ?

¹² Dayirã mejãcha krĩcha zroma oẽ bʼaira akʉdaibara Jeowaba akʉbʉ kĩrãkʼa. Jeowabara idi ewadera nekʼãrẽ mejãcha onʉmʉ. Dayirãbara kʼarebaseabʉ iya obʉra (1 Cor. 3:9). Dayirãba pribilegio erbʉra awuara baseabʉ, mamina Jeowaba dayirã kãgabʉra mia kʼãrẽsida awuara babe ẽ. Jeowa organizasionba nekʼãrẽta awuara ora akʉza jaradara bʉa maʉ̃ta oibarata, maʉ̃ta badua krĩchanʉmerãra kʼãrẽa mawũã osidata, badua bʉa maʉ̃ krĩchanʉmʉikaʉde awuarabʉrʉ krĩchara bʉa atia nebia obʉra yibiata (Ecl. 7:10). Bʉa krĩchaikaʉde bʉa nekʼãrẽ obe ẽãta, krĩchara bʉa nekʼãrẽ oseabʉ ʉ̃rʉ. Zacaríasba ũdudaba iyi ʉ̃rʉmabʉde kʼarebabʉ dayirã krĩcha zroma obaikaʉde nebiata  krĩchaibarata, mawũã odara sobia bayi akʉza kʼẽrẽpa bayi dayirãba pribilegio erbʉta wua oda ẽ bʉsida.

13. ¿Kʼãrẽa ʉ̃kʉrʉ judiorabara krĩchabasi templo jẽda ara oira yibia ẽ basita?

¹³ Templo odaira kãgada ẽ basimina, judiora ũmeba saserdote zroma Josuéba akʉza gobernador Zorobabelba ãyiareba ojʉ̃drʉsida templora (Esd. 5:1, 2). Maʉ̃ba ʉ̃kʉrʉ judioraba krĩchapanasi ãya ojʉ̃drʉbʉrʉra yibia ẽ basita. Naʉ̃ra jõmaʉ̃ba akʉpanasi baera, adewara wuabʉrʉ bedʼea zroma ũduibasi baera. Maʉ̃ ewaridera Josuéta akʉza Zorobabelta judiora buru baera ãyara nesidapanasi kʼawuaita wãrĩnu Jeowaba ãyi kʼareba kʼawuaita. Akʉdaya maʉ̃ta sãwũã Jeowaba kʼawuabisita.

14. Zacarías 4:12, 14de jarabʉbara, ¿kʼãrẽta jara ũrĩbisi Zorobabelʼa akʉza Josuéʼa?

¹⁴ (Akʉra Zacarías 4:12, 14). Nama angelbara jarakĩrãbasi olivo bakuru ũmebara jarakĩrãbasita aba Josúeta, ababemara Zorobabelta. Akʉza angelbara jarasi naʉ̃ra yumakẽrã ũmera Jeowa kʼawa bʉkĩrãkʼa panʉta. Mawũẽra naʉ̃ bedʼeabara jarakĩrãbasi Jeowabara ĩjãbʉta naʉ̃ra yumakẽrãne. Maʉ̃ kʼarea judiorabara ãyide ĩjãseabãsi Jeowaba zokʼasi baera iyi pʉwʉrʉ akʉmarẽã.

15. ¿Dayirãbara sãwũã wawiabʉta ũdubidai Daizeze Bedʼeara?

¹⁵ Idi ewaridera Jeowabara dayirãra jaradiabʉ iyi Bedʼeadeba. Naʉ̃ne eda jarabʉ sãwũã kãgadamarẽã kãgabʉta akʉza sãwũã iya jarabʉde opanamarẽã. Mawũẽra, ¿dayirãba sãwũa wawia bʉta ũdubidai Daizeze Bedʼeara? Ewari jʉrʉbʉde Daizeze Bedʼea kĩrãkita leita akʉza biʼia ũrĩta. Bʉyikʉza widira: «Mʉ̃a Daizeze Bedʼea lebʉde mawũã ẽ bʉrʉ kartara lebʉdera, ¿maʉ̃ ʉ̃rʉ biʼia krĩchabʉka? Akʉza bʉbʉrʉ bedʼea mʉ̃a ũrĩ ẽãta, ¿mʉ̃ara jʉrʉbʉka mʉ̃a biʼia ũrĩñiena Mawũã ẽ bʉrʉ, ¿bari mesera lebʉka kartara?» (2 Ped. 3:16). Dayirãta ewari jʉrʉbʉbʉrʉ Jeowaba zokʼabʉ bia ũrĩta Jeowaba jarabʉta ũrĩnañi, adewara bia jaradiadayi Daizeze Bedʼeata wuabema ẽbẽrarã (1 Tim. 4:15, 16).

16. Dayirãba ũrĩ ẽãne zõrãra buru biaba zokʼabʉta, ¿kʼãrẽba kʼarebai maʉ̃ oita?

¹⁶ Adewara Jeowabara dayirãra akʉbʉ nezokʼara jipa biʼia krĩchabʉraneba  (Mat. 24:45). Edaʉde ãya zokʼabʉra dayirãbara bia ũrĩ ẽ. Bari jaraita, ãya jarasebʉ kʼãrẽta odaibarata naʉ̃ drʉade neida berabaribʉrʉdera dayirãra beuda ẽ marẽã, mamina dayirãba krĩchaseabʉ naʉ̃ra, ¿mʉ̃ drʉadera berabarika maʉ̃ra? ¿Kʼãrẽa ũrĩbara ãyi bedʼeara? Adewara dayirãbara krĩchaseapanʉ Zõrãrã Burubiabara mejãchade kĩrãtana jaranʉmʉta, dayirã sãwũã jʉrakʼawuabaibarata pandemia kʼarea. Dayirãba krĩchabʉbʉrʉ maʉ̃ ũrãgʼata dayirãita zeri ẽãta, ¿kʼãrẽta odaibara? Kĩrãbedaibara judiorãra bia pãrãsita Jeowaba Josué akʉza Zorobabeldeba zokʼadata ũrĩsida baera. Akʉza dayirãbara leseabʉta Daizeze Bedʼeade nebʉrabʉta, dayirãba ledara ũdudayi sãwũã nããrabema ẽbẽra Daizeze ode pananara beida ẽ basita, Jeowaba zokʼabʉta osida baera ãya bia ũrĩna ẽ basimina (Juec. 7:7; 8:10).

17. Zacaríasba ʉ̃rʉmabʉde ũdudabara, ¿sãwũã kʼarebasi judiorãra?

¹⁷ Jeowaba Zacarías ũdubidaba kʼarebasi judioraba akʉdamarẽã ãya obʉra aripe basita, adewara kʼarebasi templo maparãnaita akʉza Jeowaba kãgabʉde odaita. Ãya osidade Zacaríasba ʉ̃rʉmabʉde ũdudade sentisida sãwũã Jeowaba kãgade kʼarebabʉta ãyira. Jeowabara iyi jaure zareadeba kʼarebasi templo maparãnamarẽã akʉza ãyi sobiapanamarẽã (Esd. 6:16).

18. Zacaríasba ʉ̃rʉmabʉde ũdudabara, ¿bʉra sãwũa kʼarebaseabʉ?

¹⁸ Zacaríasba ĩbira juwa jiwini barabʉta akʉza iyi ʉ̃rʉmabʉde ũdudaba biode kʼarebaseabʉ bʉra. Naʉ̃ba kʼarebaseabʉ dayirã zarea erbaita awuru ẽbẽraba kãga ẽãne dayirãba odamarẽã Jeowaba zokʼabʉta. Sobia bʼaita dayirãba nãã pribilegio erbadata wua oẽmina. Ĩjãita Jeowa organizasionba jarabʉta, adewara oita dayirãba ũrĩ ẽ mina. Mawũẽra bʉa bedʼea zromata ũdura, ¿kʼãrẽta oibara? Nããra, akʉra Zacaríasba akʉda kĩrãkʼa, iyara ũdusi Jeowabara sãwũã akʉbʉta iyi pʉwʉrʉra. Yi ũmeta, ĩjãra Jeowata akʉza soidʉba ora iya zokʼabʉta (Mat. 22:37). Mawũã odara Jeowaba kʼarebayi ewari jõmaʉ̃nẽ iyi ode sobia bamarẽã (Col. 1:10, 11).