1, 2. Ka wemegeirubei lun lánharun Heowá lun wáhuduragun?

 KA UAGU hasaminara dan le haganbuni dimurei áhuduraguni? Másiñati hasaminarun luagu aban íbiri lafurieiduña hudugu turugabu ligabanan ani ladararuñoun lanigi lun Heowá. Másiñati hasaminarun hawagu iduheñu ha aturiahabarun Bíbülia úara lau ugundani.

² Gürigia ha lídanbaña bián sügǘ le háhuduraguña lun Heowá. Ánhati funa san Heowá lun áhuduraguni le? Anha, anhein adügǘwa súnwandan lau ínsiñeni luma inebesei según lugundan. Kei weiri lubéi línsiñe Heowá woun ani subudi wamuti yu lan lun, busentiwa wáhuduragun lun lidan igaburi le buídutimabei.

3. Kaba wariha lidan aturiahani le?

³ Lidan aturiahani le, wayanuhaba luagu ligaburi o luwuyeri áhuduraguni le meha unbei lánhara Heowá lidan dan le sügühalibei, ani wakutiha widü katei lánina áhuduraguni le unbei lánhara Heowá uguñe weyu. Lidan awanha lan akutihei katei burí le, samina wamá luagu ida luba lan wabuiduragüdüni ligaburi wáhuduragun. Warihubei giñe ka lan uagu ladüga áhuduraguni inarüniti lúntima gunda wamá.

4. Lubaragiñe lidaani Kristu, ida liña meha harufuduni lubúeingu Heowá lun hínsiñe lan houn ani inebe ligía houn?

⁴ Lubaragiñe meha lidaani Kristu, arufuda hamuti meha wügüriña úaraguatiña kéiburi Aweli, Noé, Abürámü luma Hobu inebe lan Heowá houn ani hínsiñe ligía houn. Ida? Lau haganbadi, hafiñen luma le hadügübei. Mariñagun tumuti Bíbülia ídatima liña lan háhuduragun lun Heowá. Le chóurubei adüga hamuti lan le  hayaraati lun háhuduragun lun, ani ánhati lun háhuduragun. Lau lásügürün dan, aba líchuguni Bungiu lilurudun Moisesi houn ladügawagun Abürámü. Lidan Lúrudu le ruti adundehani furanguti houn luagu ida liña lan labusenrun lun láhudurawagun lun.

5. Ida liña lasansirun áhuduraguni inarüniti lárigiñe lounwen luma lásaarun Kristu?

⁵ Lárigiñe meha lounwen luma lásaarun Hesusu, mamuriahanti Heowá hama lubúeingu lun gaganbadi hamá lun lilurudun Moisesi (Rom. 10:4). Lubaragiñe lira, mosu meha hafalaruni kristiánugu aban iseri lúrudu, “lilurudun Kristu” (Gal. 6:2). Mámaali meha mosu hakipurun saragu lúrudu hachügüwagu, le meha lunbei hadügüni, lun hafalaruni lani Hesusu hénpulu luma larufudahan. Uguñe weyu, adüga hamuti sun kristiánugu sun hayaraati lun háyeihani Kristu lun hagundaaragüdüni Heowá luma lun hadarirun awalidaguni (Mat. 11:29).

6. Ida luba líderaguniwa aturiahani le?

⁶ Lidan wakutihani kada aban lídangiñe ligaburi wáhuduragun lun Heowá, álügüdagua wamá woungua: “Awanseedina san lidan ligaburi náhuduragun lun Heowá? Gayaraati san nabuiduragüdüni ligaburi náhuduragun?”. Buiti lun gunda wamá lau ligaburi wawanserun lidan wáhuduragun lun Heowá, íbini ítara lunti wamuriahan luma Heowá lun líderaguniwa ariha kábatima lan idan wabuiduragüdei.

7. Ida liña larihini Heowá furíei le wadügübei tídangiñe sun wanigi?

⁷ Huduguatiwa lun Heowá dan le wafurieidun lun. Tidan Lererun ítara liña wafurieidun kei kupali le meha aranserubei lun lágudahouniwa tidan sanduariu, ani lau lásügürün dan tidan ténpulu (Sal. 141:2). Ruti meha kupali ligía aban lubuidun íhemeni le meha hínsiñebei lun Bungiu. Ítarameme dan le wafurieidun tídangiñe sun wanigi lun Heowá “resibi lumuti lau ugundani” íbini ánhawa mayusu bandi dimurei (Ari. 15:8; 2 Lur. 33:10). Anihein resun buiti lun wafiñerun hínsiñe lan lun Heowá lun warufuduni wínsiñehabu luma weteingiradi lun. Ani busenti lun wayanuhan luma luagu le wayumahabei, le adiheridagüdübaliwa luma luagu wemenigin. Ligíati, lubaragiñe wafurieidun lun, ka uagu mararamagun wabéi asaminara luagu le lunbei wariñaguni lun? Ítara luba, wadügün aban lubuidun furíei le ítarabei kei lubuidun “líheme” kupali lun Wáguchi le siélubei.

8. Ka lubuidun chansi wámabei lun walawahani Bungiu?

⁸ Huduguatiwa lun Heowá dan le walawahani (Sal. 34:1). Ida liña san walawahani Heowá? Lau wayanuhan lau ínsiñehabuni luagu lubuidun burí ligaburi luma katei le ladügübei. Tídangiñe aban anigi buin lau geteingiradi liabin alawahani. Ánhawa adireira dan lun wararamagun asaminara luagu lareini Heowá —luagu sun katei buiti le adüga láalibei wawagu—, súnwandan ñeinbei lan resun lun walawahani. Ruti apurichihani aban lubuidun chansi woun lun weteingiruni Bungiu “lau wayuma” (Ebü. 13:15). Ítara kei mosu lan wasaminarun buidu luagu le lunbei wariñaguni lun Heowá lubaragiñe wafurieidun, buídubei giñe hamuga wasaminarun buidu luagu le lunbei wariñaguni houn gürigia lubaragiñe woudin apurichiha. Busentiwa lun “walawahani Heowá” lidan igaburi le buídutimabei. Dan le wapurichihani inarüni houn gürigia, ayanuhatiwa tídangiñe sun wanigi.

9. Ka buiti hasagarubei lumutuniña Heowá dan le houdin adamuridagua, ani ida liña líderagunün?

⁹ Huduguatiwa lun Heowá dan le woudin adamuridagua. Ariñawagúati houn binadu ísüraelina: “Lidan ǘrüwa fedu le, sun wügüriña ísüraelina gasu harufudagun houngua ligibugiñe Heowá lidan fulasu le lanúadirubei lun lichugúniwa uéiriguni lun” (2 Lur. 16:16). Mosu meha  hígirunu haban luma hachari úouga kaba lan óunigirei. Füramaseti Heowá houn: “Úabei ni aban áluguti lanügüni hufulasun sun anungura lan arufudagua hungua ligibugiñe Hubungiute” (Afu. 34:24). Ñǘdüntiña meha ísüraelina lidoun fedu irumu-auti ligía lau aban lanarime afiñeni luagu Heowá. Sagatiña meha saragu buiti lídangiñe fedu ligía: gunfurandatima hamuti lilurudun Bungiu, ráramaguatiña asaminara luagu lareini ani gúndaatiña hádanñanu lan ha híbiri lubúeingu Heowá (2 Lur. 16:15). Sagatiwa giñe buiti dan le wadügüni sun wayaraati lun woudin adamuridagua. Ani máfuna lugundan Heowá dan le waranserun luba wíchugun óunabagülei chátiti ani aranserúati buidu.

10. Ka uagu aban lubéi fánreinti súdiniti eremuhani lidan wáhuduragun lun Heowá?

¹⁰ Huduguatiwa lun Heowá dan le weremuhan lun úara hama wábirigu (Sal. 28:7). Aban meha fánreinti súdiniti houn ísüraelina, eremuhani lidan háhuduragun lun Heowá. Kei hénpulu, ruti urúei Dawidi 288 lewitagu lun heremuhan tidan ténpulu (1 Kro. 25:1, 6-8). Uguñe weyu, gachansintiwa lun warufuduni lun Heowá hínsiñe lan woun lau weremuhan lun. Mama lubuidun wamalali súdinibei. Samina humá luagu hénpulu le: “sun wagía charatiwa” dan le wayanuhan íbini ítara mararamun lumutiwa lira luéi wayanuhan lidan damuriguaü ni luéi wapurichihan (Sant. 3:2). Ítarameme, moun lumuti wígirun lun leredehaniwa meremuhadi wamá lun meremuhan wamá lun Heowá.

11. Ítara kei larufuduni Sálumu 48:13, ka uagu lunti lubéi wadireirun dan lun waturiahanu Bíbülia úara hama waduheñu?

¹¹ Huduguatiwa lun Heowá dan le waturiahanu Lererun ayanuha wagía luagu houn wasaanigu. Sagü luéyuri emeraaguni, mawadigimariduntiña meha ísüraelina yusu hamuti meha weyu le lun hederebudagüdüni hamadagua luma Heowá (Afu. 31:16, 17). Arufudahatiña meha ísüraelina ha úaraguabaña houn hasaanigu luagu Heowá luma luagu lareini. Lidan wakesin, lunti wadireirun dan lun waliihanu luma lun waturiahanu Lererun Bungiu. Ligía aban lídangiñe fánreinti lánina wáhuduragun lun Heowá ani íderagua lumutiwa lúntima wayarafadun lun (Sal. 73:28). Lanwoun lira, dan le wáhuduragun úara keisi iduheñu, gayaraati wíderaguniña iseri gürigia ha ñǘbuinbaña wárigiñe kéiburi —wasaanigu— lun gamadagua hamá houngua luma Wáguchi Bungiu le hínsiñehabubei le siélubei (aliiha huméi Sálumu 48:13).

12. Ida liña meha larihiniña Heowá ha adügübalin katei le tídanbei sanduariu, ani ka larufudahabei le woun?

¹² Huduguatiwa lun Heowá dan le wábunagun muna lun wáhuduragun lun luma lun wetenirun tun. Ariñagatu Bíbülia aban lan wadagimanu “sagüráuti ” tadügǘniwa sanduariu luma sun le tídanbei (Afu. 36:1, 4). Uguñe weyu, ariha lumuti giñe Heowá kei wadagimanu sagüráuti tábunawagun luban wadamuridagun tuma burí amu muna to eseriwiduboun lun láhudurawagun lun. Sügütiña íbirigu saragu dan adügei wadagimanu le. Ma rútiwa seremei houn íbirigu ha luagu lubuidun wadagimanu le hadügübei luagu Larúeihan Bungiu? Anha, díreitiña giñe íbirigu ha dan lun hapurichihan. Másiñati añahein lan hádangiñe busentiña lun heseriwidun kei prekursorugu. Ídehatiña wéiyaaña lidan afiñeni lidan bunaguaü dan le hígirun lun heseriwidun íbirigu benefatiña ha kei prekursorugu anhein adüga hamaali lubéi le mégeiwabei lun hadügüni dasi le. Subudi lan yebe bunaguaü woun o ibidiñe lan, sun wagía gayaraati wídehan lidan tarumadahóun muna burí to luma lun buidu lan taríawagun.

13. Ida liña warihini budagia le wíchugubei lun wídehan lidan wadagimanu lánina apurichihani lidan sun ubóu?

¹³ Huduguatiwa lun Heowá dan le wídehan lidan wadagimanu lánina larúeihan dan le wíchugun budagia. Moun lumuti meha harufudagun  ísüraelina houngua ligibugiñe Heowá málouga háhabu (2 Lur. 16:16). Mosu meha hanügün aban idewesei según le gádanbaliña. Ítara luba meha harufudun eteingiruni luagu sun buiti le hibihubei lúmagiñe Bungiu. Ani ida luba warufuduni wínsiñehabu lun Heowá luma weteingiradi luagu sun le ladügübei wawagu? Aban lídangiñe según le gádanbaliwa gayaraati wíchugun budagia lidan damuriguaü le ñein wabéi luma lun lamainirúniwa wadagimanu lánina apurichihani lidan sun ubóu. Afuranguagüda lumuti apostolu Pábulu ítara: “Lugundun anhein íchiga aban gürigia sun le liyaraati según le lúmabei, lau sun lugundan, gúndaati Bungiu lau, ani resibi lumuti le líchugubei gürigia ligía, mamuriahan lumuti Bungiu le úati hama gürigia” (2 Ko. 8:4, 12). Gebegiti budagia le wíchugubei lun Heowá tau sun wanigi, meberesenga anhein gibe lubéi o mibe lan (Mar. 12:42-44; 2 Ko. 9:7).

14. Según Ariñawagúni 19:17, ida liña larihini Heowá wíderaguniña wábirigu ha ásügürübaña lídangiñe mégeiguaü?

¹⁴ Huduguatiwa lun Heowá dan le wíderaguniña wábirigu ha ásügürübaña lídangiñe mégeiguaü. Füramaseti Heowá labinirubaña lan ísüraelina ha íderagubaliña gudemetiña (2 Lur. 15:7, 10). Sagü wíderagun aban hádangiñe wíbirigu ha ásügürübaña lídangiñe mégeiguaü, ariha lumuti Heowá kei hamuga wíchuguña lan aban idewesei lun (aliiha huméi Ariñawagúni 19:17). Kei hénpulu, óunahatiña meha kristiánugu ha Filipubaña aban idewesei lun Pábulu dan le meha dáüwañu liña lubéi, ani ariñagati ítara liña lan idewesei ligía kei aban idewesei le leresibirubei Bungiu lau ugundani (Fili. 4:18). Samina wamá hawagu íbirigu ha lídanbaña damuriguaü le ñein wabéi ani álügüdagua wamá woungua: “Anihein san somu íbiri le gayaraabei níderaguni?”. Hínsiñeti lun Heowá larihiniwa ayusurei wadaani, were, wayaraati luma wámati lun wíderaguniña ha mégeihabubaña. Lun Heowá, ítara liña le kei aban fánreinti lánina wáhuduragun lun (Sant. 1:27).

15. Ka uagu mama lubéi ihürügu wadireirun dan luma áfaaguni lun wáhuduragun lun Heowá?

¹⁵ Mégeiwati dan luma áfaaguni lun wáhuduragun lun Heowá kei aubei labusenra. Ligía mama lubéi aban ihürügu lira (1 Huan 5:3). Ka uagu? Ladüga hínsiñe lan woun. Samina wamá luagu aban irahü le busenbei líchugun aban idewesei lun lúguchi. Másiñati lásügürün saragu oura adibuha somu katei lun lúguchi, lau sun lira masakürihanti irahü ligía luagu sun oura le lásügürübei adügei dibuhu ligía lun lúguchi ladüga hínsiñeti lúguchi lun ani gúndaati lau líchuguni idewesei ligía lun. Ítarameme ladüga hínsiñe lan Heowá woun, gúndaatiwa lau wayusuruni wadaani luma were lun wáhuduragun lun.

16. Según Ebüréu 6:10, ida liña larihini Heowá áfaaguni le hadügübei lun hagundaaragüdüni?

¹⁶ Agübürigu ha hínsiñehabubaña houn hasaanigu magurabuntiña ligiamémeba lan idewesei híchiga kada aban hádangiñe hasaanigu houn. Subudi hamuti ámuñegueinarügü hamá hasaanigu hawariuagua ani ámuñegueinarügü lan giñe gádantiña. Ítarameme, subudi lumuti Wáguchi le siélubei le gádanbalin kada aban wádangiñe. Másiñati gayara lan hadügün lóugiñe le hadügübei hiibe-agei humadagu. O, másiñati, siñá lan hadügün saragu kei amu, ladüga hirumudiri, hátuadi o ladüga mosu lan hetenirun houn hiduheñu. Íbini ítara madüga lan le lun lábürühan harüna (Gal. 6:4). Mabulieidun lubéi Heowá le hadügübei. Gúndaabei Heowá anhein híchiga le buídutimabei lun lau aban lubuidun igaburi (aliiha huméi Ebüréu 6:10). Ariha lumuti Heowá tidan hanigi le habusenrubei hadügün. Busenti lun gunda humá lau ligaburi áhuduraguni le gayara hubéi íchiga lun.

17. a) Ka gayaraabei wadügüni anhein hénrengu lubéi woun wagunfulirun lau aban lídangiñe katei le wadügübei lun wáhuduragun lun Heowá? b) Íderagua lumutün san aban lídangiñe katei le áfuachubei lidan rekuáduru le gíribei “ Ida luba gúndaatima wamá”?

 ¹⁷ Ka gayaraabei wadügün anhein hénrengu lubéi woun lun wadügün aban lídangiñe katei le uágubei wayanuha guentó kei burí waturiahan wábuguarügü, o wapurichihan? Másiñati wíchugun fe dan le lan wásügürün dan adügei katei le, wasagaratimaaba buiti lídangiñe ani gúndaatimabadiwa. Gayaraati wariñagun ítara liña lan wáhuduragun lun Heowá kei wadügün ehersísiu o wáfarun gidara, garanwoun o katei líbeina lira. Ánheinti mama lubéi gabügürügua wadügei, mawanserunbadiwa saragu. Ánheinti wadüga sagü weyu, furumiñe luagu fiu minutu lárigiñe luagu fiu oura, warihibei lubuidun lidin woun. Lau lásügürün dan másiñati memeniha lanme wanigi lun lachülürün dan lunya wadügüni ani gúndaabadiwa. Ka uagu madügün wabalin ligiaméme lidan wáhuduragun lun Heowá?

18. Ka katei súdinitimabei lun wadügüni lidan wabagari, ani kaba wibiha anhein wadüga?

¹⁸ Wáhuduragun lun Heowá tau sun wanigi, ligía katei súdinitimati le lunbei wadügüni lidan wabagari. Anhein wadüga lira gúndaabei wabagari, gasuunibei, ani hemenigibadiwa wáhuduragun lun Heowá lun súnwandan (Ari. 10:22). Lúmagiñe guentó sanditiwa darangilaü ladüga subudi wamuti líderagubadiwa lan Heowá dan le wagagibudagun luma turobuli (Isa. 41:9, 10). Gébunati wasandirun ugundani dan le wáhuduragun lun wáguchi le hínsiñehabubei, le garichabei lun leresibiruni uéiriguni luma inebesei lúmagiñe sun le ladügübei (Aruf. 4:11).