1. Savi prilika hine len o Judejcija kola hine ko ropstvo?

 O JUDEJCIJA hine but bahtale. O Jehova „podstakninđa e persijsko kralje e Kire“ te mukhel e Izraelcen, kola beršencar hine ko ropstvo ko Vavilon. O kralj phenđa so o Judejcija šaj te irinen pe ki pi phuv hem „palem te ćeren ćher e Jehovase, e Izraelese Devlese“ (Jezd. 1:1, 3). Odija hine but šuži vest! Sebepi odova o Judejcija palem šaj hine te služinen e ćaćutne Devlese ki phuv koja ov dinđa len.

2. So ćerđe o Judejcija kola irinđe pe ko Jerusalim?

² Ko 537. berš angl. n. e., disave Judejcija irinđe pe ko Jerusalim, kova hine glavno diz ko južno kraljevstvo andi Juda. Odola Judejcija sigate počminđe te ćeren ko odova te obnovinen o hram hem đi o 536. berš angl. n. e. on već ćhivđe o temelj ando hram.

3. Savo protivljenje o Judejcija doživinđe?

³ Ked počminđe te ćeren o hram, but manuša počminđe te protivinen pe olenđe. O narodija uzalo lende „počminđe te obeshrabrinen e narodo andi Juda hem te pheren olengi godi te na gradinen“ (Jezd. 4:4). E Judejcenđe hine but pharo, ama o buća ulje pana pološna. Ko 522. berš angl. n. e. o Artakserks ulo nevo kralj andi Persija. * O protivnikija mislinđe so akana ked alo nevo kralj so šaj te koristinen o zakon te ćhinaven te gradini pe o hram (Ps. 94:20). On bićhalđe jekh lil e kraljese hem phenđe so o Judejcija mangena te pobuninen pe protiv oleste (Jezd. 4:11-16). O kralj verujinđa ko olenge hovajba  hem zabraninđa te gradini pe o hram (Jezd. 4:17-23). Odolese, o Judejcija ćhinavđe te gradinen o hram (Jezd. 4:24).

4. So o Jehova ćerđa ked o protivnikija zabraninđe te gradini pe o hram? (Isaija 55:11)

⁴ O narodija kola na služinđe e Jehovase hem disave kola hine ki vlast ki Persija manglje ko sa o načinija te ćhinaven te gradini pe o hram. Ama, o Jehova manglja o Judejcija palem te ćeren o hram, a ov uvek ćerela odova so mangela. (Čitin Isaija 55:11.) Ov ćhivđa e Zaharija te ovel oleso proroko hem dinđa le ofto but šuže vizije kola valjanđe te ohrabrinen e Judejcen. Odola vizije valjanđe te pomožinen len te haljon so na valjani te daran ando pe protivnikija hem podstakninđe len hem ponodri te ćeren odova so o Jehova mangela. Ki panđto vizija, o Zaharija dikhlja o svećnjak hem duj kašta andi maslina.

5. Sostar ka vaćera ko akava članko?

⁵ Sare amen disavo puti hijam obeshrabrime. Odolese i panđto vizija koja o Jehova dinđa e Zaharijase šaj te ohrabrini amen, sar so ohrabrinđa e Izraelcen. Ako trudinaja amen te haljova akija vizija, odova ka pomožini amen verno te služina e Jehovase ked neko protivini pe amenđe, ked disave buća ko amaro životi menjinena pe hem ked dobinaja smernice kola na haljovaja.

6. Sar i vizija koja pisini ko Zaharija 4:1-3 ohrabrinđa e Judejcen? (Dikh i slika ki naslovno strana.)

⁶ Čitin Zaharija 4:1-3. I vizija ando svećnjak hem ando duj kašta andi maslina pomožinđa e Judejcenđe te oven hrabra hem te ćeren i buti koja o Jehova dinđa len iako hine len protivljenje. Sar? Da li zapazinđan so o svećnjak niked na aćhilo bizo ulje? O ulje ando duj kašta andi maslina thavdela ko ćaro, a palo odova o ulje đala ko efta svetiljke ando svećnjak. Sebepi odova o svetiljke stalno thabljona. O Zaharija pućlja: „So akava značini?“ O anđeo vaćerđa lese e Jehovase lafija: „’Na e vojno silaja, ni e snagaja već me duhoja‘, phenela o Jehova, o Komandanti upro sa o vojske“ (Zah. 4:4, 6). O ulje ando kašta predstavinđa e Jehovaso sveti duh kova našti te trošini pe. E Devleso sveti duh hine but pozoralo andi persijsko vojska. Sebepi so o Jehova hine ki olengi strana on šaj hine te završinen o hram iako avera protivinđe pe olenđe. Odija hine šukar vest! O Judejcija samo valjanđe te verujinen e Jehovase hem palem te počminen te gradinen o hram. Ađahar hem ćerđe iako pana hine zabranimo lenđe te gradinen.

7. So pomožinđa e manušenđe te završinen o hram?

⁷ Ko 520. berš angl. n. e., disave buća menjinđe pe hem sebepi odova e manušenđe kola ćerđe o hram hine but polokho. Tegani, o Darije I ulo nevo kralj andi Persija. Ko dujto berš andi pi vladavina, ov arakhlja so odova so hine zabranimo te gradini pe o hram na hine premalo zakon. O Darije phenđa so on valjani te završinen o hram (Jezd. 6:1-3). E kraljesi odluka iznenadinđa sarinen. Ama, o kralj ćerđa pana diso. Ov naredinđa e manušenđe kola hine uzo Judejcija te na mešinen pe olenđe ki gradnja hem te den len pare hem sa avera buća kola valjani lenđe te završinen o hram (Jezd. 6:7-12). Sebepi odova, ko 515. berš angl. n. e. o Judejcija završinđe o hram palo štar berš (Jezd. 6:15).

8. Sose šaj te ove hrabro ked avera protivinena pe tuće?

 ⁸ Avdije, but e Jehovase sluge doživinena progonstvo. Na primer, disave amare phralja hem phenja živinena ko phuvja kuri amare aktivnostija tane zabranime. Ko asavke phuvja, amare phralja but putija tane phanle hem odothe šaj te svedočinen e manušenđe kola tane ki vlast (Mat. 10:17, 18). Podijekh puti, sebepi so i vlast menjini pe ja sebepi disavo pošteno sudija, amare phralja šaj slobodno te služinen e Jehovase. Avera phralja hem phenja tane progonime hem ko aver način. On šaj živinena ko phuvja kuri šaj slobodno te služinen e Jehovase, ama šaj neko kotar olengi familija mangela te ćhinavi len te služinen olese (Mat. 10:32-36). But putija, amare ćherutne više na protivinena pe amenđe ked dikhena so našti te ćhinaven amen te služina e Jehovase. Podijekh puti, baš okola so hine bare protivnikija kasnije ulje revna Svedokija. Odolese, ked doživineja progonstvo ma ćhinav te služine e Jehovase, već ov hrabro. O Jehova hem oleso moćno sveti duh tane tuvaja. Odolese, nane sostar te dara!

9. Sose disave Judejcija hine tužna ked hine ćhivdo o temelji ando hram?

⁹ Ked hine ćhivdo o temelji ando hram, disave phure manuša runđe (Jezd. 3:12). On dikhlje o hram kova ćerđa o Solomon hem mislinđe so akava nevo hram na ka ovel ništa premalo odova hram (Ag. 2:2, 3). On hine but tužna sose uporedinđe o nevo hram okoleja so hine angleder. E Zaharijasi vizija valjanđa te pomožini len palem te oven bahtale. Sar?

10. Sar o lafija ando Zaharija 4:8-10, kola o anđeo vaćerđa, pomožinđe e Judejcenđe palem te oven bahtale?

¹⁰ Čitin Zaharija 4:8-10. Ko so o anđeo mislinđa ked phenđa so o Judejcija „ka radujinen pe ked ka dikhen o visak ko vasta ando [judejsko namesnik] Zorovavelj?“ O visak hine alatka koja mothovi da li tano diso uspravno. O anđeo uverinđa e Devlese narodo so iako o hram nane sar okova angleder, ov ka ovel završimo hem ka ovel asavko savo o Jehova mangela. Ako o Jehova ka ovel zadovoljno oleja sose on na bi ovena zadovoljna? E Jehovase hine važno ko nevo hram te služinen  olese sar so ov mangela. Ako bi o Judejcija ćerena odova hem ako bi dena sa pestar o Jehova te ovel zadovoljno olencar, on bi palem ovena bahtale.

11. So šaj te ovel pharo disave e Jehovase slugenđe avdije?

¹¹ Butenđe amendar tano pharo ked disave buća menjinena pe ko amaro životi. Disave kola beršencar služinđe ki specijalno punovremeno služba akana dobinđe nevo zadatko. Disave morandilje te aćhaven o zaduženje kova manglje sebepi pe berša. Normalno tano te ova tužna ked asavke promene desinena pe amenđe. Šaj na haljovaja sose anđa pe asavki odluka ja šaj tano pharo amenđe te prihvatina la. Šaj mislinaja so angleder hine amenđe pošukar. Šaj te ova obeshrabrime hem te mislina so akana našti te ćera e Jehovase odobor sar angleder (Posl. 24:10). Sar e Zaharijasi vizija šaj te pomožini amen hem tegani te da amaro najšukar e Jehovase?

12. Sar e Zaharijasi vizija šaj te pomožini amen te aćhova radosna ked ovena promene ko amaro životi?

¹² Ka ovel amenđe polokho te prihvatina o promene ako ko buća dikhaja sar o Jehova. Avdije, ov ćerela but buća hem amen isi amen čast te ova olese saradnikija (1. Kor. 3:9). Amare zadatkija šaj te menjinen pe, ama e Jehovaso mangipe premalo amende niked na ćhinavđola. Ako disavi promena utičini upro tute, ma razmislin but sose alo đi odija promena. Umesto samo te mange to životi te ovel sar angleder, molin e Jehova te pomožini tut te dikhe sose tani odija promena šukar (Prop. 7:10). Ma razmislin samo kola buća akana našti te ćere, već razmislin so akana šaj te ćere. Andi Zaharijasi vizija sikljovaja kobor tano važno hem ponodri te aćhova pozitivna. Ađahar ka aćhova radosna hem verna iako ovena disave promene ko amaro životi.

13. Sose disave Izraelcija šaj mislinđe so nane šukar odluka palem te ćerel pe o hram?

¹³ Hine zabranimo te obnovini pe o hram. Ama, o prvosveštenik Isus hem o namesnik Zorovavelj hine ćhivde te predvodinen e Devlese narodo hem „počminđe palem te gradinen e Devleso ćher“ (Jezd. 5:1, 2). Disave Judejcija šaj  mislinđe so odija hine lošno odluka. On naštine te garaven ando pe dušmanija so gradinena o hram. O Judejcija đanđe so olenge dušmanija sa ka ćeren samo te ćhinaven len te gradinen o hram. O Isus hem o Zorovavelj manglje te đanen so o Jehova tano olencar. Hem o Jehova uverinđa len ko odova. Sar?

14. Ko so o lafija ando Zaharija 4:12, 14 uverinđe e Isuse hem e Zorovavelje?

¹⁴ Čitin Zaharija 4:12, 14. Ko akava deo andi Zaharijasi vizija, o anđeo mothovi e Devlese verno prorokose so o duj kašta andi maslina tane „o duj pomazanikija“ – o Isus hem o Zorovavelj. O anđeo phenđa so on duj samći „terđona uzo Gospodari andi celo phuv“, o Jehova. Odija hine but bari čast! O Jehova hine le but baro poverenje upro lende. Sebepi odova o Izraelcija šaj hine te verujinen ko sa so on phenđe lenđe te ćeren, sose o Jehova prekalo lende vodinđa pe narodo.

15. Sar šaj te mothova so poštujinaja e Jehovase smernice ando oleso Lafi?

¹⁵ Jekh način sar o Jehova dela smernice pe narodose tano prekalo poklo Lafi, i Biblija. Ki odija knjiga, ov phenela amenđe sar te služina lese ko ispravno način. Sar šaj te mothova so poštujinaja o smernice kola dobinaja ando Devleso Lafi? Ađahar so ka arakha vreme te čitina e Devleso Lafi hem te haljova so pisini ano leste. Puć tut: „Ked čitinava i Biblija ja disavi amari publikacija da li terđovava hem hor razmislinava ando odova so čitinđum? Ked diso na haljovava, da li istražinava odova? Ja da li samo sigate nakhava prekalo odova materijali?“ (2. Petr. 3:16). Ako arakhaja vreme te razmislina ando odova so o Jehova sikavi amen, tegani ka ićera amen ko olese smerinice hem ka ćera i buti koja o Jehova dinđa amen (1. Tim. 4:15, 16).

16. Ked na haljovaja o smernice ando „verno hem razborito robo“, so ka pomožini amen te ićera amen ko odola smernice?

¹⁶ Pana jekh način sar o Jehova dela amen smernice tano prekalo „verno hem razborito robo“ (Mat. 24:45). Podijekh puti šaj te dobina disave smernice kola na haljovaja. Na primer, šaj te dobina konkretna smernice sar te pripremina amen asi disavi prirodno katastrofa asi koja mislinaja so niked na ka ovel koro amende. Ja šaj mislinaja so ko period andi pandemija kotar koronavirus o verno hem  o razborito robo tano preterano oprezno. So valjani te ćera ako mislinaja so o smernice nane mudra? Šaj te razmislina sose e Izraelcenđe hine šukar ked ćerđe sa odova so o Isus hem o Zorovavelj phenđe lenđe te ćeren. Šaj te razmislina hem ando avera primerija kola čitinđam ki Biblija. Podijekh puti e Devleso narodo dobinđa disave smernice kola olenđe dićhilje sar nemudra, ama spasinđe olengo životi (Sud. 7:7; 8:10).

17. Sar i vizija ando svećnjak hem ando duj kašta andi maslina utičinđa upro Judejcija?

¹⁷ I panđto vizija koja o Zaharija dikhlja šaj tani kratko, ama pomožinđa e Judejcenđe revno te ćeren pi buti hem palem te služinen e Jehovase ko ispravno način. Ked ićerđe pe ko odova so sikljilje andi Zaharijasi vizija, on osetinđe so o Jehova pomožini len hem so vodini len. Prekalo po moćno sveti duh, o Jehova pomožinđa len te nastavinen te ćeren pi buti hem palem te oven bahtale (Jezd. 6:16).

18. Sar šaj e Zaharijasi vizija te utičini upro tute?

¹⁸ E Zaharijasi vizija ando svećnjak hem ando duj kašta andi maslina šaj but te utičini upro tute. Sar so dikhljam, šaj te pomožini tut te ovel tut snaga ked avera protivinena pe tuće, te ove bahtalo ked disave buća menjinena pe ko to životi, te ovel tut poverenje kova valjani tuće te šaj te šune o smernice čak ked na haljoveja len. So valjani te ćere ked desinena pe disave promene ko to životi? Najangleder, dikh odova so o Zaharija dikhlja – dokaz so o Jehova brinini pe ando po narodo. Palo odova, ked hijan sigurno so o Jehova brinini pe ando po narodo, verujin olese hem služin olese celone vileja (Mat. 22:37). Tegani, o Jehova ka pomožini tut zauvek te služine lese radosno (Kol. 1:10, 11).