1-2. Ni enki ekirije kutuma Ruhanga yayikiriza okuramya kwitu?

 NI ENKI eki ori kutekateka wahurira ekigambo “okuramya”? Nobasa kuhika ori kutekateka aha muntu ofukami aha rubaju rw’ekitanda ari kushaba ninga aha b’omu ka abari kwega Bibuli.

² Ebyo byombi ni ebikorwa by’okuramya. Mbwenu shi Yehova nayija kwikiriza okuramya kwabo? Nakwikiriza baba bari kugezaho kukora ebi ari kukunda, bakamukunda kandi bakamuha ekitinisa. Nitukunda Yehova munonga. Nitumanya ku ari we oshemerire kuramibwa kandi nitwenda ngu tubikore omu buryo obu ari kusima.

3. Ni enki eki twaza kushwijuma omuri eki kicweka?

³ Omuri eki kicweka, twaza kushwijuma oburyo bw’okuramya obu Yehova yabire ari kwikiriza omuri Isirayeli y’omu bwire bwa kare, n’oburyo munana obu turi kubasa kuramyamu Yehova akikiriza okuramya kwitu. Ku turabe nitubishwijuma, buri omwe nabasa kutekateka aha bi ari kubasa kukora kugira ngu akizeho kuboneza okuramya kweye. Nambwenu twaza kushwijuma enshonga ahabw’enki okuramya okw’amazima kuri kutuma twashemererwa.

4. Ni bata oku abahereza ba Yehova b’omu bwire bwa kare bayerekire ku nibamuha ekitinisa kandi ku bari kumukunda?

⁴ Abahereza ba Yehova b’omu bwire bwa kare, nka Abeli, Nowa na Yobu bakereka ku nibaha Ruhanga ekitinisa kandi ku  bari kumukunda. Bata shi? Bakabyereka bari kumworobera, bari kumwikiriza kandi bari kumweha. Bibuli teri kugamba buri kintu cona eki bakozire omu kuramya Yehova. Konka bakaba nibakora cona eki bari kubasa kugira ngu bahimbise Yehova kandi bamuramye omu buryo obu ari kwikiriza. Bwanyima Yehova akaha Abisirayeli ebiragiro abirabize ahari Musa. Omuri ebyo biragiro hakaba harimu obuhabuzi obushoborokire ge, oburi kugamba aha bikwatirine n’oku babire bashemerire kuramya Yehova omu buryo obu ari kwikiriza.

5. Ni ziha mpinduka ezabireho omu kuramya okw’amazima Yesu ku yafire kandi akazoka?

⁵ Yesu ku yafire kandi akazoka, Yehova taragarukire kushaba abantu kugendera aha biragiro bya Musa. (Rom 10:4) Abakristo bakaba bashemerire korobera ekiragiro kisya, ni okugamba “ekiragiro ca Kristo.” (Gal 6:2) Bakaba bashemerire korobera eco kiragiro, atari okukikwata omu mutwe ahobwe bakaba bashemerire kutoreza ecokureberaho ca Yesu n’okugendera aha nyegesa zeye. Omuri obu bwire, Abakristo nibakora cona eki bari kubasa batoreza Yesu kugira ngu bahimbise Yehova kandi ‘batunge okuhumura.’—Mat 11:29.

6. Ni bata oku eki kicweka kiri kubasa kutugasira?

⁶ Ku turabe nitushwijuma buri buryo bw’okuramya, yebuze ngu, ‘ni eha ntunguka eyi nkozire ahari obu buryo bw’okuramya?’ Nambwenu nobasa kwebuza ngu, ‘mbehi tindi kubasa kukizaho kuboneza oburyo obu ndi kuramyamu?’ Nobasa kuba ori kushemerererwa oku ori kubikora hati konka noba oshemerire kushaba Yehova kugira ngu akukwase kushwijuma oku ori kubasa kuboneza okuramya kwawe.

7. Ni bata oku Yehova ari kureba eshara zitu ezirugire aha mutima?

⁷ Twaba turi kushaba nituba turi kuramya Yehova. Ebyahandikirwe nibigeranisa eshara zitu n’obubane obutebekanisibwe ge obwabire nibwotererwa omu ihema ry’okubuganiramu, rero bwanyima bukotererwa omuri hekalu. (Zab 141:2) Obwo bubane bukaba niburugamu akahoho akari kushemeza Ruhanga. Omu buryo nk’obwe, eshara zitu ezirugire aha mutima nizimushemeza n’obu twakuba tugambiremu ebintu ebyorobi. (Emi 15:8; Bir 33:10) Obwe rero, nitubasa kwesiga tutari kubanganisa ku kiri kushemeza omutima gwa Yehova yahurira ebigambo ebiri kwereka ku turi kumukunda kandi ku turi kumusima. Nayenda ngu tumugambire ebiri kutwemereza omutima, amasiko gitu n’ebyetengo byitu. Mbehi waza kuhika hihi ya Yehova omu shara tori kubasa kubanza wayetonda okatekateka oyetonzire aha bi waza kugamba? Ku orakikore basyoya noba waha Sho w’omu iguru ebirungi kukira ebindi ebiri nk’“obubane.”

8. Ni buha buryo burungi obu twine bw’okuhimbisa Ruhanga?

⁸ Twagambira abandi ebiri kukwata ahari Yehova nituba turi kumuramya. (Zab 34:1) Nituhimbisa Yehova turi kugamba emitwarize yeye mirungi n’emirimo yeye. Twaba twine ebintu ebi turi kusima Yehova nikituma twamuhimbisa. Ku turakwate obwire tukatekateka aha burungi bwa Yehova n’aha bintu byona ebi yatukorire titurije kubura eby’okumusima. Omurimo g’okuburira na go nigutuha omugisha g’okuhimbisa Ruhanga turi kumuha “ekitambo c’okusima c’eminwa yitu.” (Heb 13:15) Nk’oku turi kubanza twatekateka twetonzire aha bi twaza kugambira  Yehova omu shara, ni ko oku tushemerire kukikora twaba turi kutorana ebi turagambire abantu omu murimo g’okuburira. Nitwenda ngu “ekitambo kitu c’okusima” kibe kiri kirungi kukira ebindi. Omutima gwitu gwaba gwijwire okusima nitugira amani g’okugambira abandi amazima.

9. Nk’Abisirayeli ba kare, ni bata oku turi kugasirwa twateranira hamwe? Gamba ecokureberaho cawe.

⁹ Twaza omu nterane nituba twaramya Yehova. Abisirayeli bakaba bine ekiragiro ekiri kugira ngu: “Buri mwaka abantu bawe bona abetwa abashija baryaguma barebwe kashatu omu misho ga Yehova Ruhanga wawe omu mwanya ogu aritorana.” (Bir 16:16) Bakaba nibasiga amaka n’emisiri yabo bitine burinzi. Konka Yehova akaba yabaraganisize ngu: “Ku oriba ogire kurebwa omu misho ga Yehova kashatu omu mwaka, tihine muntu wena oriyetenga ensi yawe.” (Kur 34:24) Abisirayeli ababire bari kutina Ruhanga, bakaba nibesigira kimwe Yehova buri mwaka baza omuri ebyo biro bikuru. Eco kikaba nikituma batunga ebirungi byingi, harimu okukizaho kushoborocerwa ebiragiro bya Ruhanga, okutekateka aha burungi bwa Yehova, n’okugaruranamu amani n’Abisirayeli bagenzi babo. (Bir 16:15) N’itwe nitutunga ebirungi nk’ebyo twayeferereza tukaza omu nterane. Nambwenu tekateka aha ku Yehova ari kushemererwa twija tutebekanisize ekitekateko kigufu eki turagambe.

10. Ni bata oku okweshongora kiri ekicweka c’omugasho omu kuramya Yehova?

¹⁰ Twayeshongora nituba turi kuramya Yehova. (Zab 28:7) Abisirayeli bakaba nibareba ku okweshongora kiri ekicweka c’omugasho omu kuramya Ruhanga. Omugabe Dawudi akaba yatireho Abalevi 288 b’okweshongora omuri hekalu. (1 Bus 25:1, 6-8) Omuri obu bwire nitubasa kwereka Ruhanga ku nitumukunda turi kweshongora ebyeshongoro by’okumuhimbisa. Iraka ryitu oku ryakuba riri kona, eco ti co kikuru. Yetegereze eki cokureberaho: Twaba nitugamba “twena nitushobya omuri byingi,” konka eco tikiri kutuma tutagamba omu nterane n’omu murimo g’okuburira. (Yak 3:2) Omu buryo nkobwe, titushemerire kutekateka ngu obu iraka ryitu ritari rirungi tituri kubasa kuhimbisa Yehova turi kweshongora.

11. Nk’oku biri kugambwa omuri Zaburi ya 48:13, ahabw’enki tushemerire kutaho entebekanisa y’okwega Bibuli omu maka gitu?

¹¹ Twaba turi kweyegesa Ekigambo ca Ruhanga kandi tukegesa abana bitu ebiri kumukwataho nituba turi kuramya Yehova. Sabato ekaba netuma Abisirayeli bata aha rubaju emirimo yabo rero bagumya obunywani bwabo na Yehova. (Kur 31:16, 17) N’itwe tushemerire kutaho obwire bw’okushoma Ekigambo ca Ruhanga n’okuceyegesa. Eyo ntebekanisa ni emwe omu kuramya Yehova kandi netuma twakizaho kuba banywani beye. (Zab 73:28) Kandi twayega Bibuli turi hamwe n’ab’omu maka gitu nituba turi kukwasa abarikurataho ni okugamba abana bitu kukizaho kugira obunywani burungi na Tata w’omu iguru ori kutukunda, Yehova.—Shoma omuri Zaburi ya 48:13.

12. Ni enki eki turi kwegera aha ku Yehova yabire nareba omurimo gw’abakozire ah’ihema ry’okubuganiramu?

¹² Twayombeka omwanya g’okuramizamu kandi tukaguboneza nituba turi kuramya Yehova. Bibuli negamba ku okombeka ihema ry’okubuganiramu n’okutamu ebikoreso gwabire guri “omurimo oguri kwera.” (Kur 36:1, 4) N’omuri obu bwire, Yehova nareba ku okombeka Amaju g’Obukama n’agandi maju gitu guri omurimo oguri kwera. Hariho benetata na banyanyazi abari kumara  obwire bwabo omuri eyo mirimo. Mbehi titushemerire kwereka ku nitusima abari kushagika ogu murimo g’Obukama? Ni amazima na bo nibekwatanisa omu murimo g’okuburira. Hariho na bamwe abari kubasa kuba abapayoniya. Abazehe b’ekibina nibereka ku nibashagika eyo mirimo y’obwombeki bari kwikiriza abo benetata na banyanyazi abari kukora n’amani ngu babe abapayoniya caba kiri kubasika. Twaba turi kumanya kombeka ninga tutari kubimanya, twena twine omugisha g’okuboneza ago maju n’okugahunduza.

13. Tushemerire kureba tuta ebiconco ebi turi kuhayo omu kushagika omurimo g’Obukama?

¹³ Twahayo esente z’okushagika omurimo g’Obukama nituba turi kuramya Yehova. Abisirayeli bakaba batashemerire kwija omu misho ga Yehova n’engaro nsha. (Bir 16:16) Bakaba bashemerire kuretera Yehova ekiconco bakuratize embera za buri omwe. Eco kikaba nikituma bayereka ku nibasima Yehova, ahabw’entebekanisa yona y’okubakwasa omu kumuramya. Ni bata oku turi kubasa kwereka ku nitukunda Yehova kandi ku nitumusima ahabw’ebintu byona by’omu buryo bw’omwika ebi ari kutuha? Oburyo bumwe, ni okuhayo esente z’okukwasa ekibina eki turimu n’ez’okushagika omurimo omu nsi yona tukuratize embera ezi turimu. Entumwa Pawulo akakigamba nagira ati: “Ahakuba ahu okukunda kuri, nikwikirizibwa nk’oku omuntu ayine, ti nk’oku atine.” (2 Kor 8:4, 12) Yehova natusima ahabw’ebiconco byona ebi turi kumuha twihire aha mutima n’obu byakuba biri bice.—Mak 12:42-44; 2 Kor 9:7.

14. Tukuratize ebiri omu Migani 19:17, ku turi kukwasa benetata abine eki bari kwetenga, Yehova nabireba ata?

¹⁴ Twakwasa benetata abine eki bari kwetenga nituba turi kuramya Yehova. Yehova akaba yaraganisize Abisirayeli ku yabire arije kuhemba abari kukwasa aboro. (Bir 15:7, 10) Buzima, ku turi kukwasa mwenetata ninga munyanyazi oyine eki ari kwetenga Yehova nakireba nk’omugisha hari We. (Shoma omu Migani 19:17.) Ecokureberaho: Obu Abakristo b’omu Filipi bayohererize Pawulo ebiconco obu yabire ari omu kihome, akaceta “ekitambo ekiri kwikirizibwa kandi ekiri kusimwa Ruhanga.” (Fil 4:18) Nobasa kureba omu kibina rero oyebuza oti: ‘Mbehi hariho owu ndi kubasa kuyamba?’ Yehova nashemererwa ku ari kureba turi kukoresa obwire bwitu, amani gitu, obwenge bwitu n’ebintu ebi twine omu kukwasa abandi. Eco na co nakireba nk’omuringo g’okumuramya.—Yak 1:27.

15. N’obu okuramya Yehova omu buryo obu ari kusima kiri kushaba obwire n’amani, ahabw’enki kitari kurusya?

¹⁵ Okuramya Yehova nk’oku ari kwenda nikishaba obwire n’amani. Konka tikiri kurusya. (1 Yoh 5:3) Ahabw’enki? Ni ahabw’okuba rukundo eyi turi kukunda Yehova ni yo eri kutuma twamuramya. Tekateka aha mwana ocari muto oyine eki ari kwenda kuha ishe. Nikibasa kumutwarira obwire ari kukora ekishushani eki aramuhe. Ogo mwana tarije kwefuza ahabw’obwire obu atireho ari kukora eco kishushani. Ahakuba ari kukunda ishe nikimushemeza kumuha eco kiconco. Ni co kimwe ahakuba turi kukunda Yehova, nitushemerererwa kukoresa obwire bwitu n’amani gitu omu kugambira abandi ebiri kukwata aha kuramya okw’amazima.

16. Tukuratize ebiri omu Baheburayo 6:10, Yehova natureba ata ahabw’amani agu turi kutaho ngu tumuhereze?

¹⁶ Abazire abine rukundo nibaba batari kwetenga ebiconco ebiri kushushana aha bana babo. Nibaba nibamanya ku buri mwana atari  kushushana n’ondijo omu bi bari kukora. Ni co kimwe Tata w’omu iguru ori kutukunda namanya ge buri muntu. Nobasa kukora byingi kukira abandi abu ori kumanya ninga abu ori kukunda. Ninga nobasa kutakora byingi nk’oku abandi bari kubikora ahabw’eza bukuru, amagara mabi ninga emirimo y’omu ka. Konka otahwa amani. (Gal 6:4) Yehova tarije kwebwa omurimo ogu wamukorire. Waba ori kumuhereza oyihire aha mutima kandi oyine ekigenderwa kirungi noyija kumushemeza. (Shoma omu Baheburayo 6:10.) Yehova namanya ebi ori kuba ori kwenda kukora. Nayenda ngu oshemerererwe kandi omarwe n’okuramya oku ori kubasa kumuha.

17. (a) Ni enki eki turi kubasa kukora twareba ngu omu kuramya kwitu hariho ebiri kutugumira kukora? (b) Ni bata oku wagasirwa aha biri omu kashanduku akari kugira ngu: “ Yongera aha kushemererwa kwawe”?

¹⁷ Ni enki eki turi kubasa kukora caba nikitugumira kwekwatanisa omu buryo bumwe bw’okuramya nk’okweyegesa Bibuli ninga okuburira omu misho ga bona? Nitwija kureba ngu oku turi kukizaho kwekwatanisa omuri eyo mirimo ni ko turi kukizaho kushemererwa kandi tukagasirwa. Nitubasa kugeranisa okuramya kwitu n’okumanyiza omubiri ninga shi okutera ekikoreso c’omuziki. Twaba tutari kumanyiza omubiri ninga okutera ekikoreso c’omuziki burijo titurije kubigiraho obumanyi. Ni enki ekiri kubasa kurugamu twasharamu kubikora burizoba? Nitubasa kutandika turi kukora obudakika buce rero tuguma turi kweyongera mporampora. Ku turi kureba ebiri kurugamu ahabw’amani agu turi kutamu, nikija kutuma twakora munonga kugira ngu tukizeho kushemererwa. Mbehi wayetegereza oku turi kubasa kubigeranisa n’okuramya kwitu?

18. Ni biha bintu bikuru ebi tushemerire kukora kandi ni enki ekirije kurugamu?

¹⁸ Kukora eki turi kubasa cona omu kuramya Yehova, ni co kintu kirungi munonga eki turi kubasa kukora. Ku turakikore tusyo nitwija kutunga okushemererwa, tugire amagara marungi kandi tugire amasiko g’okuramya Yehova ebiro byona. (Emi 10:22) Twine obusinge bw’omu mutima ahabw’okuba nitumanya ku Yehova ari kukwasa abari kumuramya baba bine ebizibu. (Isa 41:9, 10) Twine enshonga nyingi ezishemerire kutuma twashemererwa ahabw’okuramya Tata w’omu iguru oshemerire “kuhebwa ekitinisa n’obushoborozi” n’ebi yahangire byona!—Kush 4:11.