1-2. Paquemodo queda aceptable con Dios el diaton adoranza?

 COSA ta entra na de tuyu pensamiento si ta oi tu con el palabra “adoranza”? Posible, ta pensa tu con el un humilde hermano quien ta hinca na costao del de suyu cama mientras con todo corazon ta reza. O posible, ta pensa tu con el un familia quien alegre ta estudia con el Biblia.

² Na ese dos ejemplo, aquellos quien envuelto ta hace un manera de adoranza. Hay acepta ba si Jehova con el diila adoranza? Si, si harmonia ese na de suyu proposito y si hace con ese con amor y respeto. Ta ama gayot kita con Jehova. Sabe kita que debe kita adora con ele y quierre kita que el diaton adoranza amo el de con todo bueno.

3. Cosa kita considera na este articulo?

³ Na este articulo, hay man repaso kita con el clase de adoranza que ya acepta si Jehova na tiempo del Biblia y hay considera kita con el ocho aspeto de adoranza que aceptable ahora. Mientras hace kita con ese, pensa si paquemodo kita mejora con el calidad del diaton adoranza. Hay man repaso tambien kita si porque el verdadero adoranza puede kanaton hace alegre.

4. Paquemodo el maga siervo de Jehova antes llega si Jesus aqui na tierra ya demonstra con el diila respeto y amor con Jehova?

⁴ El maga fiel hombre igual con Abel, Noe, Abraham y Job ya demonstra el diila respeto y amor con Jehova. Paquemodo?  Por medio na diila obediencia, fe y maga sacrificio. El Biblia nuay menciona el todo cosa que necesita sila hace na diila adoranza. Pero, ya hace sila el diila de con todo bueno para honra con Jehova y ya acepta le con el diila adoranza. Despues, ya dale si Jehova el Ley de Moises na maga descendiente de Abraham. Incluido na este maga ley el maga especifico instruccion acerca si paquemodo adora con Jehova na aceptable manera.

5. Cosa cambio ya hace na verdadero adoranza despues del muerte y resureccion de Jesus?

⁵ Despues del muerte y resureccion de Jesus, nuay mas pidi si Jehova con el maga gente que sigui con el Ley de Moises. (Roma 10:4) El maga Cristiano necesita sigui con el un nuevo ley, “el Ley de Cristo.” (Gal. 6:2) Puede sila obedece con este “Ley,” gendeh por medio que man memorize con ese o sigui con el largo lista del cosa debe y gendeh debe hace, sino por medio que imita con el ejemplo de Jesus y sigui con el de suyu maga enseñanza. Ahora tambien, el maga Cristiano ta hace el diila de con todo bueno para sigui con el Cristo para puede hace alegre con Jehova y ‘incuntra descanzo.’​—Mat. 11:29.

6. Paquemodo kita beneficia na este articulo?

⁶ Mientras considera kita con el cada aspeto del diaton adoranza, pregunta con el de tuyu mismo cuerpo, ‘Cosa progreso yo ya hace aqui?’ Puede tambien tu pregunta, ‘Puede pa ba yo mejora con el calidad del de mio adoranza?’ Debe tu queda alegre na cosa tu ya puede hace pero puede tambien tu pidi con Jehova que ayuda contigo mira si na onde pa tu necesita mejora.

7. Cosa el mirada de Jehova na diaton maga con todo corazon rezo?

⁷ Ta adora kita con Jehova si ta reza kita con ele. El Escritura ya compara con el diaton maga rezo na incenso que ya prepara enbuenamente para ofrece na tabernaculo y na templo. (Sal. 141:2) Ese incenso tiene oloroso olor que ta hace alegre con Dios. Na igual manera, el diaton de con todo corazon rezo ta hace alegre con ele, maskin pa bien simple lang el maga palabra que ta usa kita. (Deut. 33:10; Prov. 15:8) Poreso, puede kita habla que alegre si Jehova oi si ta habla kita que ta ama y ta aprecia kita con ele. Quierre le que habla kita con ele acerca el diaton maga lingasa, esperanza y deseo. Poreso antes reza con Jehova, puede tu pensa enbuenamente si cosa tu habla. Si hace tu se, puede tu dale el de tuyu de con todo bueno “incenso” na de tuyu Tata na cielo.

8. Cosa oportunidad kita tiene para alaba con Dios?

⁸ Ta adora kita con Jehova si ta alaba kita con ele. (Sal. 34:1) Ta alaba kita con Jehova si ta habla kita con otro si paquemodo kita ta ama y ta aprecia con el de suyu maga calidad y trabajo. Puede kita habla manada buen cosas acerca con Jehova si ta aprecia kita con ele. Si dale kita tiempo para medita con el pagka-bueno de Jehova​—el todo cosas que ya hace le para kanaton—​hay tiene kita manada razon para alaba con ele. El trabajo predicacion amo un buen oportunidad para “ofrece kita firmi con el Dios . . . un sacrificio de alabanza; quiere decir, manda kita con el diaton boca alaba con el disuyo Nombre. “ (Heb. 13:15) Igual si paquemodo ta pensa kita enbuenamente si cosa kita habla antes kita reza con Jehova, necesita tambien kita pensa enbuenamente si cosa kita habla con aquellos con quien kita ta predica na ministerio. Quierre kita que el diaton “sacrificio de alabanza” amo el de con todo bueno. Poreso, con gana kita ta predica el verdad con otro.

9. Igual na maga Israelita de antes, paquemodo kita ta beneficia si ta atende kita na maga miting? Dale un personal ejemplo.

 ⁹ Ta adora kita con Jehova si ta atende kita na maga miting. Ya habla con el maga Israelita de antes: “Tres beses na un año, el todo maga hombre debe aparece adelante de Jehova el de ustedes Dios na lugar que hay iscuji le.” (Deut. 16:16) Necesita sila deja con el diila casa y simentera. Pero, ya promete si Jehova kanila: “Nuay quien hay desea con el de ustedes tierra mientras anda ustedes mira con el cara de Jehova el de ustedes Dios.” (Ex. 34:24) Por causa na diila fe con Jehova, aquellos maga Israelita ya atende con el maga fiesta cada año. Poreso, ya ricibi sila maga bendicion; mas ya queda hondo el diila entendimiento na maga Ley del Dios, ya medita con el de suyu pagka-bueno y alegre yan junto con aquellos quien ta ama con Jehova. (Deut. 16:15) Ta ricibi tambien kita maga semejante beneficio si ta hace kita maga sacrificio para atende na maga miting. Y pensa si paquemodo de alegre si Jehova si preparao kita ta atende na maga miting y ta dale corto y bonito comento.

10. Paquemodo de importante el cancion na diaton adoranza?

¹⁰ Ta adora kita con Jehova si ta canta kita junto con el diaton maga hermano y hermana. (Sal. 28:7) El cantada amo un importante parte del adoranza del maga Israelita. Si Rey David ya iscuji 288 Levita para canta na templo. (1 Cron. 25:1, 6-8) Ahora, puede kita dale mira el diaton amor con Dios si canta kita maga cancion de alabanza. El calidad del voz gendeh amo el de con todo importante cosa. Considera este: “Todo kita ta comete culpa muchas veces” si ta converza pero gendeh se ta sangga kanaton para converza na congregacion y na ministerio. (Sant. 3:2) Na igual manera, puede siempre kita canta maga cancion de alabanza con Jehova maskin pa ta pensa kita que gendeh kita bueno canta.

11. Como cosa ta habla na Salmo 48:13, porque kita debe dale tiempo para estudia con el Biblia como un familia?

¹¹ Ta adora kita con Jehova si ta estudia kita con el de suyu Palabra y ta enseña con el diaton maga anak acerca con ele. El Sabbath ya dale oportunidad con el maga Israelita para gendeh trabaja y concentra na diila relacion con Jehova. (Ex. 31:16, 17) El maga fiel siervo ya enseña con el diila maga anak acerca con Jehova y el de suyu pagka-bueno. Ahora, debe tambien kita dale tiempo para le y estudia con el Palabra del Dios. Parte este del diaton adoranza con Jehova y puede este ayuda kanaton para queda mas cerca con ele. (Sal. 73:28) Y si estudia kita junto como un familia, puede kita ayuda con el diaton maga anak para tene personal relacion con el diaton amable Tata na cielo.​—Le con el Salmo 48:13.

12. Cosa kita puede aprende na mirada de Jehova na trabajo de aquellos quien ya hace con el maga gamit na tabernaculo?

¹² Ta adora kita con Jehova si ta construi y ta mentena kita con el maga lugar de adoranza. El Biblia ta habla que el hacida de tabernaculo y el maga gamit de este amo un “sagrao trabajo.” (Ex. 36:1, 4) Ahora, un sagrao servicio tambien para con Jehova el construida de maga Kingdom Hall y otro maga teocratico facilidad. El cuanto del maga hermano y hermana ta usa grande tiempo para na este maga actividad. Gendeh ba ta aprecia kita con este importante contribucion para na trabajo del Reino? Siempre, ta hace tambien sila con el trabajo predicacion. Gane, el cuanto kanila posible quierre queda maga pioneer. El maga anciano puede dale mira con  el diila suporta na construida si permiti sila con el maga trabajador hermano y hermana que man pioneer si cualificao sila. Tiene man kita skill na construida o nuay, todo kita puede ayuda para mentena limpio este maga facilidad y na buen condicion.

13. Cosa debe el diaton mirada na maga donacion que ta hace kita para suporta con el trabajo del Reino?

¹³ Ta adora kita con Jehova si ta suporta kita con el trabajo del Reino por medio na diaton maga donacion. El maga Israelita gendeh puede atraca con Jehova si nuay sila cosa ta lleva. (Deut. 16:16) Necesita sila lleva ofrecimiento asegun na diila circumstancia. Na ansina manera, ta dale sila mira que ta aprecia sila con el todo cosas que ya hace si Jehova para kanila. Paquemodo kita puede dale mira con el diaton amor para con Jehova y el diaton apresacion para na maga espiritual provision que ta ricibi kita? El un manera amo por medio na diaton donacion para na congregacion y na worldwide work asegun na diaton circumstancia. Si apostol Pablo ya habla: “Basta tiene kita interes, aceptao ya kita asegun el que puede kita dale. Dejalo lang si no puede kita dale mas.” (2 Cor. 8:4, 12) Alegre si Jehova con el diaton de con todo corazon maga donacion, maskin paquemodo pa se de diutay.​—Mar. 12:42-44; 2 Cor. 9:7.

14. Asegun na Proverbio 19:17, cosa el mirada de Jehova na maga ayuda que ta dale kita na diaton maga hermano?

¹⁴ Ta adora kita con Jehova si ta ayuda kita con el diaton maga hermano y hermana quien necesita ayuda. Ya promete si Jehova que hay bendici le con el maga Israelita quien bondadoso ya dale con el maga pobre. (Deut. 15:7, 10) Si, cada vez ta ayuda kita con el diaton hermano o hermana quien necesita ayuda, ta mira si Jehova con ese como regalo para con Ele. (Le con el Proverbio 19:17.) Por ejemplo, cuando el maga hermano na Filipo ya imbia regalo con Pablo cuando preso le, ya llama le con este un “sacrificio que el Dios ta acepta y ta gusta.” (Fil. 4:18) Pensa con aquellos na de ustedes congregacion y pregunta na de tuyu mismo cuerpo, ‘Tiene ba yo con quien puede ayuda?’ Alegre si Jehova si ta mira le que ta usa kita con el diaton tiempo, fuerza, abilidad y material cosas para ayuda con aquellos quien ta necesita ayuda. Ta considera le con ese como parte del diaton adoranza.​—Sant. 1:27.

15. Necesita tiempo y esfuerzo el verdadero adoranza pero porque este gendeh pesao?

¹⁵ Necesita tiempo y esfuerzo para hace con el verdadero adoranza. Pero, gendeh este pesao. (1 Juan 5:3) Porque? Cay ta adora kita con Jehova por causa na amor. Imagina con el un bata quien quierre dale un cosa na de suyu tata. Posible, necesita le tiempo para man drawing un letrato para na de suyu tata. El bata gendeh tan sayang con el tiempo que ya usa le. Ta ama le con el de suyu tata y alegre le dale ese regalo con el de suyu tata. Na igual manera, por causa na diaton amor para con Jehova, alegre kita dale el diaton tiempo y fuerza para adora con ele.

16. Asegun na Maga Hebreo 6:10, cosa el mirada de Jehova na diaton maga esfuerzo para hace alegre con ele?

¹⁶ El maga amable mayores gendeh ta expecta que ricibi igual regalo estaba na diila maga anak. Sabe sila que diferente el cada bata y tiene sila diferente circumstancia. Na igual manera, el diaton Tata na cielo ta entende con el circumstancia del cada uno kanaton. Posible, puede tu hace mas manada cosas que con otro. O posible, gendeh tu puede hace con el  maga cosas igual si paquemodo ta hace el otro, posible por causa na de tuyu edad, salud o responsibilidad na familia. No man luya. (Gal. 6:4) Gendeh ulvida si Jehova con el de tuyu maga trabajo. Si dale tu el de tuyu de con todo bueno y tiene justo motivo, hay queda le alegre. (Le con el Maga Hebreo 6:10.) Gane, sabe si Jehova el cosa tu quierre hace. Quierre le que alegre y satisfechao tu ta dale con el de tuyu adoranza con ele.

17. (a) Si tan dificil kita na cuanto aspeto del diaton adoranza, cosa kita puede hace? (b) Paquemodo contigo ya puede ayuda el uno del maga aspeto que ya dale mira na cajon “ Omenta con el De Tuyu Alegria”?

¹⁷ Pero paquemodo si tan dificil kita hace con el cuanto aspeto del diaton adoranza, igual na personal estudiada o predicacion? Si pirmi kita hace con este maga actividad, posible mas man enjoy kita y mas beneficia con ese. Puede kita compara con el diaton adoranza na cuanto actividad, igual na ejercicio o si tan practice kita tuca instrumento. Si tiene vez lang kita con ese hace, posible gendeh kita tanto progresa. Pero, pone kita que ya hace kita con ese parte del diaton rutina cada dia. Na primero, posible hace kita con ese por cuanto minuto y despues hinay-hinay kita omenta con el largor del tiempo. Si mira kita con el maga buen resulta del diaton esfuerzo, posible hay gusta ya kita con ese hace. Ya puede ba tu pensa si paquemodo kita con este puede aplica na diaton adoranza?

18. Paquemodo kita cumpli con el proposito del diaton existencia y cosa el resulta si hace kita con ese?

¹⁸ Puede kita cumpli con el proposito del diaton existencia si adora kita con Jehova con todo corazon. Como resulta, queda kita alegre y queda kita satisfechao na diaton vida, y tiene el esperanza adora con Jehova hasta para cuando. (Prov. 10:22) Tiene kita paz na pensamiento cay sabe kita que ayuda si Jehova con el de suyu maga siervo si ta experiencia sila maga problema. (Isa. 41:9, 10) Asigurao, alegre kita adora con el diaton amable Tata quien conviene “recivi el gloria, el honor” estaba na todo de suyu maga creacion!​—Rev. 4:11.