ບົດຄວາມສຶກສາທີ 12
ເຈົ້າເຂົ້າໃຈສິ່ງທີ່ຊາກາລີເຫັນບໍ?
“ເຮົາເຢໂຫວາຜູ້ເປັນຈອມທັບບອກວ່າ ‘ເລື່ອງນີ້ຈະເກີດຂຶ້ນໄດ້ ບໍ່ແມ່ນເພາະກຳລັງທະຫານຫຼືກຳລັງຢ່າງອື່ນ ແຕ່ເພາະກຳລັງຂອງເຮົາ.’”—ຊກາ. 4:6, ລ.ມ.
ເພງ 73 ຂໍຊ່ວຍໃຫ້ເຮົາກ້າຫານ
ໃຈຄວາມສຳຄັນ *
1. ຄົນຢິວຈະກັບໄປບ້ານເກີດເມືອງນອນຂອງຕົວເອງເພື່ອເຮັດຫຍັງ?
ຊາວອິດສະຣາເອນຮູ້ສຶກຕື່ນເຕັ້ນດີໃຈຫຼາຍທີ່ພະເຢໂຫວາໄດ້ “ກະຕຸ້ນຄວາມຄິດຈິດໃຈ” ກະສັດຊີຣຶຊແຫ່ງເປີເຊຍໃຫ້ປ່ອຍຊາວອິດສະຣາເອນ ເຊິ່ງເປັນຊະເລີຍຢູ່ບາບີໂລນຫຼາຍສິບປີ. ກະສັດໄດ້ມີຄຳສັ່ງໃຫ້ຄົນຢິວກັບບ້ານເກີດເມືອງນອນຂອງຕົວເອງ ແລະ “ສ້າງວິຫານຂອງພະເຢໂຫວາພະເຈົ້າຂອງອິດສະຣາເອນ.” (ເອເຊດ. 1:1, 3, ລ.ມ.) ນີ້ເປັນສິ່ງທີ່ໜ້າຕື່ນເຕັ້ນຫຼາຍແທ້ໆ ເພາະເຂົາເຈົ້າຈະໄດ້ກັບໄປນະມັດສະການພະເຈົ້າທ່ຽງແທ້ຢູ່ແຜ່ນດິນທີ່ພະເຢໂຫວາມອບໃຫ້ອີກເທື່ອໜຶ່ງ!
2. ເມື່ອຄົນຢິວກັບໄປຮອດເມືອງເຢຣູຊາເລັມ ສິ່ງທຳອິດທີ່ເຂົາເຈົ້າເຮັດໄດ້ສຳເລັດແມ່ນຫຍັງ?
2 ໃນປີ 537 ກ່ອນ ຄ.ສ ຊະເລີຍກຸ່ມທຳອິດໄດ້ມາຮອດເມືອງເຢຣູຊາເລັມ ເຊິ່ງເຄີຍເປັນເມືອງຫຼວງຂອງຢູດາອານາຈັກທາງໃຕ້. ຫຼັງຈາກທີ່ເຂົາເຈົ້າກັບມາໄດ້ບໍ່ດົນ ເຂົາເຈົ້າກໍໄດ້ເລີ່ມລົງມືສ້າງວິຫານແລະໄດ້ວາງພື້ນຖານຂອງວິຫານແລ້ວໃນປີ 536 ກ່ອນ ຄ.ສ.
3. ຄົນຢິວເຈິການຕໍ່ຕ້ານຫຍັງແດ່?
3 ເມື່ອຄົນຢິວເລີ່ມສ້າງວິຫານກໍມີຫຼາຍຄົນມາຕໍ່ຕ້ານ. ຊາດຕ່າງໆທີ່ຢູ່ອ້ອມຂ້າງໄດ້ “ພະຍາຍາມທຳລາຍຂວັນກຳລັງໃຈຂອງຊາວຢູດາຈົນພວກເຂົາທໍ້ໃຈບໍ່ຢາກສ້າງວິຫານ.” (ເອເຊດ. 4:4, ລ.ມ.) ແຕ່ຍັງມີເລື່ອງທີ່ເຮັດໃຫ້ຄົນຢິວທໍ້ໃຈຫຼາຍກວ່ານັ້ນອີກ. ໃນປີ 522 ກ່ອນ ຄ.ສ ກະສັດອາເຣຕາເຊເຣເຊໄດ້ຂຶ້ນເປັນກະສັດເປີເຊຍອົງໃໝ່. * ຜູ້ຕໍ່ຕ້ານຈຶ່ງເຫັນວ່ານີ້ ເປັນໂອກາດທີ່ຈະເຮັດໃຫ້ຄົນຢິວເຊົາສ້າງວິຫານໂດຍໃຫ້ກະສັດ “ອອກກົດໝາຍເພື່ອສ້າງຄວາມເດືອດຮ້ອນ” ໃຫ້ກັບຄົນຢິວ. (ເພງ. 94:20, ລ.ມ.) ເຂົາເຈົ້າໄດ້ສົ່ງຈົດໝາຍເຖິງກະສັດແລະບອກວ່າຄົນຢິວກຳລັງວາງແຜນຈະກະບົດ. (ເອເຊດ. 4:11-16) ກະສັດໄດ້ເຊື່ອຄຳຕົວະນີ້ ແລະໄດ້ສັ່ງຫ້າມການກໍ່ສ້າງວິຫານ. (ເອເຊດ. 4:17-23) ຍ້ອນແນວນີ້ຄົນຢິວຈຶ່ງໄດ້ເຊົາສ້າງວິຫານ.—ເອເຊດ. 4:24
4. ພະເຢໂຫວາໄດ້ເຮັດຫຍັງເມື່ອເຫັນວ່າຜູ້ຕໍ່ຕ້ານພະຍາຍາມຂັດຂວາງການສ້າງວິຫານ? (ເອຊາອີ 55:11)
4 ຊາດຕ່າງໆທີ່ຢູ່ອ້ອມຂ້າງແລະບາງຄົນທີ່ຢູ່ໃນເຂດປົກຄອງຂອງເປີເຊຍບໍ່ຢາກໃຫ້ມີການສ້າງວິຫານຄືນໃໝ່. ແຕ່ພະເຢໂຫວາຢາກໃຫ້ຄົນຢິວສ້າງວິຫານນັ້ນໃຫ້ສຳເລັດ ແລະເພິ່ນກໍໄດ້ຊ່ວຍເຂົາເຈົ້າໃຫ້ສ້າງສຳເລັດແທ້! (ອ່ານເອຊາອີ 55:11) ເພິ່ນໄດ້ໃຫ້ຜູ້ພະຍາກອນຊາກາລີເຫັນນິມິດທີ່ໜ້າຕື່ນເຕັ້ນ 8 ເລື່ອງ ແລະໃຫ້ລາວໄປບອກເລື່ອງນີ້ກັບຄົນຢິວເພື່ອເຮັດໃຫ້ເຂົາເຈົ້າມີກຳລັງໃຈ. ນິມິດເຫຼົ່ານີ້ຊ່ວຍຄົນຢິວບໍ່ໃຫ້ຢ້ານພວກຜູ້ຕໍ່ຕ້ານ ແລະກະຕຸ້ນເຂົາເຈົ້າໃຫ້ລົງມືເຮັດວຽກທີ່ພະເຢໂຫວາບອກໃຫ້ເຮັດ. ໃນນິມິດທີ 5 ຊາກາລີໄດ້ເຫັນຕະກຽງແລະຕົ້ນໝາກກອກ 2 ຕົ້ນ.
5. ເຮົາຈະຮຽນຫຍັງໃນບົດຄວາມນີ້?
5 ບາງເທື່ອເຮົາທຸກຄົນກໍຮູ້ສຶກທໍ້ໃຈ ແຕ່ເຮົາຈະໄດ້ຮັບປະໂຫຍດຈາກກຳລັງໃຈທີ່ພະເຢໂຫວາໃຫ້ກັບຊາດອິດສະຣາເອນຜ່ານທາງນິມິດທີຫ້າທີ່ຊາກາລີເຫັນ. ນິມິດນີ້ຍັງຊ່ວຍເຮົາໃຫ້ຮັບໃຊ້ພະເຢໂຫວາຢ່າງສັດຊື່ເມື່ອເຈິກັບການຕໍ່ຕ້ານເມື່ອມີການປ່ຽນແປງໃນຊີວິດ ແລະເມື່ອຮູ້ສຶກວ່າຍາກທີ່ຈະເຮັດຕາມຄຳແນະນຳ.
ເມື່ອເຮົາຖືກຕໍ່ຕ້ານ
ຊາກາລີເຫັນນິມິດກ່ຽວກັບຕົ້ນໝາກກອກ 2 ຕົ້ນທີ່ໃຫ້ນ້ຳມັນໄຫຼລົງມາໃສ່ຕະກຽງ 7 ອັນ (ເບິ່ງຂໍ້ 6)
6. ນິມິດເລື່ອງຕະກຽງກັບຕົ້ນໝາກກອກ 2 ຕົ້ນທີ່ຢູ່ໃນຊາກາລີ 4:1-3 ໃຫ້ກຳລັງໃຈຄົນຢິວແນວໃດ? (ເບິ່ງຮູບໜ້າປົກ)
6 ອ່ານຊາກາລີ 4:1-3. ນິມິດເລື່ອງຕະກຽງກັບຕົ້ນໝາກກອກ 2 ຕົ້ນໃຫ້ກຳລັງໃຈຄົນຢິວທີ່ຈະສ້າງວິຫານຕໍ່ໄປເຖິງວ່າຈະຖືກຕໍ່ຕ້ານ. ເລື່ອງນີ້ໃຫ້ກຳລັງໃຈເຂົາເຈົ້າແນວໃດ? ໃນນິມິດນັ້ນ ເຮົາເຫັນວ່າມີນ້ຳມັນຈາກຕົ້ນໝາກກອກ 2 ຕົ້ນໄຫຼລົງມາໃສ່ຊາມບໍ່ຂາດສາຍ. ແລ້ວນ້ຳມັນໃນຊາມກໍໄຫຼລົງມາໃສ່ຕະກຽງ 7 ອັນ. ນີ້ເຮັດໃຫ້ຕະກຽງມີໄຟລຸກຢູ່ຕະຫຼອດ. ຊາກາລີຖາມພະເຢໂຫວາວ່າ: “ທີ່ຂ້ອຍເຫັນນີ້ໝາຍຄວາມວ່າຫຍັງ?” ແລ້ວພະເຢໂຫວາກໍຕອບຜ່ານທາງທູດສະຫວັນວ່າ: “ເຮົາເຢໂຫວາຜູ້ເປັນຈອມທັບບອກວ່າ ‘ເລື່ອງນີ້ຈະເກີດຂຶ້ນໄດ້ ບໍ່ແມ່ນເພາະກຳລັງທະຫານຫຼືກຳລັງຢ່າງອື່ນ ແຕ່ເພາະກຳລັງຂອງເຮົາ.’” (ຊກາ. 4:4, 6, ລ.ມ.) ນ້ຳມັນຈາກຕົ້ນໝາກກອກທີ່ໄຫຼບໍ່ຂາດສາຍໝາຍເຖິງພະລັງບໍລິສຸດຂອງພະເຈົ້າ ທີ່ບໍ່ມີວັນໝົດຈັກເທື່ອ. ເຖິງວ່າກອງກຳລັງຂອງພວກຈັກກະພັດເປີເຊຍຈະໃຫຍ່ສ່ຳໃດ ກໍບໍ່ມີຄວາມໝາຍຫຍັງເມື່ອທຽບກັບພະລັງບໍລິສຸດຂອງພະເຈົ້າ. ນີ້ເປັນເລື່ອງທີ່ໃຫ້ກຳລັງໃຈຫຼາຍແທ້ໆ! ຍ້ອນພະເຢໂຫວາຊ່ວຍເຫຼືອ ຄົນຢິວຈຶ່ງສາມາດສ້າງວິຫານໄດ້ສຳເລັດເຖິງວ່າຈະຖືກຕໍ່ຕ້ານ. ດັ່ງນັ້ນ ສິ່ງທີ່ຄົນຢິວທຸກຄົນຈະຕ້ອງເຮັດກໍຄື ໄວ້ວາງໃຈພະເຢໂຫວາແລະກັບມາສ້າງວິຫານ ເຖິງວ່າຈະຖືກສັ່ງຫ້າມກໍຕາມ.
7. ມີການປ່ຽນແປງຫຍັງທີ່ເຮັດໃຫ້ການກໍ່ສ້າງວິຫານໄດ້ງ່າຍຂຶ້ນ?
7 ມີການປ່ຽນແປງໜຶ່ງທີ່ຊ່ວຍໃຫ້ສ້າງວິຫານໄດ້ງ່າຍຂຶ້ນ. ການປ່ຽນແປງນັ້ນແມ່ນຫຍັງ? ໃນປີ 520 ກ່ອນ ຄ.ສ ກະສັດດາຣີອຶຊທີ I ໄດ້ຂຶ້ນປົກຄອງເປີເຊຍ. ໃນປີທີ 2 ທີ່ລາວປົກຄອງລາວໄດ້ເຫັນວ່າ ຄຳສັ່ງຫ້າມບໍ່ໃຫ້ສ້າງວິຫານເປັນສິ່ງທີ່ຜິດກົດໝາຍ. ດັ່ງນັ້ນ ກະສັດຈຶ່ງໄດ້ບອກໃຫ້ຄົນຢິວກໍ່ສ້າງວິຫານໃຫ້ສຳເລັດ. (ເອເຊດ. 6:1-3) ລາວບໍ່ໄດ້ເຮັດພຽງແຕ່ເທົ່ານັ້ນ. ລາວຍັງໄດ້ສັ່ງຊາດຕ່າງໆທີ່ຢູ່ອ້ອມຂ້າງໃຫ້ເຊົາຕໍ່ຕ້ານຄົນຢິວ ແລະຍັງບອກໃຫ້ເຂົາເຈົ້າບໍລິຈາກເງິນຄຳເພື່ອເອົາມາຊ່ວຍໃນການສ້າງວິຫານໃຫ້ສຳເລັດ! (ເອເຊດ. 6:7-12) ນີ້ຈຶ່ງເຮັດໃຫ້ຄົນຢິວສ້າງວິຫານໄດ້ສຳເລັດໃນ 4 ປີຕໍ່ມາເຊິ່ງກໍຄືປີ 515 ກ່ອນ ຄ.ສ.—ເອເຊດ. 6:15
ໃຫ້ເພິ່ງພະລັງບໍລິສຸດຂອງພະເຢໂຫວາເມື່ອຖືກຕໍ່ຕ້ານ (ເບິ່ງຂໍ້ 8)
8. ເປັນຫຍັງເຈົ້າບໍ່ຕ້ອງຢ້ານເມື່ອຖືກຕໍ່ຕ້ານ?
8 ໃນທຸກມື້ນີ້ພະຍານພະເຢໂຫວາຫຼາຍຄົນກໍຖືກຕໍ່ຕ້ານໃນແບບທີ່ແຕກຕ່າງກັນ ເຊັ່ນ: ບາງຄົນຢູ່ໃນປະເທດທີ່ວຽກປະກາດຖືກຈຳກັດ ເຊິ່ງອາດຈະເຮັດໃຫ້ພີ່ນ້ອງຖືກຈັບແລະ “ຖືກພາຕົວໄປຢູ່ຕໍ່ໜ້າເຈົ້າແຂວງແລະກະສັດ.” (ມທ. 10:17, 18) ແຕ່ບາງເທື່ອອຳນາດການປົກຄອງກໍມີການປ່ຽນແປງ ເຊິ່ງຊ່ວຍໃຫ້ພີ່ນ້ອງມີອິດສະຫຼະຫຼາຍຂຶ້ນ. ຫຼືບາງເທື່ອສານກໍໃຫ້ຄວາມຍຸຕິທຳກັບພີ່ນ້ອງໂດຍໃຫ້ມີອິດສະຫຼະຫຼາຍຂຶ້ນໃນການປະກາດ. ສ່ວນບາງຄົນທີ່ຢູ່ໃນປະເທດທີ່ມີອິດສະຫຼະໃນການນະມັດສະການພະເຢໂຫວາກໍຖືກຄົນໃນຄອບຄົວຕໍ່ຕ້ານ. (ມທ. 10:32-36) ຫຼາຍເທື່ອຄົນໃນຄອບຄົວຂອງເຮົາກໍເຊົາຕໍ່ຕ້ານເມື່ອເຫັນວ່າ ເຖິງຈະພະຍາຍາມຂັດຂວາງເຮົາຫຼາຍສ່ຳໃດ ແຕ່ເຮົາກໍບໍ່ເຊົາຮັບໃຊ້ພະເຢໂຫວາ. ແລະບາງເທື່ອຄົນທີ່ເຄີຍຕໍ່ຕ້ານເຮົາຢ່າງໜັກອາດເຂົ້າມາເປັນພະຍານພະເຢໂຫວາທີ່ກະຕືລືລົ້ນ. ເມື່ອເຈົ້າຖືກຕໍ່ຕ້ານ ຂໍໃຫ້ເຈົ້າຢ່າເຊົາຮັບໃຊ້ພະເຢໂຫວາແລະບໍ່ຕ້ອງຢ້ານ ເພາະພະເຢໂຫວາຈະໃຊ້ພະລັງບໍລິສຸດເພື່ອຊ່ວຍເຫຼືອເຈົ້າ!
ເມື່ອມີການປ່ຽນແປງໃນຊີວິດ
9. ເປັນຫຍັງຄົນຢິວບາງຄົນຮູ້ສຶກເສຍໃຈຫຼັງຈາກທີ່ໄດ້ວາງພື້ນຖານວິຫານຫຼັງໃໝ່?
9 ເມື່ອມີການວາງພື້ນຖານວິຫານຫຼັງໃໝ່ແລ້ວ ພວກຜູ້ເຖົ້າບາງຄົນໄດ້ຮ້ອງໄຫ້ຍ້ອນເຂົາເຈົ້າເຄີຍເຫັນຄວາມສະຫງ່າງາມຂອງວິຫານທີ່ໂຊໂລໂມນສ້າງແລະຄິດວ່າວິຫານຫຼັງໃໝ່ທີ່ເຂົາເຈົ້າສ້າງໄວ້ນີ້ “ທຽບກັນບໍ່ໄດ້ເລີຍ” ກັບວິຫານຫຼັງເກົ່າ. (ເອເຊດ. 3:12; ອເກ. 2:2, 3, ລ.ມ.) ການສົມທຽບແບບນີ້ເຮັດໃຫ້ເຂົາເຈົ້າຮູ້ສຶກເສົ້າໃຈ ແຕ່ນິມິດທີ່ຊາກາລີເຫັນຈະຊ່ວຍເຂົາເຈົ້າໃຫ້ມີກຳລັງໃຈໄດ້ແນວໃດ?
10. ຄຳເວົ້າຂອງທູດສະຫວັນທີ່ຢູ່ໃນຊາກາລີ 4:8-10 ໃຫ້ກຳລັງໃຈຄົນຢິວແນວໃດ?
10 ອ່ານຊາກາລີ 4:8-10. * ທູດສະຫວັນໝາຍຄວາມວ່າແນວໃດເມື່ອບອກວ່າ ຄົນຢິວ “ຈະດີໃຈທີ່ເຫັນ [ຜູ້ປົກຄອງຄົນຢິວ] ເຊຣຸບບາເບນຖືສາຍດິ່ງ”? ສາຍດິ່ງເປັນເຄື່ອງມືວັດແທກທີ່ຊ່ວຍໃຫ້ສິ່ງກໍ່ສ້າງຕັ້ງ ຊື່. ທູດສະຫວັນໄດ້ຮັບຮອງກັບປະຊາຊົນຂອງພະເຢໂຫວາວ່າ ເຂົາເຈົ້າຈະສ້າງວິຫານໄດ້ສຳເລັດ ແລະເປັນໄປຕາມມາດຕະຖານທີ່ພະເຢໂຫວາກຳນົດໄວ້. ຖ້າພະເຢໂຫວາພໍໃຈກັບວິຫານຫຼັງນີ້ ເຂົາເຈົ້າກໍຄວນຈະພໍໃຈຄືກັນ. ສິ່ງສຳຄັນທີ່ສຸດສຳລັບພະເຢໂຫວາກໍຄື ເພິ່ນຕ້ອງການໃຫ້ເຂົາເຈົ້ານະມັດສະການເພິ່ນໃນແບບທີ່ເພິ່ນຍອມຮັບຢູ່ທີ່ວິຫານຫຼັງໃໝ່. ຖ້າເຂົາເຈົ້ານະມັດສະການພະເຢໂຫວາໃນແບບທີ່ເພິ່ນຍອມຮັບແລະເຮັດໃນສິ່ງທີ່ເພິ່ນພໍໃຈ ເຂົາເຈົ້າກໍຈະມີຄວາມສຸກ.
ໃຫ້ມີຄວາມຄິດໃນແງ່ບວກເມື່ອມີການປ່ຽນແປງໃນຊີວິດ (ເບິ່ງຂໍ້ 11-12) *
11. ສິ່ງໃດທີ່ເປັນເລື່ອງຍາກສຳລັບຜູ້ຮັບໃຊ້ຂອງພະເຢໂຫວາບາງຄົນໃນທຸກມື້ນີ້?
11 ການປ່ຽນແປງເປັນສິ່ງທີ່ຍາກສຳລັບເຮົາຫຼາຍຄົນ. ບາງຄົນທີ່ຮັບໃຊ້ເຕັມເວລາປະເພດພິເສດມາຫຼາຍປີໄດ້ຖືກປ່ຽນວຽກມອບໝາຍ. ສ່ວນບາງຄົນກໍຕ້ອງໄດ້ເຊົາເຮັດວຽກມອບໝາຍທີ່ຕົວເອງມັກຍ້ອນອາຍຸທີ່ຫຼາຍຂຶ້ນ. ເມື່ອເຈິກັບເລື່ອງແບບນີ້ ເປັນເລື່ອງທຳມະດາທີ່ເຮົາຈະຮູ້ສຶກທໍ້ໃຈ. ທຳອິດ ເຮົາອາດບໍ່ເຂົ້າໃຈແລະບໍ່ເຫັນດີກັບການປ່ຽນແປງນັ້ນ. ເຮົາອາດຈະຄິດຮອດວຽກມອບໝາຍທີ່ເຮົາເຄີຍເຮັດແລະອາດຮູ້ສຶກທໍ້ໃຈທີ່ເຮົາບໍ່ສາມາດຮັບໃຊ້ພະເຢໂຫວາໄດ້ຫຼາຍຄືແຕ່ກ່ອນ. (ສຸພາ. 24:10) ແຕ່ນິມິດຂອງຊາກາລີຈະຊ່ວຍເຮົາແນວໃດໃຫ້ເຮັດດີທີ່ສຸດເພື່ອຮັບໃຊ້ພະເຢໂຫວາຕໍ່ໄປ?
12. ນິມິດຂອງຊາກາລີຊ່ວຍເຮົາໃຫ້ມີຄວາມສຸກໄດ້ແນວໃດເຖິງວ່າສະພາບການຈະປ່ຽນໄປ?
12 ເຮົາຈະຮັບມືກັບການປ່ຽນແປງໄດ້ງ່າຍຂຶ້ນຖ້າເຮົາເບິ່ງສິ່ງຕ່າງໆຄືກັບທີ່ພະເຢໂຫວາເບິ່ງ. ຕອນນີ້ພະເຢໂຫວາກຳລັງເຮັດຫຼາຍຢ່າງໃຫ້ສຳເລັດ ແລະເຮົາກໍມີສ່ວນໃນວຽກນີ້. (1 ກຣ. 3:9) ເຮົາອາດຈະຖືກປ່ຽນວຽກມອບໝາຍ ແຕ່ຄວາມຮັກທີ່ພະເຢໂຫວາມີຕໍ່ເຮົາບໍ່ໄດ້ປ່ຽນໄປ. ດັ່ງນັ້ນ ຖ້າການປ່ຽນແປງໃນອົງການມີຜົນຕໍ່ເຮົາ ເຮົາບໍ່ຄວນຄິດວ່າເປັນຫຍັງຈຶ່ງມີການປ່ຽນແປງແບບນີ້ ແລະບໍ່ຄວນຄິດເຖິງແຕ່ສິ່ງທີ່ເຮົາເຄີຍເຮັດໃນ “ເມື່ອກ່ອນ.” (ຜູ້ປ. 7:10) ແຕ່ເຮົາຄວນອະທິດຖານແລະຄິດເຖິງສິ່ງດີໆໃນການປ່ຽນແປງນັ້ນ. ແທນທີ່ຈະຄິດເຖິງແຕ່ສິ່ງທີ່ເຮົາເຮັດບໍ່ໄດ້ ໃຫ້ຄິດເຖິງສິ່ງທີ່ເຮົາເຮັດໄດ້. ຈາກນິມິດຂອງຊາກາລີເຮົາໄດ້ບົດຮຽນວ່າ ເປັນເລື່ອງສຳຄັນທີ່ເຮົາຈະຮັກສາຄວາມຄິດໃນແງ່ບວກຢູ່ສະເໝີ ເພາະຖ້າເຮົາເຮັດແບບນັ້ນເຮົາກໍຈະຮັບໃຊ້ພະເຢໂຫວາຢ່າງມີຄວາມສຸກແລະສັດຊື່ຕໍ່ເພິ່ນຕໍ່ໆໄປເຖິງວ່າສະພາບການຈະປ່ຽນໄປ.
ເມື່ອຮູ້ສຶກຍາກທີ່ຈະເຮັດຕາມຄຳແນະນຳ
13. ເປັນຫຍັງຄົນຢິວບາງຄົນຈຶ່ງຄິດວ່າການສ້າງວິຫານເປັນການຕັດສິນໃຈທີ່ບໍ່ສະຫຼາດ?
13 ເຖິງວ່າວຽກກໍ່ສ້າງວິຫານຈະຖືກສັ່ງຫ້າມ ແຕ່ເຢເຊືອ ເຊິ່ງເປັນປະໂລຫິດໃຫຍ່ແລະເຊຣຸບບາເບນເຊິ່ງເປັນຜູ້ປົກຄອງໄດ້ “ເລີ່ມສ້າງວິຫານຂອງພະເຈົ້າ.” (ເອເຊດ. 5:1, 2, ລ.ມ.) ນີ້ອາດເຮັດໃຫ້ຄົນຢິວບາງຄົນຄິດວ່າເປັນການຕັດສິນໃຈທີ່ບໍ່ສະຫຼາດ ເພາະຖ້າຈະສ້າງວິຫານໂດຍທີ່ບໍ່ໃຫ້ສັດຕູຮູ້ຄືຊິເປັນໄປບໍ່ໄດ້. ແລະຖ້າເຂົາເຈົ້າຮູ້ ເຂົາເຈົ້າກໍຈະເຮັດທຸກວິທີທາງເພື່ອຂັດຂວາງບໍ່ໃຫ້ສ້າງວິຫານ. ແຕ່ເຢເຊືອແລະ ເຊຣຸບບາເບນ ຮູ້ວ່າພະເຢໂຫວາຈະຊ່ວຍເຫຼືອເຂົາເຈົ້າ. ເຂົາເຈົ້າຮູ້ໄດ້ແນວໃດ?
14. ຕາມຊາກາລີ 4:12, 14 ເຢເຊືອກັບເຊຣຸບບາເບນໄດ້ຮັບຄຳຮັບຮອງຫຍັງ?
14 ອ່ານຊາກາລີ 4:12, 14. * ໃນນິມິດນີ້ ທູດສະຫວັນບອກຜູ້ພະຍາກອນຂອງພະເຈົ້າວ່າ ຕົ້ນໝາກກອກ 2 ຕົ້ນ ໝາຍເຖິງ “ຜູ້ຖືກເຈີມ 2 ຄົນ” ເຊິ່ງກໍຄືເຢເຊືອກັບເຊຣຸບບາເບນ. ສອງຄົນນີ້ເປັນຜູ້ທີ່ “ຢືນຢູ່ຂ້າງໆພະເຈົ້າຜູ້ເປັນເຈົ້າຂອງໂລກທັງໝົດ” ເຊິ່ງກໍຄືພະເຢໂຫວາ. ຈັ່ງແມ່ນເປັນກຽດຫຼາຍແທ້ໆສຳລັບເຢເຊືອກັບເຊຣຸບບາເບນທີ່ໄດ້ຢືນຢູ່ຂ້າງໆພະເຢໂຫວາ! ເຊິ່ງສະແດງໃຫ້ເຫັນວ່າພະເຢໂຫວາໄວ້ໃຈເຂົາເຈົ້າຫຼາຍແທ້ໆ. ດັ່ງນັ້ນ ຊາວອິດສະຣາເອນກໍຄວນໄວ້ໃຈການຕັດສິນໃຈຂອງເຂົາເຈົ້າ ເພາະພະເຢໂຫວາເປັນຜູ້ທີ່ຊີ້ນຳເຂົາເຈົ້າ.
15. ເຮົາຈະສະແດງໃຫ້ເຫັນແນວໃດວ່າເຮົາຍອມຮັບການຊີ້ນຳຈາກພະເຢໂຫວາທີ່ຢູ່ໃນຄຳພີໄບເບິນ?
15 ວິທີໜຶ່ງທີ່ພະເຢໂຫວາຊີ້ນຳປະຊາຊົນຂອງເພິ່ນໃນທຸກມື້ນີ້ແມ່ນໂດຍທາງຄຳພີໄບເບິນ. ໃນຄຳພີໄບເບິນພະເຢໂຫວາບອກເຮົາໃຫ້ຮູ້ວິທີທີ່ຈະນະມັດສະການເພິ່ນໃນແບບທີ່ເພິ່ນຍອມຮັບ. ເຮົາຈະສະແດງໃຫ້ເຫັນແນວໃດວ່າເຮົາຍອມຮັບການຊີ້ນຳຈາກພະເຢໂຫວາທີ່ຢູ່ໃນຄຳພີໄບເບິນ? ເຮົາຈະເຮັດແບບນັ້ນໂດຍ ພະຍາຍາມໃຊ້ເວລາອ່ານຄຳພີໄບເບິນແລະເຂົ້າໃຈສິ່ງທີ່ອ່ານ. ແລະເຮົາຄວນຖາມຕົວເອງວ່າ ‘ເມື່ອຂ້ອຍອ່ານຄຳພີໄບເບິນແລະປຶ້ມອື່ນໆຂອງອົງການ ຂ້ອຍໄດ້ຢຸດແລະຄິດຕຶກຕອງສິ່ງທີ່ໄດ້ອ່ານບໍ? ເມື່ອອ່ານເຈິສ່ວນ “ທີ່ເຂົ້າໃຈຍາກ” ຂ້ອຍໃຊ້ເວລາຄົ້ນຄວ້າເພື່ອຈະເຂົ້າໃຈສິ່ງທີ່ອ່ານບໍ? ຫຼືຂ້ອຍພຽງແຕ່ອ່ານຜ່ານຊື່ໆ?’ (2 ປຕ. 3:16) ຖ້າເຮົາໃຊ້ເວລາຄິດຕຶກຕອງວ່າພະເຢໂຫວາກຳລັງສອນຫຍັງເຮົາ ເຮົາກໍຈະສາມາດເຮັດຕາມຄຳແນະນຳຂອງເພິ່ນ ແລະເຮັດວຽກປະກາດໄດ້ຢ່າງຄົບຖ້ວນ.—1 ຕມ. 4:15, 16
ໃຫ້ໄວ້ໃຈຄຳແນະນຳທີ່ເຈົ້າໄດ້ຮັບຈາກ “ທາດທີ່ສັດຊື່ແລະສຸຂຸມ” (ເບິ່ງຂໍ້ 16) *
16. ສິ່ງໃດຈະຊ່ວຍເຮົາໃຫ້ເຮັດຕາມຄຳແນະນຳທີ່ມາຈາກທາດທີ່ສັດຊື່ແລະສຸຂຸມ ເຖິງວ່າເຮົາຈະບໍ່ເຂົ້າໃຈທັງໝົດ?
16 ຍັງມີອີກວິທີໜຶ່ງທີ່ພະເຢໂຫວາຊີ້ນຳປະຊາຊົນຂອງເພິ່ນໂດຍຜ່ານທາງ “ທາດທີ່ສັດຊື່ແລະສຸຂຸມ.” (ມທ. 24:45) ບາງເທື່ອທາດທີ່ສັດຊື່ແລະສຸຂຸມອາດໃຫ້ຄຳແນະນຳທີ່ເຮົາບໍ່ຄ່ອຍເຂົ້າໃຈປານໃດ. ຕົວຢ່າງເຊັ່ນ: ເຂົາເຈົ້າອາດແນະນຳເຮົາໃຫ້ກຽມພ້ອມວິທີທີ່ຈະເອົາຕົວລອດຈາກໄພພິບັດ ເຊິ່ງເຮົາອາດຄິດວ່າເລື່ອງນີ້ໜ້າຈະບໍ່ເກີດຂຶ້ນໃນບ່ອນທີ່ເຮົາຢູ່. ຫຼືເຮົາອາດຄິດວ່າທາດທີ່ສັດຊື່ແລະສຸຂຸມບອກເຮົາໃຫ້ລະວັງຕົວຫຼາຍໂພດໃນຊ່ວງທີ່ມີໂລກລະບາດ. ແລ້ວເຮົາຄວນເຮັດແນວໃດຖ້າຮູ້ສຶກວ່າຄຳແນະນຳເຫຼົ່ານັ້ນໃຊ້ບໍ່ໄດ້ກັບເຮົາ? ໃຫ້ເຮົາຄິດເຖິງຊາດອິດສະຣາເອນວ່າເຂົາເຈົ້າໄດ້ຮັບປະໂຫຍດແນວໃດທີ່ໄດ້ເຮັດຕາມຄຳແນະນຳທີ່ພະເຢໂຫວາໃຫ້ຜ່ານທາງເຢເຊືອແລະເຊຣຸບບາເບນ. ນອກຈາກນັ້ນ ໃຫ້ເຮົາຄິດເຖິງເລື່ອງຕ່າງໆທີ່ເຮົາອ່ານໃນຄຳພີໄບເບິນ ເຊິ່ງບາງເທື່ອເຮົາອາດຮູ້ສຶກວ່າຄຳແນະນຳທີ່ພະເຢໂຫວາໃຫ້ກັບຜູ້ຮັບໃຊ້ຂອງເພິ່ນໃນຕອນນັ້ນບໍ່ຄ່ອຍສົມເຫດສົມຜົນປານໃດ ແຕ່ນັ້ນກໍເປັນການຊ່ວຍຊີວິດເຂົາເຈົ້າ.—ຕັດສິນ. 7:7; 8:10
ເຈົ້າເຂົ້າໃຈສິ່ງທີ່ຊາກາລີເຫັນບໍ?
17. ນິມິດເລື່ອງຕະກຽງກັບຕົ້ນໝາກກອກ 2 ຕົ້ນ ມີຜົນຕໍ່ຄົນຢິວແນວໃດ?
17 ເຖິງວ່ານິມິດທີ 5 ທີ່ຊາກາລີເຫັນຈະເປັນນິມິດທີ່ສັ້ນໆ ແຕ່ມັນກໍຊ່ວຍຄົນຢິວໃຫ້ມີຄວາມຄິດໃນແງ່ບວກໃນການເຮັດວຽກແລະນະມັດສະການພະເຢໂຫວາ. ແລະເມື່ອເຂົາເຈົ້າເຮັດຕາມນິມິດທີ່ຊາກາລີເຫັນ ເຂົາເຈົ້າກໍໄດ້ຮູ້ວ່າພະເຢໂຫວາຊີ້ນຳແລະຊ່ວຍເຫຼືອເຂົາເຈົ້າ. ຍ້ອນພະເຢໂຫວາໃຊ້ພະລັງບໍລິສຸດຊ່ວຍເຫຼືອເຂົາເຈົ້າ ເຂົາເຈົ້າຈຶ່ງສາມາດເຮັດວຽກໄດ້ຕໍ່ໆໄປແລະກັບມາມີຄວາມສຸກໄດ້ອີກ.—ເອເຊດ. 6:16
18. ນິມິດທີ່ຊາກາລີເຫັນສົ່ງຜົນແນວໃດຕໍ່ຊີວິດຂອງເຈົ້າ?
18 ນິມິດຂອງຊາກາລີເລື່ອງຕະກຽງກັບຕົ້ນໝາກກອກ 2 ຕົ້ນສົ່ງຜົນຕໍ່ຊີວິດຂອງເຮົາຄືກັນ. ຄືກັບທີ່ເຮົາໄດ້ຮຽນມາແລ້ວວ່ານິມິດນັ້ນຊ່ວຍເຮົາໃຫ້ມີກຳລັງໃຈ ເມື່ອຖືກຕໍ່ຕ້ານ ຊ່ວຍເຮົາໃຫ້ມີຄວາມສຸກ ເມື່ອມີການປ່ຽນແປງໃນຊີວິດ ແລະຊ່ວຍເຮົາໃຫ້ໄວ້ໃຈ ຄຳແນະນຳຂອງພະເຢໂຫວາເຖິງວ່າເຮົາຈະບໍ່ເຂົ້າໃຈ. ເຮົາຄວນເຮັດແນວໃດຖ້າມີບັນຫາໃນຊີວິດ? ທຳອິດ ໃຫ້ເຮົາເຂົ້າໃຈນິມິດທີ່ຊາກາລີເຫັນໂດຍໝັ້ນໃຈວ່າພະເຢໂຫວາຈະຊ່ວຍເຫຼືອປະຊາຊົນຂອງເພິ່ນ. ຈາກນັ້ນ ໃຫ້ເຮັດຕາມຄວາມເຂົ້າໃຈກ່ຽວກັບນິມິດນັ້ນໂດຍໄວ້ໃຈແລະຮັບໃຊ້ພະເຢໂຫວາສຸດຫົວໃຈຕໍ່ໆໄປ. (ມທ. 22:37) ຖ້າເຮົາເຮັດແບບນີ້ ພະເຢໂຫວາກໍຈະຊ່ວຍເຮົາໃຫ້ຮັບໃຊ້ເພິ່ນຢ່າງມີຄວາມສຸກຕະຫຼອດໄປ.—ກລຊ. 1:10, 11
ເພງ 7 ພະເຢໂຫວາເປັນກຳລັງຂອງເຮົາ
^ ພະເຢໂຫວາໄດ້ໃຫ້ຊາກາລີເຫັນນິມິດທີ່ໜ້າຕື່ນເຕັ້ນຫຼາຍຢ່າງ ເຊິ່ງໄດ້ຊ່ວຍລາວແລະຜູ້ຮັບໃຊ້ຄົນອື່ນໆມີກຳລັງໃຈທີ່ຈະຟື້ນຟູການນະມັດສະການແທ້ ເຖິງວ່າຈະມີບັນຫາຫຼາຍຢ່າງ. ໃນນິມິດເຫຼົ່ານັ້ນຍັງໄດ້ຊ່ວຍເຮົາໃຫ້ຮັບໃຊ້ພະເຢໂຫວາຢ່າງສັດຊື່ຕໍ່ໄປເຖິງວ່າຈະມີບັນຫາ. ໃນບົດຄວາມນີ້ເຮົາຈະເບິ່ງວ່າ ເຮົາຈະໄດ້ບົດຮຽນຫຍັງຈາກນິມິດຂອງຊາກາລີເລື່ອງຕະກຽງແລະຕົ້ນໝາກກອກ.
^ ຫຼາຍປີຕໍ່ມາໃນສະໄໝຂອງເນເຫມີ ມີກະສັດອີກອົງໜຶ່ງທີ່ຊື່ອາເຣຕາເຊເຣເຊໄດ້ເຮັດດີຕໍ່ຄົນຢິວຫຼາຍ.
^ ຊາກາລີ 4:8-10 (ລ.ມ.) ອ່ານວ່າ: “ພະເຢໂຫວາສົ່ງຂ່າວມາຫາຂ້ອຍວ່າ: ‘ເຊຣຸບບາເບນເປັນຜູ້ວາງຖານຮາກວິຫານນີ້ດ້ວຍມືຂອງລາວເອງ ແລະລາວຈະສ້າງໃຫ້ສຳເລັດດ້ວຍມືຂອງລາວຄືກັນ’ ແລ້ວເຈົ້າຈະຮູ້ວ່າພະເຢໂຫວາຜູ້ເປັນຈອມທັບສົ່ງຂ້ອຍມາຫາເຈົ້າ ‘ໃຜຈະດູຖູກຈຸດເລີ່ມຕົ້ນນ້ອຍໆ? ພວກເຂົາຈະດີໃຈທີ່ເຫັນເຊຣຸບບາເບນຖືສາຍດິ່ງ ຕາທັງເຈັດນີ້ຄືຕາຂອງພະເຢໂຫວາທີ່ເບິ່ງໄປທົ່ວໂລກ.’”
^ ຊາກາລີ 4:12, 14 (ລ.ມ.) ອ່ານວ່າ: “ແລ້ວຂ້ອຍກໍຖາມລາວອີກວ່າ ‘ງ່າຂອງຕົ້ນໝາກກອກ 2 ຕົ້ນທີ່ມີນ້ຳມັນສີຄຳໄຫຼອອກມາຜ່ານທໍ່ຄຳ 2 ທໍ່ໝາຍຄວາມວ່າແນວໃດ?’ ລາວບອກວ່າ ‘ມັນໝາຍເຖິງຜູ້ຖືກເຈີມ 2 ຄົນທີ່ຢືນຢູ່ຂ້າງໆພະເຈົ້າຜູ້ເປັນເຈົ້າຂອງໂລກທັງໝົດ.’”