1. Wanem nao olketa Jew wea stap lo Babylon luk forward lo hem?

 JEHOVAH hem “waka insaet long tingting blong” King Cyrus blo Persia and datwan mekem Cyrus for disaed for letem olketa Israelite kamap free. Olketa Jew barava hapi lo datwan bikos olketa stap lo Babylon olsem prisoner for staka year. King sei olketa Jew savve go bak lo Jerusalem for ‘bildimbaek moa temple blong Jehovah, God blong Israel.’ (Esra 1:1, 3) Olketa Jew luk forward for worshipim datfala tru God moa lo Israel lo datfala land wea hem givim lo olketa.

2. Wanem nao samfala Jew duim taem olketa kam bak lo Jerusalem?

² Lo 537 B.C.E., samfala Jew arrive lo Jerusalem, wea hem kapitol taon blo kingdom blo Judah lo south. Stretawe olketa start for wakem faondeson blo temple, and olketa finisim datwan lo 536 B.C.E.!

3. Hu nao againstim olketa Jew, and hao nao olketa duim datwan?

³ Bihaen datwan, olketa Jew start for wakem bak temple bat staka pipol againstim olketa. Pipol lo olketa kantri wea stap raonem olketa ‘trae fo mekem olketa fraet an mekem olketa stop fo no bildimbaek’ temple. (Esra 4:4) Bat olketa samting kamap worse bikos lo 522 B.C.E. Artaxerxes kamap King blo Persia. * Olketa wea againstim olketa Jew iusim king hia for helpem olketa for stopem waka lo temple. (Ps. 94:20, NWT) Olketa talem King Artaxerxes hao olketa Jew plan for againstim hem taem temple hem finis. (Esra 4:11-16) King bilivim olketa laea story hia and banim waka lo temple. (Esra 4:17-23) So olketa Jew stop nao for buildim temple.​—Esra 4:24.

4. Wanem nao Jehovah duim bihaen olketa banim waka for buildim temple? (Aesaea 55:11)

 ⁴ Olketa pipol lo olketa kantri wea stap raonem Jerusalem wea no worshipim Jehovah and samfala lo gavman blo Persia strong for stopem disfala waka for gohed moa. Bat Jehovah laekem olketa Jew for mas gohed waka lo temple, and evritaem wanem hem laekem bae hem happen. (Readim Aesaea 55:11.) Hem chusim Zechariah for kamap profet blo hem and hem showim Zechariah eitfala vision wea hem mas storyim lo olketa Jew for encouragem olketa. Olketa vision hia helpem olketa Jew for luksavve olketa no need for fraetem pipol wea againstim olketa, and olketa vision encouragem olketa tu for gohed wakem datfala temple. Lo mek-faev vision, Zechariah lukim wanfala lampstand and tufala olive tree.

5. Wanem nao bae iumi storyim lo disfala article?

⁵ Samfala taem iumi evriwan savve discourage. So iumi savve kasem gud samting taem iumi tingim encouragement wea Jehovah givim lo olketa Israelite lo datfala mek-faev vision blo Zechariah. Datfala vision savve helpem iumi for gohed faithful lo Jehovah taem pipol againstim iumi, taem change kamap lo laef, or taem iumi kasem direction wea iumi tingse hem no fitim.

6. Hao nao vision abaotem lampstand and tufala olive tree wea Sekaraea 4:1-3 storyim encouragem olketa Jew? (Lukim piksa lo front page.)

⁶ Readim Sekaraea 4:1-3. Vision hia abaotem lampstand and tufala olive tree encouragem olketa Jew for gohed waka lo temple nomata pipol againstim olketa. Wanem moa Zechariah lukim? Hem lukim hao tufala olive tree producem oil wea ran insaed wanfala dish, and datfala oil mekem sevenfala lamp lo lampstand for gohed laet. Zechariah askem angel wea story witim hem: “Wanem nao mining blong olketa samting ya?” Angel talem hem disfala message from Jehovah. “I no long strong blong yufala. An i no long paoa blong yufala. Bat i long spirit blong mi nomoa.” (Sekaraea 4:4, 6) Oil wea tufala olive tree hia producem wea no savve finis hem piksarem holy spirit blo Jehovah. So holy spirit blo God garem bigfala paoa winim gavman and army blo Persia. Nomata pipol againstim olketa Jew, Jehovah bae helpem olketa for finisim waka lo temple. Datfala message from Jehovah barava encouragem olketa! Olketa Jew need for trustim Jehovah and start moa for buildim bak datfala temple. And hem nao wanem olketa duim nomata king still banim disfala waka.

7. Wanem change nao kamap wea barava helpem olketa Jew wea wakem temple?

⁷ Wanfala change kamap wea barava helpem olketa Jew. Wanem nao datwan? Darius I, hem kamap niu king blo Persia. Lo mek-tu year wea hem rul, lo 520 B.C.E., hem luksavve hem againstim law for King Artaxerxes stopem olketa Jew for buildim temple. So Darius talem olketa Jew olketa savve finisim waka lo temple. (Esra 6:1-3) Olketa Jew barava sapraes lo datwan, bat Darius duim nara samting tu for helpem olketa. Hem givim order lo pipol wea trae for stopem waka lo temple for stop for duim datwan, and for givim selen and olketa building material for sapotim datfala waka! (Esra 6:7-12) Datwan helpem olketa Jew for finis for buildim temple lo 515 B.C.E., wea hem samting olsem fofala year nomoa.​—Esra 6:15.

8. Taem pipol againstim iumi, wanem nao bae helpem iumi for no fraet?

 ⁸ Distaem tu, staka brata and sista kasem hard taem from pipol againstim olketa. Olsem example, samfala stap lo olketa kantri wea gavman tambuim waka blo iumi. Maet olketa arrestim olketa brata and sista hia and tekem olketa lo kot, and diswan givim witness lo olketa. (Matt. 10:17, 18) Bat samfala taem gavman savve change, and datwan savve mekem olketa Witness free for worship moa. Or maet wanfala judge mekem disison wea helpem preaching waka for gohed. Olketa nara brata and sista maet stap lo kantri wea olketa free for worshipim Jehovah, bat maet olketa famili member againstim olketa and trae for stopem olketa for no duim datwan. (Matt. 10:32-36) Staka taem, olketa famili member stop for againstim iumi taem olketa luksavve olketa no savve stopem iumi for worshipim Jehovah. And tu, samfala wea barava againstim iumi gogo olketa kamap Witness. So no fraet and givap taem pipol againstim iumi bikos Jehovah bae givim holy spirit for helpem iumi.

9. Why nao samfala Jew sorre taem olketa wakem faondeson blo datfala niu temple?

⁹ Taem olketa Jew finis for wakem faondeson blo datfala niu temple, samfala olo Jew wea lukim temple wea Solomon buildim bifor, olketa barava sorre and krae. (Esra 3:12) Olketa tingse datfala niu temple hem bae nating gud nomoa taem olketa comparem datwan witim temple blo Solomon. (Hagae 2:2, 3) Datwan nao mekem olketa barava sorre. Bat datfala vision blo Zechariah bae helpem olketa for hapi moa. Hao nao olsem?

10. Hao nao toktok wea angel talem lo Sekaraea 4:8-10 helpem olketa Jew for hapi moa?

¹⁰ Readim Sekaraea 4:8-10. Angel talem Zechariah hao olketa Jew bae “hapi tumas” from Zerubbabel, governor blo olketa, hem “mekem las ston blong Tambuhaos ya fo hemi stret.” Wanem nao hem minim? Angel hia helpem olketa Jew for luksavve nomata olketa tingse niu temple bae no barava gud olsem temple blo Solomon, Jehovah bae hapi lo temple, and olketa shud hapi tu. Wanem hem important lo Jehovah nao hem for olketa Jew worshipim hem insaed datfala niu  temple followim hao hem laekem. Sapos olketa duim datwan, bae olketa hapi moa.

11. Wanem change nao kamap lo laef blo samfala brata and sista wea no isi for deal witim?

¹¹ Maet hem no isi taem change kamap lo laef blo iumi. Samfala wea insaed lo spesol full-taem service for staka year, olketa mas finis from datfala assignment. Olketa narawan mas stop for duim wanfala assignment wea olketa enjoyim tumas bikos olketa olo nao. Hem fitim for iumi sorre sapos samting olsem happen lo iumi, and maet firstaem iumi no barava minim or iumi no hapi witim datfala disison. Maet iumi sorre from iumi no savve duim staka samting for Jehovah distaem and iumi feel olsem iumi iusles. (Provebs 24:10) Hao nao vision blo Zechariah savve helpem iumi for gohed duim best blo iumi for Jehovah?

12. Hao nao vision blo Zechariah helpem iumi for deal witim eni change wea kamap?

¹² Samting wea bae helpem iumi for deal witim eni change wea kamap hem for luksavve hao Jehovah duim staka spesol samting distaem, and hao iumi garem privilege for waka tugeta witim God. (1 Cor. 3:9) Nomata assignment blo iumi hem change, Jehovah hem gohed for lovem iumi. So sapos samting olsem happen lo iumi, no spendem staka taem for tingting abaotem why nao hem olsem? Winim wei for tingse “evrisamting long bifoa kam hemi barava gud tumas,” askem Jehovah for helpem iumi luksavve lo gud samting wea kamaot from datfala change. (Eklesiastes 7:10) Hem gud for no tingim wanem iumi no fit for duim distaem, bat tingim wanem iumi fit for duim. Datfala vision blo Zechariah teachim iumi hao hem important for gohed hapi nomata samfala change kamap lo laef blo iumi.

13. Why nao samfala Jew no agree witim disison for startim moa waka lo temple?

¹³ Nomata King Artaxerxes banim olketa Jew for wakem bak temple, Hae Priest Jeshua (Joshua) and Governor Zerubbabel, wea leadim olketa Jew “statem moa disfala waka” lo temple. (Esra 5:1, 2) Maet samfala Jew no agree witim disison hia for startim moa disfala waka. Olketa savve olketa enemy bae lukim olketa duim datfala waka and bae trae for stopem olketa moa.  Joshua and Zerubbabel need for sure Jehovah sapotim disison wea olketa mekem. Wanem nao helpem tufala for sure?

14. Olsem Sekaraea 4:12, 14 storyim, wanem nao mekem Hae Priest Joshua and Governor Zerubbabel for sure God sapotim tufala?

¹⁴ Readim Sekaraea 4:12, 14. Angel talem Zechariah hao tufala olive tree piksarem “tufala man wea bae [Jehovah] siusimaot” wea hem nao Joshua and Zerubbabel. Angel sei tufala hia “duim waka” blo Jehovah. Datwan hem nambawan privilege for tufala, and hem showimaot Jehovah trustim olketa! So olketa Jew fit for trustim olketa disison blo Joshua and Zerubbabel bikos Jehovah nao iusim tufala for givim direction lo olketa Jew.

15. Hao nao iumi savve showimaot iumi tinghae lo direction wea iumi kasem from Bible?

¹⁵ Jehovah gohed for leadim pipol blo hem distaem. Wanfala samting hem iusim for givim direction lo iumi hem Bible wea storyim hao for worshipim Jehovah lo stretfala wei. Hao nao iumi savve showimaot iumi tinghae lo direction blo Jehovah lo Bible? Iumi need for spendem taem for readim Bible and for minim gud. Tingim diswan: ‘Taem mi readim Bible or olketa pablikeson blo iumi, waswe, mi savve stop and ting raonem wanem mi readim? Sapos mi readim samting wea “hard for minim,” waswe, mi trae for minim datwan? Or mi read nomoa and no interest for savve lo mining blo hem?’ (2 Pet. 3:16) Sapos iumi spendem taem for ting raonem wanem Jehovah hem teachim iumi lo Bible, datwan bae helpem iumi for followim direction blo hem and duim gud ministry blo iumi.​—1 Tim. 4:15, 16.

16. Wanem nao bae helpem iumi for laek followim direction from “datfala wakaman wea faithful and wise” nomata firstaem iumi tingse maet hem no fitim iumi?

¹⁶ Jehovah iusim tu “datfala wakaman wea faithful and wise” for givim direction lo iumi. (Matt 24:45) Samfala taem maet iumi kwestinim why iumi kasem samfala direction. Olsem example, maet iumi kasem instruction for redyim samfala samting for wanfala natural disaster wea iumi tingse bae no savve happen lo ples blo iumi. Or maet iumi tingse direction iumi kasem lo taem blo wanfala pandemic hem ova tumas. Wanem nao iumi shud duim sapos iumi tingse olketa  instruction wea iumi kasem hem no fitim iumi? Hem gud for tingim hao olketa Jew kasem gud samting from olketa followim direction wea olketa kasem from Joshua and Zerubbabel. Hem gud for tingim tu olketa nara story lo Bible, olsem taem pipol blo God followim direction wea olketa tingse hem no fitim, bat hem sevem laef blo olketa.​—Jajis 7:7; 8:10.

17. Hao nao datfala vision abaotem lampstand and tufala olive tree helpem olketa Jew?

¹⁷ Nomata Zechariah no lukim staka samting insaed mek-faev vision, wanem hem lukim hem encouragem olketa Jew for gohed waka lo temple and for worshipim Jehovah. Taem olketa duim datwan olketa luksavve Jehovah nao leadim and sapotim waka wea olketa duim. Jehovah iusim holy spirit blo hem for helpem olketa gohed lo datfala waka and for hapi moa.​—Esra 6:16.

18. Hao nao vision blo Zechariah encouragem iumi?

¹⁸ Datfala vision blo Zechariah abaotem lampstand and tufala olive tree barava encouragem iumi. Olsem iumi storyim, datfala vision savve strongim iumi taem pipol againstim iumi. Hem teachim iumi hao hem important for gohed hapi nomata samfala change kamap lo laef blo iumi. And hem teachim iumi tu for tinghae lo direction wea iumi kasem nomata firstaem maet iumi tingse hem no fitim iumi. Taem iumi deal witim olketa hard samting, wanem nao iumi savve duim? Hem gud for tingim hao datfala vision blo Zechariah helpem iumi for luksavve Jehovah nao sapotim pipol blo hem. Then from iumi trustim Jehovah, iumi bae gohed worshipim Jehovah lo full heart blo iumi. (Matt. 22:37) Sapos iumi duim olsem, Jehovah bae helpem iumi for gohed worshipim hem for olowe, and datwan bae mekem iumi barava hapi.​—Col. 1:10, 11.