1. Bõe la Zʋɩf-rãmbã wʋme, tɩ ra yaa koe-noog tɛkẽ?

 ZƲƖF-RÃMBÃ ra wa n kɩdemda sũ-noogo. Bala Wẽnnaam a Zeova ra kɩtame tɩ Pɛrs rĩm a Sirus kõ Israyɛll neb nins sẽn da be yembd Babilon na maan yʋʋm wʋsgã sor tɩ b na n looge. Rĩmã yiisa noore, n yeel tɩ Zʋɩf-rãmbã leb b tẽngẽ wã n tɩ lebs n “me Sẽn-ka-saab sẽn yaa Israyɛll nebã Wẽnnaamã roogo.” (Ɛsd. 1:1, 3) Ra yaa koe-noog tɛkẽ! Woto rat n yeelame tɩ b paamame n na n le tɩ tũud Wẽnnaam sɩd-sɩdã, tẽng ning a sẽn da kõ-bã pʋgẽ.

2. Zʋɩf-rãmbã sẽn yi yembd n wa wã, bõe la b tõog n maan pipi yʋʋmdã pʋgẽ?

² Zʋɩf-rãmb nins sẽn yɩ pipi n yi Babilonnã taa Zerizalɛm yʋʋmd 537 sẽn deng a Zeezi rogmã. Zerizalɛm ra yaa Zida soolmã sẽn da be nug-rɩtgã na-tẽnga. B sẽn ta wã bala, b sɩnga wẽnd-doogã meebo. Yʋʋmd 536 sẽn deng a Zeezi rogmã tɩ b zoe n yẽbga roogã n sa.

3. Ãnd dãmb n gɩdg Zʋɩf-rãmbã tʋʋmdã, la wãn to la b maan rẽ?

³ B sẽn da ket n kẽngd taoor ne wẽnd-doogã meebã, neb n yik n na n gɩdg b tʋʋmdã. Tẽn-yagsã neb ‘bao n na n booga Zida nebã raoodo, la b kẽes-b rabeem, sẽn na n yɩlẽ tɩ b bas Wẽnnaam doogã meebo.’ (Ɛsd. 4:4) Ra pa nana ne Zʋɩf-rãmbã ye. Yellã pʋd n kengame. La yʋʋmd 522 sẽn deng a Zeezi rogmã, Pɛrs soolmã paama rĩm-paall t’a yʋʋr boond t’a Artazɛgzɛs. * Bɛɛbã gesame tɩ yaa segb b sẽn paame, n na n kɩt t’a “yiis noor sẽn paasd neb toogo,” sẽn na yɩl tɩ b bas wẽnd-doogã meebo. (Yɩɩn. 94:20) B gʋlsa lɛtr n kõ rĩmã, n wilg tɩ Zʋɩf-rãmbã magdame n na n kɩɩs-a. (Ɛsd. 4:11-16) Rĩmã tẽe b ziri wã, n sɩd yiis noor n  gɩdg wẽnd-doogã meebã. (Ɛsd. 4:17-23) No-kãng kɩtame tɩ Zʋɩf-rãmbã bas roogã meebo.—Ɛsd. 4:24.

4. Bɛɛbã sẽn wa n gɩdg wẽnd-doogã meebã, bõe la a Zeova maan-yã? (Ezayi 55:11)

⁴ Tẽngã neb nins sẽn da pa tũud a Zeova wã, n paas Pɛrs goosneema wã neb kẽer baoo ne b sũy fãa n na n gɩdg wẽnd- doogã meebo. La a Zeova yẽ raabã ra yaa Zʋɩf-rãmbã me roogã n baase. A Zeova pidsda a raab wakat fãa. (Karm-y Ezayi 55:11.) A yãka rao sẽn tar raood t’a yʋʋr boond t’a Zakari t’a na n yɩ a no-rɛɛsa. A vẽneg-a lame t’a yã bũmb toor-toor a nii, n segd n taas Zʋɩf-rãmbã tɩ keng b raoodo. Sõng-b lame tɩ b bãng tɩ b pa segd n zoe rabeem bɛɛbã sẽn da namsd-bã yĩnga, la tɩ b segd n kell n kẽnga taoor ne a Zeova tʋʋmdã n da bas ye. Bũmb a nu-n-soab a Zakari sẽn yã a vẽnegrã pʋgẽ yɩɩ fɩtl-doagendga, la oliiv tɩɩs a yiibu.

5. Bõe la d na n yã sõs-kãngã pʋgẽ?

⁵ D fãa mi n komsa raood wakat ninga. Bũmb a nu soabã a Zeova sẽn vẽneg a Zakari t’a yã sẽn na yɩl t’a tall rẽ n keng Israyɛll nebã raoodã tõe n kenga tõnd me raoodo. D sã n wʋm a Zakari sẽn yã bũmb ningã võor sõma, tõe n sõnga tõnd tɩ d kell n tũ a Zeova ne d sũur fãa b sã n wa namsd tõnd d tũudmã yĩnga, d yɛlã sã n wa toeeme, la a Zeova siglgã sã n wa kõ-d noor tɩ d pa wʋmd a võore.

6. Wãn to la fɩtl-doagendgã ne oliiv tɩɩs a yiibã yell b sẽn gomd Zakari 4:1-3 sõng Zʋɩf-rãmbã tɩ b paam raoodo? (Ges-y sebrã pipi neng fotã.)

⁶ Karm-y Zakari 4:1-3. Fɩtl-doagendgã ne oliiv tɩɩs a yiibã a Zakari sẽn yã vẽnegrã pʋgẽ wã sõnga Zʋɩf-rãmbã tɩ b paam raood n kell n kẽng taoor ne b tʋʋmdã, baa ne bɛɛbã sẽn da namsd-bã. Wãn to? Kaam n da be fɩtl-doagendgã pʋgẽ wakat fãa. Kaamã ra yita oliiv tɩɩs a yiibã pʋgẽ n sigd fɩtl-doagendgã laagã pʋgẽ, n yit be masã n kẽed fɩtl-dãmb a yopoe wã sẽn be fɩtl-doagendgã zugã, tɩ wita. Kaamã ra kɩtame tɩ fɩtl-dãmbã wit wakat fãa. Rẽ la a Zakari sok malɛkã yaa: “M Soaala, bõn- kãensã rat n yeelame tɩ bõe?” A Zeova leoka a Zakari ne malɛkã maasem yaa: “Ka ne gãndaalem, leb n ka ne pãng me ye. Yaa ne mam sɩɩgã. Yaa maam a Sẽn-Ka-Saab sẽn yaa Saasẽ-Pãng-Soabã n yeele.” (Zaka. 4:4,6) Kaamã sẽn da yit tɩɩsẽ wã makda a Zeova vʋʋsem sõngã sẽn tar pãng wʋsgo, tɩ d tõe n paam-a wakat fãa wã. A Zeova vʋʋsem sõngã pãng yɩɩda Pɛrs soolmã sodaasã fãa pãng hal zĩig sẽn zãre. A Zeova sẽn da be ne sẽn met-b wẽnd-doogã yĩnga, bɛɛbã ra pa na n tõog n gɩdg-b tɩ b pa baas wẽnd-doogã meebã ye. Ad sɩd da yaa koɛɛg sẽn kengd raoodo. Dẽnd Zʋɩf-rãmbã sẽn da segd n maan bal yaa b teeg a Zeova, n kell n kẽng taoor ne tʋʋmdã. Sɩd me, yaa woto bal kɛpɩ la b maan-yã, baa ne b sẽn da ket n gɩdg b tʋʋmdã.

7. Bõe n wa n maane, tɩ sõng sẽn da met-b wẽnd-doogã?

⁷ Bũmb n wa n maan tɩ sõng tɩ wẽnd- doogã meeb na n kell n kẽng taoore. Bõe n maane? Yʋʋmd 520 sẽn deng a Zeezi rogmã, a Darius pipi soabã n lebg Pɛrs soolmã rĩma. A naamã yʋʋm a yiib- n- soabã pʋgẽ, a yãame tɩ b sẽn gɩdg wẽnd- doogã meebã kɩɩsda tẽngã noyã. Rẽ n so t’a kõ sore, tɩ b na n baas tʋʋmdã. (Ɛsd. 6:1-3) Kibarã linga nebã fãa. La rĩmã pʋd n maana sẽn yɩɩd rẽ. A yiisa noor n wilg tẽn-yagsã tɩ b bas Zʋɩf-rãmbã namsgo, la b pʋd n kõ-b ligd la teed n teel tʋʋmdã.  (Ɛsd. 6:7-12) Woto sõnga Zʋɩf-rãmbã tɩ b tõog n baas wẽnd-doogã meeb yʋʋm a naas la kiis a wãn pʋgẽ bala, rat n yeel tɩ yʋʋmd 515 sẽn deng a Zeezi rogmã.—Ɛsd. 6:15.

8. Bõe yĩng tɩ y tõe n tall raoodo, b sã n wa namsd yãmb y tũudmã yĩnga?

⁸ Rũndã-rũndã me, a Zeova Kaset rãmb wʋsg la b namsda, b tũudmã yĩnga. Wala makre, sãnda bee tẽns b sẽn gɩdg d tũudmã tʋʋm kẽere. Tẽn-kãens pʋsẽ, b mi n talla d tẽed-n-taas n kẽng “guvɛrneer-dãmb la rĩm-dãmb nengẽ,” tɩ yɩ kaset nin-kãens yĩnga. (Mat. 10:17, 18) Wakat ning me, b sã n toeem goosneema taoor dãmba, tõe n kɩtame tɩ d paam sor n tʋmd d tũudmã tʋʋm tɩ gɩdgr kae ye. Bʋ-kaood ning me tõe n kaoo bʋʋd tɩrga, tɩ sõng tɩ d paam sor n tʋmd d tũudmã tʋʋma. A Zeova Kaset rãmb kẽer segda zu-loees a taaba. Baa ne goosneema wã sẽn pa gɩdg d tũudmã tẽns nins pʋsẽ b sẽn be wã, b zakã rãmb maanda b sẽn tõe fãa n dat tɩ b bas a Zeova tũubu. (Mat. 10:32-36) La naoor wʋsgo, b basd-b-la namsgo, b sã n wa bãng tɩ b pa tol n tõe tɩ b bas a Zeova tũub ye. Neb kẽer sẽn da namsd a Zeova Kaset rãmbã ne toolem pĩndã wa n lebga d tẽed-n-taas sẽn tar yẽesem. Rẽ wã, b sã n wa namsd yãmb y tũudmã yĩng bɩ y ra bas a Zeova tũub ye. Tall-y raoodo. A Zeova ne a vʋʋsem sõngã sẽn tar pãng wʋsgã bee ne-yã. Dẽnd y pa segd n zoe rabeem ye.

9. Bõe yĩng tɩ Zʋɩf-rãmb kẽer sũy sãam wʋsgo, b sẽn wa n yẽbg wẽnd-do-paallã?

⁹ B sẽn wa n yẽbg wẽnd-doogã, Zʋɩf-rãmb kẽer sẽn da lebg nin-kẽemb yãbame. (Ɛsd. 3:12) B ra yãa wẽnd- do- neerã a Salomo sẽn da me wã. La b tagsame tɩ wẽnd- do- paallã b sẽn metã “ka baa fɩ” a Salomo wẽnd- doogã taoor ye. (Aaze 2:2, 3) B sũy sãama wʋsgo, b sẽn dɩk wẽnd-do-paallã n mak ne wẽnd-do-kʋdrã. A Zakari sẽn yã bũmb ning a vẽnegrã pʋgẽ wã ra na n sõng-b lame tɩ b le paam sũ-noogo. Wãn to?

10. Wãn to la bũmb ning malɛkã sẽn yeel tɩ be Zakari 4:8-10 sõng Zʋɩf-rãmbã tɩ b le paam sũ-noogo?

¹⁰ Karm-y Zakari 4:8-10. Malɛkã sẽn yeel tɩ “b sã n wa yãnd namdã sẽn be [guvɛrneer] a Zorobabɛll nugẽ wã, b na n kɩdmame” wã, a ra rat n yeelame tɩ bõe? B sẽn boond a soab tɩ namdã yaa wĩir buud metbã sẽn tar n magd lalsã n get sã n sɩd  yaa tɩrga. Malɛkã ra ratame tɩ Wẽnnaam nin-buiidã bãng tɩ baa kẽer sẽn get tɩ wẽnd-doogã pa ta a soab ning a Salomo sẽn me wã, b na n tõog n me-a lame n baase, tɩ zems ne a Zeova sẽn dat t’a yɩ to-to wã me. A Zeova sũur da nooma ne wẽnd-doogã. Dẽnd bãmb me sũy ra segd n yɩɩ noog ne wẽnd-doogã. A Zeova nifẽ, sẽn da tar yõod n yɩɩd yaa bũmb ning b sẽn na n maan doogã pʋgẽ wã zems ne a raabã. Sẽn da pak Zʋɩf-rãmbã sã n da yaa b modg n tũ a Zeova wa a sẽn datã la b paam a barka, b ra na n le paama b sũ-noogã.

11. Bõe n pa nana ne a Zeova Kaset rãmb kẽer rũndã-rũndã?

¹¹ Tõnd sʋkã neb wʋsg yɛl sã n wa toeeme, pa nana ne-b ye. Neb kẽer da kẽesa b mens zãng a Zeova tʋʋmdã pʋgẽ n kaoos yʋʋm wʋsgo, tɩ b wa kɩt tɩ b toeem tʋʋmde. Yɩɩ tɩlɛ tɩ sãnda me bas tʋʋmd b sẽn da nong wʋsgo, b yʋʋmã sẽn vẽsg yĩnga. Sã n wa yaa woto ne-do, d sũur pa tõe n pa sãam ye. Sɩngrẽ wã, d tõeeme n pa wʋmd toeengã võore, bɩ n pa rat n sak ye. D tõe n tagsame tɩ d yɛlã sẽn da yaa to-to pĩndã n são. Sẽn paase, d sũur tõe n sãamame, tɩ d tagsdẽ tɩ d pa le tar yõod wʋsg a Zeova nifẽ ye. (Yel. 24:10) Wãn to la a Zakari vẽnegrã tõe n sõng tõnd tɩ d ket n maand d sẽn tõe fãa n tũud d Wẽnnaamã?

12. Wãn to la a Zakari vẽnegrã tõe n sõng-d tɩ d kell n tall sũ-noogo, d yɛlã sã n wa toeeme?

¹² D sã n get yɛlã wa a Zeova sẽn get-b to-to wã, d yɛlã sã n wa toeeme, d sũur pa na n sãam ye. A Zeova maanda bõn- kãsems rũndã-rũndã. Tõnd paamame n yaa a tʋmd- n- taase, tɩ yaa zu- zẽkr meng- menga. (1 Kor. 3:9) Tʋʋmd ning d sẽn tʋmd a Zeova siglgã pʋgẽ wã tõe n wa toeemame. La a Zeova sẽn nong tõnd to-to wã pa toeemd ye. Dẽnd b sã n wa kɩt tɩ d toeem tʋʋmd a Zeova siglgã pʋgẽ, bɩ d da sidgd wakat fãa n sokd d meng bõe yĩng la b sẽn kɩt tɩ d toeem tʋʋmdã ye. Da le tagsd-y “wakat sẽn loog poorẽ wã yell ye.” Kos-y-yã a Zeova t’a sõng-y tɩ y tags toeengã sẽn na n naf-y to-to wã yelle. (Koɛ. 7:10) Ra tags-y y sẽn pa le tõe n maanã yell ye. Tagsd-y bũmb nins fãa y sẽn ket n tõe n maanã yelle. A Zakari vẽnegrã sõngda tõnd tɩ d bãng tɩ d segd n kell n talla yam-sõngo. Woto, baa d yɛlã sã n wa toeeme, d na n kell n talla sũ-noogo, la d kell n maan sɩd ne a Zeova.

13. Tõe tɩ Israyɛll neb kẽer tagsame tɩ b sẽn yeel tɩ b lebs n sɩng wẽnd-doogã meebã pa yam tʋʋmd ye. Bõe yĩnga?

¹³ B ra gɩdga Zʋɩf-rãmbã tɩ b ra lebs n me wẽnd-doogã ye. La baa ne rẽ, maan- kʋʋdb-kãsem a Zozuwe ne guvɛrneer a Zorobabɛll b sẽn da yãk tɩ b lʋɩt tʋʋmdã taoorã “yikame n sɩng Wẽnnaam doogã” meebo. (Ɛsd. 5:1, 2) Tõe tɩ Zʋɩf-rãmb kẽer tagsame tɩ b sẽn maanã ka neng ye. La b ra pa tõe n soos n me roogã tɩ nebã pa bãng ye. B ra miime me tɩ bɛɛbã na n maana b sẽn tõe fãa sẽn na yɩl n gɩdg tʋʋmdã. Dẽnd a Zozuwe ne a Zorobabɛll sẽn da yaa taoor lʋɩtbã ra segd n paama kaset sẽn wilgd t’a Zeova teend-b lame. B sɩd paama kaseto. Wãn to?

14. Wa Zakari 4:12, 14 sẽn wilgdã, kaset-bʋg la maan-kʋʋdb kãsem a Zozuwe ne guvɛrneer a Zorobabɛll paam-yã, tɩ keng b raoodo?

¹⁴ Karm-y Zakari 4:12, 14. Vẽnegrã bab-kãnga pʋgẽ, malɛkã wilga Wẽnnaam no-rɛɛsã tɩ oliiv tɩɩs a yiibã makda “neb a yiib nins b sẽn pʋdg ka-paalgã b zutã,” rat n yeel t’a Zozuwe ne a Zorobabɛll. Malɛkã wilgame tɩ yaa wa nin-kãensã a yiibã ‘yasa a Zeova sẽn yaa dũni gill Soaalã taoore.’ Woto ra yaa zũ-zẽkr meng-menga. A Zeova ra kɩs-b-la sɩda. Dẽnd Israyɛll nebã ra segd n sak n maana bũmb nins fãa b sẽn na n yeel-b tɩ b maanã, bala a Zeova ra tũnugda ne-b n wilgd a nebã sore.

15. Bõe la d tõe n maan tɩ wilg tɩ d sakdame t’a Zeova tũnugd ne Biiblã n wilgd-d sore?

¹⁵ Rũndã-rũndã, bũmb a ye a Zeova sẽn tũnugd ne n wilgd a nin-buiidã sor yaa Biiblã sẽn yaa a Gomdã. Seb-kãng pʋgẽ, a togsa d sẽn tõe n tũ-a to-to tɩ ta a yam. Bõe la d tõe n maan n wilg tɩ d sakdame tɩ Wẽnnaam Gomdã wilgd-d sore? Yaa d sẽn na n maagd d yĩng n karemd-a, la d baood n wʋmd a goamã võore. Rẽ wã, sok-y y meng yaa: ‘M sã n wa karemd Biiblã wall sebr siglgã sẽn yiisi, m maagda m yĩng n bʋgs a zug bɩ? M maanda vaeesg n tõog n wʋm Biiblã goam nins “võor wʋmb sẽn yaa toogã” bɩ? Bɩ m karemd-a-la var-var bala?’ (2 Pɩy. 3:16) D sã n maagd d yĩng n bʋgsd a Zeova sẽn zãmsd tõnd bũmb ninsã zugu, na n yɩɩ nana ne-d tɩ d tõog n tũ a sẽn yetã, la d tõog me n moon koɛɛgã sõma.—1 Tɩm. 4:15, 16.

16. “Tʋm-tʋmd sẽn tũud sɩd la sẽn tar yamã” sã n wa kõ-d noor tɩ d pa wʋmd a võor sõma, bõe n na n sõng tõnd tɩ d tõog n tũ?

¹⁶ A Zeova tũnugda ne “tʋm-tʋmd sẽn  tũud sɩd la sẽn tar yamã” me n wilgd a nin-buiidã sore. (Mat. 24:45) Wakat ninga, tʋm-tʋmdã tõe n yeelame tɩ d maan bũmbu, tɩ d pa wʋmd a võor sõma ye. Wala makre, b tõe n wa kõ-d-la noy takɩ, sẽn na n sõng-d tɩ d wa tõog n põs sabab-wẽng sasa, tɩ d yaool n tagsdẽ tɩ yell a woto buud pa tõe n maan tõnd sẽn beẽ wã ye. D tõeeme me n tags tɩ bã-longdg sasa, tʋm-tʋmdã yaa n maanda gũusg tɩ loog noore. B sã n wa kõ-d noor tɩ d tagsdẽ tɩ pa tar nenga, bõe la d segd n maane? D tõe n tagsa Israyɛll nebã sẽn naf to-to wã yelle, b sẽn sak n tũ noy nins a Zeova sẽn tũnug ne a Zozuwe la a Zorobabɛll n kõ-bã. D leb n tõe n tagsa Biiblã kibay a taab d sẽn da karem yelle. Wakat kẽere, b kõo Wẽnnaam nin-buiidã noor sẽn wõnd ka neng ninsaal nif gesgẽ ye. La yaool n fãag-b lame.—Bʋk. 7:7; 8:10.

17. Wãn to la fɩtl-doagendgã ne oliiv tɩɩs a yiibã a Zakari sẽn yã a vẽnegrã pʋgẽ wã sõng Zʋɩf-rãmbã?

¹⁷ Tõe tɩ bũmb a nu-n-soabã a Zakari sẽn yã wã yɩɩ koɛɛg-koɛɛg bala. La sõnga Zʋɩf-rãmbã tɩ b kell n wɩng ne b tʋʋmdã, la b ket n tũud a Zeova ne yẽesem. La b sẽn sak n tũ bũmb ning a Zakari vẽnegrã sẽn sõng-b tɩ b bãngã, b yãame t’a Zeova nong-b lame, la t’a wilgd-b-la sore. A Zeova tũnuga ne a vʋʋsem sõngã sẽn tar pãng wʋsgã n sõng-b tɩ b kell n kẽng taoor ne b tʋʋmdã, la b le paam b sũ-noogã.—Ɛsd. 6:16.

18. Wãn to la a Zakari vẽnegrã tõe n sõng yãmb y vɩɩmã pʋgẽ?

¹⁸ A Zakari vẽnegrã sẽn gomd fɩtl doangdg ne oliiv tɩɩs a yiibã yellã tõe n sõng-y-la wʋsg y vɩɩmã pʋgẽ. Wa d sẽn yã wã, tõe n sõng-y lame tɩ y paam pãnga, n tõog n yals kãn-kãe bɛɛbã taoore, la sõng-y me tɩ y kell n tall sũ-noogo, baa y yɛlã sã n wa toeeme. Leb n tõe n sõng-y lame tɩ y kɩs sɩda, n sak n tũ noor b sẽn kõ-yã, baa y pa wʋmd noorã võore. Sã n wa pa nana ne-yã, bõe la y segd n maane? Pipi, modg-y n yã-y bũmb ning a Zakari sẽn yã wã, rat n yeel tɩ kaset sẽn wilgd t’a Zeova geta a nin-buiidã yelle. Rẽ poor bɩ y teeg a Zeova, n ket n tũud-a ne y sũur fãa tɩ wilg tɩ y tũuda bũmb nins y sẽn bãngã. (Mat. 22:37) Y sã n maan woto, a Zeova na n sõng-y lame tɩ y kell n tũ-a ne sũ-noog wakat fãa yĩnga.—Kol. 1:10, 11.