1-2. Gin ango ma biweko Lubanga jolo worowa?

 ITAMO i kom gin ango ka iwinyo nyig lok man ni “woro”? Gwok nyo itamo i kom omego mo ma orumo conge piny ka lega bot Jehovah ma peya en onino. Nyo itamo i kom jo me ot mo ma gitye i worogi pi jo me ot dok gitye ka nongo mit pa kwano Baibul.

² Jo magi ducu gitye ka woro Lubanga. Tika Jehovah bijolo worogi? En bijolo ka worogi rwatte ki yubbe dok gitye ka timone ki mar. Wamaro Jehovah matek. Wangeyo ni en opore me awora, dok wamito wore i yo maber loyo ducu.

3. Gin ango ma wabinyamo i pwony man?

³ I pwony man, wabinyamo kit woro ma Jehovah onongo jolo i kare macon dok wabipwonyo yo aboro mapatpat ma Jehovah mito ni wawore kwede i kare-ni. Ka wawoto ki timo meno, watwero tam i kom kit ma watwero dongo rwom me worowa. Wabinyamo bene tyen lok mogo ma oweko woro me ada keliwa yomcwiny.

4. Jo ma onongo giworo Jehovah i kare ma Yecu peya obino i lobo gunyuto mar ki woro pi Jehovah nining?

⁴ Co ma lugen calo Abel, Nua, Abraim, ki Yubu gunyuto mar ki woro madit pi Jehovah. I yo ma nining? Gubedo luwiny bot Lubanga, gunyuto niye dok gumiyo gityer bote. Baibul pe tittiwa jami ducu ma onongo mitte ni gutim  me woro Lubanga. Ento onen ka maleng ni gutimo jami ducu ma gitwero me miyo deyo bot Jehovah, dok Jehovah ojolo worogi. Lacen Jehovah omiyo Cik bot Luicrael kun tiyo ki Moses. Cik magi mapatpat-ti, onongo tito kore ki kore kit me woro Jehovah i yo ma en cwako.

5. Jehovah mito ni lulub kor Yecu guwore nining?

⁵ I nge to ki cer pa Yecu, Jehovah onongo dong pe mito ni dano guwore kun gilubo Cik pa Moses ma en omiyo ki Luicrael. (Rom. 10:4) Onongo mitte ni Lukricitayo gulub cik manyen, “cik pa Kricito.” (Gal. 6:2) Onongo gitwero lubo “cik” man pe ki makone amaka i wigi kun gilubo cik mapol, ento ki lubo lanen pa Yecu kacel ki winyo pwonnye. I kare-ni bene, Lukricitayo gitute matek me lubo lanen pa Yecu wek giyom cwiny Jehovah dok ‘gilim yweyo’ i kwogi.—Mat. 11:29.

6. Watwero nongo adwogi maber ki i pwony man nining?

⁶ Ka wawoto ki nyamo but worowa mapatpat, pennye kekeni ni, ‘Ka kwene ma atye ka timone maber ma lubbe ki bute man?’ Itwero bene pennye ni, ‘Tika atwero medo rwom me woro ma amiyo bot Lubanga?’ Omyero ibed ki yomcwiny pi gin ma itye ka timo kombeddi, ento omyero bene ileg Jehovah wek okonyi inen ka ma mitte ni iyubbi.

7. Jehovah neno lega ma a ki i cwinywa nining?

⁷ Waworo Jehovah ka watye ka lega bote. Ginacoya poro legawa ki odok eceta ma kiyubo maber ma onongo kiwango i kema me woro ki lacen i ot pa Lubanga. (Jab. 141:2) Odok eceta onongo ka kiwango duny ma ngwece kur adada dok yomo cwiny Lubanga. I yo acel-lu, lega ma walego kun a ki i cwinywa weko Lubanga “cwinye bedo yom” kadi bed watiyo ki nyig lok ma yot. (Car. 15:8; Nwo. 33:10) Watye ki tyen lok maber me moko ni yomo cwiny Jehovah me winyo ka walego kun watito marwa ki pwocwa pire. En mito ni watite parwa, genwa, kacel ki mitiwa. Ma peya ilego bot Jehovah, pingo pe kong ikwany kare me lwodo gin ma ibiwacce? Ka itimo kit meno, ci ibiwango “odok eceta” ma pud dong ber loyo ducu bot Woru me polo.

8. Kare mene ma watwero tic kwede me pako Lubanga?

⁸ Waworo Jehovah ka wapakke. (Jab. 34:1) Wapako Jehovah ka wawaco ki jo mukene kit ma wamaro kwede kite mamwonya kacel ki ticce mabeco. Wabibedo ki jami mapol me awaca i kom Jehovah ka watye ki pwoc pire. Ka walwodo jami mapol ma Jehovah otimo piwa, ci wabibedo ki tyen lok mapol me pakke. Tic me tito kwena miniwa kare maber adada me miyo “gitum ma gityero bot Lubanga, kun wawok ki bot Yecu; meno aye pwoc ma wamiyo ki dogwa.” (Ibru 13:15) Kit macalo omyero kong walwod gin ma wabiwaco i lega bot Jehovah ma peya walego, mitte bene ni kong watam i kom gin ma wabiwaco bot jo ma wabirwatte kwedgi i ticwa me pwony. Wamito ni “pakwa bot Lubanga” obed gin maber loyo ducu. Meno aye oweko watito kwena ki mit kom.

9. Adwogi maber ango ma jo pa Jehovah ginongo ka gibedo tye i cokke? Mi labol ma megi.

⁹ Waworo Jehovah ka wabedo tye i cokke. Kitito ki Luicrael macon ni: “Co  ducu ma i kinwu myero gubin i nyim Rwot [Jehovah] Lubangawu tyen adek i mwaka acel acel ki i kabedo ma en biyero.” (Nwo. 16:16) Onongo mitte ni guwek gangigi ki potigi labongo ngat mo me gwokone. Ento Jehovah ocikke botgi ni: “Ngatti mo bene pe bibedo ki miti i kom loboni i kare ma ibiwot ka nen i nyim Rwot Lubangawu.” (Nia 34:24) Pien Luicrael onongo gigeno Jehovah ki cwinygi ducu, gin onongo gicito i gure man ma bedo mwaka ki mwaka-ni. Onongo ginongo adwogi mabeco ki iye. Me labolle, onongo kipwonyogi ki jami mapol i kom Cik pa Lubanga, onongo gilwodo kit ma Jehovah onyutigi berre, dok onongo ginongo mit pa ribbe ki jo ma gimaro Jehovah. (Nwo. 16:15) Wan bene wanongo adwogi mabeco ka watute ki kerowa ducu me bedo tye i cokke pa Lukricitayo. Dok igo kong kit ma Jehovah cwinye bedo yom kwede ka wamiyo lagam macek ma walwodo maber.

10. Ngo ma nyuto ni wer obedo but worowa ma pire tek?

¹⁰ Waworo Jehovah ka wawero wer kacel ki omege ki lumege. (Jab. 28:7) Luicrael onongo gineno wer calo obedo but worogi ma pire tek adada. Kabaka Daudi oketo Lulevi 288 me bedo luwer i ot pa Lubanga. (1 Tekwaro 25:1, 6-8) I kare-ni, wanyuto marwa pi Lubanga ka wawero wer me pakke. Pe mitte ni wabed jo ma ngeyo wer maber adada wek watim meno. Nen kong lapor man: Ka watye ka lok, “ngat acel acel timo lwak roc mapol,” ento meno pe gengowa ki lok i kacokke kacel ki i ticwa me pwony. (Yak. 3:2) I yo acel-lu, pud watwero wero wer me pako Jehovah, kadi bed watamo ni pe wawero mamit.

11. Kit ma kitito kwede i Jabuli 48:13, pingo omyero wakwany kare me bedo ki woro pi jo me ot?

¹¹ Waworo Jehovah ka wakwano Lokke dok wapwonyo lutinowa lok i kome. I nino me Cabat, Luicrael onongo pe gitiyo tic mukene-ni, onongo gitiyo ki kare meno me jingo watgi ki Jehovah. (Nia 31:16, 17) Jo ma lugen i kingi onongo gipwonyo lutinogi lok i kom Jehovah kacel ki berre. I kare-ni bene, mitte ni wakwany kare me kwano Baibul i yo matut. Man obedo but worowa bot Jehovah, dok konyowa me nyikke cok kwede. (Jab. 73:28) Dok ka wakwano kacel macalo jo me ot, wakonyo lutinowa me dongo wat macok ki Wonwa me polo ma lamar-ri.—Kwan Jabuli 48:13.

12. Wapwonyo gin ango ki i kit ma Jehovah onongo neno kwede tic pa jo ma guyubo jami ma kitiyo kwede i kema me woro?

¹² Waworo Jehovah ka watye ka gero nyo roco odi me worowa. Jehovah onongo neno tic me yubo kema kacel ki jami ma iye macalo ‘tic maleng.’ (Nia 36:1, 4) I kare-ni bene, Jehovah neno tic me gero Odi me Ker ki gedo mukene ma kitiyo kwedgi pi worowa calo tic maleng. Omege ki lumege mukene gicwalo cawa madwong adada ka tiyo tic magi. Pud dong watye ki pwoc madit ya pi ticgi man ma pire tek-ki. Ngene kene ni gin bene ginywako i tic me tito kwena. Jo mogo i kingi gitwero bedo ki miti me tic macalo painia. Luelda gitwero nyuto cwakgi bot utmege magi pi tic matek ma gitiyo ka guye ni utmege magi gitwero tic macalo painia ka gupongo fom me penyo pire. Kadi bed watye ki diro me gedo nyo pe, wan ducu watwero nywako  i gwoko lengo me gedo magi ki rocone.

13. Omyero wanen mot ma wamiyo me cwako kor tic me Ker-ri nining?

¹³ Waworo Jehovah ka wacwako tic me Ker-ri ki miyo mot. Onongo pe mitte ni Luicrael gubin i nyim Jehovah ki cinggi nono. (Nwo. 16:16) Onongo omyero gukel mot me jami me kom ma lubbe ki kerogi. I yo ma kit man, onongo ginyuto ni gitye ki pwoc pi jami ducu ma Jehovah tye ka timo pigi. Watwero nyuto marwa pi Jehovah nining pi jami ducu ma en tye ka timo piwa? Yo acel aye ki miyo mot me cente pi kacokke kacel ki ticwa ma kwako wi lobo ducu kit ka kerowa twero. Lakwena Paulo oloko iye kit man: “Lubanga gamo mot ma dano tye kwede, tekke en obedo ki miti me miyone, ma pe paro gin ma pe etye kwede.” (2 Kor. 8:4, 12) Jehovah tye ki pwoc madit adada pi mot ducu ma wamiyo kadi bed nen tidi.—Mar. 12:42-44; 2 Kor. 9:7.

14. Ma lubbe ki Carolok 19:17, Jehovah neno mot ma wamiyo bot utmegiwa ma gitye i peko nining?

¹⁴ Waworo Jehovah ka wakonyo Lukricitayo luwotwa ma gitye i peko. Jehovah ocikke me culo Luicrael ma gikonyo lucan. (Nwo. 15:7, 10) Ada, kare ducu ma wakonyo omege ki lumege ma gimito kony, Jehovah neno calo wamiyo mot Bote. (Kwan Carolok 19:17.) Me labolle, i kare ma Lukricitayo ma i Pilipi gucwalo mot bot Paulo ma onongo en tye i buc, en olwongo motgi man ni “gin ma ngwece kur ma gityero bot Lubanga, ma en opwoyo, dok ma yomo cwinye.” (Pil. 4:18) Tam i kom jo ma gitye i kacokkewu dok ipennye kekeni ni, ‘Tika tye ngat mo ma atwero konyo?’ Jehovah cwinye bedo yom adada ka watiyo ki cawawa, kerowa, dirowa, kacel ki jamiwa me kom me konyo jo mukene. En neno meno calo but yub me worowa.—Yak. 1:27.

15. Woro me ada tero cawa ki kero madwong, ento pingo pe nurowa?

¹⁵ Woro me ada mito cawa ki kero. Ento timo man pe nurowa. (1 Jon 5:3) Pingo pe nurowa? Pien waworo Jehovah pi mar ma watye kwede pire. Go kong latin ma mito miyo mot mo ki wonne. En twero tero cawa malac me golo cal me amiya ki wonne. Latin man pe koko ange pi cawa ma ecwalo ka goyo cal. En maro wonne, dok tye ki yomcwiny me mine mot meno. I yo acel-lu, pi marwa pi Jehovah, wabedo ki yomcwiny me tic ki cawawa kacel ki kerowa me woro Jehovah.

16. Ma lubbe ki Jo Ibru 6:10, Jehovah neno tutewa me yomo cwinye nining?

¹⁶ Lunywal ma lumar pe gigeno ni gibinongo mot marom kit bot latin acel acel. Gingeyo ni latin acel acel pat ki lawote ka odok i kom kerogi me timo jami. I yo acel-lu, Wonwa me polo niang gin ma wan ducu ki acel acel watwero timo. Twero bedo ni ingeyo ni itwero timo makato jo mapol ma ingeyo dok imarogi. Nyo twero bedo ni pe itwero tic madwong calo jo mukene, gwok pi peko me yotkom, tiyo, nyo tic me gwoko jo me gangi. Pe iwek cwinyi otur. (Gal. 6:4) Jehovah wiye pe biwil i kom ticci. Ka itye ka miyo ki Jehovah mot maber loyo dok ki tyen lok ma atir, en cwinye bibedo yom i komi. (Kwan  Jo Ibru 6:10.) Jehovah ngeyo wa gin ma cwinyi mito timo. En mito ni ibed ki yomcwiny dok ma iyeng ki woro ma itwero miyone bote.

17. (a) Ka wanongo ni keto i tic but worowa mo tek, jami ango ma watwero timogi? (b) Jami ma kiketogi i bok ma wiye tye ni “ Med Yomcwinyi” gukonyi nining?

¹⁷ Gin ango ma omyero watim ka wanongo ni tek me timo jami mogo ma waa ka nyamogi-ni, calo kwano Baibul nyo tito kwena? Ka wawoto ki timo jami magi kare ki kare, ci wabinongo mitte kacel ki adwogi maber makato. Watwero poro woro ma wamiyo ki Lubanga ki ryeyo ler nyo pwonyo goyo adungu. Ka watimo man kicel kicel, ci pe wabitwero dongo dirowa. Ento ket kong ni waketo yub me timone nino ducu. I acakkine watwero timone pi dakika manok, ento lacen watwero medo cawa ma wacwalo ka timone. Ka wawoto ki neno adwogi maber ma tye ka bino pi yellewa, ci wabicako bedo ki miti me timone. Man bene tye lok ada ka odok i kom worowa.

18. Gin ango ma pire tek loyo ma watwero timone, dok gin ango ma bitimme ka watimo meno?

¹⁸ Tute ki kerowa ducu me woro Jehovah obedo gin ma pire tek loyo ducu ma watwero timo. Ka watimo meno, kwowa bedo ki yomcwiny dok ki tyen lok dok wabedo ki gen me woro Jehovah pi naka. (Car. 10:22) I kare-ni, watye ki wic ma opye mot pien wangeyo ni Jehovah konyo jo ma giwore ka gitye ka kato ki i peko. (Ic. 41:9, 10) Labongo akalakala mo, watye ki tyen lok maber adada me bedo ki yomcwiny ka wawoto ki woro Wonwa, ma opore “me nongo deyo ki woro,” ki bot cwecce ducu!—Yabo 4:11.