1-2. Hi nga maha txani ti to Jehovha amukela wukhozeli wathu?

 NGU tihi ati u ti alakanyako ngako u txi pfa dipswi di di ku “wukhozeli”? Ti nga maha u txi pimisa ngu mwanathu awu a nga khizama ha didhawani ka m’bhedhu wakwe a txi maha mkombelo ka Jehovha ngu mbilu yakwe yotshe. Ti nga maha kambe u txi pimisa ngu mwaya awu wu nga tshangana wu txi maha wukhozeli wa mwaya.

² Votshe vanathu vale ka siemo si hi nga si womba vo khozela. Ina Jehovha a na tumela wukhozeli wawe? Ngako va txi maha wukhozeli wawe ngu kulava ku mu engisa, ku mu xonipha, ni ku mu randa ene a na amukela wukhozeli wawe. Athu ha mu randa ngutu Jehovha ni ku ha ti ziva ti to ene wa fanelwa ngu kukhozelwa. Ni ku athu hi lava ti to wukhozeli wathu ka Jehovha wu va wa wunene ngutu.

3. Hi na bhula ngu txani ka gondo yiya?

³ Ka gondo yiya hi na wuseta nzila ya wukhozeli ayi Jehovha a nga txi yi amukela ka timbimo ta kale. Ni ku hi na tshumela hi wona 8 wa tinzila ati hi nga khozelako ngu tona Jehovha nyamsi. Mbimo yi hi mahako toneto alakanyisisa ngu nzila yi awe u nga tshukwatisako ngu yona wukhozeli wako. Hi na tshumela hi wona sivangelo sa ti to ngu kutxani kukhozela Jehovha ngu nzila ya yinene ti nga engetelako ngu yona litsako lathu.

4. Vathu va nga hanya na Jesu asi se ta hamafuni va txi mu khozelisa kutxani Jehovha?

⁴ Khe makhatoni vathu vo fana ni Abhele, Abrahamu, Nowa ni Jobe va txi kombisa ti to va txi xonipha ni kuranda Jehovha.  Ngu nzila muni? Nguko vona va txi mu engisa, va ti kholwa kwakwe ni kutshumela ve mu hisela mabaselo. Bhiblia kha yi wombi totshe ti ti nga txi pateka ka wukhozeli awu va nga txi wu maha ka Jehovha. Kambe vona va ti vekile hakubasani ti to va txi dhumisa Jehovha ni ku ene a txi amukela wukhozeli wawe. Ngu kutsimbila ka mbimo, Jehovha a ni ningela Vaisrayeli mlayo wa Mosi. Mlayo wonewo wu txi pata mkongomiso mayelano ni nzila va nga ti fanete kukhozela ngu yona Jehovha.

5. Ngu tihi ti nga txitxa ka wukhozeli wa ditshuri msana kova Jesu a date ni kuwuswa?

⁵ Msana kova Jesu a di fite ni kutshumela e wuswa, kha ti sungi ku hi londisa mlayo wa Mosi. (Var. 10:4) Makristu konkuwa ma londisa mlayo wa wuphya, i ku “mlayo wa Kristu.” (Vag. 6:2) Kulondisa mlayo wonewo kha ti wombi ku namarela ka lista ya ti hi fanelako kumaha ni ti hi si faneliko kumaha. Kambe ti womba ku etetela txikombiso txa Jesu ni kuengisa tigondo takwe. Nyamsi Makristu ma maha totshe ti ma nga tikotako kasi kulondisa Jesu ti to me tsakisa Jehovha ni ‘kumana kuhumula.’—Mat. 11:29.

6. Ti to u wuyelwa kwati ngu gondo yiya u fanete kumaha txani?

⁶ Mbimo hi xolisisako nzila yimwani ni yimwani ya wukhozeli wathu u fanete kutiwotisa tiya: ‘Ina ni mahile kutxitxa ka mhaka yiya? Ina ku ni mu ni nga tshukwatisako kona ka wukhozeli wangu ka Jehovha?’ Awe u fanete u tsaka ku ti u tikotako kumaha konakuwa, hambiketo u nga kombela Jehovha e kuvhuna kuwona amu u nga tshukwatisako kona.

7. Jehovha a yi wonisa kutxani mikombelo yathu?

⁷ Hi khozela Jehovha mbimo yi hi mahako mkombelo kwakwe. Mibhalo yi fananisa mikombelo ayi hi mahako ni dibaselo adi di nga lulamisewa kwati adi di nga txi ningelwa ditendani, ngu msana di ti ningelwa dithepeleni. (Mas. 141:2) Dibaselo donedo di txi humisa mbhumulo awu wu nga txi tsakisa Jehovha. Ngu ha kufanako mikombelo ya “tsakisa” Jehovha, hambi hi txi thumisa mapswi o hehuka. (Mav. 15:8; Dhewut. 33:10) Hi ni sivangelo so kholwa ti to Jehovha wa tsaka mbimo yi hi kombisako ti to ha mu randa ni ku mu bonga. Jehovha a lava ti to hi mu gela ati ti hi karatako, ta themba yathu ni mixuwo yathu. Na u si se maha mkombelo ka Jehovha, ti ngo txani u khata ngu kualakanyisisa ngu ti u no ti womba. U txi maha toneto ti na fana ni ku u txi ningela “dibaselo” do bhumula ngutu ka Tate wathu wa nzumani.

8. Ngu wuhi mkhanjo hi ku nawo wo dhumisa Txizimu?

⁸ Hi khozela Jehovha ngu ku mu dhumisa. (Mas. 34:1) Hi nga dhumisa Jehovha ngu kuwomba-womba ngu nzila yo kombisa kubonga mithumo yakwe yo xamalisa ni tifanelo takwe. Hi na mana to tala to gela Jehovha ngako hi txi kombisa kubonga. Ngako hi txi tiha mbimo yo alakanyisisa ngu wunene wakwe ni totshe ati a nga hi mahela hi na mbi pwata to mu dhumisa ngu tona. Mthumo wo txhumayela wa hi ninga mkhanjo wo ‘ningela yotshe mbimo mhamba yo dhumisa Txizimu, ti ti wombako m’hando wa txisofu.’ (Vaheb. 13:15) Nga ha hi maha ngu kona ngako hi txi lava kumaha mkombelo, hi tiha mbimo yo alakanyisisa, hi fanete kumaha ti ti fanako ngako hi txi lava ku ya kutxhumayelani hi khata ngu kualakanyisisa kasi kuziva ti to hi na womba txani. Athu hi lava ti to “mhamba yo dhumisa” yi va ya yinene ngutu. Hi txi maha toneto hi na sikota kutxhumayela hi di tsakile.

9. Kufana ni Vaisrayeli hi wuyelwa ngu nzila muni ngako hi txi ya mitshanganoni? Womba txikombiso txa nzila yi u nga vhuneka ngu yona awe.

 ⁹ Hi khozela Jehovha mbimo yi hi yako mitshanganoni. Vaisrayeli wa getwe tiya: “Sikhati siraru ngu dilembe votshe vavamna va fanete ku ya ti kombekisa masoni ka MKOMA Txizimu txako, ka wukhalo wule ene a nga wu sawula.” (Dhewut. 16:16) Vona va ti fanete kuleka miti yawe ni tithembwe tawe ti si wonelelwi, kambe Jehovha ava thembisile tiya: “Ni wammweyo kha na mbi navela tithembwe tako ngako u txi kwela u txi ya ti wonekisa masoni ka MKOMA Txizimu txako.” (Eks. 34:24) Aku Vaisrayeli va nga ti ni likholo lo tsana ka Jehovha, vona va txi ya ka mibuso yoneyo dilembe ni dilembe. Ngu toneto, vona va txi wuyelwa ngutu, vona va txi ya pfisisa kwati mlayo wa Txizimu, va txi alakanyisisa ngu wunene wa txona ni kutidila ngu wumwewo kumweko ni vakhozeli kulowe. (Dhewut. 16:15) Nanathu hi nga mana wuyelo ayi yi fanako ngako hi txi maneka ka mitshangano ya Wukristu. Alakanya ngu nzila yi Jehovha a ti pfako ngu yona ngako hi txi lulamisela kwati tixamulo tathu hambi i di ti to ti komile.

10. Ngu kutxani kuembelela i di ta lisima ka wukhozeli wathu?

¹⁰ Ha khozela Jehovha hi txi embelela. (Mas. 28:7) Vaisrayeli va txi teka kuembelela i di txienge txa lisima ka wukhozeli wawe. Mkoma Dhavhidha a sawute 288 wa Valevhi ti to ve va vaembeleli dithepeleni. (1 Mak. 25:1, 6-8) Nyamsi hi nga kombisa lirando ngu Jehovha ngu kuembelela tindando to mu dhumisa. Kha ti sungi ti to hi va vaembeleli va vanene ti to hi mu dhumisa. Wona txikombiso txiya. Mbimo yi hi wombako ha “onha sikhati so tala” kambe eto kha ti hi vhaleli ku hi womba-womba hi di kutxhumayelani mwendo hi di mitshanganoni. (Jak. 3:2) Ngu ha kufanako, kha fanela ku tumelela ti to kwa mbi hetiseka ka dipswi dathu ku hi vhalela ti to hi si embeleli tindando to dhumisa Jehovha.

11. Nga ha ti kombiswa ngu kona ka Masalmo 48:13, ngu kutxani hi di fanete ku tiha mbimo yo gonda Bhiblia ngu mwaya?

¹¹ Hi khozela Jehovha ngu kugonda dipswi dakwe di kutshumela hi gondisa vanana vathu ngu ngene. Ka masiku a Sabbata Vaisrayeli va si mahi mithumo yimwani kasiku ve tiha mbimo yo tsanisa wuxaka wawe ni Jehovha. (Eks. 31:16, 17) Vona va ti gondisa vanana vawe ngu Jehovha ni wunene wakwe. Nanathu hi fanete hi tiha mbimo yo lera ni kugonda Dipswi da Txizimu. Atiya nda lisima ka wukhozeli wathu ka Jehovha, nguko ti hi vhuna ti to hi tshuketa hafuhi ni nene. (Mas. 73:28) Ngako hi txi gonda Bhiblia kota mwaya ti nga vhuna vanana ti to ve kulisa wuxaka wawe ni Jehovha Tate wathu wa lirando.—Lera Masalmo 48:13.

12. Hi gonda txani ka nzila yi Jehovha a nga txi wu wona ngu mthumo wo aka ditenda ni silo sa kona?

¹² Hi khozela Jehovha ngako hi txi pateka ko aka ni kuwuseta tinyumba ta wukhozeli. Bhiblia yi womba ti to mthumo wo maha ditenda ni silo sa kona wu ti pateka ka mithumo ya “wukhalo wo sawuleka.” (Eks. 36:1, 4) Jehovha a wona mthumo awu hi wu mahako wo aka tinyumba ta Mfumo ni tinyumba timwani ta wukhozeli kota mthumo wo sawuleka. Vanathu vamwani va heta mbimo yo tala va txi pateka ka mthumo wuwa. Ha bonga ngutu mthumo awu va wu mahako wo aka ni kuwuseta tinyumba ta wukhozeli. Phela vona va maha mithumo yimwani yo fana ni kupateka ka mthumo wo txhumayela. Ni ku vamwani va thuma kota vanyaphandule. Se madhota ma nga kombisa ti to ma seketela mthumo wuwa wo aka ni kuwuseta tinyumba  ta wukhozeli ngu ku va tumelela vanathu vonevo ti to ve thuma kota vanyaphandule ngako va txi faneleka. Ti si nga ni mhaka ni ti to hi ni wusikoti ka mthumo wo aka mwendo nem, hotshethu hi nga pateka ko wuseta tinyumba ta wukhozeli ti to ti zumba ti di basile.

13. Hi fanete ku yi wona ngu nzila muni miningelo ayi hi humisako kasi kuseketela Mfumo?

¹³ Hi khozela Jehovha mbimo yi hi seketelako mthumo wa Mfumo ngu kumaha miningelo. Vaisrayeli va ti fanete kutsula ni miningelo mbimo yi va yako ka mibuso. (Dhewut. 16:16) Vona va ti fanete kumaha miningelo yoneyo ngu kuya ngu siemo sawe. Eto ti txi ninga mkhanjo wo kombisa kubonga totshe ati Jehovha a nga txi va mahela kasi ku ve wuyela ngu didhawa da moya. Hi maha txani ti to hi kombisa lirando lathu ngu Jehovha ni kukombisa kubonga sakudya sa moya asi a hi ningako? Yimweyo ya tinzila ngu maha mningelo kasi kuvhuneta ka dibanza dathu mwendo kuvhuneta ka mthumo wa hamafuni kotshe ngu kuya ngu siemo sathu. Mpostoli Paulo a wombile tiya: “Ngako ku di ho kuxuva kuhumisa misengo, sa amukeleka asi m’thu a ku naso; kha ku nga ni mhaka ya si a ku singa naso.” (2 Vak. 8:4, 12) Jehovha wa ninga lisima miningelo ayi hi humisako ti txi huma mbiluni ti si nga ni mhaka ni ti to nja mpimo muni.—Marku 12:42-44; 2 Vak. 9:7.

14. Ngu kuya ngu dibhuku da Mavingu 19:17, Jehovha a txi wonisa kutxani txivhuno atxi hi ningako vanathu?

¹⁴ Hi khozela Jehovha mbimo yi hi vhunako vanathu ava va ku ka txilaveko. Jehovha a thembisile kuhakela Vaisrayeli ava va nga txi vhuna sisiwana. (Dhewut. 15:7, 10) Se mbimo yimwani ni yimwani ayi hi vhunako awu aku ni txilaveko, Jehovha a ti wona hi txo ninga ene txihiwa txonetxo. (Lera Mavingu 19:17.) Ngu txikombiso, mbimo Makristu a Filipiya ma nga rumela sihiwa ka mpostoli Paulo mbimo yi a nga ti jele ene a si woni kota “mhamba yo amukeleka ni kutsakisa Txizimu.” (Vaf. 4:18) Se alakanyisisa ngu va u nga vhunako dibanzani kwako se u ti wotisa tiya ‘Ina ku ni wu ni nga mu vhunako?’ Jehovha wa tsaka ngutu ngako a txi hi wona hi txi thumisa mtamo wathu, mbimo yathu, ni silo asi hi ku naso ti to hi vhuna vamwani. Jehovha a wona eto kota txienge txa wukhozeli wathu.—Jak. 1:27.

15. Hambiku ti lavako mbimo ni mizamo ti to hi seketela wukhozeli wa ditshuri, ngu kutxani i si nga mrwalo?

¹⁵ Ti lava mizamo ni mbimo ti to hi seketela wukhozeli wa ditshuri. (1 Joh. 5:3) Ngu kutxani? Nguko athu hi khozela Jehovha nguku hi mu randako. Alakanya ngu mwanana awu a lavako kuningela txihiwa tate wakwe. Ene a nga heta mbimo lapha a txi mu dhezenyara. Kambe mwanana eneyo kha ti soli a txi khene a hetile mbimo yakwe mahala. Ngu kutxani? Nguko ene wa mu randa tate wakwe, ni ku wa tsaka ngutu ngu ku mu ninga txihiwa txile. Ngu ha kufanako, aku hi randako Jehovha ha tsaka ngutu kuheta mbimo yathu ni mtamo wathu kasi ku hi seketela wukhozeli wa ditshuri.

16. Ngu kuya ngu Vahebheru 6:10, Jehovha awu wonisa kutxani mthumo awu hi mu mahelako?

¹⁶ Vaveleki ava va ku ni lirando kha va rinzeli ti to vanana vawe ve va ninga sihiwa si si fanako. Vona va tiziva ti to mwanana mmwani ni mwani wa hambana. Ngu ha kufanako Tate wathu wa nzumani nene wa pfisisa txiemo txathu. Ti nga maha awe u txi maha to pinda ti vamwani va mahako. Mwendo ti nga maha u si ti koti kumaha to tala kufana ni vamwani,  ti nga maha ngu ko na ha ka tanga yako, dihanyo dako ni wutixamuleli wa mwaya. Kambe u nga godholi. (Vag. 6:4) Jehovha kha na mbi divala mthumo wako. Jehovha wa tsaka ngako u txi mu thumela ngu mbilu yako yotshe ni ngu txikongomelo txa txinene. (Lera Vahebheru 6:10.) Jehovha wa tiziva ati u ti xuvako ka mbilu yako. Ene a lava ti to u tsaka ni kueneliseka ngu wukhozeli wako.

17. a) Ngako hi txi wona nga timwani ti patekako ka wukhozeli wathu ta karata, ngu tihi ti nga hi vhunako? b) Ina ku ni ti nga kuvhuna ati ti manekako ka dibhokiso di di ku “ Wukhozeli wa ditshuri wa ninga litsako”?

¹⁷ Hani ngako hi txi ti wona ti txi hi karatela kumaha mithumo yimwani ayi yi patekako ka wukhozeli wathu, yo fana ni gondo ya m’thu apune ni mthumo wo txhumayela? Ngako u txi tolovela kumaha mithumo yiya mbimo yotshe u na yi tsakela ni ku u na wuyelwa ngu yona. Hi nga fananisa mithumo ayi yi patekako ka wukhozeli wathu ni mthumo wo kari wo fana ni kutiolola mmidi mwendo kutrenara txitrumentu txo kari. Ngako hi si toloveli kutiolola mwendo kutrenara txitrumentu txonetxo hi na mbi tshukwatisa. Kambe alakanya u txo maha eto ditshiku di ditshiku, hi nga khata ngu kumaha kudotho-kudotho ngu kutsimbila ka mbimo hi laphisa mbimo hi yi hetako. Mbimo yi hi wonako ti to mizamo yi hi yi mahako ya hi wuyelisa ti na hi ninga mtamo ti to hi engetela mbimo yi hetako hi txi maha toneto ni ku hi na mana litsako ka toneto. Ti ngu ha kufanako ni wukhozeli wathu.

18. Ngu tihi ati i ku ta lisima ngutu kwathu? Ni ku ngu yihi wuyelo hi yi manako?

¹⁸ Kumaha totshe ti u nga ti kotako ti to hi seketela wukhozeli wa Jehovha ngu tona i ku ta lisima ngutu ka wutomi wathu. Kota wuyelo athu ha mana litsako, hi ni txikongomelo ka wutomi ni ku hi ni themba yo khozela Jehovha ngu ha ku si gumiko. (Mav. 10:22) Konkuwa ha mana kudikha ka mialakanyo ngu kuziva ti to Jehovha wa hi vhuna mbimo yi u wonisanako ni sikarato. (Isaya 41:9, 10) Ngu toneto hi ni sivangelo so hi tsaka mbimo yi hi khozelako Jehovha nguko ene wa fanelwa ngu “kuamukela kupfaliswa, wudhumo ni mtamo” ngu sotshe sivangwa sakwe.—Mtu. 4:11.