1-2. Wen Jehoava hapi wid wi wership?

 WEH yoo tink bowt wen yu hyaa di werd “wership”? Maybi yu tink bowt wahn brada weh di neel dong fi pray tu Jehoava bifoa ih goh sleep. Er maybi yu tink bowt wahn hapi famili weh di injai dehn famili wership.

² Eena dehn too egzampl, dehn di wership Jehoava eena difrent wayz. Yu tink Jehoava wahn aksep dehn wership? Af koars hihn wahn aksep it, az lang az da akaadn tu fi hihn perpos ahn dehn du it wid lov ahn rispek fi hihn. Wee lov Jehoava wahn lat. Wi noa dat hihn dizerv wi wership an wi waahn wership ahn eena di bes way pasabl.

3. Weh wi wahn diskos eena dis aatikl?

³ Eena dis aatikl, wi wahn laan bowt di kaina wership weh Jehoava mi aksep eena Baibl taimz, ahn wi wahn diskos ayt wayz how Jehoava waahn wi wership ahn tudeh. Az wi du dat, wi waahn tink bowt how wi ku du beta eena di way how wi wership Jehoava. Wi wahn aalso si sohn reezn wai wi feel hapi wen wi wership Jehoava eena di rait way.

4. How di peepl weh mi wership Jehoava bifoa Jeezas mi kohn pahn ert mi shoa dat dehn lov ahn rispek Jehoava?

⁴ Eena Baibl taimz, faytful man laik Aybl, Noawa, Aybraham, ahn Joab mi shoa dat dehn lov ahn rispek Jehoava.  How dehn mi du dat? Dehn mi obay Gaad, dehn mi ga fayt eena ahn, an dehn mi aafa sakrifais tu ahn. Di Baibl noh tel wi bowt evriting weh dehn mi haftu du, bot fi shoar dehn mi du dehn bes fi aana Jehoava ahn hihn mi aksep dehn wership. Layta, Jehoava, mi gi di Laa tu di Izrelaits chroo Moaziz. Dehndeh laa mi gat een wahn lata roolz bowt how hihn mi waahn dehn wership ahn.

5. How Jehoava mi waahn Jeezas falowaz wership Hihn afta Jeezas mi ded ahn rezorek?

⁵ Afta Jeezas mi ded ahn geh rezorek, Jehoava neva ekspek ih peepl fi wership ahn bays pahn di Laa weh ih mi gi di Izrelait dehn. (Roam. 10:4) Kristyanz mi fi fala wahn nyoo laa, “di laa a di Krais.” (Gal. 6:2) Dehn neva obay dis “laa” di fala lata roolz, bot dehn mi fala Jeezas egzampl ahn fi hihn teechinz. Tudeh, Kristyanz du dehn bes fi fala Krais soh dat dehn ku pleez Jehoava ahn “fain res” fi dehnself.—Mach. 11:29.

6. How wi ku benifit fahn dis aatikl?

⁶ Az wi kansida eech way how Jehoava waahn wi wership ahn, aks yuself dehnya kweschan: ‘Ai mek eni proagres eena mi wership tu Jehoava?ʼ Yu ku aalso aks yuself ‘Ai ku du beta eena di way Ah wership Jehoava?ʼ Yu shuda bee hapi wid di proagres weh yu di mek now, bot yu aalso shuda aks Jehoava fi help yu si weh yu ku du beta.

7. How Jehoava feel wen wi pray tu ahn fahn wi haat?

⁷ Wi wership Jehoava wen wi pray tu ahn. Di Baibl kompyaa wi pryaa tu insens weh geh pripyaa an aafa op da di tabernakl, ahn laytaraan da di templ. (Ps. 141:2) Da insens ga wahn smel weh pleez Jehoava. Saym way soh, hihn “pleez” wid wi pryaaz weh kohn fahn wi haat, eevn if wi yooz kaman werdz. (Prov. 15:8; Deut. 33:10) Now wi noa wai Jehoava waahn wi tel ahn humoch wi lov ahn, an dat wi tankful tu ahn. Hihn waahn wi tel ahn weh di bada wi, weh wi di hoap fa, ahn di tingz weh wi waahn. Bifoa wi pray tu Jehoava wi waahn tink bowt weh wi wahn seh. If wi du dat, wi wahn di aafa di bes “insens” tu wi hevnli Faada.

8. Weh gud apachooniti wi ga fi prayz Gaad?

⁸ Wi wership Jehoava wen wi prayz ahn. (Ps. 34:1) Wi prayz Jehoava wen wi tel adaz humoch wi lov an admaiya fi hihn wandaful kwalitiz an ih werk. Wi wahn ga wahn lata gud tingz fi seh bowt Jehoava if wi tankful tu ahn. Wen wi tek di taim fi tink bowt aal di gud tingz weh Jehoava don du fi wi, wi wahn ga lata gud reezn fi prayz ahn. Wen wi preech, da wahn gud apachooniti fi mek wi “prayz Gaad . . . wid di werdz weh kom owta wi mowt.” Dat da “di sakrifais weh wi aafa op tu Gaad.” (Heeb. 13:15) Jos laik how wi shuda tink bowt weh wi wahn pray fa, wi aalso waahn tink bowt weh wi wahn seh tu di peepl weh wi preech tu. Wi waahn wi “sakrifais weh wi aafa op tu Gaad” bee wi veri bes. Dat da wai wi soh hapi wen wi preech tu adaz.

9. Jos laik di Izrelait dehn eena Baibl taimz, how wi benifit wen wi meet tugeda fi wership Jehoava? Gi wahn egzampl a how di meetin mi help yoo.

⁹ Wi wership Jehoava wen wi goh da wi meetinz. Dis da weh dehn mi tel di Izrelaits eena Baibl taimz: “Chree taimz fi di  yaa, aala di man dehn shuda apyaa fronta Jehoava yu Gaad da di plays weh hihn chooz.” (Deut. 16:16) Dehn mi haftu lef dehn hows ahn dehn feel, wid nobadi fi tek kayr a it. Bot Jehoava mi pramis dehn: “Wen yu goh stan op fronta Jehoava chree taimz fi di yaa, nobadi wahn chrai tek weh yu lan wail yu noh dehdeh.” (Ex. 34:24) Bikaaz di Izrelait dehn mi kompleetli chros eena Jehoava, dehn kuda mi gaahn da di festival weh mi hapm evri yaa ahn dehn mi benifit eena wahn lata wayz. Fi egzampl dehn mi laan moa bowt Gaad laa, dehn mi tink bowt how gud Jehoava mi gud tu dehn, an dehn mi injai fi deh rong adaz weh mi lov Jehoava tu. (Deut. 16:15) Wee geh simila benifit wen wi du aal weh wi kud fi deh da wi Kristyan meetinz. Ahn tink bowt how hapi Jehoava hapi wen wi koment fahn wi haat.

10. Wai ih impoatant fi sing wen wi wership Jehoava?

¹⁰ Wi wership Jehoava wen wi sing wid wi bradaz ahn sistaz. (Ps. 28:7) Wahn impoatant paat a di Izrelait dehn wership da-mi wen dehn sing. King Dayvid mi aks 288 Leevait fi sing da di templ. (1 Chron. 25:1, 6-8) Tudeh, wee ku shoa wi lov tu Jehoava wen wi prayz ahn wid sang. Wi noh haftu noa how fi sing gud fi du dat. Tink bowt dis: Wen wi taak, “wi mek mistayk lata taim,” bot dat noh stap wi fahn taak da wi kangrigayshan an eena di minischri. (Jay. 3:2) Saym way soh, wi ku stil yooz sang fi prayz Jehoava eevn if wi feel laik wi vais noh song tu gud.

11. Laik weh Psalm 48:13 seh, wai wi shuda mek taim fi wi famili wership?

¹¹ Wi wership Jehoava wen wi stodi fi hihn Werd ahn teech wi chiljren bowt hihn. Pahn di Sabat, di Izrelait dehn neva werk ahn dehn mi yooz da day fi schrentn dehn rilayshanship wid Jehoava. (Ex. 31:16, 17) Faytful Izrelaits mi teech dehn chiljren bowt Jehoava ahn fi hihn gudnis. Tudeh, eech wan a wi aalso waahn mek taim fi reed ahn stodi Gaad Werd. Dis da paat a fi wee wership tu Jehoava an ih help wi fi jraa kloasa tu ahn. (Ps. 73:28) Wen wi stodi tugeda az wahn famili wi ku help wi chiljren fi ga wahn lovin frenship wid wi hevnli Faada.—Reed Psalm 48:13. *

12. How Jehoava mi feel bowt di werk weh dehn mi du fi mek di fernicha fi di tabernakl, ahn weh wi ku laan fahn dat?

¹² Wi wership Jehoava wen wi bil ahn mantayn di bildin dehn weh wi yooz fi wership. Di Baibl seh dat di werk fi mek di tabernakl ahn di fernicha da wahn “hoali werk.” (Ex. 36:1, 4) Tudeh, Jehoava aalso vyoo di werk weh wi bradaz ahn sistaz du fi bil Kingdom Haal an ada bildin weh wi yooz fi wership hihn az paat a wi wership tu hihn. Sohn bradaz ahn sistaz spen wahn lata taim di du dehnya tingz. Wi reeli apreeshiayt weh dehn du fi di Kingdom werk! Af koars, dehn aalso tek paat eena di preechin werk. Ahn som a dehn mait eevn waahn bee painyaaz. Eldaz ku shoa dat dehn sopoat di kanschrokshan werk wen dehn alow dehnya haad werkin bradaz ahn sistaz fi bee painyaaz wen dehn kwalifai. Weda er nat wi ga di skil fi du kanschrokshan werk, aala wi ku help owt wen wi kip dehnya bildin kleen an eena gud kandishan.

13. How wi shuda vyoo di doanayshan weh wi mek fi sopoat di Kingdom werk?

 ¹³ Wi wership Jehoava wen wi sopoat di Kingdom werk wid wi doanayshan. Jehoava mi ekspek di Izrelait dehn fi bring wahn gif far ahn wen dehn mi aten di festival. (Deut. 16:16) Dehn mi fi bring wahn gif bays pahn weh dehn kuda mi afoad. Wen dehn mi du dis, dehn shoa dat dehn mi tankful fi evriting weh Jehoava mi du fi dehn. How wee ku shoa dat wi lov Jehoava ahn dat wi tankful fi evriting weh ih du fi wi? Wan way wi du dis da wen wi sopoat di loakal kangrigayshan ahn di werlwaid werk wid wi doanayshan bays pahn humoch wi ku giv. Di apasl Paal mi put it dis way: “Gaad pleez wid wahn gif weh kohn fahn di haat, bikaaz ih waahn peepl giv akaadn tu weh dehn ku afoad, noh weh dehn kyaahn afoad.” (2 Kor. 8:4, 12) Jehoava veri hapi wid wateva wi ku gi hihn, eevn if da noh moch.—Maak 12:42-44; 2 Kor. 9:7.

14. Akaadn tu Proverbs 19:17, how Jehoava feel wen wi help owt dehn wan weh need it?

¹⁴ Wi wership Jehoava wen wi help owt wi bradaz ahn sistaz. Som a di Izrelait dehn mi veri jenaros tu dehn wan weh mi poa. Ahn Jehoava mi pramis dehn dat hihn mi wahn pay dehn bak. (Deut. 15:7, 10) Enitaim wi help wahn brada er sista, da laik if wi di gi Jehoava wahn gif. (Reed Proverbs 19:17.) * Fi egzampl, wen di Kristyanz mi sen wahn gif tu Paal wen ih mi deh da prizn, hihn mi seh dat da gif da-mi laik wahn “sakrifais” tu Jehoava. (Fil. 4:18) Tink bowt dehn wan eena yu kangrigayshan an aks yuself, ‘Enibadi deh weh Ai ku help?ʼ Jehoava hapi wen wi yooz wi taim, enerji, skilz, ahn di mateeryal tingz weh wi ga fi help wi bradaz ahn sistaz. Hihn si dat az paat a wi wership tu hihn.—Jay. 1:27.

15. Ih tek taim an efoat fi wership Jehoava, bot wai wi noh waahn seeʼt az wahn berdn?

¹⁵ Ih tek taim an efoat fi wership Jehoava, bot wai wi noh waahn seeʼt az wahn berdn? (1 Jan 5:3) Wi wership Jehoava bikaaz wi lov ahn. Imajin wahn lee pikni weh spen wahn lata taim di jraa wahn picha fi ih pa. Hihn noh sari dat ih spen aal da taim di jraa da picha fi ih pa, bikaaz ih lov ih pa ahn hihn hapi fi mek da gif far ahn. Saym way soh, wee hapi fi yooz wi taim an efoat fi serv Jehoava bikaaz wi lov ahn.

16. Akaadn tu Heebrooz 6:10, how Jehoava feel bowt weh eech wan a wi du fi mek ahn hapi?

¹⁶ Eni lovin payrent noh ekspek fi geh di saym gif fahn eech wan a ih pikni. Dehn noa dat eech wan a dehn pikni difrent ahn dehn serkomstans difrent tu. Saym way soh, Jehoava andastan dat eech wan a wi difrent ahn wi serkomstans difrent tu. Maybi wi ku du moa dan adaz. Er, maybi wi kyaahn du az moch az dehn bikaaz a wi ayj, helt, er famili rispansabiliti. If dat da di kays, noh mek dat diskorij yu. (Gal. 6:4) Jehoava noh wahn ferget di werk weh yoo du. Hihn wahn hapi wid yu az lang az yu di du yu bes ahn yu di du it fi di rait reezn. (Reed Heebrooz 6:10.) Jehoava ku eevn si eena yu haat, ahn hihn noa weh  yu waahn du. Hihn waahn mek yu bee hapi eena wateva yu ku du eena yu wership tu hihn.

17. (a) If yoo fain eni paat a wi wership haad fi du, weh yu ku du? (b) How yoo benifit fahn wan a di points weh eena di baks “ How Yu Ku Bee Hapiya”?

¹⁷ Wat if wi feel laik som paat a wi wership haad fi du, laik persnal stodi er fi tek paat eena di minischri? Wi wahn benifit an injai dehnya tingz wen wi tek moa taim fi du dehn. Wi ku tink bowt sombadi weh di staat eksasaiz er sombadi weh di chrai laan fi play wahn inschrument. If da persn noh praktis aafn, ih noh wahn mek proagres ataal. Bot wat if ih disaid fi du it evri day, maybi ih staat aaf di du it jos fi wahn fyoo minits, bot az taim goh bai ih spen moa taim di du it. Az ih si di rizolt a ih haad werk, ih wahn luk faawod fi dehnya tingz, an ih wahn injai it. Di saym ting ku hapm wid wi wership tu Jehoava.

 18. Wat da di moas impoatant ting wi ku du, ahn weh wahn hapm if wi du it?

¹⁸ Di moas impoatant ting weh wi ku du da fi wership Jehoava wid aala wi haat. If wi du dat wi wahn bee hapi ahn wi wahn satisfai eena laif, ahn wi wahn luk faawod fi wership Jehoava fareva. (Prov. 10:22) Eevn doa wi ga lata prablemz, wi stil ga pees, bikaaz wi noa dat Jehoava wahn help wi deel wid wi prablemz. (Isa. 41:9, 10) Wi ga gud reezn fi bee hapi az wi di wership wi lovin hevnli Faada, di wan weh dizerv “aala di gloari ahn di aana” fahn aala ih kriyayshan!—Rev. 4:11.