1. Вавилоны уацары чи уыд, уыцы дзуттӕгтӕ цавӕр цины хабар фехъуыстой?

 АДӔМ ӕндӕр кой нал кодтой! Йегъовӕ Персы паддзах Киры «сразӕнгард кодта, ӕмӕ Кир уынаффӕ рахаста» израилӕгты ссӕрибар кӕныны тыххӕй. 70 азы дӕргъы уыдысты уацары Вавилоны. Паддзах фехъусын кодта, дзуттӕгтӕ сӕ зӕхмӕ кӕй хъуамӕ аздӕхой ӕмӕ ногӕй кӕй хъуамӕ саразой, «Израилы Хуыцау Йегъовӕйӕн... Иерусалимы цы хӕдзар уыд, уый» (Езд. 1:1, 3). Уый уыд стыр цины хабар! Уый ууыл дзурӕг уыд, ӕмӕ та дзуттӕгтӕ ӕцӕг Хуыцауӕн кувдзысты, кӕй сын радта, уыцы зӕххыл.

2. Дзуттӕгтӕй Иерусалиммӕ фыццаг чи ӕрыздӕхт, уыдонӕн цы бантыст?

² Н. э. размӕ 537 азы дзуттӕгтӕй фыццӕгтӕ Иерусалиммӕ ӕрхӕццӕ сты. Уый раздӕр уыди хуссар паддзахад Иудӕйы сӕйраг горӕт. Уыдон уайтагъд кувӕндон аразынмӕ бавнӕлдтой. Ӕмӕ н. э. размӕ 536 азмӕ йӕ бындур ӕвӕрд ӕрцыд!

3. Дзуттӕгтӕн сӕ ныхмӕ чи рацыд?

³ Фӕлӕ стӕй уыцы дзуттӕгтӕн сӕ алыварс цӕрӕг адӕм «се уонг марын ӕмӕ сӕ ныфс сӕттын райдыдтой, цӕмӕй Хуыцауы хӕдзар мауал арӕзтаиккой» (Езд. 4:4). Уый фӕстӕ та уавӕр ноджы фыддӕр фӕци. Н. э. размӕ 522 азы Персы паддзах сси Артаксеркс *. Дзуттӕгты ныхмӕ чи цыд, уыдон сфӕнд кодтой «закъоны фӕрцы» фыдхъуыддаг саразын – кувӕндоны арӕзтад ӕрлӕууын кӕнын (Пс. 94:20). Гъемӕ Артаксерксмӕ фыстӕг ныффыстой ӕмӕ дзуттӕгтӕй алы мӕнг ныхӕстӕ фӕкодтой. Суанг ма афтӕ дӕр ныффыстой, ӕмӕ йӕ ныхмӕ цӕуынц (Езд. 4:11–16). Паддзах сын сӕ ныхӕстыл баууӕндыд, ӕмӕ бардзырд радта, цӕмӕй дзуттӕгтӕ кувӕндон мауал арӕзтаиккой (Езд. 4:17–23). Ӕмӕ уый тыххӕй арӕзтад ӕрлӕууыд (Езд. 4:24).

4. Знӕгтӕ кувӕндоны арӕзтад куы ’рлӕууын кодтой, уӕд Йегъовӕ куыд бакодта? (Исай 55:11).

 ⁴ Уыцы зӕххыл цӕрӕг адӕмтӕн ӕмӕ Персы паддзахады стыр хицӕуттӕй кӕмӕндӕрты сӕ фӕнд уыд кувӕндоны арӕзтад бынтондӕр ӕрлӕууын кӕнын. Йегъовӕйӕн та йӕ фӕнд уыд уыцы хъуыддаг кӕронмӕ ахӕццӕ кӕнын. Ӕмӕ уый йӕ фӕнд алкӕддӕр сӕххӕст кӕны. (Бакӕс Исайы 55:11.) Йегъовӕ хъӕбатыр нӕлгоймаг Захарийы равзӕрста пехуымпарӕй ӕмӕ йын равдыста аст диссаджы цӕстылуайӕны. Захари та уыцы цӕстылуайӕнты тыххӕй хъуамӕ дзуттӕгтӕн радзырдтаид, цӕмӕй сӕ ныфс бауагътаид. Уыцы цӕстылуайӕнты фӕрцы бамбӕрстой, знӕгтӕй сӕ тӕрсын кӕй нӕ хъӕуы ӕмӕ Йегъовӕйы хъуыддаг дарддӕр кӕй хъуамӕ аразой. Фӕндзӕм цӕстылуайӕны Захари федта цырагъдарӕн ӕмӕ дыууӕ оливӕбӕласы.

5. Ацы статьяйы цӕуыл аныхас кӕндзыстӕм?

⁵ Иуӕй-иу хатт алкӕмӕн дӕр йӕ ныфс асӕтты. Ӕмӕ Йегъовӕ фӕндзӕм цӕстылуайӕны фӕрцы израилӕгты ныфс куыд бауагъта, ууыл куы ахъуыды кӕнӕм, уӕд махӕн дӕр нӕ ныфсыл ныфс бафтдзӕн. Уыцы цӕстылуайӕн цӕуыл дзурӕг у, уый куы ӕмбарӕм, уӕд нын уый ӕххуыс кӕндзӕн дарддӕр дӕр Йегъовӕйӕн иузӕрдионӕй лӕггад кӕнынӕн, нӕ ныхмӕ куы цӕуой, нӕ царды кӕнӕ нӕ лӕггады исты куы фӕива ӕмӕ нын цы разамынд дӕттынц, уый-иу куы не ’мбарӕм, уӕд.

6. Захарийы 4:1–3, 12 стихты цы цӕстылуайӕны кой ис, уый дзуттӕгты ныфс куыд бауагъта? (Кӕс нывмӕ ӕддаг цъарыл.)

⁶ Бакӕс Захарийы 4:1–3, 12. Дӕ хъус ӕрдардтай, цырагъдарӕнмӕ сой ӕдзух кӕй кӕлы? Дыууӕ оливӕбӕласӕй сой кӕлы къусмӕ, уырдыгӕй та, цырагъдарӕныл цы авд цырагъы ис, уыдонмӕ. Уыцы сойы фӕрцы цырӕгътӕ ӕдзухдӕр судзынц. Захари зӕды бафарста: «Адон цы нысан кӕнынц?» Зӕд ын дзуапп радта: «„Нӕдӕр ӕфсады фӕрцы, нӕдӕр хъаруйы фӕрцы, фӕлӕ мӕ тыхы фӕрцы ӕрцӕудзысты ӕппӕт адӕттӕ“,– зӕгъы ӕфсӕдты хицау Йегъовӕ» (Зах. 4:4, 6). Оливӕбӕлӕстӕй цы сой кӕлы, уый амоны Йегъовӕйы хъомысджын сыгъдӕг тыхмӕ – уымӕн фӕуӕн нӕй. Цы уыди Персы паддзахады хъомыс ӕмӕ йе стыр ӕфсад Хуыцауы сыгъдӕг тыхы раз?! Дзуттӕгтӕн Йегъовӕ уыд се ’ххуысгӕнӕг. Ӕмӕ уымӕ гӕсгӕ, кӕд знӕгтӕ сӕ ныхмӕ цыдысты, уӕддӕр сӕ бон уыд кувӕндон кӕронмӕ саразын. Уыцы ныхӕстӕ сӕ ныфс куыннӕ хъуамӕ бауагътаиккой. Ӕрмӕстдӕр сӕ хъуыди сӕ зӕрдӕ Йегъовӕйыл дарын ӕмӕ та хъуыддагмӕ бавналын. Ӕмӕ уыдон дӕр афтӕ бакодтой, кӕд паддзахы бардзырд нырма йӕ тыхы уыд, уӕддӕр.

7. Кувӕндон аразджытӕн цӕй фӕрцы фенцондӕр сӕ куыст кӕнын?

⁷ Уый фӕстӕ Персы паддзах сси Дарий Фыццаг. Ӕмӕ уӕд кувӕндон аразджытӕн фенцондӕр сӕ куыст кӕнын. Дарий дыккаг аз куы уыд паддзах, уӕд базыдта, Артаксерксы бардзырд закъонмӕ гӕсгӕ кӕй нӕ уыд. Ӕмӕ уынаффӕ рахаста, кувӕндон кӕронмӕ арӕзт кӕй хъуамӕ фӕуа. Уый уыд н. э. размӕ 520 азы (Езд. 6:1–3). Ахӕм уынаффӕ хаст кӕй ӕрцыд, уый диссаг уыд! Фӕлӕ диссӕгтӕ ууыл нӕ фесты. Сӕ алыварс цӕрӕг адӕмтӕн паддзах бардзырд радта, цӕмӕй дзуттӕгты мауал хъыгдардтаиккой кувӕндон аразын ӕмӕ ма сын цӕмӕй ӕхцайӕ дӕр ӕмӕ ӕндӕр цӕмӕйдӕрты дӕр ӕххуыс кодтаиккой! (Езд. 6:7–12). Гъемӕ н. э. размӕ 515 азы кувӕндон арӕзт фесты. Паддзахы бардзырдӕй рацыд 4 азӕй гыццыл фылдӕр (Езд. 6:15).

8. Исчи дӕ ныхмӕ куы цӕуа, уӕд хъӕбатыр ӕмӕ ныфсджын цӕмӕн хъуамӕ уай?

⁸ Нӕ рӕстӕджы дӕр Йегъовӕйы лӕггадгӕнджытӕй бирӕтӕн сӕ ныхмӕ цӕуынц. Кӕцыдӕр бӕстӕты нӕ бон нӕу нӕ хъуыддаг  сӕрибарӕй аразын. Уымыты нӕ хотӕ ӕмӕ не ’фсымӕртӕй кӕйдӕрты ӕрцахсынц ӕмӕ сӕ акӕнынц «хицӕуттӕм ӕмӕ паддзӕхтӕм». Афтӕмӕй уыдон дӕр фехъусынц хорз хабар (Матф. 10:17, 18). Иуӕй-иу хатт та нын фенцондӕр вӕййы, бӕстӕйы хицау кӕй фӕивы кӕнӕ тӕрхонгӕнджытӕй исчи раст уынаффӕ кӕй рахӕссы, уый фӕрцы. Сӕрибардзинад нын кӕм ис, уыцы бӕстӕты та нӕ хотӕ ӕмӕ не ’фсымӕртӕн арӕх сӕ бинонтӕ фӕцӕуынц сӕ ныхмӕ (Матф. 10:32–36). Фӕлӕ арӕх афтӕ вӕййы, ӕмӕ куы фенынц, ӕмӕ сын ницы уайы, уӕд сӕ нал фӕхъыгдарынц Хуыцауӕн лӕггад кӕнын. Чидӕртӕ та дзы сӕхӕдӕг дӕр свӕййынц зынгзӕрдӕ Ӕвдисӕнтӕ. Уӕдӕ исчи дӕ ныхмӕ куы цӕуа, уӕд-иу дӕ ныфс ма асӕттӕд. Хъӕбатыр ӕмӕ ныфсджын у! Йегъовӕ демӕ ис. Уый дын ӕххуыс кӕны йӕ хъомысджын сыгъдӕг тыхы фӕрцы. Ӕмӕ хъуамӕ мацӕмӕй тӕрсай!

9. Ног кувӕндонӕн йӕ бындур арӕзт куы цыд, уӕд иуӕй-иу дзуттӕгтӕ цӕмӕн ӕрӕнкъард сты?

⁹ Ног кувӕндонӕн йӕ бындур арӕзт куы цыд, уӕд ацӕргӕ дзуттӕгтӕй чидӕртӕ хъӕрӕй фӕкуыдтой (Езд. 3:12). Уыдон сӕхи цӕстӕй федтой Соломоны кувӕндон. Уымӕн йӕ кад нӕргӕ кодта. Ӕмӕ сӕм афтӕ каст, ӕмӕ ног кувӕндон «уыимӕ абаргӕйӕ ницы» уыдзӕн (Аг. 2:2, 3). Уый сын тынг зын уыди. Ӕмӕ сын Захарийы цӕстылуайӕн сӕ ныфсыл ныфс бафтыдта.

10. Захарийы 4:8–10 стихты фыст ныхӕстӕ дзуттӕгтӕн куыд баххуыс кодтой, цӕмӕй та ногӕй цин кодтаиккой?

¹⁰ Бакӕс Захарийы 4:8–10. Зӕд загъта, зӕгъгӕ, дзуттӕгтӕ «кӕсдзысты, Зоровавелы къухы цы уырдыгбарӕн ис, уымӕ ӕмӕ цин кӕндзысты». Уымӕй йӕ цы зӕгъын фӕндыд? Уырдыгбарӕны фӕрцы аразӕг базоны, цы аразы, уый ӕмраст у ӕви нӕ. Зӕды ныхӕстӕ сын ууыл дзурӕг уыдысты, ӕмӕ кӕд кӕмӕдӕр ног кувӕндон ӕгӕр хуымӕтӕг каст, уӕддӕр кӕронмӕ арӕзт ӕрцӕудзӕн ӕмӕ уыдзӕн Йегъовӕйы домӕнтӕм гӕсгӕ арӕзт. Ӕмӕ кӕд Йегъовӕйы зӕрдӕмӕ цӕудзӕн, уӕд уыдоны зӕрдӕмӕ цӕуылнӕ хъуамӕ фӕцӕуа? Йегъовӕйӕн сӕйраг уыд, цӕмӕй йын уыцы кувӕндоны адӕм куывтаиккой, уый куыд фӕндыд, афтӕ. Уӕдӕ уыдонӕн дӕр уый хъуамӕ уыдаид сӕйраг ӕмӕ хъуамӕ архайдтаиккой Йегъовӕйы хорзӕх ссарыныл. Ӕмӕ та уӕд ногӕй цин кодтаиккой.

11. Абон Йегъовӕйы лӕггадгӕнджытӕ цавӕр зындзинӕдтыл ӕмбӕлынц?

¹¹ Бирӕтӕн зын вӕййы, сӕ царды исты куы фӕивы, уӕд. Чырыстӕттӕй кӕмӕндӕрты сӕ  лӕггады цыдӕр фӕивта. Зӕгъӕм, уыдысты сӕрмагонд ӕххӕстрӕстӕг лӕггадгӕнджытӕ, фӕлӕ сӕ стӕй снысан кодтой ӕндӕр ранмӕ. Кӕмӕндӕрты та сӕ бон нал у, цы кадджын хӕстӕ сыл уыд, уыдон ӕххӕст кӕнын, уымӕн ӕмӕ сыл азтӕ сӕ уӕз ӕруагътой. Ахӕм уавӕрты адӕймаг кӕй ӕрӕнкъард вӕййы, уым диссагӕй ницы ис. Гӕнӕн ис, ӕмӕ фыццаг разы ма уӕм, цы уынаффӕ ӕрцыд хаст, уыимӕ кӕнӕ ма ӕмбарӕм, ахӕм уынаффӕ хаст цӕмӕн ӕрцыд, уый. Иуӕй-иу хатт фӕмысӕм, раздӕр куыд лӕггад кодтам, уый. Ӕмӕ нӕм афтӕ куы кӕса, ӕмӕ нӕ ныр Йегъовӕйӕн ницыуал пайда ис, уӕд та нӕ ныфс дӕр асӕтдзӕн (Ӕмб. 24:10). Захарийы цӕстылуайӕн нын куыд баххуыс кӕндзӕн, цӕмӕй дарддӕр дӕр Йегъовӕйӕн зӕрдиагӕй лӕггад кӕнӕм?

12. Нӕ царды кӕнӕ нӕ лӕггады исты куы фӕива, уӕд нын Захарийы цӕстылуайӕн куыд баххуыс кӕндзӕн?

¹² Нӕ царды кӕнӕ нӕ лӕггады исты куы фӕива, уӕд уымӕ хъуамӕ кӕсӕм Йегъовӕйы цӕстӕй. Уӕд нын ӕнцондӕр уыдзӕн. Абон диссаджы хъуыддӕгтӕ аразы. Ӕмӕ нӕм ахӕм кад ӕрхауд, цӕмӕй йе ’мкусджытӕ уӕм (1 Кор. 3:9). Йегъовӕ нӕ тынг уарзы, ӕмӕ уый алкӕддӕр афтӕ уыдзӕн. Цы хӕстӕ ныл ис, уыдон та, гӕнӕн ис, фӕивой. Уӕдӕ, нӕ организацийы цавӕрдӕр ивындзинӕдтӕ кӕй ӕрцыд, уый тыххӕй дӕ лӕггады дӕр исты куы фӕива, уӕд-иу хъуыдыты ма ацу, зӕгъгӕ, афтӕ куыд рауад, афтӕ цӕмӕн рауад. Раздӕры лӕггад мысыны бӕсты хъуыды кӕн, дӕ ног уавӕрты хорзӕй цы ис, ууыл. Ӕмӕ Йегъовӕмӕ дӕр кув, цӕмӕй дын уый бамбарынӕн баххуыс кӕна (Еккл. 7:10). Дӕ бон цыдӕртӕ аразын кӕй нал у, ууыл ма хъуыды кӕн, фӕлӕ, ныр дӕр дӕ бон цас цыдӕртӕ у аразын, ууыл. Захарийы цӕстылуайӕнӕй базонӕн ис, ахсджиаг кӕй у, цӕмӕй алцӕмӕ дӕр раст цӕстӕй кӕсӕм. Ӕмӕ уӕд, цыфӕнды ивындзинӕдтӕ ма ’рцӕуа, уӕддӕр Йегъовӕйӕн дарддӕр дӕр цингӕнгӕйӕ ӕмӕ иузӕрдионӕй лӕггад кӕндзыстӕм.

13. Йесо ӕмӕ Зоровавел ногӕй кувӕндон аразынмӕ кӕй бавнӕлдтой, уый дзуттӕгтӕй кӕмӕдӕрты ӕнӕзонд ми цӕмӕн фӕкастаид?

¹³ Артаксерксы бардзырд нырма йӕ тыхы уыд. Фӕлӕ уӕддӕр, дзуттӕгтӕн разамынд чи лӕвӕрдта, уыцы нӕлгоймӕгтӕ – хистӕр сауджын Йесо ӕмӕ хицау Зоровавел – «ногӕй бавнӕлдтой, Хуыцауӕн Иерусалимы цы хӕдзар уыд, уый аразынмӕ» (Езд. 5:1, 2). Уый адӕмӕй кӕмӕдӕрты, чи зоны, ӕнӕзонд ми  фӕкастаид. Уыцы хабар се знӕгтӕй нӕ басусӕг кодтаиккой, ӕмӕ сӕ уыдон хъыгдардтаиккой кувӕндон аразын. Фӕлӕ Йегъовӕ Йесойӕн ӕмӕ Зоровавелӕн бамбарын кодта, кӕй сын ӕххуыс кӕндзӕн.

14. Захари 4:12, 14 стихтӕм гӕсгӕ, Йегъовӕ хистӕр сауджын Йесойӕн ӕмӕ хицау Зоровавелӕн цы бамбарын кодта?

¹⁴ Бакӕс Захарийы 4:12, 14. Зӕд Хуыцауы иузӕрдион пехуымпарӕн раргом кодта, дыууӕ оливӕбӕласы кӕй амонынц «дыууӕ сӕрст лӕггадгӕнӕгмӕ» – Йесомӕ ӕмӕ Зоровавелмӕ. Афтӕ ӕвдыст уыдысты, цыма лӕууынц «ӕгас зӕххы Бардарӕджы раз» – Йегъовӕйы раз. Уымӕй стырдӕр кад ма цы хъуамӕ уа! Йегъовӕ сыл ӕууӕндыд ӕмӕ йӕ зыдта, раст уынаффӕтӕ кӕй хӕсдзысты. Уымӕ гӕсгӕ израилӕгтӕ дӕр хъуамӕ ууыл ма дызӕрдыг кодтаиккой. Йегъовӕ сын уыдоны уылты лӕвӕрдта разамынд.

15. Йегъовӕ нын йӕ Ныхасы цы разамынд дӕтты, уымӕн кӕй аргъ кӕнӕм, уый куыд равдисдзыстӕм?

¹⁵ Абон Йегъовӕ йӕ адӕмӕн разамынд дӕтты йӕ Ныхас Библийы фӕрцы. Уым нын дзуры, куыд ын хъуамӕ лӕггад кӕнӕм, уый. Нӕ бон куыд у равдисын, уыцы разамындӕн кӕй аргъ кӕнӕм? Хъуамӕ Хуыцауы Ныхас лӕмбынӕг кӕсӕм ӕмӕ, цы бакӕсӕм, уый-иу хъуамӕ бамбарӕм. Ахъуыды кӕн ахӕм фарстатыл: «Библи кӕнӕ нӕ публикацитӕ куы фӕкӕсын, уӕд ӕрлӕууын ӕмӕ, цы бакӕсын, ууыл лӕмбынӕг ахъуыды кӕнын? „Зынӕмбарӕн бынӕттӕ“ дзы куы вӕййы, уӕд уыдоны фӕдыл фылдӕр ӕрмӕг бацагурын? Ӕви сӕ тагъд-тагъд акӕсын?» (2 Пет. 3:16). Йегъовӕ нын цы амоны, ууыл хъуыды кӕнынӕн рӕстӕг куы арӕм, уӕд ын йӕ разамындмӕ дӕр хъусдзыстӕм ӕмӕ хорз хабар дӕр ӕнтыстджынӕй хъусын кӕндзыстӕм (1 Тим. 4:15, 16).

16. «Ӕууӕнкджын ӕмӕ зондджын цагъар» нын цы разамынд дӕтты, уый-иу куы не ’мбарӕм, уӕд нын цы баххуыс кӕндзӕн уыцы разамындмӕ гӕсгӕ архайынӕн?

¹⁶ Йегъовӕ ма нын разамынд дӕтты «ӕууӕнкджын ӕмӕ зондджын цагъары» уылты дӕр (Матф. 24:45). Ӕууӕнкджын цагъар нын цы разамынд ратты, уый иуӕй-иу хатт нӕ фембарӕм. Зӕгъӕм, цавӕрдӕр ӕрдзон бӕллӕхы аирвӕзӕн куыд ис, уый фӕдыл нын амындтӕ куы фӕдӕтты, уӕд, чи зоны, ахъуыды кӕнӕм, зӕгъгӕ, махмӕ ахӕм хабар никуы ’рцӕудзӕн. Кӕнӕ нӕм, чи зоны, афтӕ кӕсы, ӕмӕ нӕ ӕууӕнкджын цагъар коронавирусӕй ӕгӕр арӕх фӕдзӕхсы. Уыцы ’фсымӕртӕ нын цы разамынд дӕттынц, уый нӕм раст куы нӕ кӕса, уӕд-иу куыд хъуамӕ бакӕнӕм? Ис израилӕгты хабарыл ахъуыды кӕнӕн. Йегъовӕ сын Йесо ӕмӕ Зоровавелы  уылты цы уынаффӕтӕ радта, уыдонмӕ кӕй байхъуыстой, уый сын стыр ӕххуыс фӕци. Ис ма ӕндӕр хабӕрттыл дӕр ахъуыды кӕнӕн. Хатт-иу Хуыцауы адӕмӕн лӕвӕрд ӕрцыд, адӕймаджы цӕстӕй кӕсгӕйӕ раст чи нӕ уыд, ахӕм разамынд, фӕлӕ-иу уый фӕрцы аирвӕзтысты (Тӕрх. 7:7; 8:10).

17. Фӕндзӕм цӕстылуайӕн дзуттӕгтӕн куыд баххуыс кодта?

¹⁷ Захари цы цӕстылуайӕнтӕ федта, уыдонӕй фӕндзӕм цыбыр у. Фӕлӕ уый фӕрцы дзуттӕгтӕ сӕ куыстмӕ ӕмӕ сӕ лӕггадмӕ ӕндӕр цӕстӕй ракастысты. Уыцы цӕстылуайӕнӕй цы базыдтой, уымӕ гӕсгӕ архайын райдыдтой. Ӕмӕ сын Йегъовӕ дӕр ӕххуыс кодта ӕмӕ сын разамынд лӕвӕрдта. Йӕ хъомысджын сыгъдӕг тыхы фӕрцы сын баххуыс кодта сӕ куыст цингӕнгӕйӕ адарддӕр кӕнынӕн (Езд. 6:16).

18. Захарийы цӕстылуайӕн дын ныфсы хос куыд уыдзӕн?

¹⁸ Захарийы цӕстылуайӕн дӕуӕн дӕр уыдзӕн стыр ныфсы хос. Дӕ ныхмӕ исчи куы цӕуа, уӕд дӕ хъарутӕ бауадздзӕн. Дӕ царды кӕнӕ дӕ лӕггады исты куы фӕива, уӕд дын баххуыс кӕндзӕн дарддӕр дӕр цингӕнгӕйӕ лӕггад кӕнынӕн. Ӕмӕ дын цы разамынд дӕттынц, уый куы не ’мбарай, уӕд та дын баххуыс кӕндзӕн, цӕмӕй ма дызӕрдыг кӕнай, уыцы разамынд Йегъовӕйӕ кӕй у. Уӕдӕ зындзинӕдтыл куы сӕмбӕлай, уӕд-иу ӕрхъуыды кӕн Захарийы цӕстылуайӕн. Уымӕй ды базыдтай, Йегъовӕ йӕ адӕмӕн кӕй ӕххуыс кӕны, уый. Стӕй дӕ ныфс Йегъовӕйыл дар ӕмӕ йын дарддӕр дӕр ӕппӕт зӕрдӕйӕ лӕггад кӕн (Матф. 22:37). Ӕмӕ дын уӕд Йегъовӕ баххуыс кӕндзӕн, цӕмӕй кӕронмӕ фидар фӕлӕууай ӕмӕ йын ӕнустӕм цингӕнгӕйӕ лӕггад кӕнай! (Кол. 1:10, 11).