1-2. Kai si erban meriah ukur Dibata sanga sisembah Ia?

 KAI nge si ukurindu sanga begindu kata “nembah”? Banci saja bayangkenndu lit sekalak turang senina si sujud i deher ingan medemna guna ertoto. Ntah, bayangkenndu sada keluarga si tutus atena mpelajari Pustaka.

² Duana si bayangkenndu ndai termasuk bagin arah nembah Dibata. Aloken Jahwe nge kai si ilakoken kalak ndai? Nggit Jahwe ngalokenca adi sesuai ras peratenNa janah adi keleng atena Jahwe ras ergaiNa Ia. Keleng kel ateta Jahwe. Siteh maka Ia ngenca si patut sisembah janah sibereken ateta si mehulina bas nembah Ia.

3. Kai kari sibahas bas artikel enda?

³ Bas artikel enda, sibahas kari cara nembah Jahwe si ngena ateNa bas jaman si nai, bage pe waluh cara si ngena ateNa bas jaman si gundari. Sanga sibahas kari kerna si e, banci siukuri uga carana gelah reh ulina kita bas nembah Jahwe. Sibahas ka kari engkai maka nembah Jahwe alu cara si benar erban meriah ukurta.

4. Sope reh Jesus ku doni, kai si ilakoken kalak si nembah Jahwe guna mbuktiken maka keleng atena Jahwe ras ergaina Ia?

⁴ Sope reh Jesus ku doni, dilaki-dilaki si setia bagi Abil, Nuah, Abraham, ras Jop enggo mbuktiken maka keleng  ate kalak e Jahwe ras ergaina Ia. Uga carana? Patuh kalak e man Dibata, tek kalak e man baNa, janah bereken kalak e persembahen man baNa. Labo lit ituriken bas Pustaka kai saja si ilakoken kalak e. Tapi, arah kai si ilakoken kalak e terbukti maka bereken kalak e si mehulina bas nembah Jahwe, janah nggit Jahwe ngalokenca. Bas pudi wari, ibereken Jahwe Undang-Undang Musa man kalak Israel. Bas Undang-Undang e, melala petunjuk kerna cara nembah Jahwe bagi si ngena ateNa.

5. Kai si berubah bas cara nembah Jahwe kenca kematen ras kekeken Jesus?

⁵ Kenca kematen ras kekeken Jesus, lanai arapken Jahwe umatNa arus patuh man Undang-Undang Musa. (Rom. 10:4) Tapi, kalak Kristen arus ngikutken undang-undang si mbaru eme “undang-undang Kristus.” (Gal. 6:2) Patuh kalak e man “undang-undang” e, alu ngusih Jesus ras ndalanken kai si ajarkenna. Labo arus ihapal kalak e undang-undang e ntah pe ikutkenna mbue aturen. Gundari pe, kalak Kristen ngelakoken si mehulina bas ngikutken Kristus gelah banci meriah ukur Jahwe ras “terpegegehi” kalak e.​—Mat. 11:29.

6. Uga carana gelah sidat manpaat arah artikel enda?

⁶ Sanga sibahas kari waluh bagin i bas nembah Jahwe, ukurilah penungkunen enda: ‘Kemajun kai nge si enggo kuban bas bagin enda?’ Janah, ‘Banci denga nge kuban reh ulina bas bagin enda?’ Amin pe enggo meriah ukurndu ngidah kai si enggo ilakokenndu sedekah enda, perlu denga pindondu penampat Jahwe gelah tehndu bas bagin si apai si banci denga banndu reh ulina.

7. Uga perasan Jahwe ngidah totota si ipeseh arah ukurta nari?

⁷ Sisembah Jahwe sanga ertoto kita man baNa. Bas Pustaka, totota ipeseri ras kemenyan si isikapken alu mehuli si ipersembahken bas kemah ingan ersembah, bas pudi wari bas rumah pertoton. (Ms. 141:2) Meriah ukur Dibata perban bau kemenyan e. Bage ka pe, toto si ipeseh arah ukurta nari “ngena ateNa,” amin pe labo kita beluhsa ertoto. (Kua. 15:8; Ul. 33:10) Tek kel kita maka meriah ukur Jahwe sanga situriken uga kekelengenta ras pengerganta man baNa. AteNa gelah situriken min kai si erban latih ukurta bage pe sura-surata. Sope ertoto kita man Jahwe, mehuli kang adi siukuri lebe kai ateta sikataken. Adi bage siban, sibereken me toto si bali bagi “kemenyan” si mehulina man Bapakta si i surga.

8. Kesempaten kai si lit bas kita guna muji Dibata?

⁸ Sisembah Jahwe sanga sipuji Ia. (Ms. 34:1) Adi siceritaken sipat-sipat Jahwe si luar biasa ras perbahanenNa man kalak si deban, e buktina sipuji Jahwe. Adi siergai Jahwe, melala si banci siceritaken kerna Ia. Adi siban waktuta guna ngukuri sipat-sipat Jahwe, eme kerina si enggo ilakokenNa man banta, pasti melala alasenta guna muji Ia. Dahin erberita me salah sada kesempaten si mehuli man banta guna ‘mereken korban pujin man Dibata, eme kata-kata si rehna arah babahta nari.’ (Heb. 13:15) Sope ertoto, siukuri lebe kai ateta sikataken man Jahwe. Bage ka pe sanga erberita, siukuri lebe kai ateta sikataken man kalak si deban.  Ateta min gelah “korban pujin” si mejilena sibereken. E me sebapna tutus ateta sanga kita erberita.

9. Bali bagi kalak Israel si mbarenda, kai manpaat si banci sidat arah perpulungen? Ceritaken pengalamenndu.

⁹ Sisembah Jahwe sanga reh kita ku perpulungen. Lit perentah man kalak Israel si mbarenda si isina bagenda: “Telu kali setahun, kerina dilaki arus reh ku lebe-lebe Jahwe Dibata kena bas ingan si pilihNa.” (Ul. 16:16) Arus itadingken kalak e rumahna ras jumana janah la lit si njagasa. Tapi erjanji Jahwe man kalak e, “Ise pe pagi la lit si merhat muat daerah kena sanga ngadap kena man Jahwe.” (Kel. 34:24) Tek kel kalak Israel man Jahwe, emaka tiap tahun reh kalak e ku perayan-perayan. Melala manpaat si banci dat kalak e. Contohna, banci kalak e erlajar terbuen kerna Undang-Undang Dibata. Banci ukuri kalak e uga ulina Jahwe man kalak e. Banci ka kalak e mpegegehi sada ras si debanna. (Ul. 16:15) Kita pe banci sidat manpaat si seri adi siusahaken reh ku perpulungen. Pasti meriah ukur Jahwe adi sibereken komentar si singkat si enggo sipersiapken alu mehuli.

10. Engkai maka rende termasuk bagin si penting bas nembah Jahwe?

¹⁰ Sisembah Jahwe sanga ikut kita rende. (Ms. 28:7) Teh kalak Israel maka rende termasuk bagin si penting bas nembah Jahwe. Ipilih Raja Daud 288 kalak Lewi jadi penyanyi bas rumah pertoton. (1 Kro. 25:1, 6-8) Gundari pe, banci sicidahken kekelengenta man Dibata sanga rende kita muji Ia. Labo arus mejile sorata gelah banci kita rende muji Jahwe. Cuba ukuri enda: Sanga kita ngerana, ‘rusur kita erban salah,’ tapi e labo erban kita ngadi ngerana bas perpulungen bage pe sanga erberita. (Jak. 3:2) Bage ka pe, amin pe labo mejile sorata rende, ula min kita ngadi rende muji Jahwe.

11. Bagi si ikataken bas Masmur 48:13, engkai maka perlu siban waktuta guna ibadah keluarga?

¹¹ Sisembah Jahwe sanga sipelajari Pustaka ras siajarken man anak-anakta. Bas wari Sabat, kalak Israel la erdahin. Banci ipake kalak e wari e guna mpegegehi hubungenna ras Jahwe. (Kel. 31:16, 17) Kalak Israel si setia, ajarkenna man anak-anakna kerna Jahwe ras perbahanenNa. Gundari pe, perlu siban waktuta guna mbaca ras mpelajari Kata Dibata. Enda bagin arah nembah Jahwe janah e banci nampati kita reh rembakna ras Ia. (Ms. 73:28) Sanga sipelajari Pustaka radu ras keluargata, banci sisampati anak-anakta gelah reh rembakna ras Bapakta si perkeleng si lit i surga.​—Baca Masmur 48:13.

12. Kai si banci sipelajari arah perukuren Jahwe kerna kalak si erban barang-barang bas kemah ingan ersembah?

¹² Sisembah Jahwe sanga sibangun ras sijaga ingan guna nembah Ia. Bas Pustaka, ikataken maka dahin erban kemah ingan ersembah ras isina eme “dahin si badia.” (Kel. 36:1, 4) Gundari pe, dahin pembangunen Bale Kerajan ras bangunen si debanna si ipake guna nembah Jahwe, ianggapNa dahin si badia. Melala kel waktu si ipake piga-piga turang seninata guna ngelakoken pendahin e. Pasti siergai kel kerja keras kalak e. Selain si e, kalak e pe ikut ka bas dahin erberita. Piga-piga arah kalak e banci saja merhat jadi perintis. Pertua-pertua bas runggun banci ndukung proyek pembangunen alu  ngelantik kalak e jadi perintis adi ncukupi syarat. La soal kita beluh bas dahin pembangunen ntah lang, kerina kita banci ikut njaga ingan guna nembah Jahwe tetap bersih ras mejile.

13. Engkai maka nggit kita mereken sumbangen guna ndukung pendahin Kerajan?

¹³ Sisembah Jahwe sanga sidukung pendahin Kerajan alu mereken sumbangen. Sanga kalak Israel reh ku perayan-perayan, arus baba kalak e pemere man Jahwe. (Ul. 16:16) Ibereken kalak e sumbangen sesuai ras kengasupenna. Alu cara e, ibuktiken kalak e maka ergaina kerina si ilakoken Jahwe man bana. Gundari, uga carata mbuktiken kekelengenta man Jahwe ras pengerganta man kerina si enggo lakokenNa man banta? Salah sada carana eme alu mereken sumbangen guna ndukung runggunta bage pe pendahin sebelang doni sesuai ras kengasupenta. Bagenda nina Rasul Paulus kerna si e, “Meriah ukur Dibata adi sekalak jelma mere alu ukur meriah, perban arapken Dibata gelah kalak mere sesuai ras kai si lit bas ia, labo si la lit bas ia.” (2 Kor. 8:4, 12) Meriah kel ukur Jahwe ngaloken sumbangenta la soal asa kai buena.​—Mrk. 12:42-44; 2 Kor. 9:7.

14. Bagi si ikataken bas Kuan-kuanen 19:17, uga perasan Jahwe sanga sisampati turang senina si merluken penampat?

¹⁴ Sisembah Jahwe sanga sisampati turang senina si merluken penampat. Erjanji Jahwe man kalak Israel maka melala berekenNa pasu-pasu adi isampati kalak e kalak mesera. (Ul. 15:7, 10) Payo, tiap sisampati turang seninata si merluken penampat, ianggap Jahwe e pemere man baNa. (Baca Kuan-kuanen 19:17.) Contohna, sanga ibereken kalak Kristen i Pilipi pemere man Paulus si sangana ipenjaraken, ikatakenna e “korban si merim janah ngena ate Dibata.” (Pil. 4:18) Cuba siukuri turang senina si lit bas runggunta, banci saja lit si merluken penampat. Meriah ukur Jahwe adi sigunaken waktuta, gegehta, kengasupenta, ras ertata guna nampati kalak si merluken penampat. IanggapNa e bagin bas nembah Ia.​—Jak. 1:27.

15. Engkai maka labo mberat nembah Jahwe amin pe perlu waktu ras usaha?

¹⁵ Perlu waktu ras usaha nembah Jahwe, tapi labo mberat ngelakokenca. (1 Joh. 5:3) Engkai maka bage? Sebap keleng ateta Jahwe. Cuba bayangken anak-anak si berena atena gambar man bapakna. Banci saja, mbue waktuna guna erban gambar e. Tapi labo kapna dalih, perban keleng kel atena Bapakna janah meriah ukurna mereken hadiah e. Bage ka pe, perban keleng ateta Jahwe, meriah ukurta nggunaken waktu ras gegehta guna nembah Ia.

16. Bagi si ikataken bas Heber 6:10, uga perasan Jahwe ngidah usahata erban meriah ukurNa?

¹⁶ Orang tua si perkeleng, tehna maka labo seri kengasupen anak-anakna. Emaka, labo arapkenna seri kerina pemere kalak e. Bage ka pe Bapakta si i surga, tehNa maka labo seri kengasupenta sekalak-sekalak. Banci saja buen si banci silakoken asangken kalak si deban ntah la banci silakoken bagi kalak e perban umurta, kesehatenta, ntah pe tanggung jawapta bas keluarga. Tapi ula kitik ukurta. (Gal. 6:4) Labo lupaken Jahwe kerina si enggo silakoken. Adi tetap  sibereken si mehulina man baNa ras benar alasenta ngelakokenca, pasti meriah ukurNa. (Baca Heber 6:10.) Bas pusuhta denga pe lit sura-surata guna ngelakoken si mehuli, enggom iteh Jahwe. AteNa min meriah ukurta ras puas siakap sanga sisembah Ia sesuai ras kengasupenta.

17. (a) Kai si banci silakoken adi mesera siakap ngelakoken piga-piga bagin bas nembah Dibata? (b) Ceritaken kai gunana man bandu perban enggo dalankenndu salah sada si lit bas kotak “Si Nambahi Keriahen Ukurta.”

¹⁷ Uga adi mesera siakap ndalanken piga-piga bagin bas nembah Jahwe, bagi erlajar Pustaka ras erberita? Banci sicubaken reh rusurna ngelakoken kegiaten e, alu bage reh riahna siakap ras reh buena sidat manpaatna. Banci siumpamaken, nembah Dibata e bagi latihen olahraga ntah pe main sada alat musik. Adi jarang kita latihen, la kita banci beluh. Tapi uga adi tiap wari kita latihen? Tangtangna kentisik lebe kita latihen, tapi dungna reh dekahna. Sanga siidah hasil si mehuli arah usahata e, banci saja semangat kita neruskenca ras meriah siakap. Bage ka me si banci silakoken bas nembah Dibata.

18. Kai si pentingna si banci silakoken, ras kai hasilna?

¹⁸ Si pentingna si banci silakoken eme mereken si mehulina bas nembah Jahwe. Adi bage siban, meriah ukurta, puas siakap, ras lit arapenta guna nembah Jahwe seh rasa lalap. (Kua. 10:22) Sanga lit masalahta, banci tetap dame pusuhta perban siteh maka pasti lalap sampati Jahwe kita. (Jes. 41:9, 10) Pasti lalap lit alasenta ermeriah ukur sanga sisembah Bapakta si i surga si metunggung “ngaloken kemulian, ras kehamaten” arah kerina ciptanNa!​—Ket. 4:11.