1, 2. ¿Kʼãrẽta oibara Jeowaba dayirã bia akʉmarẽã?

 BɄMARA, ¿Jeowaba ẽbẽra abaʉta bia akʉmarẽãra kãgabʉbʉrʉ kʼãrẽta oibara? Krĩchara naʉ̃ta: Mebẽã abaʉta sãkokode kʉbepe Daizeze Jeowaʼa yiwidʼibʉ mawũã iyi sodebʉta jõma jaraita akʉza iyi sãwũã sentibʉta. Mawũã ẽ bʉrʉ krĩchara mebẽrãta yi mebẽrãbawara ãba jewedapanʉta Daizeze Bedʼea ʉ̃rʉ kʼawuadaita.

² Mawũẽra mebẽã sãkokode yiwidʼibadata akʉza mebẽrã iyi mebẽrãbawara badata, ãyi ũmenaʉ̃ba Jeowaba kãgabʉta opanasi. Naʉ̃ta mawũã opanʉbʉrʉ iyaba Jeowa kãga ũdubipanʉ, mamina Jeowabara bia akʉyi dayirãba iya kãgata akʉza wawia ũdubipanʉbʉrʉ. Dayirãbara kãgata ũdubikĩrãpanʉ Jeowaʼa iya nekʼãrẽ jõma parãsi baera. Maʉ̃ kʼarea dayirãbara nekʼãrẽ jõma biʼia okĩrãbʉ Jeowaba bia akʉmarẽã.

3. ¿Kʼãrẽta kʼawuadayi naʉ̃ artikulodera?

³ Naʉ̃ artikulode kʼawuadayi, nããbema ẽbẽrabara kʼãrẽta osidata Jeowaba bia akʉmarẽã akʉza kʼawuadayi nekʼãrẽ ocho idi dayirãba kʼãrẽta oseabʉta Jeowaba bia akʉmarẽã. Adewara kʼawuadayi Jeowaba dayirãta bia akʉbʉbʉrʉ kʼãrẽa sobiabaseabʉta.

4. ¿Nããbema ẽbẽrabara sãwũã kãgabʉta akʉza wawiabʉta ũdubisida Jeowaʼa?

⁴ Jesu zei nãã, nããbema ẽbẽrarãbara Abel, Noé, Abrahán, Jobʼba akʉza wuabema ẽbẽrarãba, ãyira kʼẽrẽpabʉ daucha kãgabʉta akʉza wawiabʉta ũdubisida Jeowara.  Mamina, ¿ãyara sãwũã kãgata akʉza wawiabʉta ũdubisida? Daizeze Bedʼeabara jara ẽ ãya jõma odara mamina jarabʉ ãya ũrĩsidata Jeowaba jarabʉta, ĩjã ũdubisidata akʉza Jeowaʼa sakripisio diasida. Ãyira nekʼãrẽ jõma biʼia osida baera Jeowaba bia akʉmarẽã, maʉ̃ kʼarea Jeowabara ãya odara jõma bia akʉsi, maʉ̃ tẽã Jeowabara jarasi kʼãrẽta oibarata iya bia akʉmarẽã Moisésʼa Ley diadadeba.

5. ¿Jesu beida tẽãra Daizeze pʉwʉrʉbara kʼãrẽta wua oda ẽ baibarabasi?

⁵ Mamina Moisés Leyra Jesu bei kʼãrãpe akʉza jẽda piradrʉda tẽã Daizeze pʉwʉrʉbara wua oda ẽ baibarabasi (Rom. 10:4). Awuarabʉrʉ kristianorabara ũrĩnaibarabasi ley yiwidita «Kristo leyta» (Gál. 6:2). Naʉ̃ leyba jarabʉ oira, ãyara burude kʼawuaita nesida ẽ basi nama eda jarabʉra. Awuarabʉrʉ odaibarabasi, Jesuba oda kĩrãkʼa adewara iya jaradiadata odaibarabasi. Idi ewadera kristianorabara nekʼãrẽ jõma opanʉ Jesude kĩrãkʼa odaita, mawũã Jeowaba bia akʉmarẽã akʉza aduʼa panaita (Mat. 11:29).

6. ¿Bʉra sãwũã kʼarebaseabʉ naʉ̃ artikulobara?

⁶ Naʉ̃ artikulo akʉ wãne bʉyikʉza widiseabʉ: «¿Mʉ̃ara kʼãrẽta ozebʉrʉ Jeowaba mʉ̃ta bia akʉmarẽã? ¿Mʉ̃ara audre bia oseabʉka Jeowaba mʉ̃ bia akʉmarẽã?» Bʉa nekʼãrẽ bia obʉmina Jeowaba bʉ bia akʉmarẽã, bʉa widiseabʉ Jeowaʼa bʉta kʼarebamarẽã audre bia oita.

7. ¿Sãwũã akʉbʉ Jeowabara dayirãba soiduba yiwidʼibʉra?

⁷ Jeowaba bia akʉbʉ yiwidʼipanʉne. Nããra tabernakulodera akʉza templodera insienso bapanasi mamina mawũã oi nããra nãã biʼia ara oibara basi baita. Daizeze Bedʼeabara jarabʉ yiwidʼibʉra templode insienso ba bari kĩrãkʼabʉta (Sal. 141:2). Naʉ̃ insiensora Daizezeitara tũãpoabasi. Abarika dayirã yiwidʼibʉrʉde soiduba opanʉne akʉza bedʼea kĩrãwãreã jara ẽ mina iyitara naʉ̃ isienso kĩrãkʼa tũãpobʉ maʉ̃ba iyira sobiabibʉ (Prov. 15:8; Deut. 33:10). Dayirãbara kʼawuapanʉ Jeowara sobiabʉta, dayirãba kãga ũdubibʉrʉde akʉza iyaʼa biga diabʉrʉde. Adewara Jeowabara kãgabʉ dayirãba jaradamarẽã kʼãrẽba krĩcha zroma obʉta, kʼãrẽba sobiabibʉta akʉza dayirãba kãgabʉta. Maʉ̃ kʼarea yibia dayirã yiwidʼi naweda biʼia krĩchaita kʼãrẽta jaraita. Mawũã odara dayirã yiwidʼira insienso tũãpoabʉ kĩrãkʼa bayi.

8. ¿Sãwũã ibia bedʼeaseapanʉ Jeowa ʉ̃rʉ?

⁸ Jeowaba bia akʉbʉ iyi ʉ̃rʉ ibia bedʼeabʉrʉde (Sal. 34:1). ¿Sãwũã oseapanʉ naʉ̃ra? Dayirã ibia bedʼeapanʉne iyi nebia ʉ̃rʉ akʉza iya nekʼãrẽ jõma parãna ʉ̃rʉ. Jeowaʼa biga diakĩrãpanʉ baera iyi ʉ̃rʉ ibia bedeapanʉ. Maʉ̃ kʼarea, dayirãba bia krĩchapanʉbʉrʉ iya nekʼãrẽ jõma odata dayirã kʼarea, iyaʼa biga diakĩrãnañi «Daizeze ʉ̃rʉ ibia bedʼeabibara». Dayirãba awuru ẽbẽrãra jaradiabʉrʉde Daizeze ʉ̃rʉ (Heb. 13:15). Maʉ̃ kʼarea abarika bia krĩchabʉ kĩrãkʼa Daizezeʼa yiwidʼi nãã, abarika bia krĩchadaibara kʼãrẽta jaraita awuru ẽbẽrarãma wãbʉrʉde Daizeze Bedʼea ʉ̃rʉ jaradiabʉrʉde. Kãgapanʉ Daizeze ʉ̃rʉ ibia bedʼeadamarẽã, maʉ̃ kʼarea awuru ẽbẽraʼa jaradiabʉdadera soiduba jaradiapanʉ.

9. ¿Kʼãrẽ nebiata ũdupanʉ ãba yi jʉrebarima wãbʉrʉdera? Akʉza ¿Bʉra sãwũã kʼarebasebʉrʉ?

 ⁹ Jeowaba bia akʉbʉ ãba yi jʉrebarima wãbʉrʉde. Moíses leyba jarabasi israelitaraʼa poaga abaʉde jʉ̃ẽma ũbea jʉ̃ẽibarabasita yumakẽrã, Jeowa nãã bʼaita iya jarabʉrʉmae (Deut. 16:16). Mawũã oira ãyara doba amaebarabasi ãyi drʉata, ãyi deta. Mamina Jeowabara jarasi mia kʼaiba ãyi drʉara jĩrẽ ẽ baita ãyi Jeowaba jaradama wãenara (Éx. 34:24). Israelitara mawũã wãpanʉnera nebiata mejãcha ũdupanasi. Daizeze Leyta audre bia kʼawuapanasi, krĩchapanasi Jeowaba ãyi kʼarea nekʼãrẽ bia ozebʉrʉta adewara wuabema ẽbẽrarã Daizeze ode opanʉbawara ãba panasi (Deut. 16:15). Idi dayirãbida nebiata mejãcha ũdupanʉ ãba yi jʉrebarima wãbʉrʉde akʉza Jeowata mejãcha sobiabibʉ juwa ʉ̃ta wãbʉrʉde dayi bedʼeaita adewara ãba yi jʉrebari wãi naweda estudiapanʉne bia panʉita akʉza kʉtʉa bedʼeaita.

10. ¿Kʼãrẽa yibia Jeowa trãnaita?

¹⁰ Jeowaba bia akʉbʉ dayirã mebẽrãbawara trãbʉrʉde (Sal. 28:7). Israelitaraitara trãnaira audre yibia basi. Maʉ̃ra Jeowabara bia akʉbasi. Bari jaraita, noko Davidʼbara zokʼabʉesi 288 lebitarata templode trãpanamarẽã (1 Crón. 25:1, 6-8). Idi ewadera dayirãbara Jeowa kãgabʉta ũdubipanʉ trãpanʉne. Kʼãrẽ ẽ dayirã sãwũã trãpanʉ bʉsida. Krĩchara naʉ̃ta, dayirã bedʼeabʉrʉdera edaʉde aña bedʼeabʉ, mamina naʉ̃ba jarakĩrãbʉ ẽ dayirãra wua bedʼea ẽ bʼaita ãba yi jʉrebʉrʉde akʉza Daizeze Bedʼea jaradia wãbʉrʉde (Sant. 3:2). Abarika dayirã trãbʉrʉde dayi nemiba bia trã ẽ mina naʉ̃ba jarakĩrãkʉ ẽ dayirãra wua trãna ẽ bʼaita Daizeze Jeowara.

11. Salmo 48:13de jarabʉdebara, ¿kʼãrẽa ewari jʉrʉibara dayirã mebẽrãbawara Daizeze Bedʼea kʼawuaita?

¹¹ Jeowaba bia akʉbʉ iyi bedʼea kʼawuabʉde akʉza dayirã wũãwũãraʼa jaradiabʉde iyi ʉ̃rʉ. Israelitarabara ewari za nekʼãrẽ badua obadara sabado za awuara opanasi audre Jeowa neũdukʼawua bʼaita (Éx. 31:16, 17). Maʉ̃ ewaridera israelitarabara ãyi wũãwũã jaradiapanasi Jeowa ʉ̃rʉ akʉza Jeowaba kʼãrẽ nebia odata. Idi ewadera dayirãsida ewari jʉrʉibara Daizeze Bedʼea leita iyi ʉ̃rʉ audre kʼawuaita, mawũã dayirãta bia akʉyi akʉza iyi kʼawa panañi (Sal. 73:28). Adewara dayirã mebẽrãbawara Daizeze Bedʼea estudiabʉde kʼarebaseapanʉ dayirã wũãwũãra Jeowa kʼawa bʼaita (akʉra Salmo 48:13).

12. ¿Jeowabara sãwũã akʉsi ẽbẽra tabernakulo pãrãnara akʉza naʉ̃ba kʼãrẽta jaradiabʉ dayirã?

¹² Jeowabara bia akʉbʉ Daizeze de bia akʉbʉrʉde akʉza parãbʉrʉde. Ẽbẽrarã tabernakulo parãita trajapanʉnara Jeowaita trajapanasi (Éx. 36:1, 4). Idi ewadera mebẽrã mejãchaʉta Daizeze de kʼareba parãpanʉ, maʉ̃ra Jeowaita trajapanʉ akʉza Jeowaba bia akʉbʉ. Ʉ̃kʉrʉ mebẽrãra zarea trajapanʉ, maʉ̃ de parãita. Maʉ̃ kʼarea dayirãbara biga diakĩrãpanʉ ãyaʼa mawũãsidu ãyira ewari jʉrʉpanʉ Daizeze bedʼea jaradia wãita. Adewara ʉ̃kʉrʉra yi nãã edebari 70 ora diabari bakĩrãpanʉ. Maʉ̃ kʼarea zõrãrã kongregasionebemaba kʼarebabʉrʉde mebẽã abaʉta yi nãã edebari bʼaita, naʉ̃ba udubibʉ ãya kʼarebabʉta Daizeze de parãita. Dayirãra Daizeze de  parãbeda ẽ mina kʼarebaseabʉ ãrĩ ẽ marẽã akʉza jaigʉa ẽ erbaita.

13. ¿Dayirãbara sãwũã Jeowa kãgabʉta akʉza iya biga diabʉta ũdubiseapanʉ?

¹³ Jeowabara bia akʉbʉ dayirãba soiduba diapanʉbʉrʉ platata Daizeze Nokʼodebema kʼarebaita. Israelitarãra Jeowaba jarabʉrʉma jʉ̃ẽbʉrʉdera, juwaba jʉ̃ẽ ẽ baibarabasi Jeowa nãã (Deut. 16:16). Mawũẽra israelitaraba ãya diaseabʉta diaibarabasi Jeowara. Mawũã ũdubidaibasi Jeowa biga diapanʉta ãyi bari nekʼãrẽ bia ozebʉrʉta. ¿Idi ewaridera dayirãbara sãwũã kãgabʉta akʉza biga diadayi Jeowaʼa iya nekʼãrẽ bia dia zebʉrʉ kʼarea? Naʉ̃ra dayirãbara ũdubiseabʉ kongregasione plata soiduba diabʉde akʉza dayirãba diaseabʉta kʼarebaita Daizeze Bedʼeata naʉ̃ drʉa jõmaʉ̃nẽ jaradiadamarẽã. Maʉ̃ krĩchara apostol Pabloba bia jara ũrĩbita naʉ̃ta bʉsi: «Ẽbẽra abaʉba soiduba diabʉbʉrʉ iya diabʉra yibia, diabʉ baera iya erbʉta mawũã dia ẽ iya erbʉ ẽãta» (2 Cor. 8:4, 12). Jeowaitara kʼãrẽ ẽ wĩka diabʉta iyitara audre yibia soiduba oita (Mar. 12:42-44; 2 Cor. 9:7).

14. Proverbios 19:17de jarabʉdebara, ¿sãwũã akʉbʉ Jeowabara dayirãba mebẽrã kʼareba nesidabʉ kʼarebabʉdera?

¹⁴ Jeowabara bia akʉbʉ dayirãba kʼarebabʉdade mebẽrã kʼareba nesidabʉta. Jeowabara jarasi israelitara yi nekʼãrẽ neẽ kede kʼarebabʉra nebia diaita (Deut. 15:7, 10). Mawũẽra dayirãba kʼarebabʉrʉde mebẽã abaʉta kʼareba nesidabʉta naʉ̃ra Jeowaitara iya nekʼãrẽ biata diabʉ kĩrãkʼabʉ (akʉra Proverbios 19:17). Bari jarita, mebẽrã Filiposdebemata nekʼãrẽ biata diabʉesida Pablo karselde baside, maʉ̃ kʼarea Pablobara jarasi maʉ̃ nebiara Jeowaba nekʼãrẽ biata diabʉrʉ kĩrãkʼa basita (Filip. 4:18). Maʉ̃ kʼarea dayirã mebẽrã kongregasionebemata krĩchada kʼãrãpe dayikʉza widibara: «¿Mʉ̃ kongregasionera mʉ̃ara kʼaita kʼarebaseabʉ?». Akʉza Jeowabara bia akʉbʉ dayirãba erbʉdeba kʼarebabʉde akʉza dayirã ewari diabʉde adewara zarea opanʉne yi kʼareba nesidabʉ kʼarebadaita. Mawũã opanʉbʉrʉ Jeowabara dayirãra bia akʉyi (Sant. 1:27).

15. ¿Kʼãrẽa zare ẽ Jeowaba zokʼabʉ oira?

¹⁵ Ewari jʉrʉibara akʉza zarea odaibara. Mamina mawũã oira zare ẽ (1 Juan 5:3). ¿Kʼãrẽa? iyita kãgapanʉ baera. Krĩchara naʉ̃ yizata, wũãwũãba yi zezeʼa dibujota diakĩrãbʉta, maʉ̃ dibujo oita iyita ewari bio berabariyi, mamina maʉ̃ kʼareara kĩrʉ ẽ akʉza idubʉ ẽ maʉ̃ dibujo onʉmʉta, mejãcha kãgabʉ baera yi zezeta akʉza kʼawuabʉ baera yi zezera mejãcha sobiaita maʉ̃ dibujo diabʉrʉdera. Abarika dayirãsida sobiabʉ ewari jʉrʉbʉ baera akʉza zarea opanʉ Jeowaba zokʼabʉ oita.

16. Hebreos 6:10de jarabʉrʉdera, ¿Jeowabara kʼãrẽta kĩrãdua ẽ bayi?

¹⁶ Yibarirabara jʉ̃ã ẽ yi wũãwũãraba iyabaʉ regalota diadamarẽã. Yibariraba kʼawuapanʉ baera yi wũãwũã aba abaka awuara panʉta akʉza awuara krĩchapanʉta. Abarika Daizeze Jeowaba kʼawuabʉ dayirã aba abaka awuara panʉta, ʉ̃kʉrʉba mejãcha diaseabʉ Jeowaʼa. Ʉ̃kʉrʉba eda diasebʉ. Maʉ̃ranebemara  kayabʉ baera, zõna basi baera, trajaibara baera mawũã ẽ bʉrʉ dayi mebẽrã akʉibara baera. Mamina maʉ̃ kʼãrẽa sopʉa senti ẽ baibara (Gál. 6:4). Jeowabara kĩrãdua ẽ bayi bʉa obʉra. Bʉa soiduba diabʉbʉrʉ bʉa nekʼãrẽ erbʉta iyira sobiabayi (akʉra Hebreos 6:10). Jeowabara akʉbʉ dayirã sode bʉta. Iyara kãga dayirãra sobia bamarẽã nekʼãrẽ diabʉrʉdera.

17. (1) ¿Kʼãrẽta oseabʉ zarebʉrʉ estudiaita akʉza Daizeze Bedʼea jaradiaita? (2) Rekuadro « ¿Sãwũã audre sobia bʼaita?» jarabʉmaebara, ¿bʉra sãwũã kʼarebasi?

¹⁷ ¿Kʼãrẽta oseapanʉ dayirãita zareabʉbʉrʉ dayi doba estudiaita semanaza akʉza jaradiaita Daizeze Bedʼeata? Audre estudiadaibara akʉza jaradia wãnaibara, mawũã odara sobiapanañi akʉza zare ẽ bayi. Bari jaraita, naʉ̃ra abarikabʉ dayirãba musika za kʼawuai kĩrãkʼa. Dayirãba badua zapanʉbʉrʉ audre bia zayi, daya jʉ̃drʉsidera mia kʼãrẽsida zabe ẽ basi, mamina mawũã zarebasimina ewariza zabʉba zare ẽ basi akʉza sobiabasi mawũã obʉ baera.

18. ¿Kʼãrẽta ũdudayi dayirãba soiduba opanʉbʉrʉ Jeowaba zokʼabʉta?

¹⁸ Dayirãba soiduba opanʉbʉrʉ Jeowaba zokʼabʉta sobiapanañi akʉza jʉ̃anañi nebia ʉ̃rabʉrʉ zeita, adewara ewari jõmaʉ̃nẽ panaita (Prov. 10:22). Kʼawũãena dayirãra aduʼa panʉ kʼawuapanʉ baera Jeowaba kʼarebabʉta dayirã bedʼea zroma erbʉde (Is. 41:9, 10). Dayirãba jʉrʉpanʉbʉrʉ Jeowaba bia akʉmarẽã sobiapanʉ. Jeowa ʉ̃rʉ abapai ibia bedʼeaibari baera akʉza iyabʉrʉ wawia ũdubidaibara baera (Apoc. 4:11).