1-2. Kan biaknak cu zeinihdah Pathian cohlanmi a siter lai?

 “BIAKNAK” timi biafang na theih tikah zeidah na lung ah a chuak? Unaupa pakhat nih a ih hlanah Jehovah sinah khukbil in thla a cammi kha na lung ah a chuak men ko lai. Asiloah chungkhar pakhat nih nuam tein Baibal hlathlainak an tuahmi kha na ruah men ko lai.

² Mah thil sining pahnih cu biaknak tuahsernak ah aa telmi an si. An biaknak kha Jehovah nih a cohlang lai maw? A duhnak ningin an nun i Jehovah kha an dawt, an upat ahcun a cohlan ko lai. Jehovah kha kan dawt tuk. Anih cu biak awkah aa tlakmi a si ti kha kan hngalh i a ṭha bikmi lam in biak kan duh.

3. Hi capar ah zei kong dah kan i ruah hna lai?

³ Hi capar ah hlanlio chan i Jehovah cohlanmi biaknak phun le tuchan i Pathian cohlanmi biaknak phun pariat kong kan i ruah hna lai. Mah kong kan i ruah lioah kan biaknak ṭhanchoter khawh ning kong kan ruah khawh. Cun a hmaanmi biaknak nih a kan nuamhternak a ruang zong kan i ruah hna lai.

4. Khrihfa chan hlan i Jehovah a biami hna nih Jehovah cungah upatnak le dawtnak kha zeitindah an langhter?

⁴ Abel, Noah, Abraham le Job ti bantuk hlanlio Khrihfa chan hlan i zumhfekmi pa hna nih Jehovah cungah upatnak  le dawtnak kha an rak langhter. Zeitin in dah? Nawlngaihnak, zumhnak le mahca ṭhatnak an hlawtnak thawngin an langhter. Baibal nih biaknak caah an tuah a herhmi thil vialte kha a langhter lo. Asinain an si khawh chungin Jehovah kha an thangṭhat i an biaknak cu Jehovah caah cohlan awk tlak a si. Jehovah nih Abraham tefa kha Moses Nawlbia a pek hna. Mah nawlbia hna ah Jehovah nih a cohlanmi lam in zeitindah biak ding timi cuset khaset lamhruainak hna aa tel.

5. Jesuh a thih i a thawh ṭhan hnuah a hmaanmi biaknak ah zei thlennak dah a rak um?

⁵ Jesuh a thih i a thawh ṭhan hnuah Jehovah nih Moses Nawlbia zulh dingin a kan hal ti lo. (Rom 10:4) Khrihfa hna nih “Khrih nawbia” timi nawlbia thar kha an zulh. (Gal. 6:2) Mah “nawlbia” kha i cinken in tuah dingmi le tuah lo dingmi cazin ningin zulh lawng si loin Jesuh nunning le cawnpiaknak hna i zohchunhnak thawngin mah kha an zulh khawh. Tuchan Khrihfa hna zong nih Jehovah lunglawmhter awk le anmah theng “dinhnak [hrimhnak, NW]” hmuh awkah an si khawh chungin Khrih hnu kha an zulh.—Matt. 11:29.

6. Hi capar in zeitindah ṭhatnak kan hmuh khawh?

⁶ Kan biaknak ah aa telmi a kong pakhat cio kan i ruah tikah ‘mah kong he aa tlaiin ṭhancho awkah zeidah ka tuah?’ tiah i hal. Cun ‘ka biak ning ka ṭhanchoter kho lai maw?’ tiah i hal. Atu na tuahmi ah naa nuam kho, asinain ṭha deuh in tuah khawh ning hngalh awkah Jehovah sinah bawmhnak na hal khawh.

7. Lungtak tein thla kan cammi kha Jehovah nih zeitindah a hmuh?

⁷ A sinah thla kan camnak thawngin Jehovah kha kan biak. Baibal nih kan thlacamnak kha puan biakinn le a hnuah sakmi biakinn ah ṭha tein timhtuah in khanghmi zihmui he a tahchunh. (Salm 141:2) Mah zihmui in a chuakmi rimthaw cu Pathian caah duhnungmi a si. Cu bantukin biafang sawhsawh te kan hman hmanhah lungtak tein thla kan cammi cu Pathian nih “a lawmhmi” a si. (Ptb. 15:8; Deut. 33:10) Jehovah nih amah kan dawtnak le kan i lawmhnak kong kan phuanmi a theih tikah Jehovah aa lawm ti zumh awkah a ruang ṭha kan ngei. Kan lungretheihnak, kan i ruahchanmi le kan saduhthah hna kha ka chim hna seh ti a duh. Thla kan cam hlanah kan chim dingmi kong kha ṭha tein kan ruah hmasa awk a si. Cutin na tuah ahcun vancung kan Pa kha a ṭha bikmi “zihmui” khanghthawinak na pekmi a si lai.

8. Pathian thangṭhat awkah zei caanṭha dah kan ngeih?

⁸ Amah kan thangṭhatnak thawngin Jehovah kha kan biak. (Salm 34:1) Jehovah i a ṭha tukmi a sining le a rianṭuannak kan sunsaknak kong kan chimnak thawngin kan thangṭhat. A cungah kan i lawmh ahcun Jehovah kong chim ding tampi kan ngei lai. Jehovah ṭhatnak kong le kan caah a kan tuahpiakmi thil tampi kha a caan pek in ṭha tein kan ruah ahcun amah thangṭhat awk a ruang tampi kan ngei lai. Phungchim rian nih a hleiin ‘Pathian sinah thangṭhat raithawinak’ pek awk caanṭha a kan ngeihter. (Heb. 13:15) Jehovah sin thla kan cam hlanah kan chim dingmi kong ṭha tein kan ruah hmasa a hauh bantukin phungchimnak ah kan tonmi hna sinah kan chim dingmi kong zong ṭha tein kan ruah awk a si. ‘Thangṭhat raithawinak’ kha a ṭha bikmi lam in pek kan duh. Midang sin biatak kong kan chim tikah lungtho tein kan chim.

9. Hlanlio Israel mi bantukin pumhnak in zeitindah ṭhatnak kan hmuh khawh? Pumpak hmuhtonnak pakhat in chim.

 ⁹ Kan i pumhnak thawngin Jehovah kha kan biak. Hlanlio Israel mi cu hitin nawl pek an si: “Kumkhat ah nan lak i pa vialte nih BAWIPA hmaiah a thim laimi hmun ah voithum an chuak lai.” (Deut. 16:16) Mah tikah an inn le an lo kha kaltak a hau. Asinain Jehovah nih hitin bia a kamh hna: “BAWIPA nan Pathian ka hmai i chuah awkah . . . nan rat tikah hin, hi caan ah hin nan ram cu ahohmanh nih tei an i zuam lai lo.” (Ex. 34:24) Pathian a ṭihmi Israel mi nih Jehovah kha an zumh i an i bochan caah kum fatin tuahmi puai ah an rak kal. Cucaah thluachuah tampi an hmu; Pathian Nawlbia kha an hngalhthiam chin, Pathian ṭhatnak kha ṭha tein an ruah khawh i zumtukhat pawl he thazaang a pemi hawikomhnak zong an tuah khawh. (Deut. 16:15) Khrihfabu pumhnak ah i pumh dingin mahca ṭhatnak kan hlawt tikah cu bantuk ṭhatnak kan hmu ve. Sullam a ngeimi a phi tawite pek dingin kan i timh tikah Jehovah zeitluk in dah aa lawmh lai ti kha ruat.

10. Hlasaknak cu kan biaknak ah zeitluk in dah a biapit ve?

¹⁰ Hla kan saknak thawngin Jehovah kha kan biak. (Salm 28:7) Israel mi nih hlasaknak kha biaknak ah a biapi tukmi pakhat in an hmuh. Siangpahrang David nih Levi mi 288 kha biakinn ah hlasatu in rian a pek hna. (1 Chan. 25:1, 6-8) Tuchan ah thangṭhatnak hla kan saknak thawngin Pathian kan dawtnak kha kan langhter khawh. Kan aw a ṭhat, a chiat cu a biapimi a si lo. Mah tahchunhnak hi ruathmanh: Bia kan chim tikah “kan dihlak hin palhnak kan tuah cio tawn,” asinain mah nih Khrihfabu le phungchimnak ah biachim loin a kan umter lo. (Jeim 3:2) Cu bantukin kan aw a ṭhat lo hmanhah Jehovah thangṭhatnak hla saknak kha kan i dawnhter awk a si lo.

11. Salm 48:13 ningin zeicah chungkhar Baibal cawnnak caah a caan kan suai awk a si?

¹¹ Baibal kan hlathlai i kan fale Pathian kong kan cawnpiak hnanak thawngin Jehovah kha kan biak. Sabbath ni nih Israel mi kha nifate an ṭuanmi rian in i dinh ding le Jehovah he an i pehtlaihnak ah lungthin pek dingin caanṭha a ngeihter hna. (Ex. 31:16, 17) Zumhfekmi hna nih an fale kha Jehovah kong le a ṭhatnak kong an cawnpiak hna. Tuchan ah kannih zong Baibal rel awk le hlathlai awkah a caan kan suai a hau. Mah cu Jehovah kan biaknak ah aa tel i mah nih amah he i naih deuh awkah a kan bawmh khawh. (Salm 73:28) Chungkhar ningin hlathlainak kan tuah tikah kan fale kha dawtnak a ngeimi, vancung kan Pa he pehtlaihnak ṭha ngeih awkah kan bawmh khawh hna.—Salm 48:13 rel.

12. Jehovah nih biakinn thilri a sermi pawl i an rian a hmuh ningin zeidah kan cawn khawh?

¹² Biaknak caah hmanmi inn hna kan sak i kan zohkhenhnak thawngin Jehovah kha kan biak. Baibal nih biakinn saknak le a chung thilri pawl sernak rian kha “a thiangmi rian” tiah a ti. (Ex. 36:1, 4, NW) Tuchan zongah Jehovah nih Biakinn saknak le Pennak rian he aa tlaimi a dang inn hna saknak rian kha a thiangmi rian in a hmuh. Unau cheukhat nih mah rian hna ṭuannak caah an caan tampi an pek. Mah a biapimi Pennak rian bawmhnak kha kan sunsak tuk ko lo maw? Annih cu phungchim rian zongah an i tel. An lak i cheukhat cu hmaikal ṭuan hmanh an duh men lai. Mah rian aa zuammi unau pawl kha Khrihfa upa nih hmaikal rian ah sining an tlinh tikah rian an pek hnanak thawngin  innsaknak rian an bawmh kha an langhter. Innsaknak rian kha kan thiam ah siseh, thiam lo ah siseh kan dihlak in mah inn pawl thianhnak le zohkhenhnak ah kan i tel kho.

13. Pennak rian bawmh awkah thawhlawm kan pekmi kha zeitindah kan hmuh awk a si?

¹³ Pennak rian bawmh awkah thawhlawm kan peknak thawngin Jehovah kha kan biak. Israel mi cu kut ro in Jehovah hmaiah an chuak lo. (Deut. 16:16) An sining cungah i hngat in laksawng an i put. Cuticun Jehovah nih an caah a tuahpiakmi vialte hna cung an i lawmhnak kha an langhter. Jehovah kan dawtnak le kan hmuhmi thlaraulei thil cung kan i lawmhnak kha zeitindah kan langhter khawh? Kan langhter khawhnak lamkhat cu kan Khrihfabu le vawleicung pumpi rian bawmh awkah kan si khawh tawkin thawhlawm kan peknak thawngin a si. Lamkaltu Paul nih hitin a ti: “Pek duhnak lungthin nan ngeih ahcun nan ngeih lomi thil zoh in si loin nan ngeihmi thil zoh in Pathian nih nan laksawng cu aan cohlanpiak hna lai.” (2 Kor. 8:4, 12) Kan pekmi cu tlawmte a si hmanhah lungtak tein kan pekmi kha Jehovah nih a sunsak.—Marka 12:42-44; 2 Kor. 9:7.

14. Phungthlukbia 19:17 ningin bawmh a herhmi unau pawl kan bawmhmi hna kha Jehovah nih zeitindah a hmuh?

¹⁴ Bawmh a herhmi unau pawl kan bawmh hnanak thawngin Jehovah kha kan biak. Misifak cungah siannak a langhtermi Israel mi kha Jehovah nih kaan cham ṭhan hna lai tiah bia a kamh hna. (Deut. 15:7, 10) Bawmh a haumi unau pakhat kan bawmh fatin Jehovah nih amah laksawng kan pekmi bantukin a hmuh. (Phungthlukbia 19:17 rel.) Tahchunhnak ah, Filipi khua i Khrihfa hna nih thong a tlami Paul sin laksawng an kuatmi kha Paul nih “Pathian nih a duh i a cohlanmi raithawinak” a si tiah a ti. (Fil. 4:18) Nan Khrihfabu i unau pawl kong kha ruat law ‘Ka bawmh khawhmi pakhatkhat an um maw?’ tiah i hal. Bawmh a herhmi hna bawmh awkah kan caan, kan thazaang, kan thiamnak le kan thilri kan hmanmi a hmuh tikah Jehovah cu aa lawm. Mah kha biaknak ah aa telmi in a hmuh.—Jeim 1:27.

15. A hmaanmi biaknak caah kan caan le kan thazaang kan pek ko nain zeicah mah cu thilrit a si lo?

¹⁵ A hmaanmi biaknak caah a caan le zuamnak a hau. Asinain mah cu thilrit a si lo. (1 Johan 5:3) Zeicah? A ruang cu Jehovah kha kan dawt caah kan biakmi a si. A pa sinah thil pakhat pek a duhmi ngakchia pakhat kha na mitthlam ah cuanter hmanh. A pa ca hmanthlak suainak ah suimilam tampi a hman men lai. A fapate nih mah suainak caah a caan a pekmi kha aa ngaichih lo. A pa kha a dawt caah laksawng a pek tikah aa lawm tuk. Cu bantukin Jehovah kan dawt caah amah biaknak ah kan caan le kan thazaang kan hman tikah kan i lawm.

16. Hebru 6:10 ningin amah lunglawmhter awkah kan i zuamnak kha Jehovah nih zeitindah a hmuh?

¹⁶ Dawtnak a ngeimi nulepa nih an fale pakhat cio sinin aa khatmi laksawng an i ruahchan lo. An fale pakhat cio cu an i dang i an sining zong aa khat lo ti kha an hngalh. Cu bantukin vancung kan Pa nih pakhat cio kan sining kha ṭha tein a hngalh. Na hngalhmi le na dawtmi, mi tampi hna nakin tam deuh in na tuah khawh men lai. Asiloah na kumkhua, na ngandamnak le chungkhar rian ruangah midang tlukin na tuah kho men lai lo. Asinain na lungdong hlah. (Gal. 6:4) Jehovah nih na ṭuanmi kha a philh lai lo. A hmaanmi lungput  he a ṭha bik in na ṭuan ahcun Pathian lung na lawmhter lai. (Hebru 6:10 rel.) Jehovah nih tuah na duhmi hmanh kha a hngalh. Na tuah khawhmi lam in na biak tikah lawmhnak le lungsinak hmu seh ti aan duh.

17. (a) Biaknak tuahsernak cheukhat tuah kan i harh ahcun zei kehlan hna dah kan hlan khawh? (b) “ Naa Lawmhnak Karhter” timi rinli kulh ah langhtermi a kong pakhat cio nih zeitindah aan bawmh khawh?

¹⁷ Pumpak hlathlainak asiloah phungchimnak ti bantuk biaknak tuahsernak cheukhat tuah awkah kan i harh ahcun zeitin? Mah tuahsernak hna kha kan tuah deuhdeuh tikah kan i nuam deuh lai i mah in ṭhatnak kan hmu deuhdeuh ve lai. Kan biaknak kha guitar tum cawnnak he kan tahchunh khawh. A caancaan lawngah kan tum ahcun kan ṭhangcho kho lai lo. Asinain nifatin kan cawng hei ti u sih. A hmasa ah caan tawi tein kan thawk khawh i a hnuah caan sau deuh kan pek khawh. Kan i zuamnak ruangah a ṭhami a phichuak kan hmuh tikah mah caan kha kan i ngaih tuk lai i kan i nuam tuk ko lai. Kan biaknak zongah cutin tuah khawh a si ve.

18. Kan tuah khawhmi a biapi bikmi cu zeidah a si i cutin kan tuah ahcun zeidah a cang lai?

¹⁸ A ṭha bikmi lam in Jehovah biak cu kan tuah khawhmi lakah a biapi bikmi a si. Cutin kan tuah ahcun a nuammi le sullam a ngeimi nunnak kan ngei lai i zungzal in Jehovah biak khawhnak ruahchannak zong kan ngei lai. (Ptb. 10:22) Buaibainak kan ton tikah Jehovah nih amah a biami kha a bawmh hna ti kan hngalh caah lungdaihnak kan hmu. (Isa. 41:9, 10) “Sunparnak le upatnak le lianhngannak kha hmuh awkah aa tlakmi,” dawtnak a ngeimi kan Pa kan biak caah i lawmh awk a ruang tampi kan ngei.—Biat. 4:11.