1. Nama kebuah orang Judah ba Babilon berasai gagit ati?

 ORANG Judah amat gagit ati. Petara Jehovah udah “nyungkak Sairus,” raja menua Persia ngelepaska orang Israel. Orang Israel udah lama diau di Babilon ketegal nyadi orang tangkap. Raja madahka, orang Judah ulih pulai baru ngagai menua asal sida ‘lalu nirika baru Rumah Jehovah Petara ke disembah orang Israel.’ (Esr. 1:1, 3) Atur tu tentu ngasuh sida berasai gaga ati laban sembah ti bendar deka diaduka baru ba menua ti diberi Petara ngagai sida.

2. Enda lama pengudah orang Judah pulai ngagai Jerusalem, nama utai ke mujur digaga sida?

² Ba taun 537 Sebedau Masihi. seraban orang Judah ti keterubah datai ba Jerusalem. Maya nya, Jerusalem indu nengeri perintah Judah di selatan. Sida lalu berengkah ngaga rumah sembiang Jehovah. Lalu ba taun 536 Sebedau Masihi. batu pemun rumah sembiang Jehovah udah tembu digaga!

3. Baka ni pengawa orang Judah disakal?

³ Orang Judah berengkah nirika rumah sembiang Jehovah. Taja pia, mayuh orang nyakal sida. Orang ke nguan menua nya “nguji nagang sereta ngemba orang Judah ngambika sida enda berani ngaga Rumah Sembiang nya.” (Esr. 4:4) Penanggul  sida majak balat. Tu ketegal ba taun 522 Sebedau Masihi. perintah Persia bisi raja ti baru, iya nya Raja Artaserses. * Sida ke nyakal ngumbai ubah tu siti peluang kena nagang pengawa nirika rumah sembiang Jehovah. Nya alai, sida “ngaga atur ti jai lalu ngumbai atur nya betul.” (Mas. 94:20) Sida madah ngagai Raja Artaserses orang Judah deka angkat ngelaban iya. (Esr. 4:11-16) Raja nya pechaya utai ku sida lalu meri atur ngambika orang Judah badu agi nirika rumah sembiang Jehovah. (Esr. 4:17-23) Pengujung iya, pengawa begagaka rumah sembiang Jehovah diketuka.—Esr. 4:24.

4. Nama digaga Jehovah lebuh pengawa nirika Rumah Sembiang ditagang? (Isaiah 55:11)

⁴ Orang ba menua nya ke enda nyembah Jehovah sereta sekeda pegawai perintah Persia keran deka ngetuka pengawa nirika rumah sembiang Jehovah. Taja pia, Jehovah deka orang Judah nembuka pengawa nirika baru Rumah Sembiang lalu peneka Iya seruran deka dikeamatka. (Bacha Isaiah 55:11.) Jehovah milih seiku nabi ke berani, iya nya Sekariah. Iya meri Sekariah lapan iti genera. Lalu Sekariah patut madahka genera nya ngagai orang Judah ngambika ulih meransang sida. Lapan iti genera tu deka ngeringka sida kena terus ngereja pengawa ke diberi Jehovah. Lalu sida enda ibuh takut ke munsuh sida. Ba genera kelima, Sekariah meda siti penuduk lampu sereta dua batang kayu kana.

5. Nama deka dipejuraika kitai ba artikel tu?

⁵ Kekadang semua kitai bisi berasai asa ati. Nya alai, genera ke dipeda Sekariah pasal siti penuduk lampu enggau dua batang kayu kana ulih meransang kitai. Genera tu ulih nulung kitai terus nyembah Jehovah enggau tetap ati taja pan kitai disakal orang, lebuh situasi kitai berubah sereta lebuh nerima iring ke enda dimeretika kitai.

6. Nitihka Sekariah 4:1-3, baka ni genera pasal siti penuduk lampu enggau dua batang kayu kana ulih meri pemerani ngagai orang Judah? (Peda gambar ba mua majalah.)

⁶ Bacha Sekariah 4:1-3. Baka ni genera pasal siti penuduk lampu enggau dua batang kayu kana ulih meri pemerani ngagai orang Judah lebuh disakal? Kati nuan bisi meda penuduk lampu ke bisi tujuh iti endur alai engkah sumbu ti enda ngetu nerima minyak? Dua batang kayu kana mansutka minyak ngagai siti mangkuk ti besai. Lalu mangkuk nya magi minyak ngagai tujuh iti endur alai engkah sumbu. Enggau nya, tujuh iti lampu deka mengkang mau. Pengudah bulih genera nya, Sekariah nanya: “Nama reti utai nya, tuan?” Melikat nyaut: ‘Ukai ngena pengering, ukai ngena kuasa, tang ulih roh Aku, ku Jehovah ti Pemadu Bekuasa bejaku.’ (Sek. 4:4, 6) Minyak ari pun kayu tu ngambarka roh kudus Jehovah ke enda ngetu diberi. Taja pan perintah Persia kering, tang sida enda ulih ngelaban roh kudus Jehovah. Enggau saup ari Jehovah, orang Judah ulih napi sebarang penanggul lalu nembuka pengawa sida. Endaka pesan nya amat meransang? Orang Judah semina patut pechayaka Jehovah lalu nyambung baru pengawa sida. Nya meh utai ke digaga sida, taja pan pengawa nirika rumah sembiang Jehovah agi disakal.

7. Nama ubah ba perintah ke ngasuh rumah sembiang Jehovah ulih didirika?

⁷ Ba taun 520 Sebedau Masihi. bisi siti ubah ba perintah ke ngasuh rumah sembiang  Jehovah ulih didirika baru. Seiku raja ti baru, Darius I, berengkah merintah Persia. Iya lalu nemu pengawa nirika rumah sembiang Jehovah enda patut diketuka. Nya alai, Darius meri atur ngambika orang Judah ulih nembuka pengawa nya. (Esr. 6:1-3) Atur nya tentu ngenyitka semua orang. Darius ukai semina ngemendarka projek nya diteruska, tang iya mega enda ngasuh orang bansa bukai ngachau projek nya. Sida diasuh meri ungkus sereta nama-nama aja utai ke diguna ngambika rumah sembiang Jehovah tembu digaga! (Esr. 6:7-12) Asil iya kira-kira empat taun udah nya, orang Judah nembuka pengawa nirika rumah sembiang Jehovah ba taun 515 Sebedau Masihi.—Esr. 6:15.

8. Nama kebuah nuan enda ibuh takut lebuh disakal?

⁸ Kemayaharitu, mayuh ari penyembah Jehovah disakal. Ambika chunto, ba sekeda menua pengawa kitai ditagang. Nya alai, bala menyadi Kristian kitai ba dia engka ditangkap sereta “kena pechara di mua gabenor enggau raja.” Lalu situasi tu engka ulih muka peluang ngagai sida kena meri saksi. (Mat. 10:17, 18) Tang kekadang, situasi sida engka ulih berubah ketegal ubah ke bisi nyadi ba perintah. Pia mega, engka hakim ti lurus udah ngaga pemutus ti ngemendarka sida bibas agi nyembah Petara. Ba menua bukai, sekeda Saksi bisi napi sakal ti enda sama. Taja pan sembah sida ngagai Jehovah enda ditagang perintah, tang sida dilaban ruang bilik sida ke enda sepengarap. (Mat. 10:32-36) Kesuah iya, diri sebilik ke balat ngelaban pengujung iya enda agi nyakal, laban sida sedar pengawa sida semina lebu ngapa. Asil iya, bisi entara sida udah nyadi Saksi ti amat ransing. Nya alai, lebuh nuan disakal, anang meh putus asa! Nuan enda ibuh takut laban Jehovah deka ngena roh kudus Iya nulung nuan!

9. Nama kebuah sekeda orang Judah berasai tusah ati lebuh meda batu pemun rumah sembiang Jehovah didudukka?

⁹ Lebuh batu pemun rumah sembiang Jehovah didudukka, sekeda orang Judah ke tuai nyabak. (Esr. 3:12) Nama kebuah? Laban sida kala meda rumah sembiang Jehovah ke didirika Solomon. Lalu sida ngasaika rumah sembiang Jehovah ke suba jauh manah agi enti dibanding enggau rumah sembiang Jehovah ke digaga orang Judah maya nya. (Hag. 2:2, 3) Lebuh sida meda bida entara dua iti rumah sembiang Jehovah nya, sida balat tusah  ati. Tang genera Sekariah ulih nulung sida bulih pengaga ati baru. Baka ni?

10. Baka ni utai ke dipadahka melikat ba Sekariah 4:8-10 ulih nulung orang Judah bulih pengaga ati baru?

¹⁰ Bacha Sekariah 4:8-10. Nama reti ku melikat nya lebuh madahka orang Judah deka “rami gaga, lalu deka meda tali penyukat enggau batu nya ba jari [gabenor Judah] Serubabel”? Tali penyukat nya perengka ke dikena nentuka sekalika sesiti utai nya lurus tauka enda. Reti ku melikat nya, taja pan rumah sembiang Jehovah kelia engka manah agi, tang rumah sembiang Jehovah ti baru nya tetap deka ditembuka sereta diterima Jehovah. Enti Jehovah gaga ati enggau Rumah Sembiang nya, endaka orang Judah mega patut gaga ati? Utai ke pemadu beguna ba Jehovah iya nya, sembah ti dipejalaika ba Rumah Sembiang enda tau enda nitihka peneka Iya. Enti orang Judah betatika chara sembah ti betul sereta diterima Jehovah, sida tentu deka gaga ati baru.

11. Nama penanggul ke ditapi sekeda nembiak Jehovah kemayaharitu?

¹¹ Lebuh situasi berubah, nya ulih nyadi penanggul ba kitai. Ambika chunto, sekeda menyadi Kristian kitai ke udah lama gawa penuh jam ke Jehovah engka nerima pengawa ti baru. Ke bukai patut badu ba pengawa sida ketegal udah tuai. Ubah ke baka tu ulih ngasuh kitai asa sereta tusah ati. Keterubah iya, kitai engka enda entu nemu kebuah tauka enda setuju enggau pemutus ke digaga. Kitai engka ngasaika gaya kitai ke suba manah agi. Kitai mega engka berasai asa ati ketegal ngumbai diri enda beguna agi ba Jehovah. (J-lam. 24:10) Nya alai, baka ni genera ke dipeda Sekariah ulih nulung kitai terus meri utai ti pemadu manah ke Jehovah?

12. Baka ni genera ke dipeda Sekariah ulih nulung kitai enti kitai berasai asa ati ketegal ubah ke nyadi ba pengidup kitai?

¹² Enti kitai bisi runding Jehovah, kitai deka senang agi nerima ubah. Diatu, Iya benung ngereja utai ti ngalitka ati lalu kitai bisi basa ti besai ulih sama bekereja enggau Iya. (1 Kor. 3:9) Taja pan pengawa kitai engka berubah, tang pengerindu Jehovah ke kitai enda sekali-kali berubah. Nya alai, enti bisi ubah dalam gerempung ti bekaul enggau nuan, anang meh seruran berunding nama kebuah ubah tu nyadi tauka nanya “Nama kebuah utai menya manah agi ari utai ti diatu?” (P-jar. 7:10) Tang, kitai patut besampi lalu ngiga penguntung ari ubah ke nyadi. Ari berundingka utai ke enda ulih digaga nuan, endaka manah berundingka  utai ke ulih digaga nuan diatu? Utai ke dipeda Sekariah ngajar kitai kebuah kitai patut mengkang positif. Lebuh kitai mengkang positif, nya ulih nulung kitai tetap ati sereta gaga ati taja pan situasi kitai berubah.

13. Nama kebuah sekeda orang Israel ngasaika nirika baru rumah sembiang Jehovah nya pemutus ti enda manah?

¹³ Taja pan kereja nirika rumah sembiang Jehovah ditagang, Imam Besai Jeshua (Josua) sereta Gabenor Serubabel ngaga pemutus deka “belabuh nirika Rumah Sembiang baru.” Seduai iya dipilih kena ngiring pengawa tu. (Esr. 5:1, 2) Sekeda orang Judah ngasaika pemutus nya enda manah. Tu ketegal sida ngasaika bala munsuh deka meda pengawa sida sereta ngaga mayuh macham utai kena ngachau pengawa sida. Nya alai, Josua enggau Serubabel begunaka tulung kena ngasuh sida andal Jehovah benung nyukung sida. Baka ni sida nerima tulung nya?

14. Nitihka Sekariah 4:12, 14, baka ni Imam Besai Josua enggau Gabenor Serubabel nemu Jehovah benung nyukung sida?

¹⁴ Bacha Sekariah 4:12, 14. Melikat nya madah ngagai Sekariah pasal dua batang kayu kana. Dua batang kayu kana nya nunjuk ngagai Josua enggau Serubabel. Seduai iya “orang ke udah dipilih.” Melikat nya madahka seduai iya baka ke ‘bediri semak Jehovah ti merintah semua dunya.’ Naka meh pemesai basa ke diberi ngagai Josua enggau Serubabel! Jehovah andalka seduai iya sereta ngena seduai iya ngiring orang Israel. Nya alai, orang Israel ulih andalka semua iring ke datai ari seduai iya.

15. Baka ni kitai ulih nunjukka diri bebasaka iring Jehovah ke bisi dipadah ba Bup Kudus?

¹⁵ Kemayaharitu, siti chara Jehovah meri iring ngagai bala nembiak Iya nengah Bup Kudus. Dalam Bup Kudus, Jehovah ngajar kitai baka ni nyembah Iya enggau chara ti diterima Iya. Baka ni kitai ulih nunjukka diri bebasaka iring ba Bup Kudus? Kitai patut macha Bup Kudus lalu meri awak kena meretika iya. Tanya meh diri empu: ‘Kati aku bisi ngetu enda lama lalu belematika utai ke dibacha aku dalam Bup Kudus tauka litaricha Kristian kitai? Enti bisi pemendar Bup Kudus ke ‘mar dimeretika,’ kati aku mansik reti iya? Tauka kati aku macha enggau jampat aja?’ (2 Pet. 3:16) Enti kitai meri awak belematika utai ke diajar Jehovah, kitai tentu deka nitihka iring Iya sereta bebendar agi ngereja pengawa nginjil.—1 Tim. 4:15, 16.

16. Enti “ulun ke tetap ati sereta bepenemu-dalam” meri iring ke enda ulih dimeretika kitai, nama ulih nulung kitai ngasika iring?

 ¹⁶ Siti agi chara Jehovah nyediaka iring ke kitai nengah “ulun ke tetap ati sereta bepenemu-dalam.” (Mat. 24:45) Bisi maya iya, sida engka meri iring ke enda ulih dimeretika kitai. Ambika chunto, kitai engka diberi iring ngambika ulih besedia napi bencana alam. Tang engka kitai ngasaika utai tu enda nyadi ba endur kitai diau. Tauka kitai engka mega ngasaika Raban ti Ngiring kelalu bejimat lebuh pandemik tu nyadi. Nya alai, enti kitai nerima iring ti baka ke enda ngena, nama ulih digaga kitai? Kitai ulih berundingka baka ni orang Israel bulih penguntung ketegal nitihka iring Josua enggau Serubabel. Kitai mega ulih berunding enggau dalam cherita Bup Kudus pasal nembiak Jehovah diselamatka ketegal nitihka iring ti baka ke enda ngena ba sida.—P-ulu. 7:7; 8:10.

17. Baka ni genera pasal siti penuduk lampu enggau dua batang kayu kana udah nulung orang Judah?

¹⁷ Cherita genera ti kelima Sekariah enda panjai. Tang genera nya udah nulung orang Judah ngambika ulih mengkang positif ba pengawa sereta sembah sida. Lebuh sida ngereja utai ti sejalai enggau genera ke dipeda Sekariah, sida ulih ngasaika pengerindu, sukung sereta iring ari Jehovah. Nengah roh kudus Iya, Jehovah nulung sida neruska pengawa sida sereta ngulihka baru pengaga ati sida.—Esr. 6:16.

18. Baka ni genera ke dipeda Sekariah ulih nulung nuan?

¹⁸ Genera ke dipeda Sekariah pasal siti penuduk lampu enggau dua batang kayu kana ulih nulung nuan ba pengidup. Baka ke udah dikerandauka kitai, genera Sekariah ulih meri pengering ngagai nuan lebuh disakal. Genera tu mega ulih nulung nuan mengkang gaga ati taja pan situasi nuan berubah. Pia mega, genera nya ulih nulung nuan andal agi ngambika ulih ngasika iring ke engka enda ulih dimeretika nuan. Nama ulih digaga nuan lebuh napi penanggul ba pengidup? Kesatu, peda meh utai ke dipeda Sekariah iya nya, bukti ke nunjukka Jehovah benung nyaga nembiak Iya. Kedua, kereja meh utai ti sejalai enggau utai ke dipeda nuan. Lalu pechaya ngagai Jehovah sereta terus meh nyembah Iya enggau pengabis ati. (Mat. 22:37) Enti nuan ngereja tu, Jehovah tentu deka nulung nuan terus gawa ke Iya enggau gaga ati nyentukka belama iya.—Kol. 1:10, 11.