LARTIK LETID 12
Eski To Trouv Seki Zakari Ti Trouve?
“‘Par mo lespri,’ Zeova Sef bann larme dir.”—ZAKA. 4:6.
KANTIK 73 Donn Nou Kouraz
REZIME *
1. Ki kitsoz ti rann bann Zwif bien zwaye?
BANN Zwif bien zwaye! Zeova “ti pous Lerwa Siris” pou liber bann Izraelit ki ti pe res dan Babilonn depi plizir lane. Lerwa ti fer enn lanons pou ki bann Zwif retourn dan zot pei, pou zot “rekonstrir lakaz Zeova, Bondie Izrael.” (Esdr. 1:1, 3) Sa ti enn extra bon nouvel, parski sa ti pou permet bann Zwif pou rekoumans ador Zeova dan pei ki Li ti donn zot.
2. Kan enn parti Zwif ti retourn Zerizalem, ki kitsoz zot ti reisi fer?
2 An 537 Avan Nou Lepok, enn premie parti Zwif ti ariv Zerizalem, ki avan ti kapital rwayom lesid dan Zida. Sa bann Zwif-la deswit ti koumans rekonstriksion tanp, ek an 536 Avan Nou Lepok, zot ti fini poz so fondasion.
3. Ki difikilte bann Zwif ti gagne?
3 Apre ki bann Zwif ti koumans rekonstriksion tanp, boukou dimounn ti koumans opoz ar zot. Bann dimounn ki ti res toutotour Zerizalem “ti touletan esey dekouraz bann Zwif ek fer zot per pou ki zot aret konstriksion.” (Esdr. 4:4) Sa ti bien difisil pou bann Zwif, me zot sitiasion ti vinn pli pir ankor! An 522 Avan Nou Lepok, enn nouvo lerwa Pers, Artakzerses, ti koumans dirize. * Bann dimounn ki ti opoz ar bann Zwif ti trouv sa sanzman-la kouma enn lokazion pou fer aret travay konstriksion tanp. Zot ti “servi lalwa pou fer bann dimounn soufer.” (Ps. 94:20) Parmi bann kitsoz ki zot ti dir Lerwa Artakzerses, zot ti dir li ki bann Zwif ti pe prepar zot pou rebel kont li. (Esdr. 4:11-16) Lerwa ti krwar zot bann mansonz ek li ti interdi rekonstriksion tanp. (Esdr. 4:17-23) Alor, bann Zwif ti aret konstriksion tanp.—Esdr. 4:24.
4. Ki Zeova ti fer kan ti interdi rekonstriksion tanp? (Izai 55:11)
4 Bann dimounn ki ti res toutotour Zerizalem ek ki pa ti ador Zeova, ek sertin dimounn dan gouvernman Pers, ti bien deside pou fer aret konstriksion tanp. Me Zeova ti anvi ki bann Zwif terminn konstriksion tanp, ek Zeova touletan realiz so bann proze. (Lir Izai 55:11. *) Zeova ti swazir Zakari kouma so profet, ek Li ti fer li trouv wit vizion bien inpresionan. Lerla, Zakari ti bizin partaz sa bann vizion-la ar bann Zwif pou ankouraz zot. Sa bann vizion-la ti ed bann Zwif pou konpran ki zot ti bizin pa per zot bann opozan, ek sa ti osi ankouraz zot pou kontign travay ki Zeova ti donn zot. Dan sinkiem vizion ki Zakari ti gagne, li ti trouv enn stenn lalanp ek de pie zoliv.
5. Ki nou pou examine dan sa lartik-la?
5 Parfwa, nou tou nou dekouraze. Alor, nou osi nou kapav gagn bann bienfe kan nou reflesi lor lankourazman ki Zeova ti donn bann Izraelit gras-a sinkiem vizion ki Zakari ti gagne. Kan nou konpran sa vizion-la, sa kapav ed nou pou kontign servi Zeova avek fidelite kan nou fer fas ar lopozision, kan nou bizin adapte ar bann sanzman, ek kan nou gagn bann instriksion ki nou pa tro konpran.
KAN BANN DIMOUNN OPOZ AR NOU
Dan enn vizion, Zakari trouv de pie zoliv ki pe donn delwil set lalanp ki lor enn stenn (Get paragraf 6)
6. Kouma vizion konsernan enn stenn lalanp ek de pie zoliv, ki trouv dan Zakari 4:1-3, ti donn bann Zwif kouraz? (Get zimaz lor kouvertir.)
6 Lir Zakari 4:1-3. * Vizion konsernan enn stenn lalanp ek de pie zoliv ti donn bann Zwif kouraz pou zot kontign zot travay malgre lopozision. Kouma? Eski to’nn remarke kouma sa bann lalanp-la kontign gagn delwil? Pou koumanse, delwil sorti dan sa de pie zoliv la ek li tom dan enn bol. Apre sa, delwil ki dan sa bol-la ranpli sakenn parmi sa set lalanp-la. Gras-a sa, sa bann lalanp-la kontign res alime san ki zot tengn. Zakari ti demande: “Ki sa bann kitsoz-la vedir?” Lerla, sa anz-la ti dir li seki Zeova ti dir: “‘Ni par lafors enn larme ni par pwisans bann zom, me par mo lespri,’ Zeova Sef bann larme dir.” (Zaka. 4:4, 6) Sa delwil ki sorti dan sa bann pie-la reprezant lespri sin Bondie, enn lafors extraordiner ki pou touletan existe. Lespri sin Zeova boukou pli pwisan ki larme bann Pers. Zeova ti pe soutenir bann Zwif ki ti pe rekonstrir tanp. Akoz sa, zot ti pou kapav terminn travay-la malgre lopozision. Sa mesaz-la ti bien ankourazan, pa vre! Ki sa ti inplike pou bann Zwif? Zot ti bizin ena konfians an Zeova ek kontign zot travay. Ek se samem ki zot ti fer, mem si lerwa Pers ti interdi rekonstriksion tanp.
7. Ki kitsoz ti ed bann Zwif ki ti pe rekonstrir tanp?
7 Ki kitsoz ti ed bann Zwif ki ti pe rekonstrir tanp? An 520 Avan Nou Lepok, finn ena enn sanzman. Enn nouvo lerwa Pers, Darius I, ti koumans dirize. Dan deziem lane so regn, li’nn al trouve ki linterdiksion pou rekonstrir tanp ti ilegal. Lerla, Darius ti dir bann Zwif ki zot ti bizin terminn konstriksion tanp. (Esdr. 6:1-3) Desizion ki Darius ti pran ti etonn tou dimounn. Me Darius pa ti zis donn bann Zwif permision pou rekoumans zot travay. Li ti osi donn lord bann dimounn ki ti res toutotour Zerizalem pou aret opoz ar bann Zwif, ek pou donn zot larzan ek tou seki zot ti bizin pou ki zot terminn zot travay. (Esdr. 6:7-12) Gras-a sa, bann Zwif ti reisi terminn konstriksion tanp dan mwins ki sink an, setadir an 515 Avan Nou Lepok.—Esdr. 6:15.
Kont lor lespri sin Zeova kan to fer fas ar lopozision (Get paragraf 8)
8. Kifer nou bizin ena kouraz kan nou fer fas ar lopozision?
8 Azordi osi, boukou serviter Zeova bizin fer fas ar lopozision. Par exanp, sertin parmi zot res dan bann pei kot nou laktivite lor restriksion. Dan sa bann pei-la, parfwa bann frer al dan prizon, ek zot bizin donn enn temwaniaz “devan bann gouverner ek bann lerwa.” (Mat. 10:17, 18) Parfwa, kan enn gouvernman sanze, kitfwa nou bann frer ek ser inpe pli lib pou servi Zeova. Ouswa, enn ziz ki bon, kapav pran enn desizion kot nou inpe pli lib pou servi Zeova. Ena lezot Temwin ki kitfwa bizin fer fas ar enn lot kalite lopozision. Mem si zot res dan enn pei kot zot lib pou servi Zeova, kitfwa zot bizin fer fas ar lopozision zot fami, ki bien determine pou anpes zot servi Zeova. (Mat. 10:32-36) Bien souvan, kan bann manb nou fami trouve ki zot pa pou kapav anpes nou servi Zeova, zot aret opoz ar nou. Ek parfwa, mem sertin ki ti bien opoze ar laverite, inn vinn bann Temwin Zeova. Alor, kan to bizin fer fas ar lopozision, pa bes lebra! Okontrer, to bizin ena kouraz. Zeova pou ed twa avek so lespri sin ki bien pwisan. Alor, to pena okenn rezon pou per!
KAN ENA BANN SANZMAN
9. Kifer sertin Zwif ti bien tris kan ti poz fondasion nouvo tanp?
9 Sertin Zwif ti plore kan ti poz fondasion nouvo tanp. (Esdr. 3:12) Zot ti trouv zoli tanp ki Salomon ti aranze, ek zot ti ena linpresion ki sa nouvo tanp-la ti pou “enn nanye ditou” konpare ar tanp Salomon. (Aze 2:2, 3) Kan zot ti konpar nouvo tanp ar ansien tanp, sa ti rann zot bien tris. Me vizion Zakari ti pou ed zot pou regagn zot lazwa. Kouma?
10. Dapre Zakari 4:8-10, kouma bann parol sa anz-la ti ed bann Zwif pou regagn zot lazwa?
10 Lir Zakari 4:8-10. * Kan sa anz-la ti dir ki bann Zwif ti pou “kontan ek zot pou trouv fil-a-plon dan lame [gouverner bann Zwif] Zorobabel,” ki li ti pe rod dir? Enn fil-a-plon se enn zouti ki montre si enn kitsoz so kote vertikal, li bien drwat. Bann parol sa anz-la ti fer bann Zwif konpran ki, mem si sa nouvo tanp-la ti paret mwin zoli ki tanp Salomon, so konstriksion ti pou fini ek Zeova ti pou aksepte li. Sa tanp-la ti pou fer plezir Zeova, alor bann Zwif ti bizin kontan tanp-la zot osi. Seki ti pli inportan pou Zeova, se ki dan sa nouvo tanp-la, bann Zwif ador Li kouma Li Li anvi. Si bann Zwif ti fer zefor pou ador Zeova dan bon fason, pou ki zot gagn so faver, zot ti pou regagn zot lazwa.
Gard enn latitid pozitif kan to sitiasion sanze (Get paragraf 11-12) *
11. Ki difikilte sertin serviter Zeova gagne azordi?
11 Boukou serviter Zeova kapav trouv sa difisil kan zot sitiasion sanze. Par exanp, sertin serviter spesial aplintan, ki’nn servi pandan lontan dan enn form servis, inn gagn bann nouvo afektasion. Ena lezot Kretien ki, akoz zot laz, finn bizin abandonn sertin responsabilite ki zot ti ena ek ki zot ti bien kontan. Li normal ki nou santi nou tris kan nou pas par sa bann sitiasion-la. O-koumansman, kitfwa nou pa tro konpran kifer inn pran sa desizion-la, ek nou pa tro dakor avek li. Kitfwa nou ti kontan kouma bann kitsoz ti ete avan. Ek kitfwa nou kapav santi nou dekouraze parski nou ena linpresion ki asterla, nou nepli itil pou Zeova. (Prov. 24:10) Kouma vizion Zakari kapav ed nou pou nou kontign fer nou best pou Zeova?
12. Kouma vizion Zakari kapav ed nou pou res zwaye kan nou sitiasion sanze?
12 Nou aksepte bann sanzman pli fasilman kan nou trouv bann kitsoz parey kouma Zeova. Zeova pe fer bann kitsoz extraordiner azordi. Anplis, nou ena gran privilez pou travay ansam avek Li. (1 Kor. 3:9) Kitfwa nou bann responsabilite inn sanze, me lamour ki Zeova ena pou nou pa’nn sanze. Alor, si to sitiasion inn sanze akoz bann desizion ki lorganizasion inn pran, pa perdi to letan pou reflesi lor kifer finn ena sa bann sanzman-la. Olie ki to mazinn “lepok lontan,” demann Zeova pou ed twa pou trouv sa bann sanzman-la dan enn fason pozitif. (Ekle. 7:10) Ek olie ki to mazinn bann kitsoz ki to nepli kapav fer, reflesi ki kitsoz to kapav fer asterla. Vizion Zakari ed nou pou konpran linportans pou gard enn latitid pozitif. Si nou fer sa, nou pou res fidel anver Zeova ek nou pou res zwaye, mem si nou sitiasion sanze.
KAN NOU GAGN DIFIKILTE POU SWIV BANN INSTRIKSION
13. Kifer sertin Izraelit ti panse ki sa ti enn move lide pou rekoumans konstrir tanp?
13 Rekonstriksion tanp ti interdi. Kanmem sa, bann zom ki Zeova ti swazir pou diriz sa travay-la, setadir Gran Pret Zeshwa ek Gouverner Zorobabel, “ti koumans rekonstrir tanp Bondie.” (Esdr. 5:1, 2) Sertin Zwif kitfwa ti panse ki sa ti enn move lide. Kifer? Parski zot bann lennmi ti pou trouve ki zot pe rekoumans konstrir tanp ek bann-la ti pou fer tou seki zot kapav pou anpes zot. Pou zot fer travay-la, Zeshwa ek Zorobabel ti bizin pena okenn dout ki Zeova ti pou soutenir zot. Ek Zeova vremem ti soutenir zot! Kouma?
14. Dapre Zakari 4:12, 14, kouma Zeova ti rasir Gran Pret Zeshwa ek Gouverner Zorobabel?
14 Lir Zakari 4:12, 14. * Dan sa vizion-la, anz Zeova ti dir profet Zakari ki sa de pie zoliv la ti reprezant “de dimounn ki Bondie inn swazir.” Sa de dimounn-la ti Zeshwa ek Zorobabel. Sa de zom-la ti koumadir pe debout “akote ar Lesegner later antie,” setadir Zeova. Sa ti vremem enn gran loner! Zeova ti fer zot konfians. Alor, bann Izraelit ti kapav fer konfians sa de zom-la ek fer tou seki bann-la ti pe demann zot, parski Zeova ti pe servi sa de zom-la pou diriz travay rekonstriksion.
15. Kouma nou kapav montre ki nou respekte direksion ki Zeova donn nou atraver so Parol, Labib?
15 Azordi, Zeova pe kontign diriz so pep gras-a so Parol, Labib. Dan Labib, Zeova dir nou kouma nou kapav ador Li dan bon fason. Kouma nou kapav montre ki nou respekte direksion ki Zeova donn nou atraver so Parol? Nou fer sa kan nou pran letan pou lir Labib bien ek pou konpran li. Demann tomem: ‘Kan mo lir Labib ouswa enn piblikasion, eski mo pran letan pou reflesi lor seki mo lir? Eski mo fer zefor pou konpran bann verite Biblik ki “difisil pou konpran”? Ouswa eski mo zis lir zot vit-vit?’ (2 Pier 3:16) Si nou pran letan pou reflesi bien lor seki Zeova ansegn nou, nou pou kapav swiv so direksion ek akonpli nou minister.—1 Tim. 4:15, 16.
Ena konfians dan bann instriksion “lesklav fidel ek saz” (Get paragraf 16) *
16. Kan nou pa tro konpran bann instriksion ki “lesklav fidel ek saz” donn nou, ki kitsoz kapav ed nou pou obeir zot?
16 Enn lot fason ki Zeova diriz nou se atraver “lesklav fidel ek saz.” (Mat. 24:45, NW) Me parfwa, lesklav fidel ek saz kapav donn nou bann instriksion ki nou pa tro konpran. Par exanp, zot kapav donn nou bann instriksion pou prepar nou pou fer fas ar bann katastrof natirel, ki kitfwa zame pa pou arive dan landrwa kot nou reste. Ouswa, kitfwa nou kapav panse ki bann prekosion ki lesklav fidel ek saz pe dir nou pran akoz pandemi, zot tro exazere. Ki nou bizin fer si nou panse ki bann instriksion ki nou pe gagne, zot pa pratik ouswa lozik? Nou kapav reflesi lor bann bienfe ki bann Zwif ti gagne kan zot ti fer seki Zeshwa ek Zorobabel ti demann zot. Nou kapav osi reflesi lor bann lezot lexanp Biblik ki nou’nn lir. Parfwa, bann serviter Zeova inn gagn bann instriksion ki kitfwa pa ti paret lozik ek pratik. Me alafin, sa finn sov zot lavi!—Ziz 7:7; 8:10.
TROUV SEKI ZAKARI TI TROUVE
17. Ki lefe vizion konsernan enn stenn lalanp ek de pie zoliv ti ena lor bann Zwif?
17 Sinkiem vizion ki Zakari ti gagne kitfwa ti inpe kourt. Selman, li ti ed bann Zwif pou ena enn latitid pozitif lor zot travay ek zot ladorasion pou Zeova. Ek kan zot ti met an pratik seki zot ti aprann ar vizion Zakari, zot ti santi ki Zeova ti pe soutenir zot ek diriz zot. Gras-a so lespri sin, Zeova ti ed zot pou ki zot res zwaye ek zot kontign zot travay.—Esdr. 6:16.
18. Ki lefe vizion Zakari kapav ena lor twa?
18 Vizion Zakari konsernan enn stenn lalanp ek de pie zoliv kapav ena enn gran lefe lor twa. Kouma nou’nn trouve dan sa lartik-la, li kapav ed twa pou gagn lafors ki to bizin pou to fer fas ar lopozision. Li kapav osi ed twa pou res zwaye kan to sitiasion sanze. Ek li kapav ed twa pou ena konfians dan bann instriksion ki kitfwa to pa tro konpran, ek pou obeir zot. Ki to bizin fer kan to gagn bann difikilte dan to lavi? Premierman, trouv seki Zakari ti trouve, setadir bann prev ki Zeova pe pran swin so bann serviter. Ek apre sa, azir, fer Zeova konfians, ek kontign servi Li avek tou to leker. (Mat. 22:37) Si to fer sa, Zeova pou ed twa pou to kontign servi Li dan lazwa pou touletan.—Kol. 1:10, 11.
KANTIK 7 Zeova, Nou Lafors
^ par. 5 Zeova ti fer profet Zakari trouv bann vizion bien inpresionan. Seki Zakari ti trouve ti donn li ek bann serviter Bondie, lafors pou sirmont bann difikilte ki zot ti gagne kan zot ti pe retabli vre ladorasion. Sa bann vizion-la kapav donn nou osi lafors pou kontign servi Zeova malgre nou bann difikilte. Dan sa lartik-la, nou pou get bann leson inportan ki nou kapav aprann ar enn vizion ki Zakari ti gagne, vizion konsernan enn stenn lalanp ek de pie zoliv.
^ par. 3 Plizir lane plitar, kan Neemi ti Gouverner, enn lot lerwa ki ti apel Artakzerses ti pe dirize, me li li ti bon anver bann Zwif.
^ par. 4 Izai 55:11: “Li parey pou parol ki sorti dan mo labous. Li pa pou retourn ver mwa san okenn rezilta, me vremem li pou realiz tou seki fer mwa plezir, ek li pou reisi akonpli seki mo’nn avoy li fer.”
^ par. 6 Zakari 4:1-3: “1 Sa anz ki ti koz avek mwa la, ti revinn get mwa ek li ti lev mwa, parey kouma lev enn kikenn ki pe dormi. 2 Apre, li ti demann mwa: ‘Ki to pe trouve?’ Mo ti reponn li: ‘Mo trouv enn stenn an-or, ek ena enn bol lao li. Lor stenn-la, ena set lalanp, wi set, ek ena set tiyo ki konekte ar bann lalanp ki lor sa stenn-la. 3 Ek akote ar stenn-la, ena de pie zoliv, enn dan kote drwat bol-la ek enn dan so gos.’”
^ par. 10 Zakari 4:8-10: “8 Zeova inn rekoz avek mwa. Li’nn dir mwa: 9 ‘Se lame Zorobabel ki’nn poz fondasion sa lakaz-la, ek se so lame ki pou terminn li.’ Ek vremem zot pou kone ki se Zeova, Sef bann larme, ki’nn avoy mwa ver zot. 10 ‘Parski kisannla ki’nn mepriz lepok kot bann kitsoz ti koumanse tigit par tigit? Parski zot pou kontan ek zot pou trouv fil-a-plon dan lame Zorobabel. Sa set lizie-la se bann lizie Zeova ki pe get lemond antie.’”
^ par. 14 Zakari 4:12, 14: “12 Mo’nn demann li enn deziem fwa: ‘Lor sa bann pie zoliv-la, sa de touf brans kot enn delwil kouler lor pe koule atraver de tiyo an or la, ki zot reprezante?’ 14 Li ti dir: ‘Se de dimounn ki Bondie inn swazir ek zot pe debout akote ar Lesegner later antie.’”
