1. Wanem gutpela samting inap painim ol Juda em ol i lusim kalabus?

 OL JUDA i amamas tru. God Jehova “i kirapim bel bilong King Sairus bilong Persia” long larim lain Israel em ol i bin stap kalabus long Babilon inap planti yia long go bek long Juda. King i mekim wanpela tokaut olsem ol Juda i ken go bek long kantri bilong ol na “wokim gen haus bilong Jehova, em God bilong ol Israel.” (Esr. 1:1, 3) Em wanpela gutpela tokaut tru! Dispela i makim olsem ol man bai kirap gen long lotuim God tru long graun em i bin givim long ol.

2. Ol Juda i lusim kalabus, wanem fes samting ol i bin wokim?

² Long 537 B.C.E., fes lain i lusim kalabus i go kamap long Jerusalem, em biktaun bilong wok king bilong lain Juda long hap saut. Wantu tasol dispela lain Juda i go bek, ol i kirapim wok bilong stretim tempel na long 536 B.C.E., ol i wokim pinis faundesen bilong tempel!

3. Wanem ol lain i birua long ol Juda?

³ Taim ol i stat long sanapim gen tempel, ol man i kirap long birua long ol dispela manmeri i bin lusim kalabus na kam bek. Ol manmeri i sindaun klostu, “ol i mekim ol samting bilong daunim ol manmeri bilong Juda na mekim ol i pret bai ol i stop long wokim dispela haus.” (Esr. 4:4) Dispela i bin putim hevi long ol, tasol ol samting i go nogut moa. Long 522 B.C.E., wanpela nupela king bilong Persia, nem bilong em Artaserksis, i kirap long mekim wok king. * Ol birua i lukim olsem dispela senis long wok king em gutpela sans bilong ol long stopim wok bilong wokim tempel, so “ol i pasim tok long kamapim trabel long nem bilong lo.” (Sng. 94:20) Ol i raitim pas i go long King Artaserksis na tok olsem ol Juda i bikhet long em. (Esr. 4:11-16) King i bilipim tok  giaman bilong ol na em i putim tambu long wok bilong sanapim tempel. (Esr. 4:17-23) Dispela i stopim wok bilong ol manmeri em ol i bin amamas tru long wokim gen tempel.—Esr. 4:24.

4. Jehova i mekim wanem taim ol birua i tambuim wok bilong wokim gen tempel? (Aisaia 55:11)

⁴ Ol man i no lotuim Jehova em ol i stap long dispela hap na sampela man long gavman Persia, ol i tingting strong long stopim wok bilong wokim gen tempel. Tasol Jehova i tingting strong long larim dispela wok i go het yet, na oltaim em i save inapim ol samting em i tingting pinis long mekim. (Ritim Aisaia 55:11.) Olsem na em i makim Sekaraia long kamap profet na em i givim 8-pela narakain visen long em. Sekaraia i mas tokim ol Juda long ol dispela visen bilong strongim ol. Ol dispela visen i helpim ol long luksave olsem ol i no ken pret long ol birua na i kirapim ol long givim bel yet long mekim wok bilong Jehova. Long namba 5 visen, Sekaraia i lukim wanpela lamsten na tupela diwai oliv.

5. Bai yumi skelim wanem samting long dispela atikol?

⁵ Yumi olgeta i save bel hevi sampela taim. So yumi ken kisim helpim taim yumi skelim ol tok em Jehova i givim bilong strongim bel bilong lain Israel long rot bilong namba 5 visen bilong Sekaraia. Taim yumi kliagut long dispela visen, em bai helpim yumi long givim bel yet long mekim wok bilong Jehova taim i gat pasin birua, taim ol senis i kamap long sindaun bilong yumi, na taim yumi kisim daireksen em yumi yet i no kliagut long en.

6. Olsem wanem visen bilong lamsten na tupela diwai oliv em Sekaraia 4:1-3 i stori long en i strongim ol Juda? (Lukim fran pes piksa.)

⁶ Ritim Sekaraia 4:1-3. Visen bilong lamsten na tupela diwai oliv i strongim bel bilong ol Juda long givim bel yet long mekim wok maski i gat pasin birua. Wai na yumi tok olsem? Yu luksave olsem dispela lamsten i gat oil i wok long ron i kam insait long en oltaim? Oil bilong tupela diwai oliv i wok long ron i go insait long wanpela dis, na oil insait long dispela dis i go insait long wan wan bilong ol dispela 7-pela lam long lamsten. Dispela oil i helpim ol lam long lait i stap inap oltaim oltaim. Sekaraia i mekim dispela askim: “Ol dispela samting i makim wanem samting?” Ensel i bekim tok wantaim tok i kam long Jehova olsem: “‘I no long strong bilong ami o long strong bilong ol man, nogat. Tasol long rot bilong spirit bilong mi ol dispela samting bai kamap,’ Jehova, bosman bilong bikpela lain ami i mekim dispela tok.” (Sek. 4:4, 6) Oil long dispela tupela diwai oliv i makim strong bilong holi spirit bilong Jehova, em strong i no gat pinis bilong en. Holi spirit bilong God i gat bikpela strong moa winim strong bilong ami bilong gavman Persia. Jehova i stap olsem helpim bilong ol lain bilong wokim tempel, olsem na i no gat wanpela birua inap daunim ol na ol i ken pinisim gut wok bilong ol! Dispela tok i strongim tru bel bilong ol! Ol Juda i mas trastim Jehova na kirap gen long mekim wok. Ol i mekim olsem, maski dispela tambu long wok i stap yet.

7. Wanem senis i mekim gut bel bilong ol man bilong wokim gen tempel?

⁷ Wanpela senis i kamap na i mekim gut bel bilong ol man bilong wokim gen tempel. Wanem dispela senis? Long 520 B.C.E., nupela King Darius Namba 1 i kirap mekim wok king long Persia. Long namba 2 yia bilong em long mekim wok king, em i painimaut olsem gavman Persia i brukim lo taim ol i tambuim wok bilong wokim gen tempel. Darius i givim tok orait long ol i pinisim dispela wok. (Esr. 6:1-3) Dispela nius i mekim na ol manmeri i kirap nogut tru, tasol i gat sampela samting moa. King i tokaut olsem ol manmeri i stap klostu, ol i no ken pasim  dispela wok bilong wokim gen tempel na em i tokim ol long givim mani na ol samting bilong sapotim dispela wok! (Esr. 6:7-12) Dispela i mekim na ol Juda i pinisim wok bilong wokim gen tempel inap 4-pela yia samting bihain, long 515 B.C.E.—Esr. 6:15.

8. Wai na yu mas strongim bel taim yu karim hevi bilong pasin birua?

⁸ Long nau tu, planti manmeri i lotuim Jehova i karim hevi long pasin birua. Olsem, sampela i stap long ol kantri we gavman i tambuim wok bilong yumi. Long ol dispela kantri, ol i arestim ol bratasista na ol i “sanapim [ol] long ai bilong ol gavana na ol king,” na long dispela rot i olsem ol i autim tok long ol. (Mat. 10:17, 18) Sampela taim senis i kamap long wok gavman na nau ol inap stap fri long mekim lotu. O wanpela jas i gat gutpela tingting inap wokim disisen i helpim wok bilong yumi. Ol narapela Witnes i karim hevi bilong pasin birua long narapela rot. Ol i stap long ol kantri we ol i stap fri long lotuim Jehova, tasol planti taim ol wanfamili i birua long ol na laik pasim ol long mekim wok bilong God. (Mat. 10:32-36) Planti taim ol wanfamili i luksave olsem hatwok bilong ol i lus nating, olsem na ol i stop long birua long wanfamili bilong ol. Na sampela taim ol man husat i birua nogut tru long ol Witnes, bihain ol yet i save kamap strongpela Witnes. So taim yu bungim pasin birua, no ken givap! Strongim bel. Jehova na holi spirit bilong em i gat bikpela strong i stap long sait bilong yu, olsem na yu no ken pret long wanpela samting!

9. Wai na sampela Juda i bel hevi long lukim faundesen bilong nupela tempel?

⁹ Taim ol i wokim pinis faundesen bilong nupela tempel, sampela lapun Juda i krai long dispela samting. (Esr. 3:12) Ol i bin lukim naispela tempel tru em Solomon i bin wokim long bipo, na ol i pilim olsem dispela nupela tempel “i no luk nais olsem long bipo.” (Hag. 2:2, 3) Ol i bel hevi tru long lukim olsem olpela tempel i winim nupela tempel. Visen bilong Sekaraia bai helpim ol long daunim bel hevi bilong ol. Dispela visen bai helpim ol olsem wanem?

10. Olsem wanem tok bilong ensel long Sekaraia 4:8-10 i helpim ol Juda long daunim bel hevi bilong ol?

¹⁰ Ritim Sekaraia 4:8-10. Ensel i laik tok wanem taim em i tok ol Juda “bai amamas na ol bai lukim Serubabel [em gavana bilong ol Juda] i holim tul i save hangamap long string bilong mesarim ol samting long han bilong em”? Dispela tul em i bilong skelim sapos samting i stap stret tru o i sanap stret o nogat. Ensel i tokim  lain bilong God olsem, maski tempel i no luk nais long ai bilong sampela, wok bilong wokim tempel bai pinis na em bai stret wantaim laik bilong Jehova. Jehova bai amamas long dispela tempel, so wai na ol i no inap amamas long en? Bikpela samting long Jehova em olsem, lotu ol i mekim long dispela tempel bai i stret wantaim laik bilong em. Sapos ol Juda i tingting strong long lotuim Jehova long pasin em i laikim na bai em i ken orait long ol, orait ol bai kisim bek amamas bilong ol.

11. Ol wokman bilong Jehova long nau i bungim wanem sampela hevi?

¹¹ Ol senis i save givim hatwok long planti bilong yumi. Sampela i bin insait long spesel fultaim sevis inap planti yia, tasol nau asainmen bilong ol i senis. Ol narapela i kamap lapun na nau ol i mas lusim gutpela wok ol i holim. Em nomol long pilim bel hevi taim kain senis olsem i kamap long yumi. Pastaim ating yumi no inap kliagut long dispela disisen o yumi no wanbel long en. Ating yumi inap misim ol samting yumi save mekim bipo. Na yumi inap bel hevi na pilim olsem nau nupela sindaun bilong yumi i mekim na yumi no mekim bikpela wok moa bilong Jehova. (Prov. 24:10) Olsem wanem visen bilong Sekaraia i ken helpim yumi long givim bel yet long mekim wok bilong God?

12. Olsem wanem visen bilong Sekaraia i ken helpim yumi long daunim bel hevi taim senis i kamap long sindaun bilong yumi?

¹² Em isi long yumi lain long ol nupela senis sapos yumi holim wankain tingting olsem bilong Jehova. Em i bin mekim planti bikpela wok long nau, na yumi amamas tru long stap olsem ol wokman bilong em. (1 Kor. 3:9) Ol wok yumi mekim inap senis, tasol pasin bilong Jehova long laikim yumi i no inap senis. Sapos wanpela senis i kamap insait long oganaisesen na dispela i mekim sampela samting long yu, orait no ken bel hevi na askim wai na ol senis i kamap. No ken wari na tingim tingim ol “taim bipo,” beten na luksave long ol gutpela samting i kamap long dispela senis. (Ekl. 7:10) Na no ken tingim ol samting em yu no inap mekim moa, i gutpela yu putim tingting long ol samting em yu ken mekim long nau. Long visen bilong Sekaraia, yumi kisim skul olsem em i bikpela samting long holim stretpela tingting na stap belgut. Long dispela rot, yumi bai stap amamas na stap gut yet long Jehova maski ol senis i kamap long sindaun bilong yumi.

13. Wai na sampela Israel inap pilim olsem em i no gutpela tingting long kirapim wok bilong wokim gen tempel?

¹³ Gavman i tambuim wok bilong wokim gen  tempel. Maski i olsem, ol man em ol i makim ol long go pas long dispela wok—em Hetpris Jesuar (Josua) na Gavana Serubabel—“i kirapim wok bilong sanapim gen haus bilong God.” (Esr. 5:1, 2) Sampela Juda inap pilim olsem em i no gutpela tingting long bihainim dispela disisen. Wok bilong wokim gen tempel i no stap hait long ai bilong ol birua, na ol inap mekim olgeta samting ol inap mekim bilong stopim dispela wok. Dispela tupela man i go pas, Josua na Serubabel, i mas kisim ol tok bilong strongim ol na bai ol i ken save olsem Jehova i sapotim wok ol i mekim. Ol i bin kisim dispela tok. Hau ol i kisim?

14. Olsem Sekaraia 4:12, 14 i kamapim, Hetpris Josua na Gavana Serubabel i kisim wanem gutpela tok?

¹⁴ Ritim Sekaraia 4:12, 14. Long dispela hap long visen bilong Sekaraia, ensel i kamapim klia long gutpela profet bilong God olsem dispela 2-pela diwai oliv i makim “2-pela man ol i bin makim”—Josua na Serubabel. I olsem dispela tupela man i “sanap klostu long Bikpela bilong olgeta hap graun,” em Jehova. Em gutpela wok tru tupela i holim! Jehova i trastim tupela. Long dispela as, ol Israel tu i mas trastim tru ol samting em dispela tupela man i tokim ol long mekim, long wanem, Jehova i yusim tupela long go pas long ol Israel.

15. Yumi ken mekim wanem bilong soim olsem yumi rispektim daireksen yumi kisim long Tok Bilong God?

¹⁵ Wanpela rot Jehova i wok yet long givim daireksen long ol wokman bilong em long nau, em long rot bilong tok bilong em long Baibel. Dispela buk holii tokim yumi long pasin yumi mas bihainim bilong lotuim em na bai em i ken orait long yumi. Yumi ken mekim wanem bilong soim olsem yumi rispektim daireksen yumi kisim long Tok Bilong God? Yumi ken ritim gut ol tok bilong en na lusim haptaim long kliagut long en. Askim yu yet: ‘Taim mi ritim Baibel o wanpela pablikesen bilong yumi, mi save stop na tingim tingim long bel ol tok mi ritim? Mi save mekim wok painimaut long mining bilong ol tok i tru bilong Baibel we i “hatwok long kliagut long en”? O mi save ritim hariap tasol?’ (2 Pita 3:16) Sapos yumi lusim haptaim long tingim tingim ol tok Jehova i skulim yumi long en, yumi bai bihainim ol daireksen bilong em na inapim gut wok autim tok bilong yumi.—1 Tim. 4:15, 16.

16. Sapos yumi no kliagut long daireksen i kam long “wokboi i gat savetingting,” wanem samting bai helpim yumi long bihainim dispela daireksen?

¹⁶ Narapela rot Jehova i givim daireksen em long rot bilong “gutpela wokboi i gat savetingting.” (Mat. 24:45) Sampela taim dispela wokboi  inap givim yumi ol daireksen we yumi yet i no kliagut long en. Olsem, ating yumi inap kisim daireksen bilong helpim yumi long abrusim wanpela disasta we yumi ting em i no inap kamap long hap bilong yumi. O yumi inap pilim olsem wokboi i wari tumas long taim bilong wanpela pendemik. Yumi ken mekim wanem sapos yumi pilim olsem em i no savetingting long bihainim ol instraksen ol i givim? Yumi ken tingim olsem ol Israel i kisim gutpela helpim taim ol i bihainim tok bilong God em Josua na Serubabel i givim long ol. Yumi ken tingim tu ol narapela stori bilong Baibel em yumi bin ritim. Sampela taim lain bilong God i kisim ol daireksen we i luk olsem longlong pasin long ai bilong ol man, tasol taim ol i bihainim, dispela i lukautim laip bilong ol.—Het. 7:7; 8:10.

17. Visen bilong lamsten na tupela diwai oliv i mekim wanem long ol Juda?

¹⁷ Namba 5 visen em Sekaraia i lukim em i sotpela, tasol em i helpim ol Juda long holim stretpela tingting long wok na lotu bilong ol. Na taim ol i mekim ol samting i stret wantaim visen bilong Sekaraia, ol i pilim olsem Jehova i sapotim ol na stiaim wok ol i mekim. Jehova i yusim holi spirit bilong em i gat bikpela strong long helpim ol long givim bel yet long wok ol i mekim na long kisim bek amamas bilong ol.—Esr. 6:16.

18. Visen bilong Sekaraia i ken mekim wanem long yu?

¹⁸ Visen bilong Sekaraia long lamsten na tupela diwai oliv i ken mekim sampela bikpela samting long laip bilong yu. Olsem yumi stori pinis, em i ken helpim yu long kisim strong em yu nidim taim i gat pasin birua, long stap amamas yet taim senis i kamap long sindaun bilong yu, na long trastim Jehova taim yu kisim daireksen em yu no kliagut long en. Yu mas mekim wanem taim yu bungim ol hatwok long laip bilong yu? Pastaim, lukim samting Sekaraia i bin lukim—ol evidens i soim olsem Jehova i lukautim lain bilong em. Na bihainim samting yu lukim, long rot bilong trastim Jehova na wok yet long givim bel olgeta long lotuim em. (Mat. 22:37) Taim yu mekim olsem, Jehova bai helpim yu long stap amamas long lotuim em inap oltaim oltaim.—Kol. 1:10, 11.