1. მუ მნიშვნელოვან ამბე გეგეს გინოხორაფილ იუდეველეფქ?

 ებრაელეფქ მანგარ მნიშვნელოვან ამბეს გებულენა. იეჰოვა ღორონთ გინაჭყვიდირაფუანს სპარსეთიშ მეფე კიროსის, ნამდა გათავისფალას ისრაელეფ, ნამუთ ვითობით წანა რე, მუთ ბაბილონიშ ტყვეობას რენა. მეფექ გეგმუცხადენს იუდეველეფს, ნამდა დირთან მუნეფიშ ქიანაშა დო „[აღადგინან] ისრაელიშ ღორონთიშ, იეჰოვაშ, ტაძარ“ (ეზრ. 1:1, 3). თენა მანგარ მნიშვნელოვან ბრძანება რე! თე ბრძანება ნიშნენს, ნამდა ჭეშმარიტ ღორონთიშ თაყვანიშცემა აღდგენილ იჸუაფ თი დიხას, ნამუთ ღორონთიქ მეჩჷ მუშ ხალხის.

2. მუშ კეთებაქ შეიალებეს პირველო დორთელ იუდეველეფს?

² პირველო ჯვ. წ. 537 წანას ინორთეს გინოხორაფილეფქ იერუსალიმშა, იუდაშ სამხრეთ სამეფოშ დედაქალაქშა. თინეფქ ხეთეშე ქეშუდირთეს ტაძარიშ შენებაშ საქმეს დო ჯვ. წ. 536 წანას ფუნდამენტ უკვე ენობუნილ აფდეს.

3. მუ წინააღმდეგობას შეხვადეს იუდეველეფქ?

³ ტაძარიშ შენებაშ დოჭყაფაშ უკულ ხეთეშე თინეფქ დიდ წინააღმდეგობას შეხვადეს. თინეფიშ გოხოლუას მახორუ ხალხ „ირიათო გურს უტახუნდჷ იუდეველეფს დო შენებაშ ხიოლს უდინუანდჷ“ (ეზრ. 4:4). სიტუაცია დროშ მიკულაწკუმა ართო უმოსო ირთულებუდ. ჯვ. წ. 522 წანას სპარსეთის ახალ მეფექ, არტაქსერქსექ, გემეფ. * მოწინააღმდეგეეფ ფიქრენდეს, ნამდა მეფეშ თირუა თინეფს საშვალებას ქიმეჩანდჷ, საბოლათ გაჩერესკო შენებაშ საქმე უბადო დადგენილებეფიშ გიშაშქუმალათ (ფსალმ. 94:20). თინეფქ მეფე არტაქსერქსეს წერილ ქიმუჯღონეს, ნამდა ითამ იუდეველეფს ბუნტიშ ეტახუა ულამდეს (ეზრ. 4:11—16). მეფექ ქიდეჯერ თინეფიშ ტყურა დო ზოჯჷ, მეუტებდესკო ტაძარიშ შენება (ეზრ. 4:17—23). ათეშენ თინეფს გაჩერებელქ აჸუეს (ეზრ. 4:24).

4. მუ აკეთ იეჰოვაქ თიშ უკულ, მუთ ებრაელეფს მოწინააღმდეგეეფქ ტაძარიშ შენება მიოტებაფეს? (ეს. 55:11).

 ⁴ სპარსეთიშ მთავრეფქ დო თე ტერიტორიას მახორუ ხალხიქ, მით ვამსახურუდ იეჰოვას, გინოჭყვიდეს, მიოტებაფესკო იუდეველეფს ტაძარიშ აღდგენა, მარა მშენებლობაშ გაგრძელება იეჰოვას აფუდ გინოჭყვიდილ დო თინა ირო ასრულენს მუშ განზრახვას (წეკითხით ესაიაშ 55:11). თიქ მუშ უშქურანჯ წინასწარმეტყველ ზაქარიას ქაძირუ ბრუო მნიშვნელოვან ხილუა, ნამუთ ებრაელეფშა ოკო გეგნუჩამუდკო, ნამდა თინეფშა გურშა ელუკინუდკო. თე ხილუეფ თინეფს ქიმეხვარებუდ, ვაშქურნებდესკო მუნეფიშ ნტერეფშა დო გუგრძელებდესკო იეჰოვაშ საქმეშ კეთება. მახუთა ხილუას ზაქარია ორწყე სალამპრეს დო ჟირ ზეთისხილიშ ჯას.

5. მუს გუვარჩიენთ თე სტატიას?

⁵ მინშა არძას მიტირხნა გურ, ათეშენ ჩქი ხოლო შემლებნა სარგებელ მიბღათ ზაქარიაშ ხილუაშე დაფიქრებათ. თე სტატიას გუვარჩიენთ, მუჭო ელუკინ გურშა იეჰოვაქ ისრაელეფს ხუთ ხილუათ, ნამუთ ზაქარიას ოძირუ. თე ხილუაშე ტომბაშე დაფიქრება მიმეხვარებნა, ართგურო ვემსახურათ იეჰოვას, მუჟამსით მოწინააღმდეგნა, ჩქინ მდგომარეობა ითირუ დო ბღებულენთ თიცალ მითითებეფს, ნამუთ ბოლოშა ვა მარჩქილენა.

6. მუჭო ელუკინ გურშა იუდეველეფს ხილუაქ, ნამუთ ზაქარიაშ 4:1—3-ს რე მოშინაფილ? (ქოძირით სურათ გალენ გვერდის)

⁶ (წეკითხით ზაქარიაშ 4:1—3). სალამპრე დო ჟირ ზეთისხილიშ ჯაშ გურშენ ხილუაქ ებრაელეფს ქიმეჩ გაბედულება, ნამდა გუგრძელებდესკო საქმე წინააღმდეგობაშ უმკუჯინუო. მუჭო შეიალებეს თექ? ქიდეკვირითო, ნამდა ლამპარს ზეთ დღას ვაკორდუდ. ზეთ ჟირ ზეთისხილიშ ჯაშე ჯამს ინმოწენდჷ დო უკულ შქვით ლამპარს ინაწილებუდ, შედეგო თე ლამპარეფს ირიათო ონტუდ. ზაქარიაქ იკითხჷ: „ჩქიმ ბატონ, მუს ნიშნენს თე ირფელ?“. ანგელოზიქ იეჰოვაშ სიტყვეფ გეგნოჩ: «„ვართ ჯარით დო ვართ და ძალათ, ხვალე ჩქიმ წმინდა შურით“ — იჩიებ ლაშქარეფიშ ღორონთ იეჰოვა» (ზაქ. 4:4, 6). ჯალეფშე მიშუნ თი ზეთ ასიმბოლოენს იეჰოვაშ ძალიერ წმინდა შურს, ნამუთ დღას ველიებ. ღორონთიშ წმინდა შურ ბრელით უმოს ძალიერ რდჷ, ვინემ სპარსეთიშ ჯარ. მუდგა წინააღმდეგობას ვეშეხვადესკონ, თინეფს შეიალებედეს ბოლოშა გათესკო ტაძარიშ შენებაშ საქმე, მუშენდა იეჰოვა უკინენდჷ ხუჯის. მუ გურიშემაკინალ იჸუაფუდ თეშ რჩქინა! ებრაელეფს ხვალე ართ მუდგარენ ოსაჭირდეს, ოკო გეგმირჩქინესკო იეჰოვაშ ნდობა დო კინ ქიდიჭყესკო კინ ტაძარიშ შენება. თინეფქ ქოთ თაშ მიქცის, თიშ უმკუჯინუო, ნამდა შენებაშ უფლება დიო ხოლო ვა უღდეს.

7. მუქ ითირ ტაძარიშ მაშენებელეფიშ საჯგირობუოთ?

⁷ ჭიჭე ხანშა მდგომარეობაქ დითირ, მუდგაქ ტაძარიშ მაშენებელეფს ეუქექუ. მუქ მოხვად? ჯვ. წ. 520 წანას სპარსეთის დარიოს I-ქ ქიდიჭყჷ მეფობა. მუშ მეფობაშ მაჟია წანას თიქ ქოძირ, ნამდა ტაძარიშ შენებაშ საქმე უკანონოთ რდჷ ვარიებულ. შედეგო დარიოსიქ იუდეველეფს კანონიერ უფლება ქიმეჩ, ტაძარიშ შენებაშ საქმე ბოლოშა ქიმუჸონაფდესკო (ეზრ. 6:1—3). მეფეშ მეღებულ გადაწყვეტილებაქ არძა გაკვირ, მარა მეფექ თეს ვეგეჯერდჷ. თიქ უზოჯ მოწინააღმდეგეეფს, ვა უცილებდესკო მშენებლობაშ საქმეშა დო ქიმეჩ იუდეველეფს ფარა დო ირფელ, მუთ საჭირო რდჷ ტაძარიშ შენებაშ ოთებელო (ეზრ. 6:7—12). შედეგო ჯვ. წ. 515 წანას სოდგარენ, ოთხ წანაშა ტაძარიშ შენებაქ გეთუ (ეზრ. 6:15).

8. მუშენ შემლებნა გაბედულეფ ვორდათ, მუჟამსით წინააღმდეგობას ფხვადუთ?

 ⁸ ამდღა ხოლო იეჰოვაშ თაყვანიშმცემელეფს ოწინააღმდეგნა. მაგალთო, ნამთინე ქიანას ჩქინ საქმიანობა ვარიებულ რე. თეცალ ქიანეფს ჯიმალეფ შილებე ციხეს ქუდახუნუან დო ქიმიჸონან „გამგებელეფშა დო მეფეეფშა“, სოდეთ თინეფს ქადაგებაშ საშვალება მიაჩამნა (მათ. 10:17, 18). მარა მინშა ითირუ მთავრობა დო ჩქინ და დო ჯიმალეფს საშვალება მიაჩამნა, უმოს თავისფალო ემსახურან იეჰოვას. ვარდა სამართლიან მოსამართლექ შილებე თიცალ გადაწყვეტილება მიღას, ნამუთ უმოს თავისუფლებას ქომჩანა. შხვა ქიანეფს მოწმეეფ შხვანერ წინააღმდეგობას ხვადუნა. თექ იეჰოვაშ თაყვანიშცემა ვარიებულ ვა რე, მარა ოჯახიშ წევრეფშე უღნა წინააღმდეგობა (მათ. 10:32—36). უმენტაშო თეცალ წინააღმდეგობეფ ვეგრძელებ, მუშენდა თინეფ მეხვადნა, ნამდა ჩქი მუდგა ვა რდასინ ვემვოტენთ იეჰოვაშ მსახურებას. ნამთინე შემთხვევას თინეფ, მით ულირს მანგარ მოწინააღმდეგეეფ რდეს, იეჰოვაშ მოწმეეფო გინმირთუნა. თაშ ნამდა, წინააღმდეგობაშ უმკუჯინუო, ვემიოტუათ იეჰოვაშ მსახურება. რდათ გაბედულეფ! თქვანწკუმა იეჰოვა დო თიშ ძალიერ წმინდა შურ რე, ათეშენ, მუთუნშა ვა გაშქურნან!

9. მუშენ რდჷ ნამთინე იუდეველ გურგოტახილ, მუჟამსით ახალ ტაძარიშ ფუნდამენტის ინარღვანდეს?

⁹ მუჟამსით ტაძარიშ ფუნდამენტის ინარღვანდეს, ნამთინე ხანშამიშულირ ებრაელ ინგარდჷ (ეზრ. 3:12). თინეფს ნაძირეფ აფდეს სოლომონიშ აშენებულ დიდებულ ტაძარ დო ფიქრენდეს, ნამდა ასე აშენებულ ტაძარს „ხოლოშა ხოლო ვემიართედ“ თიმ დროიან ტაძარშა (ანგ. 2:2, 3). თინეფ მანგარ დამწუხრებულ რდეს, მუშენდა ჯვეშ ტაძარს ახალს უდარენდეს. ზაქარიაშ ხილუაქ თინეფს მეხვარ, ხიოლ დურთინუაფდესკო. მუჭო იჸუ თექ შეიოლებერქ?

10. მუჭო მეხვარ ზაქარიაშ 4:8—10-ის ენოჭარილ ანგელოზიშ სიტყვეფქ ებრაელეფს ხიოლიშ დორთინაფას?

¹⁰ (წეკითხით ზაქარიაშ 4:8—10). მუს ნიშნენდჷ ანგელოზიშ სიტყვეფ: „გეხარენა, მუჟამსით ზერუბაბელიშ [ებრაელ მართველიშ] ხეს შვეულს ქოძირნა“. მართალ რე, ნამთინეს თე ტაძარ პირველ ტაძარიშ გინაწონს დიდებულო ვაძირედ, მარა ანგელოზიშ სიტყვეფქ ღორონთიშ ხალხ დარწმუნ, ნამდა თიშ შენება გეთებუდ დო იჸუაფუდ თიცალ, მუნერით იეჰოვას ოკოდ.მუ თე ტაძარ იეჰოვას ქუმოწონდ-და, იუდეველეფქ  მუშენ ოკო დეწონესკო?! მთავარ რდჷ, ნამდა ახალ ტაძარს, თაყვანიშცემა თიშ მოსაწონ ფორმათ ჸოფედკო. ებრაელეფ მთელ ყურადღებას იეჰოვაშ მოსაწონ თაყვანიშცემაშა გეგნიღანდეს-და, თიშ მოწონას მიღენდეს დო ხიოლს კინ დირთინუანდეს.

11. მუ სირთულეეფს შეხვადუ ამდღა იეჰოვაშ ნამთინე თაყვანიშმცემელ?

¹¹ ადვილ ვა რე, მუჟამსით ჩქინ მდგომარეობა ითირუ. ნამთინეს, მით ბრელ ხან რე სპეციალურ სრულ დროთ მსახურებას რდჷ, დათირ დანიშნულებაქ. ნამთინეს ასაკიშ გურშენ აჸუ მიოტებელქ მსახურებაშ თი ფორმაქ, ნამუთ უჸორს. თეცალ ცვლილებეფიშ დროს შილებე ადვილო გომტირხან გურქ. დუდშე შილებე ბოლოშა ვა მარჩქილედან, მუშენ მიღეს თეცალ გადაწყვეტილება ვარდა ვა ვოთანხმუდათ თის. შილებე ჯვეშ დროს ეკვანარღუდათ გურგოტახილო იბგინათ დუდ დო იფიფქრათ, ნამდა ჩქინ ახალ მდგომარეობას ბრელიშ კეთება ვეშემლებნა იეჰოვაშო (იგავ. 24:10). მუჭო მოხვარნა ზაქარიაშ ხილუა, ნამდა მუთ შემლებნან ირფელ გუვაკეთათ იეჰოვაშო?

12. მუჭო მოხვარნა ზაქარიაშ ხილუა, ვა ვოდინუათ ხიოლ, თიმ დროს ხოლო, მუჟამსით ჩქინ მდგომარეობა ითირუ?

¹² ჩქინო ადვილ იჸუაფ ახალ სიტუაციაშ მერჩქვანა, მუჟამსით ირფელს იეჰოვაშ თოლით უჯინეთ. იეჰოვა ამდღა სარკო საქმეეფს ორთჷ დო მიღნა დიდ პატი, ვორდათ თიშ თანამშრომელეფ (1 კორ. 3:9). ჩქინ პასუხიშმგებლობეფქ შილებე დითირას, მარა იეჰოვაშ ჸოროფა ჩქინ მიმართ დღას ვეთირუ. ორგანიზაციულ ცვლილებეფქ თქვანდა ხოლო ქიმოქმედ-და, ბრელ ვეფიქრათ თიშე, მუ მიზეზეფიშ გურშენ მოხვად თექ. ულირ დღალეფს ქეკანარღუთ-და, ქოთხით იეჰოვას, ქიმგეხვარან აზროვნებაშ თირუას (ეკლ. 7:10). თიშ მანგიორო, ნამდა იფიქრათ, მუშ კეთება ვეშეილებნა, ქიფიქრით თიშე, მუშ კეთება შეილებნა. ზაქარიაშ ხილუაშე ბგურაფლენთ, ნამდა მნიშვნელოვან რე, ირო დადებითშე იფიფქრათ. თეშნერო ვა ვოდინუანთ ხიოლს დო იპჸუაფუთ ართგურეფ, თიმ დროს ხოლო, მუჟამსით ჩქინ მდგომარეობა ითირუ.

13. მუშენ შილებე იფიქრუკო ნამთინე იუდეველქ, ნამდა ტაძარიშ შენებაშ გაგრძელება ვა რდჷ გონივრულ გადაწყვეტილება?

¹³ ტაძარიშ შენებაშ საქმე ვარიებულ რდუნ თიშ უმკუჯინუო, წინამძღოლო დანიშნულ ქომოლკათაქ მღვდელმთავარ იეშუაქ (იეჰოშუაქ) დო გამგებელ ზერუბაბელქ  „გაგრძელეს ღორონთიშ ტაძარიშ შენება“ (ეზრ. 5:1, 2). ნამთინე იუდეველს შილებედ უფიქრებუდკო, ნამდა თენა ვა რდჷ გონივრულ გადაწყვეტილება. ებრაელეფს ვაფულედეს, ტაძარს აშენენდესინ. თინეფს უჩქუდეს, ნამდა ნტერეფ ირფელს გაკეთენდეს თე საქმეშ ოცილებერო. თე ჟირ ქომოლკოჩის, იეშუას დო ზერუბაბელს, ნამდგას პასუხიშმგებლობა აფდეს მენდებულ, ოსაჭირდეს თიშა დარწმუნება, ნამდა იეჰოვა ხუჯის უკინენდჷ თინეფს. მუჭო აკეთ თენა იეჰოვაქ?

14. მუშა დარწმუნ იეჰოვაქ მღვდელმთავარ იეშუა დო გამგებელ ზერუბაბელ, მუჭოთ თენა ზაქარიაშ 4:12, 14-შე იძირე?

¹⁴ (წეკითხით ზაქარიაშ 4:12, 14). თე ხილუას ანგელოზ უცხადენს ღორონთიშ ართგურ წინასწარმეტყველს, ნამდა ზეთისხილიშ ჟირ ჯა განასახიერენს „ჟირ ცხებულს“, იეშუას დო ზერუბაბელს. თე ჟირ ქომოლკოჩ სიმბოლურ მნიშვნელობათ გერდჷ იეჰოვაშ „მთელ დედამიწაშ უფალიშ, გვერდით“. მუ დიდებულ მდგომარეობა რდჷ თენა! იეჰოვა ონდუდ თინეფს. თაშ ნამდა, ისრაელეფს შეულებდეს ნდობა გეგმურჩქინდესკო დო ქუდუჸუნალდესკო თე ქომოლკათაშა, მუშენდა იეჰოვა თე ჟირ პიროვნებას ირინუანდჷ ისრაელეფიშ ოხემძღვანელებერო.

15. მუჭო შემლებნა ვოძირათ, ნამდა პატის ფცენთ იეჰოვაშ სიტყვაშე მეღებულ მითითებეფს?

¹⁵ ართ-ართ საშვალება, მუდგათ იეჰოვა ამდღა ხემძღვანელენს მუშ ხალხის, რე მუშ სიტყვა, ბიბლია. თე წმინდა წიგნის თინა მეჩიებნა, მუჭო ვემსახურათ თის მუშ მოსაწონო. მუჭო შემლებნა ვოძირათ, ნამდა პატის ფცენთ ღორონთიშ სიტყვაშე მეღებულ მითითებეფს? თეშ კეთება შემლებნა, მუჟამსით დროს გეგშურთუნთ თიშ კითხირს დო ნაკითხირშე ფიქრის. დეფიქრით თეცალ კითხვეფშე: „მუჟამსით ბკითხულენქ ბიბლიას ვარდა ნამთინე ჩქინ პუბლიკაციას, ქოფჩერდუქო დო ქოფიფქრენქო ნაკითხირშე? ქიბრკვიენქო საკითხეფს, მუჟამსით „რთულ გაგებელ“ მაფჷ? მიკასურებელო ხომ ვა ბკითხულენქ?“ (2 პეტ. 3:16). მუჟამსით დროს გიმურთუნთ თიშე ფიქრის, მუდგას იეჰოვა მოგურუანა, შემალებენა მივაჸუნათ თიშ მითითებეფს დო შევასრულათ ჩქინდა დავალებურ ქადაგებაშ საქმე (1 ტიმ. 4:15, 16).

16. მუ მიმეხვარებნა „ართგურ დო გონიერ მონაშე“ მეღებულ თიცალ მითითებეფიშ მეჸუნას, ნამუთ ბოლოშა ვა მარჩქილენა?

¹⁶ ხოლო ართ საშვალება, მუდგათ იეჰოვა ხემძღვანელენს მუშ ხალხის, რე „ართგურ დო გონიერ მონა“ (მათ. 24:45). მინშა გონიერ მონა მარზენა მითითებას,  ნამუთ შილებე ბოლოშა ვა მარჩქილედან. მაგალთო, თინეფშე შილებე მიბღათ სტიქიურ უბედრობაწკუმა დაკავშირებულ მითითებეფ, ნამდგაშე ფიფქრენთ, ნამდა ჩქინ ტერიტორიას ვა მოხვადუ. ვარდა შილებე ფიფქრენდათ, ნამდა გონიერ მონა ზედმეტო გიმირჩქინანს სიფრთხილეს პანდემიაწკუმა დაკავშირებით. მუშ კეთება შემლებნა, მუჟამსით ფიფქრენთ, ნამდა მეღებულ მითითებეფ იშენდოიშენ პრაქტიკულ ვა რე. შემლებნა ქიგიფშინათ, მუჭო მიაჸუნეს ისრაელეფქ იეშუაშ დო ზერუბაბელიშ მითითებეფს. თეს გეძინელ, შემლებნა იფიფქრათ ბიბლიაშე კითხირებულ შხვა მაგალითეფშე ხოლო. ღორონთიშ ხალხ მინშა თიცალ მითითებეფს ღებულენდჷ, ნამუთ ართ მეჯინათ პრაქტიკულო ვეძირედ, მარა თინეფიშ სიცოცხლეს ირსხენდჷ (მსაჯ. 7:7; 8:10).

17. მუჭო იმოქმედ იუდეველეფწკუმა ლამპარიშ დო ჟირ ზეთისხილიშ ჯაშ ხილუაქ?

¹⁷ მახუთა ხილუა, ნამუთ ზაქარიაქ ძირჷ, შილებე დიდ ვა რდას, მარა თიქ ებრაელეფს მეხვარ, უღდესკო დადებით განწყობა დო შურ დო გურით გაგრძელესკო იეჰოვაშ თაყვანიშცემა. მუჟამსით იუდეველეფქ ცხოვრებას გეგმირინეს, მუთ ზაქარიაშ ხილუაშე დიგურეს, ქიგინეს იეჰოვაშ ჸოროფათ ელარნა დო ხემძღვანელობა. მუშ ძალიერ წმინდა შურიშ ჭყოლოფათ იეჰოვაქ ქიმეხვარ თინეფს, ვემუტებდესკო მუნეფიშ საქმე დო დურთინუაფდესკო ხიოლ (ეზრ. 6:16).

18. მუჭო შილებე იმოქმედას ზაქარიაშ ხილუაქ ჩქინდა?

¹⁸ შილებე ჩქინ ცხოვრებაშა ხოლო მანგარო ქიმოქმედას ლამპარიშ დო ჟირ ზეთისხილიშ ჯაშ გურშენ ზაქარიაშ ხილუაქ. მუჭოთ გუვარჩით, თინა ძალას ქომჩანა წინააღმდეგობაშ დროს, ხიოლს — მუჟამსით ჩქინ მდგომარეობა ითირუ დო ნდობას — მუჟამსით ბღებულენთ თიცალ მითითებეფს, ნამუშ ბოლოშა ვა მარჩქილენა. მუ ოკო ვაკეთათ, მუჟამსით ჩქინ ცხოვრებას მუდგარენ ითირუ? პირველ, ჩქი ხოლო ქობძირათ თინა, მუთ ზაქარიაქ ძირჷ — თიშ მტკიცებულება, ნამდა იეჰოვა ზრუნენს მუშ ხალხშე. მაჟია, გეგმოფხანტათ იეჰოვაშ ნდობა საქმეეფით დო გუვაგრძელათ მთელ გურით თიშ თაყვანიშცემა (მათ. 22:37). თაშ ქიმიფქციებუთ-და, იეჰოვა ქიმმეხვარებნა, ირიათო ხიოლით ვემსახურათ თის (კოლ. 1:10, 11).