ЭСКЕРОН ПОННА СТАТЬЯ 12
Адӟиськоды-а тӥ сое, мае адӟиз Захария?
«„Ожгарчиосын ӧвӧл, кужымен ӧвӧл, но Мынам Духеным“,— шуэ Саваоф Кузё-Инмар» (ЗАХ. 4:6).
73-ТӤ КЫРӞАН Сёт милемлы дӥсьтонлык
ТА СТАТЬЯЫН a
1. Малы израиль калык туж шумпотэмын вал?
ИЗРАИЛЬ калык туж шумпотэмын! Трос дасо аръёс ӵоже соос вавилон пленын вал. Нош табере Персиысь Кир эксэй косэ соосты ас музъемазы бертыны но «Израильлэн Инмарезлы Кузё-Инмарлы корка» пуктыны (Езд. 1:1, 3). Израиль калык тае туж кема возьмаз! Табере соос зэмос Инмарлы ас музъемазы йыбыртъяны быгатозы.
2. Мар лэсьтыны быгатӥзы израиль калык пӧлысь куд-огъёсыз берытскемзы бере ик?
2 Асьме вакытлэсь азьло 537-тӥ арын израиль калык пӧлысь куд-огъёсыз Иерусалиме берытскизы. Соос соку ик кутскизы храмез тупатыны. Асьме вакытлэсь азьло 536-тӥ арлы храмлэн инъетэз лэсьтэмын вал ини!
3. Кыӵе шуг-секытъёсын пумиськиз иудей калык?
3 Храмез тупатӥсьёс шуг-секытъёсын пумиськизы. «Та музъемысь калык иудей калыклэсь кизэ юскыса улӥз, лэсьтӥськон ужлы котькызьы но люкетыны тыршиз» (Езд. 4:4). Берлогес югдур эшшо но уродмиз! Асьме вакытлэсь азьло 522-тӥ арын Персиын Артаксеркс b эксэй луиз. Ӵапак та вакытэ иудей калыклэн тушмонъёсыз тыршизы пуктӥськон ужъёсты дугдытыны. Соос «законлэн саюлаз сьӧсь уж» малпазы (Пс. 93:20). Соос Артаксеркслы чагиськизы но веразы, иудей калык солы пумит ӝутскыны малпа шуыса (Езд. 4:11—16). Эксэй соослы оскиз но пуктӥськон ужъёсты дугдытыны косӥз (Езд. 4:17—23). Соин сэрен иудей калыклэн мылкыдыз куашказ. Соос храмез пуктэмысь дугдӥзы (Езд. 4:24).
4. Мар кариз Иегова, куке тушмонъёс люкетыны кутскизы храмез тупатыны? (Исаия 55:11).
4 Мукет инмаръёслы йыбыртъясь калыкъёс но Персиысь куд-ог кивалтӥсьёс туж тыршизы пуктӥськон ужъёсты дугдытыны. Но Иеговалэн потэ вал, иудей калык храмез мед тупатоз шуыса. Нош Инмар аслэсьтыз эриксэ котьку но быдэстэ. (Лыдӟе Исаиялэсь 55:11.) Иегова Захария нимо кышкасьтэм пиосмуртэз пророк кариз но солы тямыс адӟытонъёс возьматӥз. Инмар косӥз Захарияез соосты иудей калыклы вераны. Та адӟытонъёс юрттӥзы соослы кышкасьтэм луыны но Иеговалэсь ужзэ быдэстыны. Витетӥяз адӟытонын Захария лампадаез но кык вӧйпуосты адӟиз.
5. Мае ми эскеромы та статьяын?
5 Лампада но кык вӧйпуос сярысь адӟытон иудей калыкез туж юнматӥз. Со милемыз но юнматыны быгатэ, малы ке шуоно ми но шуг-секытъёсын пумиськылӥськомы. Та адӟытонэз валамы ке, ми быгатомы Иеговалы оскымон кыльыны: 1) куке адямиос милемлы пумит мыно, 2) куке улонамы бадӟым воштӥськонъёс кылдо но 3) куке организацимылэсь куд-ог кивалтэтъёссэ туж ик ум валаське.
ПУМИТЪЯСЬКОНЪЁС
Захария адӟиз кык вӧйпуосты, кудъёсысьтыз вӧй лампадае вия. (Учке 6-тӥ абзацез.)
6. Малы лампада но кык вӧйпуос сярысь адӟытон иудей калыкез юнматӥз? (Учке вылбамысь суредэз.)
6 Лыдӟе Захариялэсь 4:1—3. Лампада но кык вӧйпуос сярысь адӟытон иудей калыклы юрттӥз шуг-секытъёс дыръя но кышкасьтэм луыны. Мар соосты юнматӥз? Висъялэ саклыктэс: лампада котьку но вӧйын тырмемын вал. Кык вӧйпуосысь вӧй ваське вал чашае, нош отысь сизьым гумыостӥ — лампадалэн вӧй ӝуан интыосаз. Соин ик лампада ялан ӝуаны быгатэ вал. Захария юаз: «Мар та таӵе?» Иеговалэн кылчинэз солы шуиз: «„Ожгарчиосын ӧвӧл, кужымен ӧвӧл, но Мынам Духеным“,— шуэ Саваоф Кузё-Инмар» (Зах. 4:4, 6). Адӟытонысь вӧй возьматэ Иеговалэсь святой духсэ, кудӥз котьку но кужым сётэ. Иеговалэн святой духез, Персиысь ожгарчиосын ӵошатыса, трослы кужмогес. Иеговалэн юрттэменыз иудей калык, нокыӵе шуг-секытъёс шоры учкытэк, ужзэ быдэстыны быгатэ вал. Та соосты туж юнматӥз. Соослы Иеговалы оскиськоно вал но ужзэс азьланьтоно вал. Пуктӥськон ужез нуыны лэземын ӧй вал на ке но, соос озьы ик лэсьтӥзы.
7. Кызьы малпамтэ шорысь югдур воштӥськиз?
7 Югдур малпамтэ шорысь воштӥськиз. Асьме вакытлэсь азьло 520-тӥ арын Персиын Дарий I кыкетӥ арзэ эксэй луыса кивалтӥз. Со тодӥз, храмез тупатон законэз тӥяса дугдытэмын вал шуыса. Соин ик со иудей калыкез косӥз пуктӥськон ужъёсты азьланьтыны (Езд. 6:1—3). Но таиз гинэ паймоно кадь ӧй вал. Дарий мукет калыкъёслы ӧз лэзьы люкетыны храмез пуктыны. Со сяна, со косӥз соосты иудей калыклы коньдон но ваньбур сётыны, храмез пуктон понна! (Езд. 6:7—12). Ог ньыль ар ортчыса гинэ, асьме вакытлэсь азьло 515-тӥ арын, пуктӥськон уж быдэстэмын вал (Езд. 6:15).
Иеговалэн кужымезлы оскиське, куке адямиос тӥледлы пумит мыно (Учке 8-тӥ абзацез.)
8. Мар юрттоз тӥледлы кышкасьтэм луыны, куке кин ке но тӥледлы пумит мынэ?
8 Туннэ но Иеговалэн ужась-тыршисьёсызлы куд-ог адямиос пумит мыно. Куд-ог шаеръёсын кивалтӥсьёс ужмес нуыны уг лэзё. Куд-огъёссэ пытсэтъёсы пуктыло, «кивалтӥсьёс, эксэйёс доры» нуо. Но Адӟись-Ивортӥсьёс сыӵе югдурын но тодытыны тыршо (Матф. 10:17, 18). Куддыръя югдур умой пала воштӥське — яке кивалтӥсьёс воштӥсько, яке судьяос умой ужпум куто. Нош куд-ог Адӟись-Ивортӥсьёс мукет шуг-секытъёсын пумиськыло. Соослэн шаеразы кивалтӥсьёс ужмес нуыны лэзё ке но, соослы семьязы люкетэ (Матф. 10:32—36). Но ӵем дыръя, куке ӵыжы-выжыоссы адӟо, номыр карыны уг быгато шуыса, соос пумитъяськемысь дугдо. Куд-огъёсыз Иеговалы но ужаны-тыршыны кутско. Соин ик, куке кин ке но тӥледлы пумит мынэ, киостэс эн лэзе! Иегова тӥледлы юрттоз но святой духсэ сётоз. Соин ик тӥ быгатӥськоды кышкасьтэмесь луыны!
УЛОНЫСЬ ВОШТӤСЬКОНЪЁС
9. Малы, выль храмез пуктыку, иудей калыкысь куд-огъёсыз бӧрдӥзы?
9 Иудей калыкысь куд-ог арлыдоос, «тазэ храмез ӝутонэз адӟыса, куараен бӧрдӥзы» (Езд. 3:12). Соос ас синъёсынызы адӟизы, макем бадӟым но узыр вал Соломонлэн храмез. Соос малпазы, табере Инмарлэн коркаез «номыр кадь но ӧвӧл» шуыса (Агг. 2:2, 3). Та арлыдоослы вӧсь вал, малы ке шуоно соос малпазы, азьвыл храмен ӵошатыса, таиз храм сокем бадӟым но узыр ӧвӧл шуыса. Но Захариялэн адӟытонэз юрттӥз соослы урод малпанъёссэс палэнтыны.
10. Кызьы кылъёс, кудъёсыз гожтэмын Захариялэн 4:8—10, юрттӥзы иудей калыклы урод малпанъёссэ палэнтыны?
10 Лыдӟе Захариялэсь 4:8—10. Мар со сыӵе «Зоровавельлэн киысьтыз лэсьтӥськисьёслэн мертаськон гозызы»? Та гозы юрттэ вал шонер сылӥсь борддор пуктыны. Кызьы та малпан Инмарлэсь калыксэ юнматӥз? Выль храм сокем узыр ӧй вал ке но, сое Иеговалэн шонерлыко курон-косонъёсызъя пуктыны кулэ вал. Нош со Иеговалы кельшысал ке, сюлмаськонэз ӧй луысал. Нырысь ик Иеговалэн потэ вал, храмын солэн курон-косонъёсызъя мед ужалозы-тыршозы шуыса. Иудей калык Инмарлы ярамон луыны тыршысал ке, соос нош ик шумпотыса улысалзы.
Кылдэм югдурысь умойзэ адӟыны тырше (Учке 11-тӥ но 12-тӥ абзацъёсты.) c
11. Мар секытэн сётӥське Иеговалэн куд-ог ужась-тыршисьёсызлы?
11 Тросэзлы воштӥськонъёс секытэн сётӥсько. Кылсярысь, куд-огъёсызлы, кинъёс трос дасо аръёс ӵоже вань дырзэс сётыса Иеговалэн организацияз кыӵе ке ужез быдэсъязы, выль уж сёто. Мукетъёсыз бадӟым арлыдзы сэрен яратоно ужан-тыршонзэс кельтоно луо. Куд-огъёсызлэн таин сэрен мылкыдзы куашка. Кин ке но уг вала, малы сыӵе ужпум кутэмын вал. Мукетъёсыз азьвыл ужан-тыршонзылэсь мӧзмыса уло. Куддыръя соослэн киоссы лэзисько, малы ке шуоно малпало, азьвыл мында Иеговалы ужаны-тыршыны уг быгато ини шуыса (Мад. 24:10). Ойдолэ тодомы, кызьы Захариялэн адӟытонэз юрттоз таӵе малпанъёсты палэнтыны.
12. Кызьы Захариялэн адӟытонэз юрттоз воштӥськонъёсты шумпотыса пумитаны?
12 Воштӥськонъёс капчигес сётӥсько, соос шоры Иеговалэн синъёсыныз учкыса. Туннэ Инмар туж бадӟым уж быдэстэ. Со милемлы но дан сётӥз та уже пыриськыны (1 Кор. 3:9). Ужъёс, кудъёссэ милемлы Иеговалэн организациез сётэ, воштӥськыны быгато. Нош Иеговалэн яратонэз уг вошъяськы. Соин ик тӥ но воштӥськонъёсын пумиськиды ке, укыр трос дырдэс эн быдтэ но эн малпалэ, малы тӥ таӵе югдуре сюриды. Эн малпалэ, «малы меда азьвыл нуналъёс туала нуналъёслэсь ӟечгес вал» шуыса. Со интые, Иеговалэсь юрттэт куре но кылдэм югдурлэсь умой палъёссэ адӟыны тырше (Екк. 7:10). Ортчемез сярысь жалям интые, валаны тырше, мае тӥ али карыны быгатӥськоды. Захариялэн адӟытонэз возьматэ, ваньмыз шоры шонер мылкыдын учконо шуыса. Соку тӥ быгатоды воштӥськонъёсты шумпотыса пумитаны но Иеговалы оскымон кыльыны.
ВАЛАНТЭМ КИВАЛТЭТ
13. Малы куд-огъёсыз малпазы, вылды, пуктӥськон ужез азьланьтыны визьмо ӧвӧл шуыса?
13 Нош ик малпаськомы со дыр сярысь, куке пуктӥськон ужъёсты азьланьтыны лэземын ӧй вал на. Та шоры учкытэк, Зоровавель кивалтӥсь но Иисус быдӟым священник «Инмар коркаез пуктыны кутскизы» (Езд. 5:1, 2). Иудей калык пӧлысь куд-огъёсыз малпазы, вылды, сыӵе дыре пуктӥськон ужъёсты азьланьтыны визьмо ӧвӧл шуыса. Малы ке шуоно тушмонъёссы со сярысь тодысалзы. Соин ик Зоровавельлы но Иисуслы Иеговалэн юрттэтэз кулэ вал. Иегова зэм но соослы юрттӥз. Кызьы?
14. Кызьы кылъёс, кудъёсыз гожтэмын Захариялэн 4:12, 14, юрттӥзы Зоровавельлы но Иисуслы?
14 Лыдӟе Захариялэсь 4:12, 14. Иеговалэн кылчинэз Захариялы валэктӥз: кык вӧйпуос — со «вӧйын зырӟем кык муртъёс», Зоровавель но Иисус. Та адӟытонын соос сыло «быдэс музъемлэн Кузё-Инмарез азьын», Иегова азьын. Со туж бадӟым дан! Иегова та пиосмуртъёслы быдэсак оске вал. Соин ик иудей калыклы но соослы осконо вал но соос пыр сётэм кивалтэтлэсь соку ик кылзӥськоно вал.
15. Кызьы возьматоно, ми гажаськомы шуыса Иеговалэсь кивалтэтсэ, кудӥз Библиын гожтэмын?
15 Туннэ Иегова аслаз калыкезлы кивалтэт Библия пыр сётэ. Та книгаын гожтэмын, кыӵе луыны кулэ зэмос йыбырттон. Кызьы возьматоно, ми Библиын гожтэм кивалтэтэз гажаськомы шуыса? Со понна сое сак лыдӟоно но малпаськон понна дыр висъяно. Юалэ асьтэлэсь: «Библиез лыдӟыкум, мон вис карисько-а но лыдӟеме вылын малпаськисько-а? Кыӵе ке кылбур мыным валантэм ке, тыршисько-а мон сое эскерыны? Яке, валаны тыршытэк но, азьлань мынӥсько?» (2 Пётр 3:16). Ми Иеговалэсь кылъёссэ валаны тыршимы ке, соку быгатомы солэн кивалтэтэзлэсь кылзӥськыны но тодытыны (1 Тим. 4:15, 16).
«Оскиськымон, визьмо ляльчилэн» кивалтэтэзлы оске (Учке 16-тӥ абзацез.) d
16. Мар юрттоз «оскиськымон, визьмо ляльчи» пыр сётэм кивалтэтлэсь кылзӥськыны, со милемлы туж ик валамон ӧвӧл ке но?
16 Со сяна, Иегова аслаз калыкеныз «оскиськымон, визьмо ляльчи» пыр кивалтэ (Матф. 24:45). Куддыръя та ляльчи пыр сётэм кивалтэт милемлы туж ик валамон ӧвӧл. Кылсярысь, ойдолэ малпаськомы шимучырлы дасям сумка сярысь. Куд-огъёсыз малпаны быгатозы, соосты дасяло шуыса шимучырлы, кудӥз соос палан ноку уз но луы, вылды. Яке кин ке но малпаны быгатэ, «оскиськымон, визьмо ляльчи» пандемия дыръя мултэс чаклаське шуыса. Мар юрттоз та агайёс пыр сётэм кивалтэтлэсь дась луыса кылзӥськыны? Умой луысал тодэ вайыны, кыӵе пайда вайиз иудей калыклы Зоровавельлэсь но Иисуслэсь кылзӥськемез. Библиын гожтэмын мукет учыръёс но, куке, адями синмын учкыса, Инмарлэн кивалтэтэз туж ик визьмо ӧй вал, нош со адямиослэсь улонзэс утиз (Суд. 7:7; 8:10).
АДӞЕ СОЕ, МАЕ АДӞИЗ ЗАХАРИЯ
17. Кызьы лампада но кык вӧйпуос сярысь адӟытон иудей калыклы юрттӥз?
17 Лампада но кык вӧйпуос сярысь адӟытон бадӟым ӧй вал ке но, со юрттӥз иудей калыклы ужез но Иеговалы йыбыртъямез шоры мукет сямен учкыны. Куке соос Захариялэсь кылъёссэ сюлмазы пыртӥзы но пуктӥськон ужзэс азьланьтӥзы, соос Иеговалэсь яратэмзэ шӧдӥзы. Святой духез пыр Иегова юрттӥз соослы пуктӥськон ужзэс азьланьтыны но выльысь шумпотыса улыны (Езд. 6:16).
18. Кыӵе пайда вайыны быгатэ Захариялэн адӟытонэз?
18 Лампада но кык вӧйпуос сярысь адӟытон милемлы бадӟым пайда вайыны быгатэ. Кызьы ми адӟимы та статьяысь, та адӟытон: 1) тӥледлы кужым сётоз, куке адямиос тӥледлы пумит мыно, 2) юрттоз тӥледлы шумпотыса улыны, куке улонады воштӥськонъёс кылдо, но 3) юрттоз Иеговалы оскыны, кивалтэт туж ик валамон ӧвӧл ке но. Озьыен, кызьы тӥ асьтэды возёды шуг-секытъёс дыръя? Син азяды пуктэ лампада но кык вӧйпуос сярысь адӟытонэз. Эн вунэтэ: Иегова аслаз калыкез сярысь сюлмаське. Та юрттоз тӥледлы Инмарлы оскыны но вань сюлмысьтыды солы ужаны-тыршыны (Матф. 22:37). Соку Иегова тӥледлы луонлык сётоз пырак дауръёс ӵоже шумпотыса солы йыбыртъяны! (Кол. 1:10, 11).
7-ТӤ КЫРӞАН Иегова — милям кужыммы
a Иегова Захария пророклы адӟытонъёс возьматӥз. Соос Захариялы но, Иеговалэн быдэс калыкезлы но юрттӥзы шуг-секытъёс пыр потыны но чылкыт йыбырттонэз тупатыны. Та адӟытон милемлы но юрттоз шуг-секытъёс дыръя Иеговалы оскымон ужаны-тыршыны. Та статьяын ми эскеромы лампада но кык вӧйпуос сярысь адӟытонэз. Озьы ик тодомы, малы та адӟытон милемыз дышетыны быгатэ.
b Кӧня ке аръёс ортчыса, Неемия кивалтон дыръя, Персиын мукет эксэй кивалтӥз. Солэн но нимыз Артаксеркс вал. Таиз эксэй иудей калыкен ассэ лякытэн возиз.
