1-2. Kwa ki pou fer Zeova aksepte nou ladorasyon?

 KI OU mazinen ler ou tann sa mo “ladorasyon”? Petet ou mazin en frer ki annan limilite pe azenou pour priy Zeova avan i al dormi ouswa ou mazin en fanmir ki pe pas en bon letan pe etidye Labib.

² Dan sa de sityasyon, sa bann dimoun pe fer bann keksoz pour ador Zeova. Eski Zeova pou aksepte zot ladorasyon? Zeova pou aksepte zot ladorasyon si i an armoni avek son plan e si zot annan lanmour ek respe pour li. Nou kontan Zeova en kantite. Nou konnen ki Zeova i merit ganny adore e nou anvi fer sa dan sa pli bon fason.

3. Ki nou pou vwar dan sa lartik?

³ Dan sa lartik, nou pou vwar sa kalite ladorasyon ki Zeova ti aksepte dan letan Labib e nou pou vwar wit keksoz ki nou bezwen fer pour ki Zeova i aksepte nou ladorasyon ozordi. Anmezir nou fer sa, nou kapab reflesir lo lafason ki nou kapab amelyor nou ladorasyon. Nou pou osi vwar akoz ler nou ador Zeova dan sa bon fason, sa i fer nou ere.

4. Ki mannyer bann ki ti ador Zeova avan Zezi ti vin lo later, ti demontre zot respe ek lanmour pour Zeova?

⁴ Bann zonm fidel ki ti viv avan Zezi parey Abel, Noe, Abraam ek Zob ti demontre respe ek lanmour pour  Zeova. Ki mannyer zot ti fer sa? Zot ti obei Bondye, annan lafwa dan li e zot ti ofer bann sakrifis pour li. Labib pa dir nou tou keksoz ki zot ti bezwen fer pour Zeova. Me i kler ki zot ti fer zot mye pour onor Zeova e Zeova ti aksepte zot ladorasyon. Pli tar, Zeova ti donn Lalwa Moiz avek bann desandans Abraam. Sa bann lalwa ti enkli bann lenstriksyon spesifik lo lafason ki Zeova ti ekspekte bann Izraelit i ador li.

5. Ki mannyer Zeova ti anvi bann disip Zezi i ador li?

⁵ Apre lanmor ek rezireksyon Zezi, Zeova ti nepli ekspekte ki dimoun i obei Lalwa Moiz. (Rom. 10:4) Bann Kretyen ti pou obei en nouvo lalwa, sa i “lalwa Kris.” (Gal. 6:2) Zot ti pou fer sa par swiv legzanp Zezi e obei son bann lansennyman olye mazin sa lalwa parker e swiv bann lenstriksyon lo kwa ki zot ti bezwen fer oubyen pa fer. Ozordi osi, bann Kretyen pe fer zot mye pour obei Kris pour ki zot fer plezir Zeova e “reganny lafors.”​—Mat. 11:29.

6. Ki mannyer sa lartik i kapab ed nou?

⁶ Anmezir ki nou vwar sak keksoz ki nou fer dan nou ladorasyon, demann ou lekor: ‘Ki progre mon’n fer? Eski mon kapab amelyor lafason ki mon ador Zeova?’ Ou devret santi ou zwaye konsernan bann progre ki ou’n fer. Me ou devret osi demann Zeova dan lapriyer pour ed ou vwar ki mannyer ou kapab amelyore.

7. Ki mannyer Zeova i vwar nou bann lapriyer senser?

⁷ Nou ador Zeova ler nou fer lapriyer avek li. Labib i konpar nou bann lapriyer avek lansan ki ti ganny byen prepare pour ganny ofer kot tabernak e pli tar kot tanp. (Ps. 141:2, NWT) Sa lansan ti anvoy en loder ki ti fer Bondye plezir. Pareyman, nou bann lapriyer senser i fer li “plezir” menm si nou servi bann mo ki senp. (Prov. 15:8, NWT; Det. 33:10) Nou annan bon rezon pour krwar ki Zeova i kontan pour ekout nou ler nou eksprim nou lanmour ek lapresyasyon pour li. I anvi ki nou dir li sa ki fer nou enkyet, sa ki nou anvi e sa ki nou pe espere pour lavenir. Avan ou koz avek Zeova dan lapriyer, reflesir byen lo sa ki ou pe al dir. Ler ou fer sa, i pou konmsi ou pe ofer sa pli bon “lansan” avek ou Papa ki dan lesyel.

8. Ki loportinite nou annan pour loue Bondye?

⁸ Nou ador Zeova ler nou loue li. (Ps. 34:1) Nou loue Zeova ler nou dir avek lezot ki nou kontan Zeova e nou admir son bann zoli kalite ek son bann travay. Nou pou annan en kantite bon keksoz pour dir lo Zeova si nou rekonesan anver li. Ler nou mazin lo tou sa bann bon keksoz ki Zeova in fer pour nou, nou pou annan en kantite rezon pour nou loue li. Sa travay predikasyon i donn nou en bon loportinite pour “loue Bondye” atraver sakrifis ki nou ofer “avek nou labous.” (Ebr. 13:15) Zis parey nou reflesir lo sa ki nou pe al dir avek Zeova dan lapriyer, nou osi bezwen reflesir byen lo sa ki nou pe dir bann dimoun ki nou anons sa bon nouvel avek. Nou anvi ki sa “sakrifis ki nou pe ofer Bondye avek nou labous” i nou meyer. I pour sa rezon ki ler nou anons sa bon nouvel avek lezot, nou fer li avek tou nou leker.

9. Ki bann byenfe ki pep Zeova i gannyen ler zot asiste bann renyon? Donn en legzanp lo ki mannyer bann renyon in ed ou.

 ⁹ Nou ador Zeova ler nou asiste renyon. Zeova ti dir bann Izraelit dan letan lontan: “Trwa fwa par lannen, tou ou bann zonm i devret al devan Zeova ou Bondye, dan sa landrwa ki i swazir.” (Det. 16:16, NWT) Zot ti bezwen kit zot lakour ek plantasyon e i ti napa personn pour vey sa bann keksoz. Me Zeova ti promet zot: “Personn pa pou esey pran ou later ler ou al devan Zeova ou Bondye.” (Egz. 34:24, NWT) Vi ki bann Izraelit ti annan konfyans dan Zeova, zot ti al bann lafet tou le lannen. Zot ti ganny bokou byenfe. Par egzanp, zot ti konpran pli byen lalwa Bondye, zot ti medit lo lafason ki i’n demontre son labonte anver zot e zot ti pas bann bon moman avek lezot dimoun ki kontan Zeova. (Det. 16:15) Nou osi nou ganny sa bann byenfe ler nou fer sa ki nou kapab pour asiste bann renyon. Mazinen ki mannyer Zeova i kontan ler nou donn bann komanter ki senp e ki’n ganny byen prepare.

10. Akoz i enportan pour sant kantik dan nou ladorasyon?

¹⁰ Nou ador Zeova ler nou sant kantik ansanm avek nou bann frer ek ser. (Ps. 28:7) Bann Izraelit ti vwar li enportan pour sant kantik dan zot ladorasyon. Lerwa David ti apwent 288 Levit pour sante kot tanp. (1 Kron. 25:1, 6-8) Ozordi, nou kapab montre ki nou kontan Bondye ler nou sant bann kantik pour loue li. I pa neseser ki nou bann bon santer pour fer sa. Annou vwar en legzanp. “Nou tou nou souvan fer fot” ler nou koze me sa pa anpes nou koze dan kongregasyon e dan predikasyon. (Zak 3:2) Pareyman, nou kapab sant kantik pour loue Zeova menm si nou krwar ki nou pa en bon santer.

11. Dapre Psonm 48:13, akoz i enportan pour en fanmir fer letan pour etidye Parol Bondye?

¹¹ Nou ador Zeova ler nou etidye Labib e ansenny nou zanfan konsernan li. Zour Saba, bann Izraelit pa ti travay me zot ti servi sa zour pour ranforsi zot lanmitye avek Zeova. (Egz. 31:16, 17) Bann ki ti fidel parmi zot ti ansenny zot zanfan konsernan Zeova ek lafason ki i’n demontre labonte anver zot. Ozordi osi, nou bezwen fer letan pour lir e etidye Parol Bondye. Sa i form parti nou ladorasyon pour Zeova e i ed nou pour vin pli pros avek li. (Ps. 73:28) Ler nou etidye ansanm konman en fanmir, nou kapab ed nou zanfan pour devlop en lanmitye pros avek nou Papa ki dan lesyel ki kontan nou.​—Lir Psonm 48:13, NWT.

12. Ki nou aprann avek lafason ki Zeova ti vwar sa travay pour fer meb pour tabernak?

¹² Nou ador Zeova ler nou konstri e mentenir nou bann landrwa ladorasyon. Labib i dir ki sa travay pour fer tabernak ek son bann meb ti en “travay sen.” (Egz. 36:1, 4, NWT) Ozordi osi, Zeova i vwar sa travay pour konstri bann Lasal Rwayonm ek lezot batiman konman en laspe dan nou servis pour li. Serten frer ek ser i pas en kantite letan dan sa bann aktivite. Nou apresye sa zefor ki zot fer pour siport sa travay Rwayonm. Me zot osi partisip dan sa travay predikasyon. I kapab ki serten parmi zot i anvi vin pionye. Ler sa bann frer ek ser ki travay dir i kalifye pour servi konman pionye, bann ansyen pa devret tarde pour apwent zot.  Sa pou montre ki bann ansyen pe siport sa travay konstriksyon. Ki swa nou annan leksperyans dan travay konstriksyon oubyen non, nou tou nou kapab ede pour gard sa bann batiman prop e dan en bon leta.

13. Ki mannyer nou devret vwar bann kontribisyon ki nou fer pour siport sa travay Rwayonm?

¹³ Nou ador Zeova ler nou fer bann kontribisyon pour siport sa travay Rwayonm. Zeova ti anvi ki bann Izraelit i anmenn en kado ler zot ti asiste bann lafet. (Det. 16:16, NWT) Zot ti sipoze anmenn en kado dapre sa ki zot ti kapab donnen. Dan sa fason, zot ti montre ki zot rekonesan pour tou sa ki Zeova ti pe fer pour zot. Ki mannyer nou kapab montre nou lanmour pour Zeova ek nou rekonesans pour tou sa ki Zeova pe fer pour nou? En fason i ler nou donn kontribisyon finansyel pour siport nou kongregasyon lokal ek sa travay mondyal. Nou fer sa dapre sa ki nou kapab donnen. Zapot Pol ti dir: “Si zot pare pour donnen, sa i byen devan Bondye akoz i ekspekte ki en dimoun i donn dapre sa ki i annan, pa dapre sa ki i napa.” (2 Kor. 8:4, 12) Zeova i vreman apresye sa ki nou kapab donnen menm si i pa bokou.​—Mark 12:42-44; 2 Kor. 9:7.

14. Dapre Proverb 19:17, ki mannyer Zeova i vwar sa led ki nou donn nou bann frer ek ser ki dan bezwen?

¹⁴ Nou ador Zeova ler nou ed bann frer ek ser ki dan bezwen. Zeova ti promet pour beni bann Izraelit ki ti demontre zenerozite anver bann pov. (Det. 15:7, 10) Sak fwa ki nou ed en frer oubyen en ser ki dan bezwen, Zeova i vwar sa konman en kado pour li. (Lir Proverb 19:17, NWT.) Par egzanp, ler bann Kretyen sorti dan lavil Filip ti anvoy en kado pour Pol, ki ti en prizonnyen, i ti dir ki sa ti en kado ki “akseptab e ki fer plezir Bondye.” (Fili. 4:18) Mazin bann frer ek ser dan ou kongregasyon e demann ou lekor: ‘Eski i annan en dimoun ki mon kapab ede?’ Zeova i kontan ler i vwar nou pe servi nou letan, lenerzi, abilite ek bann keksoz materyel pour ed bann ki dan bezwen. I vwar sa konman en parti nou ladorasyon.​—Zak 1:27.

15. I demann letan ek zefor pour vre ladorasyon me akoz i pa en fardo?

¹⁵ Vre ladorasyon i demann letan ek zefor. Me nou ladorasyon i pa en fardo. (1 Zan 5:3) Akoz? Parski nou ador Zeova akoz nou kontan li. Meton en zanfan i anvi donn son papa en kado. I kapab pas plizyer erdtan pour desin en desen pour li. Sa garson pour kontan pas sa kantite letan pour fer sa desen. I kontan son papa e i vreman anvi donn li sa kado. Pareyman, vi ki nou kontan Zeova, nou kontan pour fer zefor e servi nou letan pour ador Zeova.

16. Dapre Ebre 6:10, ki mannyer Zeova i vwar zefor ki nou fer pour fer li plezir?

¹⁶ Bann paran ki kontan zot zanfan, pa ekspekte ganny menm kalite kado avek sak zot zanfan. Zot konnen ki sak zanfan i diferan e ki zot pa kapab fer menm keksoz. Pareyman, nou Papa ki dan lesyel i konnen ki sakenn parmi i kapab fer. Petet ou kapab fer plis ki bokou dimoun ki ou konnen e kontan. Ouswa ou pa kapab fer parey lezot petet akoz ou laz, lasante oubyen ou responsabilite. Me pa dekouraze.  (Gal. 6:4) Zeova pa pou oubliy sa ki ou’n fer. I pou kontan si ou donn ou meyer avek en bon motivasyon. (Lir Ebre 6:10.) Zeova i menm vwar sa ki ou anvi fer. Zeova i anvi ki ou zwaye e satisfe avek sa ladorasyon ki ou kapab donn li.

17. (a) Ki nou kapab fer si nou vwar li difisil pour fer serten keksoz dan nou ladorasyon? (b) Kwa ki’n ed ou dan sa bwat “ Vre ladorasyon pou fer ou pli ere”?

¹⁷ Ki nou kapab fer si nou vwar li difisil pour fer serten keksoz dan nou ladorasyon parey pour fer letid personnel ouswa temwannyaz an piblik? I tre probab ki ler nou fer sa bann keksoz pli souvan, nou pou kontan pour fer zot e nou pou ganny bann byenfe. Nou kapab konpar nou ladorasyon avek ler nou fer legzersis ouswa ler nou aprann zwe en lenstriman lanmizik. Si nou pa fer sa aktivite souvan, nou pa pou fer bokou progre. Me ki pou arive si nou fer sa aktivite toulezour? Petet, nou pou fer pour en pti gin letan pour konmanse me apre nou fer li pour pli lontan. Ler nou vwar bann bon rezilta nou zefor, nou pou kontan pour fer li ankor e nou pou vwar li gou. Eski ou kapab vwar ki mannyer nou kapab aplik sa prensip dan nou ladorasyon?

18. Ki sa keksoz pli enportan ki nou kapab fer dan nou lavi e ki pou arive si nou fer sa?

¹⁸ Pour fer nou meyer pour ador Zeova, sa i keksoz pli enportan ki nou kapab fer dan nou lavi. Si nou fer sa, nou pou ere e annan en lavi ki fer sans. Nou pou osi annan sa lespwar pour ador Zeova pour touzour. (Prov. 10:22) Nou deza santi nou anpe parski nou konnen ki Zeova i ed son bann adorater ler zot fer fas avek bann problenm. (Iza. 41:9, 10) Nou annan bon rezon pour zwaye ler nou ador nou Papa ki kontan nou ki “merit laglwar, [ek] loner” sorti kot son kreasyon.​—Rev. 4:11.