1. Соске шај сине те овен бахтале о Евреија?

 О ЕВРЕИЈА сине бут бахтале. О Јехова поттикнинѓа „о вило е Кирескоро, е персиско царескоро“, те ослободинел е Израелцон, кола со бут берша сине робија ко Вавилон. О цари објавинѓа кај о Евреија шај те иранен пе ки пумари пхув „хем палем те градинен о кхер е Јеховаскоро о Девел е Израелескоро“ (Езра 1:1, 3). Адава диве сине ленге чаче посебно диве! Адава значинела сине кај о Евреија палем шај те обожавинен е чачутне Девле ки пхув која со денѓа ла ленге.

2. Која бути успешно завршинѓе о прва Евреија со иранѓе пе ко Ерусалим?

² Ко 537-то берш а.а.е., о прва Евреија иранѓе пе ко Ерусалим, и главно диз ко јужно царство Јуда. Окола со иранѓе пе, одма почминѓе те градинен о храми, хем џи ко 536-то берш а.а.е., ола више чхивѓе е храмескере темелија!

3. Саво противибе сине е Евреен?

³ Откеда о Евреија почминѓе палем те градинен о храми, бут мануша почминѓе те противинен пе ленге. О народија со сине околу ленде почминѓе „те обесхрабринен лен хем те убединен лен те на градинен“ (Езра 4:4). Акаја ситуација сине бут пхари е Евреенге, ама о буќа уле панда полошна. Ко 522-то берш а.а.е., о Артаксеркс уло нево цари ки Персија. * О противникија мислинѓе песке кај адалеске со иси акана нево цари ола ка шај скроз те чхинавен о градибе аѓаар со ка керен проблемија преку о закони (Пс. 94:20). Ола бичхалѓе писмо џи ко цари Артаксеркс коте со пишинѓе кај о Евреија планиринена те бунинен пе против лесте (Езра 4:11-16). О цари верујнѓа ко ленгоро ховајбе хем заповединѓа  те чхинавел пе градибаја о храми (Езра 4:17-23). Адалеске со сине денди адаја забрана, о Евреија мора сине те чхинавен те градинен о храми (Езра 4:24).

4. Со керѓа о Јехова откеда несаве противникија забранинѓе те градинел пе о храми? (Исаија 55:11).

⁴ Несаве мануша тари адаја пхув со на обожавинена сине е Јехова хем несаве службеникија таро Персиско царство сине одлучна те чхинавен палем те градинел пе о храми. Ама о Јехова сине одлучно те продолжинел пе е градибаја, хем ов секогаш исполнинела пли намера. (Читин Исаија 55:11.) Ов биринѓа е Захарија сар пророко хем денѓа ле офто интересна визие, хем о Захарија ваљани сине те вакерел е Евреенге адала визие те шај те охрабринел лен. Адала визие поможинѓе ленге те дикхен кај нане соске те даран таро пумаре противникија хем охрабринѓе лен те продолжинен е задачаја со денѓа лен о Јехова. Ки панџто визија, о Захарија дикхља светилнико хем дуј маслинкакере кашта.

5. Со ка дикха ки акаја статија?

⁵ Сарине амен понекогаш обесхрабринаја амен. Адалеске ка овел шукар те дикха сар о Јехова охрабринѓа е Израелцон преку е Захаријаскири визија. Ако хаљоваја акаја визија ка поможинел аменге верно те служина е Јеховаске кеда о мануша противинена пе аменге, кеда менинена пе амаре околностија хем кеда добинаја упатство кова со на хаљоваја ле.

6. Сави визија башо светилнико хем башо дуј маслинкакере кашта сој пишими ко Захарија 4:1-3 охрабринѓа е Евреен? (Дикх и слика ки насловно страна.)

⁶ Читин Захарија 4:1-3. И визија башо светилнико хем башо дуј маслинкакере кашта денѓа е Евреен храброст те на чхинавен е буќаја иако сине лен противибе. Сар? Дали приметинѓан кај ко светилнико цело време тхавдела сине масло? Таро дуј е маслинкакере кашта тхавдела сине масло ки јекх чинија, колатар со пхерѓона сине о ефта светилке таро светилнико. Аѓаар о светилнико шај сине цело време те тхабљол. О Захарија пучља: „Со значинела акава?“ О ангели одговоринѓа леске акале поракаја: „’Ни војскаја, ни силаја, него мле духоја‘, вакерела о Јехова о заповеднико е војскенгоро“ (Зах. 4:4, 6). О масло таро кашта претставинела е Јеховаскоро моќно свети дух, кова со никогаш нашти те трошинел пе. Е Јеховаскоро свети дух сине бут помоќно тари Персиско војска. Адалеске со о Јехова поддржинела сине околен со градинена о храми, ола шај сине те завршинен и бути иако сине лен противибе. Акава хабери сине бут охрабрувачко! Е Евреен ваљани сине само те овел лен доверба ко Јехова хем те продолжинен те градинен. Ола баш адава керѓе, иако сине ленге забранимо те градинен.

7. Која промена локхјарѓа и бути околенге со градинена сине о храми?

⁷ Пало несаво време, ало џи ки промена која со локхјарѓа и бути околенге со градинена сине о храми. Ко 520-то берш а.а.е., о Дариј I уло цари ки Персија. Ко дујто берш таро лескоро владибе, ов откринѓа кај и забрана башо градибе о храми на сине законско. Тегани ов нарединѓа те продолжинел пе е градибаја (Езра 6:1-3). Е царескири одлука изненадинѓа саринен. Ама ов керѓа нешто повише. Нарединѓа са е околна народонге те чхинавен те противинен пе е Евреенге хем те ден лен паре хем са со ваљани ленге те шај те завршинен о храми (Езра 6:7-12). Адалеске, о Еврија шај сине те завршинен о храми околу штар берш пало адава, ко 515-то берш а.а.е. (Езра 6:15).

8. Соске шај те ове храбро кеда о јавера противинена пе туке?

 ⁸ Авдиве да, бут џене таро е Јеховаскере слуге иси лен противибе. На пример, несаве живинена ко пхувја коте со амаре активностија тане ограничиме. Ко асавке пхувја, амаре пхраља тане пханле хем „ингарена лен англо управителија хем царија“ те шај те ден сведоштво ленге (Мат. 10:17, 18). Понекогаш, кеда менинена пе о владе амаре пхраленге овела полокхо. Или несаво праведно судија ка анел несави одлука која со ка дозволинел амаре пхраленге послободно те обожавинен е Јехова. Јавера сведокија иси лен противибе тари јавер страна. Ола живинена ки пхув коте со шај слободно те обожавинен е Јехова, ама иси лен противибе тари фамилија кола со мангена те чхинавен лен те служинен е Јеховаске (Мат. 10:32-36). Ко бут случаија, кеда и фамилија дикхела кај нашти те чхинавен амен те служина е Јеховаске, ола на керена аменге више притисок. Хем иси случаија коте со несаве ко почеток сине насилна противникија, ама покасно уле ревносна Сведокија. Кеда ка противинен пе туке, ма откажин тут! Ов храбро. О Јехова тано туја хем ка поможинел туке пле свето духоја хем адалеске нане состар те дара!

9. Соске несаве Евреија сине разочариме кеда дикхле о темелија башо нево храми?

⁹ Кеда чхивѓа пе о темели башо нево храми, несаве таро попхуре Евреија рунѓе (Езра 3:12). Ола дикхле о бут шужо храми кова со градинѓа ле о Соломон, хем адалеске мислинѓе песке кај акава нево храми нане те овел „ништо ки споредба“ е пуране храмеа (Агеј 2:2, 3). Ола сине бут разочариме соске спорединѓе о нево храми е пуранеа. Е Захаријаскири визија ваљани сине те поможинел ленге те овен палем бахтале. Сар?

10. Сар е ангелескере лафија сој пишиме ко Захарија 4:8-10 поможинѓе е Евреенге палем те овен бахтале?

¹⁰ Читин Захарија 4:8-10. Со мислинѓа о ангели кеда вакерѓа кај о Евреија „ка овен бахтале кеда ка дикхен о висако ко васта [е еврејско управителеске] е Зоровавелеске“? Висако тано алати кова со сикавела дали несаво ѕидо тано совршено вертикално, или право. Е ангелескере лафија уверинѓе е Девлескере народо кај иако несаве Евреенге о нево храми изглединела сине бут скромно ов ка овел завршимо хем ка овел кердо аѓаар сар со мангела о Јехова. Ако о Јехова сине задоволно таро нево  храми, тегани о Евреија да ваљани сине те овен задоволна. Е Јеховаске сине најважно ко нево храми те обожавинен ле ко јекх прифатливо начин. О Евреија ка шај сине палем те овен бахтале ако сине ленге најважно те обожавинен е Јехова ко прифатливо начин хем те дикхел ки ленде шукар.

11. Сој тано пхаро несаве Јеховаскере слугенге авдиве?

¹¹ Буте џененге амендар тано пхаро кеда ка менинен пе амаре околностија. Несаве со бут време служинѓе ки несави специјално полновремено служба добинѓе неви задача. Јавера мора сине те чхинавен те служинен ки несави задача која со бут мангена ла сине адалеске со пхуриле. Кеда доживинаја асавке промене нормално тано те разочарина амен. Ко почеток, шај нане те хаљова целосно несаве одлуке или палем те сложина амен ленцар. Шај те мислина аменге кај англедер сине бут пошукар. Хем шај те обесхрабрина амен, хем те мислина аменге кај акана ко неве околностија на сием више добором корисна е Јеховаске (Изр. 24:10). Сар шај е Захаријаскири визија те поможинел аменге понадари да те да амаро најшукар амаре Девлеске?

12. Сар шај е Захаријаскири визија те поможинел аменге те ачхова бахтале кеда амаре околностија менинена пе?

¹² Полокхе шај те прилагодина амен ко промене ако дикхаја ко буќа сар о Јехова со дикхела. Ов керела баре буќа авдиве, хем амен иси амен и чест те ова лескере соработникија (1. Кор. 3:9). Амаре задаче шај те менинен пе, ама е Јеховаскоро мангипе спрема аменде нане те менинел пе. Значи, ако несави промена ки организација погодинела туте лично, ма трошин бут време ко адава те размислине таро кола причине тани анди адаја промена. Наместо те роде о „пуране диве“, молин тут те шај те дикхе о шукар буќа со анела лен и промена (Проп. 7:10). Наместо те размислине башо буќа кола со нашти више те кере лен, размислин башо буќа кола со шај те кере лен. Тари е Захаријаскири визија сикљоваја кобор тано важно те овел амен позитивно стави. Аѓаар ка шај те ачхова бахтале хем верна чак кеда ка менинен пе амаре околностија.

13. Соске несаве Евреија шај мислинѓе песке кај тани погрешно одлука палем те градинел пе о храми?

¹³ Иако сине забранимо те градинел пе о  храми, о првосвештенико о Исус хем о управители о Зоровавел, о дуј мурша кола со сине бириме те водинен е народон, „почминѓе палем те градинен е Девлескоро кхер“ (Езра 5:1, 2). Несаве Евреија шај мислинѓе песке кај тани погрешно одлука. Соске? Ола нашти сине те гаравен кај градинена о храми хем џанле кај ленгере душмања ка керен са со шај те шај те чхинавен лен тари бути. Е дује одговорно муршенге, е Исусеске хем е Зоровавелеске, ваљани сине доказ кај о Јехова поддржинела лен. Хем добинѓе ле. Те дикха сар.

14. Спрема Захарија 4:12, 14, со уверинѓа е првосвештенико е Исусе хем е управителе е Зоровавеле?

¹⁴ Читин Захарија 4:12, 14. Ко акава дело тари визија о ангели откринѓа е Девлескере пророкоске кај о дуј маслинкакере кашта претставинена е „дује помазаникон“ — е Исусе хем е Зоровавеле. Акала дуј мурша ки симболично смисла „терѓона сине узо о Господари е цело пхувјакоро“, о Јехова. Адава сине јекх бари чест! Е Јехова сине ле доверба ки ленде. Адалеске, е Евреен шај сине те овел лен доверба ко ленгере одлуке хем ко е Јеховаскоро водство, бизи разлика саве упатствија ка добинен сине.

15. Сар шај те сикава кај ценинаја е Јеховаскоро водство кова со аракхљола ко лескоро Лафи?

¹⁵ Јекх начин сар о Јехова понадари да водинела пле народо тано преку пло Лафи, и Библија. Ко акава свето лил ов вакерела аменге сар те обожавина ле ко прифатливо начин. Сар шај те сикава кај ценинаја о водство со добинаја ле таро е Девлескоро Лафи? Аѓаар со ка одвојна аменге време шукар те читина ле хем те трудина амен те хаљова адава со читинаја. Пуч тут: „Кеда читинава и Библија или амаре публикацие, дали ачховава хем хор размислинава башо адава со читинава? Дали трудинава ман те аракхав повише информацие башо библиска чачипа кола сој пхаре хаљојбаске? Или само сигате читинава о материјали?“ (2. Пет. 3:16). Ако одвојнаја аменге време хор те размислина башо адава со сикавела амен о Јехова, тегани ка шај те следина лескоро водство хем успешно те кера амари служба (1. Тим. 4:15, 16).

16. Со ка поможинел аменге те шуна о упатствија таро верно хем разборито робо кола со нане аменге баш јасна?

¹⁶ Јекх јавер начин сар о Јехова дела амен водство тано преку о „верно хем разборито робо“ (Мат. 24:45). Понекогаш, акава робо  шај те дел упатствија кола со нане те овен аменге баш јасна. На пример, шај те добина конкретна упатствија кола со ваљани те спреминен амен баши несави природно катастрофа баши која со шај те мислина аменге кај нане те случинел пе ко тхан коте со амен живинаја. Или шај те мислина аменге кај о робо превише пазинела џикоте трајнела акаја пандемија. Со ваљани те кера ако мислинаја кај о упатствија со добинаја лен нане баш мудра? Шај те размислина сави корист сине е Израелцон адалеске со керѓе адава со о Исус хем о Зоровавел вакерѓе ленге те керен. Шај исто аѓаар те размислина башо јавера библиска извештаија со читинѓем лен. Понекогаш е Девлескере слуге добинена сине упатствија кола со на изглединена сине баш мудра ама ко крајо адала упатствија спасинѓа ленгоро живото (Суд. 7:7; 8:10).

17. Сар влијајнѓа упро о Евреија и визија башо светилнико хем башо дуј маслинкакере кашта?

¹⁷ Е Захаријаскири панџто визија шај сине кратко, ама поможинѓа е Евреенге те дикхен позитивно ки пли бути хем ко пло обожавибе. Хем кеда постапинѓе спрема е Захаријаскири визија, ола осетинѓе е Јеховаскири поддршка хем водство. Преку пло моќно свети дух, о Јехова поможинѓа ленге те продолжинен пумаре задачаја хем палем те иранен пумаро бахталипе (Езра 6:16).

18. Сар шај те поможинел туке е Захаријаскири визија?

¹⁸ Е Захаријаскири визија башо светилнико хем башо дуј маслинкакере кашта шај бут те влијајнел упро тло живото. Сар со дикхлем, шај те поможинел туке те овел тут сила кеда о јавера противинена пе туке, те ове бахтало кеда менинена пе тле околностија, хем те овел тут доверба те шај те ове послушно кеда добинеа упатствија кола со нане туке баш јасна. Со ваљани те кере кеда накхеа таро пхаре ситуацие? Прво, дикх адава со дикхља о Захарија — доказ кај о Јехова грижинела пе пле народоске. Пало адава, применин адава со дикхљан аѓаар со ка овел тут доверба ко Јехова хем понадари да служин леске цело вилеа (Мат. 22:37). Ако кереа адава, о Јехова ка поможинел туке бахтало те служине леске ки цело вечност (Кол. 1:10, 11).