1. Цагъайради ци дзиуиттӕгтӕ адтӕй, уонӕбӕл цӕхуӕн хуарз хабар ӕрцудӕй?

 КӔДӔЙ-УӔДӔЙ дзиуиттӕгтӕ цагъайрадӕй исуӕгъдӕ ’нцӕ! Йеговӕ паддзах Кири баразӕнгард кодта, цӕмӕй уӕхӕн бардзурд равардтайдӕ: израилӕгтӕ гъӕуама сӕ райгурӕн бӕстӕмӕ раздахтайуонцӕ ӕма Йегови хӕдзарӕ нӕуӕгӕй искодтайуонцӕ (Езд. 1:1, 3). Еци рӕстӕг кӕд ралӕудзӕй, уомӕ дзиуиттӕгтӕ рагӕй ӕнгъӕлмӕ кастӕнцӕ. Нур сӕ бон уодзӕй нӕуӕгӕй Хуцауӕн лӕггадӕ кӕнун, ци зӕнхӕ син равардта, уоми.

2. Цагъайрадӕй ка ӕрӕздахтӕй, еци дзиуиттӕгтӕн фиццаг ӕнзти ци бантӕстӕй?

² Нӕ эри размӕ 537 анзи дзиуиттӕгтӕй кадӕртӕ Йерусалиммӕ ӕрӕздахтӕнцӕ. Йерусалим ба раздӕр адтӕй Иуди паддзахади сӕйраг горӕт. Куддӕр ӕрӕздахтӕнцӕ, уотӕ кустмӕ равналдтонцӕ, ӕма нӕ эри размӕ 536 анзи ковӕндони бундор ӕвӕрд ӕрцудӕй!

3. Дзиуиттӕгтӕ цӕхуӕн зиндзийнӕдтӕбӕл исӕмбалдӕнцӕ?

³ Фал гъуддаг бустӕги хуарз нӕ рацудӕй. «Сӕ алливарс цӕрӕг адӕн Иуди адӕнӕн се ’уӕнг марун ӕма сӕ нифс сӕттун райдӕдтонцӕ, цӕмӕй Хуцауи хӕдзарӕ мабал аразтайуонцӕ» (Езд. 4:4). Ӕма айдагъ уобӕл гъуддаг ку ӕрлӕудтайдӕ. Хабар никки фуддӕр фӕцӕй, нӕ эри размӕ 522 анзи Персий паддзах Артаксеркс ку иссӕй, уӕд *. Йегови адӕни нихмӕ ка цудӕй, етӕ еци уавӕрӕй испайда кодтонцӕ ӕма байархайдтонцӕ, цӕмӕй ковӕндонӕ мабал амадтайуонцӕ. Еци фудвӕндӕ искодтонцӕ «закъони фӕрци» (Пс. 94:20). Паддзах Артаксерксмӕ багъаст кодтонцӕ, зӕгъгӕ, дан, дзиуиттӕгтӕ дӕ нихмӕ исӕзмӕнтунмӕ гъавунцӕ (Езд. 4:11–16). Гъема сӕбӕл паддзах дӕр баууӕндтӕй, ӕма ковӕндонӕ аразуни гъуддаг ӕрлӕудтӕй  (Езд. 4:17–23). Уой туххӕй, фиццӕгти кустмӕ зингзӕрдӕй ка равналдта, уонӕн сӕ нифс басастӕй (Езд. 4:24).

4. Ковӕндонӕ кӕнуни гъуддаг ӕрлӕуун кӕнунмӕ ке гъавтонцӕ, уомӕ Йеговӕ цӕхуӕн цӕстӕй ракастӕй? (Исай 55:11).

⁴ Мӕнгӕ хуцӕуттӕн ковӕг адӕн ӕма Персий хецӕуттӕй еуӕй-еуетӕ се ’гас хъауритӕй архайдтонцӕ, цӕмӕй ковӕндони куститӕ ӕрлӕудтайуонцӕ. Фал Йегови фӕндадтӕй, цӕмӕй ковӕндонӕ кӕронмӕ конд фӕцайдӕ. Е ба ци исфӕндӕ кӕнуй, уой алкӕддӕр исӕнхӕст кӕнуй. (Бакӕсӕ Исаййи 55:11.) Йеговӕ нифсхаст нӕлгоймаг Захарий пахампарӕй равзурста ӕма ин бавдиста аст цӕстӕбӕлуайӕни. Уой фӕсте ба ин загъта, цӕмӕй еци цӕстӕбӕлуайӕнтӕ дзиуиттӕгтӕн радзурдтайдӕ ӕма син загътайдӕ, се знӕгтӕй сӕ тӕрсун ке нӕ гъӕуй ӕма син Йеговӕ ци гъуддаг баихӕс кодта, уомӕ нӕуӕгӕй равналун ке гъӕуй. Фӕндзӕймаг цӕстӕбӕлуайӕни Захари фӕууидта цирагъдарӕн ӕма дууӕ оливӕбӕласи.

5. Аци статьяй цӕмӕ ӕркӕсдзиан?

⁵ Цирагъдарӕн ӕма дууӕ оливӕбӕласей туххӕй цӕстӕбӕлуайӕн израилӕгти нифс бафедар кодта. Е ба уобӕл дзорӕг ӕй, ӕма мах нифс дӕр бафедар кӕндзӕй ӕма ни хъауритӕ бауадздзӕй. Е ӕхсидзгӕ ’й, уомӕн ӕма мах дӕр хатгай нӕ къохтӕ естӕй туххӕй ӕруадзӕн. Еци цӕстӕбӕлуайӕн ку лӕдӕрӕн, уӕд нин е банхус кӕндзӕй, цӕмӕй Йеговӕн еузӕрдонӕй лӕггадӕ кӕнӕн: 1) нӕ нихмӕ ку фӕццӕунцӕ, 2) нӕ царди цӕхгӕрмӕ ести ку раййевуй, удта 3) организаци ести разамунд ку раттуй ӕма ’й ӕнхӕст ку нӕ фӕллӕдӕрӕн, уӕд.

6. Захарий 4:1–3, 12 ци цӕстӕбӕлуайӕн финст ес, е дзиуиттӕгти нифс куд бафедар кодта? (Кӕсӕ хузӕмӕ ӕндаг цъарӕбӕл.)

⁶ Бакӕсӕ Захарий 4:1–3, 12. Захари ци цӕстӕбӕлуайӕн фӕууидта, цирагъдарӕн ӕма дууӕ оливӕбӕласей туххӕй, е дзиуиттӕгтӕн сӕ нифс бафедар кодта, цӕмӕй идарддӕр дӕр сӕ куст кодтайуонцӕ, кӕд сӕ нихмӕ карзӕй цудӕнцӕ, уӕддӕр. Кутемӕй син банхус кодта? Дӕ гъос ӕрдардтай, еци цирагъдарӕнмӕ сойнӕ ӕнӕрлӕугӕй ке тӕдзуй? Еци оливӕбӕлӕстӕй сойнӕ тӕдзуй къосмӕ. Къосӕй ба авд хӕтӕлебӕл авд цирагъемӕ. Уой фӕрци еци цирагъдарӕн ӕнӕрхусгӕй цӕфсуй. Захари бафарста: «Атӕ ци нисан кӕнунцӕ?» Ӕма ин Йегови изӕд загъта: «„Нӕдӕр ӕфсади фӕрци, нӕдӕр хъаури фӕрци, фал мӕ тухи фӕрци ӕрцӕудзӕнцӕ атӕ еугурӕйдӕр“,– зӕгъуй ӕфсӕдти хецау Йеговӕ» (Зах. 4:4, 6). Аци цӕстӕбӕлуайӕни сойнӕ амонуй Йегови сугъдӕг хъаурӕмӕ. Еци хъаурӕн фӕууӕн нӕййес. Персий паддзахадӕн ци хъаурӕ адтӕй, е Йегови хъаурӕн ӕ руги дӕр не ’фсардӕй. Мадта кӕд Йеговӕ дзиуиттӕгти фарс адтӕй, уӕд сӕ тӕрсун нецӕмӕй гъудӕй ӕма сӕ бон адтӕй ковӕндони куститӕ фӕуун. Мадта сӕ Захарий цӕстӕбӕлуайӕн хъӕбӕр бафедар кодта. Ӕрмӕстдӕр сӕ гъудӕй сӕ нифс Йеговӕбӕл дарун ӕма кустмӕ равналун. Гъема етӕ дӕр уотӕ бакодтонцӕ, кӕд син закъонмӕ гӕсгӕ уӕхӕн барӕ нӕма адтӕй, уӕддӕр.

7. Дзиуиттӕгтӕн цӕхуӕн хабӕрттӕ банхус кодтонцӕ ковӕндони куститӕ кӕронмӕ фӕуун?

⁷ Уӕдмӕ дин гъуддаг цӕхгӕрмӕ феййивта. Персий паддзах иссӕй Дарий Фиццаг. Гъема ӕ хецаудзийнади дуккаг анз, нӕ эри размӕ 520 анзи, исбӕрӕг кодта, дзиуиттӕгти ковӕндонӕ искӕнун ке нӕ уагътонцӕ, е закъонмӕ гӕсгӕ раст ке н’ адтӕй. Уомӕ гӕсгӕ бардзурд равардта, цӕмӕй куститӕ фӕцайуонцӕ (Езд. 6:1–3). Айдагъ е дӕр дессаг адтӕй, фал ма уавӕр никки хуӕздӕр фӕцӕй. Дзиуиттӕгти нихмӕ ка цудӕй, уонӕн Дарий загъта, цӕмӕй сӕ мабал хъор кодтайуонцӕ. Хъор нӕ, фал ма сӕмӕ цӕмӕй ӕхцайӕй, удта куститӕ фӕуунмӕ цидӕриддӕр гъудӕй, уомӕй фӕккастайуонцӕ (Езд. 6:7–12). Уобӕл рацудӕй цуппар  анземӕй минкъий фулдӕр, ӕма нӕ эри размӕ 515 анзи дзиуиттӕгтӕ ковӕндонӕ амад фӕцӕнцӕ! (Езд. 6:15).

8. Нӕ нихмӕ ку цӕуонцӕ, уӕд дӕр нифсхаст цӕй фӕрци уодзиан?

⁸ Мах рӕстӕги дӕр Йегови лӕггадгӕнгутӕй беретӕ ӕфхуӕрд ӕййафунцӕ. Зӕгъӕн, беретӕ си цӕрунцӕ, нӕ гъуддаг ӕхгӕд кӕми ӕй, уӕхӕн бӕстити. Хуӕртӕ ӕма ӕнсувӕртӕй ба ма си кедӕрти ахӕстдони дӕр исбадун кӕнунцӕ ӕма сӕ «хецӕуттӕ ӕма паддзӕхти» рази ӕрлӕуун багъӕуй. Уотемӕй Йегови Ӕвдесӕнтӕн фадуат фӕззиннуй, цӕмӕй уонӕн дӕр хуарз хабар игъосун кӕнонцӕ (Матф. 10:17, 18). Фал уавӕр еуӕй-еухатт фӕххуӕздӕр уй: бӕсти хецауадӕ раййевуй кенӕ тӕрхонгӕнӕг раст тӕрхон рахӕссуй. Иннӕ бӕстити ба нин кӕд сӕребарӕй лӕггадӕ кӕнуни барӕ ес, уӕддӕр еуӕй-еу Ӕвдесӕнтӕн сӕ хеуӕнттӕ сӕ нихмӕ фӕццӕунцӕ (Матф. 10:32–36). Фал нӕ хуӕртӕ ӕма ӕнсувӕртӕ куд федар фӕуунцӕ, уой уингӕй сӕ арӕхдӕр нӕбал фӕттухсун кӕнунцӕ. Кадӕртӕ ба ма си Йегови Ӕвдесӕнтӕ дӕр исунцӕ ӕма сӕхуӕдтӕ дӕр зингзӕрдӕй лӕггадӕ кӕнун райдайунцӕ. Мадта дӕ нихмӕ ку цӕуонцӕ, уӕд дӕ къохтӕ ма уадзӕ! Нифсхаст уо! Йеговӕ дӕ хӕццӕ ’й ӕма дин ӕ сугъдӕг хъаури фӕрци ӕнхус кӕндзӕй. Тӕрсун дӕ нецӕмӕй гъӕуй!

9. Еуӕй-еуетӕ цӕмӕн кудтӕнцӕ, Йегови хӕдзарӕн бундор ку ӕвардтонцӕ, уӕд?

⁹ Еуӕй-еу зӕронд лӕгтӕ «гъӕрӕй кудтӕнцӕ, сӕ цӕстити рази хӕдзарӕн бундор ку ӕвардтонцӕ, уӕд» (Езд. 3:12). Етӕ ма гъуди кодтонцӕ, Соломони ковӕндонӕн ци кадӕ адтӕй, уой. Уотӕ сӕмӕ кастӕй ӕма нӕуӕг ковӕндонӕ «раздӕр ци адтӕй, уой хӕццӕ рабаргӕй неци ӕй» (Аг. 2:2, 3). Зин син адтӕй, нӕуӕг ковӕндонӕн уӕхӕн кадӕ ке нӕбал уодзӕй. Фал син гъӕуама Захарий цӕстӕбӕлуайӕн сӕ нифс бафедар кодтайдӕ.

10. Захарий 4:8–10 ци дзурдтӕ финст ес, етӕ дзиуиттӕгтӕн куд банхус кодтонцӕ сӕ гъудитӕ раст ӕрдӕмӕ раздахун?

¹⁰ Бакӕсӕ Захарий 4:8–10. Фӕстӕдӕр ма Йеговӕ дзиуиттӕгтӕн уӕхӕн дзурдтӕ зӕгъун кодта: «Адӕн кӕсдзӕнцӕ, Зоровавели къохи ци урдугбарӕн ес, уомӕ ӕма цийнӕ кӕндзӕнцӕ». Урдугбарӕни фӕрци амайӕги бон фӕууй ӕ цӕстӕ дарун, цӕмӕй фарс ӕррӕстӕ рауайа. Еци цӕветтон Хуцауи адӕнӕн цӕбӕл дзорӕг адтӕй? Кӕд сӕмӕ нӕуӕг ковӕндонӕ хумӕтӕг кастӕй, уӕддӕр ӕй гъӕуама лӕдӕрдтайуонцӕ, Йегови домӕнтӕмӕ гӕсгӕ арӕзт ку ’рцӕуа, уӕд си Йеговӕ ӕхуӕдӕг арази ке уодзӕй. Мадта сӕ уобӕл тухсун нӕ гъудӕй. Фулдӕр сӕ батухсун гъудӕй,  ковӕндони куд лӕггадӕ кӕндзӕнцӕ, уобӕл. Гъема Хуцауи хуарзӕнхӕ куд иссеронцӕ, уомӕ се ’ргом ку раздахтайуонцӕ, уӕд сӕ бон адтайдӕ нӕуӕг уавӕрти дӕр цийнӕ кӕнун.

11. Йегови лӕггадгӕнгутӕй еуӕй-еуетӕн зин ци фӕууй?

¹¹ Беретӕн зин фӕууй, царди ести ку раййевуй, уӕд. Зӕгъӕн, кадӕртӕ берӕ ӕнзти дӕргъи сӕрмагонд ӕнхӕстрӕстӕг лӕггадгӕнгутӕ адтӕнцӕ. Фал уавӕртӕ раййивтонцӕ ӕма сӕ ӕндӕрхузи лӕггадӕ кӕнунмӕ иснисан кодтонцӕ. Иннети ба сӕ лӕггадӕ ниууадзун багъудӕй сӕ карӕмӕ гӕсгӕ. Уӕхӕн цӕйдӕрти туххӕй адӕймаг ке ӕрӕнкъард уй, уоми дессагӕй неци ес. Ка ’й зонуй, ӕма ’й фиццӕгти ма лӕдӕрӕн, уӕхӕн унаффӕ цӕмӕн ӕрцудӕй хаст, уой, кенӕ ба ма еци унаффи хӕццӕ арази дӕр ма уӕн. Гӕнӕн ес, ӕма ма раздӕри рӕстӕгутӕбӕл ӕрхун кӕнун дӕр райдайӕн. Кенӕ ба нӕмӕ уотӕ кӕсдзӕй, ӕма ни нур Йегови гъуддӕгти минкъийдӕр пайда уодзӕй. Уӕхӕн сагъӕстӕй адӕймагӕн ӕ нифс басӕттуй (Ӕмб. 24:10). Гъӕйдӕ мадта ӕркӕсӕн, Захарий цӕстӕбӕлуайӕн нин куд банхус кӕндзӕй уӕхӕн сагъӕсти нихмӕ тох кӕнун.

12. Захарий цӕстӕбӕлуайӕн нин куд банхус кӕндзӕй царди ӕййивддзийнӕдтӕмӕ раст цӕстӕй кӕсун?

¹² Нӕ царди ци ӕййивддзийнӕдтӕ ӕрцӕуй, уонӕбӕл нин ӕнцондӕр уодзӕй исахур ун, Йегови цӕстӕй сӕмӕ ку кӕсӕн, уӕд. Йеговӕ нӕ рӕстӕги дессаги гъуддӕгтӕ кӕнуй. Мах ба уӕхӕн кадӕй исхайгин кодта, ӕма ан е ’мкосгутӕ (1 Кор. 3:9). Йеговӕ нин ци гъуддӕгтӕ баихӕс кӕнуй, етӕ еуӕй-еухатт феййевунцӕ. Фал ӕ уарзондзийнадӕ некӕд ӕййевуй! Кӕд организаций ци ӕййивддзийнӕдтӕ ӕрцудӕй, етӕ дӕу цардбӕл дӕр фӕббӕрӕг ӕнцӕ, уӕд дӕхе ма бахуӕрӕ, уотӕ цӕмӕн рауадӕй, зӕгъгӕ. Раздӕри цард хуӕздӕр ке адтӕй, уобӕл сагъӕс кӕнуни бӕсти Йеговӕй корӕ, цӕмӕй дин дӕ уавӕртӕмӕ раст цӕстӕй кӕсунмӕ банхус кӕна (Еккл. 7:10). Ӕма дӕ бон ци нӕй, уобӕл сагъӕс кӕнуни бӕсти сагъӕс кӕнӕ, дӕ бон ци ӕй, уобӕл. Захари ци цӕстӕбӕлуайӕн фӕууидта, уомӕй бӕрӕг ӕй, цӕйбӕрцӕбӕл ӕхсидзгӕ ’й уавӕрмӕ раст цӕстӕй кӕсун. Мадта уотӕ ку кӕнӕн, уӕд нин ӕнцондӕр уодзӕй царди ӕййивддзийнӕдтӕбӕл ахур кӕнун. Уотемӕй ба Йеговӕн цийнӕгӕнгӕй лӕггадӕ кӕндзиан ӕма ибӕл еузӕрдонӕй байзайдзиан.

13. Ковӕндонӕ кӕнунмӕ ке равналдтонцӕ, е кӕмӕдӕрти раст цӕмӕннӕ фӕккастайдӕ?

¹³ Ковӕндонӕ кӕнуни барӕ закъонмӕ гӕсгӕ нӕма адтӕй. Еци гъуддагӕн разамунд  ка лӕвардта, еци хецау Зоровавел ӕма хестӕр саугин Йесо «нӕуӕгӕй равналдтонцӕ, Хуцауӕн Йерусалими ци хӕдзарӕ адтӕй, уой кӕнунмӕ» (Езд. 5:1, 2). Етӕ ци унаффӕ рахастонцӕ, е кӕмӕдӕрти раст нӕ фӕккастайдӕ. Уомӕн ӕма уӕхӕн кустмӕ ке равналдтонцӕ, уой се знӕгтӕй неци хузи баримахстайуонцӕ. Мадта еци дууӕ нӕлгоймагемӕн, Зоровавел ӕма Йесойӕн, гъудӕй сӕ нифс бафедар кӕнун. Гъӕуама ӕй федарӕй зудтайуонцӕ, Йеговӕ еци гъуддагӕн ке райарфӕ кӕндзӕй. Цума сӕ куд бафедар кодта?

14. Йеговӕ Захарий 4:12, 14 финст дзурдти фӕрци хецау Зоровавел ӕма хестӕр саугин Йесой куд бафедар кодта?

¹⁴ Бакӕсӕ Захарий 4:12, 14. Изӕд Захарийӕн куд балӕдӕрун кодта, уотемӕй дууӕ оливӕбӕласи амонунцӕ дууӕ исӕрст лӕггадгӕнӕгемӕ – Зоровавел ӕма Йесомӕ. Изӕд загъта, еци «дууӕ исӕрст лӕггадгӕнӕги ӕгас зӕнхи Бардарӕги рази» ке лӕуунцӕ, гъома Йегови рази. Е хъӕбӕр устур кадӕ адтӕй. Йеговӕ еци дууӕ нӕлгоймагебӕл ӕ зӕрдӕ дардта. Е ба уобӕл дзорӕг адтӕй, ӕма сӕбӕл израилӕгти бон дӕр адтӕй федарӕй ӕууӕндун. Йеговӕ син разамунд уони фӕрци лӕвардта.

15. Библий амундтӕмӕ уӕлӕнгай цӕстӕй ке нӕ кӕсӕн, уой нӕ бон куд ӕй бавдесун?

¹⁵ Йеговӕ ӕ адӕнӕн разамунд дӕттуй Библий фӕрци. Еци киунуги финст ӕй, Хуцауӕн куд гъӕуама лӕггадӕ кӕнӕн, цӕмӕй ни арази уа. Нӕ бон куд ӕй бавдесун, Библий ци амундтӕ ес, уонӕмӕ уӕлӕнгай цӕстӕй ке нӕ кӕсӕн? Лӕмбунӕг ӕй ку кӕсӕн ӕма сагъӕс кӕнунмӕ рӕстӕг ку хецӕн кӕнӕн. Дӕхе бафӕрсӕ: «Библи кенӕ Библибӕл арӕзт публикацитӕ ку фӕккӕсун, уӕд рӕстӕг рахецӕн кӕнун, цӕмӕй, ци бакастӕн, уобӕл расагъӕс кӕнон? Кӕцидӕр стих мӕмӕ ӕнахур ку фӕккӕса, уӕд байархайун цӕмӕй ӕй хуӕздӕр балӕдӕрон ӕви ибӕл райевгъуйун?» (2 Пет. 3:16). Кӕд лӕмбунӕг расагъӕс кӕнунмӕ рӕстӕг рахецӕн кӕнӕн, уӕд нӕ бон уодзӕй Йегови амундтӕмӕ гӕсгӕ архайун ӕма игъосун кӕнуни гъуддаги дӕр ӕнтӕстгундӕр уодзиан (1 Тим. 4:15, 16).

16. Разамундмӕ игъосун нин ци банхус кӕндзӕй, ӕнахур нӕмӕ ку кӕса, уӕд дӕр?

¹⁶ Йеговӕ ма нин разамунд дӕттуй «ӕууӕнкгун ӕма зундгин цагъари» фӕрци (Матф. 24:45). Фал, гӕнӕн ес, ӕма нин ци разамунд фӕддӕттунцӕ, уой алкӕд кӕронмӕ ма лӕдӕрӕн. Зӕгъӕн, Разамонӕг совет нин загъта, цӕмӕй рагацау нӕхе бацӕттӕ кӕнӕн, ӕнай-ӕнойти ӕрдзон бӕллӕх ку ӕрцӕуа, уомӕ, ӕма гъӕугӕ дзаумӕуттӕ сумки цӕттӕй дарӕн. Фал кадӕр зӕгъдзӕй: «Ӕз кӕми цӕрун, уоми ӕрдзон бӕллӕхӕй тӕссаг нӕй». Кадӕр  ба ма зӕгъдзӕй: «Цагъар коронавируси хабар ӕгӕр ниддессаг кодта». Ци нин банхус кӕндзӕй, цӕмӕй ӕнсувӕртӕ ци унаффитӕ рахӕссунцӕ, уонӕмӕ уӕлӕнгай цӕстӕй ма кӕсӕн? Хуарз уайдӕ нӕ зӕрдӕбӕл ку дарӕн, израилӕгтӕ Зоровавел ӕма Йесомӕ ке байгъустонцӕ, е син цӕхуӕн арфӕдзийнӕдтӕ ӕрхаста, уой. Библий ма ес ӕндӕр хабӕрттӕ дӕр, Йеговӕ ӕ адӕнӕн разамунд куд фӕддӕттидӕ, уой туххӕй. Еци разамунд ӕ лӕггадгӕнгутӕмӕ еуӕй-еухатт ӕнахур фӕккӕсидӕ. Уотӕ дӕр ма сӕмӕ кастӕй, ӕма уотӕ ку бакӕнонцӕ, уӕд си хуарзӕй неци рауайдзӕй. Фал Йеговӕмӕ ке байгъосиуонцӕ, уой фӕрци фӕййервӕзиуонцӕ (Тӕрх. 7:7; 8:10).

17. Цирагъдарӕн ӕма дууӕ оливӕбӕласей туххӕй цӕстӕбӕлуайӕн израилӕгтӕн куд банхус кодта?

¹⁷ Кӕд цирагъдарӕн ӕма дууӕ оливӕбӕласей туххӕй цӕстӕбӕлуайӕн цубур адтӕй, уӕддӕр дзиуиттӕгтӕн банхус кодта, цӕмӕй сӕ кустмӕ ӕма сӕ лӕггадӕмӕ раст цӕстӕй кастайуонцӕ. Захарий дзурдтӕ сӕ зӕрдӕмӕ ку райстонцӕ ӕма кустмӕ ку равналдтонцӕ, уӕд ӕй сӕхебӕл балӕдӕрдтӕнцӕ, Йеговӕ син куд арфӕ кӕнуй, уой. Йеговӕ син ӕ сугъдӕг хъаурӕ ке лӕвардта, уой фӕрци сӕ бон адтӕй цийнӕгӕнгӕй сӕ куст кӕронмӕ фӕуун (Езд. 6:16).

18. Захарий цӕстӕбӕлуайӕн дин царди куд банхус кӕндзӕй?

¹⁸ Захарий цӕстӕбӕлуайӕн махӕн дӕр нӕ царди устур пайда уодзӕй. Аци статьяй куд ӕркастан, уотемӕй: 1) хъаурӕ ни бауадздзӕй, нӕ нихмӕ ку цӕуонцӕ, уӕд, 2) нӕ цийнӕ нӕ фесафдзиан, нӕ царди ести ку раййева, уӕд ӕма 3) Йеговӕбӕл нӕ зӕрдӕ дардзиан, ӕ разамунд ин кӕронмӕ ку нӕ лӕдӕрӕн, уӕд дӕр. Мадта царди зиндзийнӕдтӕбӕл ку исӕмбӕлай, уӕд дӕхе куд бадардзӕнӕ? Захарий цӕстӕбӕлуайӕн дӕ зӕрдӕбӕл дарӕ – Йеговӕ ӕ адӕнбӕл ке тухсуй, уобӕл ма гурусхӕ кӕнӕ. Гъе уӕд дӕ бон уодзӕй, ци разамунд дӕттуй, уобӕл ӕууӕндун, ӕма ин ӕгас зӕрдӕй лӕггадӕ кӕнун (Матф. 22:37). Ӕма уӕд Йеговӕн цийнӕгӕнгӕй ӕносмӕ лӕггадӕ кӕндзӕнӕ! (Кол. 1:10, 11).