1-2. ?Wanem bambae i mekem i se Jehova i glad long wosip blong yumi?

 ?YU YU tingbaot wanem, taem yu harem tok ya “wosip”? Maet yu stap tingbaot wan brata we i nildaon long saed blong bed blong hem, mo i stap prea long Jehova bifo we hem i slip. O maet yu tingbaot wan famle we oli joen gud blong stadi Baebol.

² Olgeta evriwan ya oli mekem samting we i joen wetem fasin blong wosip. ?Olsem wanem? ?Jehova bambae i akseptem wosip blong olgeta? Bambae hem i akseptem, sipos samting we oli mekem i laenap wetem tingting blong hem, mo oli lavem mo respektem hem. Yumi lavem Jehova tumas. Yumi save se i stret nomo blong yumi wosipim hem, mo yumi wantem wosipim hem long rod we i beswan.

3. ?Bambae yumi tokbaot wanem long stadi ya?

³ Long stadi ya, bambae yumi tokbaot se bifo Jehova i akseptem wanem kaen wosip, mo eit rod we Jehova i wantem se yumi folem blong wosipim hem tede. Taem yumi stap tokbaot ol samting ya, i gud yumi wanwan i luk olsem wanem yumi save kam gud moa long fasin blong yumi blong wosipim Jehova. Mo tu bambae yumi luk se taem yumi wosipim Jehova long rod we i stret, bambae yumi glad.

4. ?Olsem wanem ol man blong Jehova long taem bifo oli soemaot se oli respektem mo lavem Jehova?

⁴ Long taem bifo, ol gudfala man olsem Ebel, Noa, Ebraham, mo Job oli soem se oli respektem mo lavem Jehova. ?Olsem wanem oli soemaot samting ya? Hemia taem oli obei long God, oli bilif long hem, mo oli mekem ol sakrefaes i go long hem. Baebol i no tokbaot evri samting we oli mekem blong  wosipim Jehova. Be i klia se oli mekem bes blong olgeta blong ona long Jehova, mo Jehova i akseptem wosip blong olgeta. Samtaem biaen, Jehova i givim Loa blong hem long ol man Isrel tru long Moses. Ol loa ya oli tokbaot plante rul long saed blong samting we Jehova i wantem blong oli mekem blong wosipim hem.

5. ?Jehova i wantem se ol Kristin oli wosipim hem olsem wanem?

⁵ Afta we Jisas i ded mo i laef bakegen, Jehova i no moa ekspektem ol man blong oli wosipim hem folem loa we hem i givim long ol man Isrel. (Rom 10:4) Ol Kristin oli sud folem niufala loa, hemia “loa blong Kraes.” (Gal. 6:2) Oli save obei long “loa” ya, taem oli folem eksampol blong Jisas mo ol tijing blong hem, be i no blong lanem baehat wan longfala lis blong ol samting we oli mas mekem mo oli no mas mekem. Tede tu ol Kristin oli mekem bes blong olgeta blong folem Kraes, mekem Jehova i glad, mo “harem gud long laef” blong olgeta.—Mat. 11:29.

6. ?Stadi ya bambae i givhan long yumi olsem wanem?

⁶ Taem yumi tokbaot ol samting we yumi mas mekem long wosip blong yumi, i gud yu askem se: ‘?Mi mi mekem sam samting finis blong kam gud moa? ?Mi save kam gud moa long fasin blong mi blong wosip?’ Yu save glad long wanem we yu stap mekem naoia, be i gud yu askem Jehova tu blong i halpem yu blong luksave samting we yu nid blong mekem blong kam gud moa.

7. ?Jehova i tingbaot prea we yumi mekem long fulhat blong yumi se i olsem wanem?

⁷ Yumi wosipim Jehova, taem yumi prea long hem. Baebol i talem se ol prea blong yumi oli olsem insens we oli rerem gud blong givim i go long Jehova long tabenakel, mo samtaem biaen long tempol. (Sam 141:2) Insens ya i gat wan gudfala smel we i mekem Jehova i glad. Long sem fasin, taem yumi prea long fulhat blong yumi, hemia i mekem Jehova “i glad,” nating sipos yumi yusum ol toktok we oli simpol nomo. (Prov. 15:8; Dut. 33:10) Yumi sua se Jehova i glad blong harem we yumi talem tangkiu long hem, mo soemaot se yumi lavem hem. Hem i wantem we yumi talemaot long hem ol wari blong yumi, mo ol samting we yumi wantem mo laekem. Taswe, bifo yu prea long Jehova, i gud yu tekem taem blong tingting gud long samting we bambae yu talem. Sipos yu mekem olsem, bambae yu givim beswan “insens” long Papa blong yu long heven.

8. ?Wanem nambawan rod blong presem God?

⁸ Yumi wosipim Jehova, taem yumi presem hem. (Sam 34:1) Yumi presem Jehova taem yumi talemaot ol wok mo ol fasin blong hem long ol narafala. Sipos yumi glad from ol samting we Jehova i mekem, bambae yumi glad blong presem hem. Taem yumi tingbaot ol gudfala samting we Jehova i mekem blong yumi, bambae yumi gat plante risen blong presem hem. Taem yumi prij, hemia wan gudfala taem blong “yusum lips blong yumi blong talemaot nem blong God long ol narafala man, hemia i olsem wan sakrefaes we yumi givim i go long hem blong presem hem.” (Hib. 13:15) Yumi tingting gud long samting we bambae yumi talem, bifo we yumi prea long Jehova. Long sem fasin, yumi mas tingting gud long samting we bambae yumi talem, bifo we yumi storian wetem ol man long wok blong prij. Yumi wantem se ‘sakrefaes we yumi givim i go Jehova blong presem’ hem i mas beswan. Hemia nao from wanem yumi talemaot samting we i stap long hat blong yumi, taem yumi prij.

9. Olsem ol man Isrel bifo, ?yumi kasem wanem taem yumi joen long ol miting? Tokbaot olsem wanem ol miting oli halpem yu.

 ⁹ Yumi wosipim Jehova, taem yumi go long ol miting. Bifo, Jehova i talem long ol man Isrel se: “Evriwan we oli man, oli mas kam long fored blong Jehova we i God blong yu long ples ya we hem i jusumaot. Bambae oli mekem olsem tri taem long wan yia.” (Dut. 16:16) Oli mas lego haos mo garen blong olgeta we i no gat man blong lukaotem. Be Jehova i promes se: “Bambae i no gat man i wantem kantri blong yufala taem yufala i go long fored blong Jehova we i God blong yufala.” (Eks. 34:24) Ol man Isrel oli trastem Jehova fulwan, taswe oli go long ol lafet ya we oli mekem evri yia, mo oli kasem plante gudfala samting. Eksampol, oli lanem moa long saed blong ol Loa blong Jehova, oli lanem olsem wanem Jehova i stap mekem i gud long olgeta, mo oli harem gud blong joen wetem ol narafala we oli lavem Jehova. (Dut. 16:15) Tede tu, yumi kasem plante gudfala samting taem yumi traehad blong go long olgeta miting. Mo Jehova i glad tumas taem hem i luk we yumi rerem gud ol miting blong yumi mo givim ol gudfala ansa.

10. ?Olsem wanem yumi save se singsing i wan impoten haf blong wosip?

¹⁰ Yumi wosipim Jehova, taem yumi joen blong singsing. (Sam 28:7) Long taem blong ol man Isrel bifo, singsing i wan impoten haf blong wosip blong olgeta. Hemia nao from wanem King Deved i jusumaot 288 Livaet, blong oli kam ol man blong singsing long tempol. (1 Kron. 25:1, 6-8) Tede, yumi save soemaot lav blong yumi long God, taem yumi singsing blong presem hem. Yumi no mas harem nogud sipos yumi no gat gudfala voes. Traem tingbaot: Taem yumi toktok, “yumi evriwan i stambol plante taem,” be hemia i no stopem yumi blong toktok insaed long kongregesen mo wok blong prij. (Jem. 3:2) Long sem fasin, yumi save presem Jehova nating sipos yumi ting se yumi no save singsing gud.

11. Folem Ol Sam 48:13, ?from wanem yumi mas makemaot taem blong stadi Baebol wetem famle blong yumi?

¹¹ Yumi wosipim Jehova, taem yumi stadi long Tok blong hem mo yumi tokbaot hem long ol pikinini blong yumi. Long sabat dei, ol man Isrel oli no wok mo oli yusum dei ya blong mekem frensip blong olgeta wetem Jehova i kam strong moa. (Eks. 31:16, 17) Mo tu, oli tijim ol pikinini blong olgeta long saed blong Jehova mo ol fasin blong hem. Tede tu, yumi mas tekem taem blong ridim mo stadi long Tok blong God. Hemia i wan haf blong wosip we yumi mekem i go long Jehova, mo i halpem yumi blong kam klosap long hem. (Sam 73:28) Taem yumi stadi tugeta olsem wan famle, yumi stap halpem ol pikinini blong oli frengud wetem Papa blong yumi long heven we i lavem yumi.—Ridim Ol Sam 48:13.

12. ?Wanem tingting blong Jehova long ol man we oli wokem ol samting long tabenakel mo yumi lanem wanem from?

¹² Yumi wosipim Jehova, taem yumi bildim mo lukaot gud long ol ples blong wosip. Baebol i talem se wok blong bildim tabenakel mo ol samting blong hem, oli ol “tabu wok.” (Eks. 36:1, 4) Tede tu, Jehova i luk wok blong bildim ol Haos Kingdom mo ol narafala tiokratik bilding, olsem wan haf blong wosip blong yumi. Sam brata mo sista oli spenem plante taem blong mekem ol wok ya. Yumi glad tumas long ol gudfala wok blong Kingdom we oli mekem. Mo tu oli stap joen long wok blong prij. Maet samfala long olgeta oli wantem kam paenia. Ol elda oli save soemaot se oli sapotem wok blong konstraksen, taem  oli letem ol brata mo sista we oli naf, blong oli mekem wok blong paenia. Nating se yumi gat gudhan blong wok long konstraksen o nogat, be yumi evriwan i gat wok ya blong kipim ol bilding ya oli stap klin, mo lukaot gud long olgeta.

13. ?Yumi mas gat wanem tingting long ol presen mane we yumi givim blong sapotem wok blong Kingdom?

¹³ Yumi wosipim Jehova, taem yumi givim presen mane blong sapotem wok blong Kingdom. Long taem blong ol lafet, ol man Isrel oli no mas kam emti han long fored blong Jehova. (Dut. 16:16) Oli mas karem ol presen we oli naf blong givim. Long rod ya, oli soem tangkiu blong olgeta long Jehova from ol samting we hem i mekem blong givhan long olgeta long saed blong spirit. ?Olsem wanem yumi save soem lav mo tangkiu blong yumi long Jehova from ol samting long saed blong spirit we hem i givim long yumi? Wan rod, sipos yumi naf, yumi save givim presen mane blong sapotem kongregesen blong yumi mo wok blong prij long ful wol. Aposol Pol i talem se: “Sipos man i glad nomo blong givim presen long narafala, folem samting we hem i gat, be i no samting we hem i no gat, presen ya i gud moa.” (2 Kor. 8:4, 12) Jehova i glad tumas taem yumi givim samting we yumi naf blong givim, nating se i smol nomo.—Mak 12:42-44; 2 Kor. 9:7.

14. Folem Ol Proveb 19:17, ?wanem tingting blong Jehova taem yumi halpem ol brata sista we oli gat nid?

¹⁴ Yumi wosipim Jehova, taem yumi halpem ol brata sista we oli gat nid. Jehova i promes blong blesem ol man Isrel we oli givim samting long ol puaman. (Dut. 15:7, 10) Yes, evritaem we yumi halpem wan brata o sista we i gat nid, Jehova i luk samting ya olsem wan presen we yumi givim i go long Hem. (Ridim Ol Proveb 19:17.) Eksampol, taem ol Kristin long Filipae oli sanem ol presen i go long Pol taem i stap kalabus, hem i talem se ol presen ya oli olsem ol “sakrefaes we God i glad long hem.” (Fil. 4:18) Tingbaot olgeta long kongregesen blong yu mo askem se: ‘?I gat wan man we mi save halpem hem?’ Jehova i glad tumas taem yumi yusum taem, paoa, gudhan, mo olting blong yumi blong halpem olgeta we oli gat nid. Hem i luk samting ya olsem wan haf blong wosip blong yumi.—Jem. 1:27.

15. Tru wosip i nidim taem mo paoa, ?be from wanem i no had tumas blong mekem?

¹⁵ Tru wosip i nidim taem mo paoa. Be i no had tumas blong mekem. (1 Jon 5:3) ?From wanem? From lav nao i pusum yumi blong wosipim Jehova. Traem tingbaot wan smol pikinini we i wantem givim wan samting long papa blong hem. Maet hem i spenem plante aoa blong droem wan pija blong givim long hem, mo i no rigret from. Hem i lavem papa blong hem, mo hem i glad blong givim presen ya long hem. Long sem fasin, from we yumi lavem Jehova, yumi glad blong yusum taem mo paoa blong yumi blong wosipim hem.

16. Folem Hibru 6:10, ?wanem filing blong Jehova long samting we yumi wanwan i naf blong mekem?

¹⁶ Ol perens we oli gat lav, oli no ekspektem ol pikinini blong olgeta blong givim ol presen we i sem mak. Oli luksave se wanwan pikinini i defren mo samting we oli naf blong mekem i no sem mak. Long sem fasin, Papa blong yumi long heven i kasemsave samting we yumi wanwan i naf blong mekem. Maet yu yu save mekem moa long ol narafala o maet yu no save mekem moa from we yu olfala, yu sik, o yu gat sam responsabiliti long famle. Be tingting blong yu i no mas foldaon. (Gal.  6:4) Jehova bambae i no fogetem ol wok blong yu. Sipos yu mekem bes blong yu, mo yu mekem wetem wan tingting we i stret, Jehova bambae i glad long yu. (Ridim Hibru 6:10.) Hem i save gud samting we yu laekem blong mekem. Hem i wantem se yu glad long wanem samting we yu mekem blong wosipim hem.

17. (1) ?Yumi save mekem wanem sipos yumi faenem i had blong mekem sam samting long wosip blong yumi? (2) ?Wanem i halpem yu blong mekem wan long ol samting long bokis ya “ Kasem Moa Glad”?

¹⁷ ?Yumi save mekem wanem sipos i had blong mekem sam long ol samting ya we yumi jes tokbaot, olsem stadi Baebol o prij? Sipos yumi gohed blong mekem ol samting ya oltaem, bambae yumi laekem olgeta moa, mo bambae oli givhan bigwan long yumi. Fasin blong yumi blong wosip i sem mak long fasin blong eksasaes, o lanem blong plei long wan instramen. Sipos yumi mekem eksasaes o plei long instramen ya wanwan taem nomo, bambae yumi no kam gud nating. ?Be olsem wanem sipos yumi traem blong mekem evri dei? Maet long stat, yumi mekem blong sam minit nomo, be sloslo bambae yumi mekem longtaem moa. Mo taem yumi luk gudfala frut i kamaot from traehad blong yumi, bambae yumi glad mo yumi wantem mekem samting ya moa. Hemia i sem mak long wosip blong yumi.

18. ?Wanem impoten samting we yumi save mekem, mo wanem bambae i hapen sipos yumi mekem?

¹⁸ Impoten samting we yumi save mekem, hemia blong mekem bes blong yumi blong wosipim Jehova. Sipos yumi mekem olsem, bambae yumi harem gud long laef blong yumi mo yumi gat hop ya blong wosipim Jehova olwe. (Prov. 10:22) Yumi gat pis from yumi save se Jehova i stap halpem ol man blong hem we oli stap fesem ol problem. (Aes. 41:9, 10) Yumi gat plante risen blong stap glad blong wosipim Papa blong yumi we i lavem yumi mo we i stret nomo blong hem i ‘kasem glori mo ona’ from hem i wokem olgeta samting.—Rev. 4:11.