1. Babilonant koidi aslole Judev kosli bori khobor aikon khuxal zale?

 KHUB vorsam porian Babilonant koidi aslolea Israelitkarank ek bori khobor aikonk mellʼlli. Jehova Devan, ‘Persiechea Raza Sirusak sfurti dili vo Israelitkarank soddounk tachea monant ghatlem.’ Ani Judevamnim porot aplea ganv-ghora vochon thoim “Sorvesporak, Israelachea Devak, ek Mondir bandchem” mhunn tannem sanglem. (Ezra 1:1, 3) Hi khobor aikon Judev lok ekdom khuxal zalo. Karonn tim porot Jehovan tankam dilolea desant vochon tachi bhokti korunk xoktalim.

2. Jerusalem-ant pavtoch koidi aslolea Judevamnim sogleam-von poilim kitem kelem?

² 537 K.X.A.-ant, koidi aslolea Judevancho ek poilo zomo, Juda raxttrachi rajdhani, tem mhunnttlear Jerusalem-ant ailo. Thoim pavtoch tannim rokddench mondir bandpachem kam suru kelem ani 536 K.X.A.-ant tannim tachi buniad ghatli.

3. Judevank konnem virodh kelo, ani koso?

³ Judevamnim devmondir bandpachem kam suru kelem tednam tankam her lokancho virodh ailo. Bhonvtonnchea raxttrantle lok, “tem Mondir bandina zaunk . . . Judachea lokanchem kalliz moddunk ani tankam bhenkddaunk bhair sorlo.” (Ezra 4:4) Titlench nhoi, punn poristhiti anik bigoddli. 522 K.X.A.-ant Artaxerxes, Persiecho novo raza zalo tednam hem kam bond korunk hi ek bori sondhi asli mhunn Juda lokanchea dusmanamnim polloilem. * Ani ‘kaideachea nanvan onit korunk’ tannim proitn kelo. (St. 94:20) Hem  korunk tannim Razak, Judache lok tachea add voitat mhunn sangonk ek chitt boroili. (Ezra 4:11-16) Ani razan tancheo fotti manun ghetleo ani devmondir bandpachea kamacher bondi ghatli. (Ezra 4:17-23) Tor Judachea lokamnim khuxalkaien suru kelʼlem kam atam bond poddlem.—Ezra 4:24.

4. Virodheamnim devmondir bandpachem kam bond kelem tednam Jehovan kitem kelem? (Izaias 55:11)

⁴ Jehovachi bhokti korinasle te lok ani Persiechea razache thodde odhikari, devmondir bandpachem kam samkench bond uddounk sodhtale. Punn aplea lokamnim devmondir porot bandlolem Jehovak zai aslem. Ani Jehova sodanch aplo udʼdhex purnn kortach. (Izaias 55:11 vachat.) Tor Jehovan, Zekariak aplo provadi mhunn vinchun kaddlo ani taka att ojapachim dorxonam dakhoilim. Uprant Zekarian tim dorxonam Judachea lokank sanglim ani tantuntlean tankam dhir mellʼllo. Tea dorxonam udexim tannim virodheank bhieunchi kainch goroz nasli, punn nettan devmondir porot bandpachem kam korunk fuddem soronk zai aslem mhunn tankam kollon ailem. Jehovan Zekariak dakhoilʼlea panchvea dorxonant diveachem ek pedd ani zoitunachim don zhaddam aslim.

5. Hea lekhant ami kitem xiktolim?

⁵ Jehovan Zekariak dakhoilʼlea panchvea dorxonantlean Israelitkarank urba mellʼlli. Teach bhaxen ami niraxi zatat tednam, zoxem amkam virodh ieta tednam, amchi poristhiti bodolta tednam, ani amkam melltta tem margdorxon amkam somzona tednam, Jehovachi seva visvaxiponnan korit ravonk amkam hea dorxonantlean urba mellttoli.

6. Zekaria 4:1-3-ant sanglolea diveachem pedd ani zoitunachea don zhaddanchea dorxonam thaun Judevank koso dhir mellʼllo? (Masikachem fuddlem chitr polloiat.)

⁶ Zekaria 4:1-3 vachat. Zekarian dorxonant ek diveachem pedd ani tachea kuxik don zoitunachim zhaddam polloilim. Tea zoitunachea zhaddam thaun tel bhair soron eka vatteant ektthaim zatalem. Ani tea vattea thaun tea peddachea sat-ui diveank tem tel pavtalem. Hea toren te sat-ui dive pettot urtale. ‘Hea vostuncho orth kitem?’ mhunn Zekarian vicharlem tednam, ainzan Jehova thaun ho sondex dilo: “Bollan nhoi, podven nhoi, punn Mhojea Atmean - uloita to Sorvsoktivont Sorvespor!” (Zek. 4:4, 6) Tor hea dorxonantlean Israelitkarank dhir koso mellʼllo? Tea diveachea peddak thambonastana zoitunachem tel mellttalem, teach toren, Jehovachi povitr xokti thambonastana tankam mellonk xokta mhunn hea dorxonam thaun kollon ailem. Toxench, Persiechi razvottki kitli-i bollixtt asum, Jehovache povitr xokte mukhar ti kainch nhoi mhunn tannim ugddas dovrunk zai aslo. Tor tanchea kamank virodh aslear pasun, Jehovacher patieun Judev devmondirachem bandkam korit ravonk xoktat mhunn tankam urba mellʼlli. Ani bondi aslear pasun tannim toxench kelem.

7. Koslo bodol ailolean Judevank devmondir bandpachem kam sompounk modot zali?

⁷ 520 K.X.A.-ant, Darius I, Persiecho novo raza zalo tednam ek bodol ailo. Tachea razvottkechea dusrea vorsak, devmondir bandpachea kamacher ghatloli bondi kaidea bhair asli mhunn taka kollon ailem. Tor tannem tem kam porot suru korunk sanglem. (Ezra 6:1-3) Hi khobor ojapachi asli! Titlench nhoi punn tannem bhonvtonnchea raxttrank tankam virodh korcho bond korunk ani tankam poixe ani goroz teo sogleo vostu diunk sanglem. (Ezra 6:7-12) Ani hea pasot panch vorsam bhitor, tem mhunnttlear, 515 K.X.A.-ant devmondir bandpachem kam Judevamnim sompoilem.—Ezra 6:15.

8. Virodh ailear pasun ami dhiran tacho fuddo kiteak korunk xoktat?

⁸ Aiz pasun, amchea modlea zaiteank virodhacho fuddo korcho poddtta. Punn tednam ek bodol ieunk xokta. Udharonnak, thoddea desamnim amchea kamacher bondi asa. Punn  thodde pavtti tea zagear sorkar bodolta tednam amkam ghoddie Jehovachi bhokti korunk sompem zaunk puro. Toxench, tea desamnim amchea bhavank dhorun ‘odhikariam ani razam fuddem vhortat.’ (Mt. 10:17, 18) Punn tea vellar eka neai korpean boro nirnnoi ghetlolean, amchim bhav-bhoinnam ghoddie ukteponnim Jehovachi bhokti korunk xoktat. Tea bhair, thoddea desamnim amchea kamacher bondi na astoli punn zaitea Sakxeank aplea familintlea sodoxiam thaun vo soiream thaun virodh soscho poddtta. (Mt. 10:32-36) Punn tea vellar Jehovachi bhokti korop tim soddun dinant dekhun, virodh korpi zaite pavtti virodh korop bond korunk xoktat. Thoddim bhav-bhoinnam zankam adim khub virodh soscho poddlo tim aiz Sakxi zaun asat ani urben Jehovachi seva kortat. Tor amcher koslo-i virodh ieum Jehova aplea bollixtt povitr xokte udexim amkam modot korta dekhun ami bhieunchim nant, fatti sorchimnant punn dhiran tacho fuddo kortolim.

9. Novea devmondirachi buniad ghatli tednam Judevam modle thodde zanntte kiteak roddle?

⁹ Novea devmondirachi buniad ghatli tednam Judevam modle thodde zanntte roddonk lagle. (Ezra 3:12) Karonn Solomonan bandlolem devmondir kitlem sobit aslem tem tannim polloilolem. Ani atam hem devmondir tachea mukhar ‘kainch nhoi koxem’ tankam dislem. (Hag. 2:2, 3) Tor te adlea devmondirak, hea devmondira sangata sor korunk lagle. Punn Zekarian polloilʼlea dorxonantlean tanchem niraxiponn pois korunk tankam modot zali. Koxi?

10. Zekaria 4:8-10-nt devdutan sanglolea utrantlean, Judevank aplem niraxiponn pois korunk koxi modot zali?

¹⁰ Zekaria 4:8-10 vachat. Hea dorxonant devdut sangta: ‘Jerubbabelachea hatant konnxea-sondhicho fator [ollombo, NW] polletolim tednam Judev lok sontosan murgottʼttole.’ Ollombo bandkamant uzar kortat toslem ek sadhon asa, jea udexim ek vost nitt ubi asa kai na tem topastat. Tor devdutachea utrantlean Devachea lokank urba koxi mellʼlli? Judevancho razpal, Jerubbabelachea hatant ollombo polloun tankam hi khatri mellʼlli, ki atanchem devmondir poilinchea devmondira itlem borem na oxem thoddeank disot, punn tem Jehovachea dorjeam pormonnem astolem ani te tem devmondir porot bandun kaddttole. Tor Jehova hem devmondir polloun khuxal zata zalear, te pasun khuxal zaunk xoktale. Karonn hea devmondirant te kortat ti bhokti Jehovachea dorjeam pormonnem astoli asli ani tem Jehovak chodd mhotvachem aslem. Tor tim Jehovak manvota tosli bhokti korit ravtat zalear tim porot khuxal zaunk xoktalim.

11. Aiz Jehovachea thoddea sevokank kitem korunk kotthin zait?

 ¹¹ Amchea jivitant pasun thodde bodlav ieunk xoktat. Zoxem, zaito temp porian khas purnn vellachi seva kortolea thoddea zannank dusre torechi seva korunk nemleant astolim. Toxench aple piraiek lagon, apleak avoddtta ti zobabdari pallunk thoddeank bond korchi poddli astoli. Oxem ghoddtta tednam to bodlav manun gheunk zaiteank kotthin zait. Karonn he bodlav kiteak zatat tem ghoddie poilim amkam somzona astolem ani hea pasot ami niraxi zaunk puro. Toxench, atam poros poilim kitlem borem aslem oxem pasun amkam disonk puro. Ani atam ami Jehovak amchea boreantlem borem diunk xokchimnant oxem ami chintʼtat astolim. (Mho. 24:10) Tor oxem ghoddtta tednam Zekariachea dorxonantlean Jehovak amchea boreantlem borem diunk koxi modot zaunk xokta?

12. Amchi poristhiti bodolta tednam niraxi zaina zaunk Zekariachem dorxon amkam koxem modot korunk xokta?

¹² Amchea poristhitint bodol zata tednam Jehova ti poristhiti koso polloita tea bhaxen ami pollounk zai. Oxem korunk, poilem, Jehova aplo udʼdhex purnn korta toso, tachea sangata kam korchi amkam ek sondhi asa mhunn ami ugddas dovrunk zai. (1 Kor. 3:9) Dusrem, amchi poristhiti bodlot, punn amchea pasot Jehovacho mog kednanch bodolna mhunn ami visronk zaina. Tisrem, to bodol kiteak zala tea vixim ami chintit ravchem nhoi. Ani chovtem, ‘adlea kallache dis’ bore asle vo tednam korunk zatalem tem aiz amchean korunk zaina, oxem chintchea bodlek, zo bodol zala tantunt kitem borem asa ani ami kitem korunk xoktat tacher dhean diunk ami Jehova lagim magnnem korunk zata. (Up. 7:10) Hea toren, ami Zekariachea dorxonam thaun hem xiktat ki amchi poristhiti bodolʼlear pasun ami sarkem chintop dovorlem zalear, ami Jehovachi seva khuxalkaien korunk xoktat ani taka visvaxi ravonk xoktat.

13. Devmondir porot bandpacho nirnnoi sarko naslo mhunn thoddea Judevank kiteak dislem astolem?

¹³ Devmondir bandpachea kamacher bondi asli. Tori astana fuddakar gheupi, Porom-Iadnik Joshuan ani Razpal Jerubbabelan “Devachem Mondir novean bandunk suru kelem.” (Ezra 5:1, 2) Ho nirnnoi sarko naslo mhunn thoddeam Judevank ghoddie dislem astolem. Karonn devmondir bandtat, tem dusman pollounk xoktale ani tem kam bond korunk te apnnachean zata tem soglem kortole asle. Tor hea pasot, hea kamak Jehova tankam tenko ditolo mhunn Joshuak ani Jerubbabelak khatri zai asli. Hi khatri tankam koxi mellʼlli?

14. Zekaria 4:12, 14 pormonnem, Porom-Iadnik Joshua ani Razpal Jerubbabelak kosli khatri mellʼlli?

 ¹⁴ Zekaria 4:12, 14 vachat. Hea dorxonant sanglolim don zoitunanchim zhaddam, “dog obhixek kelʼle monis” tem mhunnttlear, Joshua ani Jerubbabel zaun asat mhunn devdutan Zekariak sanglem. Te dogui eka orthan, ‘soglea sonvsarachea Sorvesporachea [mhunnttlear Jehovachea, NW] kuxik ube asle.’ Ho tankam kitlo vhoddlo man aslo! Hantuntlean Jehovak tancher visvas aslo mhunn kollon ieta. Tor Israelitkaramnim pasun, Joshua ani Jerubbabel ghetat tea nirnnoiancher visvas dovrunk zai aslo. Karonn Jehova tankam margdorxon ditalo.

15. Bible-antlean amkam melltta tea margdorxonak ami man ditat mhunn ami koxem dakhounk zata?

¹⁵ Aiz Jehova aplea lokank margdorxon diunk uzar korta ti ek vatt mhunnttlear tachem Utor, Bible. Jehovak manta te ritin ami tachi bhokti koxi korunk zata tem to amkam Bible-antlean sangta. Tor Bible-antlean amkam melltta tea margdorxonak ami man ditat mhunn ami koxem dakhounk zata? Ami Bible bore bhaxen vachunk ani to somzonk vell gheunk zai. Ami amkanch vicharunk zata: ‘Hanv Bible vo Bible-acher adarit khoinchem-i prokaxon vachta tednam hanv voilea-voir vachta kai vo tem vachlea uprant hanv tacher niall korunk vell kaddtta? “Somzunk avghodd kai vixoi” mhaka mellttat tednam tacho orth sodhunk hanv proitn korta kai?’ (2 Ped. 3:16) Tor Jehova amkam xikoita tacher ami niall kortat tednam ami tachem margdorxon pallunk pavtolim ani porgottnechem kam korit ravonk pavtolim.—1 Tim. 4:15, 16.

16. ‘Visvaxi ani xannea chakra’ udexim melltta tem margdorxon amkam purnn toren somzona zalear pasun tem pallunk amkam koxi modot zatoli?

¹⁶ Jehova amkam anik ek vatten margdorxon dita. Tem mhunnttlear ‘visvaxi ani xannea chakra’ udexim. (Mt. 24:45) Punn thodde pavtti hea chakra koddlean melltta tem margdorxon amkam purnn toren somzona. Udharonnak, thodde pavtti eka odruxttak ami koxem toiar ravonk zata tea vixim amkam umkeoch suchounneo mellot. Punn tem odruxtt amchea vattarant kednanch zaunchem na oxem amkam disot. Vo voxeachi pidda posorta tednam surokxit ravonk amkam te porot-porot suchounneo diunk xoktat. Tea vellar te amkam chodduch chotrai dovrunk laitat vo te ditat teo suchounneo xanneponnacheo nhoi oxem amkam dista zalear ami kitem korunk zata? Joshua ani Jerubbabela koddlean mellʼllolem margdorxon Israelitkaramnim pallʼllem tednam tankam koso faido zalo tea vixim ami chintunk zata. Toxench, Bible-ant ami vachlolea her ghoddniam vixim ami chintunk zata. Thodde pavtti Jehovachea lokank mellʼllem tem margdorxon munxanche nodren pixemponn  koxem dislem astolem. Punn tannim tem pallʼllem tednam tancho jiv salvar zalo.—Fudd. 7:7; 8:10.

17. Zekarian polloilʼlea panchvea dorxonam udexim Judevancher koslo porinnam zalo?

¹⁷ Zekarian polloilʼlem panchvem dorxon ghoddie lhan aslem zait. Punn tea dorxona udexim Judev lokank aplem kam ani bhokti korunk urba mellʼlli. Tea dorxona thaun tim xiklim tem tannim apnnailem tednam, Jehova koso tankam mogall ritin tenko ani margdorxon dita tem tannim polloilem. Ani aple bollixtt povitr xokte udexim tanchem kam korit ravonk, ani tankam apli khuxalkai porot mellonk Jehovan tankam modot keli.—Ezra 6:16.

18. Zekariachea dorxona thaun xiklolim lisanvam tumi tumchea jivitant koxim apnnaunk xoktat?

¹⁸ Zekarian polloilʼlem diveachem pedd ani don zoitunachea zhaddanchea dorxona thaun amchea jivitant apnnaunk ami zaitim lisanvam xikonk pavlim. Zoxem, amcher virodh ieta tednam ami tacho dhiran koso fuddo korunk zata, amchi poristhiti bodolta tednam ami khuxalkai koxi samballunk zata, ani amkam melltta tem margdorxon amkam somzona tednam pasun ami tacher visvas koso dovrunk zata. Tor amchea jivitant oddchonneo ietat tednam ami kitem korunk zai? Zekarian tea dorxonant polloilʼlem toxem, Jehova aplea lokanchi koxi kallji gheta tacher ami dhean diunk zai. Oxem kelolean tumi Jehovachi bhokti purnn kallzan korit ravonk pavtolim ani tachi seva sasnak khuxalkaien korunk to tumkam modot kortolo.—Mt. 22:37; Kol. 1:10, 11.