1-2. Sasamaan ko demak ita mamicada ko Kawas to pidoko ita hani?

 ANO malengo ko pidoko, maharatengay iso ko maanan hani? Maharateng iso ko cecay misapoeneray ko falocoˈ a salikaka mipitoros i tatihi no takar pasayra ci Yihofaan mikifalocoˈay mitolon alatek, maharatengayho ko cecay paro no lomaˈ lipahakay a minanam to Fangcalay Cudad alatek.

² Masowalay i fafekang a salikaka ato cecay paro no lomaˈ, sahtoay o midokoay to Kawas. Mamicada ci Yihofa to pidoko nangra han? Ano midofdof cangra to araaw no Kawas, tano ciolahay a falocoˈ ato mikangodoay a mihaen to demak, mamicada ci Yihofa. Tada maolahay kita ci Yihofaan, mafanaˈayho to citatodongay Cingra dokoen, mansa tada makalimay kita patafang to sangaˈayay no niyah i Cingranan.

3. Onini a lalakaw mamilengo to maanan?

³ Onini a lalakaw mamilengo, itini nolitengan makalimay ci Yihofa to tamdaw samaan ko pidoko Cingranan, mamilengoho anini ngaˈay kita itini maanan a falo a pakayraan mirienang to matatodongay a pidoko, ato sasamaan ngaˈ matongal ko kangaˈay no demak. Maminengnengho kita, mirienang to matatodongay a pidoko hano papalipahak kitaanan.

4. Itini ˈayaw no mapatireng ko Kristokiyo, o madimadiay a tamdaw samanay paihkal cangra to mikangodoay ato maolahay ci Yihofaan hani?

⁴ Itini ˈayaw no patireng to Kristokiyo, ci Apil, Nowa, Apraham, Yupo ato romaroma madimadiay a tamdaw sahtoay o mikangodoay ato maolahay ci Yihofaan. Hano mafanaˈ kita hani? Samanen midofdofay cangra ato mitadiˈecay ci Yihofaan, hanaca patoˈayaay Cingranan. Cowa ka pisongilaˈ mitadtad ko Fangcalay Cudad to misaaliay ci Yihofa cangranan samaan ko pidoko Cingranan, kawra mahapinangay to patafangay cangra to sangaˈayay no niyah Cingranan, hanaca mihaydaay Cingra to pidoko nangra. Ikor pafelian ni Yihofa to Rikec ni Mosi ko teloteloc ni Apraham. Onini a Rikec mahawpay ko adihayay ihkalay a sakayat, mitadtad to samaan ko pidoko ngaˈ ngaˈay milifok to pihayda ni Yihofa.

5. Makalimay ci Yihofa to Krisciyang sasamaan ko pidoko Cingraanan hani?

⁵ Patikol maˈorip ci Yis ikor, cowa to pisaali ci Yihofa to tamdaw midofdof to Rikec ni Mosi. (Loma 10:4) O Krisciyang mamidofdof to faelohay a rikec, oya rikec ni Kristo. (Kalatiya 6:2) Sasamaan cangra midofdof tonini a rikec hani? Cowa ko paciecian a miharateng ato paciecian midofdof to adihayay a rikec, ao minanam to taˈarawan ni Yis hanaca mitengil midofdof to sapasifanaˈ ningra. Anini mahecaday, o Krisciyang mamisarocod mihakelong to taˈarawan ni Kristo, mihaen cangra wa ngaˈay palipahak ci Yihofaan, ngangaˈayho ‘parihaday’ to niyah.—Matay 11:29.

6. Minanam tonini a lalakaw i, sasamaan ko pidemak?

⁶ Itini pilengo to pakayraan no midokoay a demak i, ngaˈayay haratengen: “Palalinien to isaˈayaway, itini tonini a pakayraan iraay ko maanan kacakatan ako hani?” Ngaˈayho kiso milicay to niyah: “Ngaˈayho kako matongal ko kangaˈay no demak han?” Ngaˈay kiso pakayni kacakatan no niyah a lipahak, kawra ngaˈayho kiso mitolon, micangacang ci Yihofaan padama tisowanan mihapinang to sasamaan matongal ko kangaˈay no demak.

7. Samanay ci Yihofa minengneng to mikifalocoˈay a satolon ita?

⁷ Pasayra kita ci Yihofaan mitolon o midokoay Cingranan. Sowal no Fangcalay Cudad o satolon ita mahecaday o patafangan a exiw i pakopangan ato fangcalay sefi, o hatiniay a exiw o misongilaˈan a misangaˈ. (ˈOlic 141:2) O fangsis no exiw palipahakay ci Yihofaan. Malecaday, o mikifalocoˈay a satolon ‘palipahakay to Kawas,’ soˈlin tano kantangay a sowal o ngaˈayayto. (Taneng 15:8; Limoˈot 33:10) Ngaˈay kita pakasoˈlin, matengil ni Yihofa ko satolon ita pasowal Cingranan to tada maolahay kita Cingranan, tada miakoˈiday Cingranan, madeng o dadihko ko falocoˈ Ningra. Makalimayho ci Yihofa kitanan o cariraw, kalim ato kihcod a harateng no niyah pasowalen Cingra. Itini ˈayaw no mitolon, salakat ngaˈay kiso misongilaˈ miharateng to o maanan ko hasowal ci Yihofaan, mihaen o ngangaˈayto kiso tano sangaˈayay a ‘exiw’ patafang to kakarayan a Wama.

8. Sasamaan kita pakahemek to Kawas?

⁸ Pakahemek kita ci Yihofaan o midokoay Cingranan. (ˈOlic 34:1) Pasowal kita to tao tada maolahay ko niyah ato masemeray to makapahay a capeling ni Yihofa ato kasapaan a demak Ningra, o pakahemekay Cingranan. Ano matomesay ko miakoˈiday a falocoˈ ita, kahnayay mahadak i ngoyos ko pakahemekay a sowal. Mihaenay, mamipalak kita to toki misongilaˈ midotim to kihcod nano demak ni Yihofa kitaanan, mihaen wa adihay ko lalangian ita pakahemek Cingranan. Sowal no Fangcalay Cudad: ‘Pakaynien ci Yisan padadotoc a pakahemek to Kawas, o sapatafang ita Cingranan a sapatoˈaya konini, tano ngoyos milasil to fangcalay ngangan Ningra, o sapatafang ita a minaroˈan konini.’ O mitosilay a tayal pafeliay kitaanan to toki mihaen to demak. (Hipray 13:15) Makalimay kita ‘o sapatafang a sapatoˈaya ita Cingranan’ o sangaˈayay, mihaenay itini ˈayaw no mitosil ngaˈay songilaˈen no niyah miharateng to o maanan ko hasowal, malecaday itini ˈayaw no mitolon misongilaˈ ko niyah miharateng to hasowal, mihaen wa fanekfekto kita paladaˈ to soˈlinay kimad i taowanan.

9. Malecad nolitengan a Israil tamdaw, mirienang kita to saˈopo ngaˈay milifok to maanan a epoc hani? Sowalen iso ko tinakoan no niyah.

 ⁹ Mirienang kita to saˈopo o midokoay ci Yihofaan. O nolitengan a Israil tamdaw mamidofdof to ilaenoay a sapalimoˈot: ‘Cecay a mihecaan kinatolo . . . o polong a faˈinayan iso tatayra i mipiliˈan no Kawas iso ci Yihofa a kitiraan midoko Cingranan.’ (Limoˈot 16:16) Tora a tatokian, o lomaˈ nangra ato papanayen awaay ko midipotay a tamdaw, kawra mikiˈokay ci Yihofa cangranan sanay: ‘Ano tayra kiso i kaˈayaw no Kawas iso ci Yihofaan to cecay a mihecaan to kinatolo a tatokian i, aawa ko miˈafasay to sera iso a tamdaw.’ (Kasadakan 34:24) O madimadiay midoko ci Yihofaan a Israil tamdaw pakayni pisarocod a mitadiˈec to Kawas, mansa to mihecahecaan tatayra i pisalisinan to lisin ni Yihofa. Mihaen ko demak nangra milifokay to taˈangayay a epoc, tinakoen matongalay ko kafanaˈ nangra to Rikec no Kawas, ira ko toki midotim to kangaˈay ni Yihofa, ngaˈayho malacafay to roma maolahay ci Yihofaan a tamdaw masasipakalalok. (Limoˈot 16:15) Misaˈicel kita mirienang to saˈopo no Krisciyang, wa ngaˈay milifok to malecaday a epoc. Haratengen hena, ano itini ˈayaw no mirienang to saˈopo misaday kita to kamotoˈay hanaca ciepocay a sapacaˈof, wa hakowa ko kalipahak ni Yihofa aki!

10. Romadiw to sapahemek to Kawas a radiw hano o kalimlaan a midokoay a demak?

¹⁰ Malacafay to salikaka romadiw to sapahemek to Kawas a radiw o midokoay ci Yihofaan. (ˈOlic 28:7) O romadiway to sapahemek to Kawas a radiw o kalimlaan i pidoko a demak sanay ko nolitengan a Israil tamdaw miharateng, hongti ci Tafiti miocoray to 288 Lifi a tamdaw misamacay itini fangcalay sefi a romadiw. (1 Rayray 25:1, 6-8) Anini wa ngaˈay kita pakayni romadiw to sapahemek to Kawas a radiw paihkal to olah ita to Kawas. Haratengen, ngaˈay anca cowa kangaˈay tengilen ko radiw cowa ko sakakaay kalimlaan. Haratengen hena, ano somowal kita i, ‘kinapinaay a mararaw,’ kawra cowa ka sawad sato kita somowal itini i saˈopo ato pitosilan. (Yakop 3:2) Mihaenay, soˈlin cowa kangaˈay tengilen ko radiw no niyah saan kita miharateng, o raromadiwho a pakahemek ci Yihofaan.

11. Mikitini ˈOlic 48:13, hano mamilimasmas kita to toki kalacafay to paro no lomaˈ minanam to Fangcalay Cudad hani?

¹¹ Micekiw kita to Fangcalay Cudad ato pasifanaˈ to wawa mafanaˈ ci Yihofaan o midokoay Cingranan. Itini Paselaˈan Romiˈad misawaday to tayal ko Israil tamdaw, misamacay patanektek to kalawidang aci Yihofaan. (Kasadakan 31:16, 17) Roma i, o madimadiay a Israil tamdaw pasifanaˈayho to wawa mafanaˈ ci Yihofaan, pasifanaˈ to wawa o ngaˈayay Cingra. Anini, o mamilimasmas kita to toki misongilaˈ micekiw to Kimad no Kawas, mihaen ko demak o midokoay ci Yihofaan, wa ngaˈay padama kitanan miingid Cingranan. (ˈOlic 73:28) Roma i, ano malacafay kita to paro no lomaˈ minanam to Fangcalay Cudad i, wa ngaˈay padama to teloteloc palahad to tangongolay a kalawidang to ciolahay a Wama i kakarayan.—ˈOsien ko ˈOlic 48:13.

12. Pakayni pisangaˈ to pakopangan ato roma dafong o fangcalay a tayal sanay ko pinengneng ni Yihofa, mikitini mananam ita ko maanan?

¹² Mipatireng kita ato mitomadaw to pidokoan a kitiraan o midokoay ci Yihofaan. Pakayni pisangaˈ to pakopangan ato roma dafong o fangcalay a tayal sanay ko pinengneng ni Yihofa. (Kasadakan 36:1, 4) Anini, o patirengay to Hongti Kitakit Kasaˈopoan ato roma pidokoan a kitiraan o fangcalay a tayal sanay ko pinengneng ni Yihofa. O roma salikaka mipalakay to adihayay a toki mirienang toniya tayal, tada miakoˈiday kita to mihadakan nangra a ˈicel pakayni i Hongti Kitakit. Manaokaniw mamirienang cangra to mitosilay a tayal, itini lalomaˈ nangra, o roma tamdaw makalimay malo misakafahay. Onini a malalokay a salikaka ano pangangan malo misakafahay i, ano matoor ko palinian, o malohemay malitengay ngangaˈay minilnil cangranan, cowa ko cacisasa ko harateng. Mihaen ko demak no malohemay malitengay, o midamaay to patirengay a tayal. Roma i, ano iraay anca awaay ko inaneng ita to patirengay a demak, o kahacecay tamdaw wa ngaˈay padama miasik ato mitomadaw to pidokoan a kitiraan.

13. Pakayni pakiyaho a midama to tayal no Hongti Kitakit, sasamaan ko pinengneng ita hani?

¹³ Pakiyaho kita midama to tayal no Hongti Kitakit o midokoay ci Yihofaan. Ano misalisin ko Israil tamdaw cowa kangaˈay wakawak saan tayra i ˈaˈayaw ni Yihofa. (Limoˈot 16:16) O mamitoor cangra to ˈicel no niyah patafang to dafong, pakayni ko pipaihkal to tada miakoˈiday cangra to kihcod a nano demak ni Yihofa cangranan. Ngaˈay kita samaan paihkal to maolahay kita ci Yihofaan, miakoˈid to kihcod a nano demak Ningra kitaanan hani? O cecay a pakayraan i, mitoor to ˈicel no niyah pakiyaho midama to kasakopang ato polong no hekal a tayal. Sowal ni Pawlo: ‘Salakat ira ko makahiay a falocoˈ no tamdaw, o sapatafang ningra wa mikiriwiˈ a palipahak to Kawas, hanaca o sapatafang ningra o kinaira ningra, cowa ko mipaciecian.’ (2 Korinto 8:4, 12) Ano adihayay anca mimingay ko sapakiyaho ita, ano mikitiniay i makahiay a falocoˈ, o mamasemer ci Yihofa.—Marko 12:42-44; 2 Korinto 9:7.

14. Mikitini Taneng 19:17, padama kita to iraay ko saali a salikaka i, samanay ko pinengneng ni Yihofa?

¹⁴ Padama kita to iraay ko saali a salikaka o midokoay ci Yihofaan. Mikiˈokay ci Yihofa to Israil tamdaw, hinapaladaˈ cangra micada to manikaway a finawlan o mamilifok to sapalemed Ningra. (Limoˈot 15:7, 10) Itini pinengneng ni Yihofa, o kahacecay noka padama ita to iraay ko saali a salikaka, o mahecaday o patelongay to dafong Cingranan. (ˈOsien ko Taneng 19:17.) Tinakoen, tiya mapalit ci Pawlo i, macadaay ko sapafeli no Filipi a kasakopang a sapatelong, oniya sapatelong o ‘micadaan no Kawas a sapatoˈaya’ sanay cingra, ‘tada palipahakay’ to Kawas. (Filipi 4:18) Ngaˈay kiso miharateng: “Ngaˈay kako padama to cima a salikaka i kasakopang hani?” Ano misaka dademak kita to toki, ˈicel, inaneng ato payci no niyah padama to iraay ko saali a salikaka, o mamahemek ci Yihofa. Itini pinengneng Ningra, mihaen ko demak ita o midokoay Cingranan.—Yakop 1:27.

15. Mirienang to matatodongay a pidoko mamihadak to toki ato ˈicel, hano cowa ko karetengay a ˈinorong konini hani?

¹⁵ Mirienang kita to matatodongay a pidoko, o mamihadak to toki ato ˈicel, kawra aka o karetengay a ˈinorong konini saan miharateng. (1 Yohani 5:3) Misamaanay hani? Samanen maolahay kita ci Yihofaan, makalimay midoko Cingranan. Haratengen hena, o cecay wawa makalimay pafeli to sapatelong i wama ningra. Adihayay ko mapalakay ningra a toki mikonis to coka, kawra cowa ko micoriyaˈay to toki no niyah saan cingra miharateng, samanen maolahay cingra to wama, mahemekay cingra mipalak to toki misaday to sapatelong. Malecaday, maolahay kita ci Yihofaan, mansa mihadak to toki ato ˈicel midoko Cingranan palipahakay kitaanan.

16. Mikitini Hipray 6:10, misaˈicel kita midoko ci Yihofaan i, samaanay ko pinengneng ni Yihofa hani?

¹⁶ O ciolahay a wama wina cowa ko hahalamham to kahacecay wawa pafeli cangranan to malecaday a sapatelong, cipinangay cangra to cowa ka lecalecad ko kahacecay a wawa, cowa ka lecad ko midemakan. Malecaday, o kakarayan Wama ita cipinangay to pakayraan no kahacecay tamdaw, mafanaˈay to cowa ka lecad ko midemakan no kahacecay tamdaw. Palalinien iso ko niyah to kafanaˈan iso a tamdaw alatek. Latekay mahapinangay iso ikakaay ko adihay no midemakan no niyah to ˈalomanay tamdaw. Kawra mahapinang iso alatek, pakayni mihecaan, pakayraan no tireng anca ˈinorong no paro no lomaˈ, o midemakan iso cowa ka lecad ko adihay to midemakan no tao. Toniya tatokian aka matoled! (Kalatiya 6:4) Cowa ko mamapawan ci Yihofa to midemakan iso a tayal. Ano paira kiso to matatodongay a araaw no falocoˈ, patafang to sangaˈayay no niyah Cingranan, o mamahemek Cingra. (ˈOsien ko Hipray 6:10.) Ihkalay ci Yihofa cipinang to kalim iso sapitongalaw to tayal saki Cingranan, hanaca makalimay Cingra tisowanan pakayni pisarocod a midemak lipahak ato marenec ko falocoˈ.

17. (1) Ano pasangaran nanay kita mirienang to roma midokoay a demak, sasamaan ko pidemak hani? (2) “ Matongal ko Lipahak Iso” onini a sapatongal lalakaw mitadtaday to cowa ka lecad a pakayraan i matatodongay a pidoko, tadtaden mikitini i cecay pakayraan malifokay iso ko maanan a epoc.

¹⁷ Ano pasangaran nanay kiso micekiw to Fangcalay Cudad, mirienang to mitosilay a tayal ato roma midokoay a demak i, sasamaan hani? Mahapinang ita alatek, ano mangalef ko picerid ita mirienang tonini a demak mamangalef ko hemek, mamatongal ko malifokay a epoc. Tinakoen, ano latekay aca kita mionto anca midatok to onkak, pasangar a macakat. Kawra ano mihatatanam kita to romiˈamiˈad, satapang aca kamotoˈay ko toki, ikorto palidlid han mitongal ko toki, cowa ko mamalecad ko pakayraan. Ano maˈaraw ita ciepocay ko mihadakan no niyah a toki, wa halamham to kahacecay a pihatatanam, hanaca mamalifok ko lipahak. Mahapinangay iso wa ngaˈay kita samaan tano malecaday a pakayraan misaka dademak i midokoay a demak han?

18. Sasamaan ko pidemak ita, ngaˈ ira ko epoc no kaˈorip? Mihaen ko demak papaira to maanan a sapalemed?

¹⁸ O tatodong no kaˈorip ita pakayniay i pisarocod midoko ci Yihofaan. Mihaen ko demak ita wa ngaˈay marenec a lipahak ko kaˈorip, papaira to hatokel tahadaˈoc midoko Cingranan. (Taneng 10:22) Roma i, mafanaˈay kita papadamaen ni Yihofa ko finawlan Ningra miremo to masakenaay a pasangaray, onini paparihaday to falocoˈ ita. (Isaya 41:9, 10) Ngaˈay midoko ci Yihofaan soˈlinay palipahak kitanan! O ciolahay a Wama Cingra, o kahacecay tamdaw mamikangodo ato pakahemek Cingranan.—Paˈarawan 4:11.