1-2. Unsay atong himoon aron dawaton sa Diyos ang atong pagsimba?

 UNSAY imong mahunahunaan dihang madunggan nimo ang pulong nga “pagsimba”? Tingali makahunahuna kag mapainubsanong brader nga nagluhod duol sa iyang higdaanan ug kinasingkasing nga nag-ampo. O kaha makahunahuna kag malipayong pamilya nga nag-enjoy sa ilang pagtuon sa Bibliya.

² Nianang duha ka kahimtang, ang ilang ginahimo maoy buhat sa pagsimba. Dawaton ba ni Jehova ang ilang pagsimba? Oo, kon nahiuyon ni sa iyang katuyoan ug ila siyang gihigugma ug gitahod. Gihigugma nato pag-ayo si Jehova. Nahibalo ta nga angay siyang simbahon, ug gusto natong ihatag kaniya ang pinakamaayong pagsimba nga atong maarangan.

3. Unsay atong hisgotan niining artikuloha?

³ Niining artikuloha, atong hisgotan ang paagi sa pagsimba nga gidawat ni Jehova sa karaang panahon ug ang walo ka bahin sa pagsimba nga gidawat niya karon. Samtang ato ning hisgotan, puwede tang maghunahuna kon unsaon nato pagpauswag ang atong pagsimba. Hisgotan pod nato ang mga rason kon nganong makapalipay nato ang pagsimba kang Jehova.

4. Sa wala pa ang Kristohanong panahon, giunsa pagpakita sa mga magsisimba ni Jehova nga ila siyang gitahod ug gihigugma?

⁴ Sa wala pa ang Kristohanong panahon, ang matinumanong mga tawo sama ni Abel, Noe, Abraham, ug Job nagpakita sa ilang pagtahod ug gugma kang Jehova. Sa unsang paagi? Pinaagi sa ilang pagkamasinugtanon, pagtuo, ug mga halad. Ang  Bibliya wala espesipikong magsulti kanato kon unsay kinahanglan nilang himoon sa pagsimba kang Jehova. Pero klaro nga gihimo nila ang ilang pinakamaayo sa pagpasidungog kang Jehova, ug gidawat niya ang ilang pagsimba. Sa ulahi, gihatag ni Jehova sa mga Israelinhon ang Balaod pinaagi kang Moises. Ang Balaod naghisgot ug daghang instruksiyon kon unsay gusto ni Jehova nga paagi sa pagsimba kaniya.

5. Human sa kamatayon ug pagkabanhaw ni Jesus, unsa nay gusto ni Jehova nga paagi sa pagsimba Kaniya?

⁵ Human sa kamatayon ug pagkabanhaw ni Jesus, si Jehova wala na magsugo nga sundon ang Balaod ni Moises. (Roma 10:4) Sundon na sa mga Kristohanon ang bag-ong balaod, ang “balaod sa Kristo.” (Gal. 6:2) Masunod nila ni nga “balaod,” dili pinaagi sa pag-memorize ug pagsunod sa daghan kaayong sugo, kondili pinaagi sa pagsundog sa ehemplo ni Jesus ug pagpadapat sa iyang mga gitudlo. Karon, ang mga Kristohanon naghimo pod sa tanan nilang maarangan nga magmasinugtanon sa Kristo aron malipay si Jehova ug ‘mobati silag kahayahay.’—Mat. 11:29.

6. Sa unsang paagi makabenepisyo ta niining artikuloha?

⁶ Samtang atong hisgotan ang matag bahin sa atong pagsimba, pangutan-a ang imong kaugalingon, ‘Unsa nay akong pag-uswag aning bahina?’ Tingali makapangutana pod ka, ‘Mapauswag pa ba nako ang kalidad sa akong pagsimba?’ Angay kang malipay sa nahimo na nimong pag-uswag, pero maayo pod nga hangyoon nimo si Jehova nga tabangan kang makita kon unsa pay imong pauswagon.

7. Unsay pagbati ni Jehova sa atong kinasingkasing nga mga pag-ampo?

⁷ Nagsimba ta kang Jehova dihang mag-ampo ta niya. Sa Bibliya, ang atong mga pag-ampo gipakasama sa maayong pagkaandam nga insenso nga gitanyag sa tabernakulo ug, sa ulahi, sa templo. (Sal. 141:2) Ang kahumot nga gipatungha sa insenso nakapalipay sa Diyos. Ang ato pong kinasingkasing nga mga pag-ampo “makapalipay” niya bisag simple ra kaayo ang mga pulong nga atong gamiton. (Prov. 15:8; Deut. 33:10) Matandog gyod ang kasingkasing ni Jehova dihang atong isulti ang atong gugma ug apresasyon kaniya. Gusto niya nga isulti nato niya ang atong mga gikabalak-an, gilaoman, ug gipangandoy. Sa dili pa ka mag-ampo kang Jehova, maayo nga imong hunahunaon pag-ayo kon unsay imong isulti. Pinaagi niana, makatanyag kag pinakamaayong “insenso” sa imong langitnong Amahan.

8. Unsa ang maayo kaayong kahigayonan sa pagdayeg sa Diyos?

⁸ Nagsimba ta kang Jehova dihang ato siyang dayegon. (Sal. 34:1) Madayeg nato si Jehova pinaagi sa pagsulti ngadto sa uban nga giapresyar nato pag-ayo ang iyang nindot nga mga hiyas ug buhat. Kon mapasalamaton ta, daghan tag maayong masulti bahin kang Jehova. Pinaagi sa paggahin ug panahon sa pagpamalandong sa pagkamaayo ni Jehova—sa tanan niyang gihimo para nato—dili gyod ta mahutdag rason nga dayegon siya. Ang pagsangyaw maoy maayo kaayong kahigayonan sa ‘pagtanyag sa Diyos ug halad sa pagdayeg, ang bunga sa atong mga ngabil.’ (Heb. 13:15) Sama ra nga hunahunaon nato pag-ayo kon unsay atong isulti sa dili pa mag-ampo kang Jehova, angay pod natong hunahunaon pag-ayo kon unsay atong isulti sa atong mga masangyawan. Gusto nato nga pinakamaayo ang atong mahatag nga “halad sa pagdayeg.” Busa mosulti ta nga madasigon ug kinasingkasing dihang magsangyaw ta.

9. Sama sa mga Israelinhon sa karaang panahon, sa unsang paagi ta makabenepisyo sa pagtambong sa mga tigom? Paghisgot ug personal nga eksperyensiya.

 ⁹ Nagsimba ta kang Jehova dihang motambong tag tigom. Sa karaang panahon, ang mga Israelinhon giingnan: “Katulo sa usa ka tuig, ang tanang lalaki kinahanglang moatubang kang Jehova nga inyong Diyos sa dapit nga iyang pilion.” (Deut. 16:16) Kinahanglan nilang biyaan ang ilang mga balay ug uma nga walay magbantay. Pero gisaaran sila ni Jehova: “Walay bisan kinsa nga magtinguha sa inyong yuta samtang manungas mo aron moatubang kang Jehova nga inyong Diyos.” (Ex. 34:24) Tungod sa ilang lig-ong pagtuo kang Jehova, ang mga Israelinhon mitambong sa tinuig nga mga pista. Daghan nig kaayohan kanila. Pananglitan, mas milawom ang ilang kahibalo sa Balaod sa Diyos, nakapamalandong sila sa iyang pagkamaayo, ug nalipay sila sa pagpakig-uban niadtong nahigugma pod kang Jehova. (Deut. 16:15) Ingon ana pod ang atong makuhang mga kaayohan kon mohimo tag mga sakripisyo sa pagtambong sa mga tigom. Ug ma-imagine ba nimo kon unsa ka malipayon si Jehova dihang mohatag tag mubo ug maayong pagkaandam nga mga komento?

10. Nganong importanteng bahin sa atong pagsimba ang pagkanta?

¹⁰ Nagsimba ta kang Jehova dihang mokanta ta. (Sal. 28:7) Para sa mga Israelinhon, ang pagkanta maoy importanteng bahin sa ilang pagsimba. Si Haring David nagpilig 288 ka Levihanon ingong mga mag-aawit sa templo. (1 Cron. 25:1, 6-8) Karon, mapahayag nato ang atong gugma sa Diyos dihang mokanta tag mga awit sa pagdayeg. Dili kinahanglan nga nindot kaayo tag tingog. Hunahunaa ni: Dihang mosulti ta, “kitang tanan masayop sa makadaghan,” pero mosulti gihapon ta diha sa kongregasyon ug sa ministeryo. (Sant. 3:2; footnote) Busa, mokanta gihapon tag mga pagdayeg kang Jehova bisag dili kaayo ta nindot ug tingog.

11. Base sa Salmo 48:13, nganong ang pamilya angayng mag-eskedyul ug panahon para sa pagtuon sa Bibliya?

¹¹ Nagsimba ta kang Jehova dihang tun-an nato ang iyang Pulong ug tudloan ang atong mga anak bahin niya. Sa Igpapahulay, ang mga Israelinhon dili motrabaho, ug gamiton nila kanang adlawa aron palig-onon ang ilang relasyon kang Jehova. (Ex. 31:16, 17) Ang matinumanong mga Israelinhon nagtudlo sa ilang mga anak bahin kang Jehova ug sa iyang pagkamaayo. Angay pod tang mag-eskedyul ug panahon sa pagbasa ug pagtuon sa Pulong sa Diyos. Apil ni sa atong pagsimba kang Jehova ug makapasuod ni nato kaniya. (Sal. 73:28) Ug dihang magtuon ta ingong pamilya, matabangan nato ang atong mga anak nga masuod sa atong mahigugmaong Amahan sa langit.—Basaha ang Salmo 48:13.

12. Giunsa pag-isip ni Jehova ang buluhaton niadtong naghimo sa mga galamiton sa tabernakulo, ug unsay atong makat-onan niana?

¹² Nagsimba ta kang Jehova dihang magtukod ug magmentinar tag mga dapit sa pagsimba. Ang Bibliya nag-ingon nga ang paghimo sa tabernakulo ug sa mga galamiton niini maoy “balaang buluhaton.” (Ex. 36:1, 4) Karon pod, giisip ni Jehova ingong sagradong pag-alagad ang pagtukod ug mga Kingdom Hall ug ubang pasilidad sa organisasyon. Ang ubang igsoon naggahin ug dako kaayong panahon niini nga mga buluhaton. Di ba naapresyar kaayo nato ang ilang importanteng nahimo para sa Gingharian? Siyempre, mosangyaw pod sila. Ang uban gusto pa ganing magpayunir. Ang mga ansiyano makapakita sa ilang pagsuporta sa buluhatong pagpanukod pinaagi sa pag-approve niining kugihang  mga brader ug sister ingong payunir kon kuwalipikado sila. Hanas man ta sa pagpanukod o dili, kitang tanan makatabang sa paghinlo ug pagmentinar niini nga mga pasilidad.

13. Unsay angay natong pag-isip sa atong mga donasyon para sa buluhaton sa Gingharian?

¹³ Nagsimba ta kang Jehova dihang atong suportahan ang buluhaton sa Gingharian pinaagi sa atong mga donasyon. Dihang ang mga Israelinhon moatubang kang Jehova, kinahanglan nga naa silay dala. (Deut. 16:16) Magdala silag materyal nga regalo sumala sa ilang maarangan. Pinaagi niana, ikapakita nila nga mapasalamaton sila sa tanang gihimo ni Jehova para nila. Unsaon nato pagpakita ang atong gugma kang Jehova ug ang atong apresasyon sa espirituwal nga mga tagana nga atong nadawat? Ang usa ka paagi mao ang paghatag ug donasyon sa atong kongregasyon ug sa tibuok kalibotang buluhaton sumala sa atong maarangan. Si apostol Pablo miingon: “Kon naa na daan ang pagkaandam, ang paghatag mas dalawaton, sa ato pa, paghatag nga sumala sa kon unsay nabatonan sa usa, dili sa kon unsay wala niya.” (2 Cor. 8:4, 12) Si Jehova malipay kaayo sa atong kinasingkasing nga donasyon, bisag unsa pa ni ka gamay.—Mar. 12:42-44; 2 Cor. 9:7.

14. Base sa Proverbio 19:17, giunsa pag-isip ni Jehova ang atong pagtabang sa mga igsoon nga nanginahanglan?

¹⁴ Nagsimba ta kang Jehova dihang motabang ta sa mga igsoon nga nanginahanglan. Si Jehova nagsaad nga iyang panalanginan ang mga Israelinhon nga mahinatagon kaayo sa mga pobre. (Deut. 15:7, 10) Oo, sa matag higayon nga atong tabangan ang igsoon nga nanginahanglan, isipon ni ni Jehova nga atong regalo Kaniya. (Basaha ang Proverbio 19:17.) Pananglitan, dihang ang mga Kristohanon sa Filipos nagpadalag regalo kang Pablo sa napriso siya, gitawag niya ni nga “makapalipay nga halad para sa Diyos.” (Filip. 4:18) Hunahunaa ang mga igsoon sa kongregasyon ug pangutan-a ang imong kaugalingon, ‘Naa ba koy puwedeng tabangan?’ Malipay si Jehova dihang makita niya nga gigamit nato ang atong panahon, kusog, abilidad, ug materyal nga mga butang sa pagtabang sa mga nanginahanglan. Giisip niya ni nga bahin sa atong pagsimba.—Sant. 1:27.

15. Ang pagsimba kang Jehova nagkinahanglag panahon ug paningkamot, pero nganong dili ta mobati nga bug-at ni?

¹⁵ Ang pagsimba kang Jehova nagkinahanglag panahon ug paningkamot. Pero dili ni makapabug-at. (1 Juan 5:3) Ngano man? Kay gihigugma nato siya. Imadyina ang bata nga gustong mohatag sa iyang papa ug drowing. Tingali pila ka oras na siyang nagdrowing. Pero wala siya mobati nga sayang ang iyang panahon. Gimahal niya ang iyang papa, ug malipay siya sa paghatag kaniya niana nga regalo. Kay gihigugma pod nato si Jehova, malipay ta nga mogamit sa atong panahon ug kusog sa pagsimba kaniya.

16. Base sa Hebreohanon 6:10, unsay pagbati ni Jehova sa mga paningkamot sa matag usa nato aron mapalipay siya?

¹⁶ Ang mahigugmaong mga ginikanan dili magdahom nga parepareho ang regalo nga mahatag sa ilang mga anak. Kabalo sila nga lainlain ang kayang himoon sa ilang mga anak. Ingon ana pod ang atong Amahan sa langit. Nakasabot siya nga lainlain tag kayang himoon. Tingali mas daghan kag mahimo kay sa  uban. O kaha mas gamay ra ang imong mahimo tungod sa imong edad, panglawas, o mga responsibilidad sa pamilya. Pero ayawg kaluya. (Gal. 6:4) Dili gyod kalimtan ni Jehova ang imong ginahimo para niya. Kon himoon nimo ang tanan nimong maarangan ug maayo ang imong motibo, malipay siya niana. (Basaha ang Hebreohanon 6:10.) Makita ni Jehova bisan ang naa sa imong kasingkasing. Gusto niya nga malipay ka sa kon unsay kaya nimong ihatag sa pagsimba kaniya.

17. (a) Kon nalisdan ta sa ubang bahin sa atong pagsimba, unsay puwede natong himoon? (b) Unsay nadawat nimo nga kaayohan dihang imong gihimo ang usa sa mga buhat sa pagsimba nga gipakita sa kahong “ Dugangi ang Imong Kalipay”?

¹⁷ Unsay atong himoon kon nalisdan ta sa ubang bahin sa atong pagsimba, sama sa personal nga pagtuon o sa pagsangyaw? Makatabang kon pirme nato ning himoon, kay pinaagi niana mas mag-enjoy ug mas makabenepisyo ta. Ang atong pagsimba parehas sa pag-exercise o kaha pagpraktis ug tugtog sa usa ka instrumento. Kon panagsa ra nato ning himoon, dili kaayo ta mouswag. Pero imadyina nga midesisyon ta nga himoon ni kada adlaw. Tingali sa primero gamay ra nga panahon ang atong igahin, pero anam-anam nato ning dugangan. Dihang makita nato ang maayong mga resulta sa atong paningkamot, mas eksayted na ta nga mag-exercise o magpraktis, ug mas ma-enjoy na nato ni. Ingon ana pod kon bahin sa atong pagsimba.

18. Unsaon nato pagtuman ang katuyoan kon nganong nabuhi ta, ug unsay resulta kon ato nang himoon?

¹⁸ Matuman nato ang katuyoan kon nganong nabuhi ta kon atong simbahon si Jehova nga kinasingkasing. Kon ato nang himoon, magmalipayon ta ug mobatig katagbawan sa atong kinabuhi ug naa tay paglaom nga simbahon si Jehova hangtod sa hangtod. (Prov. 10:22) Naa tay kalinaw sa hunahuna kay nahibalo ta nga si Jehova motabang nato dihang makaatubang tag mga problema. (Isa. 41:9, 10) Naa gyod tay mga rason nga magmalipayon sa atong pagsimba sa atong mahigugmaong Amahan, nga takos “modawat sa himaya ug sa dungog” gikan sa tanan niyang linalang!—Pin. 4:11.