1. Muaj tej yam zoo zoo twg uas cov Yudais tos ntsoov?

 TXHUA leej txhua tus zoo siab kawg nkaus li. Vajtswv Yehauvas “tshoov Xailas siab” kom tso cov Yixalayees los sis Ixayees uas poob cev qhev rau tim Npanpiloos rov qab mus vaj mus tsev. Tsis tas li ntawd, huab tais Xailas tau tshaj kom cov Yudais “rov mus txhim kho [Yehauvas] uas yog cov Yixalayees tus Vajtswv lub Tuamtsev dua tshiab.” (Exalas 1:1, 3) Qhov no txhais hais tias, txhua leej txhua tus yuav tau rov qab mus pe hawm Yehauvas dua hauv lawv lub tebchaws.

2. Thaum cov Yudais rov los txog hauv Yeluxalees, lawv txhim kho tau dab tsi?

² Nyob rau xyoo 537 ua ntej Yexus yug, cov neeg uas poob cev qhev txawm rov los txog hauv lub nroog Yeluxalees. Cov Yudais no txawm fab taws ntsos pua lub plag tse ntawm lub tuam tsev tiav tau tag nrho rau xyoo 536 ua ntej Yexus yug.

3. Cov Yudais raug tawm tsam li cas?

³ Thaum cov Yudais pib txhim kho lub tuam tsev, lawv txawm raug tej neeg ob cag tawm tsam tsis tseg tsis tu. Cov tib neeg ntawd “pheej nrhiav kev hem thiab ua kom cov neeg [Yudas] qaug zog tsis txhob txhim kho lub Tuamtsev.” (Exalas 4:4) Txawm lawv ua npaum li no rau cov Yudais los haj tseem tsis txaus lawv siab, lawv tseem tsub kev phem heev zuj zus ntxiv. Nyob rau xyoo 522 ua ntej Yexus yug, txawm muaj dua ib tug huab tais Pawxias tshiab uas yog Ataxawxes sawv los kav. b Tej neeg tawm tsam cov Yudais xav zoj hais tias zoo caij zoo nyoog rau lawv los mus txwv tuag nthi kom tsis txhob ua tau lub tuam  tsev. (Phau Ntawv Nkauj 94:20) Lawv txawm mus nkawg xaiv rau Huab Tais Ataxawxes tias cov neeg Yudais sawv tawm tsam nws. (Exalas 4:11-16) Huab tais txawm mloog lawv tej lus dag thiab txwv tsis pub leej twg ua lub tuam tsev ntxiv lawm. (Exalas 4:17-23) Vim huab tais txwv li no, cov Yudais thiaj tseg ntua tsis txhim kho lub tuam tsev.​—Exalas 4:24.

4. Tom qab cov tib neeg tawm tsam txwv tsis pub ua lub tuam tsev, Yehauvas ua li cas xwb? (Yaxayas 55:11)

⁴ Cov tib neeg uas tsis pe hawm Yehauvas thiab Pawxias ib co nom tswv ua zaj ua ntxeev txwv tsis pub kho lub tuam tsev. Tiam sis Yehauvas xav kom cov Yudais ua kom tau lub tuam tsev. Yehauvas tau hais li cas lawm yeej yuav muaj li ntawd. (Nyeem Yaxayas 55:11.) Yog li ntawd, Yehauvas thiaj li tsa muaj ib tug cev nws lus hu ua Xakhaliyas. Tus cev Yehauvas lus no muaj siab loj siab tawv thiab nws yuav qhia 8 zaj yog toog los mus txhawb cov Yudais lub zog. Cov yog toog no txhawb tau cov Yudais lub zog kom ua siab loj siab tawv txhim kho lub tuam tsev thiab tsis txhob ntshai tej neeg tawm tsam lawv. Nyob rau zaj yog toog 5, Xakhaliyas pom ib tug ncej txawb teeb thiab ob tsob txiv ntoo roj.

5. Nyob rau zaj kawm no, yuav piav txog dab tsi?

⁵ Muaj qee lub caij lub nyoog, peb tsis muaj siab ua ib yam dab tsi li. Nyob rau hauv Xakhaliyas zaj yog toog 5, qhov uas Yehauvas txhawb cov Ixayees kuj pab tau peb thiab. Yog hais tias peb nkag siab zaj yog toog no lawm, yuav pab peb kov yeej tej yam kev tawm tsam peb raug, thaum peb lub neej hloov mus hloov los, thiab thaum hais kom ua ib yam twg paub tsis tshab.

6. Zaj yog toog uas hais txog tus ncej txawb teeb thiab ob tsob txiv ntoo roj uas hais nyob hauv Xakhaliyas 4:1-3, txhawb tau cov Yudais li cas? (Saib daim duab ntawm lub khaum.)

⁶ Nyeem Xakhaliyas 4:1-3. Zaj yog toog txog tus ncej txawb teeb thiab ob tsob txiv ntoo roj txhawb tau cov Yudais lub dag lub zog kawg nkaus tab txawm lawv raug tawm tsam. Ua cas ho txhawb tau lawv? Vim tus ncej txawb teeb ntawd muaj roj ntws los tsis so li. Muaj ob tsob txiv ntoo roj pheej ywg roj ntws los mus rau saum lub tais cug roj ces cov roj mam li si los mus rau saum tus ncej txawb teeb uas muaj xya lub teeb. Cov roj no ua rau tej nplaim teeb cig tsis txawj tuag li. Xakhaliyas nug hais tias: “Tej no yog piv txog dab tsi?” Tus tub txib saum ntuj siv Yehauvas cov lus teb li no: “Tsis yog qhov uas koj muaj tubrog coob lossis koj lub zog, tiamsis yog kuv [lub hwj huam] lub hwjchim xwb.” (Xakhaliyas 4:4, 6) Cov roj ntws ntawm ob tsob ntoo piv txwv txog Yehauvas lub hwj huam dawb huv. Yehauvas yeej yuav pub nws lub hwj huam dawb huv tsis tseg tsis tu. Yog li ntawd, Yehauvas muaj zog tshaj tag nrho cov Pawxias tej tub rog txuam ua ke. Yog muaj Yehauvas pab lawv ua lub tuam tsev lawm, cov neeg tawm tsam yeej yuav kov tsis yeej. Tej lus no txhawb zog tiag tiag li. Qhov uas cov Yudais ua tsuas yog tso siab rau Yehauvas thiab rov mus txhim kho lub tuam tsev. Lawv thiaj li mus ua raws nkaus li ntawd tab txawm tej neeg ob cag yuav txwv npaum li cas.

7. Muaj dab tsi txawv txav thiaj pab tau cov Yudais ua lub tuam tsev?

⁷ Muaj dab tsi txawv txav thiaj pab tau cov Yudais ua lub tuam tsev? Tom qab no muaj dua ib tug huab tais npe hu ua Dali-us tus 1 sawv los kav. Thaum nws kav tau 2 xyoos, uas yog xyoo 520 ua ntej Yexus yug, nws mam li paub tseeb tias qhov uas luag txwv tsis pub ua lub tuam tsev tsis raws kev cai lawm. Dali-us thiaj li tshaj xo rau kom lawv kav tsij muab lub tuam tsev ua kom tiav. (Exalas 6:1-3) Thaum huab tais tshaj tawm li no, ua rau sawv daws yoob tas li. Tsis tas li ntawd, huab tais tsis yog hais  kom txhim kho lub tuam tsev xwb, nws haj tseem hais kom tej neeg ob cag tsis txhob cuam tshuam tiam sis pab nyiaj pab txiaj, thiab tej uas cov Yudais xav tau coj los txhim kho lub tuam tsev. (Exalas 6:7-12) Yog li ntawd, cov Yudais siv yuav luag 5 lub xyoos thiaj ua tiav lub tuam tsev rau xyoo 515 ua ntej Yexus yug.​—Exalas 6:15.

8. Thaum muaj lwm tus tawm tsam, ua li cas peb ho tsis txhawj ntshai?

⁸ Niaj hnub niam no, Yehauvas Cov Tim Khawv yeej raug ntau yam kev tawm tsam. Xws li nyob rau tej lub teb chaws, tej nom tej tswv txwv peb tes hauj lwm mus tshaj tawm txoj moo zoo. Muaj coob leej kwv tij ntseeg raug ntes coj “mus kom ntawm tej tswv xeev thiab tej vaj ntxwv.” (Mathais 10:17, 18) Tej thaud, cov ntseeg raug khuav ntev loo mus txog thaum luag hloov dua nom tshiab ces lawv mam li dim. Los sis ho muaj tej tug txiav txim coj ncaj es ho muab lawv tso tawm. Tsis tas li ntawd, nyob rau tej lub teb chaws, Yehauvas Cov Tim Khawv teev tiam Yehauvas kaj siab lug tso siab plhuav tiam sis lawv tsev neeg los sis tej nruab ze ho ua nruj ua tsiv rau lawv. (Mathais 10:32-36) Muaj ntau zaus thaum tej nruab ze xam pom hais tias tej yam lawv ua nruj ua tsiv rau peb tsis muaj qab hau dab tsi ces lawv kuj muab tso tseg lawm thiab. Muaj tej txhia nruab ze ua ntuj liab teb ntsuab tiam sis tom qab no lawv kuj hloov siab los ntseeg Yehauvas lawm thiab. Nco ntsoov ua siab loj thaum raug ib yam kev tawm tsam twg. Tsis txhob ntshai kiag li, Yehauvas yeej muab nws lub hwj huam dawb huv los pab peb ntshawv ntshis.

9. Vim li cas ib txhia Yudais ho quaj thaum lawv pom luag pua lub tuam tsev lub plag tse?

⁹ Cov Yudais uas laus lawd quaj quaj thaum luag pua lub tuam tsev lub plag tse. (Exalas 3:12) Cov laus ntawd muab lub tuam tsev thaum ub Xalumoos ua thiab lub niam no sib piv, lawv pom tau tias lub no zoo tsis cuag li lub thaud. (Hakais 2:2, 3) Lawv txawm tag kev cia siab. Yog li ntawd, Xakhaliyas zaj yog toog cuab tau lawv lub zog li cas?

10. Raws li Xakhaliyas 4:8-10, tus tub txib saum ntuj txhawb cov Yudais li cas kom txhob tag kev cia siab?

¹⁰ Nyeem Xakhaliyas 4:8-10. Thaum tus tub txib saum ntuj hais tias cov Yudais yuav muaj kev zoo siab thaum lawv pom txoj hlua ntsuas tsev ntawm tus tswv xeev Xelunpanpees  txhais tes, txhais li cas tiag? Txoj hlua ntsuas tsev yog siv los mus ntsuas ib yam twg kom ncaj ncaj. Tus tub txib saum ntuj cov lus yog los mus txhawb Vajtswv cov tib neeg kom nco ntsoov tias lub tuam tsev sawv daws pom ntawd tsis zoo npaum li lub qub los yeej yuav muab kho kom tiav thiab yuav zoo ib yam li Yehauvas lub siab nyiam. Yog tias Yehauvas twb txaus siab ces lawv yuav tsum txaus siab thiab. Qhov tseem ceeb uas Yehauvas xav tau yog lawv txoj kev teev tiam nws nyob rau hauv lub tuam tsev tshiab no. Yog cov Yudais rau siab ntso teev tiam Yehauvas raws li nws lub siab nyiam ces lawv yeej yuav rov muaj kev zoo siab li qub.

11. Niaj hnub niam no, muaj qho yam twg nyuaj rau Yehauvas cov tib neeg?

¹¹ Thaum peb lub neej hloov mus hloov los mas nyuaj kawg nkaus li. Xws li, thaum peb tes hauj lwm puv ntoob uas tshwj xeeb hloov lawm. Hos muaj ib txhia ces hnub nyoog nchav lawm yuav tau los so. Tej thaum hloov li no mas ua rau peb nyob mluas mlob. Nyob rau hauv peb lub siab lub ntsws mas twb tsis xav tseg tej hauj lwm no kiag li. Ntev mus ntev tuaj peb txawm xav tias peb tsis tsim txiaj dab tsi rau Yehauvas hlo. (Pajlug 24:10) Ua li ntawd, Xakhaliyas zaj yog toog ho pab tau peb kom peb ua tau npaum li peb ua tau rau Yehauvas li cas?

12. Thaum peb tes haujlwm hloov, Xakhaliyas zaj yog toog pab tau peb kom tsis txhob nyob mluas mlob li cas?

¹² Yog peb xav ib yam li Yehauvas xav ces yuav yooj yim dua rau peb thaum ib yam twg hloov hauv peb lub neej lawm. Nco ntsoov tias tes hauj lwm no yog Yehauvas tes hauj lwm, peb tsuas cev tes pab qho yam kom tiav. (1 Kauleethaus 3:9) Muaj tej zaud, peb pab qhov no tag peb yuav tau mus pab qhov tod los Yehauvas txoj kev hlub tshua peb tseem nyob li qub. Txawm hais tias peb tes hauj lwm hloov lawm los, tsis txhob xav ntau ntau. Tsis txhob tshua tshua txog lub neej “yav tas los” lawm tiam sis cia li thov kom Yehauvas pab peb xav rau qhov zoo. (Tej Lus Qhia 7:10) Tsis txhob zaum tsaws xav txog tej yam uas peb ua tsis tau lawm tiam sis cia li xav txog tej yam peb haj tseem yuav ua tau. Nyob rau hauv Xakhaliyas zaj yog toog, peb khaws tau tias yuav tau xav txog qhov zoo. Thaum peb xav txog qhov zoo, yuav pab tau peb muaj kev kaj siab thiab rau siab ntso teev tiam Yehauvas mus li tab txawm peb lub neej yuav hloov mus hloov los.

13. Vim li cas ib txhia Ixayees ho xav tias mus txhim kho lub tuam tsev mas yog ib lub tswv yim tsis zoo hlo?

¹³ Luag txwv tsis pub txhim kho lub tuam tsev. Tiam sis tus Pov Thawj Hlob Yesuas (Yausuas) thiab tus Tswv Xeev Xelunpanpees uas yog ob tug thawj “txawm sawv tsees rov mus pib ua lub Tuamtsev.” (Exalas 5:1, 2) Muaj ib txhia Yudais xav hais tias nkawv tawm tau ib lub tswv yim tsis zoo hlo li vim tej neeg ob cag ntsia ntsoov cov Yudais ua lub tuam tsev ces lawv yuav tuaj tsim kev kub ntxhov rau cov neeg Yudais. Yausuas thiab Xelunpanpees nkawv xav paub seb Yehauvas puas txhawb nqa ob tug. Yehauvas yeej txhawb nqa. Ua li cas nkawv ho paub?

14. Raws li Xakhaliyas 4:12, 14, tus Pov Thawj Yausuas thiab tus Tswv Xeev Xelunpanpees tau hnov li cas?

¹⁴ Nyeem Xakhaliyas 4:12, 14. Nyob rau Xakhaliyas qhov yog toog ntawm no, tus tub txib saum ntuj qhia tias ob tsob txiv ntoo roj piv txwv txog “ob tug neeg uas Vajtswv tau xaiv.” Ib tug yog Yausuas, ib tug yog Xelunpanpees. Ces zoo li Yehauvas uas yog “tus TSWV uas kav tagnrho lub ntiajteb no” xaiv nkawv los ua nws tes hauj lwm. Yog ib txoj koob hmoov zoo kawg li uas Yehauvas tso siab plhuav rau nkawv. Vim Yehauvas siv nkawv los ua ob tug coj ces cov Ixayees yuav tau mloog thaum nkawv txiav txim siab ua ib yam twg.

15. Peb qhia tias peb mloog Yehauvas tej lus li cas thaum nyeem nws Txoj Lus?

¹⁵ Niaj hnub niam no, Yehauvas siv nws Txoj Lus los coj nws cov tib neeg txoj hau kev. Nyob hauv nws Txoj Lus, nws qhia tias yuav pe hawm nws li cas thiaj zoo. Ua li cas peb thiaj qhia tau tias peb mloog Yehauvas tej lus thaum peb nyeem nws Txoj Lus? Peb yuav tau ua tib zoo nyeem thiab muab xav mus xav los kom thiaj nkag siab txog. Zaum tsaws xav li no: ‘Thaum kuv nyeem Vajtswv Txoj Lus los sis nyeem tej ntaub ntawv lub koom haum luam tawm, kuv puas muab xav mus xav los? Tej yam kuv nyeem uas kuv tsis nkag siab, kuv puas mus tshawb nrhiav lub ntsiab? Los yog kuv lam nyeem tsawg tsuag kom dhau?’ (2 Petus 3:16) Yog peb lauj sij hawm los ua tib zoo xav txog tej yam uas Yehauvas qhia rau peb ces peb yuav mloog tej uas nws qhia thiab yuav txawj mus qhia nws Txoj Lus.​—1 Timautes 4:15, 16.

16. Thaum “tus qhev ncaj thiab ntse” hais ib yam twg peb tsis nkag siab, peb yuav tau nco ntsoov li cas?

¹⁶ Muaj dua ib txoj hau kev uas Yehauvas siv los coj peb yog los ntawm “tus qhev ncaj thiab ntse.” (Mathais 24:45) Muaj qee lub sij hawm,  tus qhev ncaj thiab ntse yuav qhia qho yam uas peb tsis nkag siab rau peb. Xws li, tej zaud peb yuav xav hais tias xyov tus qhev ncaj thiab ntse pheej hais kom peb npaj tej nyuag txhiam laj txhiam xwm tseg cia los ntshe tej xwm txheej twb tsis los raug thaj tsam peb nyob. Los sis tej zaum peb yuav xav tias tus qhev ncaj thiab ntse muab txhawj dhau rau lub caij muaj kab mob aws no. Yog peb xav tias tej nws qhia tsis yog lawm, peb yuav tau nco ntsoov li cas? Yog peb tau xav li no lawm, nco ntsoov txog Yausuas thiab Xelunpanpees nkawv tej lus ntuas cov Ixayees. Tsis tas li ntawd, nco ntsoov tej zaj nyob hauv phau Vajlugkub uas peb twb tau nyeem dua los lawm. Muaj tej zaug, Vajtswv cov tib neeg yuav ua qho yam uas ib txhia xav tias tsis zoo tiam sis txog thaum kawg ho pab tau lawv.​—Cov Thawjtswj 7:7; 8:10.

17. Xakhaliyas zaj yog toog txog tus ncej txawb teeb thiab ob tsob txiv ntoo roj pab tau cov Yudais li cas?

¹⁷ Txawm Xakhaliyas zaj yog toog 5 dhau ib vuag lawm xwb los tseem pab tau cov Yudais kom rau siab ntso ua lawv tes hauj lwm thiab teev tiam Vajtswv. Thaum lawv coj lub neej xws li Xakhaliyas zaj yog toog, lawv yeej pom tau tias Yehauvas yeej nrog nraim lawv txhua lub caij. Yehauvas muab lub hwj huam dawb huv pab kom lawv rau rau siab ua lawv tes hauj lwm thiab kom lawv muaj kev kaj siab.​—Exalas 6:16.

18. Xakhaliyas zaj yog toog pab tau koj li cas?

¹⁸ Xakhaliyas zaj yog toog txog tus ncej txawb teeb thiab ob tsob txiv ntoo roj yuav pab tau peb lub neej kom tawg paj txi txiv. Raws li peb twb tham dua los lawm, zaj yog toog ntawd pab txhawb tau peb lub zog thaum raug kev tawm tsam, muaj kev kaj siab thaum peb lub neej hloov mus hloov los, thiab tso siab rau thaum muaj ib yam twg uas peb paub tsis tshab. Peb yuav ua li cas thaum peb raug ib yam kev nyuaj siab ntxhov plawv twg? Cia li xav ib yam li Xakhaliyas xav thiab tso siab tias Yehauvas yeej yuav saib xyuas nws cov tib neeg. Thaum peb pom tias Yehauvas yeej saib xyuas tau nws cov tib neeg ces cia li rau siab teev tiam nws kom tag nrho peb lub siab lub ntsws. (Mathais 22:37) Yog peb tso siab rau Yehauvas ces nws yuav pab kom peb muaj kev kaj siab teev tiam nws mus ib txhis.​—Kaulauxais 1:10, 11.