1-2. Yika twatamba kulinga mba Yehova atayize uwayilo wetu?

 YIKA wakunyonga muze wakwivwa liji “uwayilo”? Kota wakunyonga hali ndumbu yoze wasa makungunwa hashi ni kulemba kuli Yehova ni mbunge yeswe shimbu kanda achipomba. Hanji wakunyonga hali asoko waze analilongesa Mbimbiliya ni chiseke.

² Ha yikuma yino yaali, atu jacho eswe kanawayila. Shina Yehova matayiza uwayilo wo? Ewa, mautayiza nyi yize analingi yinalite ni upale wenyi ni kumusolwela zango ni vumbi. Twakuzanga chinji Yehova. Tunanyingika ngwetu, iye mwe watela uwayilo wetu nawa tunazange kumuwayila mu jila yalita.

3. Yika mutulilongesa ha mutwe uno?

³ Ha mutwe uno, mutumonaho uwayilo uze Yehova apwile ni kutayiza ku mashimbu a kunyima. Hanyima, mutulilongesa majila nake waze mutuhasa kuwayilamo Yehova mu jila yalita musono. Muze tunalilongesa, tunyongenu chize mutuhasa kululieka uwayilo wetu kumeso ja Yehova. Mutulilongesa nawa chize kuwayila Yehova mu jila yalita chakwokesa uwahililo wetu.

4. Shimbu Yesu te kanda achiza hano hashi, kuchi tuvumbi twa Yehova asolwele ngwo kakumuvumbika ni kumuzanga?

⁴ Shimbu Yesu te kanda achiza hano hashi, malunga ashishika ngwe Abele, Noa, Apalahama ni Yombi kasolwele ngwo, kakuvumbika Yehova ni kumuzanga. Kuchi achilingile? Kachilingile ha kumwononokena, kumufuliela ni kumwaha yitapo.  Mbimbiliya kuyishi kusolola yuma yeswe yize ayo atambile kulinga mba awayile Zambi. Chipwe chocho, kasele tachi hanga ahalise Yehova, hachino iye yatayiza uwayilo wo. Ha kupalika cha mashimbu, Yehova yahana Shimbi ya Mose kuli A-Izalele. Shimbi jacho te jakuhana usongwelo ha chize atamba kuwayila Yehova mu jila yize akutayiza.

5. Yika yalumukine mu uwayilo wamwenemwene hanyima lia kufwa cha Yesu ni kumuhindwisa?

⁵ Hanyima lia kufwa cha Yesu ni kumuhindwisa, Yehova te keshi kwita nawa atu hanga akaule Shimbi ya Mose. (Roma 10:4) Akwa-Kristu te katamba kwononokena shimbi yaha, “shimbi ya Kristu.” (Ngala. 6:2) Ayo kakafupiwile kupwa ni katalilo wa chize mahasa kwononokena “shimbi” yino, alioze katambile kwimbulula chilweza cha Yesu ni kukaula malongeso jenyi. Ni musono nawa, akwa-Kristu kakusa tachi hanga embulule Kristu ha kuvwisa Yehova kuwaha ni ‘kuwana uhwimino’ ku mwono wo.—Mateu 11:29.

6. Kuchi longeso lino mulihasa kutukwasa?

⁶ Muze tunahengwola hita chikuma cha uwayilo wetu, lihule ngwe, ‘Yika nalulieka ha chikuma chino?’ Muhasa kulihula nawa ngwe, ‘Shina munguhasa kululieka mulali uze nakuwayilamo Yehova?’ Kwamba pundu, muhasa kuwahilila ha chize unakola ku ufulielo, alioze watamba nawa kwita kuli Yehova hanga akukwase kumona haze muhasa kululieka.

7. Kuchi Yehova akumona yilemba yetu ya ku mbunge?

⁷ Twakuwayila Yehova muze twakulemba kuli iye. Mbimbiliya yinambe ngwo, yilemba yetu yapwa ngwe insensu yize apwile ni kululieka kanawa hanga ayihane mu tabernakulu, kulutwe mu tembele. (Samu 141:2) Insensu yacho yapwile ni kutuhwisa lupembo mupema yoze te wakuvwisa Zambi kuwaha. Chizechene nawa, yilemba yetu ya ku mbunge, yakuvwisa Yehova kuwaha, chipwe ngwe mutuhona maliji akwamba. (Yishi. 15:8; Shimbi 33:10) Tuli ni shindakenyo ngwetu, Yehova kakuwahilila muze akutwivwa mutulemba kuli iye ni zango hamwe ni usakwililo. Iye kanazange hanga tumulweze yipikalo yetu, yize tunazange kulinga ni yize tunafupu. Shimbu kanda uchihanjika ni Yehova mu yilemba, muchilita chitangu kunyonga ha yize muhanjika. Nyi wachilinga, muhana kuli Tatenu wa mu malilu “insensu” yipema.

8. Uhashi uka tuli nawo wa kuhalisa Zambi?

⁸ Twakuwayila Yehova muze twakumuhalisa. (Samu 34:1) Twakuhalisa Yehova muze twakulweza akwetu chize twakulemesa yitanga ni milimo yenyi ya kukomwesa. Muze twakusakwilila Yehova ni mbunge yeswe, chakupwa chashi kumuhalisa. Nyi mutusa mashimbu hanga tupukune ha yuma yeswe yipema yize Yehova akutulingila, mutupwa ni yuma yinji yize muyitutwala hanga tumuhalise. Mulimo wa kwambujola wakutwaha uhashi wa kuhana “chitapo cha uhaliso kuli Zambi matangwa eswe, chenacho mihuko ya mivumbo yetu.” (Hepre. 13:15) Ngwe chizechene chinalite kulianga kunyonga ha yize mutuhanjika ni Yehova mu yilemba, chili nawa chilemu kulianga kunyonga ha yize mutuhanjika ni atu mu munda. Tunazange hanga “chitapo cha uhaliso” wetu chipwe chipema. Hachino, muze mutwambujola kuli akwetu mutuhanjika no ni mbunge yeswe.

9. Ngwe A-Izalele, yiwape yika twakuyuka muze twakukunguluka? Hana chilweza cha chize kukunguluka chakukwashile.

⁹ Twakuhalisa Yehova muze twakukunguluka. A-Izalele kaahele shimbi yinambe ngwo:  “Katatu ha mwaka, malunga eswe makasoloka kumeso ja Yehova Zambi yenu kuze iye matongola.” (Shimbi 16:16) Chino te chinalumbunuka ngwo, mazuwo ni minda yo muyisala chakuhona yoze mayifunga. Alioze Yehova yaalakenya ngwenyi: ‘Niumwe mutu kechi kazanga chifuchi che, muze mukanduka ukasoloke kumeso ja Yehova Zambi ye.’ (Kutuhu. 34:24) Kufuliela muli Yehova ni mbunge yeswe, chakwashile A-Izalele kuyaya ha yiwanyino yacho hita mwaka. Muze apwile ni kuchilinga, ayo te kakuzuka yiwape yinji. Chakutalilaho, kapwile ni kulilongesa yuma yinji hakutwala ku shimbi ja Zambi, kupukuna ha yuma yeswe yipema yize Yehova aalingilile, ni kuwahilila ha kupwa hamuwika ni atu waze te akuzanga Yehova. (Shimbi 16:15) Ni yetu twakuzuka yiwape yinji muze twakusa tachi hanga tukunguluke. Nawa Yehova kakuwahilila muze twakulilulieka hanga tuhane makumbululo ehi nawa autakamiso.

10. Mumu liaka kwimba chili chuma chilemu mu uwayilo wetu?

¹⁰ Twakuhalisa Yehova muze twakumwimbila miaso hamwe ni mandumbu jetu. (Samu 28:7) Kuli A-Izalele, kwimba chapwile chuma chilemu mu uwayilo wo. Mwanangana Ndawichi katongwele A-Levi 288 hanga apwe ni kwimba mu tembele. (1 Sango 25:1, 6-8) Musono, mutuhasa kusolola ngwetu twakuzanga Yehova ha kumuhalisa ni miaso, chipwe ngwe twakwimba kanawa hanji ka. Chakutalilaho, muze twakuhanjika “twakutalinga mu yuma yinji,” alioze chino kuchishi kutukwika kuhanjika muze tuli ha kukunguluka ni mu mulimo wa kwambujola. (Tia. 3:2) Chizechene nawa, kutwatambile kulitwamina kuhalisa Yehova ni miaso mumu ngwo, kutushi kwimba kanawa.

11. Kulita ni Samu 48:13, mumu liaka twatamba kusa mashimbu hanga tulilongese Mbimbiliya mu usoko?

¹¹ Twakuwayila Yehova muze twakulilongesa Mbimbiliya ni kulongesa ana jetu hakutwala kuli iye. Ha Sambata, A-Izalele kakapwile ni kukalakala nawa te kakuzachisa tangwa liacho hanga akolese usepa wo ni Yehova. (Kutuhu. 31:16, 17) A-Izalele ashishika kapwile ni kulongesa ana jo hakutwala kuli Yehova ni yuma yipema yize te akwalingila. Musono, ni yetu twatamba kusa mashimbu hanga tutange Mbimbiliya ni kulilongesayo. Chino chinalingi chihanda cha uwayilo wetu kuli Yehova, nawa chakutukwasa kukundama kuli iye. (Samu 73:28) Chikwo nawa, nyi twalilongesa hamuwika mu usoko, mutuhasa kukwasa munyachi waha hanji ngwetu, ana jetu hanga no apwe ni usepa upema ni Tata yetu wa zango, Yehova.—Tanga Samu 48:13.

12. Kuchi Yehova amwene mulimo wa kutunga tabernakulu ni yikumba yamo, nawa yika chino chinatulongesa?

¹² Twakuwayila Yehova muze twakutunga yihela yetu ya uwayilo ni kuyifunga. Mbimbiliya yinambe ngwo, kutunga cha tabernakulu ni yikumba yamo wapwile ‘mulimo usandu.’ (Kutuhu. 36:1, 4) Ni musono nawa, Yehova kakumona mulimo wa kutunga Mazuwo a Wanangana ni mazuwo akwo ngwe mulimo usandu. Mandumbu amwe kakupalikisa mashimbu anji mu milimo yino. Twakulemesa chinji tachi jize akusa hanga akwase mulimo wa Wanangana. Chipwe chocho, ayo nawa kakwambujola sango lipema. Amwe a kuli ayo kanazange kupwa mapionelu. Makulwana a mu chikungulwila masolola ngwo, kakulemesa mulimo wa kutunga ha kutayiza ni kawashi mandumbu jacho hanga apwe mapionelu muze mapwa ni uhashi wa kuulinga. Chipwe ngwe kutushi ni utotombo mu mulimo wa kutunga, nihindu mutuhasa kukwasa kululieka ni kufunga mazuwo jacho.

13. Mumu liaka chili chilemu kuhana milambu hanga tukwase mulimo wa Wanangana?

 ¹³ Twakuwayila Yehova muze twakuhana milambu hanga tukwase mulimo wa Wanangana. A-Izalele kaalwezele ngwo katambile kusoloka mokomoko kumeso ja Yehova. (Shimbi 16:16) Ayo te katamba kutwala mulambu kuli Yehova kulita ni uhashi wo. Chino te chakusolola ngwo, kanasakwilila ha yuma yeswe yize Yehova apwile ni kwalingila. Kuchi mutuhasa kusolola zango ni usakwililo wetu kuli Yehova ha yuma yeswe yize akutulingila? Jila yimwe yili kuhana milambu kulita ni yize tuli nayo hanga tukwase chikungulwila chetu ni mulimo wa kwambujola hashi heswe. Postolo Paulu kambile ngwenyi: “Nyi mbunge yiliko, muchipemena chikolo nikulita ni chize mutu mapwa nacho, hi nikulita ko ni chize keshi nacho.” (2 Kori. 8:4, 12) Yehova kakulemesa chinji milambu yize twakuhana ni mbunge yeswe chipwe ngwe yili yikehe.—Marku 12:42-44; 2 Kori. 9:7.

14. Kulita ni Yishima 19:17, kuchi Yehova akumona ukwaso uze twakuhana kuli mandumbu jetu?

¹⁴ Twakuwayila Yehova muze twakukwasa mandumbu jetu ha yize anafupiwa. Yehova kalakenyene kuwahisa A-Izalele waze te makwasa yiswale. (Shimbi 15:7, 10) Kwamba pundu, hita shimbu mutukwasa ndumbwetu yoze unafupiwa ukwaso, acho tunahana mulambu kuli Yehova. (Tanga Yishima 19:17.) Chakutalilaho, muze akwa-Kristu mu Fwilipu atumine chawana kuli Paulu mu zuwo lia ususu, iye yachivuluka ngwo, “mulambu wa kupemena chikolo kuli Zambi.” (Fwili. 4:18) Nyonga hali mandumbu mu chikungulwila chenu nawa lihule ngwe, ‘Shina kuli umwe yoze munguhasa kukwasa?’ Yehova kakuwahilila muze akumona chize twakuzachisa mashimbu, tachi, utotombo ni upite wetu hanga tukwase waze anafupiwa ukwaso. Kuli iye yino yinalingi chihanda cha uwayilo wetu.—Tia. 1:27.

15. Kuwayila Yehova mu jila yalita chakufupiwa mashimbu ni tachi, mba mumu liaka mutuhasa kwamba ngwetu hi chikalu ko?

¹⁵ Kuwayila Yehova mu jila yalita chakufupiwa mashimbu ni tachi. Alioze hi chikalu ko kuchilinga. (1 Yoa. 5:3) Mumu liaka tunambe chocho? Mumu twakuwayila Yehova hamukunda wa zango. Achinyonga hali umwe kanuke yoze unazange kuhana chawana kuli tato. Iye hanji mapalikisa mashimbu anji ha kumulingila yimwe. Chipwe chocho, kechi kulinyenyeta mumu lia mashimbu waze apalikisa. Iye kakuzanga tato, kashika mawahilila ha kumwaha chawana chacho. Chizechene nawa, yetu twakuzanga Yehova, kashika twakuwahilila ha kusa mashimbu ni tachi hanga tumuwayile.

16. Kulita ni A-Hepreu 6:10, kuchi Yehova akumona tachi jize twakusa hanga tumuvwise kuwaha?

¹⁶ Yisemi waze akwete zango, keshi kushimbwila kutambula yawana yalifwa kuli hita mwano. Ayo kananyingika ngwo ana kalisa nawa hita mwana kakwete utotombo wenyi. Chizechene nawa, Tata yetu wa mu malilu kananyingika yize hita umwe wa kuli yetu mahasa kulinga kulita ni uhashi wenyi. Muhasa kulinga yuma yinji kuhiana mandumbu je anji waze wanyingika nawa wakuzanga. Hanji kuushi kuhasa kulinga yuma yinji ngwe akwenu mumu lia miaka, musongo hanji mumu lia yiteli yize ukwete mu usoko. Nyi chocho, kanda uhonga. (Ngala. 6:4) Yehova kechi keza kavulama yize wakumulingila. Nyi mulinga yeswe yize muhasa ni nyonga lialita, iye mawahilila. (Tanga A-Hepreu 6:10.) Yehova  mahasa kumona chipwe yuma yize yili ku mbunge ye. Iye kanazange uwahilile ha yeswe yize muhasa kulinga hanga umuwayile.

17. (a) Nyi mumona ngwe kuwahashile kulinga yimwe yize yinatale ha uwayilo we kuli Yehova, yika muhasa kulinga? (b) Kuchi wayukile ha kukaula chimwe chikuma chili ha mushete, “ Weza Uwahililo we”?

¹⁷ Mba yika mulinga nyi kuushi kulinga kanawa yimwe yikuma yize twatongola hano ngwe, longeso lia wika hanji kwambujola ha mbunga? Kwamba pundu, nyi walihana ha kulinga yuma yacho muyizanga nawa muyuka chinji. Yino ye yakulingiwa nyi mutuputuka kunana-nana mujimba hanji kulilongesa kwimba yimwe. Nyi kutwayilingile mashimbu eswe, kutuchi kuya kulutwe. Kashika, mutuhasa kuyilinga matangwa eswe ha kuputuka ni maola akehe, hanyima mba mutwokesa. Muze mutumona yuma yipema yize tunayuka ha tachi tunase, mutuwahilila ni kuzanga kulinga yuma yacho. Yino ye mutuhasa kwamba nawa ha tachi jize twakusa hanga tuwayile Yehova.

18. Chuma chika chilemu chize twatamba kulinga, nawa yika muyilingiwa nyi twachilinga?

¹⁸ Yehova katutangile hanga tumuwayile. Kashika muze twakuchilinga ni mbunge yeswe, twakuwahilila, twakupwa ni mwono upema ni kutalatala cha kuwayila Yehova ku miaka yeswe. (Yishi. 10:22) Chikwo nawa, twakupwa ni sambukila ya ku mbunge mumu tunanyingika ngwetu, Yehova kakukwasa tuvumbi twenyi muze akupwa ni yipikalo. (Iza. 41:9, 10) Kwamba pundu, kuli yuma yinji yize muyitwaha uwahililo muze tunawayila Tata yetu wa zango, yoze watela “kutambula uhenya ni ulemu” wa yitangiwa yenyi yeswe!—Uso. 4:11.