1, 2. Иеговага кандый бажырыш јарап јат?

 «БАЖЫРЫШ» деген сӧсти уксагар, бажаарда кандый јурук јуралат? Кемге де уйуктаар алдында тизеленип алала, Иеговага мӱргӱп јаткан ака јуралар болор. А та кемге де Агару Бичикти кӧдӱриҥилӱ шӱӱжип јаткан ырысту биле јуралар болор.

² Бу эки учурал бажырышла колболу. Је сурак чыгып јат: мындый бажырышты Иегова јарадат па? Бу улус Кудайды сӱӱп, тооп, ого јараар эдип бажырза, Иегова олордыҥ бажырып турганын јарадар. Бис Иегованы акту јӱрегистеҥ сӱӱп јадыс ла ого бажырар учурлу деп оҥдоп јадыс. Оныҥ учун ого иштеп, эҥ артыгын берерге албаданып јадыс.

3. Бу јӧрмӧлдӧ нени шӱӱжерис?

³ Бу јӧрмӧл Иегованыҥ алдындагы ишчилери ого канайып бажырганын эске алындырар. Анайда ок бӱгӱнги кӱнде Иеговага бажырарына кандый керектер кирип турганын кӧрӧрис. Бу керектерди кӧрӱп, бистиҥ кажыбыска ла не јанынаҥ иштеерин шӱӱп сананар керек. Анайда ок чын бажырыш кижини нениҥ учун ырысту эдет деп кӧрӧрис.

4. Христостыҥ јерге келеринеҥ озо јӱрген улустыҥ Иеговага сӱӱжи ле тоомјызы недеҥ кӧрӱнген?

⁴ Христостыҥ јерге келеринеҥ озо Авель, Ной, Авраам ла Иов Иегованы сӱӱп јӱргилеген. Бу недеҥ кӧрӱнген? Олор ого бӱткен, оныҥ сӧзин угуп јӱрген ле ого тайылгалар эткен. Агару Бичикте олордыҥ Кудайга бажырганы оок-теегине јетире бичилбей де турган болзо, бис алаҥзыбай јадыс, олор Кудайды тооп јӱрген, а Иегова олордыҥ бажырганын јараткан. Кийнинде Иегова Авраамныҥ бала-барказына Моисей ажыра јасак берген. Бу јасакта Кудайга канайып бажырар керек деп айдылып калган болгон.

5. Иисустыҥ божогоныныҥ кийнинде, Иегова христиандардаҥ нени некеген?

⁵ Иисустыҥ божогоныныҥ кийнинде, Иегова бойыныҥ ишчилеринеҥ Моисейдиҥ јасагын бӱдӱрзин деп некебеген (Рим. 10:4). Ол олорго јаҥы јасак — «Христостыҥ Јасагын» берген (Гал. 6:2). Бу јасакта нени эдерге јараар, нени јарабас деп кӧп неме тоололып бичилбеген. Оныҥ учун оны бӱдӱнге ӱренип алары керек јок болгон. Айдарда, христиандар бу јасакты канайып бӱдӱрет? Олор Христостыҥ теми ле оныҥ ӱредӱлери аайынча јӱрет. Бу биске Кудайысты сӱӱндирерге ле ийде-кӱчтӱ болорго болужат (Матф. 11:29).

6. Бу јӧрмӧл биске тузалу болзын деп, нени эдер керек?

⁶ Иеговага бажырарына кирип турган керектерди кӧрӱп тура, бойоордоҥ мынайып сурагар: «Мен кандый једимдерге јеткем?», «Меге база не јанынаҥ иштеер керек?» Бис кӧгӱс јанынаҥ ӧзӱп, јакшы једимдерге јеткен болзоос, бу јакшы эмей. Је андый да болзо, биске Иегованаҥ нени тӱзедетенин кӧргӱзип берзин деп сураган болзоос, оноҥ јакшы болор эди.

7. Акту јӱректеҥ айдылган мӱргӱӱлдерге Иегованыҥ кӧрӱми кандый?

⁷ Мӱргӱӱл. Агару Бичикте бистиҥ мӱргӱӱлдерис јазап белетелген фимиамга тӱҥдештирилет (Сар. 141:2). Фимиамды агару байканда ӧртӧп туратан, кийнинде дезе ӧргӧӧдӧ. Оныҥ јыды Кудайга јарап туратан. Анайып ла ишчилериниҥ акту јӱрегинеҥ айткан мӱргӱӱлдери, керек дезе јараш сӧстӧр айдылбаза да, Кудайга јарап јат (Јаҥ. т. 33:10; Укаа 15:8). Мӱргӱӱлдеристе Иегованы сӱӱп турганысты, быйанду болгонысты айдып турзаас, оны сӱӱндирип јадыс деп алаҥзыбайдыс. Ол бисти санааркаштарысты, нени кӱӱнзеп турганысты айдып турзын деп кӱӱнзедет. Је бистиҥ мӱргӱӱлдерис јазап белетелген фимиамдый болзын деп, нени эдер керек? Мӱргӱӱрдеҥ озо нени айдарын јазап сананып туругар.

8. Бис Кудайды канайып мактаар аргалу?

⁸ Мактаары. Иегова Кудайыстыҥ биске эткен ондый кӧп јакшы керектерин кӧрӱп, анайда ок оныҥ јараш кылык-јаҥдарын сананып, бис Кудайысты мактап јадыс (Сар. 34:1). Мынайып мактаарга бистиҥ быйанду јӱрегис кӱӱнзедет. Кудай биске учы-куйузы јок тоолоп болбос алкыштар берген, оныҥ учун оны канай мактабайтан?! Оны мактайтан эҥ јакшы арга — улуска ол керегинде куучындаары. Бис улуска јарлап турзаас, Кудайыска «макташтыҥ тайылгазын»,  ӧскӧртӧ айтса, «оосторыстыҥ сыйын» бередис (Евр. 13:15). Канайып Кудайга мӱргӱӱрдеҥ озо нени айдарын сананып аладыс, анайып ла улуска јарлаарга нени айдарын сананадыс. Бис макташтыҥ тайылгазы јик јок болзын деп кӱӱнзеп турганыс, оныҥ учун акту јӱрегистеҥ улустыҥ јӱрегин томултарга албаданып јадыс.

9. Јуунныҥ туштажулары Кудайдыҥ ишчилерине ле слердиҥ бойыгарга кандый туза берип турганын куучындап беригер.

⁹ Јуунныҥ туштажуларына јӱрери. Моисейдиҥ јасагыла болзо, «эр улустыҥ ончозы бир јылда ӱч катап... Иегова Кудайдыҥ алдына, оныҥ талдап алган јерине келер учурлу» (Јаҥ. т. 16:16). Кудай олорго: «Слердиҥ јеригерди кем де блаап албас» — деп сӧзин берген (Чыг. 34:24). Оныҥ учун израильтяндар Иеговага иженип, айылдарын, кыраларын артыргызала, бу байрамга јӱре беретен. Иегова олорды сӧсуккуры учун алкаган: израильтяндар Кудайдыҥ берген јасагын јакшы оҥдогон, оныҥ јалакайын јарт кӧргӧн, ака-эјелерле куучындажып, кӧкӱдӱ алган (Јаҥ. т. 16:15). Анайып ла бис јуунныҥ туштажуларын бир де божотпой турзаас, керек дезе та нени де артыргызарга да келижип турза, израильтяндар чылап, јаан оморкоду аладыс. Бого коштой, јазап сананала берген кыска карууларысла Иегова Кудайысты сӱӱндиредис.

10. Нениҥ учун Кудайга бажырарга кожоҥдоп јадыс?

¹⁰ Кожоҥ (Сар. 28:7). Израильтяндар Кудайга бажырарга јуулышса, јаантайын Иегованы мактап, кожоҥдоп туратан. Темдектезе, Давид каан 288 левит талдап, Кудайдыҥ туразында кожоҥдозын деп кӧстӧгӧн (1 Лет. 25:1, 6—8). Анайып, бис бӱгӱнги кӱнде Кудайга сӱӱжисти кожоҥло кӧргӱзип јадыс. Иегованы мактаарга, кӱӱ јанынаҥ ондый ла јайалталу болоры керек јок. Бистиҥ ортобыста «сӧс айдып, јастырбай турган кижи» јок эмей (Иак. 3:2). Је ондый да болзо, бистер улуска јарлап јадыс, јуунда каруулар берип јадыс. Слер бойоорды ӱн јок, кожоҥдоп јазап билбезим деп сананып турган болзоор, Иегованы мактап кожоҥдоорго кандый да буудак болбозын!

11. Сарын 48:13-ле болзо, билелик бажырышты нениҥ учун ӧткӱрер керек?

¹¹ Агару Бичикти таҥынаҥ ӱренери ле билелик бажырыш. Алдында, суббот кӱнде, израильтяндар кӱнӱҥ сайын эдетен керектерин туура јылдырып, бастыра ӧйин Иеговага учурлаган (Чыг. 31:16, 17). Анайып, ада-энелер балдарына Кудай керегинде, оныҥ јалакайы керегинде куучындап туратан. Оныҥ да учун биске Агару Бичикти кычырып турарга, оны шиҥдеп турарга ӧй таап турар керек. Анайып, бис Кудайга бажырып јадыс ла оныла колбуларысты тыҥыдып јадыс (Сар. 73:28). А качан ада-энелер билелик бажырыш ӧткӱрип турза, «келер ӱйеге» ол эмезе бойыныҥ балдарына теҥеридеги Адазыла кожо јуук колбуларлу болзын деп болужып јат. (Сарын 48:13 кычырыгар.)

12. Агару байканды тударына Иегованыҥ кӧрӱминеҥ нени билип аладыс?

¹² Иеговага бажырарга керектӱ туралар тудары ла јазаары. Агару Бичикте озогы ӧйдӧ агару байканды ла ондо бар немени эдери «агару иш» деп айдылып јат (Чыг. 36:1, 4). Бӱгӱнги кӱнде Каандыктыҥ Тураларын ла организацияныҥ ӧскӧ дӧ тураларын тудары Кудайга бажырарына кирип јат. Бу мындый ишке  ака-эјелер кӧп ӧйин берип туружат. Олорго бу учун јаан быйанысты айдып јадыс! Ол ака-эјелер јарлаар ишке база туружып јат. Олордыҥ кезиги пионер болорго кӱӱнзеп, заявление бичигилейт. Олор Кудайдыҥ некелтелерине келижип турза, аксагалдар алаҥзыбай ла олорды пионердиҥ ижине кӧстӧп салат. Анайып, аксагалдар бистиҥ организацияныҥ туралар тудар проекттерине јӧмӧжӧт. Слерде туралар тудар ченемел јок то болзо, Каандыктыҥ Туразын јазаар ла арутаар арга бар.

13. Каандыктыҥ ижине сыйлар берерине кӧрӱмис кандый болор керек?

¹³ Каандыктыҥ ижине сыйлар эдери. Израильтяндар јыл сайын болуп турган байрамга јуулышса, «Олордыҥ кемизи де Иеговага куру колду келбес учурлу» болгон (Јаҥ. т. 16:16). Олордыҥ эткен тайылгалары арга-чагынаҥ камаанду да болгон болзо, кажы ла кижи Кудайга кӧгӱс јанынаҥ оны кичееп турганы учун быйанын ла сӱӱжин кӧргӱскен. А мындый тайылгаларды бис канайып эдер аргалу? Темдектезе, бис јууныбыстыҥ чыгымдарын бӧктӧӧр аргалу эмезе бистиҥ телекейлик ижиске јӧмӧжип, сыйлар берер аргалу. Апостол Павел бу јанынаҥ мындый сӧстӧр бичиген: «Берерге кӱӱнзеп турган болзогор, слерде барынаҥ алып јадылар, слерде јогынаҥ эмес» (2 Кор. 8:4, 12). Качан бистиҥ јӱрегис Кудайга сый берерге, кичинек те сый берерге кӱӱнзеп турза, Иегова Кудайыс сӱӱнер (Марк 12:42—44; 2 Кор. 9:7).

14. Укаа сӧстӧр 19:17-ле болзо, кӱч айалгада ака-эјелериске болушканысты Иегова канай кӧрӧт?

¹⁴ Кӱч айалгада ака-эјелерге болужары. Озогы ӧйдӧ израильтяндар јокту-јойу улуска болужып турза, Иеговага тӧлӱге берип тургандый болотон (Јаҥ. т. 15:7, 10). Иегова Кудай олордыҥ чыккан чыгымын ойто кайра јандырып беретен. (Укаа сӧстӧр 19:17 кычырыгар.) Павел тӱрмеде болордо, Филиппыдагы ака-эјелер ого сый экелип берерде, ол бу сыйды «Кудайга јараар тайылга» деп айткан (Флп. 4:18). Биске бойыстаҥ сураар керек: «Јуунда кӱч айалгада болуп калган ака-эјелер бар ба?» Бис олорго акча-манадысла, ӧйисле, кӱчисле болужып турзаас, Иегова сӱӱнип јат. Бу мындый болушты Иегова Кудай агару бажырышка кирип турган деп кӧрӧт (Иак. 1:27).

15. Кудайга бажырарга ӧйисти ле кӱчисти берерге биске нениҥ учун кӱч эмес?

¹⁵ Иеговага бажырарга ӧй лӧ ийде-кӱч керек. Је биске бир де кӱч эмес (1 Иоанн 5:3). Нениҥ учун дезе бис Иегованы сӱӱп јадыс. Мындый тем кӧрӱп ийектер. Бала адазына сый эдерге турган болзын. Анайып ла канча сааттыҥ туркунына јараш јурук јураарга албаданат. Ол адазын тыҥ сӱӱп јат. Оныҥ учун ӧйдиҥ ӧткӧнин билбей де калат. Карын ол сыйды белетеп тура, сӱӱнчи алып јат. Анайып ла бис ӧйисти ле ийде-кӱчисти кысканбай, Кудайга бажырып турзаас, сӱӱнчи алып јадыс.

16. Еврейлерге 6:10-ло болзо, Иегова кажы ла кижиниҥ оны сӱӱндирерге албаданып турганын канайып кӧрӧт?

¹⁶ Балдарын сӱӱп турган ада-энелер кажы ла баланыҥ сыйын баалап јат. Нениҥ учун дезе кажы ла бала башка, олорды тӱҥдештирбес керек. Анайып, Иегова Кудай кажы ла Керечизиниҥ  айалгазы башка деп оҥдоп јат. Та кемниҥ де ийде-кӱчи кӧп, а та кемниҥ де ас, су-кадыгы да коомой, јажы да јаанап калган, биледе молјулары да кӧп. Је андый да болзо, акту јӱректеҥ иштеп турзаас, Кудайыс сӱӱнип јат (Гал. 6:4). Санааркаба, сениҥ ижиҥди Иегова качан да ундыбас. (Еврейлерге 6:10 кычырыгар.) Иегова Кудай сениҥ ого кӧптӧдӧ иштеерге турганыҥды билер, је ол сени тери-буры чачылганча, ийде-кӱчи, сӱӱнчизи јылыйганча иштезин деп кӱӱнзебей јат.

17. а) Кудайга бажырарына кирип турган керектердиҥ кажы бирӱзин эдерге кӱч болуп турган болзо, нени эдерге јараар? б)  23-чи бӱктеги рамкада кӧргӱзилген керектер слерге ырысту болорго канайып болушкан?

¹⁷ Бу јӧрмӧлдӧ Кудайга бажырарына кирип турган керектерди кӧрдис. Темдектезе, слерге Агару Бичикти таҥынаҥ ӱренерге ле јарлаарга кӱч болуп турган болзо, нени эдерге јараар? Бу учуралда мындый принцип иштейт. Бир немени јаантайын эдип турзаҥ, оны канча ла кире јакшы эдип баштаарыҥ. Кудайга бажырып турганысты спортло тазыктырынарына эмезе кӱӱлик инструментле ойноорына тӱҥдештирерге јараар. Бис бу керектерди каа-јаа ла эдип турзаас, јаан ла једимдерге јетпес болорыс. А кажы ла кӱн эдип турзаас, једимдерге једер эмезис пе? Озо баштап бир эмештеҥ баштагар, оноҥ дезе бу керектерге баратан ӧйди кӧптӧдип туругар. Анайып бисте ӱзе јакшы келижип турза, бис јакшызынып, бу керектерди оноҥ ло ары эдерге кӱӱнзей берерис.

18. Бистиҥ јӱрӱмис недеҥ улам калас ӧтпӧй јат? Бу биске кандый тузазын јетирет?

¹⁸ Иеговага бажырып јӱргенистеҥ улам бистиҥ јӱрӱмис калас ӧтпӧй јат. Бис бу јердиҥ ӱстинде нениҥ учун јӱрӱп турганысты оҥдоп, јаан сӱӱнчи алып јадыс. Иеговага бажырзаас, ӱргӱлји јӱрӱмге ижемјилӱ јӱрӱп јадыс (Укаа 10:22). Бисте кӱчтер болуп турза, Иегова болужарга јаантайын белен. Мыны ундыбай турзаас, бӱгӱнги де кӱнде токуналу артарыс (Иса. 41:9, 10). Бистиҥ сӱӱп турган теҥеридеги Адабыс ончо јайаандарынаҥ «макты, кӱндӱни... аларга јарамык» (Ачыл. 4:11). Ого бажырганыс бисти чыннаҥ ла ырысту эдет!