1. Sé Juif-la yo té chayé Babilòn pa fòs té kay viv dé biten èstraòwdinè toubònman. Ki biten ésa ?

 SA TÉ ja ka fè plizyè lanné kè yo té chayé sé Juif-la pa fòs Babilòn, men on jou yo mèt-yo ka soté anlè tèlman yo té kontan. Poukwa sa ? Pas Jéova pousé Siris, wa a Lapèws fè on anons. Ki anons ésa ? Wa-la té sòti anonsé kè sé Juif-la té pé viré an péyi a yo pou woukonstwi kaz a Jéova, Bondyé a Izrayèl (Èsdr. 1:1, 3). Ou ka imajiné jan yo té kontan ! Alèla, yo té’é pé woukoumansé adoré vré Dyé-la kon i ka mandé adan péyi-la i té ba-yo la.

2. Lèwvwè sé prèmyé Juif-la rivé Jérizalèm, ki prèmyé biten yo mèt-yo ka fè ?

² Sé prèmyé Juif-la ki rivé Jérizalèm la rivé an 537 avan épòk an nou. Avan, sé Jérizalèm ki té kapital a wayòm a Jida. Lèwvwè yo rivé, yo pa pèd tan pou woukonstwi Tanp-la é an 536 avan épòk an nou, yo té ja fè fondasyon a Tanp-la.

3. Kimoun ki té kont sé Juif-la é ka sé moun-lasa fè sé Juif-la ?

³ Lèwvwè yo koumansé woukonstwi Tanp-la, sé moun-la ki té ka rété alantou a sé Juif-la té kont yo toubònman. Sé moun-lasa té ka « chèché dékourajé sé Juif-la é fè-yo pè pou yo arété konstwi [Tanp-la] » (Èsdr. 4:4). Malérèzman, sitiyasyon-la vin pli mové ankò. An 522, Awtagzèwsès vin nouvo wa a Lapèws *. Sé moun-la ki té kont sé Juif-la té ka pansé kè konm té ni on nouvo wa, yo té’é pé fè sé Juif-la arété travay-la yo té ka fè la asi Tanp-la. Pousa, yo té’é « sèvi èvè lwa-la pou fè moun soufè » (Sòm 94:20). Kifè, yo voyé on lèt ba wa-la pou di-y konsa kè sé Juif-la té vlé ba-y do (Èsdr. 4:11-16). Wa-la pran sa pou lajan-kontan, alò, i entèwdi sé Juif-la woukonstwi Tanp-la (Èsdr. 4:17-23). Akòz dè sa,  sé Juif-la té oblijé arété fè travay-la yo té ka fè la. Sa fè-yo pèd jwa a yo (Èsdr. 4:24).

4. Kijan Jéova réyaji lèwvwè yo té ka pèwsékité sé Juif-la ? (Izayi 55:11).

⁴ Adan péyi-la, té ni moun ki pa té ka adoré Jéova é yo é sèwten moun ki té adan gouvènman a Lapèws té byen désidé a fè sé Juif-la arété woukonstwi Tanp-la. Men li Jéova, i té byen désidé a fè sé Juif-la woukonstwi Tanp-la, é biten a Jéova toujou ka maché (li Izayi 55:11). Alò, i fè pwofèt Zakari vwè 8 vizyon ki té entérésan toubònman é i mandé-y ay rakonté sé Juif-la tousa i vwè la pou ankourajé-yo. Sé vizyon-lasa té’é édé sé Juif-la pou yo vwè kè yo pa té bizwen pè sé moun-la ki té ka pèwsékité-yo la, é sa té’é ankourajé-yo pou yo pé sa kontinyé fè travay-la Jéova té ba-yo fè la. Adan 5^èm vizyon-la, Zakari vwè on chandèlyé é 2 pyé-zoliv.

5. Ka nou ké vwè adan awtik-lasa ?

⁵ Sa ka rivé noutout dè santi-nou dékourajé. Alò, 5^èm vizyon-la Jéova fè Zakari vwè la pé ankourajé-nou pas Jéova sèvi èvè-y pou ankourajé sé Izraélit-la. Si nou ka konprann vizyon-lasa byen, sa pé édé-nou kontinyé sèvi Jéova é rété fidèl a-y lèwvwè nou ka jwenn pèwsékisyon, lèwvwè sitiyasyon an nou ka chanjé oben lèwvwè yo ka mandé-nou fè on biten é kè nou pa’a byen konprann poukwa yo ka mandé-nou fè sa.

6. Adan Zakari 4:1-3 nou ka touvé on vizyon ki ni on chandèlyé é 2 pyé-zoliv adan. Kijan vizyon-lasa ankourajé sé Juif-la ? (gadé imaj-la ki anlè po a jounal-la).

⁶ (Li Zakari 4:1-3.) Vizyon-la ki té ni chandèlyé-la é sé 2 pyé-zoliv-la adan ba sé Juif-la onlo kouraj pou yo té kontinyé travay a yo magré yo té ka pèwsékité-yo. Kijansa ? Ès ou rèmawké kè ni luil akontinyé adan chandèlyé-la ? Luil-la té ka sòti adan sé pyé-zoliv-la, é i té ka koulé adan on biten ki té ka sanm on bòl, é aprésa, luil-la ki té adan bòl-la té ka koulé adan sé 7 lanp-la chandèlyé-la té ni la, é grasa luil-lasa, sé lanp-la pa jen té ka étenn. Alò, Zakari mandé zanj-la ka sa vlé di é zanj-la ba-y on mésaj ki té ka vin dè Jéova é mi sa i di : « “Tout sé biten-lasa pé ké fèt ni grasa fòs a on lawmé, ni grasa puisans a lézòm, men grasa lèspri an mwen”, sé sa Jéova, Chèf a sé lawmé-la, ka di » (Zak. 4:4, 6). Luil-la ki té ka sòti adan sé pyébwa-la té ka rèprézanté lèspri sen a Jéova ki puisan toubònman é Jéova pa té ké jen arété ba-yo li. Lawmé a Lapèws té puisan, men sé té ti afè parapòt a lèspri a Jéova ki puisan toubònman. Konm Jéova té ka soutyenn sé moun-la ki té ka konstwi Tanp-la, yo té’é rivé fin travay-la i té ba-yo fè la magré sé moun-la té ka pèwsékité-yo. Mi on bèl mésaj mi ! Sa pou sé Juif-la té fè, sé mèt konfyans a yo an Jéova, é woupran travay-la pou i fè douvan. É sé sa yo fè, magré wa-la té entèwdi-yo fè travay-lasa.

7. Ki biten ki rivé ki édé sé moun-la ki té ka konstwi Tanp-la kontinyé travay a yo ?

⁷ Ni on biten ki fèt aprésa é sa édé sé Juif-la ki té ka konstwi Tanp-la toubònman. Ki biten ésa ? An 520 avan épòk an nou, Dariyis 1^é vin wa a Lapèws. 2 an apré i koumansé gouvèné, i dékouvè kè yo té entèwdi sé Juif-la woukonstwi Tanp-la, alòskè Siris té fè on lwa ki té ka pèwmèt-yo fè sa. Alò, i ba sé Juif-la lotorizasyon woukonstwi Tanp-la (Èsdr. 6:1-3). Lè sé moun-la tann sa, yo rété bouch gran wouvè. Men a pa sa tousèl wa-la fè. Non sèlman i di-yo kè yo pé woukoumansé konstwi Tanp-la, men i di sé moun-la ki té ka rété alantou a yo la arété mèt baton an wou a sé Juif-la, é i di-yo ba sé Juif-la  lajan é ba-yo tousa yo té bizwen (Èsdr. 6:7-12). Sé konsa, sé Juif-la fin travay-la an 515 avan épòk an nou, kivédi pétèt plis ki 4 an apré (Èsdr. 6:15).

8. Ka ki ké édé-w pou ou kontinyé ni kouraj lè ou ka jwenn pèwsékisyon ?

⁸ Jòdijou osi, ni onlo sèwvitè a Jéova ki ka jwenn pèwsékisyon. Pa ègzanp adan sèwten péyi, yo ka anpéché-nou adoré Jéova kon nou vlé. Dépawfwa, yo ka mèt frè é sè an nou lajòl, yo ka menné-yo douvan tribinal é sé on lokazyon pou frè é sè an nou ba sé otorité-la on témwanyaj (Mat. 10:17, 18). Défwa osi, lè on péyi ka chanjé gouvènman, sa pé ba sèwvitè a Jéova on favè. Dòt fwa osi, yo ka tonbé asi on jij ki janti é ki ka pran on désizyon ki ka pèwmèt-yo adoré Bondyé pli fasilman. Men ni dòt frè é sè ki ka jwenn dòt kalité éprèv. Yo ka viv adan on péyi yo pé sèvi Jéova kon yo vlé, men sèl biten ki an tèt a fanmi a yo ki pa Témwen, sé fè-yo arété sèvi Jéova é yo ka mèt bon présyon asi yo pou yo rivé fè sa (Mat. 10:32-36). Byensouvan onlo moun ki té ka éséyé anpéché fanmi a yo sèvi Jéova ka rann-yo kont kè yo pé’é jen rivé fè sa é yo ka arété pèwsékité-yo. É délè jous ni dé moun ki té ka pèwsékité Témwen a Jéova bon pèwsékité la ki vin Témwen a Jéova a tou a yo é yo ka pòté bon mannèv pou fè sa Jéova ka mandé-yo. Alò, si vou osi ou ka jwenn pèwsékisyon, pa lagé ! Fò ou ni kouraj. Jéova la ! I ké ba-w lèspri sen a-y pou édé-w. Alò, ou pa bizwen pè !

9. Lèwvwè sèwten Juif vwè fondasyon a nouvo Tanp-la, poukwa yo té tris ?

⁹ Lè yo fè fondasyon a nouvo Tanp-la, sèwten Juif ki té ni on bèl laj pléré (Èsdr. 3:12). Yo té vwè bèl Tanp-la Salomon té konstwi la é parapòt a Tanp-lasa, yo té ni lenprésyon kè nouvo Tanp-la ‘pa té ka sanm ayen konnyéla’ (Ajé 2:2, 3). Yo té tris, pas yo té ka konparé nouvo Tanp-la èvè ansyen Tanp-la. Men grasa vizyon-la Jéova té fè Zakari vwè la, yo pa té’é tris ankò. Tchè a yo té’é kontan. Kijansa ?

10. Kijan sé pawòl-la zanj-la di la an Zakari 4:8-10 édé sé Juif-la pou yo pa té tris ankò ?

¹⁰ (Li Zakari 4:8-10.) Mi sa zanj-la di sé Juif-la : « Yo ké kontan é yo ké vwè fil-a-plon-la an men a Zorobabèl [Juif-la ki té gouvènè-la] ». Ka sé pawòl-lasa té vlé di ? On fil-a-plon sé on zouti ou ka sèvi èvè-y pou vwè si on masonn oben ondòt biten byen dwèt. Sé pawòl-la zanj-la té di la té ka  montré pèp a Bondyé kè menmsi pou yo Tanp-lasa pa té ayen parapòt a Tanp-la Salomon té fè la, yo té’é fin konstwi-y é i té’é agou a tchè a Jéova pas yo té’é fè-y kon i té vlé. Si Jéova té kontan, poukwa yo pa’a té kontan ? Sa ki té pli enpòwtan pou Jéova sé kè yo adoré-y kon i té ka mandé adan nouvo Tanp-la. É si sé Juif-la té ka fè éfò pou fè sa, é si yo té ka fè éfò pou fè dé biten pou fè Jéova plézi, tchè a yo té’é kontan kon avan.

11. Ki biten ki pé rèd pou sèwten sèwvitè a Jéova jòdijou ?

¹¹ Lèwvwè sitiyasyon an nou ka chanjé, sa pa toujou fasil. Ni sèwten frè é sè ki rété lontan ka travay ba lòwganizasyon, é yo mandé-yo arété fè sa yo té ka fè la pou fè ondòt biten. Ni sa adan yo ki té misyonè, ki té ka konstwi batiman pou lòwganizasyon, ki té bétélit, oben ki té ka fè ondòt travay ankò. Ni dòt sèwvitè a Bondyé ki té ja ni on bèl laj é akòz dè sa, yo té oblijé arété fè on biten yo té ka fè adan lasanblé-la é kè yo té enmé. Lèwvwè sitiyasyon an nou ka chanjé konsa, sa toutafè nòwmal kè nou tris. Pétèt kè odépa nou pa’a byen konprann poukwa yo pran désizyon-lasa, é nou ni dimal a aksèpté-y. Pétèt osi kè vi-la nou té ni la avan ka manké-nou, é pétèt kè lè nou ka sonjé sa, nou ka santi-nou dékourajé pas nou ni lenprésyon kè konnyéla la, nou pé pa fè granzafè pou Jéova ankò (Pwov. 24:10). Men kijan vizyon-la Jéova fè Zakari vwè la ka édé-nou kontinyé ba-y sa nou ni dè méyè ?

12. Kijan vizyon-la Jéova fè Zakari vwè la pé édé-nou kontinyé ni tchè-kontan si sitiyasyon an nou chanjé ?

¹² Nou ké rivé fè kò èvè on sitiyasyon pli fasilman si nou ka éséyé vwè sitiyasyon-la kon Jéova ka vwè-y. Jòdijou, Jéova ka fè onlo biten èstraòwdinè toubònman, é nou, nou ka kolaboré èvè-y (1 Kor. 3:9). Sé on bèl lonnè toubònman. Pétèt kè avan, yo té ban-nou fè on travay pou Jéova men kè aprézan nou pa’a fè-y ankò. Men sa pa vlé di kè Jéova pa enmé-nou ankò. Alò, si ou adan on sitiyasyon konsa pas ni on chanjman ki fèt adan òwganizasyon a Jéova, é kè toutlè ou ka mandé-w poukwa yo fè chanjman-lasa, arété tèwbolizé lèspri a-w. Olyé ou règrété vi-la ou té ni la avan, priyé Jéova é mandé-y édé-w vwè ki bon biten sitiyasyon-la pé pòté ba-w (Ékl. 7:10). Olyé ou sonjé sa ou pé pa fè ankò, chèché a vwè tousa ou pé fè konnyéla la. Vizyon-la  Jéova fè Zakari vwè la ka montré-nou kè sa enpòwtan toubònman kè nou rété pozitif. Sa ké édé-nou kontinyé ni tchè-kontan é sa ka ké édé-nou rété fidèl.

13. Poukwa sèwten Juif té ka pansé kè a pa té on bon biten kè yo woukoumansé konstwi Tanp-la ?

¹³ Wa Awtagzèwsès té entèwdi sé Juif-la woukonstwi Tanp-la, é poutan, yo koumansé woukonstwi Tanp a Bondyé. Sé gran prèt-la Jéchoua (kivédi Joziyé), é Zorobabèl gouvènè-la, ki té antèt a travay-lasa (Èsdr. 5:1, 2). Pétèt kè sèwten Juif pansé kè a pa té on bon biten kè yo fè sa pas toutmoun té ké vwè-yo ka fè sa, é lènmi a sé Juif-la pa té’é lésé sa pasé. Yo té’é chèché tout kalté tim-tim bwasèk pou anpéché-yo réyalizé pwojé a yo. Sé pousa, fò Joziyé é Zorobabèl té sèten kè Jéova té ka soutyenn-yo. É Jéova rasiré-yo. Kijan i fè sa ?

14. Dapré Zakari 4:12, 14, kijan Jéova rasiré Joziyé é Zorobabèl ?

¹⁴ (Li Zakari 4:12, 14.) Adan pawti a vizyon-lasa, zanj-la ka di Zakari kè sé 2 pyé-zoliv-la ka rèprézanté sé 2 wen-la, Joziyé é Zorobabèl. Aprésa zanj-la ka di kè sé konsi sé 2 misyé-lasa té doubout douvan Jéova Sényè a toutlatè. Mi on bèl lonnè mi ! Jéova té ka fè-yo konfyans. Kifè, sélézòt Juif-la té pé fè Joziyé é Zorobabèl konfyans osi pas Jéova té ka sèvi èvè sé 2 misyé-lasa pou dirijé sé Izraélit-la.

15. Ka nou pé fè pou nou montré kè nou vlé Jéova gidé-nou ?

¹⁵ Jòdijou Jéova ka kontinyé gidé pèp a-y. Pousa, i ka sèvi èvè Pawòl a-y Labib. Adan liv-lasa ki sakré, i ka èspliké-nou kijan pou nou adoré-y. Kijan nou pé montré Jéova kè sa i ka mandé-nou fè adan Pawòl a-y ni onlo valè pou nou ? Fò nou pran tan li-y, é fò nou chèché a konprann sa i ka di-nou osi. Mi sa pou-w mandé-w : « Lè an ka li Labib oben on piblikasyon an nou, èskè an ka pran tan réfléchi asi sa an ka li ? Lè an ni dimal a konprann on biten adan Bib-la, ès an ka fè tousa an pé pou rivé konprann-li ? Oben ès an ka enn li pou li san chèché a konprann sa an ka li ? » (2 Pyè 3:16). Si nou ka pran tan réfléchi asi sa Jéova ka anségné-nou, nou ké pé suiv sa i ka mandé-nou pli fasilman é nou ké fè travay a prédikasyon an nou byen konm i fo (1 Tim. 4:15, 16).

16. Lèwvwè èsklav fidèl é prévwayan la ka ban nou on dirèksyon é kè nou ni dimal a suiv dirèksyon-lasa, ka ki pé édé-nou ?

 ¹⁶ Jéova ka sèvi osi èvè « èsklav fidèl é prévwayan la » pou ban-nou on dirèksyon jòdijou (Mat. 24:45). Men dépawfwa, sa pé rivé kè nou pa’a konprann poukwa yo ka mandé-nou fè on sèwten biten. Pa ègzanp, yo pé di-nou ka pou nou fè pou nou préparé-nou sianka on katastròf ka vin, é pétèt kè an tèt an nou, nou ka di-nou kè kalité katastròf-lasa pé’é jan fèt la nou ka rété la. Oben pétèt kè nou ka di-nou kè sa lèsklav ka mandé-nou fè la pannan pandémi-la on jan two rèd. Men a moman-lasa, ka pou nou fè ? An-nou pran tan sonjé ki byenfé sa pòté ba sé Juif-la lèwvwè yo kouté sa Joziyé é Zorobabèl té di-yo fè. An-nou pran tan réfléchi osi asi dòt istwa adan Labib kè nou ni lokazyon li. Dépawfwa, yo ba sèwvitè a Bondyé on dirèksyon, é ni moun ki té’é pé pansé kè a pa té on bon lidé, men anfinaldikont sé sa ki sové vi a onlo moun (Jij 7:7 ; 8:10).

17. Vizyon a chandèlyé-la é a sé 2 pyé-zoliv-la aji anlè sé Juif-la. Kijansa ?

¹⁷ Pétèt kè 5^èm vizyon-la Jéova fè Zakari vwè la pa diré tèlman lontan, men i édé sé Juif-la kontinyé pòté bon mannèv pou yo té pé fè travay-la Jéova té ba-yo fè la, é pou yo té pé adoré Jéova byen konm i fo. É lèwvwè yo mèt sa vizyon-la aprann-yo la an pratik, yo rann-yo kont kè Jéova té ka soutyenn-yo é kè i té ka gidé-yo. Jéova sèvi èvè lèspri sen a-y ki puisan toubònman pou édé-yo woukoumansé konstwi Tanp-la é pou édé-yo ni tchè-kontan kon avan (Èsdr. 6:16).

18. Kijan vizyon a Zakari pé aji asi vi an nou ?

¹⁸ Vizyon a chandèlyé-la é a sé 2 pyé-zoliv-la pé aji asi vi a-w toubònman. Kon nou vwè-y adan awtik-lasa, i pé ba-w fòs lèwvwè ou ka jwenn pèwsékisyon, i pé ba-w tchè-kontan menmsi sitiyasyon a-w ka chanjé, é i pé édé-w fè èsklav fidèl é prévwayan la konfyans lèwvwè yo ka ba-w on dirèksyon é kè ou ni dimal a suiv dirèksyon-lasa. Alò, lèwvwè ou ka jwenn on sitiyasyon konsa, ka pou-w fè ? Dabò pou yonn, fò ou kontinyé gadé sa Zakari vwè, kivédi sé prèv-la ki ka montré kè Jéova ka pran swen a pèp a-y. Fè Jéova konfyans é kontinyé adoré-y èvè tout tchè a-w (Mat. 22:37). Konsa, ou ké montré kè ou ka tchenn kont dè sé prèv-la ou ka vwè la. Si sé sa ou ka fè, Jéova ké édé-w sèvi-y èvè tchè-kontan pou touttan (Kol. 1:10, 11).