1. Kantu kahi kakushagalusa Abayahudi bahêkagwa e Babiloni bayumvirhe?

 ABAYAHUDI bal’ishagalusire bwenene. Yehova Nnâmahanga “ashumya omurhima gwa Mwami Sirusi w’e Persi” ly’alika Abaisraheli bali bamayusa myaka minji bahêsirwe e Babiloni. Mwami ayaliza oku Abayahudi bagaluke emwabo lyo ‘bagend’iyubaka buhyahya enyumpa ya Yehova Nnâmahanga wa Israheli.’ (Ezr. 1:1, 3, NWT) Eryo lyali irhegeko lyakushagalusa bwenene! Oko kwali kuderha oku enterekêro ya Nnâmahanga w’okuli yali yacib’igalulwa omu cihugo ahâga olubaga lwage.

2. Bulyo bwakujira bici Abayahudi babire nabo erhi bagaluka e Yeruzalemu?

² Omu mwaka gwa 537 E.K.K.K., Abayahudi barhanzi barhengaga e Babiloni bahika omu vile nkulu y’obwami bw’e sud bw’e Yuda yakag’ihamagalwa Yeruzalemu. Abo Bayahudi bagalukaga barhondera okukola ho n’aho lyo bacib’iyubaka ehekalu, n’omu mwaka gwa 536 E.K.K.K., bali erhi bamayus’iyubaka omusingi gw’ehekalu!

3. Gurhi Abayahudi bahagalisirwemwo?

³ Erhi Abayahudi bacib’irhondera okuyubaka buhyahya ehekalu, bantu banji barhondera okubahagalika. Olubaga lwal’ibazungulusire lwanacijaho “lwarhondera okubulisa olubaga lw’Abayahudi omurhima gw’okuyubaka.” (Ezr. 4:4) Ako, kali kanga kazibu oku Bayahudi, cikone, hali ebindi bintu byabire. Omu mwaka gwa 522 E.K.K.K., omwami muhyahya wakag’ihamagalwa Artashasta, arhondera okurhegeka e Persi. * Abo bakag’ihagalika Abayahudi babona oko kushanja mwami nka yo njira y’okubarhabala bahanze loshi-loshi ogo mukolo gw’okuyubaka omu ‘kuzûsa entambala mpu ly’irhegeko erhi irhegeko.’ (Enna. 94:20) Egarhi k’ebintu babwiraga Mwami Artashasta, baderha oku Abayahudi bali bajira ekomplo y’okumugomera. (Ezr. 4:11-16) Mwami  ayemera obo bunywesi anarhegeka oku bayimanze ogo mukolo gw’okuyubaka. (Ezr. 4:17-23) Oko kwarhuma Abayahudi baleka okuyubaka ehekalu.​—Ezr. 4:24.

4. Gurhi Yehova ajijire erhi abashombanyi b’Abayahudi babahanza okuyubaka buhyahya ehekalu? (Izaya 55:11)

⁴ Abantu barhakag’iharamya Yehova, na bantu baguma na baguma b’omu burhegesi bw’e Persi, bal’ihizire okuhanza omukolo gw’okucib’iyubaka buhyahya ehekalu. Cikone Yehova al’ilonzize Abayahudi bayuse ogo mukolo. N’ensiku zoshi, anahikirize omuhigo gwage. (Osome Izaya 55:11.) Acishoga muntu muguma orhal’iyobohire wakag’ihamagalwa Zakariya mpu abe mulebi wage, anamuha bibonekerezi munani bishagalwire ali agend’iganirira Abayahudi ly’abaha omurhima. Ebyo bibonekerezi byabarhabala babone oku ntaco bakayobohireko abo bakag’ibahagalika, byanabaha omurhima gw’okugendekera n’omukolo gwa Yehova. Omu cibonekerezi ca karhanu, Zakariya abona ecimanikiro c’itara na mirhi ibirhi y’emizetuni.

5. Bici rhwaganirira mw’eci cigabi?

⁵ Hali amango ngasi muguma wirhu avunika omurhima. Co cirhumire, rhwanayunguka omukuyiga ecibonekerezi ca karhanu Yehova ayeresagya Zakariya. Okuhugûkwa eco cibonekerezi kwanarhurhabala rhukolere Yehova n’obwishwekerezi amango rhuli rhwahagalikwa, amango akanga kirhu kamashanja, n’amango rhwamahâbwa obulongozi rhurhahugûsirwi bwinja. Mw’eci cigabi rhwaganirira ebyo byoshi.

6. Gurhi ecibonekerezi c’ecimanikiro c’itara n’emirhi ibirhi y’emizetuni ciganirirwe omu Zakariya 4:1-3, cahiremwo Abayahudi oburhwali? (Olole enfoto eri oku cijalada c’eyi gazeti.)

⁶ Osome Zakariya 4:1-3. Ecibonekerezi c’ecimanikiro c’itara n’emirhi ibirhi y’emizetuni caha Abayahudi oburhwali bw’okugendekera n’omukolo gw’okuyubaka ciru akaba bakag’ihagalikwa. Omu njira nci? K’obwine oku eco cimanikiro c’itara cagwerhe aha cakag’igendekera cakûla amavurha? Mirhi ibirhi y’emizetuni yaliko emiloko yakag’ihêka amavurha omw’ibakuli, n’er’ibakuli lyakag’ihêka amavurha omu ngasi liguma ly’omu matara nda gali oku cimanikiro c’itara. Ago mavurha gakag’irhuma amatara gagendekera gayaka buzira kuzima. Zakariya adosa ntya: “Ebyo k’okuderha gurhi?” Malahika amushuza kugerera ogu mwanzi gwarhengaga emwa Yehova: “‘Arhali oku misi y’abasirika, erhi oku buhashe, ci kugerera iroho lyani,’ ntyo ko Yehova w’emirhwe adesire.” (Zak. 4:4, 6, NWT) Amavurha gakag’irhenga omu mirhi gashushanyize iroho litagatifu lya Yehova ly’emisi minji bwenene, nshôko y’emisi erhankahwa. Abasirika boshi b’omu burhegesi bw’e Persi, bali babusha omu kubagerera oku buhashe bw’iroho litagatifu lya Nnâmahanga. Kugerera oburhabale bwa Yehova, abo bakag’iyubaka ehekalu bakabire n’obuhashe bw’okuhima okuhagalikwa n’okuyûsa omukolo gwabo. Ogo gwali mwanzi gwa kuhâna omurhima! Ebi Abayahudi balishinganine bajire kwali kulangalira Yehova n’okucib’igalukira omukolo. Ntyo ko banajijire ciru akaba ogo mukolo gwacir’ihanzibwe.

7. Kanga kahi karhabire Abayahudi bakag’iyubaka ehekalu barhulirizibwe omu njira ndebe?

⁷ Erhi akanga kashanja, abakag’iyubaka ehekalu barhulirizibwa omu njira ndebe. Bici byashanjire? Omu mwaka gwa 520 E.K.K.K., Mwami Dariusi I, arhondera okurhambula e Persi. Omu mwaka gwa kabirhi gw’oburhegesi bwage, avumbula oku irhegeko lyal’ihanzize okuyubakwa kw’ehekalu lirhal’ishinganine. Dariusi arhegeka oku ogo mukolo guyukirizibwe. (Ezr. 6:1-3) Ngasi muntu asomerwa n’ogo mwanzi, cikone hali ebindi Dariusi ajijire. Mwami arhegeka abantu boshi balizungulusire Abayahudi oku baleke okuhanza ogo mukolo n’oku bahâne  ensaranga na ngasi byoshi Abayahudi balilagirireko lyo bayukirîza ogo mukolo! (Ezr. 6:7-12) Oko, kwarhuma Abayahudi bayusa omukolo gw’okuyubaka ehekalu enyuma za myaka ini yone, omu mwaka gwa 515 E.K.K.K.​—Ezr. 6:15.

8. Bulya gurhi wakaba n’oburhwali amango oli wahagalikwa?

⁸ Ene nalyo, bakozi banji ba Yehova bali bahagalikwa. Kwa lwiganyo, baguma na baguma baba balamire omu bihugo mikolo yirhu miguma na miguma eba ehanzibwemwo. Muli ebyo bihugo, bene wirhu banagwarhwa n’‘okuhêkwa embere z’abarhambo n’embere z’abami’ lyo babaha obuhamirizi. (Mt. 10:17, 18) Hali amango okushanja omurhegesi kwakalerha oburhulirize. Erhi kandi omuzuzi orharhugwerhiko kabôlo anarhôla omuhigo gwakarhurhabala ly’omukolo gwirhu gugendekera. Abandi Bahamirizi banahagalikwe omu yindi njira eri lubero. Baba balamire omu bihugo rhujiramw’oluhuma lw’okuharamya Yehova, cikone banahagalikwe n’abantu b’omu mulala gwabo barhaba balonzize bagendekere bakolera Nnâmahanga wabo. (Mt. 10:32-36) Omu kanga kanji, erhi abali bahagalika bene wabo b’omu mulala bali Bahamirizi ba Yehova babona oku barhahashiri okubahanza okuharamya Yehova, banaleke okubahagalika. N’omu kanga kaguma na kaguma, abo bakag’irhuhagalika bwenene bahikîre aha baba Bahamirizi b’obushiru. Amango oli wahagalikwa, orhavunikaga omurhima! Obe n’oburhwali. Yehova akurhabala kugerera iroho lyage litagatifu ly’emisi bwenene, co cirhumire ntaco wakayoboha!

9. Bici byarhumire Bayahudi baguma na baguma bavunika omurhima erhi omusingi gw’ehekalu mpyahya gugwikwa?

⁹ Erhi omusingi gw’ehekalu mpyahya gugwikwa, Bayahudi baguma na baguma balikola bashosi balaka. (Ezr. 3:12) Babwîne ehekalu nyinja bwenene yayubakagwa na Solomoni, n’erhi bashushanya eyo mpyahya n’eyo ya mîra, babona oku eyo mpyahya “erhacigwerhi nda na mugongo.” (Hag. 2:2, 3) Bagaya bwenene erhi bashushanya eyo hekalu mpyahya n’eya mîra. Ecibonekerezi ca Zakariya cakabarhabire barhacivunikaga omurhima. Gurhi byakahashikinemwo ntyo?

10. Gurhi enderho za malahika ziganirirwe omu Zakariya 4:8-10, NWT, zarhabiremwo Abayahudi lyo barhacivunikaga omurhima?

¹⁰ Osome Zakariya 4:8-10, NWT. Bici malahika alonzagya okuderha erhi ayerekana oku Abayahudi bashinganine “bashagaluke banabone olukamba lw’enivo luli omu maboko ga  [guvernere Muyahudi] Zorobabeli”? Olukamba lw’enivo ciba cikolanwa cirhabala okupima erhi kantu kalebe kayimanzire bwinja, erhi kakubusîre. Malahika alonzagya ayemeze abakozi ba Nnâmahanga oku, ciru akaba eyo hekalu yakag’ibonekana oku eri ya lugero kuli bantu baguma na baguma, yakayunjwire yakanahikirizize ebi Yehova al’ilonzize ebe. Yehova akashagalukire eyo hekalu, co cirhumire Abayahudi nabo balishinganine bayishagalukire. Akantu Yehova akag’ibona oku kali ka bulagirire, yali nterekêro elinganine n’obulonza bwage Abayahudi bakamuheriremw’eyo hekalu mpyahya. Abayahudi bakacib’iriba n’omwishingo bacisegezagya obwenge bwabo oku kuharamya Yehova omu njira aba ayemire n’oku kuyemerwa naye.

11. Ene, mazibu gahi bakozi baguma na baguma ba Yehova bali barhimanana nago?

¹¹ Erhi akanga kirhu kashanja, oko kuba kuzibu kuli banji ba muli rhwe. Bene wirhu na bali birhu baguma na baguma bajijire myaka minji omu mukolo gwago-gwago gw’akasanzi koshi, omukolo gwabo gwashanjire. Abandi bahûnyirwe okuleka omukolo gwabo bal’izigire bwenene erhi myaka yabo erhuma. Biyumvikine oku, rhwanaciyumva kubi bwenene erhi akanga kirhu kakashanja omu njira ya ntyo. Oku murhondero, rhwanayabirwa okuhugûkwa erhi okuyemera omuhigo gwarhôzirwe enyanya zirhu. Rhwanarhanya oku ebintu byâli binja embere. Na kandi, rhwanavunika omurhima, n’okurhanya oku akanga rhulimo karhakacirhuhashisa okujira binji omu mukolo gwa Yehova. (Mig. 24:10) Gurhi ecibonekerezi ca Zakariya cakarhurhabala rhugendekere rhwaha Nnâmahanga wirhu ebi rhwakanahasha?

12. Gurhi ecibonekerezi ca Zakariya cakarhurhabala rhugendekere rhwaba n’omwishingo amango akanga kirhu kamashanja?

¹² Kwanaba kulembu kuli rhwe okukômera akanga kirhu kahyahya erhi rhwakakakabona nk’oku Yehova akabona. Ali ahikiriza bintu binji ene, rhunagwerhe olukengwa lwago-lwago lw’okukola haguma naye. (1 Kr. 3:9) Emikolo yirhu yanashanja, cikone obuzigire Yehova arhujirako bohe burhakashanja. Co cirhumire, erhi mpindûlo ndebe zajiragwa omw’ikubuliro zakakuhûmako, ayake okuhêza kasanzi kanji omu kucidosa bulya gurhi ezo mpindûlo zajijirwe. Ahali h’okukacifinja “ensiku zàli burhanzi,” okashenga Yehova ly’akurhabala obone ebintu binja biri mw’ezo mpindûlo. (Muh. 7:10) Ahali h’okukarhanya oku bintu orhakacihash’ijira, okarhanya oku bintu byoshi wakahash’ijira. Kugerera ecibonekerezi ca Zakariya, rhuciyigirizize obulagirire bw’okugendekera rhwaba  n’entanya nyinja. Okujira ntyo kwanarhurhabala rhugendekere rhwaba n’omwishingo n’okubêra bishwekerezi ciru n’amango akanga kirhu kamashanja.

13. Bulya gurhi Baisraheli baguma na baguma bakarhanyize oku obulongozi bahâbagwa bw’okuyubaka buhyahya ehekalu burhali bwa bwenge?

¹³ Omukolo gw’okuyubaka buhyahya ehekalu gwal’ihanzibwe. Cikone, abalume bahiragwaho lyo balongoza omukolo, k’okuderha, Kuhani Mukulu Yeshuwa (Yozwe) na Guvernere Zorobabeli, “barhondera okuyubaka buhyahya enyumpa ya Nnâmahanga.” (Ezr. 5:1, 2, NWT) Nkaba Bayahudi baguma na baguma bakarhanyize oku ogo muhigo gurhali gwa bwenge. Omukolo gw’okuyubaka buhyahya ehekalu gurhakafulisirwe oku bashombayi b’Abayahudi, bakag’ijira okwabo koshi lyo babahanza okuyubaka. Abo balume babirhi bakag’ilongoza, k’okuderha, Yozwe na Zorobabeli, bal’ilagirire oku by’okubayemeza oku Yehova al’ibalunzire okuboko. Bananabibwine. Gurhi babibwinemwo?

14. Nk’oku biyerekinwe omu Zakariya 4:12, 14, NWT, bici Kuhani Mukulu Yozwe na Guvernere Zorobabeli bayemezibwe n’obwalagale?

¹⁴ Osome Zakariya 4:12, 14, NWT. Mw’eci cigabi c’ecibonekerezi ca Zakariya, malahika ahugûlira omulebi mwishwekerezi wa Nnâmahanga oku emirhi ibirhi y’emizetuni eshushanyize “bashîge amavurha babirhi,” k’okuderha, Yozwe na Zorobabeli. Abo balume babirhi bali nka “bayimanzire aha burhambi bwa Nnawirhu w’igulu lyoshi,” Yehova. Olo lwali lukengwa lunene bwenene! Yehova al’ibalangalire. Co cirhumire, ababo Baisraheli nabo bal’ishinganine balangalire emihigo yabo n’obulongozi bwa Nnâmahanga, ciru bwakahânyirwe omu njira nci.

15. Gurhi rhwakayerekanamwo oku rhukenzire obulongozi bwa Yehova buli omu Kanwa kage?

¹⁵ Njira nguma y’omu njira Yehova ali akolesa ene ly’aha abakozi bage obulongozi, kuli kugerera Akanwa kage, Bibliya. Mw’eco citabu, arhubwizire gurhi rhwakamuharamya omu njira ayemire. Gurhi rhwakayerekanamwo oku rhukenzire obulongozi rhuhâbwa kugerera Akanwa ka Nnâmahanga? Omu kukaciha akasanzi k’okukasoma n’okukahugûkwa. Ocidose ntya: “Amango ndi nasoma Ebibliya erhi cindi cicapo, ka nantagiy’imanga hitya n’okurhanya bwenene kw’ebi ndi nasoma? Ka nanjire obusagasi lyo mpugûkwa okuli kw’Ebibliya ‘kuba kuzibu okuyumva [erhi kuhugûkwa]’? Erhi nansome duba-duba kone?” (2 Pt. 3:16) Erhi rhwakakaciha akasanzi k’okurhanya kw’ebi Yehova ali arhuyigiriza, rhwanahash’irhumikira obulongozi bwage  n’okuhikiriza omukolo gwirhu gw’amahubiri.​—1 Tm. 4:15, 16.

16. Amango “mushizi mwirhonzi na mwikubagirwa” amarhuha obulongozi rhurhahugûsirwi bwinja, bici byakarhurhabala rhubukulikire?

¹⁶ Eyindi njira Yehova akolesa ly’arhuha obulongozi kuba kugerera “mushizi mwirhonzi na mwikubagirwa.” (Mt. 24:45, NWT) Hali amango oyo mushizi akarhuha obulongozi rhurhahugûsirwi bwinja. Kwa lwiganyo, rhwanahâbwa obulongozi okubiyerekire oku rhwakacirheganya lyo rhuyokoka buhanya bulebe rhurhanyize oku burhakaba omu eneo yirhu. Erhi rhwanarhanya oku mushizi arhalusize olugero okubiyerekire amahano arhuhire lyo rhucilanga n’obulwala bw’okuyahukira. Gurhi rhushinganine rhujire erhi rhwakarhanya oku obulongozi rhuhâbirwe burhali bwa bwenge? Rhwanarhanya okubiyerekire gurhi Abaisraheli bayungusiremwo omu kukulikira amahano bahâbagwa na Yozwe na Zorobabeli. Na kandi, rhwanarhanya okubiyerekire emyanzi rhwasomire omu Bibliya. Hali amango abakozi ba Nnâmahanga bahâbirwe obulongozi bubonekine nka burhali bwa bwenge omu masu ga bene bantu, cikone bwayokola obuzine bwabo.​—Bac. 7:7; 8:10.

17. Gurhi ecibonekerezi c’ecimanikiro c’itara n’emirhi ibirhi y’emizetuni carhabiremwo Abayahudi?

¹⁷ Ecibonekerezi ca karhanu ca Zakariya nkaba cali cofi, cikone carhabire Abayahudi babe n’entanya nyinja okubiyerekire omukolo gwabo n’enterekêro yabo. N’erhi bakolesa ebi baciyigirizagya kugerera ecibonekerezi ca Zakariya, babona oku Yehova akag’ibarhabala n’okubalongoza omu njira y’obuzigire. Kugerera iroho lyage litagatifu ly’emisi bwenene, Yehova abarhabala bagendekera n’omukolo banacib’iba n’omwishingo.​—Ezr. 6:16.

18. Gurhi ecibonekerezi ca Zakariya cakakurhabalamwo?

¹⁸ Ecibonekerezi ca Zakariya c’ecimanikiro c’itara n’emirhi ibirhi y’emizetuni canakurhabala bwenene omu kalamo kawe. Nk’oku rhwabwine, canakurhabala obe n’emisi olagirireko ly’ohima okuhagalikwa, omwishingo olagirireko amango akanga kawe kamashanja, n’obulangalire olagirireko ly’orhumikira obulongozi orhahugûsirwi bwinja. Bici oshinganine ojire amango wamahikirwa n’amazibu omu kalamo kawe? Burhangiriza, obone ebi Zakariya abonaga, k’okuderha, ebiyemezize oku Yehova ali ashibirira abakozi Bage. Buzinda, ojire kushimbana n’ebi oli wabona omu kulangalira Yehova n’okugendekera wamuharamya n’omurhima gwawe goshi. (Mt. 22:37) Erhi wakajira ntyo, Yehova anakurhabala ogendekere wamukolera n’omwishingo ensiku zoshi.​—Kl. 1:10, 11.